တွၼ်ႈသၢမ်သိပ်းသွင်
ဝၢႆးသေလၢႆႈၽူႈၵွၼ်းႁူင်းႁဵၼ်းယဝ်ႉ ၵဵဝ်ႇလူၺ်ႈလွင်ႈဝႆႉၸူႉဝႆႉၸူဝ်းၸိူဝ်းၼႆႉ ၶူးၶဝ်ၵေႃႈဝႆႉမဝ်မၢင်မႃးသေ၊ ႁၼ်ယူႇၵေႃႈဢမ်ႇတၵ်ႉဢမ်ႇဝႃႈ ႁူႉယူႇၵေႃႈပွႆႇၵႂႃႇႁဵတ်းၼၼ်ၵူၺ်း၊ မိူၼ်ဝႃႈလုၵ်ႈႁဵၼ်းၵေႃႈ တေယူႇငၢႆႈၵိၼ်လူမ်ၵၼ်မႃးတႄႉတႄႉယူႇ။ ယူႇၸွမ်းၵၼ်ၼႂ်းႁွင်ႈႁဵၼ်းပဵၼ်ၵူႈပဵၼ်တွႆး၊ ၵႂႃႇလႂ်ၵေႃႈပဵၼ်ၵူပ်ႉပဵၼ်ၵူႈ၊ ႁၼ်ယဝ်ႉၵေႃႈ ၶႃႈသမ်ႉပေႃးၶႂ်ႈပဵၼ်ၶူးလူင်ႁေၵမ်ႉယဝ်ႉ၊ မၼ်းၶတ်းတႃၼႃႇၼႃႇ ပေႃးဢမ်ႇဢၢၼ်းၼႃႇပိူၼ်ႈသေဢိတ်းတေႉလူင်။ ယၢမ်းၼၼ်ႉ ၶမ်းလိူၼ်သႂ်ၼၼ်ႉၵေႃႈ မႃးၸူးၶႃႈသေယဝ်ႉ
“သႅင်ၶမ်း! မိုတ်ႈၵၼ်တင်းပီႈၸွမ်ၶိူဝ်းယူႇဢမ်ႇၸႂ်ႈႁႃႉ”
“ပေႃးပဵၼ်လွင်ႈႁႂ်ႈႁဵတ်းၶဵဝ်ပၼ်တႄႉဢမ်ႇလူဝ်ႇမႃးထၢမ်ၼႃ”
“ႁူႉလႆႈၸိူင်ႉႁိုဝ်လႃႇ!”
“ဢၼ်ယိပ်းမႃးၼၼ်ႉဢမ်ႇၸႂ်ႈလိၵ်ႈၶဵဝ်ႁႃႉတေႃႈ..”
“ဢိုမ်ႈ!! ၸႂ်ႈယဝ်ႉ..သူၸွႆႈဢဝ်ၵႂႃႇပၼ်ႁဝ်းၽွင်ႈ”
“ဢဝ်ၵႂႃႇပၼ်ႁင်းၵူၺ်းလႄႈ.. လွင်ႈၸိူင်ႉၼႆႁဝ်းဢမ်ႇၶႂ်ႈသုၵ်ႉယုင်ႈၸွမ်း”
“ႁဝ်းတေႁဵတ်းႁိုဝ်ဢဝ်ၵႂႃႇပၼ်လႃႇ! ႁဝ်းၵေႃႈဢၢႆယူႇၵူၺ်းဢိူဝ်ႈ ၸွႆႈဢိတ်ႉၼိုင်ႈလႄႈ သူၵေႃႈမိုတ်ႈၵၼ်ယူႇယဝ်ႉလူး”
“တေဢၢႆသင်လႃႇ မိူဝ်ႈၶဝ်ပၼ်ၶဝ်ၵေႃႈမႃးပၼ်တီႈတူဝ်သူၵူၺ်းဢမ်ႇၸႂ်ႈႁိုဝ်”
