ပၼ်ႁႅင်းတူဝ်ၵဝ်ႇတူၺ်းလူး

မိူဝ်ႈဢမ်ႇယဵၼ်ႉၶၢမ်ႇလႆႈယဝ်ႉၼႆၵေႃႈ ယွမ်းႁပ်ႉသေ မၢင်ပွၵ်ႈတေမိူၼ်ၵႂင်တၢင်းယူႇလႄႈႁဵတ်းသင်ဢမ်ႇပဵၼ်လွင်ႈၼႆၵေႃႈတိူင်းမၼ်းသေ ဢမ်ႇၵႅၼ်ႇၶႅင်ယူႇတႃႇသေႇၵေႃႈလႆႈ ယွမ်းႁပ်ႉဝႃႈႁဵတ်းဢမ်ႇလႆႈ ႁိူဝ်ႉယဝ်ႉၼႆၵေႃႈ ဢမ်ႇပဵၼ်သင်ၼႃ။

ယူႇၸွမ်းၶၢဝ်းယၢမ်းမိူဝ်ႈလဵဝ်ၼႆႉလီလိူဝ်ပိူၼ်ႈယဝ်ႉ ၸူမ်ယူႇၸွမ်းလွင်ႈဝၼ်းလင် ဝူၼ်ႉၵႂင်ၸွမ်းလွင်ႈမိူဝ်းၼႃႈၵေႃႈ ဢမ်ႇလႆႈသင်မႃးၼင်ႇၵဝ်ႇ လူမ်းထူၺ်ႈၸႂ်ဢၼ်မီးယူႇၼၼ်ႉ ပဵၼ်ယၢမ်းၼႆႉမိူဝ်ႈလဵဝ်ၼႆႉၵူၺ်း ႁဵတ်းလႆႈၵေႃႈႁဵတ်း ႁဵတ်းဢမ်ႇလႆႈၵေႃႈလိုဝ်ႈသေၵွၼ်ႇလႄႈ။

ပူတ်းပွႆႇတူဝ်ၵဝ်ႇလႄႈဝၢင်းၶႂၢင်းပၼ်ပိူၼ်ႈသေ တေၸႂ်လမ်ၽႂ်ႁိုဝ်ၸႂ်လမ်တူဝ်ၵဝ်ႇၵေႃႈယဝ်ႉ မိူၼ်တင်းမႅၵ်ႇမၢၵ်ႇႁိၼ်ၼၵ်းၼၵ်းဝႆႉယူႇတႃႇသေႇၼၼ်ႉၵူၺ်း ပွႆႇမၼ်းၵႂႃႇတူၺ်းလႄႈ ဢမ်ႇပဵၼ်သင်။

ၸႂ်ႉၶၢဝ်းယၢမ်းယူႇၸွမ်းသၽႃႇဝသေ ဢမ်ႇဝႃႈပႆလဵၼ်ႈၸွမ်းထိူၼ်ႇပႃႇ ဝႂ်မႆႉလူမ်းထွင်းမႃးၼၼ်ႉ မၼ်းၵေႃႈၸွႆႈယူတ်းယႃၸႂ်လႆႈယူႇယဝ်ႉ ၸၢမ်းတူၺ်းလႄႈ။

လွင်ႈဢၼ်ၶမ်ၸႂ်ၼၼ်ႉ ၸၢမ်းတႅမ်ႈသႂ်ႇၼႂ်းၽိုၼ်ၸေႈ ဢၼ်ၶႂ်ႈလၢတ်ႈၶႂ်ႈႁဵတ်းၼၼ်ႉ တႅမ်ႈဢွၵ်ႇမႃးတူၺ်း မၼ်းၸၢင်ႈပူတ်းပွႆႇလွင်ႈၶမ်ၸႂ်လႆႈယဝ်ႉ။

