တွၼ်ႈသၢမ်သိပ်းၸဵတ်း
ၽွင်းလုၵ်ႈတႃဝၼ်းၶိုၼ်ႈပိူင်းထွင်ႇ သႅင်ၶမ်းၵေႃႈႁေႃႈၵႃးဢွၵ်ႇႁိူၼ်းၶဝ် ၵႂႃႇတၢင်းၶွပ်ႇလႅၼ်ဝဵင်း ဢၼ်မီးပႃႇမႆႉဢုမ်ႇသုမ်ႇလွမ်ႉဝႆႉ ႁၢမ်ႉၵႂၢင်ႈတၢၼ်ႇတၢၼ်ႇၼၼ်ႉ မၼ်းၵေႃႈသိုပ်ႇပႆၶဝ်ႈၵႂႃႇ ၼႂ်းလူင်ပႃႇၸိူဝ်းၼၼ်ႉသေ လတ်းၽၢၼ်ႇၶုမ်ၵူၼ်းဢၼ်ယဝ်ႉဢၼ် ၵႂႃႇၸုၵ်းယူႇတီႈၶုမ်ဢွၼ်ႇဢၼ်ၼိုင်ႈယဝ်ႉ။ မႄးၽဵဝ်ႈမႄးပတ်းႁႂ်ႈမူတ်းၵဵင်ႈသႂ်လီသေ ဢဝ်မွၵ်ႇၶဝ်ႈတႅၵ်ႇဢၼ်မၼ်းပိတ်းမႃးၼၼ်ႉ တမ်းပၼ်ၵႂႃႇတီႈၼႃႈၶုမ်ၼၼ်ႉယဝ်ႉ၊ ၶုမ်ၼၼ်ႉတႄႉဢမ်ႇလႆႈမီးႁၢင်ႈသင် ၵူၺ်းမီးၸိုဝ်ႈတႅမ်ႈဝႆႉဝႃႈ ယုမ်ႉလိူၼ်ၼႆယူႇ။
သႅင်ၶမ်းၼၼ်ႉၵေႃႈ လၢတ်ႈၸူးၶုမ်ၼၼ်ႉၵႂႃႇ
“ဢမ်ႇလႆႈမႃးႁႃမႂ်းႁိုင်ၼႃႇယဝ်ႉ ယူႇတၢင်းပုၼ်ႉမႂ်းၵေႃႈၵတ်းယဵၼ်လီယူႇၸွင်ႇၸႂ်ႈ၊ မႂ်းတေလိုမ်းၵဝ်ၵႂႃႇယဝ်ႉသေတႃႉ ၵဝ်တႄႉၵေႃႈ..ဢမ်ႇပႆႇၸၢင်ႈလိုမ်းမႂ်းလႆႈ သမ်ႉဝႃႈဢမ်ႇတၼ်းမႃးၸႂ်းမႂ်းတႃႇသေႇၵေႃႈ ၵဝ်တေၶတ်းၸႂ်ၵႆႉမႃးၸႂ်းမႂ်းယူႇၼႃႈ”
ယၢမ်းၼၼ်ႉ ၸင်ႇသမ်ႉလႆႈငိၼ်းသဵင်တိၼ် ယဵပ်ႇတမ်းဝႂ်မႆႉမႃးတၢင်းမၼ်းၼၼ်ႉ မေႃးပဵၼ်ၵမ်းပဵၼ်ၵမ်း၊ လူမ်းၵေႃႈထူဝ်းထွင်း ဢဝ်ၵိင်ႇၵၢၼ်ႈဝႂ်မႆႉသၼ်ႇၼိုင်ၶွၼ်း ၼႂ်းပႃႇလူင်ၼၼ်ႉ သမ်ႉပေႃးဢဝ်ၶူၼ်တုမ်ႇၼိူဝ်ႉမၼ်းၵီႈမႃး ၼင်ႁူဝ်ၼၼ်ႉၵေႃႈယုၵ်ႉၶိုၼ်ႈမႃးယူႇ။ ႁတ်းႁေဢမ်ႇႁတ်းႁေ မၼ်းၵေႃႈဝိၼ်ႇဝၢႆႇတူၺ်ၵႂႃႇလွႆးလွႆး။ သဵင်ဢၼ်ဢမ်ႇထၢင်ႇဢမ်ႇထိူမ်ၼၼ်ႉၵေႃႈ မေႃးမႃး
“သူ!! မႃးမီးတီႈၼႆႈၸဵမ်မိူဝ်ႈလႂ်လႃႇ?”
သႅင်ၶမ်းၼင်ႇႁၢင်ႈလူမ်ၸႂ်မႃးသေ
“ပႆမႃးပေႃးဢမ်ႇသူပ်းဢမ်ႇသဵင်ႁင်ဝႃႇ!..”
“ပေႃးၵူဝ်ႁမ်ႉ..ႁႅင်ႉလႄႈမႃးၵေႃႉလဵဝ်ၶႃႈ..”
