မိူဝ်ႈၶၢဝ်းယၢမ်းပူၼ်ႉၵႂႃႇ သႅင်ႁွမ်ၵေႃႈ ၵိူတ်ႇဢွၵ်ႇမႃးလုၵ်ႈယိင်းဢွၼ်ႇလီႁၵ်ႉလီပႅင်း မႄႈၶဝ်ၼၼ်ႉတႄႉၵေႃႈ ၸူမ်းဢုမ်ႈၸူမ်းႁွပ်ႇႁၵ်ႉၼႃႇပေႇၸႂ်ယဝ်ႉဝႃႈ၊ ဢမ်ႇဝူၼ်ႉထိုင်မိူဝ်ႈမၼ်းလႃႇသႅင်ႁွမ် မိူဝ်ႈပႃးတွင်ႉၼၼ်ႉ သမ်ႉပေႃးဢမ်ႇတီႈၵိၼ်တီႈယူႇၵွၼ်ႇယဝ်ႉ။
သမ်ႉဝႃႈပဵၼ်မႄႈလဵင်ႉလုၵ်ႈၵေႃႉလဵဝ်ၼႆၵေႃႈ မၼ်းၵေႃႈသႂ်ႇၸႂ်တူၺ်းထိုင်ႁၵ်ႉႁွမ်သိမ်းပႅင်းလုၵ်ႈမၼ်းၼႃႇၼင်ႇၵဝ်ႇယဝ်ႉ၊ လုမ်းလႃးတူၺ်းထိုင်ၵေႃႉယႂ်ႇမႃးၵူႈမိုဝ်ႉၵူႈဝၼ်းယူႇယဝ်ႉ။ ဢေးၼုမ်ႇၼၼ်ႉၵေႃႈ ၵႆႉၵႆႉမိူဝ်းလႄႇၼႃႇ ၵမ်ႈၽွင်ႈယင်းထၢင်ႇဝႃႈ မၼ်းမိူဝ်းလႄႇဢၢႆႈၶိူဝ်းၼႆၵွၼ်ႇ၊ ၵမ်ႈၽွင်ႈၵေႃႈ ၵိူဝ်ႉမၼ်းၵိုၵ်းဢၢႆႈၶိူဝ်းသေ ဢၢႆႈၶိူဝ်းၼၼ်ႉတႄႉၵေႃႈ လၵ်ႉလွမ်လႆႈၸႂ်မၼ်းယူႇႁိုဝ် ဢမ်ႇထဵင်သေပွၵ်ႈပေႃးပိူၼ်ႈၵိူဝ်ႉသႂ်ႇ ယုမ်ႉယုမ်ႉသေတူၺ်းၼႃႈဢေးၼုမ်ႇၵႂႃႇၸိူင်ႉၼၼ်ၵူၺ်း။
ဢေးၼုမ်ႇၼၼ်ႉတႄႉ “ပေႃးထၢၼ်ႈဝႃႈလႄႇႁိူၼ်းလႂ် ၵဝ်ၶႂ်ႈလႆႈလုၵ်ႈၸၢႆးပိူၼ်ႈႁိူၼ်းၼၼ်ႉ ၵဝ်လႆႈၽူဝ်ပဵၼ်သိပ်းပဵၼ်လူဝ်ယဝ်ႉဝႃႈ ၵဝ်မိူဝ်းလႄႇဢေးသႅင်ၵေႃႈၵဝ်ၶႂ်ႈလႆႈၽူဝ်ဢေးသႅင်ယူဝ်ႉ၊ ၵဝ်မိူဝ်းလႄႇဢေးမူဝ်ၵေႃႈ ၵဝ်ၶႂ်ႈလႆႈၼွင်ႉဢေးမူဝ်ၵႃႈ၊ ၵဝ်မိူဝ်းလႄႇပႃႈၶွင်ႇၵေႃႈၵဝ်ၶႂ်ႈလႆႈလုၵ်ႈပႃႈၶွင်ႇၵႃႈ ႁိူၼ်းဢၼ်မီးလုၵ်ႈဢွၼ်ႇၼႂ်းဝၢၼ်ႈၼႆႉ ၵဝ်လႄႇပေႃးၸွတ်ႇၵူႈႁိူၼ်းယဝ်ႉ မိူဝ်ႈၵဝ်မိူဝ်းႁိူၼ်းသႅင်ႁွမ်ၼႆတႄႉ ဝႃႈၵဝ်မိူဝ်းလႄႇဢၢႆႈၶိူဝ်းယဝ်ႉ”
“မႂ်းတေပွင်ႉႁဵတ်းသင်တိၵ်းတိၵ်း ပွင်ႉၵေႃႈဢမ်ႇယဝ်ႉလႆႈလေႃႇ” ဢေးၼုမ်ႇမိူဝ်းပွင်ႉတေႃႇဢေးသႅင်သေ ဢေးသႅင်လၢတ်ႈတီႈမၼ်းၵႂႃႇ။
“လႃးလႃးဢမ်ႇၸၢင်ႈဢဝ်ၽႂ်ၼႆၵေႃႈ မႂ်းဢဝ်မၼ်းႁေဢမ်ႇလီႁိုဝ်လႃႇၼၼ်ႉ”
“မႂ်းၼႆႉၵေႃႈထႅင်ႈၵေႃႉယဝ်ႈ”
ပီယဝ်ႉပီပူၼ်ႉၵႂႃႇ လုၵ်ႈဢွၼ်ႇၵေႃႈၵေႃႉယႂ်ႇ ၵူၼ်းလူင်ၵေႃႈထဝ်ႈမႃး ဢေးၼုမ်ႇသၢဝ်လူင်ၼႂ်းဝၢၼ်ႈၼၼ်ႉၵေႃႈ ယင်းတိုၵ်ႉယူႇတူဝ်လွတ်ႈလႅဝ်းသေ ၵလၢတ်ႈၵူဝ်းလူဝ်းလႄႇပႃႈႁွင်ႇပႃႈၸၢၼ်းယူႇၸိူင်ႉၼၼ် ဢမ်ႇသူၼ်ၸႂ်ၽႂ်ၶႂ်ႈဝႃႈႁိုဝ်ဝႃႈယဝ်ႉ တေဝႃႈႁိုဝ်ၵေႃႈ ဢႃႇယုၶွပ်ႈထိုင်မႃး 30 ယဝ်ႉလႄႈ ၶႂ်ႈလႆႈၵေႃႈၸွင်ႇတေမီးၵူၼ်းဢဝ်ယဝ်ႉႁိုဝ်ဢမ်ႇႁူႉ။
ဢၢႆႈၶိူဝ်းၵေႃႈတေႇၼႃႈႁိူၼ်းၵႂႃႇပႅတ်ႈမိူဝ်ႈသၢမ်ပီႊပူၼ်ႉမႃးသေ မီးလုၵ်ႈဢွၼ်ႇၸၢႆးၵႂႃႇၵေႃႉၼိုင်ႈလႄႈမေးမၼ်းၼၼ်ႉၵေႃႈ သမ်ႉပေႃးပႃးတွင်ႉဝႆႉယူႇထႅင်ႈၵေႃႉၼိုင်ႈယဝ်ႉ။
ဢေးၼုမ်ႇၼၼ်ႉၵေႃႈ မိူဝ်ႈယင်းတိုၵ်ႉႁဵတ်းၵၢၼ်ယူႇၼၼ်ႉ တွင်ႉမၼ်းၸဵပ်းႁႅင်းၼႃႇသေယဝ်ႉလႄႈ ဢဝ်မၼ်းသမ်ႉပေႃးလိုမ်းတူဝ်ၵႂႃႇယူႇယဝ်ႉ။ ၵူၼ်းတီႈႁဵတ်းၵၢၼ်မၼ်းၼၼ်ႉၵေႃႈ ဢွၼ်ၵၼ်ဢဝ်ၵႂႃႇႁူင်းယႃသေ ပွႆႇမၼ်းၵႂႃႇဝႆႉတီႈၼၼ်ႈယူႇယဝ်ႉ။