လွင်ႈဢၼ်မႃးႁဵတ်းႁႂ်ႈၼၵ်းၸႂ်ၼၼ်ႉ ဢဝ်ဢွၵ်ႇပႅတ်ႈသေ လွင်ႈၸမ်ၸႂ်ဢၼ်ဢမ်ႇလီ ဢမ်ႇပၼ်ၽွၼ်းလီ တူင်ႇဝူင်းႁိမ်းႁွမ်းဢၼ်ဢမ်ႇလီၼႆၵေႃႈ သုတ်ႉႁၢင်ႇမၼ်းဢွၵ်ႇၵႂႃႇလႄႈ။

ယုမ်ႇယမ်သဵၼ်ႈတၢင်းဢၼ်တူဝ်ၵဝ်ႇလိူၵ်ႈၼၼ်ႉလႄႈ မၢင်ပွၵ်ႈတေၸၢင်ႈၵႂႃႇၽိတ်းတၢင်းလႄႈၵႂႃႇထိူင်းသေတႃႉ မၼ်းၵေႃႈ ဢမ်ႇလႆႈလမ်ႇလွင်ႈတၢၼ်ႇဢၼ်လႆႈပႆၵႂႃႇသဵၼ်ႈတၢင်းထုၵ်ႇမႅၼ်ႈပုၼ်ႈတႃႇတူဝ်ၵဝ်ႇၼႃ။

ဢွၵ်ႇႁၢင်ႇသူဝ်ႇသျႄႇမီႇတီႇယႃႇတူၺ်းလႄႈ မိူဝ်ႈလႆႈႁၼ်ၸၢတ်ႈပၢၼ်ဢၼ်တဵမ်ထူၼ်ႈပိူၼ်ႈၼၼ်ႉ တေႁဵတ်းႁႂ်ႈႁဝ်းလႆႈၼႃႈလဵၵ်ႉယဝ်ႉ တီႈတေႉၽႂ်ၵေႃႈမီးလွင်ႈဢၼ်ဢမ်ႇၸၢင်ႈလၢတ်ႈၼႄၵၼ်ႁႂ်ႈႁၼ်လႆႈမူတ်းလေႃႇ ၸၢမ်းဢွၵ်ႇႁၢင်ႇမၼ်းသေ ယူႇၸွမ်းလွင်ႈပဵၼ်ယူႇတေႉၽွင်ႈ။

ၸၢမ်းႁဵတ်းတူၺ်းလွင်ႈဢၼ်ႁဵတ်းယဝ်ႉ ႁဝ်းမီးတၢင်းသိူဝ်းၼၼ်ႉလႄႈ ဢမ်ႇဝႃႈတေလူလိၵ်ႈႁိုဝ်ထွမ်ႇၵႂၢမ်း ႁဵတ်းတၢင်းၵိၼ်ၸိူဝ်းၼႆႉၵေႃႈ တေၸွႆႈထႅမ်ႁႅင်းၸႂ်ၵႂႃႇလႆႈလီယဝ်ႉ။

မေႃယိၼ်းၸူမ်းလႄႈ ဢမ်ႇဝႃႈလွင်ႈလဵၵ်ႉလဵၵ်ႉဢွၼ်ႇၵူၺ်းၵေႃႉယဝ်ႉ ဝူၼ်ႉထိုင်လွင်ႈလီလီ ဢမ်ႇဝႃႈမိူဝ်ႈၼႆႉလႆႈၼွၼ်းလပ်းလီတေႉယဝ်ႉၼႆၵေႃႈ ပဵၼ်လွင်ႈလီဢၼ်ၼိုင်ႈယဝ်ႉ။

ယႃႇၵူဝ်တေတႄႇမႂ်ႇ ဢမ်ႇမီးၽႂ်တူၵ်းလိုၼ်းတႃႇလႅၵ်ႈလၢႆႈ ၵူႈဝၼ်းၼၼ်ႉပဵၼ်တိုဝ်ႉတၢင်းမႂ်ႇသေႇသေႇတႃႇတႄႇမႂ်ႇ မၢင်လွင်ႈသင်ႁဝ်းႁတ်းယၢင်ႈဢွၵ်ႇၵႂႃႇတီႈၵဝ်ႇၵူၺ်းၵေႃႈလႅၵ်ႈလၢႆႈယဝ်ႉ။

