တွၼ်ႈသၢမ်သိပ်းပႅတ်ႇ
လုၵ်ႈဢွၼ်ႇတေၵေႃႉယႂ်ႇမႃး ပဵၼ်ၵူၼ်းၸိူင်ႉႁိုဝ်ၼႆၼၼ်ႉၵေႃႈ ယူႇတီႈဢူႈမႄႈဢၼ်ဝၢၼ်ႇၸိူဝ်ႉၽၼ်းၸိူင်ႉႁိုဝ်၊ လုမ်းလႃးမၼ်းၸိူင်ႉႁိုဝ်ၼႆ ၼၼ်ႉယဝ်ႉ။ သင်ၸိူဝ်ႉဝႃႈသႂ်ႇပၼ် ၽုၼ်ႇငႂ်ႈလုမ်းလႃးပၼ်ႁႂ်ႈမၼ်းလီၵေႃႈ ႁူႉမၼ်းတေယႂ်ႇမႃႈၵႃႈသုင်လႆႈလီမႃးယူႇ။ သင်ပွႆႇပိုၼ်ႉပွႆႇပႅတ်ႈၵေႃႈ မၼ်းတေႃႈတေႁဵဝ်ႇႁႅင်ႈၵႂႃႇပႅတ်ႈလၢႆလၢႆ ၼၼ်ႉယဝ်ႉ။ ပုၼ်ႈၽွၼ်းဢူႈမႄႈၼၼ်ႉယိုင်ႈယႂ်ႇၼႃႇ ဢမ်ႇၸႂ်ႈလုၵ်ႈဢွၼ်ႇၵူၺ်း တေလႆႈႁူႉၵုင်ႇမုၼ်ဢူႈမႄႈ၊ ဢူႈမႄႈၵေႃႈတေႃႈတေလႆႈႁူႉပုၼ်ႈၽွၼ်းၸဝ်ႈၵဝ်ႇ ဢၼ်မီးတေႃႇလုၵ်ႈလၢင်းၼၼ်ႉမိူၼ်ၵၼ် ယဝ်ႉ။
တွင်ႉၾႃႉၸိုၼ်ႈပၢင်ႇသႂ် ဝၢႆးၽူၼ်လူင်လူမ်းလူင်တူၵ်းႁိူတ်ႇၵႂႃႇ၊ ၵူၺ်းၵႃႈၶႃႈတႄႉ ႁိုဝ်တေၸိုၼ်ႈပၢင်ႇသႂ်လႆႈယဝ်ႉလႃႇ၊ ဢၼ်ၶႃႈႁူပ်ႉထူပ်းမႃးၼၼ်ႉ မၼ်းဢမ်ႇၸႂ်ႈၼွၼ်းၾၼ်လူး သဵင်ၾႃႉလင် ဢၼ်လွၵ်ႇၸႂ်ႁႂ်ႈၶႃႈၵူဝ်မႃးတႃႇသေႇၼၼ်ႉ မၼ်းပူၵ်းတိုၼ်ႇပၼ်လွင်ႈမၢႆတွင်းၶႃႈ ဢၼ်ၶႃႈလူင်လိုမ်းၵႂႃႇၼၼ်ႉႁႂ်ႈတွင်းမႃးလႆႈ ၼၼ်ႉယဝ်ႉ။ ၶႃႈတွင်းလႆႈမူတ်းယဝ်ႉ လွင်ႈဢၼ်ၵိူတ်ႇၶိုၼ်ႈမႃးၶမ်ႈၼၼ်ႉ၊ ၶႃႈႁူႉယဝ်ႉ ယွၼ်ႉသင်လႄႈၶႃႈလိုမ်းတူဝ်ၵႂႃႇ မိူဝ်ႈၽွင်းၾႃႉမႅပ်ႈ၊ ယွၼ်ႉပဵၼ်ဝၼ်းဢၼ်ၶႃႈ ဢမ်ႇထုၵ်ႇလီလႆႈတွင်းမၼ်းၼၼ်ႉၼႃႇ။
မၼ်းပဵၼ်ဝၼ်းလိုၼ်းသုတ်း ဢၼ်ၶႃႈလႆႈထူပ်းယုမ်ႉလိူၼ်ဢူၺ်းၵေႃႉၶႃႈ လႄႈ မၼ်းပဵၼ်ဝၼ်းဢၼ်ႁၢင်ႈႁၢႆႉလိူဝ်ပိူၼ်ႈတွၼ်ႈတႃႇၶႃႈ၊ မၼ်းႁဵတ်းႁႂ်ႈၶႃႈတိူဝ်ႉၸႂ်တေႉယဝ်ႉ၊ ၶႃႈၶႂ်ႈႁွင်ႉႁႆႈဢွၵ်ႇလင်လင်ယူႇ ၵူၺ်းၵႃႈ မၼ်းမႃးဢိုၵ်ႉၼိုၵ်ႉယူႇၼႂ်းၸႂ် သဵင်ႁႆႈၶႃႈၼၼ်ႉယင်းဢမ်ႇလႆႈငိၼ်းလႃႈ၊ ဢူၵ်းႁူဝ်ၸႂ်ၶႃႈတႄႉၵပ်ႉၵိၼ်းၵႂႃႇမူတ်းယဝ်ႉ၊ ႁူဝ်ၸႂ်ၶႃႈၸဵပ်းၵႅၼ်းတေတၢႆယူႇယဝ်ႉ ၼမ်ႉတႃၶႃႈလႆယမ်းမွၼ်ႁူဝ်သမ်ႉပေႃးတေတဵမ် ၶႃႈဢမ်ႇမီးႁႅင်းတႃႇႁဵတ်းသင်လႆႈယဝ်ႉ။
ယၢမ်းၼၼ်ႉ ၼၢႆးႁဝ်းၼၼ်ႉၵေႃႈ မႃးယူႇႁိမ်းၶႃႈသေ။
“ယိင်း! ပဵၼ်ႁိုဝ်မႃးလႃႇ…”
သဵင်ၼၢႆးႁဝ်းၼၼ်ႉ ယိုင်ႈၶႅၼ်းယူင်းႁႂ်ႈၶႃႈၶႂ်ႈႁႆႈမႃးထႅင်ႈ မိူဝ်ႈၼၢႆးႁဝ်းႁူႉဝႃႈၶႃႈႁႆႈယူႇၼႆၵေႃႈ
“လုၵ်ႈ..ပဵၼ်သင်လႃႇ! ႁႆႈႁဵတ်းသင်လၢတ်ႈၼႄၼၢႆးမႂ်းလႄႈ”
ၶႃႈၵေႃႈႁိုဝ်တေလၢတ်ႈဢွၵ်ႇလႆႈ တႃႇတေလၢတ်ႈၵႂၢမ်းၵူၺ်း ယင်းၵပ်ႉၶမ်ယူႇၼႂ်းဢူၵ်းၼႆႉ၊ လိူဝ်သေဢိုတ်ႇႁႆႈၵႂႃႇၵူၺ်း။ ၼၢႆးႁဝ်းၵေႃႈႁူႉဝႃႈ မိူဝ်ႈၶႃႈႁႆႈယူႇၼၼ်ႉ မၼ်းတေဢမ်ႇႁဵတ်းႁႂ်ႈၶႃႈတဵတ်ႇလႆႈၼႆၵေႃႈ၊ ဢွၵ်ႇၵႂႃႇပႅတ်ႈသေ ပၼ်ႁႂ်ႈၶႃႈႁႆႈယူႇႁဵတ်းၼၼ်ၵူၺ်းယဝ်ႉ။
ယိုင်ႈႁူႉဝႃႈယုမ်ႉလိူၼ်မၼ်းဢမ်ႇယူႇယဝ်ႉ ၶႃႈယိုင်ႈၶႅၼ်းၸႂ်ထိုင်ၶဝ်တႄႉယဝ်ႉ ၶႃႈလႄႈတင်းၶဝ် ပဵၼ်ဢူၺ်းၵေႃႉၵၼ်မႃးၸဵမ်မိူဝ်ႈၵေႃႉလဵၵ်ႉလဵၵ်ႉ၊ လွင်ႈမၢႆတွင်းဢၼ်ၵဵဝ်ႇလူၺ်ႈလွင်ႈၶဝ်ၼၼ်ႉၵေႃႈ ၽုတ်းဢွၵ်ႇမႃးၼႂ်းႁူဝ်ၶႃႈၼၼ်ႉတင်းၼမ်။
ဢမ်ႇဝႃႈ မိူဝ်ႈႁဝ်းၸႂ်လမ်ၵၼ်၊ မိူဝ်ႈႁဝ်းဢမ်ႇထုၵ်ႇၵၼ်၊ ပွင်ႉလႃႇဝႃႈႁင်းၵၼ်၊ မိူဝ်ႈဢၼ်လႆႈႁဵတ်းတေႃႇၶဝ် ဢၼ်ဢမ်ႇလီၸိူဝ်းၼႆႉၵေႃႈ၊ ၼင်ႇႁၢင်ႈပေႉမီးၼမ်ဝႃႈၼမ်ယဝ်ႉ။ မိူဝ်ႈဢုပ်ႇၶူဝ်ႁုၼ်ႉၼူဝ်ၸွမ်းၵၼ်၊ မိူဝ်ႈယူႇမူၼ်ႈသိူဝ်းၸွမ်းၵၼ်၊ မိူဝ်ႈလဵၼ်ႈၸွမ်းၵၼ်ၸိူဝ်းၼႆႉ။ ၶဝ်ၼၼ်ႉ လႆႈၸႂ်ၵျွၵ်းၸိူၵ်ႈတေႉယဝ်ႉဝႃႈ၊ ဢမ်ႇဝႃႈမိူဝ်ႈၵေႃႉလဵၵ်ႉႁိုဝ် ၵေႃႉယႂ်ႇယဝ်ႉသေတႃႉ ၼႂ်းထူင်ၶဝ်ၼၼ်ႉ တိုၼ်းပႃးၼင်ယိုတ်ႈယူႇတႃႇသေႇယဝ်ႉ။ ပေႃးလူင်းလိုဝ်ႈၼႆ ၶဝ်တေႁႃႁွင်ႉပိူၼ်ႈတေႃႇၼင်ယိုတ်ႈယူႇ၊ လဵၼ်ႈတေႃႇထိုင်ပေႃးလူမ်ႉ ၵူၼ်ႈပေႃးၶတ်းၵေႃႈယင်းပႆႇလၢပ်ႇလူးၵွၼ်ႇ၊ မီးပွၵ်ႈၼိုင်ႈ ၶဝ်လူမ်ႉဢဝ်ၶႃႁၵ်းသေယဝ်ႉ ဢမ်ႇၸၢင်ႈၵႂႃႇႁူင်းႁဵၼ်း ႁမ်ႉႁႂ်ႈၶႃႈၵေႃႉဢဝ်မၼ်းၵႂႃႇၼႆဝႃႇ။ ပွၵ်ႈၼၼ်ႉၵႂႃႇႁူင်းႁဵၼ်းၵေႃႈ ႁိုဝ်လႆႈၵႂႃႇလီလီ မၼ်းၼၼ်ႉတႄႉ ၼင်ႈၼိူဝ်လူတ်ႉထိပ်ႇၼၼ်ႉသေယဝ်ႉ ၶႃႈသမ်ႉႁဵတ်းၵူၼ်းထူဝ်းၵႂႃႇၼၼ်ႉယိုင် တေႇဢဝ်ၼၼ်ႉမႃး ပေႃးမၼ်းၶႂ်ႈလဵၼ်ႈၼင်ယိုတ်ႈၼႆၵေႃႈ ၶႃႈၵေႃႈဢမ်ႇပၼ်မၼ်းလဵၼ်ႈႁေပွၵ်ႈယဝ်ႉ။ ၶႃႈၵေႃႈၶိုၼ်းၼႅင်ၸႂ်ယူႇ ဢၼ်ၶဝ်ၶႂ်ႈႁဵတ်းလႄႈ ဢမ်ႇပၼ်ၶဝ်လႆႈႁဵတ်းၼၼ်ႉ။
ၶဝ်ပဵၼ်ၵူၼ်းဢၼ်ယူႇၸွမ်းၶႃႈ မိူဝ်ႈၶႃႈဢမ်ႇမီးၽႂ်၊ ၶဝ်ပဵၼ်ႁႅင်းၸႂ်တွၼ်ႈတႃႇၶႃႈ ႁႂ်ႈၶႃႈသိုပ်ႇသူႈတေႃႇ၊ ၶဝ်မိူၼ်ၼင်ႇ လုၵ်ႈတႃဝၼ်းမိူဝ်ႈၶၢဝ်းၵတ်း၊ ပဵၼ်ၸွင်ႈပၼ်မိူဝ်ႈၽူၼ်တူၵ်း၊ ပဵၼ်သၢႆလူမ်းယဵၼ်မိူဝ်ႈၶၢဝ်းႁႅင်ႈ။ ဢမ်ႇဝႃႈၽႂ်တေၽၢတ်ႇၽၢၵ်ႈယၢၼ်ၶႃႈၵႂႃႇၵေႃႈ ၶဝ်ၼၼ်ႉတိုၵ်ႉယူႇႁိမ်းၸမ်ၶႃႈယူႇတႃႇသေႇ၊ ပၼ်ႁႅင်းၸႂ်ၶႃႈယူႇတႃႇသေႇ၊ မိူဝ်ႈပေႃႈၽၢတ်ႇယၢၼ်ၶႃႈၵႂႃႇၼၼ်ႉ ၶဝ်ၵေႃႈယူႇႁိမ်းၶႃႈသေ ၸွႆႈတူၺ်းထိုင်ၶႃႈယဝ်ႉ၊ မိူဝ်ႈမႄႈၽၢတ်ႇယၢၼ်ၶႃႈၵႂႃႇၵေႃႈ မီးၶဝ်ယူႇပဵၼ်ၵေႃႉသေ ဢမ်ႇႁဵတ်းႁႂ်ႈၸၢတ်ႈပၢၼ်ၶႃႈၼၼ်ႉႁဵဝ်ႇႁႅင်ႈငဝ်၊ ၶဝ်ပဵၼ်ၵူၼ်းဢၼ်လမ်ႇလွင်ႈတွၼ်ႈတႃႇၶႃႈတေႉတေႉယဝ်ႉ။
ၶဝ်ပဵၼ်တင်းဢူၺ်းၵေႃႉ၊ ပဵၼ်တင်းပီႈၼၢင်း၊ ပဵၼ်မိူၼ်ၼင်ႇမႄႈ ႁႃးသွင်ၵေႃႉ မီးလွင်ႈသင်ၵေႃႈ ဢုပ်ႇဢူဝ်းၶႆႈၼႄၵၼ်ယူႇတႃႇသေႇ။ ၶႃႈပဵၼ်ၵူၼ်းဢၼ်လႆႈၸႂ် ယူႇၸွမ်းၶဝ်တႄႉတႄႉယဝ်ႉ၊ ထိုင်တီႈၶႃႈဢမ်ႇလႆႈၸႂ်ယူႇႁိူၼ်းလႄႈ မႃးယူႇႁိူၼ်းၶဝ်လႆႈတႃႇသေႇ၊ ၵၢင်ၶမ်ႈလူဝ်ႇတူၺ်းလိၵ်ႈတူၺ်းလၢႆးၼႆၵေႃႈ တူၺ်းၸွမ်းၵၼ်ႁေ၊ ပေႃးဢမ်ႇလူဝ်ႇၵႂႃႇႁူင်းႁဵၼ်းၵေႃႈ ၼွၼ်းတီႈႁိူၼ်းၶဝ်ႁေ၊ ပေႃးၼွၼ်းၸွမ်းၶဝ်ၼႆ ၶဝ်ၵေႃႈတေၶႆႈဢပုမ်ႇၼႄၶႃႈ တေႃႇပေႃးၼွၼ်းလပ်းယူႇယဝ်ႉ။
ၶဝ်ပဵၼ်ၵူၼ်းဢမ်ႇပေႃးမၵ်ႉတၢင်းၵိၼ် ဢၼ်ဝၢၼ်ဢၼ်ၸဵမ်းသေယဝ်ႉ ၶႃႈသမ်ႉမၵ်ႉၼႃႇလႄႈ ပေႃးၶႃႈၵိၼ်မၢၵ်ႇဢူမ်ၼႆ၊ မၼ်းၵေႃႈပွင်ႉၶႃႈၵမ်းလဵဝ်ယဝ်ႉ၊ ၵွပ်ႈဝႃႈ ပေႃးၶဵဝ်ႈမႅင်းၶႃႈၸဵပ်း ၶႃႈသမ်ႉတေၵႆႉၶၢင်းၼႄမၼ်းၼၼ်ႉၼႃႇ၊ ၵူၺ်းၵႃႈ မၼ်းၼၼ်ႉတႄႉမၵ်ႉသူမ်ႈတေႉယဝ်ႉဝႃႈ ပေႃးဝႃႈပဵၼ်သူမ်ႈၼႆတႄႉ ဢမ်ႇမီးၶိင်ႇမီးၶၢဝ်းၵိၼ်လႆႈတႃႇသေႇ။
ၶဝ်ပဵၼ်ၵူၼ်းယုမ်ႉငၢႆႈ တူၺ်းၵူႈလွင်ႈလီယူႇတႃႇသေႇ၊ ပဵၼ်ၵူၼ်းဢၼ်ယူႇၸွမ်းယဝ်ႉ ႁဝ်းၵေႃႈသိူဝ်းၸႂ်ၸွမ်းၼၼ်ႉယူႇ။ ၶဝ်ပဵၼ်လုၵ်ႈယိင်းၵေႃႉလဵဝ်ၼႂ်းႁိူၼ်းယဝ်ႉ။ ဝၼ်းၼိုင်ႈ ဢမ်ႇထၢင်ႇဢမ်ႇထိူမ်သေယဝ်ႉ မႄႈၶဝ်ၵေႃႈၵိုင်ႉၵၢင်ႉဢမ်ႇယူႇလီပဵၼ်ႁႅင်းၼႃႇလႄႈ လႆႈလူႉသဵင်ႈတၢႆၵႂႃႇပႅတ်ႈၶဝ်။ ၶႃႈၵေႃႈလႆႈယူႇႁိမ်းၶၢင်ႈၶဝ်သေ ၸွႆႈၸဵတ်ႉၼမ်ႉတႃပၼ်ၶဝ်၊ လႆႈၸွႆႈၵွတ်ႇၶဝ်ဝႆႉ၊ လႆႈႁွင်ႉႁႆႈၸွမ်းၶဝ်ၵႂႃႇ ပဵၼ်ၶၢဝ်းယၢမ်းဢၼ်ၶႃႈလႆႈႁၼ် ၶဝ်တုၵ်ႉလိူဝ်သေပိူၼ်ႈ ၼႂ်းၸၢတ်ႈပၢၼ်ၶဝ်ၼၼ်ႉယဝ်ႉ။
ဝၢႆးသေၼၼ်ႉၵေႃႈ ၸၢတ်ႈပၢၼ်ၶဝ်လႆႈလႅၵ်ႈလၢႆႈၵႂႃႇ ဢူႈၶဝ်ၼၼ်ႉၵေႃႈ မိူၼ်တေယွမ်းႁပ်ႉလွင်ႈဢၼ် မႄႈၶဝ်ၽၢတ်ႇယၢၼ်ၵႂႃႇပႅတ်ႈၼၼ်ႉဢမ်ႇလႆႈလႄႈ ၵုမ်ႇမိုင်ႉၵိၼ်လဝ်ႈမဝ်းၵႅပ်ႇယူႇႁဵတ်းၼၼ် တင်းဝၼ်းတင်းဝၼ်း၊ ၵိၼ်ယဝ်ႉၵေႃႈၼွၼ်း၊ တိုၼ်ႇမႃးယဝ်ႉၵေႃႈၶိုၼ်းၵိၼ်ထႅင်ႈ၊ မၢင်ပွၵ်ႈၵေႃႈၵိၼ်ႁင်းၵူၺ်း၊ မၢင်ပွၵ်ႈၵေႃႈပိူၼ်ႈမႃးၵိၼ်ၸွမ်း၊ ပေႃးၶႃႈမိူဝ်းႁိူၼ်းၶဝ် မွၵ်ႈႁူဝ်ၶမ်ႈၼႆႉၵေႃႈ ၵႆႉႁၼ်လုင်းပၢင်ႇၼၼ်ႉ မႃးၼင်ႈဝႅင်းၵိၼ်ၸွမ်းဢူႈၶဝ်ယူႇတႃႇသေႇယဝ်ႉ။
