မိူဝ်ႈၸမ်ထိုင် ပွႆးဝၼ်းၸိူဝ်ႉၸၢတ်ႈ ၽွင်းၶိူဝ်းမိူင်းၶဝ်ၵႂႃႇႁၢင်ႈၶိူင်ႈ ၶဵင်ႇပၢင်မူၼ်ႈသိူဝ်းယူႇတီႈ ပၢင်ႇမၢႆ-2 ပၢင်ႁူမ်ႈၸဝ်ႈသိူဝ်ၶၼ်ႇၾႃႉ ဢၼ်မီးပႃး ၵူၼ်းသိုၵ်းၶဝ်ၽွၼ်ႉၵၢၼ်ယူႇၼၼ်ႉ ၸင်ႇသမ်ႉမီးၵူၼ်းလႅပ်ႈယၢမ်ႈႁၼ်ဝႆႉ ပႆမႃးၸူးၶဝ်သေ ၶိူဝ်းမိူင်းၼၼ်ႉတႄႉ ၼႃႈပေႃးယုမ်ႉမႃးၵမ်းလဵဝ်ယဝ်ႉ ဢမ်ႇထၢင်ႇဝႃႈတေလႆႈႁၼ်ႁွမ်လႅင်းတီႈၼၼ်ႈ။
ဝၢႆးသေၵႂႃႇၽိုၵ်းၵၢၼ်ယဝ်ႉ တိုၵ်ႉၸင်ႇႁႃလႆႈႁၼ်ႁွမ်လႅင်းၶိုၼ်းထႅင်ႈၵူၺ်းလႄႈ ၼႂ်းၸႂ်တႄႉၶႂ်ႈလႅၼ်ႈၵႂႃႇႁႃယဝ်ႉ ၵူၺ်းၵႃႈ ဢဝ်တင်းသၢႆတႃလႄႈတၢင်းယုမ်ႉတုမ်ႉၸူးၵႂႃႇတီႈၵႆၵႆၵူၺ်း။
ႁွမ်လႅင်းဢၼ်ၵႂႃႇၽိုၵ်းၵၢၼ်တီႈ သိုဝ်ႇၶၢဝ်ႇ တႆးလွတ်ႈလႅဝ်း ၼၼ်ႉ လႆႈမႃးၸၢမ်းၽိုၵ်းႁဵတ်းၵၢၼ်တူၺ်းတီႈပၢင်ပွႆး ၼႆယဝ်ႉ။ ပုၼ်ႈၽွၼ်းမၼ်းတႄႉ ပဵၼ်ၽူႈဢၢၼ်ႇၶၢဝ်ႇလႄႈ မႃးၸွမ်းၵၼ်တင်းၵူၼ်းထႆႇႁၢင်ႈၵေႃႉၼိုင်ႈ။
ၶဝ်ၵေႃႈၵႂႃႇတမ်းၵွင်ႈထႆႇ ၽၢႆႇၶၢင်ႈတီႈမီးၵူၼ်းသိုၵ်းၶဝ်ၽွၼ်ႉၵၢၼ်ယူႇၼၼ်ႉယဝ်ႉ ႁွမ်လႅင်းၼၼ်ႉၵေႃႈ ပႃးတင်းမႅၵ်ႉဢၼ်ၼိုင်ႈလႄႈ ၸေႈဢွၼ်ႇပွတ်းၼိုင်ႈ လၢတ်ႈတေႃႇၼႃႈၵွင်ႈထႆႇ ၵဵဝ်ႇလူၺ်ႈလွင်ႈပဵၼ်မႃးပွႆးဝၼ်းၸိူဝ်ႉၸၢတ်ႈၼၼ်ႉယူႇ။
