ထိုင်ၼင်ႇမိူဝ်ႈႁိုဝ်းမႃး ယၢမ်းၵၢင်ၶမ်ႈလပ်းၸမ်သိင်ႇ သဵင်ၵူၼ်းဢူၼ်မေႃးပၼ်းယူႇၼႃႈႁိူၼ်းဢေးလိုၼ်းၶဝ်ၼၼ်ႉလႄႈ မီးၸဵမ်လုၵ်ႈဢွၼ်ႇၵူၼ်းလူင် ဢူၼ်ဢၢၼ်သုၵ်ႉသၵ်ႉယူႇႁင်းၽႂ်ႁင်းမၼ်း။ ဢေးၼုမ်ႇၵေႃႈ ပႆမိူဝ်းၵႂႃႇဢဝ်တင်းငိုၼ်းၵဵၼ်ၵဵၼ်သေ ႁွႆႈမတ်ႉသႂ်ႇပၼ်တီႈၶႅၼ်လုၵ်ႈဢေးလိုၼ်း ဢၼ်တိုၵ်ႉလႆႈၶူပ်ႇၼိုင်ႈ ၽွင်းလီႁၵ်ႉလီပႅင်းၼၼ်ႉ ၵႅမ်ႈဢုၺ်ႉတုၺ်ႉၼုၺ်ႉ ႁူၺ်ႇၼႃလမ်လိူမ်ႈ ၶူၼ်တႃယၢဝ်းယၢဝ်း မၼ်းၵေႃႈႁွပ်ႈဢုမ်ႈဢဝ်တီႈဢေးလိုၼ်းၵႂႃႇယဝ်ႉ ၵွတ်ႇၼူတ်ႈသႂ်ႇၸုပ်ႇသႂ်ႇ ၼင်ႇဝႃႈၶိုၼ်ႉၶၢၼ်ႉၼႃႇၼႃႇၼၼ်ႉယဝ်ႉ။
“လုၵ်ႈၵဝ်တေလႅဝ်မူတ်းယဝ်ႉ”
ၼႃႈယုမ်ႉယုမ်ႉၼင်ႇမီးတၢင်းသိူဝ်းၼႃႇၼၼ်ႉသေ ယၵ်ႉတူၺ်းလုၵ်ႈဢေးလိုၼ်းၼၼ်ႉ
“ဢမ်ႇလႅဝ်လေႃႇၼေႃႈ..” သဵင်လဵၵ်ႉဢွၼ်ႇမၼ်းလၢတ်ႈၸူး။
“ၵျိူၵ်ႈလုၵ်ႈဢွၼ်ႇပေႉတၢၼ်ႇၼၼ်ႉ ဢမ်ႇမီးႁေၵဝ်ဝႃႈ”
“မီးဢိူဝ်ႈပေႃးမီးလႆႈတႄႉၼႆ..” လၢတ်ႈတေႃႇလုၵ်ႈဢွၼ်ႇၼၼ်ႉယူႇ။
“ၼၼ်ႉၵဝ်ဝႃႈ..ပေႃးမၼ်းႁၼ်လုၵ်ႈဢွၼ်ႇၵေႃႈ ႁၢင်ႈၶႂ်ႈမီးလုၵ်ႈၼင်ႇၵဝ်ႇယဝ်ႉဝႃႈ” ဢေးသႅင်ႁွပ်ႇလုၵ်ႈမၼ်းမႃးၸူးတီႈၶႃယူႇၼၼ်ႉသေလၢတ်ႈတေႃႇဢေးလိုၼ်း။
“ၵဝ်လၢတ်ႈဝႃႈႁႂ်ႈႁၢင်ႈၶိူင်ႈႁၢင်ႈလီလီမႃးၼႆ..ၼႆႉသမ်ႉ ၼႃႈၵေႃႈဢမ်ႇတႃးသင်မႃး တေႃႉတႄႉဝီႁူဝ်ၵူၺ်းယူဝ်ႉၼႆႉ မိူဝ်ႈလႂ်မႂ်းတေႁႃၽူဝ်လႆႈလႃႇ”
