ၶမ်ႈၶိုၼ်းဢၼ်လပ်းသိင်ႇမိုတ်းတၼ် သဵင်လူမ်းထူဝ်းထွင်းၽွင်းမိူဝ်ႈၼွၼ်းယဵၼ် သၢႆၶိူဝ်းတႄႉ ႁိုဝ်တေၼွၼ်းလပ်းလႆႈ ၸႂ်ဢမ်ႇမႆႈၵူၺ်းဢုပ်ႇၽူင်းတေႃႇသၢဝ်ယူႇ ဢုပ်ႇတၢင်းၶိုၼ်းတိုၼ်းဢမ်ႇၼွၼ်း ၵေႃႈလႆႈ ယိုင်ႈဢုပ်ႇယိုင်ႈၶႂ်ႈဢုပ်ႇ ဢုပ်ႇၵႂႃႇဢုပ်ႇမႃးၼွၼ်းလပ်းၵႂႃႇၸွမ်းၽူင်းပႅတ်ႈသေယဝ်ႉ။ ၼႂ်ၸဝ်ႉမိူင်းပႆႇလႅင်း သဵင်ပူၵ်းႁွင်ႉမေႃးပေႃးပၼ်းလူင်ၵႂႃႇသဵင်ႈ သၢႆၶိူဝ်းၵေႃႈၸွမ်းလူၺ်ႈၼွၼ်းလိုၵ်း ၼႃႇသေ တႃၼွၼ်းႁိုဝ်တေပႃႈၸိုၼ်ႈပၢင်ႇ ဢူၺ်းၵေႃႉမၼ်းဢၢႆႈပိူင်းၾႃႉၸင်ႇတူပ်းႁူဝ်မႃႇမၼ်းၵမ်းၼိုင်ႈ ယဝ်ႉၸင်ႇတေၸိုၼ်ႈမႃးၶိုၼ်း။
“ဢၢႆႈၶိူဝ်း!…တေလႆႈဢွၵ်ႇၶၢဝ်းတၢင်းမိူဝ်းယဝ်ႉ…”
“ဢွၵ်ႇၶၢဝ်းတၢင်း!…ပေႉၶိုၵ်ႉၶၵ်ႉပေႃးတၢၼ်ႇၼၼ်ႉလႃႇ…”
“ဢိူဝ်ႈ!…မိူင်းတႆးပွတ်းႁွင်ႇမီးလွင်ႈသုၵ်ႉသၵ်ႉလႄႈ တေလႆႈဢွၵ်ႇၶၢဝ်းတၢင်းမိူဝ်းယဝ်ႉ”
သၢႆၶိူဝ်းၵေႃႈႁိပ်ႈၼႅတ်ႈသိမ်းၶူဝ်းၶွင်မၼ်းၵႂႃႇမိူၼ်ပိူၼ်ႈယူႇယဝ်ႉ။ သၢႆၶိူဝ်းမႃးႁၢပ်ႇထၢမ်းၵၢၼ် ၸိူဝ်ႉၸၢတ်ႈႁိုင်သွင်ပီယဝ်ႉ မိူဝ်ႈလႆႈမႃးႁၢပ်ႇထၢမ်းၵၢၼ်ၼၼ်ႉ လႆႈမႃးမိုတ်ႈၵိုဝ်းႁူႉၸၵ်းၵၼ်တၢင်း ပိူင်းၾႃႉသေ ႁဵတ်းႁႂ်ႈလႆႈပဵၼ်ဢူၺ်းၵေႃႉၸမ်ၸႂ်ၵၼ်ၵႂႃႇ မီးလွင်ႈသင်ၵေႃႈၸွႆႈထႅမ်ၵၼ် မိူၼ်ပဵၼ်ပီႈဢွၵ်ႇၼွင်ႉပဵၼ်ၵၼ်ၼၼ်ႉယဝ်ႉ။ မိူဝ်ႈယင်းတိုၵ်ႉသိမ်းၶူဝ်းၶွင်ၵၼ်ယူႇၼၼ်ႉ မႄႈသၢႆၶိူဝ်းၵေႃႈလႆႈသိုပ်ႇၽူင်းမႃး မၼ်းၸင်ႇႁပ်ႉၵႂႃႇသေ ဢမ်ႇတၼ်းလႆႈလၢတ်ႈသင် သင်ၼူၵ်ႉပိတ်ႇၵေႃႈတိုင်ႈႁွင်ႉမေႃးလႄႈ ႁဵတ်းႁႂ်ႈမၼ်းလႆႈဝၢင်းၽူင်းပႅတ်ႈယဝ်ႉ လႅၼ်ႈၵႂႃႇၶဝ်ႈထႅဝ် ၵမ်းလဵဝ်။
သဵၼ်ႈတၢင်းယၢဝ်းၵႆ ပႆလတ်းထိူၼ်ႇပႃႇ ၶၢမ်ႈႁူၺ်ႈၵွင်းလွႆၸၼ်း ၶမ်ႈလႂ်ၼွၼ်းၼၼ်ႈ ပႆႈထၢၼ်ႈတိၼ်ပေႃးပွင်း မွင်းႁႂ်ႈထိုင်ယူႇၵေႃႈ တေႃႈဢမ်ႇမိူၼ်ၸႂ်လႆႈလူး ပၢၼ်ပဵၼ်ၵေႃႉသိုၵ်းၼႆ။ သၢႆၶိူဝ်းၵေႃႈႁိုဝ်တေႃႈယွမ်းၵၢၼ်ႉ ပိူၼ်ႈပႆလႆႈႁဝ်းၵေႃႈပႆလႆႈ ၶႂ်ႈႁွတ်ႈၼႃႇၵေႃႈ တေႃႈတေလႆႈၵႂႃႇၸွမ်းတၢင်း မုင်ႈမွင်းၶႂ်ႈထူပ်းႁၼ်ၼႃႈၼွင်ႉၼၢင်းႁၢင်ႈလဝ်းလီ မွင်းပႂ်ႉၵူၼ်းဢုပ်ႇမိူဝ်ႈတူၵ်းၶီယူႇၵေႃႈ တေႃႈတေလႆႈယဵၼ်ႉၵၼ်ႈဢဝ်ယဝ်ႉ။