ယုမ်ႉလိူၼ်ၵေႃႈ လိူဝ်သေလူဝ်ႇႁဵၼ်းယဝ်ႉ ဢူႈသမ်ႉၵုမ်ႇမိုင်ႉၵိၼ်လဝ်ႈ ဢမ်ႇႁႃႁဵတ်းၵၢၼ်ႁဵတ်းငၢၼ်းႁေ၊ လွင်ႈၵိၼ်လွင်ႈယူႇၼႂ်းႁိူၼ်းၵေႃႈ ၵပ်ႉၵိၼ်းမႃး၊ လွင်ႈၼႂ်းႁိူၼ်းၼႂ်းယေးၵေႃႈ ဢမ်ႇမီးၵူၼ်းလုမ်းလႃးယဝ်ႉ၊ ပေႃးဝၼ်းလိုဝ်ႈၵေႃႈ တႃႇၵိၼ်တႃႇယူႇ မၼ်းၵေႃႈလႆႈၵႂႃႇႁႃၵိၼ်ၸၢင်ႈပိူၼ်ႈၸိူဝ်းၼႆႉမႃးယဝ်ႉ။ ပေႃးၵၢင်ၶမ်ႈမႃးႁိူၼ်းၵေႃႈ ၽဵဝ်ႈႁိူၼ်းၽဵဝ်ႈယေးႁေ မၢင်ပွၵ်ႈၶႃႈၵေႃႈလႆႈမိူဝ်းၸွႆႈမၼ်းႁဵတ်းယူႇ။ ၶၢဝ်းယၢမ်းမၼ်း ဢမ်ႇပေႃးလႆႈလဵၼ်ႈမိူၼ်မိူဝ်ႈဢွၼ်တၢင်းယဝ်ႉ ႁႃးၵေႃႈလႆႈယူႇၸွမ်းၵၼ် ၽွင်းႁူဝ်ၶမ်ႈမွၵ်ႈၼၼ်ႉၵူၺ်း။
ဢွၼ်တၢင်းၶဝ်တေသဵင်ႈၵႂႃႇပႅတ်ႈၶႃႈမွၵ်ႈ 2 လိူၼ်ၼၼ်ႉ ၶႃႈၵေႃႈသမ်ႉဢမ်ႇယူႇလီပဵၼ်ၶႆႈလိူတ်ႈဢွၵ်ႇလႄႈ ၶႃႈသမ်ႉလႆႈၵႂႃႇၼွၼ်းႁူင်းယႃၼၼ်ႉၼႃႇ၊ မိူဝ်ႈတႄႇၵႂႃႇၼၼ်ႉ မၼ်းလႆႈၵႂႃႇၸႂ်းၶႃႈယူႇ ၵူၺ်းၵႃႈဝၢႆးၼၼ်ႉ မၼ်းၵေႃႈဢမ်ႇၶိုၼ်းၵႂႃႇၸႂ်းၶႃႈထႅင်ႈယဝ်ႉ၊ ႁႃးၵေႃႈဢမ်ႇလႆႈထူပ်းၵၼ်ပဵၼ်မွၵ်ႈ 2 ဝူင်ႈၼႆႉယူႇ။ ဝၢႆးသေၶႃႈၶႅၼ်းၶိုၼ်းယဝ်ႉ ယၢမ်းၵၢင်ၶမ်ႈလပ်းသိင်ႇၸွမ်ႉႁွမ်ႉၼၼ်ႉ တႂ်ႈႁိူၼ်းဢၼ်ၾႆးလႅင်းဝွႆးဝွႆးၼၼ်ႉၵေႃႈ မီးဢူႈၶဝ်လုင်းလွႆ ၼင်ႈဢိင်သဝ်ႁေ လပ်းယူႇယဝ်ႉ၊ ၵူၺ်းၵႃႈ ၽိူၼ်လဝ်ႈၼၼ်ႉတႄႉ မီးၵွၵ်းၵႅဝ်ႈသွင်လုၵ်ႈ မိူၼ်မီးၵူၼ်းထႅင်ႈၵေႃႉၼိုင်ႈယူႇ။ မိူဝ်ႈၽွင်းဢၼ်ၶႃႈၶိုၼ်ႈၶူဝ်လႆမိူဝ်းယူႇၼၼ်ႉ လႆႈႁၼ်လုင်းပၢင်ႇလုၵ်ႉၼႂ်းႁိူၼ်းၼၼ်ႉဢွၵ်ႇမႃးယဝ်ႉ။
“လုင်းၶဝ်ႈမိူဝ်းႁဵတ်းသင်လႃႇ!”
