တွၼ်ႈသီႇသိပ်းသွင်
ထိုင်ဝၼ်းလူင်းႁူင်းယႃယဝ်ႉ သႅင်ၶမ်းၵေႃႈ ႁၢင်ႈႁႅၼ်းတူဝ်တူဝ်ႈတၼ်းယဝ်ႉၼႆၵေႃႈ ဢွၵ်ႇႁူင်းယႃမႃးယူႇ၊ ဢမ်ႇထၢင်ႇဢမ်ႇထူမ် လႆႈႁၼ်ၽိူဝ်ၶမ်းပႂ်ႉဝႆႉယူႇတီႈတၢင်းၶဝ်ႈၼၼ်ႉသေ ၶဝ်ႈမႃးႁပ်ႉဢဝ်ၶူဝ်းၶွင်တီႈမိုဝ်း သႅင်ၶမ်းၼၼ်ႉၵႂႃႇယဝ်ႉ။
“မိူဝ်းလႄႈႁဝ်းမိူဝ်းသူင်ႇ!!..”
“ႁဝ်းမိူဝ်းႁင်းၵူၺ်းလႆႈယူႇၶႃႈ..ဢမ်ႇၶႂ်ႈသုၵ်ႉယုင်ႈၶၢဝ်းယၢမ်းႁဵတ်းၵၢၼ်သူဢေႃႈ”
“သင်ႁဝ်းမႃးႁေဢမ်ႇလႆႈႁပ်ႉသူမိူဝ်း..ၼၼ်ႉယဝ်ႉ ပိူၼ်ႈႁွင်ႉဝႃႈသုမ်းၶၢဝ်းယၢမ်း”
သႅင်ၶမ်းၵေႃႈလၢတ်ႈယူႇၼႂ်းၸႂ် “ၵူၼ်းၵေႃႉၼႆႉမၼ်းပဵၼ်သင်လႄႈ.. လႆႈၸႂ်တဵၵ်းၵႂၢမ်းၵၼ်တိၵ်းတိၵ်းလႃႇၼႆႉ”
မၼ်းၵေႃႈၵႃႈလႆႈၶီႇၵႃးမိူဝ်းၸွမ်းၶဝ်ၵႂႃႇယူႇယဝ်ႉ။ ဢမ်ႇႁူႉဝႃႈတေလၢတ်ႈသင်လႄႈ ယဵၼ်လူင်မိူဝ်းၵႂႃႇႁင်းၽႂ်ႁင်းမၼ်း၊ မိူဝ်ႈသဵင်မၼ်းယဵၼ်ႁႅင်းၼႃႇၼၼ်ႉ သႅင်ၶမ်းၵေႃႈ ဝၢႆႇၼႃႈယၵ်ႉတူၺ်းၸူးၶဝ်ႁေ
“ယိၼ်းၸူမ်းယဝ်ႉၶႃႈ..”
ၽိူဝ်ၶမ်းၼၼ်ႉၵေႃႈ ယၵ်ႉတူၺ်းသႅင်ၶမ်းသေယုမ်ႉယဝ်ႉ လၢတ်ႈၸူး
“ပေႃးၶႂ်ႈယိၼ်းၸူမ်းႁဝ်းယူႇတႄႉၵေႃႈ ယူတ်းယႃတူဝ်ႁႂ်ႈၸိုၼ်ႈၶႅၼ်းလီႁေ ၵႂႃႇလဵင်ႉၶဝ်ႈႁဝ်းၵူၺ်းၵေႃႈ ပေႃးယဝ်ႉ”
“ဢေႃႈၶႃႈ…တေလဵင်ႉယူႇၵူၺ်း တူၵ်ႇၵၼ်ပေႃးတၢၼ်ႇဝႃႈၵူဝ်ပိူၼ်ႈလိုမ်းယဝ်ႉ..”
“ၵူဝ်သူဢမ်ႇမီးၶၢဝ်းယၢမ်းပၼ်ၵူၺ်းၼင်ႇၵဝ်ႇ.. ပေႃးၵႆႉလၢတ်ႈၼႆ ယူဝ်တေၸၢင်ႈၽႄၶၢဝ်းယၢမ်းပၼ်ဝႆႉၽွင်ႈၼႆၵူၺ်း”
ၽိူဝ်ၶမ်းၵေႃႈ မိူဝ်းသူင်ႇသႅင်ၶမ်းႁွတ်ႈႁိူၼ်းသေ လႆႈယွင်ႈၶူဝ်းၶွင်ၸွမ်းမိူဝ်းယူႇ၊ မိူဝ်ႈဢၼ်ႁွတ်ႈထိုင်ၼႂ်းႁိူၼ်း ဢၼ်ပဝ်ႇႁူင်ႁူင်ၼၼ်ႉၵေႃႈ
“ႁိူၼ်းၵႂၢင်ႈတႄႉၶႃႈယဝ်ႉ!!”