တိုၼ်ႇမႃးယဝ်ႉၵေႃႈႁၼ်မေႃယႃဢွၼ်ႇမီးယူႇႁိမ်းမၼ်းလႄႈ
“တိုၼ်ႇယဝ်ႉၶႃႈႁႃႉ! ပဵၼ်ၸိူင်ႉႁိုဝ်ၶႃႈ”
“တွင်ႉၶႃႈၸဵပ်းၼႃႇႁေမဝ်းၼႃႇယဝ်ႉလႄႈၶႃႈထိင်းတူဝ်ဢမ်ႇလႆႈယဝ်ႉသေ လႆႈပွႆႇတူဝ်ၵႂႃႇဢေႃႈ”
“ၸဵပ်းတႃႇသေႇၶႃႈႁႃႉ ဢမ်ႇၼၼ်ၵေႃႈၸဵပ်းမႃးႁိုင်ယဝ်ႉၶႃႈ”
“ၵႆႉၸဵပ်းမိူဝ်ႈႁူဝ်လိူၼ်မႃးၶႃႈဢေႃႈ..”
“ဢေႃႈလီၾၢင်ႉၶႃႈဢေႃႈ ဢႃႇယုၵေႃႈယႂ်ႇယဝ်ႉ လီလႆႈၵူတ်ႇၸႅတ်ႈတူၺ်းဢေႃႈ ၵူဝ်မၼ်းၸၢင်ႈပဵၼ်သိတ်ႉၶႃႈၼႃ”
“ဢၼ်ဝႃႈမီးလုၵ်ႈယဝ်ႉၵေႃႈတေႁၢႆၼႆၼၼ်ႉၶႃႈႁႃႉ”
“မၼ်းတေၸွႆႈလႆႈၶႃႈဢေႃႈ”
ဢေးၼုမ်ႇၵေႃႈ တင်းဝူၼ်ႉတင်းၶမ်ၸႂ်သေ ယူႇၸိူင်ႉႁိုဝ်ၵေႃႈဢမ်ႇသိူဝ်းယဝ်ႉ လဵဝ်ႉႁူဝ်မၼ်းမိူဝ်းၵႂႃႇတၢင်းႁိူၼ်းဢေးသႅင်ၼၼ်ႉသေ ၼင်ႈထူၺ်ႈၸႂ်လူင်ယူႇၽိုဝ်ႈၽိုဝ်ႈ။
“မႂ်းပဵၼ်ႁင်လႃႇ!” ဢေးသႅင်ဢၼ်တိုၵ်ႉ လဵင်ႉၼူမ်းလုၵ်ႈမၼ်းၼၼ်ႉ ၼင်ႈသေလၢတ်ႈတေႃႇဢေးၼုမ်ႇယူႇ။
ဢေးၼုမ်ႇတူၺ်းဢေးသႅင်ၼၼ်ႉသေ “မႂ်းတေဢၢၼ်းဝႆႉလုၵ်ႈလၢႆၵေႃႉလႃႇၼႆႉ”
“ထႅင်ႈၵေႃႉၼႆႉၵေႃႈလႆႈယဝ်ႉ”
“သွင်ၵေႃႉ..ၸွင်ႇမၼ်းလဵင်ႉယၢပ်ႇၼင်ႇၵဝ်ႇၼႄႇ”