သၢႆၶိူဝ်းၵေႃႈမိူဝ်ႈမိူဝ်းႁွတ်ႈၼႃႈတီႈပွတ်းႁွင်ႇ မိူၼ်လႆႈမိူဝ်းႁွတ်ႈၶိုၼ်းမိူင်းၵိူတ်ႇဢွၼ်ႇၸၢႆးၼႆသေတႃႉ မိူၼ်ၶႂ်ႈၸူမ်းသိူဝ်းယူႇၼႆၵေႃႈ ဢမ်ႇႁဵတ်းႁႂ်ႈမၼ်းယုမ်ႉဢွၵ်ႇမႃးလႆႈ မိူၼ်ၶႂ်ႈႁွင်ႉႁႆႈဢွၵ်ႇမႃးၵူၺ်းၼၼ်ႉယဝ်ႉ။ ပၢင်တိုၵ်းသိုၵ်းသိူဝ် ၵူၼ်းလႆႈပၢႆႈမၢၵ်ႇမိူဝ် ႁိူၼ်းၶႅမ်ႉလီယူႇဢုၼ်ႇၸႂ်ၵေႃႈ ႁိုဝ်တေႃႈလႆႈသဝ်းႁူမ်ႈ သူၼ်ႁႆႈၼႃးႁဵတ်းႁဵတ်းမႃးပေႃးလူဝ်ႇပၢတ်ႇလူဝ်ႇဢဝ် လွင်ႈသုၵ်ႉယုင်ႈၵေႃႈတဝ်ၵဝ်း ၵူၼ်းဝၢၼ်ႈၵူၼ်းမိူင်းပေႃးဢမ်ႇၸၢင်ႈသဝ်းၵတ်းယဵၼ်လႆႈ ပၢႆႈၽေးသိုၵ်းၽေးၶဵၼ်ပၢႆႈမၢၵ်ႇ ပၢႆႈပေႃးဝၢၵ်ႇပေႃးဝိူဝ် သိုၵ်းသိုၵ်းသိူဝ်တိုၵ်းၵၼ်တၢႆ ၵူၼ်းမိူင်းတုၵ်ႉယၢၵ်ႈၶၢၼ်ၸႂ် ၵွႆပၢႆလႆႈလူႉသၢႆၸႂ်ၸွမ်းထႅင်ႈသေၵွၼ်ႇ။ သၢႆၶိူဝ်းၵေႃႈယိုင်ႈဝူၼ်ႉယိုင်ႈၸဵပ်းၸႂ် မိူၼ်ၶႂ်ႈၶဝ်ႈပၢင်တိုၵ်းယိုဝ်းၵူၼ်းၸိူဝ်းၼၼ်ႉတၢႆပႅတ်ႈသေမူတ်းမူတ်းယဝ်ႉ။
ၸွမ်းသၢႆသဵၼ်ႈတၢင်းဢၼ်ယဵၼ်သီႇသီႇ ၸွမ်းသူၼ်ႁႆႈၼႃးဢၼ်ငဝ်ငႅဝ် ၸွမ်းႁူၺ်ႈလွႆထိူၼ်ႇပႃႇ ဢၼ်ႁူၵ်ႉၼႃႇဢမ်ႇမီးၵူၼ်း ဢမ်ႇမီးၵႂၢၼ်းဢၼ်ၽဝ်ႇၾႆးမႆႈသူၼ် ၵူၺ်းႁၼ်ၵႂၢၼ်းၾႆးမႆႈဝၢၼ်ႈၾႆးထၢၼ်ႈပေႃးၵိုၼ်းဢိုၵ်ႉဢိုၵ်ႉ ၵႂၢၼ်းလူင်လမ်ၽိုတ်းၽိုတ်း ႁိူၼ်းၵေႃႈႁိုဝ်ၵိုတ်းသင်ယဝ်ႉလႃႇ။ သမ်ႉဝႃႈယူႇၵႆသေမုင်ႈႁၼ်ၵႂႃႇၵေႃႈ တေႃႈဢမ်ႇၸၢင်ႈၸွႆႈသင်လႆႈလူး ၸဵပ်းၸႂ်ၼႃႇၵေႃႈဢမ်ႇပႆႇၸၢင်ႈတေႃႇၼႃႈတိုၵ်းၶိုၼ်း ယွၼ်ႉပၢင်တိုၵ်းယင်းပႆႇၸၢင်ႈႁွတ်ႈထိုင်။
မိူဝ်ႈႁွတ်ႈၵႂႃႇတီႈပၢင်သဝ်း ဢၼ်ၵႆယၢၼ်တၢင်းပၢင်တိုၵ်းယူႇဢိတ်းၼိုင်ႈၼၼ်ႉ သၢႆၶိူဝ်းၵေႃႈမႆႈၸႂ်ၸွမ်းမႄႈမၼ်းၼႃႇသေ ၸင်ႇႁႃလႅင်းၽူင်းတႃႇၵပ်းသိုပ်ႇၸူးတီႈႁိူၼ်းၼႆယူႇ။ မိူဝ်ႈမီးလႅင်းၽူင်းယူႇဢိတ်းဢွတ်းၼၼ်ႉ မၼ်းၵေႃႈၶတ်းၸႂ်ၵပ်းသိုပ်ႇၸူးၼွင်ႉၸၢႆးမၼ်းၼႆသေ မိူဝ်ႈယၢမ်းႁပ်ႉၽူင်းယဝ်ႉၼၼ်ႉ သဵင်ၼၼ်ႉၵေႃႈသမ်ႉပဵၼ်သဵင်မႄႈလႄႈ…
“ႁႃလူဝ်…ၽႂ်ၶႃႈ…”
“မႄႈႁႃႉ! မႄႈမေႃၸႂ်ႉၽူင်းသေႁႃႉ” ႁဵတ်းႁႂ်ႈမၼ်းမီးတၢင်းၸူမ်းသိူဝ်းၸွမ်းဢၼ်မၼ်းလႆႈငိၼ်းသဵင်မႄႈမၼ်းၼၼ်ႉယဝ်ႉ။
“လုၵ်ႈၸၢႆးလူင်ၵဝ်ႁႃႉ! ၼွင်ႉမႂ်းသွၼ်ၵဝ်ဝႆႉဢိူဝ်ႈ…” မိူဝ်ႈငိၼ်းၼင်ႇၼၼ် ၼႂ်းၸႂ်ၵေႃႈဢမ်ႇပေႃးလီၵႃႈႁိုဝ်ယဝ်ႉ။