“တေႁႂ်ႈမႃးၸွမ်းၽႂ်လႆႈတီႈၸိူင်ႉၼႆ!.. ႁဝ်းၵေႃႈမႃးႁင်းၵူၺ်းယူႇတႃႇသေႇၶႃႈလူး ဢမ်ႇထၢင်ႇဝႃႈပွၵ်ႈၼႆႉတေမီးၵူၼ်းမႃးၼၼ်ႉၶႃႈၼႃႇ”
“တၢင်ႇပွၵ်ႈပေႃးမႃးၵေႃႈ.. ႁွင်ႉႁဝ်းၽွင်ႈလႄႈ တေဢမ်ႇလႆႈမႃးၵေႃႉလဵဝ်ၸိူင်ႉၼႆ”
“သူသမ်ႉမႃးႁႃၽႂ်ၶႃႈ!..”
ယၵ်ႉတူၺ်းၵႂႃႇႁိမ်းၼၼ်ႉ ဢမ်ႇၸမ်ဢမ်ႇၵႆသေယဝ်ႉ လႆႈႁၼ်ႁၢင်ႈၽူႈယိင်းၼုမ်ႇၼုမ်ႇၵေႃႉၼိုင်ႈ၊ မၼ်းၵေႃႈဢဝ်မွၵ်ႇဢၼ်မၼ်းသိုဝ်ႉမႃးၼၼ်ႉ ၵႂႃႇဝၢင်းသေယဝ်ႉ
“မႄႈႁဝ်း..ၶဝ်လူႉသဵင်ႈၵႂႃႇၸဵမ်မိူဝ်ႈႁဝ်းပႆႇႁူႉၵႂၢမ်းပုၼ်ႉယဝ်ႉ၊ ဢၼ်ႁဝ်းႁူပ်ႉၶဝ်လႆႈၵေႃႈမီးတီႈၼႆႈၵူၺ်း”
“ႁဝ်းၵေႃႈ..မႃးႁႃဢူၺ်းၵေႃႉ ၶဝ်လူႉသဵင်ႈၵႂႃႇၸဵမ်မိူဝ်ႈပီႊ2012 ၼၼ်ႉယဝ်ႉ လႄႈ ႁဝ်းၵေႃႈတေၵႂႃႇၸႂ်းဢူႈႁဝ်းထႅင်ႈ”
“ႁႂ်ႈႁဝ်းၵႂႃႇၸွမ်းၶႃႈလႄႈ.. တၢင်ႇပွၵ်ႈပေႃးႁဝ်းမႃး ဢမ်ႇၺႃးသူ..ႁဝ်းၵေႃႈတေလႆႈမႃးဝႄႉပႃးၼၼ်ႉၼႃႇ”
“ၵႂႃႇၸွမ်းတႄႉၵေႃႈဢမ်ႇဝႃႈသင်ၼင်ႇၵဝ်ႇ ပဵၼ်သင်လႄႈသူတေလႆႈမႃးဝႄႉပႃးၶႃႈ”
“ႁဝ်းပဵၼ်ၵူၼ်းႁူႉၸၵ်းလုၵ်ႈသၢဝ်ၶဝ်ၼၼ်ႉၼႃႇ”
သွင်ၶႃၵေႃႈလႆႈၵႂႃႇၸႂ်းတီႈၶုမ် ဢူႈသႅင်ၶမ်းၶဝ်ၼၼ်ႉသေယဝ်ႉ ဢွၼ်ၵၼ်ဢွၵ်ႇပွၵ်ႈမိူဝ်းၵႂႃႇ ႁင်းၽႂ်ႁင်းမၼ်းယူႇ။ သႅင်ၶမ်းဢၼ်ပွၵ်ႈမိူဝ်းႁွတ်ႈႁိူၼ်းၼၼ်ႉၵေႃႈ ႁႅၼ်းၶူဝ်းမၼ်းၶႅမ်ႉလႅပ်ႈလီငၢမ်း သႂ်ႇၵႃးသေယဝ်ႉ သူင်ႇသင်ႇလၢၼ်ဢွၼ်ႇမၼ်းသေ ႁေႃႈၵႃးဢွၵ်ႇႁိူၼ်းၵႂႃႇ ဝႄႉသႂ်ႇႁိူၼ်းသႅင်ၶိူဝ်းၶဝ် ဢၼ်လႆႈႁၼ်ၼူၼ်းမူဝ် မီးယူႇၼႂ်းႁွင်ႈမိုဝ်ႉၼၼ်ႉလႄႈ
“ဢေးၼူၼ်း! ၵဝ်တေမိူဝ်းၶိုၼ်းယဝ်ႉ..”