ၶိူဝ်းမိူင်း မိူၼ်ႇၸုၵ်းၸိူဝ်ႈတူၺ်းႁွမ်လႅင်းလႄႈ ၵူၼ်းယိပ်းၵွင်ႈထႆႇၵေႃႉၼၼ်ႉသေ ၼႂ်းပၢင်ပွႆးၵူၼ်းၶိုၼ်ႈႁွတ်ႈၼမ် ၵူၼ်းသိုၵ်းၸုၵ်းၸႅၼ်ႇ ႁွမ်လႅင်းၸုၵ်းဢၢၼ်ႇၶၢဝ်ႇယူႇလႄႈ ၶိူဝ်းမိူင်းပဵၼ်ၵူၼ်းယိပ်းၵွင်ႈထႆႇ ႁဵတ်းၵၢၼ်ၵႂႃႇၸွမ်းၵၼ်ယူႇၼၼ်ႉ ဢဝ်မၼ်းသမ်ႉပေႃးဢမ်ႇတၼ်းႁူႉဝႃႈ ႁွမ်လႅင်းၶဝ်တၼ်းႁၢႆၵႂႃႇလႂ်ပႅတ်ႈယဝ်ႉ။
ဝၼ်းမိူဝ်ႈၼႆႉတႄႉ တွၼ်ႈတႃႇၶိူဝ်းမိူင်းၼၼ်ႉ ပဵၼ်ဝၼ်းဢၼ်မၼ်းမီးယိူင်းဢၢၼ်း လႄႈ လွင်ႈဢၼ်ၶႂ်ႈႁဵတ်းၶႂ်ႈပဵၼ်မႃးယဝ်ႉ။
ၶၢဝ်းတၢင်းၵၢၼ်ႁဵၼ်းသုတ်းသဵင်ႈ ႁွမ်လႅင်းၶဝ် ဢၼ်ၵႂႃႇၽိုၵ်းၵၢၼ်သေ ပွၵ်ႈမႃးၶိုၼ်းၼၼ်ႉၵေႃႈ လႆႈမႃးလၢတ်ႈၼႄၶိုၼ်း တီႈ ၶူးသွၼ် လႄႈ လုၵ်ႈႁဵၼ်းၶဝ်ၶိုၼ်းယဝ်ႉ ၵၢၼ်ႁဵၼ်းၶဝ်ၵေႃႈသုတ်းယဝ်ႉၵႂႃႇ တေလႆႈသိုပ်ႇယၢင်ႈၵႂႃႇထႅင်ႈၶၵ်ႉတွၼ်ႈၼိုင်ႈဢၼ်ဝႃႈ ႁဵတ်းၵၢၼ်ႁိုဝ် တေသိုပ်ႇၶိုၼ်ႈႁဵၼ်းၸၼ်ႉၸွမ်ထႅင်ႈၼႆၼၼ်ႉယဝ်ႉ။
ႁွမ်လႅင်းၼၼ်ႉတႄႉၵေႃႈ ၸွမ်းဝႃႇသၼႃႇတၢင်းသူင်မၼ်းၼၼ်ႉ လႆႈၵႂႃႇႁဵတ်းၵၢၼ်ၸွမ်း ၸုမ်းသိုဝ်ႇၶၢဝ်ႇ တႆးလွတ်ႈလႅဝ်း ၵႂႃႇယဝ်ႉ။
ၶိူဝ်းမိူင်းၼၼ်ႉၵေႃႈ တႄႇတီႈဢမ်ႇယၢမ်ႈသူၼ်ၸႂ်လွင်ႈၶၢဝ်ႇလွင်ႈငၢဝ်းသင်ၼၼ်ႉ သမ်ႉပေႃးႁူႉၸၵ်းသိုဝ်ႇၶၢဝ်ႇၼၼ်ႉမႃးသေ ဢဝ်ပဵၼ်ၽူႈပၼ်ႁႅင်းတဵမ်တူဝ်ယဝ်ႉ ယွၼ်ႉမီးၼႃႈယုမ်ႉဢွၼ်ႇ ႁွမ်လႅင်း သဵင်ဝၢၼ်ဝၢၼ်ႁွမ်လႅင်း ၵႆႉၵႆႉ ဢုပ်ႇလၢတ်ႈဢၢၼ်ႇၶၢဝ်ႇၼႄယူႇၼၼ်ႉယဝ်ႉ။
