တွၼ်ႈသီႇ
သမ်ႉပေႃးဢဝ်မူဝ်ၶၢဝ်ၼၼ်ႉမိုင်လူင်ၵႂႃႇတေႉယူႇယဝ်ႉ မၼ်းၵေႃႈထူၺ်ႈၸႂ်လူင်မႃးသေ
“သူလႆႈၸႂ်ႁဝ်းတၢၼ်ႇႁိုဝ် ႁၵ်ႉႁဝ်းတၢၼ်ႇႁိုဝ်ၵေႃႈ ႁဝ်းဢမ်ႇမီးဝၼ်းယူႇၸွမ်းသူလႆႈတေႃႇထဝ်ႈလေႃႇၼႃႈ၊ ဢမ်ႇၸႂ်ႈၵူၼ်းၵေႃႉဢၼ်ထိူၵ်ႈယူႇႁိမ်းၶၢင်ႈသူလႆႈတေႃႇၸူဝ်ႈ လွင်ႈလီလီဢၼ်သူမီးပၼ်ႁဝ်းၼၼ်ႉ ႁဝ်းတေၵဵပ်းတွင်းဝႆႉၼႂ်းဢူၵ်းႁူဝ်ၸႂ်ႁဝ်းတေႃႇတၢႆၵူၺ်း ယိၼ်းၸူမ်းသူတေႉယဝ်ႉ ၵူၺ်းၵႃႈႁဝ်းၵေႃႈ ဢမ်ႇၸႂ်ႈၵူၼ်းၸႂ်လီတေႃႇသူလႆႈ”
ၶိူဝ်းၾႃႉၵေႃႈဢမ်ႇလၢတ်ႈသင်ထႅင်ႈသေ ဢွၵ်ႇႁွင်ႈၵႂႃႇၼင်ႇဝႆးၽႆးယူႇယဝ်ႉ။ မူဝ်ၶၢဝ်ၼၼ်ႉၵေႃႈႁႅၼ်ၼႃႈၶိုၼ်ႈသေ ၼင်ႇဝႃႈၼၵ်းၸႂ်ၼႃႇပူၼ်ႉဢႃးလႃးယဝ်ႉလႄႈ ၼမ်ႉတႃဢၼ်မီးယူႇတီႈလၢႆႇတႃမၼ်းၼၼ်ႉၵေႃႈ လႆႈယွတ်ႇလႆဢွၵ်ႇမႃးယဝ်ႉ။
ယၢမ်းၼၼ်ႉ ၸင်ႇမီးသဵင်လင်ၼႂ်းၽူင်းမၼ်းမေႃးမႃး မၼ်းၸင်ႇပို တ်ႇၽူင်းမၼ်းတူၺ်း “မႂ်ႇသုင်ၶႃႈ ယိင်းမူဝ်ၶၢဝ် မီးလွင်ႈသင်ႁႂ်ႈၸွႆႈၶႃႈ” ၼၼ်ႉတႄႉပဵၼ်ၶေႃႈၵႂၢမ်း ဢၼ်တွပ်ႇမႃးလူၺ်ႈ ၶိူဝ်းၶူမ် ၽူႈပၼ်ႁႅင်းၸႂ်ၵူၼ်းၼႂ်းဢွၼ်ႇလၢႆးၼၼ်ႉယဝ်ႉ၊ သမ်ႉဝႃႈမီးၵူၼ်းပၼ်ႁႅင်းၼပ်ႉႁူဝ်သႅၼ်မၼ်းၵေႃႈ ဢမ်ႇမီးၽႂ်တွၼ်ႉႁၼ်ၼႃႈႁၼ်တႃမၼ်းသေပွၵ်ႈ ၵူၺ်းၵႃႈ ၸိုဝ်ႈမၼ်းတႄႉလိုဝ်းလင်ၼိူဝ်ဢွၼ်ႇလၢႆးဝႆႉတႄႉတႄႉယူႇ။