ၶမ်းလိူၼ်သႂ်ၼၼ်ႉၵေႃႈ မိုင်လူင်ၵႂႃႇယဝ်ႉ “ၶဝ်ပၼ်ႁဝ်းမႃးမိူဝ်ႈလႂ်လႃႇ ႁဝ်းဢမ်ႇလႆႈႁၼ်ၼႃ သင်ၶဝ်ၵေႃႉမႃးပၼ်ႁဝ်းတႄႉ ႁဝ်းၵေႃႈတေၵႂႃႇပၼ်ၶဝ်ၵမ်းလဵဝ်ယဝ်ႉ” ႁဵတ်းမိူၼ်ဢၢႆဢၢႆဝႆႉသေ ၵူမ်ႈလၢတ်ႈႁိမ်းႁူၶႃႈလွႆးလွႆး “ႁဝ်းလႆႈၸႂ်ၶဝ်ဢိူဝ်ႈ! လႆႈၸႂ်မႃးႁိုင်ၼႃႇယဝ်ႉ ၵူၺ်းၵႃႈ ႁဝ်းၵေႃႈဢမ်ႇႁူႉဝႃႈတေလႆႈႁဵတ်းႁိုဝ်လႄႈ မႃးယွၼ်းႁႂ်ႈသူၸွႆႈၼၼ်ႉၼႃႇ”
မိူဝ်ႈဢၼ်ၶႃႈလႆႈငိၼ်းၼၼ်ႉၵေႃႈ တူၺ်းၼႃႈမၼ်းလီလီသေ ႁဵတ်းႁႂ်ႈၶႃႈဝူၼ်ႉထိုင်မိူဝ်ႈပူၼ်ႉမႃး ဢၼ်ၸွမ်ၶိူဝ်းဢဝ်လိၵ်ႈၶဵဝ်မၼ်းပၼ်ၶႃႈၼၼ်ႉသေ ၸင်ႇလၢတ်ႈၸူးၶိုၼ်းၶမ်းလိူၼ်သႂ်ၵႂႃႇ။
“ၸွမ်ၶိူဝ်းၵေႃႈလႆႈၸႂ်သူဢိူဝ်ႈ! ဝၼ်းပူၼ်ႉမၼ်းဢဝ်လိၵ်ႈမႃးပၼ်သူယူႇ ၵူၺ်းၵႃႈသူဢမ်ႇယူႇလီၼၼ်ႉၼႃႇ”
“မိူဝ်ႈလႂ်လႃႇ?” ၵူမ်ႈၼႃႈထၢမ်ၸူးၼင်ႇၶႂ်ႈႁူႉတႄႉတႄႉၼၼ်ႉယဝ်ႉ။
“ၸဵမ်မိူဝ်ႈပိူၼ်ႈတႄႇၶိုၼ်ႈႁူင်းႁဵၼ်းပုၼ်ႉၼေႈ…”
“ႁိုင်ပေႃးတၢၼ်ႇၼၼ်ႉႁႃႉ! ၵူၺ်းၵႃႈပဵၼ်သင်လႄႈ ႁဝ်းဢမ်ႇလႆႈႁပ်ႉလိၵ်ႈၶဝ်သေပွၵ်ႈလႃႇ”
“ၽႂ်တေႁဵတ်းႁိုဝ်ႁူႉ!…ဢဝ်ၵႂႃႇပၼ်လႃႈ ၶဝ်ၵေႃႈလႆႈၸႂ်သူယူႇၵူၺ်း”
ယၢမ်းၼၼ်ႉ“ဢေးယိင်း! ဢွၵ်ႇမႃးလႄႈ” ၸိုၼ်ႈသႂ်ဢၼ်ယူႇၼွၵ်ႈႁွင်ႈၼၼ်ႉ ႁွင်ႉၶႃႈဢွၵ်ႇၵႂႃႇယူႇ၊ ၵွပ်ႈဝႃႈပဵၼ်ၶၢဝ်းလဵၼ်ႈၼၼ်ႉယဝ်ႉ။ ၶႃႈၵေႃႈလႆႈဢွၵ်ႇၵႂႃႇၸူးၸိုၼ်ႈသႂ်ၶဝ်သေ လႆႈႁၼ်ၼူၼ်းမူဝ်ၶဝ်သီႇႁႃႈၵေႃႉ ဢွၼ်ၵၼ်ထတ်းလွၵ်းတႃၸီးလူင်ယၢဝ်းဝႃႈယၢဝ်း ပေႃးၶႂ်ႈတဵမ်ပၢင်ႇႁူင်းႁဵၼ်းယူႇ။
“ႁဵတ်းယၢဝ်းပေႃးတၢၼ်ႇၼႆႉတႄႉ တႃၵၢင်မၼ်းႁိူဝ်ႉထူၼ်ႈယဝ်ႉယူဝ်ႉဝႃႈ”ၶႃႈထၢမ်။
“ၸိူင်ႉၼႆဢိူဝ်ႈၵျေႃႇ၊ ႁွင်ႈႁဝ်းလႄႈႁွင်ႈA တေလဵၼ်ႈၶႄႉၵၼ်ဝႃႇ ၶူးၵေႃႈတေမႃးလဵၼ်ႈၸွမ်း” ၸိုၼ်ႈသႂ်တွပ်ႇ။
“ယႃႇပေလၢတ်ႈဝႃႈၶူးၵုမ်းၸၼ်ႉၽႂ်ၸၼ်ႉမၼ်း”
“ဢိုမ်ႈ! မႅၼ်ႈယဝ်ႉ”
“သုမ်းယူႇယူဝ်ႉ! ၸၼ်ႉႁဝ်း! ၶူးပိုၼ်ၼၼ်ႉၵႆႉလႅၼ်ႈတႃႇသေႇ တူဝ်သုင်ၶႅၼ်ယၢဝ်းၶႃယၢဝ်း ပေႃးလွၵ်းဢမ်ႇၵႂၢင်ႈတႄႉသုမ်းမၢၼ်ႇမၢၼ်ႇယဝ်ႈ၊ ၶူးပိူင်းၾႃႉၼၼ်ႉသမ်ႉတေလဵၼ်ႈလႆႈယူႇႁႃႉ တေႃႈၼင်ႇပႆတၢင်းၵူၺ်းယင်းၵူဝ် ၼင်လိၼ်မိူင်းလူမ်ႇလူးၵွၼ်ႇ”
“ၽႂ်ဝႃႈၶူးပိူင်းၾႃႉတေလဵၼ်ႈ ၶူးၽိဝ်ၾႃႉၵေႃႉတေလဵၼ်ႈ”
“ဢေႃ!” ဢမ်ႇႁူႉဝႃႈၶႃႈပဵၼ်သင် ပေႃးဝႃႈလႆႈငိၼ်းၸိုဝ်ႈၶူးၽိဝ်ၾႃႉၼႆၵေႃႈ ၼင်ႇဝႃႈလၢတ်ႈၵႂၢမ်းပေႃးဢမ်ႇဢွၵ်ႇ ၼင်ႇႁၢင်ႈပေႉမႃးၵပ်ႉဢူၵ်းၵပ်ႉၸႂ်ဝႆႉၵေႃႈဢမ်ႇႁူႉ။
ပၢင်ၶႄႉၶဵင်ႇႁဝ်းၵေႃႈ လႆႈတႄႇၵႂႃႇယူႇယဝ်ႉ။ မိူဝ်ႈတႄႇတႄႉ ဢၢၼ်းႁဵတ်းၼိုင်ႈႁွင်ႈၼိုင်ႈၸုမ်းၵူၺ်း၊ ၵူၺ်းၵႃႈ ၵူၼ်းၶႂ်ႈလဵၼ်ႈမၼ်းၼမ်ဝႆႉလႄႈ လႆႈႁဵတ်းသွင်ၸုမ်းယူႇ။ ၼိုင်ႈၸုမ်းလႂ်ဝႆႉပဵၼ်ၸဵတ်းၵေႃႉယဝ်ႉ။ တေလဵၼ်ႈၵၼ်ပဵၼ်ၸုပ်ႈ မိူၼ်ပုတ်ႈၵူၼ်းၵၼ်ၼၼ်ႉၵူၺ်း။ ၶႃႈတႄႉၵေႃႈ ပဵၼ်ၸုပ်ႈသွင်တင်းၸိုၼ်ႈသႂ်ယဝ်ႉ၊ ၼူၼ်းမူဝ်ၶဝ်တႄႉပဵၼ်ၸုပ်ႈၼိုင်ႈယူႇ။ ၶႃႈၵေႃႈ ၼင်ႇႁိုဝ်တေလႅၼ်ႈလႆႈလီလူမ်လူမ် ပိူၼ်ႈပေႃးတေဢမ်ႇၸၢင်ႈဢဝ်ႁဝ်းလႆႈၼၼ်ႉၵေႃႈ ထွတ်ႇသိူဝ်ႈထွတ်ႇၶႅပ်းတိၼ်ပႂ်ႉထႃႈယဝ်ႉ။
1 ၸုပ်ႈ ပၼ်လဵၼ်ႈသွင်ၵမ်း ပွၵ်ႈၵမ်းၼိုင်ႈ ႁွင်ႈ A ပႂ်ႉတႃ လႄႈ ပွၵ်ႈသွင်မႃး ႁွင်ႈ B ပႂ်ႉတႃသေ ပေႉဝႆႉ၊ ႁွင်ႈႁဝ်းသမ်ႉယူႇၽၢႆႇပေႉသေဢွၵ်ႇလႄႈ ႁဝ်းၶဝ်ႈတႅၼ်းၵေႃႈ ယူႇၽၢႆႇပေႉဝႆႉ ၼၼ်ႉယဝ်ႉ။ ဢၼ်ၶႃႈဢမ်ႇတၼ်းၾၢင်ႉမႅၼ်ႈၼၼ်ႉတႄႉ ၸုပ်ႈႁဝ်းၼႆႉ မီးၶူးၽိဝ်ၾႃႉၼၼ်ႉယိုင်။ မိူဝ်ႈဝႃႈတႄႇယဝ်ႉၼႆၵေႃႈ ၶႃႈၵေႃႈ လႅၼ်ႈဢႅၼ်ႇလူင်းၵႂႃႇၸွမ်းတႃမၼ်း ပူၼ်ႉၵႂႃႇပဵၼ်တႃပဵၼ်တႃယူႇ ၽိူဝ်ႇထိုင်တႃၸမ်တေသုတ်းၼၼ်ႉ ၶႃႈဢမ်ႇတၼ်းၾၢင်ႉမႅၼ်ႈတႃၵၢင်မၼ်းလႄႈ ၺႃတေၺႃးၶဝ်ဢဝ်လႆႈယဝ်ႉ သင်ဢမ်ႇမီးမိုဝ်းၶူးၽိဝ်ၾႃႉၸၼ်ဝႆႉတႄႉ တူဝ်ၶႃႈၼၼ်ႉၵေႃႈ ၵႂႃႇၸပ်းသႂ်ၶူးၼၼ်ႉ ၸမ်ဝႃႈၸမ်ယဝ်ႉ၊ တႃၵၢင်မၼ်းၼၼ်ႉၵေႃႈ သမ်ႉပႂ်ႉတီႈႁႃးၼၼ်ႉယူႇတိၵ်းတိၵ်းဝႃႇ ပေႃးသုတ်ႉၵႂႃႇၼႃႈသမ်ႉၶဝ်တေဢဝ်လႆႈ ပေႃးသုတ်ႉပႃႈလင်သမ်ႉ ႁႃးသွင်ၵေႃႉၼၼ်ႉတေဢွၵ်ႇတႃၵႂႃႇယဝ်ႉ။ သမ်ႉဝႃႈဢမ်ႇလႅၼ်ႈၵေႃႈ ၶႃႈၼၼ်ႉတႄႉပေႉၵႅၼ်ႇမႆႈဝႃႈမႆႈ ထူၺ်ႈၸႂ်ပေႃးဢမ်ႇၶိုတ်းၵၼ်လႆႈ ႁိူဝ်ႇလူင်ၵေႃႈပင်းလူင်းပင်းလူင်းယူႇတိၵ်းတိၵ်း။ ၶႃႈယုမ်ႇၸႂ်လႆႈယဝ်ႉဝႃႈ ၶႃႈမီးလူမ်းႁူဝ်ၸႂ်ၼႆ။
