ပေႃႈမႄႈၸွင်ႇႁူႉႁိုဝ်

ပေႃႈမႄႈၸွင်ႇယၢမ်ႈတူၺ်းလုၵ်ႈႁဝ်းယူႇႁႃႉ မိူဝ်ႈၽိတ်းမေႃးၵၼ်ယူႇၼၼ်ႉ လုၵ်ႈမၢင်ၵေႃႉတေၼင်ႈယဵၼ် ဢမ်ႇလၢတ်ႈဢမ်ႇၼႄၽၢင်ႁၢင်ႈသင်၊ မၢင်ၵေႃႉႁဵတ်းမိူၼ်ဢမ်ႇသူၼ်ၸႂ် တူၺ်းၵႂႃႇတၢင်ႇတီႈ လဵၼ်ႈတၢင်းလဵၼ်ႈ ၵူမ်ႈၼႃႈၵူမ်ႈတႃၸွမ်းမၢင်လွင်ႈဢၼ်ယူႇတၢင်းၼႃႈ၊ ၸွင်ႇႁူႉႁိုဝ် လွင်ႈတဵတ်ႇယဵၼ်ၸိူဝ်းၼၼ်ႉ တေတွင်းဝႆႉၵူႈလွင်ႈလႄႈ ဢမ်ႇႁူႉတေလၢတ်ႈဢွၵ်ႇမႃးၸိူင်ႉႁိုဝ်ၼၼ်ႉယဝ်ႉ။

လုၵ်ႈဢွၼ်ႇမၢင်ၵေႃႉႁွင်ႉႁႆႈသဵင်လင် ၵွပ်ႈၵူဝ်၊ ၵူၺ်းၵႃႈမၢင်ၵေႃႉဢမ်ႇႁွင်ႉႁႆႈ ယူႇၼိမ်ၼိမ် ထွမ်ႇသဵင်ဢူႈမႄႈၽိတ်းၵၼ် လူၺ်ႈႁူဝ်ၸႂ်ဢၼ်လႆႈလူႉလႅဝ်ၵႂႃႇ ၸွင်ႇသူယၢမ်ႈထၢမ်ႁိုဝ်ဝႃႈ လုၵ်ႈသူၼၼ်ႉမၼ်းၽိတ်းသင်လႃႇ?။

ၶဝ်ဢမ်ႇလႆႈယွၼ်းႁႂ်ႈသူၵိူတ်ႇမႃး ၵူၺ်းၵႃႈ ပဵၼ်သူၵူၺ်းၵေႃႉၵိူတ်ႇၶဝ်မႃး ယဝ်ႉ ၵွပ်ႈသင်လႄႈ ပေႃႈမႄႈပဵၼ်ၵူၼ်းဢၼ်မႃးႁဵတ်းႁၢႆႉၶဝ်လႃႇ?။

ၶေႃႈၵႂၢမ်းလၢတ်ႈဢၼ်ဢူႈမႄႈထဵင်မေႃးၵၼ်ယူႇၼၼ်ႉ တေပဵၼ်ယွၼ်ႉလူမ်းၸႂ်လမ်ၸူဝ်ႈၶၢဝ်းသေတႃႉ တွၼ်ႈတႃႇလုၵ်ႈ မၼ်းပဵၼ်သဵင်ဢၼ်တွင်ႈယွၼ်ႈထိုင်ၼႂ်းႁူဝ်ၸႂ်ၶဝ်ၵႂႃႇၶၢဝ်းယၢဝ်း၊ ႁၢင်ႈပေႃႈမႄႈႁဵတ်းႁၢႆႉၵၼ်ၼၼ်ႉ တေယဝ်ႉၵႂႃႇမိူဝ်ႈၼႆႉသေတႃႉ ၵူၺ်းၵႃႈ ၼႂ်းၸႂ်လုၵ်ႈ မၼ်းတေယူႇၵႂႃႇတေႃႇၸူဝ်ႈယဝ်ႉ။

ႁိူၼ်းဢၼ်ဝႃႈၼၼ်ႉ ထုၵ်ႇလီပဵၼ်ဢွင်ႈတီႈဢၼ်လွတ်ႈၽေး ပဵၼ်တီႈဢၼ်လုၵ်ႈၶႂ်ႈမိူဝ်း၊ ဢမ်ႇၸႂ်ႈပၢင်တိုၵ်းဢၼ်မီးသဵင်ပွင်ႉထႃႉလႃႇ လႄႈ ၼမ်ႉတႃၼွင်းယိုင်ႈ သင်ဝႃႈဝၼ်းၼိုင်ႈလုၵ်ႈဢွၼ်ႇ ၵေႃႉယႂ်ႇမႃး ဢမ်ႇယုမ်ႇၼိူဝ်တၢင်းႁၵ်ႉ ဢမ်ႇဝႆႉၵႃႈၶၼ် “ၼႃႈႁိူၼ်း ” ယႃႇၵႂႃႇၼႄးၽႂ် မႃးတူၺ်းတူဝ်ၵဝ်ႇၶိုၼ်းဝႃႈ ၸွင်ႇယၢမ်ႈႁၵ်ႉလႄႈပၼ်လွင်ႈဢုၼ်ႇၸႂ်ၶဝ်တေႉယူႇႁိုဝ်လႃႇ?။