မူဝ်ၶၢဝ်ၵေႃႈ ၵွပ်ႈလွင်ႈၼိုၵ်းတၼ်ဢၼ်ဢမ်ႇႁၼ်တၢင်းဢွၵ်ႇၼၼ်ႉၵေႃႈပႃးလႄႈ ၸင်ႇလႆႈတူင်ႉတၵ်ႉၵႂႃႇတီႈ ၶိူဝ်းၶူမ်ယူႇယဝ်ႉ။ မိူဝ်ႈၶေႃႈၵႂၢမ်းၶဝ်ႈမႃးၸိူင်ႉၼၼ် မၼ်းၸင်ႇၸဵတ်ႉၼမ်ႉတႃမၼ်းဢွၵ်ႇသေယဝ်ႉ ၸင်ႇတွပ်ႇၵႂႃႇၶိုၼ်း
“သူလၢတ်ႈဝႃႈႁႂ်ႈၸႂ်ႉၸၢတ်ႈပၢၼ်မိူၼ်ဝၼ်းလိုၼ်းသုတ်း ၵူၺ်းၵႃႈ ၸၢတ်ႈပၢၼ်လိုၼ်းသုတ်းဢၼ်တေမႃးထိုင်ၼၼ်ႉ ယင်းဢမ်ႇမီးသင်တေႁဵတ်းလူး”
“ပဵၼ်သင်လႄႈလၢတ်ႈၸိူင်ႉၼၼ်ၶႃႈလႃႇ”
“ဢၼ်သူလၢတ်ႈၸိူင်ႉၼၼ်လႆႈၵေႃႈ ၵွပ်ႈသူဢမ်ႇပႆႇႁူႉဝႃႈသူတေတၢႆမိူဝ်ႈလႂ်ၼၼ်ႉၼႃႇ”
“ယွမ်းၼွမ်းယူႇၶႃႈ ဢၼ်လၢတ်ႈၵႂႃႇယဝ်ႉ ဢမ်ႇထုၵ်ႇမႅၼ်ႈၸွမ်းၼင်ႇၵၢင်ၸႂ်ၽူႈႁပ်ႉထွမ်ႇႁဝ်း ၵွပ်ႈတူဝ်ထူပ်းယင်းတိုၵ်ႉဢေႇ တၢင်းႁၼ်ယင်းပႆႇၵႂၢင်ႈ တီႈၽိတ်းၵေႃႈတေမီးယူႇလႄႈ ပေႃးထွမ်ႇယဝ်ႉ ဢမ်ႇမႅၼ်ႈၸႂ်ၵေႃႈ ဢမ်ႇသိုပ်ႇပၼ်ႁႅင်းထႅင်ႈၵေႃႈ ဢမ်ႇပဵၼ်သင်ၶႃႈ”
မူဝ်ၶၢဝ်ၵေႃႈ မိူၼ်တေမီးသတိမႃးၶိုၼ်းသေ ၸင်ႇလၢတ်ႈၵႂႃႇၶိုၼ်း
“ယွမ်းၼွမ်း ယွမ်းၼွမ်းတေႉဢေႃႈ”
“ဢမ်ႇၸႂ်ႈလွင်ႈတေမႃးယွမ်းၼွမ်းၶႃႈလူး ပဵၼ်လွင်ႈလီ ဢၼ်ႁဝ်းလႆႈထူပ်းပၢႆးဝူၼ်ႉပႅၵ်ႇပိူင်ႈထႅင်ႈမဵဝ်းၼိုင်ႈၶႃႈဢေႃႈ ယိၼ်းၸူမ်းတႄႉယဝ်ႉ ဢၼ်ပၼ်တၢင်းႁၼ်ထိုင်မႃးၸိူင်ႉၼႆ ပဵၼ်သင်လႄႈဝူၼ်ႉၸိူင်ႉၼၼ်ၶႃႈလႃႇ”
“မိူဝ်ႈႁူႉဝႃႈၸဝ်ႈၵဝ်ႇ တေမီးၶၢဝ်းယၢမ်းယူႇလႆႈဢမ်ႇႁိုင်ယဝ်ႉ မၼ်းႁဵတ်းႁႂ်ႈႁဝ်း ဢမ်ႇႁူႉဝႃႈတေသိုပ်ႇႁဵတ်းသင်ၵႂႃႇထႅင်ႈ၊ တေႁဵတ်းၵွပ်ႈသင်လႃႇ မိူဝ်ႈႁဝ်းပေႃးတေၵႂႃႇပႅတ်ႈမၼ်းယူႇယဝ်ႉ၊ ႁဵတ်းတွၼ်ႈတႃႇသင်လႃႇ ႁဝ်းပေႃးတေဢမ်ႇမီးယဝ်ႉ၊ ၶၢဝ်းယၢမ်းဢၼ်မီးယူႇၼႆႉ ႁဝ်းယင်းတိုၵ်ႉတေႁဵတ်း ဢၼ်ႁဝ်းဢမ်ႇႁူႉဝႃႈတေႁဵတ်းၵွပ်ႈသင်ၼၼ်ႉယူႇႁႃႉ၊ ပေႃးဢမ်ႇႁဵတ်းယဝ်ႉ ႁဝ်းသမ်ႉတေႁဵတ်းသင်လႃႇယၢမ်းၼႆႉ၊ မီးလွင်ႈဢၼ်ႁဝ်းၶႂ်ႈႁဵတ်းယူႇႁႃႉ၊ ဢၼ်ဝူၼ်ႉဝႃႈၶႂ်ႈႁဵတ်းၼၼ်ႉၵေႃႈ တေတႄႇႁဵတ်းမိူဝ်ႈလဵဝ်ၼႆႉၵႂႃႇ သမ်ႉပေႃးတူၵ်းလိုၼ်းယဝ်ႉလူး မၼ်းသမ်ႉတေပွင်ႇလွင်ႈသင်၊ ၸၢတ်ႈပၢၼ်ဢၼ်တေသုတ်းသဵင်ႈၼၼ်ႉ တေမီးတီႈပွင်ႇသင်ယဝ်ႉလႃႇ၊ ယူႇၵေႃႈမိူၼ်တၢႆ တၢႆၵေႃႈဢမ်ႇလႆႈ မၼ်းဢမ်ႇလီၸႂ်လမ်ၼႃႇႁႃႉ”
“ႁဝ်းဢမ်ႇႁူႉလႆႈဝႃႈ လွင်ႈဢၼ်သူထူပ်းၼၼ်ႉမၼ်းပဵၼ်ၸိူင်ႉႁိုဝ် ၵူၺ်းၵႃႈ ပဵၼ်သင်လႄႈဝူၼ်ႉဝႃႈ မၼ်းတူၵ်းလိုၼ်းယဝ်ႉၶႃႈလႃႇ၊ ၶၢဝ်းယၢမ်းဢၼ်သူယင်းတိုၵ်ႉမီးလူမ်းထူၺ်ႈၸႂ်ယူႇၼႆႉ ပဵၼ်ၶၢဝ်းယၢမ်းဢၼ်လီၼႃႇယဝ်ႉလႄႈ ပဵၼ်ဢၼ်ၵၢမ်ႇလီၼႃႇယဝ်ႉဢမ်ႇၸႂ်ႈၶႃႈႁိုဝ် မိူဝ်ႈႁဝ်းယင်းတိုၵ်ႉႁဵတ်းလႆႈယူႇၼၼ်ႉ ဢမ်ႇဝႃႈတေပဵၼ်လွင်ႈသင် ဢၼ်ႁဝ်းၶႂ်ႈႁဵတ်းၼၼ်ႉ ႁဵတ်းၶႃႈလႄႈ ဢမ်ႇၸႂ်ႈဝႃႈတေလႆႈပဵၼ်လွင်ႈယႂ်ႇယႂ်ႇၶႃႈလူး လွင်ႈလဵၵ်ႉလဵၵ်ႉဢွၼ်ႇၵူၺ်းၵႃႈလႆႈယဝ်ႉ၊ ႁဵတ်းဢၼ်ႁဝ်းႁဵတ်းလႆႈၼၼ်ႉၵူၺ်းၶႃႈဢေႃႈ သင်ၵုမ်ႇဝူၼ်ႉၸွမ်းၶၢဝ်းယၢမ်း ဢၼ်တေမႃးထိုင်ၼၼ်ႉယူႇတိၵ်းတိၵ်းၵူၺ်းတႄႉ ၼၼ်ႉယဝ်ႉ မၼ်းတေတူၵ်းလိုၼ်း လူၺ်ႈဢမ်ႇလႆႈႁဵတ်းသင်ၵွၼ်ႇဢေႃႈ ၶၢဝ်းယၢမ်းသူၼၼ်ႉ မၼ်းမီးၵႃႈၶၼ်လိူဝ်သေၵူၼ်းတၢင်ႇၵေႃႉၶႃႈယဝ်ႉ ၶၢဝ်းယၢမ်းဢၼ်တိုၵ်ႉၵိုတ်းယူႇၼၼ်ႉ ယႃႇပေပၼ်ႁႂ်ႈမၼ်းပႅတ်ႈလၢႆၶႃႈၼႃႈ”