“ၵဝ်ၵေႃႈမိူဝ်းတူၺ်း…မိူဝ်းလၢတ်ႈႁႂ်ႈဢေးယုမ်ႉ မႃးတူၺ်းဢူႈမၼ်းၵူၺ်း ၵဝ်တေမိူဝ်းယဝ်ႉ”
ၵူၺ်းၵႃႈၸႂ်ၶေႃးၶႃႈၼၼ်ႉၵေႃႈ ဢမ်ႇပေႃးလီၵႃႈႁိုဝ်၊ ၶႃႈၵေႃႈၼႅတ်ႈႁွင်ႉၸူးယုမ်ႉလိူၼ်သေ
“ဢေးယုမ်ႉ!! ၵဝ်ၶႅၼ်းၶိုၼ်းယဝ်ႉၼႃႈ!!”
“ဢိုမ်ႉ! ႁဝ်းၶႂ်ႈၼွၼ်းယဝ်ႉ.. မိူဝ်ႈၼႆႉသူမိူဝ်းၵွၼ်ႇလႃႈ”
ၼႂ်းႁွင်ႈၼွၼ်းမၼ်းၼၼ်ႉၵေႃႈ မွတ်ႇၽႆးဝႆႉပေႃးလပ်းသိင်ႇလူင်ၵႂႃႇမူတ်းယူႇ။
“သူၼွၼ်းယဝ်ႉႁႃႉ!! ၼွၼ်းၸဝ်ႉၵျႃႉလႃႇ”
“ဢိုမ်ႈ!! သူမိူဝ်းၶိုၼ်းလႃႈ”
ၼႃႈႁွင်ႈမၼ်းၼၼ်ႉၵေႃႈ ငိၼ်းဢၢႆလဝ်ႈဝႆႉသေ
“သူၵိၼ်လဝ်ႈႁႃႉ!! ဢၢႆမၼ်းႁႅင်းတေႉယဝ်ႉ”
ဢမ်ႇထၢင်ႇဝႃႈၶႃႈတေလႆႈငိၼ်းသဵင်ၶဝ် ဢၼ်ႁိုတ်းသႂ်ႇၶႃႈ “ႁဝ်းလၢတ်ႈဝႃႈမိူဝ်းၵေႃႈ မိူဝ်းလႄႈ!! ႁဝ်းၵူဝ်ၸပ်းတၢင်းပဵၼ်သူဢိူဝ်ႈ”
ဢဝ်ၶႃႈသမ်ႉပေႃးႁႆႈဢွၵ်ႇမႃးယူႇယဝ်ႉ။
“ႁဝ်းဢမ်ႇလႆႈႁၼ်သူလၢႆဝၼ်းလႄႈ ႁဝ်းၶႂ်ႈမႃးလၢတ်ႈသူဝႃႈႁဝ်းၶႅၼ်းယဝ်ႉၼႆၵူၺ်း၊ ပဵၼ်သင်လႄႈသူတေလႆႈႁိုတ်းႁဝ်းထိုင်တၢၼ်ႇၼႆႉလႃႇ” လၢတ်ႈယဝ်ႉၵေႃႈ ၶႃႈၵေႃႈဢွၵ်ႇႁိူၼ်းၶဝ်မိူဝ်းၵႂႃႇယူႇ၊ ၶႃႈၼၼ်ႉတႄႉၵေႃႈ ႁႆႈလူင်မိူဝ်းတေႃႇပေႃးသုတ်းသၢႆတၢင်း ၼၼ်ႉယဝ်ႉ။ ဝၢႆးႁေၼၼ်ႉ ႁၼ်ၵၼ်ယူႇၵေႃႈ ၶႃႈၵေႃႈဢမ်ႇလၢတ်ႈတေႃႇမၼ်း၊ မၼ်းၵေႃႈဢမ်ႇတူၺ်းၼႃႈၶႃႈသေဢိတ်း၊ ၵႂႃႇႁူင်းႁဵၼ်းၵေႃႈၵႂႃႇၽႂ်ၵႂႃႇမၼ်းၵူၺ်း၊ ၽွင်းၼၼ်ႉ မၼ်းယူႇယၢပ်ႇတေႉယဝ်ႉ၊ တေၸႂ်လမ်မၼ်းႁႃႉ ဢမ်ႇၼၼ်ၵေႃႈ တေၵႂႃႇဢွၼ်ႈဝွၼ်းမၼ်းၼႄႇ။ ဢဝ်ၶႃႈပေႃးဢမ်ႇပဵၼ်ယူႇပဵၼ်သဝ်းလႆႈ။ ထိုင်ၶၢဝ်းတူၺ်းလိၵ်ႈၼႆၵေႃႈ တူၺ်းၵေႃႉလဵဝ်ဢမ်ႇပေႃးၶႂ်ႈမေႃယူႇလႄႈ ႁမ်ႉဢမ်ႇပွင်ႇၸႂ်ႁေ ဢဝ်တိုဝ်ႉတၢင်းၼႆႉလႄႈ ၶႃႈၵေႃႈလႆႈမိူဝ်းၵႂႃႇတၢင်းႁိူၼ်းမၼ်းၼၼ်ႉယဝ်ႉ။ မိူဝ်ႈၶႃႈမိူဝ်းႁွတ်ႈၵႂႃႇၼႂ်းဝၢင်းႁိူၼ်းၼၼ်ႉၵေႃႈ လႆႈႁၼ်လုင်းပၢင်ႇ ၶိုၼ်ႈမိူဝ်းၵႂႃႇၼိူဝ်ႁိူၼ်းသေယဝ်ႉ ၶႃႈၵေႃႈၸွမ်းငွႆးၵႂႃႇလွႆးလွႆး
“မႂ်းတေႁႂ်ႈၵဝ်ၵႂႃႇလၢတ်ႈၼႄပိူၼ်ႈတင်းဝၢၼ်ႈႁႃႉဝႃႈ မႂ်းလႄႈတင်းၵဝ်ၼၼ်ႉမီးလွင်ႈသင်ၵၼ်ၼႆ ဢမ်ႇၸႂ်ႈပွၵ်ႈလဵဝ်ၵူၺ်းလူး လၢႆပွၵ်ႈၼႃႇယဝ်ႉ ဢမ်ႇပႆႇယၢမ်ႈၵွၼ်ႇႁႃႉ!!”