ၼူၼ်းမူဝ်ၼၼ်ႉၵေႃႈ ဢွၵ်ႇႁွင်ႈမိုဝ်ႉမႃးၸူးမၼ်းသေ “ပေႉၸဵဝ်းမိူဝ်းလႃႇ”
“လူဝ်ႇမိူဝ်းႁဵတ်းၵၢၼ်ႁဵတ်းငၢၼ်းယဝ်ႉဢိူဝ်ႈ လိုဝ်ႈမႃးပေႃးလႆႈလၢႆဝၼ်းယဝ်ႉ ထၢင်ႇတႄႉတေဢမ်ႇလႆႈလိုဝ်ႈယၢဝ်းယူႇ” သႅင်ၶမ်းၵေႃႈ ယိပ်းဢဝ်မိုဝ်းၼူၼ်းမူဝ်မႃးသေယဝ်ႉ ယုမ်ႉၸူးၼင်ႇတဵမ်ဢူၵ်းတဵမ်ၸႂ်
“ယိၼ်းၸူမ်းၸွမ်းၼႃႈ!” ၶဝ်ႈၵွတ်ႇဢဝ်ၼူၼ်းမူဝ်သေ ၼမ်ႉတႃမၼ်းၼၼ်ႉၵေႃႈ သမ်ႉပေႃးယိုင်ႈဢွၵ်ႇမႃးယူႇ။
“ၶႂၢင်းပၼ်ၵဝ်ၼႃႈဢေးယိင်း!!” ၼူၼ်းမူဝ်ၼၼ်ႉၵေႃႈ ဢဝ်ၼမ်ႉတႃၸိုမ်ႉယမ်းမႃးမိူၼ်ၵၼ်၊ မၼ်းႁူႉလီလိူဝ်ပိူၼ်ႈယဝ်ႉ ပေႃးဝႃႈမၼ်းတေႇၼႃႈႁိူၼ်းၼႆ သႅင်ၶမ်းၼၼ်ႉတေတိူဝ်ႉၸႂ်တၢၼ်ႇႁိုဝ်။
“ပေႃးဝႃႈသူမီးတၢင်းသိူဝ်းယူႇၵေႃႈ ႁဝ်းၸူမ်းၸွမ်းယဝ်ႉ ၸူမ်းၸွမ်းတေႉဢိူဝ်ႈ ႁဝ်းလၢတ်ႈဢွၵ်ႇမႃးတီႈၼႂ်းၸႂ်ႁဝ်းဢိူဝ်ႈၼႆႉၼႃႈ၊ တေႇၼႃႈႁိူၼ်းယဝ်ႉၵေႃႈ ဢမ်ႇၸႂ်ႈဝႃႈႁဝ်းဢမ်ႇၸႂ်ႈဢူၺ်းၵေႃႉၵၼ်လူး၊ မိူဝ်ႈဝႃးတႄႉ..ႁဝ်းတိူဝ်ႉၸႂ်တေႉၼင်ႇၵဝ်ႇဢိူဝ်ႈ ၵူၺ်းၵႃႈ..မိူဝ်ႈၼႆႉႁဝ်းဢမ်ႇပဵၼ်သင်ယဝ်ႉ၊ သူတေတေႇၼႃႈႁိူၼ်းႁိုဝ်ဢမ်ႇတေႇ ႁဝ်းၵေႃႈတမ်ႉဢမ်ႇလႆႈယူႇၸွမ်းၵၼ်ၼင်ႇၵဝ်ႇ ဢမ်ႇၸႂ်ႈႁိုဝ်”
“ယႃႇမႃးႁဵတ်းပဵၼ်ၵူၼ်းၵႅၼ်ႇၶႅင်ယူႇယဝ်ႉ! ႁူႉယူႇၼႃႈ ၸႂ်သူၼၼ်ႉမၼ်းဢူၼ်ႈဢွၼ်ႇတၢၼ်ႇႁိုဝ်ၼႆ”
“ႁူႉယဝ်ႉသမ်ႉတေႁဵတ်းသင်လႆႈ သူၵေႃႈပေႃးပဵၼ်မႄႈၸဝ်ႈႁိူၼ်းယူႇယဝ်ႉလူး ဢၢင်ႈဝႃႈဢၢၼ်းဢဝ်ပပ်ႉမႃးပၼ်သူထႅင်ႈၼႆ ဢမ်ႇတၼ်းလူယဝ်ႉယူဝ်ႉထၢင်ႇ”
“တၼ်းဢိူဝ်ႈ!! ႁဵတ်းႁိုဝ်လႄႈဝႃႈဢမ်ႇတၼ်းလႃႇ မိူဝ်ႈၽုၵ်ႈၼႆႉ ပီႈသႅင်ၶိူဝ်းၶဝ်ပေႃးတေၵႂႃႇတၢင်ႇဝဵင်းယဝ်ႉ”
“တိုၵ်ႉႁႃဢဝ်ၵၼ်လႆႈၵႃႈႁိုဝ်ၵူၺ်း ပေႃးတေၵႂႃႇၼွၼ်းၶိုၼ်းပႅတ်ႈၵၼ်ယဝ်ႉၵႂႃႈ”
“ၵႂႃႇၶိုၼ်းလဵဝ်ၵူၺ်းသူၵေႃႈ ပေႉၸႂ်လႆႈပႂ်ႉမႃးပဵၼ်သိပ်းပီႊယူႇယူဝ်ႉ”
“သူၼႆႉၵေႃႈၼေႃ..” သႅင်ၶမ်းၵေႃႈ ဢဝ်ပပ်ႉမၢႆတွင်းမၼ်းၼၼ်ႉ ပၼ်ၵႂႃႇတီႈၼူၼ်းမူဝ်ယူႇ။
“ႁဝ်းတေၶတ်းၸႂ်လူႁႂ်ႈယဝ်ႉ ဢွၼ်တၢင်းပီႈသႅင်ၶိူဝ်းတေမႃးၵူၺ်ၼႃႈ!!”