“ႁဝ်းသမ်ႉတေလႆႈႁဵတ်းၸိူင်ႉႁိုဝ်ၶႃႈလႃႇ”
“ဢေႃႈၶႃႈ ပေႃးၼၼ်ႁဝ်းမႃးတႄႇၵႂႃႇၸွမ်းၵၼ်ၶႃႈၼႃ မိူဝ်ႈလဵဝ်ႁဵတ်းသင်ဝႆႉယူႇၶႃႈ”
“တိုၵ်ႉၼွၼ်းယူႇၶႃႈ”
“သူသမ်ႉၶႂ်ႈၼွၼ်းယူႇၶႃႈႁႃႉ ပေႃးဢမ်ႇၶႂ်ႈၼွၼ်းၵေႃႈလုၵ်ႉသုၵ်ႈၼႃႈသေ တွင်ႉမႆႈၶဝ်ႈၵေႃႈၵိၼ်ၶဝ်ႈ ၶႂ်ႈၵိၼ်သင်ၵေႃႈၵိၼ်ၶႃႈလႄႈ တၢင်းၵိၼ်ဢၼ်ၸဝ်ႈၵဝ်ႇလႆႈၸႂ်ၼၼ်ႉ တေမီးၶၢဝ်းယၢမ်းလႆႈၵိၼ်မၼ်းထႅင်ႈလၢႆဝၼ်းၵူၺ်းယဝ်ႉ ဝူၼ်ႉတူၺ်းၶႃႈလႄႈ ဢမ်ႇလီသေလၢႆၶႃႈႁႃႉ”
မူဝ်ၶၢဝ်ၵေႃႈ မိူၼ်တေဝူၼ်ႉလႆႈမႃးယဝ်ႉလႄႈ လုၵ်ႉဢွၵ်ႇမႃးတူပ်ႉၽႃႈသေ ဢွၵ်ႇႁိူၼ်းၵႂႃႇ ႁဵတ်းၵႂႃႇၸွမ်းၼင်ႇ ၶိူဝ်းၶူမ်လၢတ်ႈၼႄၼၼ်ႉ ယူႇယဝ်ႉ။ ဝၼ်းယဝ်ႉဝၼ်း မၼ်းလႆႈႁဵတ်းလွင်ႈဢၼ်မၼ်းၶႂ်ႈႁဵတ်း လွင်ႈဢၼ်မၼ်းၶႂ်ႈပဵၼ်လႄႈ ၵူႈလွင်ႈဢၼ်မၼ်းလႆႈႁဵတ်းမႃးၸိူဝ်းၼၼ်ႉၵေႃႈ တေဢုပ်ႇၼႄၶိူဝ်းၶူမ်လႄႈ သွင်ၶႃၵေႃႈ လႆႈဝႃႈပဵၼ်ဢၼ်ၸမ်ၸႂ်ၵၼ်မႃးတႄႉတႄႉယဝ်ႉ။
ၶိူဝ်းၾႃႉၼၼ်ႉၵေႃႈ သမ်ႉဝႃႈဢမ်ႇၶဝ်ႈထိုင်ၼႂ်းႁိူၼ်းလႆႈသေတႃႉ ၵႆႉၵႆႉမႃးလွမ်ငွၵ်ႈတူၺ်း ႁိူၼ်းမူဝ်ၶၢဝ်ယူႇတႃႇသေႇ။ မၼ်းႁဵတ်းသင်ယူႇလႃႇ မၼ်းၵႂႃႇလႂ်လႃႇ ပႂ်ႉတူၺ်းၸွမ်းၼင်ႇမႆႈၸႂ်မႆႈၶေႃးယူႇယဝ်ႉ။
တွၼ်ႈသီႇသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈႁႃႈၶႃႈ။
