တွၼ်ႈသၢမ်သိပ်းႁူၵ်း
ၶဝ်ၼႂ်းမူႇၼၼ်ႉတႄႉဢွၼ်ၵၼ်ယုမ်ႉယူႇ ၵိုတ်းသႅင်ၶမ်းၵူၺ်းဢၼ်ဢမ်ႇႁူႉလွင်ႈႁူႉတၢင်းသင်။
“ၸိုၼ်ႈသႂ်ၵေႃႈဢမ်ႇပႂ်ႉသူယဝ်ႉ!!”
သႅင်ႁၵ်ႉလၢတ်ႈၸူး၊ ၸိုၼ်ႈသႂ်ၵေႃႈယုၵ်ႉမိုဝ်းၼိဝ်ႉၼၢင်းမၼ်းၼႄသႅင်ၶမ်းၵႂႃႇ
“ႁဝ်းမီးၵေႃႉမၢႆယဝ်ႉ!”
သႅင်ၶမ်းၼၼ်ႉၵေႃႈ ယၵ်ႉတူၺ်းၼႂ်းမူႇဢူၺ်းၵေႃႉမၼ်းၸိူဝ်းၼၼ်ႉသေ တူၺ်းၽႂ်ၵေႃႈသမ်ႉပေႃးမီးၼႃႈႁိူၼ်း၊ မီးၵေႃႉမၼ်ႈၵေႃႉမၢႆ၊ မီးၵေႃႉႁၵ်ႉၵေႃႉပႅင်းၵၼ်မူတ်းယဝ်ႉ ၼင်ႇဝႃႈၵိုတ်းမၼ်းၵူၺ်းၼၼ်ႉယူႇ။ ၵမ်းၼၼ်ႉ ၸင်ႇသမ်ႉလႆႈႁၼ်ၶမ်းလိူၼ်သႂ် ၼုင်ႈသႂ်ႇသိူဝ်ႈၶူဝ်းတႆးတဵမ်ၸုမ်ႇ ႁၢင်ႈၽၢင်ႈတူဝ်ၶိင်းလဝ်းၶၢဝ်ၼုမ်ႇ ၵုမ်ႇယႂ်ႇဢႅဝ်ႁီး ၶူၼ်ႁူဝ်လမ်ယၢဝ်း ၼႃႈသဵမ်ႈၶၢဝ်ပွတ်ႇသလွတ်ႇ ယဵပ်ႇတမ်းယၢင်ႈၵႂႃႇတီႈလႂ်ၵေႃႈ သၢႆတႃၽူႈၸၢႆးၶဝ်သမ်ႉပေႃးလႄႇၸၢႆႉတူၺ်းၸွမ်း ပေႃးဢမ်ႇၽၢတ်ႇယဝ်ႉ။
“ၼၢင်းႁၢင်ႈလီႁဝ်းမႃးယဝ်ႉ!!” သႂ်လႅင်းလၢတ်ႈ။
“ၵိုင်ႇတၢင်းပဵၼ်ၼၢင်းႁၢင်ႈလီတေႉၵဝ်ႇ ႁၼ်ၼုမ်ႇသေႇသေႇၼေႃႈ” ၶမ်းၽွင်လၢတ်ႈ။
“ပိူၼ်ႈၸင်ႇဝႃႈယိုင်ႈထဝ်ႈယိုင်ႈၼုမ်ႇၼႆၼႃႇ ဢမ်ႇယၢမ်ႈငိၼ်းႁႃႉ” ၶမ်းလိူၼ်သႂ်လၢတ်ႈၸူးၶိုၼ်း။
“သူႁၢင်ႈလီၼႃႇပူၼ်ႉ တေဢဝ်ပေႃႈႁိူၼ်းၶဝ်..ယွၼ်းပႅတ်ႈမေးယဝ်ႉၵမ်ႉမႃး” သႅင်ၶမ်းဢၼ်ၺႃးၶဝ်ဝႃႈမိူဝ်ႈၵႆႈၼၼ်ႉ လၢတ်ႈၸူးၶိုၼ်းၶဝ်ၸိူဝ်းၼၼ်ႉယူႇ။
“ႁၢင်ႈၵူဝ်ဢမ်ႇလႆႈဝႃႈႁင်းၵၼ်ၶိုၼ်းၼႃႇ”
“သူဝႃႈႁင်ႁင်းမၼ်းလႃႇ! တူၺ်းမၼ်းလၢတ်ႈ..လႅပ်ႈၸဵပ်းၸႂ်တေႉယဝ်ႈ” ၶမ်းလိူၼ်သႂ်။
“ႁဝ်းဝႃႈႁင်းမၼ်း..ပိူၼ်ႈမီးၵေႃႉႁၵ်ႉၵၼ်မူတ်းယဝ်ႉ..ၵိုတ်းမၼ်းၵူၺ်းၼႆဢိူဝ်ႈ” ၶမ်းၽွင်လၢတ်ႈ။