“ၶၢၼ်ႉလၢတ်ႈတေႃႇသူယဝ်ႉ မႄႈႁိူၼ်းမႂ်ႇၶဝ်ၼႆႉ လၢတ်ႈၵႂၢမ်းၼိုင်ႈၶေႃႈသွင်ၶေႃႈၵေႃႈ ပေႃးပႃးၸိုဝ်ႈၽူဝ်သေႇသေႇဢေႉ”
သႅင်ၶမ်းၵေႃႈတင်းယုမ်ႉတင်းသိူဝ်းသေ ၽၢႆႇယၢၼ်မိူဝ်းၵႂႃႇယူႇယဝ်ႉ။
ၵၢင်ၶမ်ႈသဵင်ယဵၼ် ၼႂ်းႁိူၼ်းႁေႃမႂ်ႇ တႃႇမႄႈႁိူၼ်းၼုမ်ႇၶဝ် ဢၼ်ၸဝ်ႈၽူဝ်ဢမ်ႇယူႇၼၼ်ႉၵေႃႈ တေႃႈႁိုဝ်ယူႇလၢႆပႂ်ႉမွင်းလႃႇ၊ ၼူၼ်းမူဝ်ၼၼ်ႉ လႆႈပိုတ်ႇၽုၺ်ႇလူဢၢၼ်ႇပပ်ႉမၢႆတွင်းသႅင်ၶမ်းၵႂႃႇယူႇယဝ်ႉ။
………………………………………………
ပီႊ 2014
ၽွင်းၶၢဝ်းဢိုတ်းႁဵၼ်းသွင်လိူၼ်ပၢႆၼၼ်ႉ ပဵၼ်ၶၢဝ်းယၢမ်းဢၼ်ႁိုင်တႄႉတႄႉယဝ်ႉ၊ ယွၼ်ႉပဵၼ်ၶၢဝ်းမႆႈလႄႈ ဢမ်ႇပေႃးလႆႈၵႂႃႇတၢင်းလႂ်တေႉတေႉ လိူဝ်သေယူႇတီႈႁိူၼ်းႁေ၊ ပေႃးမီးပိူၼ်ႈထူၺ်ႈၽၵ်းမီႇၵေႃႈ ၵႂႃႇဢဝ်ဝၼ်းပိူၼ်ႈၸိူဝ်းၼႆႉယူႇ၊ လႆႈဝႃႈယူႇႁိူၼ်းပီႊၼႆႉတႄႉ ၶႃႈၵေႃႈမေႃႁဵတ်းၵၢၼ်ၸွႆႈတီႈႁိူၼ်းယူႇၽွင်ႈ။
ဝၼ်းၶိုၼ်ႈႁူင်းႁဵၼ်းၵေႃႈမႃးထိုင် ပီႊၼႆႉၶႃႈၵေႃႈလႆႈၶိုၼ်ႈၸၼ်ႉၵဝ်ႈယဝ်ႉ၊ မၢၵ်ႉလိၵ်ႈၶႃႈၼၼ်ႉ လႆႈဝႃႈ..လႆႈၼမ်ယူႇတၢၼ်ႇတၢၼ်ႇၼင်ႇၵဝ်ႇ၊ ဢၢႆႈၸၢႆးႁဝ်းၵေႃႈ ပီႊၼႆႉမၼ်းဢွင်ႇပူၼ်ႉၸၼ်ႉသိပ်းမိူၼ်ၵၼ်။ ၵူၺ်းၵႃႈ မၼ်းတႄႉဢမ်ႇသိုပ်ႇၶိုၼ်ႈၸၼ်ႉၸွမ် ၸွမ်းဢူၺ်းၵေႃႉမၼ်းယဝ်ႉ၊ ပေႃးသိုပ်ႇၶိုၼ်ႈႁူင်းႁဵၼ်းၵေႃႈ ငိုၼ်းသမ်ႉတေသဵင်ႈၼမ်ထႅင်ႈလႄႈ ၵူၼ်းႁႃငိုၼ်းတီႈႁိူၼ်းသမ်ႉဢမ်ႇမီးၽႂ်ႁေ မၼ်းလႆႈဢွၵ်ႇႁဵတ်းၵၢၼ်ပႅတ်ႈယူႇ။
ပီႊၼႆႉၵေႃႈ ၼင်ႇဝႃႈၵေႃႉယႂ်ႇမႃးထႅင်ႈဢိၼ်ႉယဝ်ႉ ယူႇၸၼ်ႉၵဝ်ႈယဝ်ႉလူး၊ ၸွမ်းၼင်ႇမီးယိူင်းဢၢၼ်းဝႆႉၼၼ်ႉ ၶႃႈၵေႃႈလႆႈၶတ်းၸႂ်ႁဵၼ်းတႄႉတႄႉယဝ်ႉ။
လွင်ႈဢၼ်ႁဵတ်းႁႂ်ႈၶႃႈၸႂ်တဵၼ်ႈတွတ်ႇႁႅင်း၊ ၶုၵ်းၸႂ်လႆႈၶဝ်ယူႇတိၵ်းတိၵ်းၼၼ်ႉ ၶႃႈႁူႉယဝ်ႉဝႃႈ ပဵၼ်ယွၼ်ႉသင်ၼႆ “ၶႃႈလႆႈႁၵ်ႉမႅၼ်ႈၶဝ်ၵႂႃႇယဝ်ႉ” မၼ်းပဵၼ်ၽၢင်ႁၢင်ႈၵူၼ်းၵေႃႉၼိုင်ႈ ဢၼ်လႆႈႁၵ်ႉမႅၼ်ႈၵူၼ်းၵေႃႉၼၼ်ႉၼႆ ၶႃႈလႆႈလူမႅၼ်ႈၺႃးၼႂ်းပပ်ႉၸိူင်းသေ ၸင်ႇတေၾၢင်ႉမႅၼ်ႈတီႈတူဝ်ၶႃႈၼၼ်ႉၼႃႇ။ ၶႃႈလႆႈႁၵ်ႉမႅၼ်ႈၶဝ်ၵႂႃႇလူၺ်ႈဢမ်ႇႁူႉတူဝ် ၵူၺ်းၵႃႈယၢမ်းၼႆႉၵေႃႈ သမ်ႉပဵၼ်တၢင်းႁၵ်ႉဢၼ်လႆႈမုင်ႈမွင်းဝႆႉလႄႈ လွမ်ႁၵ်ႉဝႆႉၵူၺ်းၼၼ်ႉယိုင်။
ဢမ်ႇဝႃႈတေပဵၼ်ၸိူင်ႉႁိုဝ် ၶႃႈၵေႃႈၶႂ်ႈႁႂ်ႈၶဝ်လႆႈႁၼ်ဝႃႈ ၶႃႈၼၼ်ႉၵေႃႈမီးလွင်ႈလီယူႇ၊ ၵႂၢမ်းမၼ်ႈၶႃႈဢၼ်ပၼ်ၶဝ်ဝႆႉၼၼ်ႉၵေႃႈ ၶႃႈတေဢၢၼ်းႁဵတ်းႁႂ်ႈလႆႈၼၼ်ႉယဝ်ႉ၊ ဝၼ်းၼၼ်ႉ ပေႃးဝႃႈၶႃႈလႆႈထူပ်းၶဝ်ၼႆ ၶႃႈဝူၼ်ႉဝႃႈတေဢၢၼ်းလၢတ်ႈၼႄၶဝ် ၶေႃႈၵႂၢမ်းၼႂ်းၸႂ်ၶႃႈ ဢၼ်မီးတေႃႇၶဝ်ၼၼ်ႉယူႇ။ သမ်ႉဝႃႈၶဝ်ဢမ်ႇယူႇတႃႇၼႃႈၵေႃႈ သဵင်ၶဝ်ၼၼ်ႉ ပဵၼ်ႁႅင်းဢီးသူၼ်းႁႂ်ႈၶႃႈ မီးႁႅင်းၸႂ်သိုပ်ႇၵႂႃႇယူႇတႃႇသေႇ ၼၼ်ႉယဝ်ႉ။
မိူဝ်ႈလႆႈငိၼ်းၶၢဝ်ႇငိၼ်းငၢဝ်းၶဝ်ၼၼ်ႉၵေႃႈ ႁဵတ်းႁႂ်ႈၶႃႈမီးတၢင်းမုင်ႈမွင်းဝႃႈ ဝၼ်းၼိုင်ႈတေလႆႈထူပ်းၶဝ်ယူႇ၊ ပဵၼ်ႁႅင်းၸႂ်ဢၼ်ၶႃႈဢမ်ႇယွမ်းသုမ်းလႆႈလႄႈ ႁိူဝ်ႉယၢပ်ႇတၢၼ်ႇႁိုဝ်ၵေႃႈ ၶႃႈၵေႃႈယင်းတိုၵ်ႉမီးႁႅင်းထိပ်ႇသိုပ်ႇသူႈလႆႈယူႇ။ တူဝ်ၵႆၵေႃႈ ၸႂ်ၶႃႈတႄႉ တိုၵ်ႉဝူၼ်ႉႁၼ်ၶဝ်မီးႁိမ်းၸမ်ယူႇလႄႈ ၽႃႈပၢႆႉၶေႃးၶဝ်ၼၼ်ႉ ယင်းတိုၵ်ႉႁဵတ်းႁႂ်ႈၶႃႈၺိၼ်း ဢၢႆဢုၼ်ႇတီႈတူဝ်ၶဝ်ဢမ်ႇလိုမ်းလႆႈသေပွၵ်ႈ ၼၼ်ႉယဝ်ႉ။