“ဢမ်ႇမီးႁင်လႄႈၵႂၢင်ႈၵူၺ်းၶႃႈဢေႃႈ.. ဢမ်ႇလႆႈယူႇလၢႆဝၼ်းယဝ်ႉ ၽုၼ်ႇၵေႃႈတေၼမ်ဢိတ်ႉၼိုင်ႈၶႃႈၼႃႈ”
“ဢမ်ႇပဵၼ်ႁင်ၶႃႈ..”
သႅင်ၶမ်းၵေႃႈ ၵႂႃႇဢဝ်ၼမ်ႉမႃးတမ်းပၼ်မၼ်းႁေယဝ်ႉ၊ ၽိူဝ်ၶမ်းၵေႃႈ ယၵ်ႉတူၺ်းၸွမ်းၼႂ်းႁိူၼ်းၼၼ်ႉသေ
“ယူႇႁိူၼ်းၵေႃႉလဵဝ်ၸိူင်ႉၼႆ ဢမ်ႇငဝ်ၽွင်ႈၶႃႈႁႃႉ”
“ႁဝ်းဢမ်ႇတၼ်းမီးၶၢဝ်းယၢမ်းငဝ်ၶႃႈလေႃႇ.. ပေႃးလႆႈႁဵတ်းၵၢၼ်ယဝ်ႉ တမ်ႉဢမ်ႇတၼ်းဝူၼ်ႉသင်ၸိူင်ႉၼၼ် မၢင်ပွၵ်ႈသမ်ႉပေႃးလိုမ်းၵွၼ်ႇယဝ်ႉဝႃႈ မီးႁိူၼ်းတႃႇတေပွၵ်ႈၼႆ”
“ပဵၼ်သင်လႄႈတေလႆႈႁဵတ်းၵၢၼ် ၼမ်ထိုင်တၢၼ်ႇၼၼ်ႉလႃႇ ဢမ်ႇလိုဝ်ႈၽွင်ႈႁႃႉ”
“လိုဝ်ႈဢေႃႈ..မိူဝ်ႈၼွၼ်းၼၼ်ႉၶႃႈၼႃႇ… သူၵေႃႈတေႁၼ်ယူႇ ၼႂ်းႁိူၼ်းၼႆႉဢမ်ႇလႆႈမီးသင် ႁဝ်းဢမ်ႇပေႃးသူႈယူႇၵႃႈႁိုဝ် ၵမ်ႈၼမ်ၵေႃႈယူႇတီႈႁဵတ်းၵၢၼ်ၵူၺ်း မၢင်ပွၵ်ႈၵေႃႈယင်းၶႂ်ႈႁူႉယူႇဝႃႈ ႁဝ်းမီးႁိူၼ်းႁဵတ်းသင်ၼႆႉ..”
“မၼ်းၵေႃႈပဵၼ်တီႈလိုဝ်ႈႁိူဝ်ႉ မိူဝ်ႈႁဵတ်းၵၢၼ်ႁိူဝ်ႉမႃး ဢမ်ႇၸႂ်ႈၶႃႈႁိုဝ်၊ မိူဝ်ႈဢမ်ႇမီးတီႈၵႂႃႇၼၼ်ႉ ႁဝ်းၵေႃႈယင်းမီးႁိူၼ်းတႃႇတေပွၵ်ႈယူႇဢမ်ႇၸႂ်ႈၶႃႈႁႃႉ သင်ဢမ်ႇသင်ၵေႃႈ မီးႁိူၼ်းၼႆႉလီယဝ်ႉၶႃႈ..”
“သူလၢတ်ႈမႃးမၼ်းၵေႃႈၸႂ်ႈယူႇ..”