“ဢမ်ႇပဵၼ်ႁင်သႅင်ၶမ်း ၵိုတ်းႁဝ်းယူႇပဵၼ်ၵေႃႉလူး”
“ယုမ်ႇလႆႈတေႉဢိူဝ်ႈ ၵူၼ်းၸိူင်ႉၼင်ႇၶမ်းလိူၼ်သႂ်ၼႆႉၼႃ ပႅတ်ႈႁေမႃးၸိူင်ႉၼင်ႇ ၶမ်းၽွင်ၶႃသႅင်ႁၵ်ႉၵူၺ်းယူဝ်ႉ” ၼုမ်ႇႁွမ်လၢတ်ႈ။
“တေႉၵႃႈ ၵူၼ်းႁၢင်ႈလီၼႆႉႁႃၸူႉယၢပ်ႇၼႆသူဢမ်ႇႁူႉႁႃႉ ၵူၼ်းၵျိူၵ်ႈတႄႉၼမ်ယူႇ၊ ၵူၼ်းၵဝ်းတႄႉဢမ်ႇမီး၊ ၶဝ်ႈႁႃပိူၼ်ႈၵေႃႈ ပိူၼ်ႈထၢင်ႇဝႃႈမီးၸူႉတိၵ်းတိၵ်းၼၼ်ႉၼႃႇ ပွင်ႇၸႂ်ဢိၼ်ႉၼိုင်ႈလႄႈ ၵူၼ်းဢမ်ႇမီးၸူႉၼႆႉ ပဵၼ်ၵူၼ်းႁၢင်ႈလီယဝ်ႉ” လၢတ်ႈယုမ်ႉၸူးသႅင်ၶမ်းၵႂႃႇယူႇ။
“သူၼႆႉၵေႃႈႁၢင်ႈမေႃလၢတ်ႈၼႃႇ!! ဢၼ်လၢတ်ႈၼႄပိူၼ်ႈႁေ လၢတ်ႈၼႄႁဝ်းပေႉမႃးပိူင်ႈၵၼ်လႃႇ ၸိုင်ဝႃႈဢမ်ႇႁူႉတေလိူၵ်ႈၵေႃႉလႂ်ၼႆဢမ်ႇၸႂ်ႈႁႃႉ မႃးထၢမ်ႁဝ်းဝၼ်းၼၼ်ႉ ၵေႃႉၼၼ်ႉၵေႃႈသေလၢႆ၊ ၵေႃႉၼႆႉၵေႃႈမေႃသႂ်ႇၸႂ်၊ ထႅင်ႈၵေႃႉၵေႃႈႁၵ်ႉၼႃႇၼႃႇ” ယိင်းၶမ်းၵေႃႈ တင်းလၢတ်ႈတင်းပႆမႃးၸူးတီႈၶဝ်ၵုမ်ၵၼ်ၼၼ်ႉယူႇ။
“ယႃႇလၢတ်ႈယဝ်ႉလႃႈဢေးၶမ်း ၵမ်ႉသႅင်ၶမ်းတေၸႂ်လဵၵ်ႉယဝ်ႉ”
သႅင်ၶမ်းၵေႃႈယုမ်ႉသေယဝ်ႉ “ပိူၼ်ႈဝႃႈၵူၼ်းႁၢင်ႈလီၼႆႉ ယုမ်ႇၸႂ်ဢမ်ႇလႆႈၵူၺ်းယူဝ်ႉ”
ၶမ်းလိူၼ်သႂ်လၢတ်ႈၸူးၵႂႃႇတီႈယိင်းၶမ်းၶိုၼ်း “ပေႃးတေမႃးႁဵတ်းၼႆတေႃႇၵၼ်ၸိူင်ႉၼႆ..မိူဝ်းၶၢႆၶူဝ်းၶိုၼ်းႁေလႃႈ”
“ႁဝ်းၵၢၼ်ႉပႅတ်ႈၵၢၼ်ပႅတ်ႈငၢၼ်းႁေမႃးဢိူဝ်ႈၼႆႉ…”
လိူဝ်သေဢူၺ်းၵေႃႉဢူၺ်းသႄႈၵၼ်ယဝ်ႉ ၸဵမ်ဢဝ်ၶႅၵ်ႇတီႈၸမ်တီႈၵႆ ဢၼ်ႁူႉၸၵ်းမိုတ်ႈၵိုဝ်းဝႆႉ ဢူႈမႄႈၵၼ်ၼၼ်ႉၵေႃႈ ဢွၼ်ၵၼ်မႃးၶဝ်ႈႁူမ်ႈမူၼ်ႈၸွမ်း ထၢၼ်ႈပေႃးၵိုၼ်းတဵမ်ၽိူၼ်လူင်ၵႂႃႇၵူႈၽိူၼ်ယူႇ။