တၢင်းႁၵ်ႉၼႂ်းၸႂ်ၶိူဝ်းမိူင်း ဢၼ်သိုဝ်ႇဢွၵ်ႇလူၺ်ႈသၢႆတႃ ဢမ်ႇၵပ်းသိုပ်ႇ၊ ဢမ်ႇလၢတ်ႈတေႃႇၼၼ်ႉၵေႃႈ ဢမ်ႇႁဵတ်းႁႂ်ႈမၼ်းၸၢင်ၵႂႃႇလႆႈ ယိုင်ႈၶႅၼ်းပဵၼ်ႁႅင်းၸႂ် ႁႂ်ႈသိုပ်ႇၶတ်းၸႂ်ၵႂႃႇထႅင်ႈၵူၺ်း ဢၢၼ်းႁဵၼ်းႁႂ်ႈမၼ်းပေႃးသုတ်းသေ တေၵႂႃႇႁူမ်ႈႁဵတ်းၵၢၼ်ၸွမ်း ႁွမ်လႅင်း တီႈသိုဝ်ႇၶၢဝ်ႇတႆးလွတ်ႈလႅဝ်းၶဝ်ၼႆယဝ်ႉ။
သမ်ႉဝႃႈဢမ်ႇႁၼ်တူဝ်ၵေႃႈ လႆႈႁၼ်ယူႇၼႂ်းၾူၼ်းၸိူင်ႉၼၼ် ပဵၼ်ဢၼ်ၸႂ်သိူဝ်းယဝ်ႉ။ ပေႃးပဵၼ်ပွႆးပဵၼ်လၢမ်းမႃးၼႆ တေၵႆႉလႆႈႁၼ်ႁွမ်လႅင်းလႄႈ ၵူၼ်းၼႂ်းၸုမ်းၶဝ် ဢွၼ်ၵၼ်ႁဵတ်းၵၢၼ် ပႃးၵွင်ႈထႆႇသေ တူင်ႉၼိုင်ယူႇၼႂ်းပၢင်ပွႆးၸိူင်ႉၼၼ် ပဵၼ်ၾၼ်ဢၼ်မုင်ႈမွင်းမႃးယူႇတႃႇသေႇလႄႈ ဝူၼ်ႉဝႃႈတေလႆႈႁူမ်ႈႁဵတ်းၸွမ်းႁွမ်လႅင်းၸိူင်ႉၼၼ် ယိုင်ႈၶႅၼ်းထႅင်ႈတၢင်းၶတ်းၸႂ်မၼ်းမႃးယဝ်ႉ။
ၶၢဝ်းယၢမ်းပူၼ်ႉၵႂႃႇပဵၼ်လၢႆလိူၼ် ထိုင်မႃးၼႂ်းလိူၼ်ထူၼ်ႈသွင်ၼၼ်ႉ တီႈႁူင်းႁဵၼ်းၼၼ်ႉၵေႃႈ လႆႈၶိုၼ်းသုၵ်ႉသၵ်ႉမႃးထႅင်ႈ ယွၼ်ႉမီးပၢင်ဢွင်ႇပူၼ်ႉၸၼ်ႉ တွၼ်ႈတႃႇလုၵ်ႈႁဵၼ်းဢၼ်လႆႈႁဵၼ်းသုတ်းယဝ်ႉၵႂႃႇ ၸၼ်ႉ 12 ၊ ၸၼ်ႉၵၢင်၊ ၸၼ်ႉငဝ်ႈ လႄႈ ႁူင်းႁဵၼ်းတၢင်းလတ်းၼႆယဝ်ႉ။ လုၵ်ႈႁဵၼ်းၸိူဝ်းပဵၼ်ၸၼ်ႉ 12 ဢွၵ်ႇၵႂႃႇႁဵတ်းၵၢၼ်ယဝ်ႉၼႆၵေႃႈ လႆႈဢွၼ်ၵၼ်ပွၵ်ႈမႃးတီႈႁူင်းႁဵၼ်းၶိုၼ်းယူႇယဝ်ႉ။
မိူဝ်ႈပႆႇထိုင်ဝၼ်းႁပ်ႉဝႂ်ၼႆၼၼ်ႉ ၸုမ်းလုၵ်ႈႁဵၼ်းၸၼ်ႉ 12 ၶဝ် တေဢွၼ်ၵၼ်ၵႂႃႇထႆႇၶႅပ်းႁၢင်ႈပဵၼ်တီႈမၢႆတွင်းဝႆႉထႃႈသေ ၶိူဝ်းမိူင်းလႆႈပဵၼ်ၵူၼ်းၵႂႃႇထႆႇပၼ်ၶဝ်ယဝ်ႉ။ တီႈဢၼ်ထႆႇၶႅပ်းႁၢင်ႈၶႅမ်ႉတႄႉ ပေႃးဢမ်ႇၸႂ်ႈ လွႆၵွင်းၽြႃးၵေႃႈ တီႈၵွင်းမူးၼၢမ်ႇမိူင်းၵူၺ်းလႄႈ တီႈၵွင်းၽြႃးၼၼ်ႉ ႁၢင်ႈလီလိူဝ်ၼႆသေ ၸူဝ်းၵၼ်ၵႂႃႇတီႈၼၼ်ႈယူႇ။