ၽိူဝ်ၶမ်းတူၺ်းၵႂႃႇတၢင်းႁွင်ႈမိုဝ်ႉ သႅင်ၶမ်းၼၼ်ႉ မီးငွႆးၼမ်ႉမႆႈၵူၺ်းလႄႈ ဢမ်ႇလႆႈႁၼ်မေႃႈႁုင်တူမ်ႈသင်သေမဵဝ်း ပဵၼ်ဢၼ်လၢၵ်ႇလၢႆးတႃဝႆႉႁေ
“သူဢမ်ႇႁုင်ၶဝ်ႈၽၵ်းၵိၼ်ႁင်းၵူၺ်းၶႃႈႁႃႉ”
“ႁုင်ယဝ်ႉႁဝ်းၵိၼ်ဢမ်ႇလူင်းသေ ဢမ်ႇလႆႈႁုင်ႁေပွၵ်ႈၼၼ်ႉယဝ်ႉ၊ ပေႃးၶႂ်ႈၵိၼ်ၶဝ်ႈၵေႃႈ ၵႂႃႇၵိၼ်တၢင်းၼွၵ်ႈၵူၺ်းၵေႃႈ ယဝ်ႉယဝ်ႉၼႃႇ ယူႇႁင်းၵူၺ်းၵူၺ်း ဢမ်ႇလူဝ်ႇၵႂႃႇႁဵတ်းႁႂ်ႈမၼ်းသုၵ်ႉသၵ်ႉယဝ်ႉဢမ်ႇၸႂ်ႈၶႃႈႁိုဝ်”
“ပေႃးတွင်ႉမႆႈၶဝ်ႈၵေႃႈ ၵိၼ်ၶဝ်ႈသွႆးဢေႃႇတေႃႇႁေၶႃႈၼေႃႈ”
“မွၵ်ႈၼၼ်ႉၶႃႈယဝ်ႉ!” ယုမ်ႉႁႅင်ႈႁႅင်ႈၸူးၵႂႃႇယူႇ။
“ယူႇႁင်းၵူၺ်းၸိူင်ႉၼႆ ထုၵ်ႇလီလုမ်းလႃးပၢႆးယူႇလီ လိူဝ်သေၼႆႉၶႃႈဢေႃႈ ပေႃးပဵၼ်မႃးဢမ်ႇမီးၽႂ်တူၺ်းထိုင်ၶႃႈလူး၊ သင်ဝႃႈမီးၵူၼ်းလုမ်းလႃးတႄႉၵေႃႈ တေလီယူႇ”
“ဢမ်ႇဢဝ်ယဝ်ႉၶႃႈ!! ၵူဝ်ႁိူၼ်းႁူၵ်ႉ”
“ဢမ်ႇၸၢင်ႈဝႃႈ ယူဝ်တေလိူမ်ႈလီလိူဝ်ၼႆႉၵေႃႈပဵၼ်လႆႈ.. ယူဝ်ၼႂ်းႁိူၼ်းပေႃးတေတူၺ်းႁၼ် မိူၼ်ႁိူၼ်းၵူၼ်းယူႇမႃးဢိတ်ႉၼိုင်ႈၼၼ်ႉယိုင်”
“ၵူၼ်းၸိူင်ႉၼင်ႇႁဝ်း ဢမ်ႇမီးၽႂ်ၶၢမ်ႇမႃးပေႉၸႂ်ႁေ လုမ်းလႃးပၼ်လႆႈၶႃႈလေႃႇ၊ ပေႃးလႆႈႁဵတ်းပၼ်ၼႃႇ သမ်ႉတေဝႃႈပေႃးတၢၼ်ႇၵူၼ်းၸႂ်ႉယဝ်ႉ၊ ပေႃးဢမ်ႇႁဵတ်းၵေႃႈ သမ်ႉတေဝႃႈႁင်းၵၼ် ၸၢင်ႈပွင်ႉၼႃႇၼႆထႅင်ႈ ဢမ်ႇမီးၼႆႉဢမ်ႇသုၵ်ႉႁူသုၵ်ႉၸႂ်သင်”
“ၸၢမ်းႁႃတူၺ်းၶႃႈလႄႈ ၼႂ်းၸၢတ်ႈပၢၼ်သူၼၼ်ႉ တိုၼ်းတေမီးယူႇၵူၺ်း ၵေႃႉဢၼ်ၶႂ်ႈလုမ်းလႃးပၼ်ၼင်ႇတဵမ်ၸႂ်၊ ၶႂ်ႈႁဵတ်းပဵၼ်ၵူၼ်းၸႂ်ႉတေႃႇၸူဝ်ႈပၢၼ်၊ သမ်ႉဝႃႈငိၼ်းသဵင်ပွင်ႉသူပေႃးမိုတ်ႈႁူၵေႃႈ ဢမ်ႇၸၢၼ်ႈၼၼ်ႉ ၵူၼ်းၵေႃႉၼၼ်ႉယင်းမုင်ႈမွင်းယူႇၼႃ”
