တွၼ်ႈသၢမ်သိပ်းၵဝ်ႈ
ဝၢႆးလူင်းႁူင်းႁဵၼ်း ၶႃႈၵေႃႈပွၵ်ႈမိူဝ်းႁိူၼ်း ဢၢပ်ႇၼမ်ႉဢၢပ်ႇသင်သေ ၵိၼ်ၶဝ်ႈၶမ်ႈယဝ်ႉ ၽူၼ်ၵေႃႈသမ်ႉတူၵ်းယွႆးယွႆးမႃးလႄႈ ၶႃႈသမ်ႉလႆႈလၢတ်ႈဝႆႉဝႃႈ တေမိူဝ်းႁႃယုမ်ႉလိူၼ်ၼႆၼၼ်ႉၼႃႇ ၽူၼ်တူၵ်းၵေႃႈၵႃႈတေလႆႈမိူဝ်းယဝ်ႉ၊ ၶႃႈမိူဝ်းပေႃးၸမ်ႁွတ်ႈႁိူၼ်းၶဝ်ယဝ်ႉ လိုမ်းပပ်ႉဝႆႉလႄႈ လႆႈၶိုၼ်းမိူဝ်းဢဝ်သေ ၽိူဝ်ႇမႃးၶိုၼ်းၵေႃႈ လႆႈႁူပ်ႉၺႃးလုင်းပၢင်ႇ လုၵ်ႉတၢင်းႁိူၼ်းၶဝ်ၼၼ်ႉမႃးလႄႈ ၽွင်းၼၼ်ႉ ၾႃႉၵေႃႈသမ်ႉမႅပ်ႈထႅင်ႈႁေ လူမ်းလူင်ၵေႃႈထူဝ်းႁႅင်းဝႃႈႁႅင်းယဝ်ႉဝႃႈ၊ မိူဝ်းႁွတ်ႈႁိူၼ်းၶဝ်ယဝ်ႉ တႂ်ႈလၢင်ႈႁိူၼ်းၼၼ်ႉတႄႉ ႁၼ်လုင်းလွႆယူႇသေႇသေႇ။ မိူဝ်ႈၶႃႈႁွင်ႉယုမ်ႉလိူၼ်လူင်ၶိုၼ်ႈႁိူၼ်းမိူဝ်းၼၼ်ႉ ၽွင်းၼၼ်ႉ ၾႆးၾႃႉၼႂ်းဝဵင်းၵေႃႈ လပ်းသိင်ႇလူင်ၵႂႃႇတၢင်းဝဵင်းသေ ၾႃႉမႅပ်ႈၾႃႉလင် မေႃးပၼ်းၼၼ်ႈဢူၼ်လူင်ၵႂႃႇသဵင်ႈ၊ ၶႃႈၵေႃႈလၢမ်းလၢမ်းႁေၶဝ်ႈႁိူၼ်းမိူဝ်းၵႂႃႇယူႇ ၽွင်းဢၼ်သၢႆၾႃႉမႅပ်ႈႁိူဝ်ႈလႅင်းမႃး ၸွမ်းႁူးလႅင်းၼၼ်ႉ လႆႈပိူင်းႁၼ်ၼႂ်းႁွင်ႈၼွၼ်းယုမ်ႉလိူၼ် မႃးပဵၼ်ၵမ်းပဵၼ်ၵမ်းယဝ်ႉ။
ၶႃႈၼၼ်ႉၵေႃႈ ႁွင်ႉႁႂ်ႈယုမ်ႉလိူၼ်ထွင်ႇၾႆးပၼ်ယူႇ၊ ၵူၺ်းသမ်ႉဢမ်ႇလႆႈငိၼ်းသဵင်မၼ်းလႄႈ ဢမ်ႇၸၢင်ႈႁဵတ်းႁိုဝ် ၵႃႈလႆႈပိုင်ႈဢိင်ၾႃႉမႅပ်ႈၼၼ်ႉ ထွင်ႇပိူင်းၶဝ်ႈမႃးပၼ်တီႈၽၵ်းတူၵူၺ်း၊ ၶႃႈၵေႃႈလႆႈၽုၺ်ႇၽၵ်းတူၵႂၢင်ႈၵႂၢင်ႈလႄႈ ၾႃႉၵေႃႈမႅပ်ႈမႃးထႅင်ႈသေ ယၢမ်းၼၼ်ႉၶႃႈလႆႈႁၼ်ယုမ်ႉလိူၼ် ၼွၼ်းဢိူၵ်ႇလိူတ်ႈလႅင်ယူႇယဝ်ႉ၊ လႅင်းၾႃႉမႅပ်ႈၼၼ်ႉၵေႃႈ ၶုၼ်ႇမႅပ်ႈၶဝ်ႈမႃးၵမ်းယဝ်ႉၵမ်း ၸွမ်းၸိူဝ်းၼၼ်ႉ ပေႃးပဵၼ်လိူတ်ႈပဵၼ်ယၢင်ၵႂႃႇမူတ်းယဝ်ႉ၊ ၶႃႈၵေႃႈလႆႈႁၼ်ၵၼ်းမိတ်ႈ ပႅၼ်ယူႇတီႈၼႃႈဢူၵ်းၽၢႆႇသၢႆႉမၼ်းၼၼ်ႉယူႇ။