ၶိူဝ်းမိူင်းၼၼ်ႉၵေႃႈ ထႆႇပၼ်ပဵၼ်ၸုမ်းယဝ်ႉ ၶိုၼ်းထႆႇပဵၼ်ၵေႃႉပဵၼ်ၵေႃႉလႄႈ မိူဝ်ႈထိုင်ၵမ်းႁွမ်လႅင်းၼၼ်ႉ ၼင်ႇႁၢင်ႈၸႂ်ပေႉမႃးဢမ်ႇၼိမ်ဝႆႉ မႆႈၵေႃႈမႆႈ ႁိူဝ်ႇတႅၵ်ႇသမ်ႉပေႃးယမ်းမူတ်း။
ထႆႇယဝ်ႉ ၶိုၼ်းၼႄၸဝ်ႈတူဝ်မၼ်းတူၺ်း ႁွမ်လႅင်းမႃးၸုၵ်းယူႇႁိမ်းၸမ်သေ ငွၵ်ႈတူၺ်းၼႂ်းၵွင်ႈထႆႇၼၼ်ႉ ၼႃႈသွင်ၶႃသမ်ႉပေႃးတေၸပ်းၵၼ်ယဝ်ႉ။
“ဢိုမ်ႈ!..လႆႈယူႇၵူၺ်း..”
ၶိူဝ်းမိူင်းသမ်ႉပေႃးလူမ်ၸႂ်လူင်မႃးၵမ်းလဵဝ်။ ႁွမ်လႅင်းၵေႃႈၵႂႃႇလၢတ်ႈႁႂ်ႈၵေႃႉဢၼ်ဢမ်ႇပႆႇလႆႈထႆႇၼၼ်ႉ မႃးထႆႇထႅင်ႈယူႇ။
ထႆႇၶႅပ်းႁၢင်ႈဢၼ်ဝႃႈၼၼ်ႉၵေႃႈ ဢမ်ႇငၢႆႈငၢႆႈ ဝၢႆးဝၼ်းၸင်ႇၶိုၼ်းပွၵ်ႈမႃးတီႈႁူင်းႁဵၼ်းသေ သိုပ်ႇထႆႇတီႈႁူင်းႁဵၼ်းထႅင်ႈယဝ်ႉ။ ၶိူဝ်းမိူင်းပဵၼ်ၵူၼ်းထႆႇမၼ်းၼၼ်ႉတႄႉ မွင်းဝႃႈထႆႇယဝ်ႉၼႆၵေႃႈ ဝၢင်းႁူဝ်မၼ်းၼွၼ်းသွပ်ႉလပ်းၵႂႃႇယဝ်ႉ။ ပႆႇလႆႈဢဝ်ၶႅပ်းႁၢင်ႈဢွၵ်ႇၼႆၵေႃႈ လုၵ်ႉမႃးၶိုၼ်းသေ မႃးလိူၵ်ႈယဝ်ႉ သိုပ်ႇသူင်ႇပၼ်ၶဝ်ၵႂႃႇထႅင်ႈ သူင်ႇၶဝ်ႈၼႂ်းၵုမ်ႇၵူၺ်းလႄႈ ဢမ်ႇလိူၵ်ႈဝႃႈၶႅပ်းႁၢင်ႈၽႂ်ပဵၼ်ႁင်းၽႂ်ယဝ်ႉ။