မိူဝ်ႈဢၼ်ၶႃႈတိုၵ်ႉမိူၼ်ႇမိုင်ယူႇၼၼ်ႉ ၶူးၵေႃႈၸၼ်ၶႅၼ်ၶႃႈပူၼ်ႉၵႂႃႇထႅင်ႈတႃယဝ်ႉ ထိုင်တႃၵမ်းလိုၼ်းသုတ်းၼၼ်ႉ ၵူၼ်းထိင်းမၼ်းဢမ်ႇပေႉလႆႈယဝ်ႉလႄႈ ႁႃးၵေႃႈၶိုၼ်ႈလႆႈလီလီသေ ဢွၼ်ၵၼ်ယွၵ်ႇၵႂႃႇၸွမ်းၵၼ်ယဝ်ႉ ၶူးၵေႃႉယွၵ်ႇ ၶႃႈၵေႃႉၶိုၼ်ႈ၊ ၶူးၵေႃႈၶိုၼ်ႈမႃးပႃႈလင်သေယွၵ်ႇၵႂႃႇ ထိုင်တီႈႁႃးသွင်ၵေႃႉပေႃးဢဝ်ပူၼ်ႉ တႃၼိုင်ႈယဝ်ႉတႃၼိုင်ႈၵႂႃႇၸွမ်းၵၼ်ယူႇ။ မိူဝ်ႈၸမ်တေထိုင်ႁူဝ်မၼ်းယဝ်ႉၼၼ်ႉ ၵူၼ်းၼႂ်းႁဝ်းသမ်ႉ ထုၵ်ႇပိူၼ်ႈဢဝ်လႆႈၼႆၵေႃႈ သုမ်းႁေယဝ်ႉၼႃႇ။
ၺႃးၵမ်းၶႃႈပႂ်ႉတႃၼႆၵေႃႈ ဢႃႈၶႅၼ်ဢႃႈမိုဝ်း သမ်ႉပေႃးတဵမ်လူင်ဝႆႉယဝ်ႉ၊ ၵူၺ်းၵႃႈ ၶဝ်ပေႉႁဵတ်းႁိုဝ်လွတ်ႈၵႂႃႇၵေႃႈဢမ်ႇႁူႉ တႃၶႃႈၼၼ်ႉတႄႉ သမ်ႉပေႃးဢမ်ႇမီးၽႂ်ၶမ်ႁေၵေႃႉ၊ ၵတ်ႉၵႃႈပႂ်ႉပွတ်းၼႂ်းၵၢင်မၼ်းၵူၺ်းလႃႈ။ ၶူးတႄႉပႂ်ႉတႃၵၢင်မၼ်းဝႆႉယဝ်ႉ။ ဢမ်ႇႁိုင်ၸုမ်းႁဝ်းၵေႃႈဢဝ်ၶဝ်လႆႈၶိုၼ်းသေ ၸုပ်ႈႁဝ်းၵေႃႈယဝ်ႉၵႂႃႇ၊ ၶၢဝ်းယၢမ်းၵေႃႈမူတ်းသဵင်ႈၵႂႃႇယဝ်ႉ ပေႃးၼပ်ႉလီလီတႄႉ လႆႈဝႃႈၽႂ်ၵေႃႈဢမ်ႇပေႉၽႂ်၊ ၵူၺ်းၵႃႈ မၼ်းၵေႃႈပဵၼ်ဢၼ်ၵျေႃႇတေႉယဝ်ႉ။ ၶၢဝ်းယၢမ်းၼႆႉ တေႁဵတ်းႁႂ်ႈၶႃႈဢမ်ႇလိုမ်းမၼ်းလႆႈသေပွၵ်ႈ ၼၼ်ႉယဝ်ႉ။
ဝၼ်းယဝ်ႉဝၼ်းပူၼ်ႉၵႂႃႇ ဢမ်ႇတၼ်းႁူႉတၼ်းႁၼ် ပီႊမႂ်ႇတႆးဢၼ်ဝႃႈၼၼ်ႉၵေႃႈ ႁွတ်ႈထိုင်မႃးယဝ်ႉ။ တီႈၼႂ်းဝဵင်းႁဝ်းၼႆႉၵေႃႈ လႆႈၸတ်းႁဵတ်းပွႆးယူႇ၊ တီႈႁူင်းႁဵၼ်းၵေႃႈ ပိၵ်ႉဢိုတ်းႁဵၼ်းပၼ်သေ ပေႃးထိုင်မႃးဝၼ်းပီႊမႂ်ႇၼၼ်ႉၵေႃႈ တေမီးပၢင်ၶႄႉၶဵင်ႇလဵၼ်ႈႁႅင်းၵၼ်ၼႆယူႇ၊ ႁၼ်ၶဝ်ပိုၼ်ၽၢဝ်ႇဝႆႉတႄႉ တေမီးလဵၼ်ႈမၢၵ်ႇၼင်၊ မၢၵ်ႇသွင်းဝၢႆ၊ တႃၸီး၊ လႅၼ်ႈၶေႉၵၼ်၊ လႅၼ်ႈသၢမ်ၶႃ၊ ၶီႇမႃႉတူင်ႈတၢင်ႈ၊ ပေႃႉမွၼ်၊ ၶိုၼ်ႈလၵ်းၼမ်ႉမၼ်းၸိူဝ်းၼႆႉ ၽႂ်ၶႂ်ႈလဵၼ်ႈၼႆၵေႃႈ ႁႂ်ႈသႂ်ႇသၢႆမၢႆမၼ်းဝႆႉပၼ်ၼႆယူႇ။ ၼႂ်းၼၼ်ႉ ၶႃႈတႄႉ တိုၼ်းဢမ်ႇပႃးသၢႆမၢႆမၼ်းႁေဢၼ် ၵွပ်ႈဝႃႈၶႃႈၶၢၼ်ႉၵႂႃႇႁူင်းႁဵၼ်းဝၼ်းလိုဝ်ႈယဝ်ႉ။
မိူဝ်ႈၼႆႉၵေႃႈပဵၼ်ဝၼ်းလိူၼ်သိပ်းသွင်လပ်းလႄႈ ၼၢႆးႁဝ်းၶႃဢၢႆႈၸၢႆးၼၼ်ႉတႄႉ ၵႂႃႇၵျွင်းမႃးယဝ်ႉ၊ ၶႃႈတမ်ႉပႆႇလုၵ်ႉၵွၼ်ႇ ၶၢဝ်းၵတ်းၼႆႉမၼ်းၼွၼ်းဢုၼ်ႇၼႃႇ ၵူၺ်းပေႃးယိုၼ်းမိုဝ်းဢွၵ်ႇၽႃႈ ၵႂႃႇသုၵ်ႈၼႃႈသမ်ႉၵတ်းဝႃႈၵတ်းၼေႈ။
“ဢေးယိင်း!! ၵၢင်ဝၼ်းပေႃးဢွၵ်ႇပူၼ်ႉႁူဝ်လွႆယဝ်ႉမႂ်းပႆႇလုၵ်ႉၵွၼ်ႇႁႃႉ” ၼၢႆးႁဝ်းလၢတ်ႈ။
ပေႃးဢမ်ႇလူဝ်ႇၵႂႃႇႁူင်းႁဵၼ်း ၽႂ်တေႁဵတ်းႁိုဝ်ၶႂ်ႈလုၵ်ႉလႃႇ၊ ၶႃႈၼၼ်ႉတႄႉ ယင်းတိုၵ်ႉၼွၼ်းၶူတ်းႁေ “ဢေႃႈ..” လၢတ်ႈယူႇၼႂ်းၽႃႈၵူၺ်း။
“လုၵ်ႉလႆႈယဝ်ႉၼႃႈ!! ပေႃးဢမ်ႇၶႂ်ႈႁႂ်ႈၵဝ်ဢဝ်ၼမ်ႉမိူဝ်းထွၵ်ႇပၼ်မႂ်းၵေႃႈ”
“ၼၢႆးႁဝ်းတိုၵ်ႉၵႂႃႇၵျွင်းမႃးၵူၺ်းႁိုဝ်! ပေႉပွင်ႉၼႃႇလႃႇဢေႉ”
“လုၵ်ႈဢွၼ်ႇၵေႃႉၼႆႉမႂ်းႁၢင်ႈၸၢင်ႈတွပ်ႇၼႃႇ လုၵ်ႉလႄႈလႃႈၼႃႇယဝ်ႉဢိူဝ်ႈ!”
“လုၵ်ႉလႄႈ..ႁႃးၵႂႃႇၵဵပ်းၽၵ်းၶၢမ်းၼႂ်းၼႃး ပေႃးမႂ်းၶႂ်ႈၵိၼ်ထူဝ်ႇၽူးဢုၼ်ႇယူႇၵေႃႈ” ဢၢႆႈၸၢႆးၵေႃႈ လၢတ်ႈယူႇၼွၵ်ႈႁိူၼ်းၼၼ်ႉယဝ်ႉ။
ပေႃးဝႃႈထူဝ်ႇၽူးဢုၼ်ႇၼႆ ႁၢင်ႈတူဝ်ၸႂ်ၼႆႉ သမ်ႉပေႃးဢုၼ်ႇမႃးၸွမ်းတေႉလူင်၊ ၶႃႈၵေႃႈၽုၼ်ႇၽၢၼ်ႇလုၵ်ႉၵမ်းလဵဝ်ယဝ်ႉ လၢၵ်ႈဢဝ်သိူဝ်ႈယၢဝ်းယဝ်ႉ ဢွၵ်ႇႁွင်ႈၼွၼ်းမႃးသေ ၼၢႆးႁဝ်းၼၼ်ႉၵေႃႈ ၶႃႈလုၵ်ႉယဝ်ႉဢမ်ႇပႆႇယဝ်ႉထႅင်ႈၵွၼ်ႇ
“ဢေးယိင်း! ႁဵတ်းႁင်မႂ်းဢမ်ႇၶွၵ်ႉၽႃႈမႂ်းလႃႇ!! တေႁႂ်ႈလႆႈလၢတ်ႈယူႇတႃႇသေႇႁႃႉဢေႉ လုၵ်ႈဢွၼ်ႇၵေႃႉၼႆႉ”
“ၶွၵ်ႉဢမ်ႇၶွၵ်ႉၵေႃႈ ပေႃးလူဝ်ႇၼွၼ်းၶိုၼ်းယူႇယဝ်ႉၼၢႆးၵေႃႈ”
“ၶွၵ်ႉၽႃႈသုၵ်ႈၼႃႈသီတႃမႂ်းယဝ်ႉၸွင်ႇၵွႆႈၵႂႃႇလႄႈ” ဢၢႆႈၸၢႆးႁဝ်းၼၼ်ႉၵေႃႈ လၢတ်ႈၸွမ်းထႅင်ႈႁေ။ ဢမ်ႇႁူႉဝႃႈၶႃသွင်ၵေႃႉၼႆ ပေႉမႃးမႅၼ်ႈၵၼ်ဝႃႈမႅၼ်ႈၵၼ်ဢဝ်။
“ၶႃႈဝႃႈၼမ်ႉႁွင်ႈၼႂ်းၼႃးၼၼ်ႉမၼ်းဢုၼ်ႇလီ ၵႂႃႇသုၵ်ႈတၢင်းပုၼ်ႉဢဝ်ၵေႃႈလႆႈယဝ်ႉဝႃႈ”
ၶႃႈၵေႃႈဢမ်ႇသူၼ်ၸႂ်သင်ယဝ်ႉ တူၺ်းၵႂႃႇၼႂ်းသွင်ႇၾႆးၼၼ်ႉ မုင်ႈႁၼ်ၼိူဝ်ၽိူၼ် မီးၶဝ်ႈတမ်ငႃးၶူဝ်ႈၼႆၵေႃႈ လႆႈၵႂႃႇဢဝ်ၵိၼ်ႁေသွင်သၢမ်ပွတ်းယဝ်ႉ တူဝ်ႈတၼ်းဢွၵ်ႇႁိူၼ်းၵမ်းလဵဝ်ယူႇ။ ၵူၺ်းၵႃႈ ၼၢႆးႁဝ်းၼၼ်ႉၵေႃႈလၢတ်ႈၸူးဢၢႆႈၸၢႆး
“ႁၢင်ႈၶူးၽိဝ်ၾႃႉၵေႃႈဝႃႈ..တေၵႂႃႇၸွမ်းၼႆႁိုဝ်လႃႇ ယႃႇလိုမ်းႁွင်ႉၶူးၶဝ်လႄႈၼႃႈ”
မွင်းဝႃႈငိၼ်းၶူးၽိဝ်ၾႃႉတေၵႂႃႇၸွမ်းၼႆၵေႃႈ ၶႃႈၼၼ်ႉတႄႉ ၼႅတ်ႈဢဝ်လူတ်ႉထိပ်ႇၶႃႈပၼ်ႇဢွၵ်ႇၵႂႃႇၵမ်းလဵဝ်သေ
“ၵဝ်ၵႂႃႇထႃႈဢွၼ်တၢင်းယဝ်ႉၼႃႈ!”