မိူဝ်ႈႁၼ်ၸိူင်ႉၼၼ်ၵေႃႈ ၶႃႈႁိုဝ်တေမီးႁႅင်းသိုပ်ႇယၢင်ႈၶဝ်ႈၵႂႃႇလႆႈယဝ်ႉ၊ ၶႃႈတင်းထူၺ်ႈၸႂ်ၵပ်ႉဢူၵ်း ၸဵပ်းၵႅၼ်းထိုင်ႁူဝ်ၸႂ်၊ မိူၼ်ၶႃႈတေတၢႆၼၼ်ႉယဝ်ႉ၊ တူဝ်ၶႃႈၼၼ်ႉၵေႃႈ ႁူၼ်သုတ်ႉဢွၵ်ႇႁၢင်ႇလူင်ၵႂႃႇ ဢမ်ႇတၼ်းႁူႉဝႃႈၶႃႈႁဵတ်းႁိုဝ်လူင်းၶူဝ်လႆ၊ ၵူၺ်းၵႃႈ ၶႃႈၼၼ်ႉသမ်ႉပေႃးတၢၵ်ႇၽူၼ်လူင်ယူႇၵၢင်တၢင်းဝႆႉယဝ်ႉ၊ ၶႃႈၸင်ႇသမ်ႉလႆႈႁၼ်ၾႃႉမႅပ်ႈယူႇတၢင်းၼႃႈၶႃႈၼၼ်ႉထႅင်ႈသေ ႁၼ်ငဝ်းၵူၼ်းလမ်လမ်လူမ်ႉလူင်လူင်းၵႂႃႇ ဢမ်ႇၸမ်ဢမ်ႇၵႆ သဵင်ၾႃႉလင်ၼၼ်ႉၵေႃႈ လင်ၵွင်ႈမႃးၼႂ်းႁူ ဢဝ်ၶႃႈပေႃးဢမ်ႇငိၼ်းသင်သေဢိတ်းယဝ်ႉ ၵူႈလွင်ႈမိူၼ်ၶႃႈၼွၼ်းၾၼ်ၵႂႃႇၵူၺ်းၼၼ်ႉယူႇ။
ၶႃႈတိုၼ်ႇမႃးၶိုၼ်းၵေႃႈ မီးယူႇၼႂ်းႁူင်းယႃယဝ်ႉလႄႈ ဢမ်ႇတွင်းႁင်လႆႈသေဢိတ်းယဝ်ႉ။ ၵူႈလွင်ႈပဵၼ်လွင်ႈဢၼ်မႂ်ႇမႂ်ႇတွၼ်ႈတႃႇၶႃႈၵႂႃႇမူတ်း၊ ပေႃးၶႃႈၶတ်းၸႂ်ဝူၼ်ႉၵေႃႈ ၼင်ႇႁၢင်ႈႁူဝ်ၼႆႉတင်းၸီးတင်းၸဵပ်းလူင်ဝႆႉယဝ်ႉ၊ ၶႃႈလႆႈလိုဝ်ႈႁိူဝ်ႉယူႇၼႂ်းႁူင်းယႃၼႆႉဝူင်ႈၼိုင်ႈသေ ၸင်ႇလႆႈမႃးလိုဝ်ႈယူႇတီႈႁိူၼ်း၊ ၼိုင်ႈလိူၼ်ၼိုင်ႈပွၵ်ႈၵေႃႈ လႆႈၵႂႃႇႁူင်းယႃယူႇတႃႇသေႇယဝ်ႉ၊ လွင်ႈမၢႆတွင်းၶႃႈၼၼ်ႉၵေႃႈ ပွၵ်ႈမႃးၶိုၼ်းၵမ်းဢိတ်းၵမ်းဢိတ်းယူႇ။ ၽွင်းၼၼ်ႉၵေႃႈ လႆႈမီးၵူၼ်းပွမ်ႁဵတ်းလွင်ႈမၢႆတွင်းၶႃႈ ၸိူင်ႉၼင်ႇဢူၺ်းၵေႃႉဢၢႆႈၸၢႆးႁဝ်းၸိူဝ်းၼၼ်ႉ မႃးလဵၼ်ႈၵေႃႉၶႃႈ၊ ဢွၼ်ႁဵတ်းမဵဝ်းၼိုင်ႈယဝ်ႉမဵဝ်းၼိုင်ႈ၊ ထိုင်တီႈၶႃႈပဵၼ်ၵူၼ်းထုၵ်ႇၸွမ်းၸႂ် ၶႂ်ႈႁဵတ်းသင်ၵေႃႈႁဵတ်းၵႂႃႇၼၼ်ႉယဝ်ႉ။