ဢမ်ႇႁိုင်ဢမ်ႇၼၢၼ်း ၵူၼ်းၵေႃႈဝွတ်ႈဝၢႆးႁၢႆ ၵိုတ်းဢူၺ်းၵေႃႉဢူၺ်းသႄႈ ဢၼ်မႃးၸွႆႈၵၼ်ႁဵတ်းသၢင်ႈၵႂႃႇ ဢိၵ်ႇတင်းၵူၼ်းႁုင်မိုဝ်ႉႁုင်တူမ်ႈ ၵူၼ်းၸွႆႈၵၢၼ်ၸွႆႈငၢၼ်းၸိူဝ်းၼႆႉၵူၺ်းယဝ်ႉ။ ယၢမ်းၼၼ်ႉ ၸၢႆးၸၢႆးလႄႈ ဝၼ်းလၢဝ်ၵေႃႈ ဢွၼ်ၵၼ်ႁွတ်ႈမႃးယူႇ။
“ႁႃးမႃးတူၵ်းလိုၼ်းပႅတ်ႈယဝ်ႉယူဝ်ႉၼႆႉ!” ၸၢႆးၸၢႆးလၢတ်ႈ။
“ပႆႇတူၵ်းလိုၼ်းၼင်ႇၵဝ်ႇ..မႃးမႅၼ်ႈဢဝ်ၵူၺ်း!” ၼူၼ်းမူဝ်လၢတ်ႈ။
ယွၼ်ႉပဵၼ်ၵူၼ်းၵၢၼ်ၼမ်လႄႈ လႆႈႁိမ်ၶၢဝ်းယၢမ်းႁေၵေႃႈမႃးၵူၺ်းၼၼ်ႉယဝ်ႉ။
“ႁဵတ်းႁိုဝ်လႄႈမႃးၸွမ်းၵၼ်လႃႇ ၵေႃႉယူႇႁူင်းယႃ..ၵေႃႉယူႇႁူင်းႁဵၼ်း”
“မႃးႁူပ်ႉၵၼ်တီႈတၢင်းၽႄၼၼ်ႉယိုင်” ဝၼ်းလၢဝ်လၢတ်ႈ။
“ၵၢၼ်သုၵ်ႉထူၼ်ႈယဝ်ႉယူဝ်ႉတီႈႁူင်းယႃ!” ၼူၼ်းမူဝ်ထၢမ်ၸူးဝၼ်းလၢဝ်။
“ၼၼ်ႉယဝ်ႉ ဢမ်ႇမီးသူယဝ်ႉၵေႃႈ ၵၢၼ်ႁဝ်းၼၵ်းမႃးထႅင်ႈၼၼ်ႉၼႃႇ ၶဝ်တီႈႁူင်းယႃၵေႃႈဢမ်ႇတၼ်းမႃးႁေ ၽၢၵ်ႇႁဝ်းမႃးပႃးဢဝ်ယဝ်ႉဝႃႈ”
“ပွင်ႇၸႂ်ယူႇၵူၺ်း..” ၼူၼ်းမူဝ်ၸင်ႇၶိုၼ်းထၢမ်ၸူးၸၢႆးၸၢႆး သေဝႃႈ “တီႈႁူင်းႁဵၼ်းၵေႃႈၵၢၼ်ၼမ်ထူၼ်ႈယဝ်ႉယူဝ်ႉ”
“ၸႂ်ႈယဝ်ႉဝႃႈ!! ၶူးမၼ်းၵေႃႈဢေႇၼႃႇယဝ်ႉမိူဝ်ႈလဵဝ် လႆႈဝႃႈ ၶဝ်ႈၶိင်ႇတဵမ်ဝၼ်းတဵမ်ဝၼ်းၼၼ်ႉၼႃႇ မႃးတီႈၼႆႈၵေႃႈ လႆႈႁိမ်ၶၢဝ်းယၢမ်းၵိၼ်ၶဝ်ႈႁေမႃးၼၼ်ႉယိုင်”
“ၵၢင်ၶမ်ႈမီးၵိၼ်လဵင်ႉပႃးဢိူဝ်ႈၼႃႈ! ပေႃးတၼ်းတၼ်းၵေႃႈမႃးလႄႈ ၵူၼ်းၵေႃႈတေမီးႁဝ်းဢူၺ်းၵေႃႉၵၼ်ၸိူဝ်းၼႆႉႁေ ဢူၺ်းၵေႃႉပီႈသႅင်ၶိူဝ်းႁေၵူၺ်း”
“ဢိူဝ်ႈ!! ပေႃးၵၢၼ်ဢမ်ႇသုၵ်ႉသၵ်ႉၵေႃႈတေမႃးယူႇ”