“ၵဝ်ဝႃႈၼႃႈၵဝ်ၸိူင်ႉၼႆၵေႃႈႁၢင်ႈလီယူႇဢမ်ႇႁိုဝ်လႃႇ” ထူၺ်ႈၸႂ်လူင်သေ ဢေးၼုမ်ႇသိုပ်ႇလၢတ်ႈ “မိူဝ်ႈပၢင်ၶႅၵ်ႇဢေးသႅင်ၼၼ်ႉ တေပဵၼ်ယွၼ်ႉၵဝ်ႁၢင်ႈၶိူင်ႈၵႂႃႇယူဝ်ႉ ဢူၺ်းၵေႃႉမၢဝ်ႇမၼ်းမႃးၵျိူၵ်ႈၵဝ်ဝႃႇ ၸဵမ်ပၢၼ်လႂ်ပုၼ်ႉ ဢေးသႅင်ပေႃးမီးလုၵ်ႈယဝ်ႉ ယင်းတိုၵ်ႉယွၼ်းတီႈၵပ်းသိုပ်ႇၵဝ်ႁေ တိတ်းတေႃႇၵဝ်မႃးယူႇၼေႈ မိူဝ်ႈသွင်သၢမ်ဝၼ်းပူၼ်ႉမႃးၵူၺ်းယူဝ်ႉၼၼ်ႉ မၼ်းမႃးလၢတ်ႈတေႃႇၵဝ် ဢဝ်ၵဝ်ဢိမ်ႇပႅတ်ႈဢိူဝ်ႈ”
“ၵဝ်ပေႃးၶႂ်ႈဢီးလူၵူၼ်းၵေႃႉၼၼ်ႉယဝ်ႉ..ၵၢၼ်ႉပႂ်ႉပဵၼ်ၵႃႈႁိုဝ်တႃႇမႃးလၢတ်ႈတေႃႇမႂ်း!..ၵိုင်ႇတၢင်းဢမ်ႇမီးၵူၼ်းဢဝ်ယူႇယဝ်ႈ”
“ဢမ်ႇၸႂ်ႈဢမ်ႇမီးၵူၼ်းဢဝ်..ၵဝ်ဢမ်ႇၶႂ်ႈလႆႈၵူၺ်းဢိူဝ်ႈ”
“ယွၼ်ႉသင်လႄႈမႂ်းဢမ်ႇၶႂ်ႈဝႆႉၸူႉ ဢမ်ႇၶႂ်ႈလႆႈၽူဝ်ပေႉပဵၼ်တၢၼ်ႇၼၼ်ႉလႃႇ”
“ၵဝ်ဢမ်ႇယုမ်ႇၼိူဝ်တၢင်းႁၵ်ႉဝႃႈမၼ်းတေမီးတေႉ…”
ယွၼ်ႉပိူဝ်ႈပေႃႈမႄႈဢေးၼုမ်ႇၶဝ် ပႅတ်ႈၵၼ်ၵႂႃႇၸဵမ်မိူဝ်ႈယင်းလဵၵ်ႉလႄႈ ပေႃႈၵေႃႈတေႇၼႃႈႁိူၼ်းမႂ်ႇ မႄႈၵေႃႈတေႇၼႃႈႁိူၼ်းမႂ်ႇထႅင်ႈလႄႈ မီးၼွင်ႉၸွမ်းၵၼ်တင်းပေႃႈသိုပ်ႇမၼ်းၼၼ်ႉထႅင်ႈ မႄႈၵေႃႈ ဢမ်ႇပေႃးသူၼ်ၸႂ်မၼ်းသေ ပေႃးမၼ်းတုၵ်းၶႂ်ႈလႆႈသင် ၶႂ်ႈႁဵတ်းသင် တေလၢတ်ႈဝႃႈ “ၵႂႃႇယွၼ်းဢူႈမႂ်းလႄႈ!” “ၵႂႃႇၸူးဢူႈသူလႄႈ”။ ပေႃးမၼ်းၵႂႃႇၸူးဢူႈသမ်ႉ မႄႈသိုပ်ႇပွင်ႉပွင်ႉထႃႉထႃႉ ဢူႈၶဝ်ၵေႃႈဢမ်ႇၵျိူၵ်ႈမၼ်း။
ယၢမ်းၵၢင်ၶမ်ႈ ၽွင်းၶၢဝ်းပႆမိူဝ်းႁိူၼ်းယူႇႁင်းၵူၺ်းၼၼ်ႉ ၸင်ႇသမ်ႉလႆႈႁၼ်ဢွၼ်ႇယိင်း ဢႃႇယုမွၵ်ႈ 16 ၼႆႉ ၼင်ႈႁႆႈယူႇတီႈၶႅပ်ႇႁူဝ်ႉၼၼ်ႉလႄႈ ဢေးၼုမ်ႇၵေႃႈ ၵႂႃႇၸူးမၼ်းသေ