“ဢၢႆႈၼွင်ႉဢမ်ႇလႆႈယူႇႁိူၼ်းႁႃႉ”
“မၼ်းၵႂႃႇႁဵတ်းသိုၵ်းတၢင်းဝၢၼ်ႈႁႆးယဝ်ႉ”
ႁဵတ်းႁႂ်ႈသဵင်သၢႆၶိူဝ်းပေႃးယဵၼ်လူင်ၵႂႃႇယဝ်ႉ တေလၢတ်ႈသင်ၵႂႃႇထႅင်ႈၵေႃႈ လၢတ်ႈၵႂၢမ်းပေႃးဢမ်ႇဢွၵ်ႇယဝ်ႉ။
“လုၵ်ႈၸၢႆး…ပဵၼ်သင်ၵႂႃႇယဝ်ႉလႃႇ…”
“မႄႈ…မိူဝ်ႈလဵဝ်ႁႃးပီႈၼွင်ႉတေလႆႈယိုဝ်းၵၼ်ယဝ်ႉ” ၼမ်ႉတႃဢွၼ်ႇမၼ်းၸၢႆးၵေႃႈၸိုမ်းယမ်းဢွၵ်ႇမႃး တီႈလၢႆႇတႃၼၼ်ႉဢိတ်းၼိုင်ႈယဝ်ႉ ယဵၼ်ၵႂႃႇသေ
“မႄႈ…လုၵ်ႈၸၢႆးတေလႆႈႁဵတ်းႁိုဝ်လႃႇ…”
“မႄႈမုင်ႈမွင်းလုၵ်ႈၸၢႆးတေၵႅၼ်ႇၶႅင်လႄႈၵေႃႉယႂ်ႇသေ ပွၵ်ႈမႃးႁႃႁိူၼ်းႁဝ်းမႄႈလုၵ်ႈၶိုၼ်း ၵိၼ်ၶဝ်ႈႁူမ်ႈၵၼ်ႁဝ်းသၢမ်ၵေႃႉမႄႈလုၵ်ႈ…မႄႈပႂ်ႉၵိၼ်ၶဝ်ႈၽၵ်းဢၼ်ၸၢႆးတေမႃးႁဵတ်းလဵင်ႉယူႇ ၼႃႈ”
“မႄႈ…ၸၢႆးမုင်ႈႁၼ်ဝၢၼ်ႈႁဝ်း..ၾႆးမႆႈမူတ်းယဝ်ႉ…ႁိူၼ်းႁဝ်းၵေႃႈမႆႈပႃးမူတ်း ၸွင်ႇႁဝ်းတေၸၢင်ႈမိူဝ်းႁိူၼ်းၶိုၼ်းယူႇႁႃႉမႄႈ…”
“ႁဵတ်းႁိုဝ်ဢမ်ႇၸၢင်ႈမိူဝ်းလႃႇ…လုၵ်ႈၸၢႆးမႄႈမီးပဵၼ်သွင်ၵေႃႉ…ၾႆးမႆႈႁိူၼ်းၵေႃႈႁဵတ်းမႂ်ႇလႆႈယူႇလူး…ၸွႆႈၵၼ်ႁဵတ်းမၼ်းၵေႃႈဢမ်ႇၼၢၼ်းယဝ်ႉသင်လေႃႇ…မႄႈတၶိုၼ်းမိူဝ်းယူႇႁိူၼ်းဢၼ်လုၵ်ႈၸၢႆးႁဵတ်းပၼ်ဝႆႉယူႇၼႃႈ…”
သဵင်ၽူင်းၵေႃႈယဵၼ်ၵႂႃႇ သၢႆၶိူဝ်းၵေႃႈၶိုၼ်းမိူဝ်းပၢင်သဝ်းၶိုၼ်း ၶမ်ႈၼၼ်ႉၵေႃႈႁိုဝ်တေၸၢင်ႈၼွၼ်းလပ်းလႆႈလႃႇ ၵုမ်ႇဝူၼ်ႉထိုင်ၼွင်ႉၸၢႆးမၼ်းလႄႈမႄႈမၼ်းယူႇတိၵ်းတိၵ်းၵူၺ်း။
“ သင်ၵႂႃႇပၢင်တိုၵ်း ထူပ်းႁၼ်ၼွင်ႉၸၢႆးလူးတေႁဵတ်းႁိုဝ်လႃႇ ပဵၼ်သိုၵ်းတႄႉၸႂ်ႈယူႇလႆ သၢႆၸႂ်ၵူၼ်းၶိူဝ်းလဵဝ်ၵၼ်ၼိူဝ်ႉလိူတ်ႈဢၼ်လဵဝ်ၵၼ် ၶႃႈႁႅမ်ၵၼ်တၢႆၶိုၼ်း မႄႈႁဝ်းသမ်ႉလႆႈသင်မႃး လိူဝ်သေတိူဝ်ႉၸႂ်ႁွင်ႉႁႆႈလႄႈ တေၽိတ်းပိူင်ႈၼႂ်းတူဝ်လုၵ်ႈၸၢႆးမၼ်းၵႃႈႁိုဝ် မၼ်းၵေႃႈႁၵ်ႉလုၵ်ႈၸၢႆးမၼ်းမိူၼ်ၵၼ်တၢင်းသွင်ၵေႃႉၼၼ်ႉယဝ်ႉ ၵဝ်ဢမ်ႇယိုဝ်း ပိူၼ်ႈၵေႃႈသမ်ႉယိုဝ်းယူႇ တႃႇၼွင်ႉၸၢႆးၵဝ်တေလွတ်ႈၽေး ၵဝ်သမ်ႉတေလႆႈႁဵတ်းႁိုဝ်လႃႇ မႄႈႁဝ်းယင်းမုင်ႈမွင်းပွၵ်ႈႁိူၼ်းယူႇၵူႈဝၼ်းလူး”