ပီႊၼႆႉၵၢၼ်ႁဵၼ်းၵၢၼ်သွၼ်ၵေႃႈ လၢႆးသွၼ်မၼ်းတႄႉတိုၵ်ႉမိူၼ်ၵဝ်ႇယူႇ တွၼ်ႈတႃႇတေၶဝ်ႈၸွမ်းၵၢၼ်ႁဵၼ်းၵၢၼ်သွၼ်ပိူၼ်ႈ ႁႂ်ႈမိူၼ်တၢင်ႇတီႈၼၼ်ႉယဝ်ႉ၊ လႆႈဝႃႈၸၼ်ႉၵဝ်ႈၼႆၵေႃႈ လႆႈႁဵၼ်းၼမ်တႄႉတႄႉလႄႈ ဢၼ်ယၢပ်ႇမၼ်းၵေႃႈၼမ်မႃးထႅင်ႈယူႇ။ ဝၼ်းယဝ်ႉဝၼ်း ၵုမ်ႇမူၵ်းယူႇၸွမ်းၵၢၼ်ႁဵၼ်းၵူၺ်း သမ်ႉပေႃးဢမ်ႇၶႂ်ႈမီးၶၢဝ်းယၢမ်းလဵၼ်ႈ ၼၼ်ႉယဝ်ႉ။
ဢၼ်ႁဝ်းလုၵ်ႉၸၼ်ႉ8 သေၶိုၼ်ႈၸၼ်ႉ 9 မႃးၸွမ်းၵၼ်ၼႆႉၵေႃႈ ၼႂ်းႁွင်ႈ B ႁဝ်း မီး 23 ၵေႃႉၵူၺ်း။ မိူဝ်ႈပီႊၵၢႆ ၵွပ်ႈဢၢႆႈဢွင်ႇႁဵတ်းၽိတ်းပၵ်းပိူင်လႄႈ လႆႈဢွၵ်ႇႁူင်းႁဵၼ်းၵႂႃႇၼၼ်ႉၼႃႇ၊ သႅင်ၶဵဝ်ၵေႃႈ လႆႈၵႂႃႇယူတ်းယႃတူဝ်မၼ်းသေယဝ်ႉ ၶၢႆႉႁိူၼ်းၵႂႃႇယူႇတၢင်ႇဝဵင်းပႅတ်ႈယူႇ၊ ဢၢႆႈဝိၵေႃႈ ယွၼ်ႉၼႃႈႁိူၼ်းဢမ်ႇမီးၵူၼ်းႁဵတ်းၵၢၼ်ၼႆလႄႈ လႆႈဢွၵ်ႇႁူင်းႁဵၼ်းၵႂႃႇပႅတ်ႈယဝ်ႉ၊ ၸၢႆးလၢဝ်လႄႈသွႆႈလိူၼ် ၶႃသွင်ၵေႃႉၼႆႉတႄႉ ပဵၼ်ၸူႉၵၼ်ယဝ်ႉ ဢမ်ႇပေႃးသူၼ်ၸႂ်ၵၢၼ်ႁဵၼ်းၵႃႈႁိုဝ်လႄႈ ၸင်ႇလႆႈတူၵ်းၸၼ်ႉၵႂႃႇယူႇ။
ပီႊၼႆႉလႆႈဝႃႈလီယူႇၵူၺ်းယူႇႁူင်းႁဵၼ်းၵေႃႈ ပၵ်းပိူင်ၶေႃႈႁၢမ်ႈၸိူဝ်းၼႆႉ ဢမ်ႇမီးႁင်ဢၼ်လီၼၵ်းၸႂ်ၸွမ်း၊ လွင်ႈဝႆႉၸူႉဝႆႉၸူဝ်းၵေႃႈ ၶူးၶဝ်ဢမ်ႇလႆႈပၼ်တၢမ်ႇ ၵူၺ်းၵႃႈ ပေႃးဝႃႈမီးလွင်ႈၸူႉလွင်ႈၸူဝ်း ဢၼ်ၸၢင်ႈတုမ်ႉတိူဝ်ႉပိူၼ်ႈ ဢမ်ႇၼၼ် တုမ်ႉတိူဝ်ႉၵၢၼ်ႁဵၼ်းၸိူဝ်းၼႆႉၼႆ ၶူးၶဝ်ၵေႃႈလႆႈႁွင်ႉၵႂႃႇထတ်းယူႇ ပေႃးဝႃႈမၼ်းပူၼ်ႉလိူဝ်ၼႃႇႁႅင်းၵေႃႈ လၢတ်ႈတီႈဢူႈမႄႈပႃးယဝ်ႉ။ မိူၼ်ဝႃႈၵူၼ်းၺႃးႁွင်ႉထတ်း လွင်ႈၸူႉလွင်ႈၸူဝ်းၼႆႉၵေႃႈၼမ်ဝႆႉၼင်ႇၵဝ်ႇ။ ၵွပ်ႈဝႃႈ မိူဝ်ႈပိူၼ်ႈလၢႆႈၽူႈၵွၼ်းႁူင်းႁဵၼ်းၼၼ်ႉ ၶူးၶဝ်ဝႆႉမဝ်မၢင်ၼိူဝ်လွင်ႈၼႆႉၼႃႇလႄႈ ႁဵတ်းႁႂ်ႈမီးလုၵ်ႈႁဵၼ်းပႃးတွင်ႉၵႂႃႇၵေႃႉၼိုင်ႈ ထိုင်တီႈလႆႈဢွၵ်ႇႁူင်းႁဵၼ်းပႅတ်ႈ ဢွၼ်တၢင်းပၢင်တွပ်ႇလိၵ်ႈတေမႃးထိုင် ၼၼ်ႉယဝ်ႉ။ ပီႊၼႆႉၵေႃႈလႆႈသႂ်ႇၸႂ်သႂ်ႇၶေႃးၼိူဝ်လွင်ႈၼႆႉဝႆႉယူႇ။