ၶၢဝ်းယၢမ်းတႃႇႁပ်ႉၶႅၵ်ႇၵၢင်ဝၼ်းၵေႃႈသုတ်းသဵင်ႈယဝ်ႉ၊ ၸင်ႇလႆႈဢွၼ်ၵၼ်ၵဵပ်းၽဵဝ်ႈၵဵပ်းသိမ်းၵႂႃႇယူႇ။ ထိုင်ၼင်ႇၵၢင်ၶမ်ႈမႃးၵေႃႈ လႆႈတႄႇပၢင်ၵိၼ်လဵင်ႉၵၼ်ၵႂႃႇယဝ်ႉ။ ၵူၼ်းၼုမ်ႇၵူၼ်းၵမ်လၢႆလၢႆ ဢွၼ်ၼင်ႈဝႅင်းပၢင်ပဵၼ်မူႇ ဢွၼ်ၵၼ်ဢုပ်ႇသဵင်သမ်ႉပေႃးဢူၼ်မေႃးပၼ်းလူင်ၵႂႃႇမူတ်း၊ လိုၵ်းမႃးတၢၼ်ႇတၢၼ်ႇ ၶဝ်ၵေႃႈ ဢွၼ်သူင်ႇၸဝ်ႈမၢဝ်ႇၸဝ်ႈသၢဝ် ၶဝ်ႈႁိူၼ်းႁေႃၵႂႃႇပႅတ်ႈယူႇယဝ်ႉ။ သမ်ႉဝႃႈၸဝ်ႈမၢဝ်ႇၸဝ်ႈသၢဝ်ဢမ်ႇယူႇသေတႃႉ မိူဝ်ႈလႂ်မိူဝ်ႈၵိၼ်ၵျေႃႇယူႇယဝ်ႉ ၸဝ်ႈႁိူၼ်းတႄႉတိုၵ်ႉမီးယူႇလူးၼႆၵေႃႈ ဢွၼ်ၵၼ်ဝႅင်းပၢင်ၵၼ်သိုပ်ႇၵိၼ်ၵႂႃႇထႅင်ႈ၊ သႅင်ၶမ်းၼၼ်ႉၵေႃႈ ႁိုဝ်တေယွမ်းၽႂ်လႃႇ ပေႃးဝႃႈၵိၼ်လဝ်ႈ၊ ပီႇယႃႇၸိူဝ်းၼႆႉ ဢွၵ်ႉၵိၼ်ဢွၵ်ႉၵိၼ် ၼင်ႇၽူႈၸၢႆး ၼၼ်ႉယဝ်ႉ။
ၵၢင်ၶိုၼ်းလိုၵ်းၼႃႇယဝ်ႉ ၵူၼ်းၵေႃႈၶႂ်ႈဝၢႆး၊ ဢၼ်မဝ်းၵေႃႈၼွၼ်းၵၼ်မူတ်းယဝ်ႉ၊ ၸၢႆးသိူဝ်၊ သၢႆႁိူဝ်ႈ၊ လႅင်းမိူင်း ဢမ်ႇပေႃးၵိၼ်ၼမ်လႄႈ လႆႈဢွၼ်ၵၼ်ၽဵဝ်ႈသိမ်းၵႂႃႇယူႇ၊ ၼုမ်ႇႁိူင်းတႄႉဢမ်ႇတိူဝ်ႉတူၺ်းသေဢိတ်း၊ ၵူၺ်းဢၼ်တိုၵ်ႉၵိၼ်လႆႈယူႇလႄႈ ပႆႇပေႃးၼၼ်ႉတႄႉ မီးသႅင်ၶမ်းဢၼ်ၼင်ႈယူႇႁင်းၵူၺ်း ၼၼ်ႉယဝ်ႉ။
“ဢေးယိင်းၼႆႉ ၵဝ်ႁၼ်မၼ်းၼင်ႈၵိၼ်ၸဵမ်မိူဝ်ႈပိူၼ်ႈတေႇပၢင်မၼ်းပုၼ်ႉယဝ်ႉၼႆႉ ယူဝ်ဝႃႈမၼ်းတေပေႃး ႁမ်ႉဢမ်ႇပေႃးႁေပွၵ်ႈလႃႇမႂ်းဝႃႈ ဢၢႆႈၼုမ်ႇ!” သၢႆႁိူဝ်ႈထၢမ်။
“ၵႃႈဢမ်ႇပႆႇသိမ်းတဝ်ႈမၼ်းပႅတ်ႈ မၼ်းၵေႃႈတေဢၢၼ်းၵိၼ်ႁႂ်ႈမူတ်းဢိူဝ်ႈၼၼ်ႉ”
“ၵိၼ်လဝ်ႈပေႃးတၢၼ်ႇၼႆႉ မႂ်းပေႉဝႆႉၸႂ်ႁေ ပွႆႇမၼ်းၵႂႃႇယူႇႁင်းၵူၺ်းလႆႈလႃႇ” ၸၢႆးသိူဝ်လၢတ်ႈ။
“သင်မၼ်းၵိၼ်ယဝ်ႉမဝ်းပွႆႇတူဝ်ပွႆႇၸႂ်တႄႉ ၵဝ်တေဝႃႈယူႇမဵဝ်းၼိုင်ႈ မႂ်းႁၼ်မၼ်းၵိၼ်ယဝ်ႉ ၵဝ်ဝႃႈပိူၼ်ႈယင်းတေၵူဝ်မၼ်းၵွၼ်ႇဢိူဝ်ႈၼၼ်ႉ”