“လဵင်ႉၵႂႃႇႁဵတ်းၼႆ ၶဝ်ၵေႃႈၵေႃႉယႂ်ႇမႃးယူႇၵူၺ်းၵဝ်ႇ တေဝႃႈလဵင်ႉငၢႆႈၵေႃႈဢမ်ႇငၢႆႈ တေဝႃႈယၢပ်ႇၵေႃႈဢမ်ႇယၢပ်ႇၵွၼ်ႇ မႂ်းၵေႃႈႁၼ်ယူႇၼင်ႇၵဝ်ႇလူး မႃးယူႇၸွမ်းၵဝ်ၵူႈဝၼ်း”
“ပေႃးၵဝ်ၵိူတ်ႇလုၵ်ႈ မႂ်းလဵင်ႉပၼ်ၵဝ်လႆႈႁ”
ဢေးသႅင်ငွၵ်ႈတူၺ်းၼႃႈမၼ်းၼၼ်ႉသေ ဢမ်ႇထၢင်ႇတေလႆႈငိၼ်းၵႂၢမ်းၸိူင်ႉၼႆလႄႈ “ယူႇယူႇ ၶႂ်ႈမီးလုၵ်ႈမႃးယဝ်ႉၵႃႈ”
“မိူဝ်ႈၼႆႉတွင်ႉၸဵပ်းသေလႆႈၵႂႃႇႁူင်းယႃ မေႃယႃဝႃႈႁႃးတေၸၢင်ႈပဵၼ်သိတ်ႉလႆႈပေႃးဢမ်ႇမီးလုၵ်ႈၼႆဢိူဝ်ႈ”
“ၸိုင်ဝႃႈဢမ်ႇၵူဝ်!”
“တွင်ႉၸဵပ်းၼႆႉမၼ်းၶၢၼ်ၸႂ်ၼႃႇမႂ်းၵေႃႈ”
“ဢမ်ႇမီးၽူဝ်သမ်ႉတေမီးလုၵ်ႈတႄႉဢမ်ႇၸႂ်ႈလၢႆးမၼ်းယူဝ်ႉ”
ၼႃႈဢေးၼုမ်ႇၼၼ်ႉသမ်ႉပေႃးဢမ်ႇလီလူင်မႃးၵမ်းလဵဝ်ယူႇ။ ဢေးသႅင်ၵေႃႈယုမ်ႉယုမ်ႉသေ တူၺ်းၾူၼ်းမၼ်းသေ သူင်ႇၶေႃႈၵႂၢမ်းတွပ်ႇပိူၼ်ႈၼႂ်းၾူၼ်းၼၼ်ႉၵႂႃႇယူႇ။
“ဢိူဝ်ႈ..မိူဝ်ႈပိူၼ်ႈၶႂ်ႈလႆႈမႂ်းမႂ်းသမ်ႉဢမ်ႇၶႂ်ႈလႆႈပိူၼ်ႈ ဢၼ်ပိူၼ်ႈၶႂ်ႈလႆႈမႂ်းဝၼ်းၼၼ်ႉၵေႃႈ ပေႃးတေႇၼႃႈႁိူၼ်းပႅတ်ႈမူတ်းယဝ်ႉႁိုဝ်လႃႇၼၼ်ႉ ဢမ်ႇမီးၵူၼ်းၶႂ်ႈလႆႈမႂ်းယဝ်ႉယူဝ်ႉၵဝ်ဝႃႈ”
“ဢမ်ႇၶႂ်ႈလႆႈၵေႃႈယဝ်ႉလႃႈ ပေႃးၵဝ်ၶႂ်ႈလႆႈ..ၵဝ်ၵေႃႈတေဢဝ်ဢိူဝ်ႈ”
“မီးပေႃႈႁၢင်ႉၵေႃႉဢိူဝ်ႈ မၼ်းပဵၼ်ၵူၼ်းလီၼႃႇၵဝ်ႇ ၸွင်ႇမႂ်းသူၼ်ၸႂ်ႁိုဝ်”