ပေႃးဝႃႈၶိုၼ်ႈႁူင်းႁဵၼ်းၼႆၵေႃႈ တေႃႈထိုင်ၶၢဝ်းၽူၼ်ယဝ်ႉၼၼ်ႉၼႃႇ၊ တႃႇတေလႆႈပၼ်ႇလူတ်ႉထိပ်ႇၵႂႃႇၼၼ်ႉတႄႉ မီးၵမ်ႈဢေႇၵူၺ်း၊ ပီႊၼႆႉတႄႉလႆႈၵႂႃႇႁူင်းႁဵၼ်းႁင်းၵူၺ်း၊ ဢၢႆႈၸၢႆးၵေႃႈဢမ်ႇၶိုၼ်ႈႁူင်းႁဵၼ်းယဝ်ႉ ဢူၺ်းၵေႃႉမၼ်းၵေႃႈ ဢွၼ်ၵၼ်ၵႂႃႇသိုပ်ႇၶိုၼ်ႈႁူင်းႁဵၼ်း တၢင်ႇဝဵင်းၵၼ်သဵင်ႈယဝ်ႉလႄႈ ၵေႃႉဢၼ်ၵႆႉမႃးၸွမ်းႁွင်ႉ ပႃႈလင်ၶႃႈသေႇသေႇၼၼ်ႉၵေႃႈ ၵိုတ်းလွင်ႈမၢႆတွင်းမၼ်းၵူၺ်းယဝ်ႉၼႃႇ။ ပႆမိူဝ်းႁိူၼ်းမိူဝ်ႈလႂ်ၵေႃႈ ဢမ်ႇတွၼ်ႉႁဵတ်းႁႂ်ႈၶႃႈလိုမ်းဝၢႆႇလင် ယၵ်ႉတူၺ်းၶိုၼ်းသေပွၵ်ႈ။
မိူဝ်ႈၼႆႉလႅတ်ႇၵေႃႈမႆႈမႆႈႁွၼ်ႉႁွၼ်ႉတင်းဝၼ်းၼၼ်ႉယဝ်ႉ ဝၢႆးလူင်းႁူင်းႁဵၼ်း မိူဝ်ႈၶႃႈတိုၵ်ႉပႆမိူဝ်းႁိူၼ်းလွႆးလွႆးၼၼ်ႉ လႆႈႁၼ်မွၵ်ႇၵုမ်ႈသုမ်ႇ လမ်ၽိုတ်းၽိုတ်းလူင်မႃး လူမ်းထွင်းပတ်ႉပဝ်ႇထူဝ်း တူၼ်ႈမႆႉသမ်ႉပေႃးပိဝ်ၶွၼ်းၼိုင်ၵႂႃႇမူတ်း မိူၼ်ဝႃႈၽူၼ်လူင်လူမ်းလူင် တေႁွတ်ႈမႃးၼၼ်ႉယဝ်ႉ၊ ၶႃႈၵေႃႈၵူဝ်ဢမ်ႇတၼ်းထိုင်ႁိူၼ်း ႁိပ်ႈၼႅတ်ႈလႅၼ်ႈမိူဝ်းယူႇ၊ ဝၢႆးသေဝၼ်းဢၼ်ၶူးၽိဝ်ၾႃႉ ဢွၼ်ၶႃႈမိူဝ်းႁွတ်ႈႁိူၼ်းလႆႈႁင်းၵူၺ်းၼၼ်ႉ ၶႃႈၵေႃႈဢမ်ႇလႆႈၵႂႃႇၵေႃႉလဵဝ်ႁင်းၵူၺ်း မိူဝ်ႈၽွင်းၾႃႉမႅပ်ႈႁိုဝ် ယူႇတီႈလပ်းသိင်ႇ မိူဝ်ႈၽွင်းၾႃႉလင်ၼၼ်ႉသေပွၵ်ႈယဝ်ႉလႄႈ၊ ၶႃႈၵေႃႈဢမ်ႇယုမ်ႇၸႂ်လႆႈဝႃႈ ၸွင်ႇၶႃႈၼၼ်ႉ ယင်းတိုၵ်ႉတေလိုမ်းတူဝ်လႆႈယူႇႁိုဝ်။ ၶႃႈလွမ်ၵူဝ်ဝႆႉယူႇ မိူဝ်ႈႁၼ်ၼႃႈမိူင်းဢၼ်လပ်းသိင်ႇ သဵင်ႁႃႇၾူၼ်လူင်လင်မႃးမေႃးၸိူင်ႉၼၼ်။