ၼႂ်းၶၢဝ်းတၢင်းႁူၵ်းလိူၼ်ပၢႆပၢႆၵေႃႈ လွင်ႈမၢႆတွင်းၶႃႈၸင်ႇတေမႃးၶိုၼ်းလီလီ လိူဝ်သေလွင်ႈၼႆႉယဝ်ႉ ၶႃႈၵေႃႈတွင်းလႆႈမူတ်းယူႇလႄႈ ၶႃႈၵေႃႈလႆႈၶိုၼ်ႈႁူင်းႁဵၼ်းၶိုၼ်းၼၼ်ႉယဝ်ႉ။
မိူဝ်ႈၶႃႈႁူႉဝႃႈ ယုမ်ႉလိူၼ်ဢမ်ႇလႆႈယူႇယဝ်ႉ ဢဝ်ၶႃႈဢမ်ႇပဵၼ်ၵိၼ်ပဵၼ်ယႅမ်ႉ၊ ဢမ်ႇဢွၵ်ႇႁိူၼ်းဢွၵ်ႇယေး၊ ဢမ်ႇလၢတ်ႈတေႃႇၽႂ် သမ်ႉပေႃးလႆႈပဵၼ်ဝူင်ႈ၊ ႁူင်းႁဵၼ်းၵေႃႈဢမ်ႇၵႂႃႇ ထိုင်တီႈၼူၼ်းမူဝ်ၶႃသႂ်လႅင်း ပေႃးလႆႈမႃးၸႂ်းထိုင်တီႈႁိူၼ်းၼၼ်ႉယိုင်။ မႃးၸႂ်းၶႃႈတႄႉလႅပ်ႈဢမ်ႇၸႂ်ႈၼေႈ မႃးမေႃးတႄႉလႅပ်ႈတေပဵၼ်လႆႈယူႇ၊ ဢမ်ႇႁူႉပေႉဢုပ်ႇႁင်တင်းၼၢႆးႁဝ်း ဢုပ်ႇဢုပ်ႇၶူဝ်ၶူဝ် သမ်ႉပေႃးဢမ်ႇသူၼ်ၸႂ်ၶႃႈသေဢိတ်းၼၼ်ႉယဝ်ႉ၊ လိူဝ်သေၼၼ်ႉၵေႃႈ ၼၢႆးႁဝ်းႁွင်ႉႁဵတ်းၶႅၵ်ႇထႅင်ႈႁေ ၵိၼ်ၶဝ်ႈၼႆၵေႃႈတမ်ႉဢမ်ႇႁွင်ႉၶႃႈႁေဢိတ်းလႃႈ၊ ဢမ်ႇႁူႉမိူဝ်ႈၼႆႉသမ်ႉ ၶႃႈပေႉၵႅၼ်ႇတွင်ႉမႆႈၶဝ်ႈဝႃႈတွင်ႉမႆႈယဝ်ႉ။ ဝူၼ်ႉဝႃႈဢၢၼ်းႁႂ်ႈၶႃမိူဝ်းယဝ်ႉ ၸင်ႇတေလုၵ်ႉၼႆယူႇ ၵူၺ်းၵႃႈ ၽူၼ်သမ်ႉမႃးလႄႈ ၶမ်ႈၵေႃႈၶမ်ႈၼႃႇယဝ်ႉသေ ၼၢႆးႁဝ်းၵေႃႈ ႁႂ်ႈၶႃၼွၼ်းတီႈႁိူၼ်းၼႆယူႇ။ ၶႃႈထၢင်ႇဝႃႈၶႃတေမိူဝ်းယဝ်ႉ သမ်ႉဝႃႈတေၼွၼ်းႁဵတ်းၶႅၵ်ႇထႅင်ႈႁေၼႆဝႃႇ သမ်ႉပေႃးဢမ်ႇဝူၼ်ႉဝႃႈဢူႈမႄႈၶဝ်တေမႆႈၸႂ်ၼႆ၊ ၶႃႈယဵၼ်ႉဢမ်ႇလႆႈယဝ်ႉ ၵႃႈလႆႈဢွၵ်ႇမႃးၸူးၶႃသေ
“လုၵ်ႉမႃးလႆႈယဝ်ႉႁႃႉ!!” ၼၢႆးႁဝ်းဢၼ်ႁၼ်ၶႃႈႁူဝ်ယုင်ႈယုင်ႈလူင်ၼၼ်ႉၵေႃႈ လၵ်ႉယုမ်ႉဢွၵ်ႇမႃးယူႇ။
“ၶမ်ႈၼႆႉႁႃးတေၼွၼ်းႁဵတ်းၵေႃႉသူဢိူဝ်ႈ! ” သႂ်လႅင်းလၢတ်ႈ။
“ဢမ်ႇၵူဝ်ဢူႈမႄႈသူမႆႈၸႂ်ၽွင်ႈႁႃႉ!”