ယၢမ်းၵၢင်ၼႂ်ၸုမ်းသၢႆၶိူဝ်းၶဝ်ၵေႃႈဢွၵ်ႇၶၢဝ်းတၢင်းၵႂႃႇႁွတ်ႈၼႂ်းဢွင်ႈတီႈပဵၼ်ပၢင်တိုၵ်းၼၼ်ႉယဝ်ႉ။ ထိုင်ယၢမ်းလႃႈမႃး သဵင်ၵွင်ႈသဵင်မၢၵ်ႇတႅၵ်ႇလင်ဢူၼ်မေႃးပၼ်း လိၼ်ၽူင်ႉတႅၵ်ႇယၢႆႈ ၽုၼ်ႇငႂ်ႈၽူင်ႉပိဝ် ဢၢႆမၢၵ်ႇဢၢႆယၢမ်း ဢၢႆၵႂၢၼ်းသမ်ႉပေႃးတဵမ်ၵႂႃႇမူတ်း။ သၢႆၶိူဝ်းၵေႃႈႁၢင်ႈႁႅၼ်းတူဝ်တူဝ်ႈတၼ်းၽွမ်ႉတႃႇတေၵႅတ်ႇၶႄတူဝ်ဝႆႉၵမ်းလဵဝ် တၢင်းၵွင်ႈသေႁၢင်ႈႁႅၼ်းဢဝ်တီႈယူႇဝႆႉလီငၢမ်း သဵင်ၵွင်ႈတၢင်းႁွင်ႇတၢင်းၸၢၼ်းၵေႃႈ ယိုဝ်းၶဝ်ႈမႃးၸမ် သဵင်မၢၵ်ႇတႅၵ်ႇလင်မေႃးၶဝ်ႈၸူးမႃး လင်ႁူၼ်ႈႁႅင်းၼႃႇပေႃးတၢၼ်ႇသဵင်ၽူၼ် ဢူၼ်ၼၼ်ႈပၼ်းမေႃး ပေႃးဢမ်ႇယဵၼ်လႆႈ မၢၵ်ႇၵွင်ႈၽႅတ်ႈၵႂႃႇၽႅတ်ႈမႃး မိူၼ်တေတိူဝ်ႉၺႃးတူဝ်ႁႃးယူႇပဵၼ်ၵမ်း။ သဵင်ၵွင်ႈယဵၼ်ၵႂႃႇၵႅပ်ႉၵမ်းၼိုင်ႈ ၵူၼ်းလႅၼ်ႈပဵၼ်ၽုင်ၶိုၼ်းသိုပ်ႇယိုဝ်း ၵူၺ်းသမ်ႉမၢတ်ႇတိူဝ်ႉၺႃးၵႂႃႇ ဢူၺ်းၵေႃႉမၼ်းပိူင်းၾႃႉၼၼ်ႉ လူမ်ႉမူပ်ႇထူလူင်းတေႃႇၼႃႈတေႃႇတႃမၼ်းၵမ်းလဵဝ်ယဝ်ႉ လူမ်ႉၵႂႃႇယဝ်ႉသဵင်ၵွင်ႈၼၼ်ႉ သိုပ်ႇလၼ်ႇယိုဝ်းသႂ်ႇထႅင်ႈလႄႈ ႁဵတ်းႁႂ်ႈပိူင်းၾႃႉပေႃးဢမ်ႇတူင်ႉတူဝ်လႆႈ။ ႁၼ်ဢူၺ်းၵေႃႉမၼ်းလူမ်ႉၵႂႃႇတၢင်းၵေႃႉ တၢင်းၸဵပ်းၸႂ်တၢင်းၸႂ်လမ် ၸင်ႇဢဝ်ၵွင်ႈမၼ်းယိူင်းၵႂႃႇတီႈၵူၼ်းၵေႃႉဢၼ်ယိုဝ်းပိူင်းၾႃႉၼၼ်ႉယဝ်ႉ။ မိူဝ်ႈယိူင်းၵႂႃႇႁၼ်ၼႃႈ ၵူၼ်းၵေႃႉၼၼ်ႉသမ်ႉပဵၼ်ၼွင်ႉၸၢႆးမၼ်း ဢၢၼ်းၼွင်ႇၼဵၼ်ၵွင်ႈၼႆသေတႃႉ ၼမ်ႉတႃၵေႃႈယိုင်ႈဢွၵ်ႇမႃး ၸႂ်ၵေႃႈပေႃးဢမ်ႇၼိမ်လႆႈယဝ်ႉ တူဝ်တၢႆဢူၺ်းၵေႃႉမၼ်းလႄႈ ၼႃႈၼွင်ႉၸၢႆးမၼ်းၼၼ်ႉ ႁဵတ်းႁႂ်ႈႁူဝ်ၸႂ်မၼ်းပေႃးၶႂ်ႈပဵၼ်ၵူၼ်းယွင်ႇၵႂႃႇ သဵင်လၢတ်ႈမႄႈၶဝ်ၼၼ်ႉၵေႃႈ ငိၼ်းၶဝ်ႈမေႃးယူႇၼႂ်းႁူမႃးထႅင်ႈ ၸႂ်လႄႈတူဝ်မၼ်းဢမ်ႇၼိမ်လႆႈသေဢိတ်းယဝ်ႉ ယိူင်းမႅၼ်ႈယဝ်ႉတေတႃႉ တႃႇတေၼွင်ႇၼဵၼ်ၵွင်ႈမၼ်းၼၼ်ႉၸိုင်ပေႉၼၢဝ်ႉယၢပ်ႇလႃႇ မိုဝ်းသမ်ႉပေႃးသၼ်ႇတိုၼ်းတိုၼ်း ႁၼ်လိူတ်ႈလႅင်ဢူၺ်းၵေႃႉမၼ်းယဝ်ႉ တေၼၢဝ်ႉသမ်ႉႁၼ်သႂ်ႇၼႃႈၼွင်ႉၸၢႆးမၼ်းထႅင်ႈ ၼမ်ႉႁိူဝ်ႇၼမ်ႉတႃလႆယွတ်ႇပင်း ပေႃးတၢၼ်ႇလိူတ်ႈဢွၵ်ႇတၢင်းတူဝ်ယဝ်ႉ။ သၢႆၶိူဝ်းၵေႃႈတေႃႈႁိုဝ်ၸၢင်ႈယိုဝ်း မူပ်ႇလူင်းပႅပ်ႉဝႆႉ ပႂ်ႉဢဝ်တူဝ်တၢႆဢူၺ်းၵေႃႉမၼ်းၵူၺ်းယဝ်ႉ။