မိူဝ်ႈၶႃႈမိူဝ်းႁွတ်ႈထိုင်ပွတ်းတၢင်းၼၼ်ႉၵေႃႈ တေႃႈႁိုဝ်တေလွတ်ႈယမ်းလႃႇ ၵၢမ်ႇလီယင်းပႃးၸွင်ႈယူႇ၊ ၶႃႈၵေႃႈၶတ်းၸႂ်သိုပ်ႇလႅၼ်ႈၵႂႃႇ ၼႂ်းၵႄႈၵၢင်သၢႆၽူၼ် ႁႃႇယႂ်ႇႁႃႇလူင်ၼၼ်ႉၵႂႃႇတိၵ်းတိၵ်း။ ၼမ်ႉၼႂ်းတၢင်းလႆၼွင်းလွင်ႈၽတ်ႉသႂ်ႇတိၼ်ၶႃႈ ႁႅင်းသိုပ်ႇယၢင်ႈယုၵ်ႉၵႂႃႇၵေႃႈ မိူၼ်ဝႃႈသမ်ႉပေႃးဢမ်ႇၶႂ်ႈပေႉမၼ်းၼၼ်ႉယဝ်ႉ၊ ယိုင်ႈၵႂႃႇယိုင်ႈၼၢၼ်းတိၵ်းတိၵ်း ပေႃးၾူၼ်တူၵ်းၵေႃႈ ၾႃႉႁူႉတိုၼ်းလမ်ယူႇယဝ်ႉ၊ သၢႆၾႃႉမႅပ်ႈႁိူဝ်ႈမႃးတေႃႇၼႃႈၶႃႈ ဢဝ်ၶႃႈသမ်ႉပေႃးတူၵ်းၸႂ်လူမ်ႉလူင်းၵႂႃႇ သဵင်ၾႃႉၵေႃႈႁွင်ႉလင်မေႃးႁႅင်း ဢဝ်ၶႃႈထိင်းတူဝ်ၸဝ်ႈၵဝ်ႇပေႃးဢမ်ႇလႆႈယဝ်ႉ ၶႃႈၵူဝ်တေႉယဝ်ႉ၊ မၼ်းသမ်ႉပေႃးလပ်းသိင်ႇလူင်ၵႂႃႇမူတ်း၊ ယၢမ်းၼၼ်ႉၶႃႈၵေႃႈလႆႈႁၼ် ၵူၼ်းၵေႃႉၼိုင်ႈ ၼွၼ်းဢၢပ်ႇလိူတ်ႈယူႇၼိူဝ်ၽႃႈ ဢၼ်ယုင်ႈယုင်ႈယၢင်ႈယၢင်ႈလူင်ဝႆႉၼၼ်ႉယူႇ၊ မိူဝ်ႈၾႃႉမႅပ်ႈမႃးပဵၼ်ၵမ်းၼၼ်ႉၵေႃႈ လႆႈႁၼ်ၼႃႈၶဝ်ပဵၼ်ၵမ်းပဵၼ်ၵမ်း၊ ၶႃႈၵေႃႈႁိုဝ်တေမီးသတိလႆႈယဝ်ႉ ၵူၼ်းၵေႃႉၼၼ်ႉ မၼ်းပဵၼ်ဢူၺ်းၵေႃႉၶႃႈ ဢၼ်ပဵၼ်ယုမ်ႉလိူၼ်ၼၼ်ႉၼႃႇ။ ၶႃႈသမ်ႉပေႃးသၼ်ႇတင်းတူဝ် ၶႃႈၵူဝ်ထိုင်တီႈဢမ်ႇႁတ်းၶဝ်ႈၸူး ၶႃႈလႅၼ်ႈပၢႆႈႁူၼ်လင်ပွၵ်ႈၶိုၼ်းတၢင်းၵဝ်ႇ လႆႈႁၼ်ငဝ်းၵူၼ်းလမ်လမ်လူမ်ႉလူင်းၵႂႃႇတႂ်ႈၾႃႉမႅပ်ႈသေ မိူင်းလူင်ၼၼ်ႉၵေႃႈ သမ်ႉပေႃးလပ်းသိင်ႇလူင်ၵႂႃႇမူတ်းယဝ်ႉ။
တွၼ်ႈသၢမ်သိပ်းၸဵတ်းသုတ်းယဝ်ႉ သိုပ်ႇတူၺ်းထႅင်ႈတွၼ်ႈသၢမ်သိပ်းပႅတ်ႇၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