“မၼ်းၵေႃႈၸႂ်ႈယူႇ!!” သၢႆႁိူဝ်ႈ။
“ႁႅင်ႉမႂ်းႁမ်ႉ..ၵိၼ်ဢိတ်ႉၵေႃႈပေႃးမဝ်းယဝ်ႉလႃႇ!” လႅင်းမိူင်းလၢတ်ႈၸူးၼုမ်ႇႁိူင်း။
“ဢေးယိင်းဢဝ်ၵႂႃႇမူတ်းယဝ်ႉယူဝ်ႉထၢင်ႇ!! မိူဝ်ႈမၼ်းၵေႃႉလဵၵ်ႉလဵၵ်ႉ ယၢမ်ႈလၵ်ႉၵိၼ်လဝ်ႈဢူႈႁဝ်း ဢဝ်မဝ်းပဵၼ်သီႇႁႃႈဝၼ်းၵွၼ်ႇၼၼ်ႉ ထၢင်ႇဝႃႈမၼ်းတေဢမ်ႇႁတ်းၵိၼ်ယဝ်ႉ၊ သမ်ႉၵိၼ်ဢမ်ႇမေႃပေႃးပႅတ်ႈႁေၼၼ်ႉယိုင်”
“လႆႈမႃးတီႈဢူႈသူယူဝ်ႉပေႃးၼႆ”လႅင်းမိူင်း။
“ၸႂ်ႈယူႇယူဝ်ႉ!” ၼုမ်ႇႁိူင်းၼၼ်ႉၵေႃႈ ထူၺ်ႈၸႂ်လူင်ႁေ ယၵ်ႉတူၺ်းၸူးသႅင်းၶမ်းၵႂႃႇယူႇ။
“မႂ်းတေဢမ်ႇႁၢမ်ႈမၼ်းႁေဢိတ်ႉၼိုင်ႈႁႃႉ” သၢႆႁိူဝ်ႈ။
“မၼ်းႁူႉတူဝ်ယူႇၵူၺ်း ပေႃးမၼ်းၶႂ်ႈပေႃးမၼ်းတေပေႃးၵႂႃႇႁင်းၵူၺ်းမၼ်း ပွႆႇမၼ်းၵႂႃႇလႄႈ မၼ်းမီးလွင်ႈၼၵ်းၸႂ်ဝႆႉယူႇဢိူဝ်ႈၼၼ်ႉ”
ၶဝ်ၵေႃႈၸုၵ်းသေတူၺ်းမၼ်း ၼင်ႈၵိၼ်ယူႇႁဵတ်းၼၼ်ယဝ်ႉ ၼုမ်ႇႁိူင်းၸင်ႇသိုပ်ႇလၢတ်ႈထႅင်ႈ။
“မၼ်းတေငဝ်တေႉယဝ်ႉ! တင်းပဵၼ်ၵူၼ်းဢဝ်ဢူၺ်းၵေႃႉပဵၼ်ယႂ်ႇႁေ တွၼ်ႈတႃႇမၼ်း မိူၼ်တေသုမ်းၵူၼ်းၵေႃႉဢၼ်မၼ်းႁၵ်ႉၵႂႃႇၼၼ်ႉယဝ်ႉ၊ မၼ်းၵေႃႈလီယူႇ ယူဝ်တေၸၢင်ႈမေႃႁႃၵေႃႉႁၵ်ႉမိူၼ်ပိူၼ်ႈမႃး”
ၶဝ်ၵေႃႈၵဵပ်းသိမ်းၸွႆႈၵၼ်သေယဝ်ႉ ပွၵ်ႈမိူဝ်းၵႂႃႇတၢင်းၽႂ်တၢင်းမၼ်းယူႇ။ သႅင်ၶမ်းၼၼ်ႉၵေႃႈ ႁၼ်ဝႃႈဢမ်ႇမီးၽႂ်ယဝ်ႉလႄႈ ဝၢင်းၵွၵ်းမၼ်းလူင်းသေ ပွႆႇၼမ်ႉတႃမၼ်းယွတ်ႇယွႆႉလူင်းမႃး ယူႇၼိူဝ်ၽိူၼ်ၼၼ်ႉႁင်းၵူၺ်းယဝ်ႉ၊ ႁွင်ႉႁႆႈဢိမ်ႇယဝ်ႉၵေႃႈ ပႆသိုင်ႉပႆသင်ႉလူင်မိူဝ်းၵႂႃႇၸွမ်းတၢင်းလွႆးလွႆးယူႇ။ မိူဝ်ႈဢၼ်တိုၵ်ႉမိူဝ်းယူႇၼၼ်ႉ ၸင်ႇသမ်ႉမီးၵူၼ်းမိူဝ်းၸွမ်းလင်မၼ်းလႄႈ သမ်ႉဝႃႈမဝ်းယူႇၵေႃႈ သတိတိုၵ်ႉၵိုၵ်းတူဝ်ယူႇသေ ၸင်ႇဝိၼ်ႇဝၢႆႇတူၺ်းယဝ်ႉ လႆႈႁၼ်ပဵၼ် ၽိူဝ်ၶမ်းယူႇ။