မိူဝ်ႈတေလႃႇၵၼ် မိူဝ်ႈတေပၼ်ႁႂ်ႈလွင်ႈၸႂ်လမ်ၵုမ်းၵမ် ၸၢမ်းဝူၼ်ႉသေဢိၼ်ႉၼိုင်ႈၶႃႈလႄႈဝႃႈ မီးၽႂ်ႁပ်ႉထွမ်ႇယူႇ ၵွပ်ႈပိူဝ်ႈႁွႆးၸဵပ်းမၢင်ဢၼ်ၼၼ်ႉ ဢမ်ႇလႆႈၵိူတ်ႇမႃးတီႈ လွင်ႈထုၵ်ႇပေႃႉႁႅမ်ႁဵတ်းႁၢႆႉတူဝ်ၶိင်းၼၼ်ႉၵူၺ်း မၼ်းယင်းၵိူတ်ႇပဵၼ်မႃးလူၺ်ႈ ပေႃႈမႄႈဢမ်ႇဝူၼ်ႉထိုင်ႁူဝ်ၸႂ်လုၵ်ႈၼၼ်ႉယဝ်ႉ။

ပိၼ်ႇ-ငဝ်မွင်မိုတ်းမူဝ်း

ၵႂၢမ်းလႅၼ်ၽၢင်း

သိုဝ်ႉၵိၼ်ဢမ်ႇမူတ်း ၵူတ်ႉၵိၼ်ဢမ်ႇႁိုင် မိူဝ်ႈထိုင်ၶၢဝ်းယၢမ်း မၼ်းတေၼႄဢွၵ်ႇမႃးၵူၺ်း ၽႂ်ထုၵ်ႇလီလႆႈႁပ်ႉလွင်ႈယုမ်ႇယမ်။ ၵႂၢမ်းလႅၼ်ၽၢင်းၼၼ်ႉ မၼ်းတုမ်ႉတိူဝ်ႉလႆႈၶၢဝ်းယၢဝ်းယဝ်ႉ သမ်ႉဝႃႈဝၼ်းၼိုင်ႈ ၶႂ်ႈလၢတ်ႈလွင်ႈတေႉယူႇၵေႃႈ ဢမ်ႇမီးၼမ်ႉၼၵ်းႁႂ်ႈပိူၼ်ႈပေႃးယုမ်ႇၸႂ်လႆႈ။ ၵႂၢမ်းယွၵ်ႇလႅၼ်...

ၵႂၢမ်းလၢတ်ႈဢၼ်ႁဵတ်းႁႂ်ႈလီထွမ်ႇ

သင်ထူပ်းၺႃးၵူၼ်းတိုၵ်ႉမွင်ၸႂ်ယူႇ ဢမ်ႇလၢတ်ႈဝႃႈ “သူတေလႆႈၵႅၼ်ႇၶႅင်ဢိူဝ်ႈ ၽႂ်ၵေႃႈမီးလွင်ႈဢမ်ႇလီၵၼ်ၵူႈၵေႃႉယဝ်ႉ” သင်ၸၢမ်းလၢတ်ႈဝႃႈ“ႁဝ်းဢမ်ႇႁူႉသူလႆႈထူပ်းလွင်ႈသင်မႃးလၢႆလၢႆ သူပဵၼ်ယူႇယၢမ်းလဵဝ်ၼႆႉလႆႈၵေႃႈ ၶႅၼ်ႇၼႃႇယဝ်ႉဢိူဝ်ႈၼႃႈ” သင်ထူပ်းၺႃးၵူၼ်းၵေႃႉဢၼ်ဝူၼ်ႉၽိတ်းယူႇ ဢမ်ႇလၢတ်ႈဝႃႈ “လၢတ်ႈယဝ်ႉဝႃႈယႃႇႁဵတ်းၸိူင်ႉၼၼ်ၼႆ” သင်လၢတ်ႈဝႃႈ “ၽႂ်ၵေႃႈယၢမ်ႈႁဵတ်းၽိတ်းၵၼ်ၵူႈၵေႃႉယဝ်ႉ ၵူၺ်းၵႃႈ လွင်ႈဢၼ်သူႁတ်းယွမ်းႁပ်ႉမၼ်းၼႆႉၵူၺ်းၵေႃႈ...

ပၢႆးဝူၼ်ႉၵူၼ်းၶႂ်ႈၶိုၼ်ႈယႂ်ႇ

ပေႃးၶႂ်ႈႁႂ်ႈတူဝ်ၵဝ်ႇပဵၼ်ၵူၼ်းလီၼၼ်ႉ ဢမ်ႇလူဝ်ႇလႆႈပႂ်ႉႁႅင်းၸႂ်တီႈၽႂ်သေၸင်ႇတႄႇၵေႃႈလႆႈ ႁဝ်းၸၢင်ႈသၢင်ႈဢဝ်ႁင်းၵူၺ်းလႆႈ ယူႇတီႈတၢင်းဝူၼ်ႉႁဝ်းၵူၺ်း။ ယုမ်ႇယမ်ဝႃႈတူဝ်ၵဝ်ႇ မီးလွင်ႈၶိုပ်ႈၼႃႈလႆႈတႃႇသေႇ ဢမ်ႇဝူၼ်ႉဝႃႈတူဝ်ၵဝ်ႇဢမ်ႇၵတ်ႉၶႅၼ်ႇ မၼ်းယင်းပႆႇထိုင်ၶိင်ႇထိုင်ၶၢဝ်းမၼ်းၵူၺ်း ၵူၼ်းၶႅၼ်ႇၵေႃႈပဵၼ်ၵူၼ်းၵေႃႉဢၼ်ႁတ်းႁဵတ်းႁတ်းၸၢမ်း ဢမ်ႇၵူဝ်ဝႃႈတေၽိတ်း...