သႅင်ၶမ်းၵေႃႈ ဢမ်ႇႁူႉဝႃႈတေလႆႈႁဵတ်းႁိုဝ်လၢတ်ႈယဝ်ႉလႄႈ ယိုင်ႈလၢတ်ႈယိုင်ႈၵႂႃႇၵႆတိၵ်းတိၵ်းၼၼ်ႉယဝ်ႉ။ ယၢမ်းၼၼ်ႉ ၸင်ႇမီးမၢႆၾူင်းဢၼ်ဢမ်ႇႁူႉၸိုဝ်ႈ သိုပ်ႇမႃးသေ သႅင်ၶမ်းၵေႃႈလႆႈႁပ်ႉၵႂႃႇယဝ်ႉ။ ဢမ်ႇပႆႇတၼ်းလၢတ်ႈသင် ၵူၼ်းၵေႃႉၼၼ်ႉၵေႃႈ လၢတ်ႈဢွၵ်ႇမႃး
“ဢေးယိင်း! လုင်းလွႆဢိူဝ်ႈ.. ဢူႈယုမ်ႉလိူၼ်ၶဝ်”
မိူဝ်ႈငိၼ်းၸိူင်ႉၼၼ်ၵေႃႈ ဢဝ်မၼ်းတူၵ်းၸႂ်ထိုင်တီႈပေႃးမိုင်လူင်ၵႂႃႇ၊ လၢတ်ႈသင်ပေႃးဢမ်ႇလႆႈယဝ်ႉ။ လုင်းလွႆသိုပ်ႇလၢတ်ႈထႅင်ႈ
“ၸွင်ႇတၼ်းႁိုဝ်! လုင်းၶႂ်ႈႁူပ်ႉထူပ်းယိင်းဢိူဝ်ႈ..”
“တၼ်းယူႇၶႃႈ..”
လုင်းလွႆၼၼ်ႉၵေႃႈ လၢတ်ႈပၼ်တီႈတေႁူပ်ႉၵၼ်တင်းသႅင်ၶမ်းသေယဝ်ႉ၊ သႅင်ၶမ်းၵေႃႈ ႁိပ်ႈဢဝ်တင်းထူင်ပႃးမၼ်းယဝ်ႉ ဢွၵ်ႇႁိူၼ်းၵႂႃႇ လူၺ်ႈဢမ်ႇတၼ်းၶုၵ်းၸႂ်လႆႈယဝ်ႉဝႃႈ ၽိူဝ်ၶမ်းၼၼ်ႉၵေႃႈ မီးယူႇၼႂ်းႁိူၼ်းၼၼ်ႉမိူၼ်ၵၼ်။
“သူတေႁိပ်ႈၵႂႃႇတၢင်းလႂ်လႃႇ! ႁႂ်ႈႁဝ်းၵႂႃႇသူင်ႇလႄႈ” ႁိပ်ႈၼႅတ်ႈလႅၼ်ႈဢွၵ်ႇႁိူၼ်း ၵႂႃႇၽုၺ်ႇၽၵ်းတူ ပၼ်သႅင်ၶမ်းၶိုၼ်ႈၵႃးၵမ်းလဵဝ်ယဝ်ႉ။
ႁွတ်ႈၵႂႃႇတီႈသႅင်ႇဢၼ်ၼိုင်ႈၼၼ်ႉ သႅင်ၶမ်းၵေႃႈ မိူဝ်ႈလႆႈႁၼ်လုင်းလွႆၼင်ႈပႂ်ႉယူႇၵေႃႈ ထူၺ်ႈၸႂ်ၶဝ်ႈလိုၵ်ႉလိုၵ်ႉသေ ပႆၶဝ်ႈၵႂႃႇၸူးလွႆးလွႆးယူႇ၊ ၽိူဝ်ၶမ်းဢၼ်မႃးၸွမ်းၼၼ်ႉၵေႃႈ ၼင်ႈယူႇဢမ်ႇၸမ်ဢမ်ႇၵႆ ပႂ်ႉဝႆႉယူႇယဝ်ႉ။
သႅင်ၶမ်းၵႂႃႇၼင်ႈတေႃႇၼႃႈလုင်းလွႆသေယဝ်ႉ
“ၶႃႈၸွမ်းႁႃလုင်းမႃးပဵၼ်လၢႆပီႊ ဢမ်ႇထၢင်ႇဝႃႈ လုင်းတေပဵၼ်ၽၢႆႇၵပ်းသိုပ်ႇမႃးဢွၼ်တၢင်းၸိူင်ႉၼႆ”
“လုင်းမိူဝ်းတီႈဝၢၼ်ႈမႃး..မိူဝ်းႁႃယိင်းမိူၼ်ၵၼ်လႄႈ လႆႈႁူႉဝႃႈယိင်းမႃးမီးယူႇတၢင်းၼႆႉ” လုင်းလွႆၵေႃႈ မိုင်တူၺ်းသႅင်ၶမ်းသေယဝ်ႉ “သင်ယုမ်ႉလိူၼ်တိုၵ်ႉမီးယူႇ မၼ်းၵေႃႈတေၵေႃႉယႂ်ႇတၢၼ်ႇၼႆႉယဝ်ႉ”