“မႃးၸွမ်းႁဵတ်းသင်လႃႇ!!..ႁဝ်းႁၼ်တၢင်းမိူဝ်းႁိူၼ်းယူႇၵူၺ်း”
“သူလိုမ်းတိုဝ်းၶႅပ်းတိၼ်!” ယိပ်းဢဝ်ၶႅပ်းတိၼ်သႅင်ၶမ်းၼၼ်ႉ မႃးတမ်းပၼ်ႁိမ်းတိၼ်ၼၼ်ႉသေ ယိပ်းဢဝ်တိၼ်သႅင်ၶမ်းသႂ်ႇၵႂႃႇယူႇ ၵူၺ်းၵႃႈသႅင်ၶမ်းဢမ်ႇလႆႈသွတ်ႇတိၼ်မၼ်းသႂ်ႇ။
“ႁဝ်းဢမ်ႇလႆႈလိုမ်းလေႃႇ ဢမ်ႇၶႂ်ႈတိုဝ်းၵူၺ်း သႂ်ႇယဝ်ႉပႆယၢပ်ႇ၊ တိၼ်ၵေႃႈၸဵပ်းၼႃႇ၊ ပႆတိၼ်လၢႆဢဝ်မၼ်းလူမ်ၸႂ်လီ”
“ယူဝ်ဝႃႈတေမဝ်းဢမ်ႇႁူႉႁူဝ်ႁူႉႁၢင်ယဝ်ႉ ယင်းတိုၵ်ႉလီယူႇၵူၺ်းလူး”
သႅင်ၶမ်းၵေႃႈႁႅၼ်မုင်ႈတူၵ်းၵႂႃႇၼိူဝ်ၵၢင်ႁၢဝ် ဢၼ်မီးလုၵ်ႈလၢဝ်လႅင်းပေႃးတဵမ်ၾႃႉၼၼ်ႉယဝ်ႉ သိုပ်ႇပႆၵႂႃႇလွႆးလွႆး။
“ႁဝ်းယၢမ်ႈၵူဝ်မီးဢူၺ်းၵေႃႉဢိူဝ်ႈ! မိူဝ်ႈၶဝ်ၽၢတ်ႇယၢၼ်ႁဝ်းၵႂႃႇၼၼ်ႉ ႁဵတ်းႁႂ်ႈႁဝ်းငဝ်တေႉယဝ်ႉ၊ ငဝ်ထိုင်တီႈဢမ်ႇၶႂ်ႈမီးဢူၺ်းၵေႃႉထႅင်ႈၼၼ်ႉယိုင်၊ ထိုင်ဝၼ်းၼိုင်ႈ ၼူၼ်းမူဝ်သႂ်လႅင်းၶဝ်ၵေႃႈ ၶဝ်ႈမႃးႁႃႁဝ်း မႃးယွၼ်းပဵၼ်ဢူၺ်းၵေႃႉႁဝ်း ၶဝ်ႈမႃးႁဵတ်းလီတေႃႇႁဝ်း ထိုင်တီႈႁဝ်းထဵင်ဢမ်ႇလႆႈၼၼ်ႉယဝ်ႉ၊ ႁဝ်းၵေႃႈလႆႈမိုတ်ႈၵိုဝ်းႁူႉၸၵ်းၵၼ်ထိုင်တီႈ လွင်ႈပဵၼ်ဢူၺ်းၵေႃႉၵၼ်ၼၼ်ႉ မၼ်းလီၶိုၼ်ႈမႃး လွင်ႈၸမ်ၸႂ်ႁဝ်းမီးတေႃႇၵၼ်ၼမ်မႃး၊ ပိုတ်ႇလၢတ်ႈၼႄၵၼ်လႆႈၵူႈလွင်ႈ တုၵ်ႉၵေႃႈတုၵ်ႉၸွမ်းၵၼ်၊ သိူဝ်းၵေႃႈသိူဝ်းၸွမ်းၵၼ် မၼ်းႁဵတ်းႁႂ်ႈႁဝ်းၶႂ်ႈယူႇၸွမ်းၶဝ်ၵႂႃႇႁိုင်ႁိုင်ၼၼ်ႉယဝ်ႉ”
သႅင်ၶမ်းၵေႃႈ ထူၺ်ႈၸႂ်လူင်မႃးသေ