“ၶူးတေဢဝ်ၵႃးၵႂႃႇဢိူဝ်ႈ…” သဵင်ၼၼ်ႉလႆႈငိၼ်းမႃးယူႇပႃႈလင်ၶႃႈဝွႆးဝွႆး။
မိူဝ်ႈဢၼ်ၶႃႈပၼ်ႇလူတ်ႉထိပ်ႇ ၵႂႃႇၸွမ်းတၢင်းတိၵ်းတိၵ်းၼၼ်ႉ ယိုင်ႈပၼ်ႇၵေႃႈ ယိုင်ႈႁိူဝ်ႉမႃးယဝ်ႉလႄႈ ၸင်ႇတေၶုၵ်းၸႂ်လႆႈ လွင်ႈဢၼ်ၶႃႈႁဵတ်းၼႆႉသေ မီးၶေႃႈထၢမ်ဢွၵ်ႇမႃးတင်းၼမ်ယဝ်ႉ ၶႃႈႁဵတ်းသင်ယူႇလႃႇ?၊ ပဵၼ်သင်လႄႈၶႃႈတေလႆႈမႃးၸိူင်ႉၼႆ?၊ ၶႃႈပဵၼ်သင်ၵႂႃႇယဝ်ႉ?၊ ၶႃႈပၢႆႈယူႇၸွင်ႇၸႂ်ႈ?၊ ၶႃႈသမ်ႉတေပၢႆႈႁဵတ်းသင်?၊ ယိုင်ႈထၢမ်ယိုင်ႈဢမ်ႇပွင်ႇၸႂ် ၶႃႈၼၼ်ႉပဵၼ်သင်ၵႂႃႇယဝ်ႉလႃႇ?၊ ဝူၼ်ႉၵႂႃႇဝူၼ်ႉမႃးၵေႃႈ ဢမ်ႇပွင်ႇၸႂ်ၸွမ်းတူဝ်ၸဝ်ႈၵဝ်ႇယဝ်ႉ။
ယၢမ်းၼၼ်ႉၵႃးၶူးၵေႃႈ ၽႅတ်ႈပူၼ်ႉၶႃႈၼၼ်ႉၵႂႃႇလွႆးလွႆးႁေ ၵိုတ်းယူႇပႃႈၼႃႈၶႃႈၼၼ်ႉယဝ်ႉ၊ ဢၢႆႈၸၢႆးငွၵ်ႈႁူဝ်မၼ်းတူၺ်းၶႃႈမႃးသေ
“ၵႂႃႇထႃႈမႂ်းယဝ်ႉၼႃႈ” ၶဝ်ၼၼ်ႉၵေႃႈ ဢီးပတ်ႉထိပ်ႇၽုၼ်ႇမုၵ်ႉ ၽုၵ်းပိဝ်ၽူင်ႉလူင်ၵႂႃႇတၢင်းၼႃႈၶႃႈၼၼ်ႉယဝ်ႉ။
မိူဝ်ႈႁၼ်ၸိူင်ႉၼၼ်ၶႃႈၸင်ႇတေၾၢင်ႉမႅၼ်ႈဝႃႈ ပဵၼ်ယွၼ်ႉၶူးၽိဝ်ၾႃႉႁႃႉတေႃႈ မိူဝ်ႈၶႃႈငိၼ်းၸိုဝ်ႈၶဝ်ၼၼ်ႉ ၶႃႈၵေႃႈၼႅတ်ႈဢွၵ်ႇမႃးၵမ်းလဵဝ်ဢမ်ႇၸႂ်ႈႁိုဝ်?၊ ယဝ်ႉၶႃႈသမ်ႉတေလႅၼ်ႈပၢႆႈႁဵတ်းသင်?၊ တေပၢႆႈၵွပ်ႈသင်?၊ မိူဝ်ႈမီးၶေႃႈထၢမ်ၵေႃႈ တိုၼ်းမီးၶေႃႈတွပ်ႇယူႇၵူၺ်း၊ တွၼ်ႈတႃႇႁႂ်ႈပေႃးႁူႉၼၼ်ႉ မိူဝ်ႈၼႆႉၵေႃႈလႆႈထူပ်းၶဝ်ယဝ်ႉ ႁူပ်ႉတေႃႇၼႃႈၶဝ်တူၺ်းလီလီသေ မၼ်းတေပဵၼ်သင်မႃးၵေႃႈ တေလႆႈႁူႉၵၼ်ယူႇ။
တွၼ်ႈသၢမ်သိပ်းသွင်သုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢမ်သိပ်းသၢမ်ၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