“ပေႃႈႁၢင်ႉၵေႃႈယဝ်ႉလႃႈ..ဢဝ်မႃးလႄႈ”
ဢေးသႅင်ၵေႃႈဢဝ်တီႈၵပ်းသိုပ်ႇပၼ်မၼ်းၵႂႃႇယူႇ။ ဢေးၼုမ်ႇၼၼ်ႉၵေႃႈ တင်ႈၸႂ်သေဢုပ်ႇတေႉၼင်ႇဝႃႈ ဢုပ်ႇၵႂႃႇဢုပ်ႇမႃး ၵႂၢမ်းဢမ်ႇပေႃးၶဝ်ႈၵၼ်ႁိုဝ် မၼ်းၵေႃႈဢမ်ႇသူၼ်ၸႂ်သေ ႁၢႆလူင်ၵႂႃႇ ဢမ်ႇသင်ႇဢမ်ႇလၢတ်ႈဢၢႆႈပေႃႈႁၢင်ႉၼၼ်ႉသေ။
“ဢေးသႅင် ၵဝ်ဝႃႈၵဝ်တေႁႃထႅင်ႈတၢင်ႇလၢႆးဢဝ်လႃႈ”
“ပဵၼ်သင်ထႅင်ႈယဝ်ႉ”
“မၼ်းလီဢီးလူ..ပေႃးၵဝ်ဢဝ်မၼ်းသေ ပႅတ်ႈမၼ်းၵႂႃႇ မၼ်းတေဢမ်ႇၵႂႃႇယႃႉၸႂ်မၼ်းၼႃႇႁႃႉ”
“ပႆႇဢဝ်ပိူၼ်ႈသမ်ႉပေႃးဝူၼ်ႉတေပႅတ်ႈပိူၼ်ႈယဝ်ႉဢိူဝ်ႈၼေႃႈ မႂ်းၼႆႉဢမ်ႇမီးတၢင်းႁၵ်ႉၼိူဝ်ၵူၼ်းတေႃႇၵၼ်သေဢိတ်ႉၼိုင်ႈယဝ်ႉႁႃႉၵဝ်ဝႃႈ ၸႂ်ႁၵ်ႉဢၼ်ဝႃႈၼၼ်ႉဢႄႈ”
“ဢမ်ႇမီးယူဝ်ႉမႃႈ ၵဝ်ၵေႃႈပဵၼ်ၵူၼ်းသိုဝ်ႈသိုဝ်ႈၵူၺ်း ၵျိူၵ်ႈၵေႃႈၵျိူၵ်ႈ ဢမ်ႇၵျိူၵ်ႈၵေႃႈဢမ်ႇၵျိူၵ်ႈ ပေႃးမၼ်းဝႃႈဢမ်ႇၵျိူၵ်ႈ ၵဝ်ၵေႃႈဢမ်ႇၵျိူၵ်ႈ ပေႃးမၼ်းဝႃႈႁၵ်ႉ ပေႃးၵဝ်ဢမ်ႇႁၵ်ႉၵဝ်ၵေႃႈတေဝႃႈဢမ်ႇႁၵ်ႉ ၵဝ်ပဵၼ်ၸိူင်ႉၼႆမႃးတႃႇသေႇလႄႈ လၢတ်ႈသိုဝ်ႈတႃႇသေႇယူဝ်ႉလႂ်ဝႃႈ ဢမ်ႇမီးၽူဝ်လႆႈ”
“မိူၼ်ၸိူင်ႉၵူၼ်းၵေႃႉဢၼ်မႂ်းဢုပ်ႇသေ သေလၢႆၶိုၼ်းၸိူင်ႉၼၼ်ဢမ်ႇမီးၼႄႇ”