သဵင်ၵွင်ႈသဵင်မၢၵ်ႇယဵၼ်ႁၢႆ သၢႆၶိူဝ်းၶဝ်ၵေႃႈဢွၼ်ၵၼ်ဢဝ်တူဝ်တၢႆဢူၺ်းၵေႃႉမၼ်းပိူင်းၾႃႉ ပွၵ်ႈမိူဝ်းတီႈပၢင်သဝ်းၶဝ်ၵႂႃႇယူႇယဝ်ႉ။ ပၢင်တိုၵ်းယဵၼ်ၵႂႃႇၵေႃႈ သၢႆၶိူဝ်းတႄႉႁိုဝ်တေယဵၼ်လႆႈလႃႇ ပဵၼ်ပၢင်တိုၵ်းၵႂႃႇၼႂ်းၸႂ်မၼ်းၼၼ်ႉယူႇႁင်းၵူၺ်း တၢင်းပႂ်ႉတူဝ်တၢႆပိူင်းၾႃႉသေ ၼင်ႈဢုပ်ႇလၢတ်ႈၼႄလွင်ႈၶမ်ၸႂ်မၼ်းၼၼ်ႉယူႇ။
“ဢၢႆႈပိူင်း…ၵဝ်မီးလွင်ႈတၢင်းၼမ်တေထၢမ်မႂ်းၼၼ်ႉယဝ်ႉ ၵူၺ်းၵႃႈမႂ်းၵေႃႈသမ်ႉလႆႈၵႂႃႇပႅတ်ႈၵဝ်သေ မိူဝ်ႈၼႆႉဢၼ်ႁဵတ်းႁႂ်ႈမႂ်းတၢႆၼၼ်ႉ ပဵၼ်ၼွင်ႉၸၢႆးၵဝ်ဢိူဝ်ႈ သမ်ႉဝႃႈၵဝ်ၸဵပ်းၸႂ်ၶႂ်ႈယိုဝ်းၶိုၼ်းၵေႃႈ မိူဝ်ႈႁၼ်ၼႃႈၼွင်ႉၸၢႆးဢွၼ်ႇၵဝ် ဢၼ်ဢမ်ႇလႆႈႁၼ်မႃးၶၢဝ်းတၢင်းသွင်ပီၼၼ်ႉ ၵဝ်ၶႂ်ႈလႅၼ်ႈၵႂႃႇၵွတ်ႇမၼ်းသေၵမ်းၼိုင်ႈယဝ်ႉ ၶႂ်ႈႁွင်ႉၸိုဝ်ႈမၼ်းသေ ယုမ်ႉလၢတ်ႈဝၢၼ်ဢုပ်ႇတေႃႇမၼ်းယူႇဢိူဝ်ႈ ၵူၺ်းၵႃႈမိူဝ်ႈလႆႈႁၼ်မၢၵ်ႇၵွင်ႈဢၼ်ယိုဝ်းသႂ်ႇမႂ်းၼၼ်ႉမၼ်းႁဵတ်းႁႂ်ႈၵဝ်ဢမ်ႇၶႂ်ႈႁူႉၸၵ်းၼွင်ႉၸၢႆးယဝ်ႉ သမ်ႉဝႃႈၵဝ်ယိုဝ်းမၼ်းတၢႆၵေႃႈ ႁႃးသမ်ႉပဵၼ်ၼိူဝ်ႉလိူတ်ႈမႄႈလဵဝ်ၵၼ်လူး ၵဝ်တေႁဵတ်းႁိုဝ်မိူဝ်းတေႃႇၼႃႈမႄႈႁဝ်းလႆႈလႃႇ ၵဝ်ပဵၼ်ပီႈၸၢႆးဢၼ်မိူၵ်ႈလိူင်းသေယိုဝ်းၼွင်ႉၸၢႆးတူဝ်ၵဝ်ႇပႅတ်ႈ မႄႈႁဝ်းလဵင်ႉယႂ်ႇမႃးၸွမ်းၵၼ် သွၼ်ႁႂ်ႈမေႃႁၵ်ႉၵၼ် မွင်းပႂ်ႉၵိၼ်ၶဝ်ႈၸွမ်းၵၼ်ယူႇၵူႈဝၼ်း မၼ်းသမ်ႉဢမ်ႇလႆႈၶိုၼ်းမိူဝ်း လႆႈတၢႆယွၼ်ႉၼမ်ႉမိုဝ်းပီႈဢၢႆႈမၼ်းသေ တေႁႂ်ႈမိူဝ်းလၢတ်ႈဝႃႈၼွင်ႉၸၢႆးၶႃႈတၢႆယဝ်ႉ ၶႃႈပဵၼ်ၵူၼ်းယိုဝ်းမၼ်းတၢႆၸိူင်ႉၼၼ်ႁိုဝ် ၵဝ်ဝူၼ်ႉပေႃးဢမ်ႇပွင်ႇယဝ်ႉ ၵဝ်တေလႆႈႁဵတ်းႁိုဝ် ဢၢႆႈၵေႃႉဢူၺ်း မိူဝ်ႈလဵဝ်ၼႆႉၵဝ်ဢမ်ႇႁူႉတေလႆႈႁဵတ်းၸိူင်ႉႁိုဝ် ႁူႉၵႃႈတေလႆႈယွမ်းၼွမ်းၼိူဝ်မႂ်းၵူၺ်း တေတွပ်ႇတႅၼ်းပၼ်မႂ်းၵေႃႈ ၵဝ်ၵေႃႈႁဵတ်းဢမ်ႇလႆႈ ၵဝ်တူၺ်းႁၼ်ပုၼ်ႈသုၼ်ႇတူဝ်ၼႃႇၸွင်ႇၸႂ်ႈႁိုဝ် ၵဝ်သုမ်းမႂ်းၵႂႃႇယဝ်ႉ ႁႂ်ႈၵဝ်သုမ်းၼွင်ႉၸၢႆးၵဝ်ၵႂႃႇထႅင်ႈ လိူဝ်သေၵဝ်တေလႆႈသုမ်းယဝ်ႉ သုမ်းထႅင်ႈ ၵဝ်ၵေႃႈဢမ်ႇလႆႈသင်မႃး သင်မႂ်းယင်းဢုပ်ႇၵဝ်လႆႈ ၵဝ်ယင်းတေၸၢင်ႈလႆႈၵႂၢမ်းတွပ်ႇတီႈမႂ်းယူႇလႃႈ မိူဝ်ႈလဵဝ်မႂ်းဢမ်ႇၸၢင်ႈလုၵ်ႉမႃးလၢတ်ႈတေႃႇၵဝ်လႆႈယဝ်ႉလူး…”