ယုမ်ႇဝႃႈၵူႈၸိူဝ်ႉၵူႈလွင်ႈၼၼ်ႉ မီးလွင်ႈတၢင်းႁင်းမၼ်း မၢင်ပွၵ်ႈလွင်ႈၼၼ်ႉမၼ်းဢမ်ႇၽဵင်ႇပဵင်းသေဢိတ်း ႁဵတ်းႁႂ်ႈထၢင်ႇထိူမ်မႃးဝႃႈ “ၵွပ်ႈသင်လႄႈပဵၼ်ၵဝ်” ၼႆသေတႃႉ၊ တူဝ်ထူပ်းၵူႈဢၼ်ၼၼ်ႉမၼ်းတိုၼ်းပၼ်တွၼ်ႈသွၼ်တႃႇသေႇယဝ်ႉ။

မၢင်ပွၵ်ႈလွင်ႈၸွႆႈထႅမ် ပၼ်ႁႅင်းပိူၼ်ႈၵူၺ်းၵေႃႈ ၸွႆႈထႅမ်ႁႅင်းပၼ်ၶဝ်လႆႈယဝ်ႉ ဢမ်ႇၸမ်ပဵၼ်တေလႆႈပဵၼ်လွင်ႈၶိုၵ်ႉၶၢႆးသင် တၢင်းယုမ်ႉ ၵႂၢမ်းလၢတ်ႈလီလီဢွၼ်ႇၵူၺ်းၵေႃႈ ပဵင်းပေႃးယူႇ။

ႁၵ်ႉတူဝ်ၵဝ်ႇဢၼ်ပဵၼ်ယူႇ ႁဝ်းဢမ်ႇၸႂ်ႈၵူၼ်းတဵမ်ထူၼ်ႈလႄႈ ယင်းမီးတီႈယူပ်ႈယွမ်းယူႇတင်းၼမ်၊ ၵူၺ်းၵႃႈဢမ်ႇပဵၼ်သင် ႁဝ်းၵေႃႈထုၵ်ႇလီလႆႈတၢင်းႁၵ်ႉတီႈတူဝ်ၵဝ်ႇယူႇ ဢမ်ႇဝႃႈတေပဵၼ်ၵူၼ်းၸိူင်ႉႁိုဝ်ၵေႃႈယဝ်ႉ။

ပိၼ်ႇ-ငဝ်မွင်မိုတ်းမူဝ်း

ဢူၺ်းၵေႃႉလီ

ၵူၼ်းၵေႃႉဢၼ်ႁၼ်လွင်ႈလီလႄႈလွင်ႈဢမ်ႇလီႁဝ်း ၵူၺ်းၵႃႈၶဝ်ယင်းတိုၵ်ႉယူႇၸွမ်းႁဝ်းယူႇၼၼ်ႉ မၼ်းၵေႃႈပဵၼ်ဢူၺ်းၵေႃႉလီတေႉယဝ်ႉ။ တႃႇပဵၼ်ဢူၺ်းၵေႃႉတင်းၽႂ်သေၵေႃႉၵေႃႉ ၼႂ်းၶၢဝ်းယၢမ်းလီၼၼ်ႉ မၼ်းဢမ်ႇၸႂ်ႈလွင်ႈယၢပ်ႇ ၽႂ်ၵေႃႈ ယုမ်ႉၶူဝ်ၵႂႃႇၸွမ်းၵၼ်လႆႈ ၼႂ်းဝၼ်းဢၼ်ၵူႈလွင်ႈသိူဝ်းလႄႈလူမ်ၸႂ် ၽႂ်ၽႂ်ၵေႃႈ...