“ပေႃးမိူဝ်းၸိူင်ႉၼႆၶႅၼ်းလီမႆႈၸႂ်ၼႃႇယဝ်ႉ ဢမ်ႇဝႃႈၼၼ်ၶႃႈႁႃႉၼၢႆး” ၼူၼ်းမူဝ်လၢတ်ႈၸိမ်။
“ၸႂ်ႈဢိူဝ်ႈ! ၶမ်ႈၵေႃႈႁမ်ႉၶမ်ႈၼႃႇယဝ်ႉၸိူင်ႉၼႆ”
ၶႃႈၵေႃႈဢမ်ႇလႆႈသူၼ်ၸႂ်ၶဝ်ယဝ်ႉ ၶဝ်ႈၵႂႃႇၼႂ်းသွင်ႇၾႆးၼၼ်ႉသေ ၽၵ်းၵေႃႈသမ်ႉပေႃးဢမ်ႇၵိုတ်းသေမဵဝ်းယဝ်ႉဝႃႇ၊ တေႃႉတႄႉၵိုတ်းၶဝ်ႈၵူၺ်း ႁၼ်ၸိူင်ႉၼၼ်ယဝ်ႉ လူမ်းၶႂ်ႈၵိၼ်ၶဝ်ႈၵေႃႈသမ်ႉပေႃးႁၢႆလူင်ၵႂႃႇသေ လူမ်းၶႆႈႁႆႈၵေႃႈပေႃႇဢွၵ်ႇမႃးယဝ်ႉ၊ ၼမ်ႉတႃႁၢမ်ႈဢမ်ႇလႆႈလႄႈ ၶႃႈၵေႃႈၼင်ႈႁေႁႆႈယူႇၼႂ်းသွင်ႇၾႆးၼၼ်ႉၵႂႃႇႁေယဝ်ႉၼႃႇ။
ဢၢႆႈၸၢႆးဢၼ်လုၵ်ႉတၢင်းလႂ်မႃးၵေႃႈဢမ်ႇႁူႉ ၶဝ်ႈမႃးၼႂ်းသွင်ႇၾႆး ႁၼ်ၶႃႈႁႆႈယူႇၼၼ်ႉၵေႃႈ။
“မႂ်းႁႆႈႁဵတ်းသင်လႃႇ!!”
“ၶႃႈတွင်ႉမႆႈၶဝ်ႈ.. ၽၵ်းၵေႃႈဢမ်ႇမီးၽၵ်းႁင်ယဝ်ႉဝႃႇ”
“ႁႃႁဵတ်းၵိၼ်လေႃႇ ၽၵ်းလိပ်းၵေႃႈမီးယူႇလူး ၶႆႇၵႆႇၵေႃႈမီးယူႇ”
ၶႃႈၵေႃႈယိုင်ႈၶႅၼ်းႁႆႈမႃးထႅင်ႈၵူၺ်း၊ တေဝႃႈႁိုဝ်ၵေႃႈ တေႃႈၼင်ႇၶူဝ်ႈၶႆႇ ၶႃႈယင်းဢမ်ႇမေႃၶူဝ်ႈလူး၊ ပေႃးပွႆႇသႂ်ႇယဝ်ႉၵေႃႈဢမ်ႇႁတ်းဢဝ်ဢွၵ်ႇယဝ်ႉၼႃႇ ၶႅမ်ႈတႃႇသေႇၼၼ်ႉယိုင်။ ဢၢႆႈၸၢႆးႁဝ်းၼၼ်ႉၵေႃႈ ၵွၼ်ႉၶဝ်ႈသေယဝ်ႉ ဢဝ်ၵိူဝ်ၽွင်ဝၢၼ်မၢၵ်ႇမိတ်ႉထူဝ်ႇၼဝ်ႈၼမ်ႉမၼ်း သႂ်ႇၼိူဝ်ၶဝ်ႈသေယဝ်ႉ ဢဝ်မိုဝ်းမၼ်းၼၼ်ႉၼူတ်ႈၶဝ်ႈသေလႄႈ ယိုၼ်ႈပၼ်ၶႃႈ ပေႃးတၢၼ်ႇပိူၼ်ႈဢွႆႇၶဝ်ႈမႃယဝ်ႉ။
“ႁိူဝ်ႈ!! ၵိၼ်လႄႈ”
ပေႃးၶႃႈဢမ်ႇတွင်ႉမႆႈၶဝ်ႈၼႃႇ ၶႃႈတေဢမ်ႇဢဝ်ယဝ်ႉ။ မိူဝ်ႈလႆႈၵိၼ်ယဝ်ႉၼႆၵေႃႈ မၼ်းဝၢၼ်တေႉယဝ်ႉ ႁဵတ်းႁႂ်ႈၶႃႈၶုၵ်းၸႂ်လႆႈဢူႈႁဝ်းမႃးယူႇ၊ ပေႃးၵႂႃႇၼႃးၸွမ်းမၼ်းၼႆ ပႆႇထိုင်ၶိင်ႇၵိၼ်ၶဝ်ႈ ၶႃႈတွင်ႉမႆႈၶဝ်ႈယဝ်ႉၼႆတႄႉ တင်းၶဝ်ႈႁေၼမ်ႉၽိတ်ႉဢၼ်မၼ်းဢဝ်ၵႂႃႇၼၼ်ႉ မႃးၵူဝ်ႈၶဝ်ႈပၼ်ၶႃႈၵိၼ်ယူႇယဝ်ႉ။ ၼမ်ႉတႃၶႃႈၼၼ်ႉၵေႃႈ လႆဢွၵ်ႇမႃးထႅင်ႈယဝ်ႉ သဵင်ႁႆႈၶႃႈၼၼ်ႉၵေႃႈ ပၼ်းမေႃးလူင်မႃးထႅင်ႈယူႇ။
“ႁႆႈႁဵတ်းသင်ထႅင်ႈယဝ်ႉလႃႇ!!”