ၼင်ႈၸဵတ်ႉၼမ်ႉတႃမၼ်းယူႇတီႈႁိမ်းတူဝ်တၢႆပိုၼ်းၾႃႉၼၼ်ႉယူႇႁင်းၵူၺ်းမၼ်းယဝ်ႉ။
သင်ပဵၼ်ၼႂ်းၵၢင်ၸႂ်ၽူႈလူဢၢၼ်ႇၶဝ်ၶႃႈလူး တေႁဵတ်းႁိုဝ်ၸွႆႈထႅမ်ၼိူဝ်သၢႆၶိူဝ်းၶႃႈလႃႇ မိူဝ်ႈလဵဝ်မၼ်းယင်းယူႇၵေႃႉလဵဝ်လႄႈ လႆႈႁပ်ႉလွင်ႈမွင်ၸႂ်ဝႆႉယူႇဢေႃႈ လႄႈလွင်ႈၶွင်ႈၶမ်ၸႂ်မၼ်းၵေႃႈ ယင်းဢမ်ႇပႆႇမီးၽႂ်မႃးၸွႆႈတွပ်ႇၵႄႈပၼ်မၼ်းလႆႈၶႃႈလူး မီးယူႇၵေႃႉလဵဝ်ၵူၺ်း မွင်းပႂ်ႉဢူၺ်းၵေႃႉမၼ်းတွပ်ႇၵႂၢမ်းထၢမ်ယူႇၼႆၵေႃႈ တေႃႈသမ်ႉဢမ်ႇၸၢင်ႈလုၵ်ႉၶိုၼ်ႈမႃးၶိုၼ်းယဝ်ႉ။ ယွၼ်းႁႂ်ႈၽူႈလူဢၢၼ်ႇၶဝ်ပၼ်ႁႅင်းၸႂ်မၼ်းလႄႈ ၸွႆႈတွပ်ႇၵႄႈပၼ်လွင်ႈၶမ်ၸႂ်မၼ်းၼၼ်ႉၽွင်ႈၶႃႈလူး။
ၼႃႈၾႃႉမိုတ်းမူဝ်းမိူင်းသဝ်ႈဝဝ်းမွင် သၢႆလူမ်းထူဝ်းထွင်းပဝ်ႇ သဵင်ၾႃႉလင်ၵွင်ႈမေႃးပၼ်း ပေႃးတၢၼ်ႇဝႃႈၽူၼ်တေတူၵ်းယဝ်ႉ။ မိူဝ်ႈယင်းတိုၵ်ႉပူၼ်ႉၶၢပ်ႈတူဝ်ပိူင်းၾႃႉၼၼ်ႉ ဢၼ်ပဵၼ်ၵေႃႉသိုၵ်းႁၼ်ၼႂ်းၸုမ်းၼၼ်ႉၵေႃႈ ဢွၼ်ၵၼ်ၼပ်ႉယမ်တူဝ်တၢႆမၼ်းသေ ဢွၼ်ၵၼ်ၽဝ်ၶၢပ်ႈတူဝ်မၼ်းၵႂႃႇယူႇယဝ်ႉ။ သၢႆၶိူဝ်းၵေႃႈသမ်ႉဝႃႈသေလၢႆတၢၼ်ႇႁိုဝ် တိူဝ်ႉၸႂ်ၼႃႇၵႃႈႁိုဝ်ၵေႃႈ ဢမ်ႇမီးၽႂ်ဢၼ်ဢမ်ႇမေႃတိူဝ်ႉၸႂ်လူး ပေႃႈမႄႈပီႈၼွင်ႉၸိူဝ်ႉၶိူဝ်းမၼ်း တေတိူဝ်းၶႅၼ်းတိူဝ်ႉၸႂ်တၢၼ်ႇႁိုဝ် သမ်ႉဝႃႈတိူဝ်ႉၸႂ်ၼႃႇၵေႃႈဢမ်ႇႁဵတ်းႁႂ်ႈမၼ်းလီမႃးလိူဝ်ၵဝ်ႇလူး။ ဢမ်ႇမီးဢူၺ်းၵေႃႉမၼ်းၵေႃႈၶီငဝ်ယူႇဢိူဝ်ႈ မၢင်ၵမ်းၵေႃႈဝူၼ်ႉဝႃႈယင်းတိုၵ်ႉမီးၶဝ်ယူႇၼႆသေ ၶုၵ်းၸႂ်လႆႈမိူဝ်ႈလႂ်မွင်ၸႂ်ၸွမ်းယူႇတႃႇသေႇယဝ်ႉ။
သဵင်ၵွင်ႈလင်တွင်ႈႁူၺ်ႈတွင်ႈလွႆမႃးထႅင်ႈ သဵင်မၢၵ်ႇသဵင်ၾႆးတႅၵ်ႇပၼ်းမေႃးလူင်ၵႂႃႇမူတ်း သိုၵ်းတႆးသွင်ၸုမ်းၶိုၼ်ႈလေႃႇတိုၵ်းတေႃးၵၼ်ထႅင်ႈယဝ်ႉ။ သၢႆၶိူဝ်းၵေႃႈတေႃႈတေလႆႈၵႂႃႇယဝ်ႉ ႁွႆးၸဵပ်းၵဝ်ႇယင်းပႆႇႁၢႆ သၢႆၸႂ်တူဝ်ၵဝ်ႇသမ်ႉတေလႆႈၶဝ်ႈလႅၵ်ႈထႅင်ႈယဝ်ႉ။ တီႈၼႂ်းပၢင်တိုၵ်း မၼ်းၵေႃႈဢဝ်ဝႆႉတီႈယူႇဢၼ်ၶႅမ်ႉလႅပ်ႈလီ သဵင်ၵွင်ႈလင်ၼၼ်ႈယူႇၼၼ်ႉ ႁဵတ်းႁႂ်ႈဝူၼ်ႉဝႃႈၵေႃႉဢၼ်ယူႇပႃႈၼႃႈၼၼ်ႉ ပဵၼ်ၼွင်ႉၸၢႆးမၼ်းယူႇတိၵ်းတိၵ်း တေယိုဝ်းၵေႃႈသမ်ႉႁိုဝ်တေႁတ်းယဝ်ႉလႃႇ တေၵွင်လင်ပႅတ်ႈသမ်ႉတူၺ်းႁၼ်မႅၼ်ႈဢူၺ်းၵေႃႉမၼ်းၼွၼ်းတၢႆဝႆႉယူလႄႈ ၸင်ႇၵၼ်ႈၸႂ်လပ်းတႃယဝ်ႉ ၸင်ႇတေၼၢဝ်ႉၼဵၼ်ၵွင်ႈမၼ်းယိုဝ်းဢွၵ်ႇၵႂႃႇလႆႈ။