“မိူဝ်ႈမီးၶဝ်ယူႇ ၸၢတ်ႈပၢၼ်ႁဝ်းၼၼ်ႉမၼ်းတဵမ်ထူၼ်ႈၼႃႇယဝ်ႉ၊ ႁဝ်းၵေႃႈယၢမ်ႈဝူၼ်ႉဝႃႈ ပေႃးမီးၶဝ်ပဵၼ်ဢူၺ်းၵေႃႉၵူၺ်းၵေႃႈ ႁၢၼ်ႉၸႂ်ယဝ်ႉ၊ ၵေႃႉႁၵ်ႉဢၼ်ဝႃႈၼၼ်ႉတႄႉ ဢမ်ႇၸမ်ပဵၼ်တွၼ်ႈတႃႇႁဝ်းယဝ်ႉ၊ ၵူၺ်းၵႃႈ မၼ်းၵေႃႈပဵၼ်တၢင်းဝူၼ်ႉႁဝ်းၽၢႆႇလဵဝ်ၵူၺ်း၊ တေႃႇထိုင်သႂ်လႅင်းပေႃးႁဵတ်းၶႅၵ်ႇၵႂႃႇ ႁဝ်းၵေႃႈ ဢမ်ႇပေႃးၵႃႈႁိုဝ်မိူဝ်ႈၼၼ်ႉ သမ်ႉဝႃႈတေတေႇၼႃႈႁိူၼ်းၵႂႃႇယဝ်ႉႁိုဝ် ဢမ်ႇတေႇ ႁဝ်းၵေႃႈယင်းတိုၵ်ႉပဵၼ်ဢူၺ်းၵေႃႉၵၼ်ယူႇ ဢမ်ႇလႅၵ်ႈလၢႆႈ၊ ၵူၺ်းၵႃႈ မၼ်းသမ်ႉပိၼ်ႈၽူၼ်ၵၼ်တင်း ဢၼ်ႁဝ်းဝူၼ်ႉၼၼ်ႉယဝ်ႉ မိူဝ်ႈတႄႇၼႃႈႁိူၼ်းမႃးၵေႃႈ ၵူႈလွင်ႈလႅၵ်ႈလၢႆႈၵႂႃႇမူတ်း ၶဝ်မီးၵၢၼ်ၼမ်မႃး၊ မီးပုၼ်ႈၽွၼ်းဢၼ်တေလႆႈႁၢပ်ႇၼမ်မႃး၊ မီးလုၵ်ႈဢၼ်တေလႆႈလဵင်ႉ လူဝ်ႇပၼ်ၶၢဝ်းယၢမ်းတွၼ်ႈတႃႇ ၵူၼ်းၼႂ်းၼႃႈႁိူၼ်း၊ တႃႇတေမီးၶၢဝ်းယၢမ်းယူႇၸွမ်းၵၼ် ဢုပ်ႇၼူဝ်ႁုၼ်ႉၶူဝ်ၸွမ်းၵၼ်ၼၼ်ႉၵေႃႈ ဢေႇယွမ်းၵႂႃႇတိၵ်းတိၵ်းယဝ်ႉ” သိုပ်ႇယၢင်ႈၵႂႃႇလွႆးလွႆးသေယဝ်ႉ လၢတ်ႈထႅင်ႈ−
“သမ်ႉဝႃႈသႂ်လႅင်းတေႇၼႃႈႁိူၼ်းၵႂႃႇယဝ်ႉသေတႃႉ ယင်းလီဢၼ်မီးၼူၼ်းမူဝ်! ၵူၺ်းၵႃႈ ဝၼ်းဢၼ်ၶဝ်မႃးလၢတ်ႈဝႃႈတေတႄႇၼႃႈႁိူၼ်းယဝ်ႉ! ဢဝ်ႁဝ်းလၢတ်ႈသင်ပေႃးဢမ်ႇဢွၵ်ႇၼၼ်ႉယိုင် မၼ်းပဵၼ်လွင်ႈလီတွၼ်ႈတႃႇၶဝ် လႆႈၸႂ်ႉၸၢတ်ႈပၢၼ်ယူႇၸွမ်းၵူၼ်းၵေႃႉဢၼ်ၶဝ်ႁၵ်ႉ၊ မီးတၢင်းသိူဝ်းၸွမ်းၸၢတ်ႈပၢၼ်ဢၼ်ၶဝ်ၶႂ်ႈပဵၼ် ႁဝ်းထုၵ်ႇလီလၢတ်ႈဝႃႈ ယိၼ်းၸူမ်းၸွမ်းၼႃႈ ႁဝ်းၵေႃႈလၢတ်ႈဢွၵ်ႇသူပ်းဢမ်ႇလႆႈ”
ယၵ်ႉတူၺ်းၼႃႈၽိူဝ်ၶမ်းယဝ်ႉ သိုပ်ႇလၢတ်ႈထႅင်ႈ “ၶဝ်တေႇၼႃႈႁိူၼ်းၵႂႃႇယဝ်ႉ..ၶဝ်တေမီးတၢင်းသိူဝ်းယူႇၸွင်ႇၸႂ်ႈ?”