“ၵဝ်ၸႂ်ထိုင်ဢူႈႁဝ်း.. မၼ်းမိူၼ်ဢူႈႁဝ်းႁဵတ်းၼႃႇ..”
ဢၢႆးၸၢႆးၼၼ်ႉၵေႃႈဢမ်ႇၸၢင်ႈလၢတ်ႈသင်ထႅင်ႈယဝ်ႉလႄႈ မိုင်ယဵၼ်လူင်ၵႂႃႇသေ
“ၸွင်ႇမႂ်းတေၵိၼ်ၶႆႇၵႆႇႁႃႉ”
ၶႃႈၵေႃႈလႆႈငွၵ်းႁူဝ်ၼႄမၼ်းၵႂႃႇယူႇ။ မၼ်းၵေႃႈယိပ်းဢဝ်ဝၢၼ်ႇၶဝ်ႈၶႃႈၼၼ်ႉၵႂႃႇၶိုၼ်းသေယဝ်ႉ ၶူဝ်ႈၶႆႇၵႆႇယဝ်ႉၵေႃႈ ဢဝ်ၶဝ်ႈၶႃႈၼၼ်ႉပွႆႇသႂ်ႇၼႂ်းမေႃႈသေ ၵမ်ႉၼိုင်ႈၵေႃႈ ဢဝ်မႃးပၼ်ၶႃႈၶိုၼ်းယူႇ။
“ၵိၼ်လႄႈ..ဢမ်ႇမိူၼ်ဢၼ်ဢူႈႁဝ်းႁဵတ်းယဝ်ႉၵမ်းၼႆႉ!”
ၶႃႈၵေႃႈတဵတ်ႇသေၸင်ႇၵိၼ်ယူႇ။
ယၢမ်းၵၢင်ၶမ်ႈလိုၵ်းယဵၼ် ႁဝ်းသၢမ်ၵေႃႉၵေႃႈ ၼွၼ်းၵႂႃႇၸွမ်းၵၼ်ယူႇယဝ်ႉ၊ ၼူၼ်းမူဝ်ၶႃသႂ်လႅင်းၼၼ်ႉ ၼွၼ်းယူႇတင်းၶၢင်ႈၶႃႈ ၵေႃႉၽၢႆႇၽၢႆႇသေ ဢွၼ်ၵၼ်ထၢမ်ၶႃႈမႃးယူႇ။
“သူမီးလွင်ႈယၢပ်ႇၸႂ်သင် ႁႂ်ႈႁဝ်းၸွႆႈလႆႈလႃႇ” ၼူၼ်းမူဝ်ထၢမ်ၸူး
မိူဝ်ႈငိၼ်းၸိူင်ႉၼၼ် ၶႃႈႁိုဝ်တေလၢတ်ႈသင်လႆႈ။
“ၸႂ်ႈယဝ်ႉ..မီးလွင်ႈယၢပ်ႇၸႂ်သင်ၵေႃႈ လၢတ်ႈၼႄႁဝ်းလႆႈယူႇၼႃ ႁဝ်းပဵၼ်ဢူၺ်းၵေႃႉၵၼ်လူး”
“ႁဝ်းၸႂ်ထိုင်ဢူၺ်းၵေႃႉႁဝ်း! ၶဝ်ၸိုဝ်ႈယုမ်ႉလိူၼ်.. ဢမ်ႇလႆႈထူပ်းၵၼ်ပဵၼ်ပီႊပၢႆယဝ်ႉ”
“ၶဝ်ၵႂႃႇလႂ်ယဝ်ႉလႃႇ!” သႂ်လႅင်းထၢမ်လူၺ်ႈဢမ်ႇႁူႉၼၼ်ႉယဝ်ႉ။
မိူဝ်ႈငိၼ်းၵႂၢမ်းၶေႃႈၼႆႉ ႁဵတ်းႁႂ်ႈၶႃႈဝူၼ်ႉလႆႈမႃးဝႃႈ ၶဝ်တေၵႂႃႇလႂ်လႃႇ မိူဝ်ႈၶဝ်တၢႆၽၢတ်ႇၵႂႃႇယဝ်ႉၼၼ်ႉ ၶဝ်ၵေႃႈတေဢမ်ႇလႆႈၸဵပ်း၊ တေဢမ်ႇလႆႈတုၵ်ႉၸႂ်၊ တေဢမ်ႇလႆႈၶၢမ်ႇမၼ်းထႅင်ႈယဝ်ႉ၊ ၸိုဝ်ႈသဵင်ၶဝ် လွင်ႈႁၢႆႉႁၢႆႉဢၼ်ၶဝ်လႆႈထူပ်းၼၼ်ႉၵေႃႈ တေမွတ်ႇႁၢႆၵႂႃႇၸွမ်းၶဝ်ယဝ်ႉ၊ ၶဝ်ၵေႃႈ တေၵႂႃႇႁွတ်ႈတီႈၵတ်းယဵၼ်၊ တီႈဢမ်ႇလႆႈတုၵ်ႉၶယၢပ်ႇၽိုတ်ႇၶၢၼ်ၸႂ်ထႅင်ႈယဝ်ႉ မိူဝ်ႈဝူၼ်ႉၸိူင်ႉၼႆ ႁဵတ်းႁႂ်ႈၶႃႈၵတ်းယဵၼ်ၸႂ်မႃးသေ
“ၶဝ်ၵႂႃႇႁွတ်ႈတီႈၵတ်းယဵၼ်ယဝ်ႉ!”