မိူဝ်ႈယိုဝ်းၵၼ်မႃးတၢင်းႁိုင် သဵင်ၵွင်ႈၸမ်ႁၢႆၵႂႃႇလွႆးလွႆး သၢႆၶိူဝ်းၵေႃႈလိုဝ်ႈၵႂႃႇယဝ်ႉ ယၢမ်းၼင်ႇၼၼ် ၸင်ႇမီးသဵင်ၵွင်ႈလင်မေႃးမႃးႁိမ်းႁူသေ ၵိုင်ႉၵၢင်ႉၸဵပ်းၵႅၼ်းမႃးတီႈႁူဝ်မႃႇ ၶိုၼ်းဝၢႆႇၵူမ်ႈတူၺ်း လႆႈႁၼ်မၢၵ်ႇၵွင်ႈတိူဝ်ႉမၢတ်ႇၺႃးသႂ်ႇႁူဝ်မႃႇမၼ်းၼၼ်ႉလႄႈ ၵူၼ်းၵေႃႉဢၼ်ယိုဝ်းမၼ်းၼၼ်ႉၵေႃႈ လႅၼ်ႈၶဝ်ႈမႃးၸမ်သေ မိူၼ်တေယိုဝ်းသႂ်ႇထႅင်ႈၵမ်းၼိုင်ႈ ဢဝ်ၵူၼ်းၵေႃႉၼၼ်ႉၵိုတ်းၵႂႃႇယဝ်ႉ ပၢႆၵွင်ႈသွင်ၶႃယိူင်းၸူးၵၼ် မိုင်ၵႂႃႇႁင်းၽႂ်ႁင်းမၼ်းယူႇ။
“ပီႈ!…” သဵင်ႁွင်ႉၼွင်ႉၸၢႆးဢွၼ်ႇမၼ်းႁွင်ႉလၢတ်ႈမႃးၸိူင်ႉၼၼ်ၵေႃႈ ႁဵတ်းႁႂ်ႈမၼ်းပႅတ်ႈၵွင်ႈမၼ်းလူင်းၵႂႃႇသေ။
“ၼွင်ႉၸၢႆးဢူၺ် မႄႈႁဝ်းမွင်းပႂ်ႉမႂ်းတေပွၵ်ႈမိူဝ်းၵိၼ်ၶဝ်ႈၵုမ်းၵၼ် မႄႈႁဝ်းမွင်းပႂ်ႉႁႃးပီႈၼွင်ႉႁႂ်ႈပွၵ်ႈမိူဝ်းႁိူၼ်း မိူဝ်းႁဵတ်းႁိူၼ်းပၼ်မႄႈႁဝ်းယူႇဢိူဝ်ႈ ၵူၺ်းၵႃႈမိူဝ်ႈလဵဝ်ၵဝ်ဢမ်ႇမီးႁႅင်းတႃႇတေပွၵ်ႈမိူဝ်းၶိုၼ်းယဝ်ႉ ၵဝ်ၸဵပ်းၼႃႇယဝ်ႉ မႂ်းၸွႆႈယိုဝ်းၵဝ်သေလႄႈ…” လပ်းတႃၸုၼ်ႉသၢႆၸႂ်ပၼ်ၼွင်ႉၸၢႆးမၼ်းယူႇယဝ်ႉ။ ယၢမ်းၼင်ႇၼၼ် သဵင်ၵွင်ႈလင်မေႃးယူႇသွင်ၵမ်းထပ်းၵၼ် သဵင်ဢၼ်လႆႈငိၼ်းၼၼ်ႉၸမ်ႁႅင်းၼႃႇ သၢႆၶိူဝ်းၵေႃႈသၢႆၸႂ်မၼ်းတေႃႈႁိုဝ်တေလွတ်ႈယဝ်ႉ ၸင်ႇၶိုၼ်းမိုၼ်းတႃဢွၵ်ႇမႃး ဢမ်ႇႁၼ်တူဝ်မၼ်းမၢတ်ႇၸဵပ်းတီႈလႂ်လႄႈ မိူၼ်ဝႄႈမၢၵ်ႇၵွင်ႈလႆႈၼၼ်ႉယဝ်ႉ ၵူၺ်းၵႃႈၼွင်ႉၸၢႆးဢွၼ်ႇမၼ်းၼၼ်ႉတႄႉ ၵွတ်ႇဢဝ်တူဝ်မၼ်းဝႆႉသမ်ႉပေႃးမၼ်ႈတိုင်ႈတိုင်ႈ သၢႆၶိူဝ်းၵေႃႈဢမ်ႇမီးႁႅင်းၶႅၼ်တႃႇတေၵမ်ႉတူဝ်ၼွင်ႉမၼ်းဝႆႉလႆႈယဝ်ႉ သွင်ၵေႃႉပီႈၼွင်ႉၼွၼ်းလူမ်ႉၵွင်ၵၼ်လူင်ၵႂႃႇ သၢႆၶိူဝ်းၵေႃႈၸင်ႇဝၢႆႇႁၼ်မႅၼ်ႈၺႃးၵူၼ်းၵေႃႉယိုဝ်းၼွင်ႉၸၢႆးမၼ်းၼၼ်ႉသေ ၸၼ်ဢဝ်မၢၵ်ႇပွမ်းတီႈဢႅဝ်ၼွင်ႉၸၢႆးမၼ်းၼၼ်ႉသေ ႁွမ်ႁႅင်းလုၵ်ႉၶိုၼ်ႈမႃးဝိုတ်ႉသႂ်ႇတီႈၵူၼ်းၵေႃႉယိုဝ်းၼွင်ႉၸၢႆးမၼ်းၼၼ်ႉလႄႈ ဢဝ်ၵူၼ်းၵေႃႉၼၼ်ႉလူမ်ႉတၢႆၵႂႃႇၵမ်းလဵဝ်ယဝ်ႉ။