ၸၢတ်ႈပၢၼ်ၼၼ်ႉႁိုဝ်ငၢႆႈ

ႁဝ်းမီးတၢင်းသိူဝ်းလႆႈယူႇၼႃ လွင်ႈဢၼ်ႁဵတ်းႁႂ်ႈၸဵပ်းၼၼ်ႉ ဝႆႉပဵၼ်လွင်ႈၶဵင်ႇတႃႉတႃႇဢဝ်ၶၢမ်ႈပူၼ်ႉမၼ်းသေ တေႁဵတ်းႁႂ်ႈမေႃယဵၼ်ႉၵၼ်ႈမႃးထႅင်ႈၼၼ်ႉယဝ်ႉ။ ယႃႇၵုမ်ႇၸူမ်ယူႇၸွမ်းလွင်ႈၸိူဝ်းပူၼ်ႉမႃးထိုင်တီႈပေႃးဢမ်ႇမီးတၢင်းသိူဝ်းလႆႈလႄႈ ၸႂ်ႉၸၢတ်ႈပၢၼ်ယူႇၸွမ်းၶၢဝ်းယၢမ်းမိူဝ်ႈလဵဝ်ၼႆႉလႄႈ။ သင်တေႁၵ်ႉပိူၼ်ႈထိုင်တီႈပေႃးလိုမ်းတူဝ်ၵဝ်ႇၼႆ ႁၵ်ႉတူဝ်ၵဝ်ႇၼမ်ၼမ်လႄႈ သမ်ႉဝႃႈဢမ်ႇမီးၽႂ်ၵေႃႈ ႁဝ်းယင်းတိုၵ်ႉမီးတူဝ်ၵဝ်ႇယူႇလူး။ ၵူၼ်းဢမ်ႇလီၵေႃႈဝႄႈသေ သူၼ်ၸႂ်ၵူၼ်းဢၼ်သႂ်ႇၸႂ်မႆႈၸႂ်ႁဝ်းၼၼ်ႉၵူၺ်းၵေႃႈပဵင်းပေႃးယဝ်ႉ။ ၸူဝ်ႈဢသၢၵ်ႈႁဝ်းၼၼ်ႉႁူႉတိုၼ်းတေလႆႈထူပ်း လွင်ႈတုၵ်ႉၶလွင်ႈယၢပ်ႇၽိုတ်ႇ...

ႁိူဝ်ႉယဝ်ႉ

မိူဝ်ႈပဵၼ်လုၵ်ႈဢွၼ်ႇ ႁဝ်းႁိူဝ်ႉၸွမ်းလွင်ႈဢႅၼ်ႇလႅၼ်ႈၸွမ်းဢူၺ်းၵေႃႉ။ ၵေႃႉယႂ်ႇမႃးထႅင်ႈၵေႃႈ ႁိူဝ်ႉၸွမ်းၵၢၼ်လူလိၵ်ႈလႄႈၵၢၼ်တွပ်ႇလိၵ်ႈ။ ၵေႃႉယႂ်ႇမႃးထႅင်ႈၵေႃႈ ႁိူဝ်ႉၸွမ်းၼႃႈၵၢၼ်တႃငၢၼ်းၵူႈဝၼ်းဝၼ်း။ မိူဝ်ႈပဵၼ်ၵူၼ်းလူင်မႃးၵေႃႈ ႁိူဝ်ႉၸွမ်းၼႃႈတီႈပုၼ်ႈၽွၼ်း ။ ဢမ်ႇဝႃႈၸိူင်ႉႁိုဝ် ၸၢတ်ႈပၢၼ်ႁဝ်းၵေႃႈ ႁူႉၵႃႈတေႁိူဝ်ႉယူႇယဝ်ႉ ယူႇတီႈဝႃႈႁိူဝ်ႉၼမ်ႁိုဝ်ႁိူဝ်ႉဢေႇၼၼ်ႉၵူၺ်း။ ၵူၺ်းၵႃႈ...