“ႁဝ်းယွမ်းၼွမ်းယူႇ!” သႂ်လႅင်းၵေႃႈယိပ်းမိုဝ်းၶႃႈဝႆႉယူႇ။
“ဢမ်ႇပဵၼ်သင်ၼႃ ႁဝ်းဝႃႈၶဝ်တေၵႂႃႇႁွတ်ႈတီႈလီလီယဝ်ႉ”
ၼူၼ်းမူဝ်ၼၼ်ႉၵေႃႈ ၶဝ်ႈၵွတ်ႇၶႃႈသေ
“ႁဝ်းၵတ်းတေႉယဝ်ႉၼႃ ယွၼ်းၵွတ်ႇသူၼွၼ်းဢိတ်ႉၼိုင်ႈ”
“ၼူၼ်းမူဝ်! ၶႆႈၼႄဢပုမ်ႇဢိတ်ႉၼိုင်ႈလူႉ” သႂ်လႅင်းလၢတ်ႈ။
“ႁဝ်းဢမ်ႇမေႃၶႆႈၼႃ ပေႃးဢၢၼ်ႇၼႄတႄႉလႆႈယူႇၵူၺ်း”
“မီးပပ်ႉဢပုမ်ႇယူႇႁႃႉဢေးယိင်း!”
“မီးယူႇယူဝ်ႉ ႁႃတူၺ်းၼိူဝ်ၽိူၼ်ၼၼ်ႉဢႄႈ”
ၼူၼ်းမူဝ်ၵေႃႈလုၵ်ႉၵႂႃႇသွၵ်ႈယူႇ ၼိူဝ်ၽိူၼ်ၶႃႈၼၼ်ႉတႄႉၵေႃႈ မီးပပ်ႉၸိူင်းၵမ်ႈၼမ်ယဝ်ႉ၊ ၼူၼ်းမူဝ်ၼၼ်ႉၵေႃႈ လႆႈၽုၺ်ႇၽိုၼ်ႉတူၺ်းၵႂႃႇသေ မိူၼ်တေလူမႅၼ်ႈယဝ်ႉ ဢမ်ႇၶႂ်ႈၽႃႈလႄႈ တင်းလူတင်းယုမ်ႉယူႇ။
“ၼူၼ်းမူဝ်! ပႆႇႁၼ်ႁႃႉပပ်ႉဢပုမ်ႇသူ”
“ပၼ်ႁဝ်းလူတူၺ်းၸိူင်းၼႆႉၵမ်ႈၼႃႈ”
“ၼွၼ်းလႄႈသႂ်လႅင်း! တူၺ်းငဝ်းလၢႆးမၼ်းတႄႉ ႁႃးဢမ်ႇလႆႈထွမ်ႇဢပုမ်ႇယဝ်ႉ”
ၶႃႈတႄႉဢမ်ႇသူၼ်ၸႂ်သင်ယဝ်ႉ ၼွၼ်းၵႂႃႇပႅတ်ႈၶႃယူႇ။ ထိုင်ယၢမ်းၵၢင်ၼႂ်ၶႃႈတိုၼ်ႇမႃးယဝ်ႉ ယင်းတိုၵ်ႉလႆႈႁၼ်ၼူၼ်းမူဝ်ၼင်ႈလူပပ်ႉယူႇလႄႈ
“တၼ်းလုၵ်ႉၸဵမ်ၸဝ်ႉႁႃႉၼႆႉ!!”
“ႁဝ်းတမ်ႉပႆႇလႆႈၼွၼ်း..”