“ၸၢင်ႈတေသေလၢႆႁဵတ်းသင်လႃႇ ႁဝ်းမီးၸၢတ်ႈပၢၼ်ၵႂႃႇတၢင်းၼႃႈလႄႈ တေလႆႈထူပ်းလွင်ႈမႂ်ႇမႂ်ႇ ထူပ်းၵူၼ်းမႂ်ႇမႂ်ႇထႅင်ႈယူႇယဝ်ႉ ၵူၼ်းၵဝ်ႇ လွင်ႈၵဝ်ႇၵေႃႈ ဝႆႉၵိုတ်းပႃႈလင်ၵူၺ်းၼၼ်ႉၼႃႇ”
“ဢိူဝ်ႈၵဝ်ယုမ်ႇယဝ်ႉ မႂ်းမၼ်းဢမ်ႇမီးႁူဝ်ၸႂ်”
“ၵဝ်ၵေႃႈၶၢၼ်ႉမေႃးၸွမ်းမႂ်းယဝ်ႉဝႃႈ တေဝႃႈႁိုဝ်ၵေႃႈၵေႃႉယႂ်ႇပေႃးတေထဝ်ႈယဝ်ႉၵဝ်ႇလူး”
“မိူဝ်ႈၼႆႉမႂ်းပဵၼ်ႁင်လႃႇ ၸႂ်လီတေႃႇၵဝ်ၵျႃႉ ဢမ်ႇၶႂ်ႈႁႃၽူဝ်ပၼ်ၵဝ်ယဝ်ႉၵႃႈ”
“ဢမ်ႇမီးၵူၼ်းႁႃပၼ်မႂ်းထႅင်ႈယဝ်ႉ! ႁႃၵူၺ်းမႂ်းလႃႈ!! လႆႈဢမ်ႇလႆႈၵေႃႈယူႇတီႈမႂ်းၵူၺ်း ႁႃပၼ်ပေႃးမႂ်းဢမ်ႇၶႂ်ႈလႆႈၵေႃႈ မႂ်းၵေႃႈဢမ်ႇဢဝ်ၼင်ႇၵွၼ်ႇ”
ဢေးၼုမ်ႇၵေႃႈပႆမိူဝ်းၵႂႃႇတၢင်းႁိူၼ်းမၼ်းသေ ႁူပ်ႉၺႃးသႅင်ႁွမ်ၸွမ်းတၢင်း ၸုင်ဢဝ်မိုဝ်းတၢင်းလုၵ်ႈဢွၼ်ႇဢၼ်လႆႈၸမ်ၸမ်ႁႃႈၶူပ်ႇ တိုၵ်ႉၸင်ႇႁႃပွၵ်ႈႁူင်းႁဵၼ်းမႃးၼၼ်ႉလႄႈ မိူၼ်ႇၸုၵ်းသေတူၺ်းသွင်ၵေႃႉမႄႈလုၵ်ႈယူႇ။
“ပေႃးဝႃႈလဵင်ႉလီ သမ်ႉဝႃႈမီးပေႃႈမႄႈႁိုဝ် ဢမ်ႇမီး မၼ်းၵေႃႈတေၵေႃႉယႂ်ႇပဵၼ်ၵူၼ်းလီလႆႈယူႇၵူၺ်း၊ သမ်ႉဝႃႈႁဝ်းဢမ်ႇလႆႈၵေႃႉယႂ်ႇမႃးၸွမ်းဢူႈမႄႈၵေႃႈ တူင်ႇဝူင်းဢၼ်ႁဝ်းယူႇမၼ်းၵေႃႈဢမ်ႇလႆႈၸႂ်ႁၢႆႉၼႃႇၼင်ႇၵဝ်ႇ သင်ဢမ်ႇသင်ၵေႃႉယႂ်ႇမႃးလႆႈမိူၼ်ႁဝ်းၵေႃႈ ဢမ်ႇႁၢင်ႈႁၢႆႉၼင်ႇၵဝ်ႇ”
သိုပ်ႇလူထႅင်ႈတွၼ်ႈတေမႃးၶႃႈ