ၶိူဝ်းမိူင်းယၵ်ႉတူၺ်းၶႅပ်းႁၢင်ႈႁွမ်လႅင်းၼၼ်ႉသေ ႁၼ်ႁၢင်ႈမိူဝ်ႈၵၢင်ဝၼ်းၼၼ်ႉမႃးမီးယူႇၼႂ်းတႃယဝ်ႉ မၢင်ၵမ်းမႃးၵေႃႈ မိူၼ်ပဵၼ်ၾၼ်ဢၼ်ဢမ်ႇၶႂ်ႈယုမ်ႇသေဢိတ်းဝႃႈ တေလႆႈမႃးထႆႇပၼ်ၶႅပ်းႁၢင်ႈႁွမ်လႅင်းၸိူင်ႉၼၼ်။
ၼႂ်းဝၼ်းပၢင်ႁပ်ႉဝႂ်ဢွင်ႇပူၼ်ႉၸၼ်ႉ ၶိူဝ်းမိူင်းၵေႃႈ လႆႈပဵၼ်ၵူၼ်းထႆႇၶႅပ်းႁၢင်ႈၵႂႃႇၸွမ်းယဝ်ႉ။ ပဵၼ်ဝၼ်းဢၼ်မၼ်း သိူဝ်းလိူဝ်ပိူၼ်ႈလႄႈ ပဵၼ်ဝၼ်းဢၼ်မၼ်းလႆႈထႆႇၶႅပ်းႁၢင်ႈပၼ်ႁွမ်လႅင်းၼၼ်ႉသေဢမ်ႇၵႃး လႆႈၶဝ်ႈႁူမ်ႈထႆႇၶႅပ်းႁၢင်ႈၸွမ်းၵၼ်တင်း ၸုမ်းႁွမ်လႅင်းၶဝ်ၼၼ်ႉ တၢင်းယုမ်ႉမၼ်းသမ်ႉပေႃးဢမ်ႇတုပ်ႇလႆႈသေဢိတ်း။
ဝၢႆးသေၼၼ်ႉၵေႃႈ ဢမ်ႇလႆႈၶိုၼ်းႁူပ်ႉၵၼ်ထႅင်ႈလႄႈ ဢမ်ႇလႆႈႁူႉဝႃႈႁွမ်လႅင်းပဵၼ်ၸိူင်ႉႁိုဝ်၊ သိုဝ်ႇၶၢဝ်ႇ တႆးလွတ်ႈလႅဝ်းၶဝ်ၵေႃႈ ဢမ်ႇဢွၵ်ႇငဝ်းႁၢင်ႈသဵင်ယဝ်ႉသေ မၼ်းၵေႃႈဢမ်ႇလႆႈၶိုၼ်းႁၼ်ၶဝ်ထႅင်ႈယဝ်ႉ။
ၶၢဝ်းတၢင်းၵၢၼ်ႁဵၼ်းမၼ်းတေႃႇပေႃးသုတ်းယဝ်ႉၵႂႃႇ ၸၼ်ႉ 12 ၼၼ်ႉ လၢတ်ႈလႆႈဝႃႈ မီးႁွမ်လႅင်းပဵၼ်ႁႅင်းၸႂ်မႃးတႃႇသေႇယဝ်ႉ။
လွင်ႈၼွၼ်းၾၼ်ဢၼ်မၼ်းဝူၼ်ႉႁၼ်ၼႂ်းတႃဝၼ်းၼၼ်ႉၵေႃႈ ပဵၼ်မႃးယူႇတေႉ မိူဝ်ႈပဵၼ်ပွႆးၼႆ မၼ်းတေလႆႈယိပ်းၵွင်ႈထႆႇသေ ထႆႇပၼ်ႁွမ်လႅင်း ဢၼ်တိုၵ်ႉဢၢၼ်ႇၶၢဝ်ႇ ယူႇၼႂ်းပၢင်ပွႆးၼၼ်ႉယဝ်ႉ။ ၵူၺ်းၵႃႈ တၢင်းႁၵ်ႉမၼ်းၼၼ်ႉတႄႉ လႆႈတူၵ်းသုမ်းၵႂႃႇ မိူဝ်ႈႁူႉဝႃႈ ႁွမ်လႅင်းၼၼ်ႉ မီးၵေႃႉႁၵ်ႉ ယူႇယဝ်ႉ။
သုတ်းယဝ်ႉ။
တႅမ်ႈ – လုၵ်ႈႁဵၼ်းၵဝ်ႇၵေႃႉၼိုင်ႈ
20-21/06/2025