“ၼွင်ႉ! ၸွင်ႇပဵၼ်သင်ႁိုဝ်”
ယိင်းဢွၼ်ႇၼၼ်ႉၵေႃႈပၢၵ်ႈပႅတ်ႈမိုဝ်းမၼ်းသေ “ၵႂႃႇလႄႈၶႂ်ႈၵႂႃႇတၢင်းလႂ်ၵေႃႈ”
“သႅင်ႁွမ်!! ၼွင်ႉဢၢႆႈၶိူဝ်းဢမ်ႇၸႂ်ႈႁိုဝ်လႃႇ”
“ပီႈၼုမ်ႇ!..” သႅင်ႁွမ်ယၵ်ႉတူၺ်းဢေးၼုမ်ႇၼင်ႇတူၵ်းၸႂ်
“ဢမ်ႇမိူဝ်းႁိူၼ်းလႃႇ”
“ၶႃႈဢမ်ႇၶႂ်ႈယူႇတီႈႁိူၼ်းယဝ်ႉပီႈ”
ဢေးၼုမ်ႇၵေႃႈဢွၼ်မိူဝ်းတီႈႁိူၼ်းမၼ်းသေ ဢဝ်ၼမ်ႉမႃးတမ်းပၼ်ယဝ်ႉၵေႃႈ
“ၵိၼ်ၶဝ်ႈယဝ်ႉႁႃႉ!!”
သႅင်ႁွမ်ၶွၼ်းႁူဝ်မၼ်းၼႄ တီႈၼႂ်းႁိူၼ်းမၼ်းၼၼ်ႉၵေႃႈ မီးၶဝ်ႈသွႆးဢေႃႇတေႃႇယူႇလႄႈ “ၵိၼ်ၶဝ်ႈသွႆးဢေႃႇတေႃႇၼႄႇ”
သႅင်ႁွမ်ငွၵ်းႁူဝ်ၼႄ ဢေးၼုမ်ႇၵေႃႈဢၢင်ႈဢဝ်ၼမ်ႉမႆႈၼႂ်းထၢတ်ႈၽူး ၼမ်ႉမႆႈသမ်ႉဢမ်ႇမီး တေလႆႈတူမ်ႈၼႆသေ။
“ဢမ်ႇပဵၼ်သင်ၼႃႈ ဢမ်ႇၶႂ်ႈမိူဝ်းၵေႃႈ ၼွၼ်းႁဵတ်းၵေႃႉပီႈၵေႃႈလႆႈယူႇၵူၺ်း”
“တေႉႁႃႉပီႈ” ႁူၺ်ႇတႃလမ်လိူမ်ႈ သီၼႃႈဢၼ်ဢမ်ႇမီးတၢင်းမုင်ႈမွင်းသင်ၼၼ်ႉ ပိုတ်ႇၵီႈပၢင်ႇမႃး။
“တေႉဢိူဝ်ႈ..ၵူၺ်းၵႃႈ ဢၢပ်ႇၼမ်ႉသေၵွၼ်ႇလႄႈ” ၵႂႃႇဢဝ်သိူဝ်ႈၶူဝ်းမၼ်းမႃးပၼ်သႅင်ႁွမ်ယိမ်ၼုင်ႈၵႂႃႇယဝ်ႉ။
သႅင်ႁွမ်ၵႂႃႇဢၢပ်ႇၼမ်ႉမႃးယဝ်ႉၵေႃႈ ၶဝ်ႈသွႆးၼၼ်ႉၵေႃႈသုၵ်းလီငၢမ်းသေ ဢေးၼုမ်ႇဢဝ်မေႃႈမၼ်းမႃးတမ်းသႂ်ႇၼႂ်ၵၢင်ၶႃသေ ၵေႃႉဝၢၼ်ႇဝၢၼ်ႇ ၼင်ႈၵိၼ်ၵႂႃႇၸွမ်းၵၼ်။
“ဢမ်ႇၸႂ်ႈပီႈၵႂႃႇဢၢပ်ႇလိူၼ်မႃးႁႃႉ..”