သႅင်ၶမ်းၼၼ်ႉၵေႃႈ ႁၢမ်ႈၸႂ်တႃႇတေဢမ်ႇလၢတ်ႈဢွၵ်ႇမႃးဢမ်ႇလႆႈယဝ်ႉ
“ပဵၼ်ယွၼ်ႉၽႂ်ၶႃႈလႃႇ.. သင်ဝႃႈလုင်းဢမ်ႇၵုမ်ႇၵိၼ်လဝ်ႈမဝ်းၵႅပ်ႇယူႇႁဵတ်းၼၼ် ၸွင်ႇၶဝ်သမ်ႉတေပဵၼ်ၼၼ်ၶႃႈႁိုဝ်”
လၢတ်ႈယဝ်ႉၵေႃႈ ဢဝ်ၼမ်ႉတႃမၼ်း သမ်ႉပေႃးၸိုမ်ႉဢွၵ်ႇမႃးယူႇယဝ်ႉ။
“လုင်းၼၼ်ႉယဝ်ႉပဵၼ်ၵူၼ်းႁဵတ်းႁၢႆႉၶဝ်.. လုင်းၼၼ်ႉယဝ်ႉပဵၼ်ၵေႃႉဢၼ်ႁဵတ်းႁႂ်ႈၶဝ်ပဵၼ်ၸိူင်ႉၼၼ်..”
“ဢၼ်လုင်းႁဵတ်းၵႂႃႇၼၼ်ႉ မၼ်းဢမ်ႇထုၵ်ႇလီၶႂၢင်းပၼ်လႄႈ ဢမ်ႇထုၵ်ႇလီလႆႈႁပ်ႉလွင်ႈၶႂၢင်းပၼ်ယူႇယဝ်ႉ၊ တေႃႈၼင်ႇတူဝ်ၵဝ်ႇၵေႃႈ လုင်းႁိုဝ်တေၶႂၢင်းပၼ်လႆႈ မိူဝ်ႈႁၼ်ယိင်းယဝ်ႉ ယိုင်ႈၶႅၼ်းႁဵတ်းႁႂ်ႈ ဝူၼ်ႉၽိတ်းတေႃႇၶဝ်မႃးထႅင်ႈၼၼ်ႉယဝ်ႉ၊ သမ်ႉဝႃႈၶႂ်ႈႁူၼ်ၶိုၼ်းၶၢဝ်းယၢမ်း၊ ၶႂ်ႈႁဵတ်းႁႂ်ႈၵူႈၸိူဝ်ႉၵူႈလွင်ႈလီမႃး လုင်းၵေႃႈဢမ်ႇၸၢင်ႈႁဵတ်းလႆႈလူး မိူဝ်ႈဝူၼ်ႉလႆႈၵေႃႈ ၵူႈလွင်ႈပေႃးတူၵ်းလိုၼ်းၵႂႃႇမူတ်းယဝ်ႉ၊ ၵူႈဝၼ်းၵူႈဝၼ်း လွင်ႈဢၼ်လုင်းလႆႈႁဵတ်းၵႂႃႇ၊ လွင်ႈဢၼ်ၶဝ်လႆႈထူပ်းမႃးၼၼ်ႉ လုင်းႁိုဝ်တေလိုမ်းမၼ်းလႆႈလႃႇ မၼ်းယင်းတိုၵ်ႉမီးယူႇၼႂ်းၸႂ်ၼၼ်ႉတႃႇသေႇဢိူဝ်ႈ! မိူဝ်ႈလႆႈႁၼ်ၶဝ်ၸဵပ်းသႅပ်ႇၼၼ်ႉ လုင်းၵေႃႈဢမ်ႇပိူင်ႈသင်ၵၼ်တင်းၶဝ် မၼ်းၸဵပ်းၵႅၼ်းထိုင်ၼိူဝ်ႉထိုင်ၸႂ်ဢိူဝ်ႈ…” ဢဝ်ၼမ်ႉတႃၸိုမ်ႉယမ်းဢွၵ်ႇမႃးတေႃႇၼႃႈသႅင်ၶမ်းၼၼ်ႉ ယူႇယဝ်ႉ။
သႅင်ၶမ်းၵေႃႈတေၸၢင်ႈႁဵတ်းႁိုဝ် ၼင်ႈႁႆႈတေႃႇၵၼ်ၵႂႃႇႁဵတ်းၼၼ်ၵူၺ်း။ ဝၢႆးသေၸႂ်ယဵၼ်ၵၼ်ယဝ်ႉၼၼ်ႉ လုင်းလွႆၵေႃႈ သိုပ်ႇလၢတ်ႈၸူးထႅင်ႈ