“ၶၢဝ်းၼႆႉၼႆႉၼႃ လိူဝ်ၸႂ်ၼႃႇယဝ်ႉဝႃႈ”
“တေသုတ်းယဝ်ႉၼႃႈ ၵမ်ႉၵေႃႈမိူဝ်းၼွၼ်းတီႈႁိူၼ်းၵေႃႈလႆႈယူႇ”
“ယွင်ႇၵႂႃႇယဝ်ႉ ယွင်ႇတေႉတေႉယဝ်ႉ”
သႂ်လႅင်းဢၼ်ႁႅၼ်းၶဝ်ႈၽၵ်းယူႇၼႂ်းသွင်ႇၾႆးၼၼ်ႉ မိူၼ်တေငိၼ်းသဵင်ႁႃးလႄႈ ၼႅတ်ႈမႃးႁွင်ႉႁႃးၵႂႃႇၵိၼ်ၶဝ်ႈယဝ်ႉ။
“မႃးလႄႈႁဝ်းၵိၼ်ၶဝ်ႈ!! ”
တီႈႁိူၼ်းတႄႉၵေႃႈၵိုတ်းႁဝ်းသၢမ်ၵေႃႉၵူၺ်းယဝ်ႉ ဢၢႆႈၸၢႆးႁဝ်းၶႃၼၢႆးႁဝ်းတႄႉ လႅပ်ႈတေၵႂႃႇသူၼ်ၵၼ်ယဝ်ႉၵႃႈထၢင်ႇ၊ ၵိၼ်ၶဝ်ႈယဝ်ႉၵေႃႈ သႂ်လႅင်းၶႃၼူၼ်းမူဝ်ၼၼ်ႉ ဢွၼ်ၵၼ်ပွၵ်ႈမိူဝ်းၵႂႃႇၶိုၼ်းႁင်းၽႂ်ႁင်းမၼ်းယူႇ။ ၼူၼ်းမူဝ်ၼၼ်ႉတႄႉၵေႃႈ ႁိမ်ပပ်ႉၶႃႈမိူဝ်းၵႂႃႇပဵၼ်လၢႆပပ်ႉယဝ်ႉ။
ဝၼ်းၶိုၼ်ႈႁူင်းႁဵၼ်းယဝ်ႉ ၶႃႈၵေႃႈၶိုၼ်းၵႂႃႇႁူင်းႁဵၼ်းမိူၼ်ပိူၼ်ႈၶိုၼ်းယူႇ၊ ပီႊၼႆႉ လိၵ်ႈၵေႃႈၼမ် ၵၢၼ်ႁိူၼ်းၵေႃႈၼမ်လႄႈ ပေႃးၵႂႃႇႁူင်းႁဵၼ်းၵေႃႈႁဵၼ်းလိၵ်ႈႁေ၊ လူင်းႁူင်းႁဵၼ်းမႃးယဝ်ႉ ဢၢပ်ႇၼမ်ႉၵိၼ်ၶဝ်ႈယဝ်ႉၵေႃႈ သမ်ႉပေႃးလူဝ်ႇႁဵတ်းၵၢၼ်ႁိူၼ်းယူႇယဝ်ႉ၊ ႁဵတ်းယဝ်ႉၵေႃႈ လူဝ်ႇၼွၼ်းယဝ်ႉၼႃႇ။ ဝၼ်းယဝ်ႉဝၼ်းပူၼ်ႉၵႂႃႇ ပၢင်တွပ်ႇလိၵ်ႈပွၵ်ႈၵမ်းၼိုင်ႈၵေႃႈပူၼ်ႉၵႂႃႇ၊ ဝၼ်းဢွၵ်ႇဝႃႇၵေႃႈၶွပ်ႈၶိုၼ်း၊ ပွႆးဝၢႆး ႁူင်းႁဵၼ်းၵေႃႈၶိုၼ်းၶိုၼ်ႈ လႄႈ ၶႃႈၵေႃႈလႆႈ မၢၵ်ႉလိၵ်ႈၼမ်လိူဝ်ပိူၼ်ႈပဵၼ် မၢႆ 4 ယူႇယဝ်ႉ။
မၼ်းႁဵတ်းႁႂ်ႈၶႃႈဝူၼ်ႉထိုင်ၵူၼ်းၵေႃႉၼၼ်ႉမႃးလႄႈ ႁဵတ်းႁႂ်ႈၶႃႈၶႂ်ႈမွၵ်ႇလၢတ်ႈၼႄၶဝ်တႄႉတႄႉ ၼၼ်ႉယဝ်ႉ။ သမ်ႉဝႃႈၶႃႈလၢတ်ႈၼႄတီႈတူဝ်ၶဝ်ဢမ်ႇလႆႈၵေႃႈ ၶႃႈၵေႃႈဝူၼ်ႉထိုင်ၶဝ်သေ ဢုပ်ႇလၢတ်ႈမိူၼ်ၼင်ႇမီးၶဝ်ယူႇႁိမ်းၶႃႈၼၼ်ႉယူႇ၊ ပေႃးဝႃႈတေႉၶႃႈၵေႃႈ မိူၼ်ၵူၼ်းယွင်ႇၼၼ်ႉယဝ်ႉ၊ တၢင်းႁၵ်ႉႁဵတ်းႁႂ်ႈႁဝ်းယွင်ႇၼႆ မၼ်းၵေႃႈတေၸႂ်ႈတေႉယူႇၵူၺ်း ယွၼ်ႉၶႃႈပဵၼ်ၼၼ်ဝႆႉယဝ်ႉလႄႇ။