ၶႃႈလႆႈငိၼ်းယဝ်ႉၵေႃႈ သမ်ႉပေႃးတူၵ်းၸႂ်လူင်ၵႂႃႇသေ ဢဝ်မိုင်ဝႆႉယူႇယဝ်ႉ။ ၶႃႈလၢတ်ႈသင်ပေႃးဢမ်ႇဢွၵ်ႇယဝ်ႉ တင်းၶႂ်ႈႁႆႈ တင်းၸႂ်လမ် ဢဝ်ၶႃႈသမ်ႉပေႃးသၼ်ႇၵႂႃႇတၢင်းတူဝ်သေ ႁိမ်းၶႃႈၼၼ်ႉ မီးသင်ဢၼ်ၼၵ်းၼၵ်းၵေႃႈ ၵမ်ၽၢတ်ႈဝိုတ်ႉသႂ်ႇပၼ်လုင်းပၢင်ႇၼၼ်ႉႁႅင်းႁႅင်းယဝ်ႉ။
“ဢေးၼႆႉ မႂ်းမႃးႁဵတ်းသင်လႃႇ!!” ဢီးၶႃႈဢွၵ်ႇၽၵ်းတူႁႅင်းဝႃႈႁႅင်းယဝ်ႉ။
ယုမ်ႉလိူၼ်ၼၼ်ႉၵေႃႈ ၼႅတ်ႈမႃးၸူးၶႃႈသေ“ဢေးယိင်းၸွင်ႇမႂ်းပဵၼ်ႁင်ႁိုဝ်”
ၶႃႈၵေႃႈတူၺ်းၼႃႈယုမ်ႉလိူၼ်ၼၼ်ႉသေ ႁွင်ႉႁႆႈဢွၵ်ႇမႃးယဝ်ႉ တေလၢတ်ႈသင်ပေႃးဢမ်ႇဢွၵ်ႇယဝ်ႉ။
လုင်းပၢင်ႇၼၼ်ႉၵေႃႈ ၵႂင်ပူၵႂင်ပႃသေ လၢမ်းလိမ်းလၢမ်းလိမ်းလူင်သေ ဢွၵ်ႇမိူဝ်းၵႂႃႇယဝ်ႉ။
“ၶႂၢင်းပၼ်ၵဝ်ဢိတ်ႉၼိုင်ႈ!!” ယုမ်ႉလိူၼ်လၢတ်ႈယဝ်ႉၵေႃႈႁွင်ႉႁႆႈဢွၵ်ႇမႃးယူႇ။
“မႂ်းတေမႃးယွမ်းၼွမ်းႁဵတ်းသင်လႃႇ!! ၵဝ်ၵူၺ်းဢိူဝ်ႈ တေလႆႈယွမ်းၼွမ်း ၸွႆႈသင်မႂ်းဢမ်ႇလႆႈ ႁဵတ်းႁႂ်ႈမႂ်းမႃးထူပ်းၸိူင်ႉၼႆ”
ႁႃးသွင်ၵေႃႉၼၼ်ႉၵေႃႈ ႁႆႈတေႃႇၵၼ်တင်းႁိုင်ယဝ်ႉ။
မိူဝ်ႈၶႃႈႁူႉယဝ်ႉၵေႃႈ ယုမ်ႉလိူၼ်ၸင်ႇလႆႈၶႆႈလွင်ႈတၢင်းမၼ်းၼႄၶႃႈၵႂႃႇ၊ ၶမ်ႈဝၼ်းဢၼ်မၼ်းၵႂႃႇၸႂ်းၶႃႈတီႈႁူင်းယႃၼၼ်ႉ လိုၵ်းတၢၼ်ႇတၢၼ်ႇယဝ်ႉ၊ မၼ်းၵေႃႈလႆႈၶဝ်ႈမိူဝ်းၼွၼ်းသေ ၼႂ်းႁွင်ႈမၼ်းၼၼ်ႉသမ်ႉ ၶတ်းသေႃးၽၵ်းတူဢမ်ႇလႆႈလႄႈ လုင်းပၢင်ႇၼၼ်ႉသမ်ႉဢမ်ႇပႆႇမိူဝ်းၼႆသေ ၽွင်းဢၼ်တိုၵ်ႉၼွၼ်းဝၢၼ်ယူႇၼၼ်ႉၵေႃႈ လုင်းပၢင်ႇလႆႈၽုၺ်ႇၽၵ်းတူၶဝ်ႈမႃးၼႂ်းႁွင်ႈမၼ်းသေ မႃးတဵၵ်းၵၼ်ႉၸၼ်မၼ်းၵႂႃႇယူႇ၊ မၼ်းၵေႃႈသမ်ႉဢမ်ႇမီးႁႅင်းတႃႇၶႄႉၶဵင်ႇၶဝ်လႆႈလႄႈ ထုၵ်ႇၶဝ်ပူၼ်ႉပႅၼ်လူလၢႆၵႂႃႇယဝ်ႉ။