“ဝၢႆးသေယုမ်ႉလိူၼ်သဵင်ႈၵႂႃႇယဝ်ႉ ယိင်းၵေႃႈဢမ်ႇယူႇလီႁေ လုင်းၵေႃႈဢမ်ႇလႆႈႁူပ်ႉတင်းယိင်းထႅင်ႈသေပွၵ်ႈ.. လွင်ႈဢၼ်ၵိူတ်ႇၶိုၼ်ႈပဵၼ်မႃးၼၼ်ႉ မၼ်းဢမ်ႇၸႂ်ႈလွင်ႈဢၼ်လီမၢႆတွင်းတွၼ်ႈတႃႇယိင်းသေၵႃႈႁိုဝ် ဢၼ်ယိင်းတွင်းႁင်ဢမ်ႇလႆႈၼႆႉၵေႃႈ မၼ်းၵေႃႈတေပဵၼ်လွင်ႈလီတွၼ်ႈတႃႇယိင်းယူႇလႄႈ လုင်းၵေႃႈ တင်ႈၸႂ်ဢမ်ႇၵႂႃႇႁူပ်ႉထူပ်းယိင်းၼၼ်ႉယဝ်ႉ” လုင်းလွႆၵေႃႈ ဢဝ်ပပ်ႉဢၼ်ၼိုင်ႈ တမ်းပၼ်တီႈ သႅင်ၶမ်းသေ “ၼႆႉမၼ်းပဵၼ်ပပ်ႉမၢႆတွင်းၶဝ် မီးၶေႃႈၵႂၢမ်းၶဝ် ဢၼ်ၶႂ်ႈလၢတ်ႈၼႄယိင်းတင်းၼမ်ၼမ်ၼၼ်ႉယဝ်ႉ သမ်ႉဝႃႈလုင်းတင်ႈၸႂ်ဢမ်ႇႁူပ်ႉယိင်းၵေႃႈ မုင်ႈမွင်းၶႂ်ႈႁႂ်ႈလႆႈႁူပ်ႉယိင်းယူႇတႃႇသေႇ၊ ဝူၼ်ႉဝႃႈမိူဝ်ႈလႂ်ယိင်းၶႅၼ်းလီယဝ်ႉၸင်ႇဢဝ်မႃးပၼ် မိူၼ်မၼ်းတေတူၵ်းလိုၼ်းႁႅင်းၼႃႇယဝ်ႉ”
သႅင်ၶမ်းဢၼ်ၼင်ႈၼိမ်ယဵၼ်ယူႇၼၼ်ႉၵေႃႈ ယိပ်းဢဝ်ပပ်ႉၼၼ်ႉဝႆႉသေယဝ်ႉ ယၵ်ႉတူၺ်းၸူးလုင်းလွႆသေ
“တူၺ်းမိူၼ်လုင်းၵေႃႈ ယင်းတိုၵ်ႉယူႇလီၵိၼ်ဝၢၼ်ယူႇလူး ယူႇလီလိူဝ်သေၵဝ်ႇၵွၼ်ႇ၊ မိူဝ်ႈၶဝ်ႈယူႇ ပဵၼ်သင်လႄႈလုင်းဢမ်ႇယူႇၸိူင်ႉၼႆလႃႇ၊ လုင်းထုၵ်ႇလီၵိၼ်လဝ်ႈမဝ်းၵႅပ်ႇယူႇသေတီႈတီႈယဝ်ႉဢမ်ႇၸႂ်ႈႁိုဝ်”
“မၼ်းပဵၼ်ၶေႃႈၵႂၢမ်းလိုၼ်းသုတ်း ဢၼ်လုင်းႁဵတ်းပၼ်ၶဝ်လႆႈ ဢၼ်ၶဝ်မုင်ႈမွင်းၶႂ်ႈပဵၼ် သမ်ႉဝႃႈမၼ်းတေတူၵ်းလိုၼ်းၵေႃႈယဝ်ႉ လုင်းၵေႃႈ ၶႂ်ႈႁဵတ်းပၼ် ဢၼ်ၶဝ်ၶႂ်ႈပဵၼ်ၼၼ်ႉယူႇဢိူဝ်ႈ”
သႅင်ၶမ်းၵေႃႈ မိူဝ်ႈဢၼ်ႁူပ်ႉထူပ်းတင်းလုင်းလွႆယဝ်ႉၼႆၵေႃႈ ဢွၵ်ႇလၢၼ်ႉမႃး သမ်ႉပေႃးဢမ်ႇၸိုၼ်ႈဢမ်ႇပၢင်ႇၸႂ်သေဢိတ်းၼၼ်ႉယဝ်ႉ၊ ၽိူဝ်ၶမ်းဢၼ်ပႂ်ႉဝႆႉယူႇၼၼ်ႉၵေႃႈ မႃးၸူးမၼ်းသေ
“ၸွင်ႇမီးတၢင်းလူဝ်ႇၵႂႃႇတီႈလႂ်ထႅင်ႈၶႃႈ..”