“ဢိုမ်ႈ! ၶဝ်တိုၼ်းတေမီးတၢင်းသိူဝ်းယူႇယဝ်ႉ.. ”
“ၸႂ်ႈႁိုဝ်! ၶဝ်တေမီးတၢင်းသိူဝ်း ၵူၺ်းၵႃႈ ယိုင်ႈဝူၼ်ႉ မၼ်းယိုင်ႈၶႅၼ်းယၢပ်ႇတွၼ်ႈတႃႇႁဝ်းယဝ်ႉ၊ သမ်ႉဝႃႈ လွင်ႈဢၼ်ယၢမ်ႈၵိူတ်ႇပဵၼ်မႃးၼၼ်ႉ တေပဵၼ်မႃးထႅင်ႈယဝ်ႉၼႆၵေႃႈ ႁဝ်းဢမ်ႇတွၼ်ႈယၢမ်ႈၸွမ်းမၼ်းႁေပွၵ်ႈ ထၢင်ႇတႄႉႁဝ်းတေၵူဝ် ၵၢၼ်ထုၵ်ႇပွႆႇၽႃႈတေႉယဝ်ႉ”
သႅင်ၶမ်းၵေႃႈၶူဝ်ဢွၵ်ႇမႃးလင်လင်သေ
“သူတေဢမ်ႇပွင်ႇၸႂ်လေႃႇ ၵၢင်ၸႂ်ၵေႃႉထုၵ်ႇပွႆႇၽႃႈမၼ်းမိူၼ်ႁိုဝ် ယွၼ်ႉသူၵေႃႈပဵၼ်ၵူၼ်းဢၼ်လႆႈၸႂ်ပွႆႇၽႃႈပိူၼ်ႈယူႇယဝ်ႉ ဢမ်ႇၸႂ်ႈႁိုဝ်လႃႇ! ပဵၼ်ၵူၼ်းၸိူင်ႉၼင်ႇသူၵေႃႈလႅပ်ႈလီမိူၼ်ၵၼ်ၼေႃ၊ ၶႂ်ႈလႆႈၵေႃႈဢဝ်၊ ဢမ်ႇၶႂ်ႈလႆႈၵေႃႈပႅတ်ႈၵူၺ်း ဢမ်ႇလူဝ်ႇသူၼ်ၸႂ်ဝႃႈ ၵၢင်ၸႂ်ပိူၼ်ႈၼၼ်ႉမၼ်းတေပဵၼ်ၸိူင်ႉႁိုဝ်”
“သူႁူႉလႆႈၸိူင်ႉႁိုဝ်လႃႇ..ဝႃႈႁဝ်းၼၼ်ႉဢမ်ႇပွင်ႇၸႂ်ၼႆ”
“ပေႃးၵူၼ်းပွင်ႇၸႂ် မၼ်းဢမ်ႇႁဵတ်းၸိူင်ႉၼၼ်လေႃႇ သင်မၼ်းထူပ်းမႃး မၼ်းၵေႃႈတေဢဝ်တွၼ်ႈသွၼ် လိူဝ်သေတေႁဵတ်းႁၢႆႉၵၢင်ၸႂ်ပိူၼ်ႈၸိူင်ႉၼၼ်”
ၽိူဝ်ၶမ်းၼၼ်ႉၵေႃႈ မိူၼ်တေဢမ်ႇပွင်ႇၸႂ် ဢၼ်သႅင်ၶမ်းၶႂ်ႈလၢတ်ႈၼၼ်ႉလႄႈ “ၶႂ်ႈလၢတ်ႈလွင်ႈသင်တေႉလႃႇ”
“ယႃႇႁဵတ်းၵႅင်ႈမႃးႁႃဢမ်ႇႁူႉလွင်ႈသင်ယူႇယဝ်ႉ”
ၶႃၵေႃႈဢွၼ်ၵၼ်ပႆမႃးႁွတ်ႈႁိူၼ်းယဝ်ႉလႄႈ
“ႁွတ်ႈႁိူၼ်းႁဝ်းယဝ်ႉ…ယိၼ်းၸူမ်းယဝ်ႉၼႃႈ မႃးသူင်ႇ”
“ယူဝ်ဝႃႈတေၶဝ်ႈႁိူၼ်းမိူဝ်းသေ ဢမ်ႇသူင်ႇသင်ႇၵၼ်ၸိူင်ႉၼႆလူၵွၼ်ႇ”
“မိူဝ်းလွႆးလွႆးၶႃႈ..”
သႅင်ၶမ်းၵေႃႈ ၵွင်လင်ၶဝ်ႈႁိူၼ်းမိူဝ်းၵႂႃႇယူႇ။ မိူဝ်ႈတေၽုၺ်ႇၽၵ်းတူၶဝ်ႈႁိူၼ်းမိူဝ်းၼၼ်ႉ ၽိူဝ်ၶမ်းၸင်ႇႁွင်ႉၸူး
“ႁဝ်းဢမ်ႇႁူႉဝႃႈသူၶႂ်ႈလၢတ်ႈထိုင်လွင်ႈသင် ႁႂ်ႈသူႁူႉဝႆႉဝႃႈ ႁဝ်းဢမ်ႇလႆႈပဵၼ်ၸိူင်ႉၼၼ်ၼႃ”
သႅင်ၶမ်းဝၢႆႇတူၺ်းၶိုၼ်းၵေႃႈ မၼ်းသမ်ႉပေႃးၵွင်လင်ပွၵ်ႈမိူဝ်းၵႂႃႇယဝ်ႉ။
တွၼ်ႈသၢမ်သိပ်းႁူၵ်းသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢမ်သိပ်းၸဵတ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