“ၸႂ်ႈယဝ်ႉဝႃႈ..ၶဝ်လဵင်ႉလီယူႇ ၵူၺ်းၵႃႈၵိၼ်ဢမ်ႇလူင်းၶေႃး”
“ႁဵတ်းႁင်ၶႃႈလႃႇ”
“ဝူၼ်ႉၼမ်..”
“ဝူၼ်ႉလွင်ႈတေႇၼႃႈႁိူၼ်းၶႃႈႁႃႉ..ၵူၼ်းတင်းဝၢၼ်ႈပိူၼ်ႈဢွၼ်ၵၼ်ဝႃႈပီႈပဵၼ်သၢဝ်လူင်ဢမ်ႇၶႂ်ႈလႆႈၽူဝ်ၼႆလၢႆလၢႆယဝ်ႉဢေႃႈ”
“ဢိုမ်ႈ!..” ဢေးၼုမ်ႇဝၢင်းၸေႃႉမၼ်းသေ “တႃႇပိူၼ်ႈၵၢၼ်တေႇၼႃႈႁိူၼ်းၼၼ်ႉမၼ်းတေငၢႆႈယူႇၼႃ ၵူၺ်းၵႃႈ တႃႇပီႈတႄႉ ဢမ်ႇၸႂ်ႈလွင်ႈဢၼ်ဝူၼ်ႉဝႃႈတေႁဵတ်းလႆႈ ၼႃႈႁိူၼ်းဢၼ်ဢုၼ်ႇၸႂ်ၼၼ်ႉၸွင်ႇတေႁဵတ်းလႆႈယူႇႁႃႉ လုၵ်ႈဢွၼ်ႇဢၼ်ၵိူတ်ႇမႃးၼၼ်ႉ ၸွင်ႇတေပၼ်လွင်ႈဢုၼ်ႇၸႂ်ၶဝ်လႆႈယူႇႁိုဝ် တေႃႈၼင်ႇပီႈယင်းဢမ်ႇပွင်ႇၸႂ် ၵွပ်ႈသင်လႄႈပေႃႈတင်းမႄႈၵိူတ်ႇပီႈမႃးလႃႇ ယွၼ်ႉတၢင်းႁၵ်ႉႁႃႉ ၵွပ်ႈသင်လႄႈၶဝ်သမ်ႉပႅတ်ႈၵၼ် ၸွင်ႇၶဝ်ဝူၼ်ႉႁႃႉဝႃႈ ႁဝ်းတေပဵၼ်ၸိူင်ႉႁိုဝ် မီးပေႃႈမႄႈယူႇၵူၺ်းၵႃႈ ဢမ်ႇမီးတီႈဢုၼ်ႇၸႂ် ဢမ်ႇမီးတီႈပိုင်ႈ တွၼ်ႈတႃႇႁဝ်း မၢင်ပွၵ်ႈၵေႃႈ ယၢမ်ႈဝူၼ်ႉဝႃႈဢမ်ႇၶႂ်ႈၵိူတ်ႇပဵၼ်ၵူၼ်းမႃးလူးၵွၼ်ႇယဝ်ႈ”
ဢေးၼုမ်ႇသူတ်ႉၵိၼ်ၼမ်ႉၶဝ်ႈသွႆးၼႂ်းဝၢၼ်ႇၼၼ်ႉသေ “မိူဝ်ႈၵႆႈ ၼွင်ႉဝႃႈဢမ်ႇၶႂ်ႈယူႇႁိူၼ်းယဝ်ႉ တီႈႁိူၼ်းမီးပၼ်ႁႃသင်လႃႇ” ယၵ်ႉတူၺ်းၼႃႈသႅင်ႁွမ်သေယဝ်ႉ “ဢမ်ႇၶႂ်ႈလၢတ်ႈၵေႃႈဢမ်ႇပဵၼ်သင်ၼႃ”
“ၶႃႈတေႁဵတ်းႁိုဝ်လႃႇပီႈ..”
“ပဵၼ်သင်..”
“ဢိူဝ်ႈ…”
သိုပ်ႇလူတွၼ်ႈတေမႃးၶႃႈ