ဢမ်ႇႁိုင်ဢမ်ႇၼၢၼ်း ပီႊမႂ်ႇတႆးၵေႃႈထိုင်မႃးထႅင်ႈယဝ်ႉ၊ ၽႃႈပၢႆႉၶေႃးၶဝ်ဢၼ်ၽၢၵ်ႇပၼ်ဝႆႉပီႊၵၢႆၼၼ်ႉ ၶႃႈယင်းပႆႇလႆႈသၵ်ႉလႃႈ၊ ပေႃးလႄႇပွႆးဢၢၼ်းသႂ်ႇၵႂႃႇယူႇ ၵွပ်ႈမၼ်းဢုၼ်ႇလီလႄႈ မိူၼ်ၶဝ်မီးယူႇႁိမ်းၸမ်ဝႆႉ ၼၼ်ႉယဝ်ႉ။ မၢင်ပွၵ်ႈၵေႃႈလႆႈငိၼ်းၶၢဝ်ႇငိၼ်းငၢဝ်းၶဝ်ယူႇ ၵူၺ်းၵႃႈ ၶၢဝ်ႇဢၼ်ဝႃႈတေပွၵ်ႈမႃးၶိုၼ်းၼၼ်ႉတႄႉ ဢမ်ႇလႆႈငိၼ်းမႅၼ်ႈသေပွၵ်ႈ၊ လိူဝ်သေ ယိုင်ႈႁူႉလွင်ႈၶဝ် ယိုင်ႈဢမ်ႇမီးတိုဝ်ႉတၢင်းလႆႈထူပ်းထႅင်ႈၼၼ်ႉၵူၺ်း ၵွပ်ႈၶဝ်လႆႈၵႂႃႇသိုပ်ႇၶိုၼ်ႈႁဵၼ်းထႅင်ႈၼွၵ်ႈမိူင်းၼႆၼၼ်ႉယိုင်။
ပွႆးပီႊၼႆႉတႄႉၵေႃႈ ၶႃႈလႆႈၵႂႃႇလႄႇၸွမ်းၵၼ်တင်းဢူၺ်းၵေႃႉ ၼူၼ်းမူဝ်၊ သႂ်လႅင်း၊ ၸိုၼ်ႈသႂ်၊ သႅင်ႁၵ်ႉ၊ ၶမ်းၽွင်ၶဝ်လႄႈ ဝၼ်းလၢဝ် ယူႇ။ ဝၼ်းလၢဝ်ၼၼ်ႉၵေႃႈ ဝၢႆးသေဢၢႆႈဢွင်ႇဢမ်ႇယူႇယဝ်ႉၼႆ မိူၼ်မၼ်းတေဢမ်ႇမီးၵေႃႉသေ ႁဝ်းၵေႃႈလႆႈၶတ်းၸႂ်ၶဝ်ႈႁႃလဵၼ်ႈၵေႃႉမၼ်းမႃးလႄႈ မၼ်းၵေႃႈလႆႈမိုတ်ႈၵၼ်တင်းႁဝ်းမႃးယူႇ၊ ႁဝ်းၵေႃႈလဵၼ်ႈၵေႃႉၵၼ်မႃး တေႃႇထိုင်ဝၼ်းမိူဝ်ႈၼႆႉယဝ်ႉ။ ယွၼ်ႉမီးမၼ်းလႄႈ လႄႇပွႆးၵေႃႈ ဢမ်ႇပေႃးမီးၽႂ်ႁတ်းမႃးၵဝ်းၸွမ်းႁဝ်း လႄႇလႆႈလွတ်ႈလွတ်ႈလႅဝ်းလႅဝ်းယူႇ။
ပီႊမႂ်ႇတႆးၼႆႉၵေႃႈ သႅင်ၶိူဝ်း၊ ၸွမ်ၶိူဝ်း၊ သၢႆႁိူဝ်ႈ ၶဝ်ၵေႃႈ ဢွၼ်ၵၼ်မႃးလႄႇႁိူၼ်းယဝ်ႉ ႁွင်ႉမႃးပႃးဢူၺ်းၵေႃႉၶဝ်ထႅင်ႈ မွၵ်ႈသွင်ၵေႃႉၼႆႉယူႇ၊ ၵွပ်ႈၶႃႈဢမ်ႇပေႃးယူႇႁိူၼ်းလႄႈ ဢမ်ႇလႆႈထူပ်းၵၼ်ႁေၵႃႈႁိုဝ် ပွႆးဝၢႆးယဝ်ႉ ၶဝ်ၵေႃႈလႆႈၶိုၼ်းပွၵ်ႈမိူဝ်းၵႂႃႇ။
ပၢင်တွပ်ႇလိၵ်ႈပွၵ်ႈၵမ်းသွင်ၵေႃႈထိုင်မႃး ၶၢဝ်းဢိုတ်းႁဵၼ်း ဢၼ်ႁႅင်ႈႁွင်ၼၼ်ႉၵေႃႈ ႁွတ်ႈထိုင်ၶိုၼ်းယဝ်ႉ၊ ၸႂ်လူင်ၼၼ်ႉၵေႃႈပေႉပိဝ်ဝႃႈပိဝ် ဢမ်ႇႁူႉၶႂ်ႈၵႂႃႇတၢင်းလႂ်တၢင်းလီတိၵ်းတိၵ်း။ မၢင်ပွၵ်ႈၵေႃႈ ၶႂ်ႈၵႂႃႇႁႃမႄႈႁဝ်းႁေၵေႃႈမီးမီး။ ဢၼ်လႆႈၵႂႃႇတႃႇသေႇၼၼ်ႉတႄႉ ၵႂႃႇသူၼ်ၼၼ်ႉၼႃႇ။ ပေႃးၵႂႃႇသူၼ်တႄႉၵေႃႈ ၵႂႃႇတင်းဝၼ်းတင်းဝၼ်း ဢမ်ႇတၼ်းႁူႉႁင်ၵမ်ႉၵေႃႈသမ်ႉပေႃးၶမ်ႈယဝ်ႉ။
တွၼ်ႈသၢမ်သိပ်းၵဝ်ႈသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသီႇသိပ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