လိူတ်ႈဢွၼ်ႇၼွင်ႉၸၢႆးမၼ်းၼၼ်ႉၵေႃႈ လႆယွတ်ႇလူမ်ႉလူင်းဢမ်ႇထၢတ်ႇဢမ်ႇဝၢႆး သမ်ႉဝႃႈဢမ်ႇလွတ်ႈတၢႆယဝ်ႉၼႆၵေႃႈ ယင်းတိုၵ်ႉမီးႁႅင်းတႃႇတေယူႇၵႂႃႇလႆႈထႅင်ႈယူႇဢိတ်းၼိုင်ႈ ယၢမ်းၼၼ်ႉသၢႆၶိူဝ်းၵေႃႈၵူမ်ႈၵွတ်ႇဢဝ်ၼွင်ႉမၼ်းမႃးဝႆႉၼႂ်းတၵ်းသေ ၵူမ်ႈႁူလူင်းထွမ်ႇသဵင်ၼွင်ႉမၼ်းလၢတ်ႈၼၼ်ႉယူႇ။
“ပီႈ…ၶႃႈတေဢမ်ႇၶိုၼ်းပွၵ်ႈႁိူၼ်းမိူဝ်းယဝ်ႉ…ၽၢၵ်ႇလၢတ်ႈမႄႈသေ…ၶႃႈယိုဝ်းပီႈၸၢႆးၶႃႈ…ၶႃႈတေႁဵတ်းႁိုဝ်ႁတ်းပွၵ်ႈၶိုၼ်းႁိူၼ်းယဝ်ႉလႃႇ…ပီႈၵေႃႉမိူဝ်းႁဵတ်းပၼ်ႁိူၼ်းမႄႈၵူၺ်းလႃႈ…ပီႈဢမ်ႇလႆႈယူႇၸွမ်းမႄႈမီးပဵၼ်သွင်ပီယဝ်ႉ…မႄႈၸႂ်ထိုင်ပီႈလႄႈၶုၵ်းၸႂ်လႆႈပီႈၵူႈဝၼ်းၼၼ်ႉယဝ်ႉ…ၸွင်ႇႁူႉႁႃႉ…မႄႈမုင်ႈမွင်းႁႂ်ႈပီႈမိူဝ်းႁဵတ်းပၼ်ႁိူၼ်းၶႅမ်ႉၶႅမ်ႉယူႇတႃႇသေႇယဝ်ႉ…ၶႃႈထၢမ်ႁဵတ်းပၼ်မိူဝ်ႈလႂ်ၵေႃႈ…မႄႈဝႃႈၵူဝ်ႁိူၼ်းဢမ်ႇၶၢမ်ႇ…ၵူဝ်ပီႈတေပွၵ်ႈမိူဝ်းဢမ်ႇတွင်းႁိူၼ်းၼႆဝႃႇ…” သၢႆၶိူဝ်းၵေႃႈတၢင်းၼမ်ႉတႃသေ
“တေလၢတ်ႈႁဵတ်းသင်တိၵ်းတိၵ်း…ယဵၼ်ႉၸႂ်ဝႆႉလႄႈ…ၵဝ်တေဢဝ်မႂ်းၵႂႃႇၸူးမေႃယႃ…”
“ၶႃႈဢမ်ႇၵႂႃႇယဝ်ႉ…ပိူၼ်ႈတေၸင်းၶႃႈတၢၼ်ႇႁိုဝ်…ပိူၼ်ႈတေယူတ်းယႃၶႃႈယူႇႁႃႉ…ၶႃႈပဵၼ်ၵူၼ်းယိုဝ်းပီႈမၢတ်ႇၸဵပ်း…ပီႈတေၸဵပ်းတေႉယဝ်ႉ…”
“ပီႈဢမ်ႇၸဵပ်းတၢၼ်ႇဢၼ်ႁၼ်မႂ်းၸၢႆးတၢႆတေႃႇၼႃႈၵဝ်လေႃႇ…”
“ပီႈယႃႇတိူဝ်ႉၸႂ်လႄႈ…ၵူၼ်းၵေႃႉဢၼ်ယိုဝ်းၶႃႈၼၼ်ႉ…ၶဝ်ဢမ်ႇပွင်ႇၵႂၢမ်းႁႃးပီႈၼွင်ႉလေႃႇ…ၶႃႈယိၼ်းၸူမ်း…ဢမ်ႇလႆႈတၢႆယွၼ်ႉမၢၵ်ႇၵွင်ႈတႆး…ၶႃႈတေဢမ်ႇလႆႈႁၼ်ပီႈၸၢၼ်ႈၸင်းတႆးၼင်ႇၵၼ်…ၶႃႈၽၢၵ်ႇႁႂ်ႈပီႈတွပ်ႇတႅၼ်းပၼ်ၶႃႈၽွင်ႈ…ၶႂၢင်းပၼ်ၶႃႈၼႃပီႈ…ၶႃႈတေဢမ်ႇယိုဝ်းပီႈထႅင်ႈယဝ်ႉ…ၸၢတ်ႈၼႆႉ…ႁႃးပီႈၼွင်ႉထိူၵ်ႈပဵၼ်ပီႈၼွင်ႉၵၼ်ၵူၺ်းယဝ်ႉ…သမ်ႉဝႃႈႁၵ်ႉၵၼ်ၼႃႇၵေႃႈ…တေႃႈဢမ်ႇလွတ်ႈမႃးပဵၼ်ၽူႈၶဵၼ်ၵၼ်လူး…ပီႈဢူၺ်…ပုၼ်ႈၽွၼ်းၶႃႈႁႂ်ႈသုတ်းၵႂႃႇၼႂ်းဢွင်ႈၵွတ်ႇပီႈၼၼ်ႉၵူၺ်းလႃႈ…”
လပ်းတႃမၼ်းလူင်းၵႂႃႇသေ ပွႆႇလူမ်းထူၺ်ႈၸႂ်မၼ်းၵႂႃႇလွႆးလွႆးၼႂ်းၵႄႈတၵ်းပီႈဢၢႆႈမၼ်းၼၼ်ႉယဝ်ႉ။
သုတ်းယဝ်ႉ။
ၼပ်ႉယမ်ထိုင်ၽူႈလူလိၵ်ႈႁဝ်းၶဝ်ယူႇဢေႃႈ
သင်ဝႃႈမီးတီႈလႂ်ၽိတ်းတီႈဢမ်ႇထုၵ်ႇၵေႃႈ ယွမ်းၼွမ်းယူႇၶႃႈ။
တႅမ်ႈ ငဝ်မွင်မိုတ်းမူဝ်း
01/06/2021