“ပဵၼ်သင်လႄႈသူတေလႆႈၶၢမ်ႇလႃႇ ယွၼ်းတၢင်းၸွႆႈထႅမ်ပိူၼ်ႈလႄႈ”
“ႁဝ်းၵူဝ်ဢိူဝ်ႈ! ပိူၼ်ႈတေတူၺ်းႁဝ်းၸိူင်ႉႁိုဝ်လႃႇ၊ ႁဝ်းတေႁတ်းတေႃႇၼႃႈပိူၼ်ႈလႆႈၸိူင်ႉႁိုဝ်လႃႇ! ၸိုဝ်ႈသဵင်ႁဝ်းၼၼ်ႉ တေၵိုၵ်းတူဝ်ႁဝ်းၵႂႃႇတေႃႇၸူဝ်ႈယဝ်ႉ၊ ၶဝ်တႄႉၵေႃႈ တူၵ်းၶွၵ်ႈယဝ်ႉၵေႃႈယဝ်ႉၵူၺ်း၊ ယွၼ်ႉႁဝ်းဢမ်ႇႁတ်းလၢတ်ႈၼႄပိူၼ်ႈႁေ ၶဝ်ၵေႃႈဢဝ်လွင်ႈၼၼ်ႉမႃးလွၵ်ႇႁဝ်းၼၼ်ႉၼႃႇ”
“ပဵၼ်သင်လႄႈပေႉမႃးငိူဝ်ႈလႃႇ! ယွၼ်ႉၵူဝ်ပိူၼ်ႈတေတူၺ်းၸိူင်ႉႁိုဝ်ႁေ ယွမ်းပၼ်ႁႂ်ႈၶဝ်ပူၼ်ႉပႅၼ်တူဝ်ၸဝ်ႈၵဝ်ႇၸိူင်ႉၼႆ လႆႈၸိူင်ႉႁိုဝ်?၊ ၵေႃႉဢၼ်ယၢပ်ႇၽိုတ်ႇၼၼ်ႉဢမ်ႇၸႂ်ႈပိူၼ်ႈၼႃ ပဵၼ်မႂ်းဢိူဝ်ႈ၊ မႂ်းၵူၺ်းဢိူဝ်ႈဢၼ်လႆႈၶၢမ်ႇ၊ ဢမ်ႇၸႂ်ႈပိူၼ်ႈ”
မၼ်းၼၼ်ႉၵေႃႈဢမ်ႇလၢတ်ႈသင်ယဝ်ႉ ၵုမ်ႇႁွင်ႉႁႆႈယူႇၵူၺ်း၊ ႁႃးသွင်ၵေႃႉၵေႃႈ ႁွင်ႉႁႆႈတေႃႇၵၼ်တင်းၶိုၼ်းယူႇယဝ်ႉ။ ၶမ်ႈၼၼ်ႉ ၶႃႈၵေႃႈလႆႈၼွၼ်းႁဵတ်းၵေႃႉမၼ်းၵႂႃႇ။ တေဝႃႈႁွင်ႉဢူႈၶဝ်ၸွႆႈၵေႃႈ ပေႃးလႆႈၵိၼ်လဝ်ႈၼႆ သမ်ႉပေႃးဢမ်ႇႁူႉတူဝ်ယဝ်ႉလူး။
ဝၼ်းၶိုၼ်ႈႁူင်းႁဵၼ်းမိူဝ်ႈၼႆႉ ႁႃးၵေႃႈလႆႈၵႂႃႇႁူင်းႁဵၼ်းၸွမ်းၵၼ်ၶိုၼ်းယူႇယဝ်ႉ၊ လွင်ႈဢၼ်ပဵၼ်ၵႂႃႇၼၼ်ႉ မၼ်းၵေႃႈလႆႈတုၵ်းယွၼ်းၶႃႈ ဢမ်ႇပၼ်လၢတ်ႈၼႄပိူၼ်ႈလႄႈ မၼ်းၵေႃႉတေၸတ်းၵၢၼ်ၵႂႃႇၼႆယူႇ၊ ၶႃႈၵေႃႈယုမ်ႇမၼ်းဝႃႈမၼ်းတေႁဵတ်းလႆႈယူႇၼၼ်ႉယဝ်ႉ။
တွၼ်ႈသၢမ်သိပ်းပႅတ်ႇသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢမ်သိပ်းၵဝ်ႈၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