“ႁဝ်းၶႂ်ႈလိုဝ်ႈႁိူဝ်ႉယဝ်ႉၶႃႈ..”
“လႆႈဢေႃႈ..ႁဝ်းတေမိူဝ်းသူင်ႇ..”
သွင်ၶႃၵေႃႈ ပွၵ်ႈမိူဝ်းၵႂႃႇ သမ်ႉပေႃးဢမ်ႇတၵ်းသဵင်ၸူးၵၼ်သေဢိတ်းၼၼ်ႉယဝ်ႉ။ ၽိူဝ်ၶမ်းၵေႃႈ သူင်ႇသႅင်ၶမ်းယဝ်ႉ ၶိုၼ်းပွၵ်ႈၵႂႃႇႁဵတ်းၵၢၼ်မၼ်းယူႇ။ မိူဝ်ႈတိုၵ်ႉမိူဝ်းၸွမ်းတၢင်းၼၼ်ႉ ၽူင်းမၼ်းၵေႃႈမႃးသေလႆႈႁပ်ႉၵႂႃႇယဝ်ႉ။
“ဝႃႈႁိုဝ်! ၸွမ်ၶိူဝ်း… ဢွၵ်ႇလူမ်းသင်သေသိုပ်ႇမႃးလႃႇ”
“ႁႃးမႃးမီးယူႇတီႈၼႃႈႁိူၼ်းၵေႃႉႁႃးၼႆႉယဝ်ႉဝႃႈ!!”
ဢၼ်ဝႃႈဢၢၼ်းၵႂႃႇႁဵတ်းၵၢၼ်ၼႆၼၼ်ႉၵေႃႈ ႁိုဝ်ပဵၼ်ယဝ်ႉ ႁိပ်ႈၼႅတ်ႈမိူဝ်းတၢင်းႁိူၼ်းမၼ်းၼၼ်ႉၵမ်းလဵဝ်၊ မွင်းႁၼ်ၸွမ်ၶိူဝ်းၵေႃႈ
“တေမႃးၼႆ သမ်ႉပေႃးဢမ်ႇလၢတ်ႈသင်ဝႆႉလူင်ႈၼႃႈသေဢိတ်းလူင်”
“ႁဵတ်းႁိုဝ်ဝႃႈဢမ်ႇလၢတ်ႈ လၢတ်ႈဝႆႉၸဵမ်မိူဝ်ႈလိူၼ်ပုၼ်ႉယဝ်ႉ ဝႃႈတေမႃးၼႆ..ၵေႃႉႁႃးၵူၺ်းဢိူဝ်ႈဢမ်ႇတွင်း.. ႁႃးဝႃႈႁႃးတေမႃးႁဵတ်းၶႅၵ်ႇႁေ သွင်သၢမ်ဝၼ်းၼႆႉ ၸင်ႇမိူဝ်းတီႈႁိူၼ်းၼႆ လႆႈယူႇယူဝ်ႉၼေႃႈ”
ၽိူဝ်ၶမ်းၵေႃႈဢမ်ႇပႆႇၵိုင်ႉၵၢင်ႉတွပ်ႇလႆႈလႄႈ ၸွမ်ၶိူဝ်းၼၼ်ႉၵေႃႈ တူၺ်းၼႃႈမၼ်းလီလီသေ
“ဢမ်ႇၼၼ်ၵေႃႈ မီးသၢဝ်မႃးယူႇၸွမ်းႁႃႉတေႃႈ!!”
“ဢမ်ႇမီးၼင်ႇၵဝ်ႇ..”
“ဢမ်ႇမီးၵေႃႈလီယဝ်ႉ.. ထိုင်မိူဝ်ႈလဵဝ်ၵေႃႈႁႃပႆႇလႆႈၵွၼ်ႇၵႂႃႈ..”
“တိုၵ်ႉၶတ်းၸႂ်ယူႇ..”
“ႁတ်းၶဝ်ႈႁႃဢိတ်ႉၼိုင်ႈလႄႈ တူၺ်းတူဝ်ယၢင်ႇမၼ်းတီႈႁႃးၼႆႉၵေႃႈလႆႈယဝ်ႉ”
“ပေႃးဝႃႈၼၼ်ၵေႃႈ မိူဝ်ႈလိူၼ်ပူၼ်ႉၼၼ်ႉ ၽူႈယိင်းဢၼ်ၵေႃႉႁႃးယၢမ်ႈႁွင်ႉမႃးတီႈႁိူၼ်းၼႆႉ သွင်ၵေႃႉ ဢၢင်ႈမႃးႁႃၵေႃႉႁႃးတီႈႁိူၼ်းၼႆႉၼင်ႇၵၼ်ၼႆဝႃႇ သမ်ႉၺႃးဝၼ်းလဵဝ်ၵၼ်ႁေ ႁႃးၵေႃႈလႆႈႁွင်ႉၵႂႃႇထူပ်းတၢင်းၼွၵ်ႈ ၵမ်းၵေႃႉၵမ်းၵေႃႉၼၼ်ႉၼႃႇ မီးပၼ်ႁႃလွင်ႈၽူႈယိင်းတီႈႁိူၼ်းၼႆႉမိူဝ်ႈလႂ်ၵေႃႈ ပၼ်ႁႂ်ႈႁႃးၵႄႈယူႇတႃႇသေႇ”
“ၼွင်ႉလိုၼ်း လႄႈ မူဝ်မူဝ် ၼၼ်ႉႁႃႉ ႁႃးပေႃးပႅတ်ႈၵႂႃႇႁိုင်ၼႃႇယဝ်ႉ ၶဝ်ၵေႃႈယင်းတိုၵ်ႉၸွမ်းၵဝ်းႁႃးတိၵ်းတိၵ်းၼၼ်ႉၼႃႇ ႁႃးၵေႃႈတတ်းၶၢတ်ႇ ၵၢၼ်ၵပ်းသိုပ်ႇၶဝ်ပႅတ်ႈႁေယဝ်ႉဢိူဝ်ႈ”
“မိူၼ်ၼၼ်ယဝ်ႉဝႃႈ ၵဝ်းၵူၼ်းဢမ်ႇလိူၵ်ႈၼႃႈၵေႃႈ”
“ယႃႇဝႃႈၼၼ်လႄႈ ႁႃးၵေႃႈလိူၵ်ႈယူႇၵူၺ်းၵဝ်ႇ၊ ႁၼ်ႁိုဝ်ၵူၼ်းႁၢင်ႈလီလၢႆလၢႆဢမ်ႇၸႂ်ႈႁႃႉ ဢၼ်ႁႃးႁွင်ႉမႃးၼၼ်ႉ” ယၵ်ႉတူၺ်း ၽိူဝ်ၶမ်းသေယဝ်ႉ “ႁႂ်ႈႁႃးလိုဝ်ႈသေသွင်သၢမ်ၶိုၼ်းၼႆႉလႄႈၼႃႈ”
“ယူႇၵေႃႈယူႇလႄႈ ယႃႇႁွင်ႉသၢဝ်မႃးလေႇထႅင်ႈၵေႃႈပေႃးယဝ်ႉ၊ ယဝ်ႉၵေႃႈ ယႃႇႁႂ်ႈႁႃးလႆႈၸွမ်းၵႄႈပၼ်ႁႃ ဢၼ်ၵေႃႉႁႃးၵေႃႇဝႆႉထႅင်ႈၼၼ်ႉၼႃႈ ပွၵ်ႈၼႃႈမႃး ဢမ်ႇမီးထႅင်ႈယဝ်ႉ”
“ဢိူဝ်ႈ!..ႁူႉယဝ်ႉ…တမ်းၸႂ်လႃႈ”
“သင်ႁွင်ႉမႃးၵေႃႉလဵဝ်ၵူၺ်းတႄႉတေဝႃႈယူႇ ၼႆႉသမ်ႉႁွင်ႉမႃးလၢႆဝၼ်းၵေႃႈ လၢႆၵေႃႉတေႉလူင်ဢ”
တွၼ်ႈသီႇသိပ်းသွင်သုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသီႇသိပ်းသၢမ်ၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
