တွၼ်ႈသၢမ်သိပ်းႁႃႈ
ယၢမ်းၵၢင်ၼႂ်ၸဝ်ႉ မိူင်းပႆႇလႅင်းၾႃႉပႆႇပၢင်ႇ သႅင်ၶမ်းဢၼ်တိုၵ်ႉၼွၼ်းဝၢၼ်ယူႇၼၼ်ႉၵေႃႈ သႂ်လႅင်းမႃးတွႆႇၽၵ်းတူႁွင်ႉပူၵ်းမၼ်းယူႇတင်းႁိုင် တေႃႇတေႃႇမၼ်းတေမိုၼ်းတႃတိုၼ်ႇ သမ်ႉပေႃးၶႂ်ႈမီးၵႂႃႇႁႃႈမိၼိတ်ႉၼႆႉယဝ်ႉ၊ တူၺ်းႁၢင်ႈတူၺ်းၽၢင်မၼ်း ဢမ်ႇၶႂ်ႈလုၵ်ႉသေဢိတ်းလႄႈ ၵၢၼ်းၵၢၼ်းၵႂႃႇၽုၺ်ႇၽၵ်းတူဢဝ်ယူႇ။ သႂ်လႅင်းဢၼ်ၽုၺ်ႇၽၵ်းတူမႃးၼၼ်ႉ လႆႈႁၼ်သႅင်ၶမ်းၼွၼ်းမူပ်ႇယူႇတိၼ်ၽၵ်းတူၼၼ်ႉလႄႈ
“လုၵ်ႉလႆႈယဝ်ႉၼႃႈဢေးယိင်း! လူဝ်ႇၵႂႃႇၸဵမ်ၸဝ်ႉဢိူဝ်ႈ”
ၶဝ်ႈမႃးၸၼ်သႅင်ၶမ်းၼၼ်ႉလုၵ်ႉၶိုၼ်ႈမႃးယူႇ၊
“တိုၵ်ႉၶႂ်ႈၼွၼ်းယူႇ ယွၼ်းၼွၼ်းထႅင်ႈႁေသိပ်းမိၼိတ်ႉၼႆႉဢမ်ႇလႆႈႁႃႉ”
“ဢမ်ႇလႆႈ!! လႃႈၼႃႇယဝ်ႉၼႆႉ ၼူၼ်းမူဝ်ပေႃးႁွင်ႉမႃးၸဵမ်ၵႆႈယဝ်ႉၼေႈ”
သႅင်ၶမ်းၼၼ်ႉၵေႃႈ ၸိုၼ်ႇလုၵ်ႉၶိုၼ်ႈမႃး ၼင်ႇဢမ်ႇၸိုၼ်ႈဢမ်ႇပၢင်ႇသေဢိတ်း။ ၵွပ်ႈဝႃႈ ၶမ်ႈဝႃးတင်းၶိုၼ်း မၼ်းၵေႃႈလႆႈၵႂႃႇၸွႆႈႁဵတ်းၸွႆႈသၢင်ႈ ႁၢင်ႈၶိူင်ႈပွႆးၶဝ်ၼၼ်ႉလႄႈ လႆႈမႃးႁိူၼ်းလိုၵ်းဢိတ်းၼိုင်ႈသေ တၼ်းလႆႈၼွၼ်းဢဝ်လၢႆၸူဝ်ႈမူင်းၵူၺ်း သမ်ႉပေႃးလႆႈလုၵ်ႉယဝ်ႉ။ မၼ်းၼၼ်ႉၵေႃႈ သုၵ်ႈၼႃႈလၢင်ႉတႃ ႁွပ်ႇၶူဝ်းလဵင်းမၼ်း မိူဝ်းၵႂႃႇတၢင်းႁိူၼ်းၼူၼ်းမူဝ်ၶဝ်ၼၼ်ႉယူႇ။
တီႈၼႂ်းႁိူၼ်းၼူၼ်းမူဝ်ၼၼ်ႉၵေႃႈ ပိူၼ်ႈပေႃးဢွၼ်လုၵ်ႉႁၢင်ႈႁႅၼ်းတူဝ်ၵၼ်မူတ်းယဝ်ႉ။ ၼူၼ်းမူဝ်ဢၼ်လႆႈႁၼ်သႅင်ၶမ်း ႁွတ်ႈမႃးယဝ်ႉၼႆၵေႃႈ လၢၵ်ႈၸၼ်ဢဝ်သႅင်ၶမ်းၵႂႃႇ ႁႂ်ႈပိူၼ်ႈႁၢင်ႈၶိူင်ႈပၼ်ၵမ်းလဵဝ်ယူႇ။
မိူဝ်ႈဢၼ်သႅင်ၶမ်းႁၢင်ႈၶိူင်ႈလၢႆႈၶူဝ်း ဢွၵ်ႇႁိူၼ်းမႃးၼၼ်ႉ ႁဵတ်းႁႂ်ႈၵူၼ်းၼႂ်းႁိူၼ်းၼူၼ်းမူဝ်ၶဝ် ဢွၼ်ၵၼ်မိုင်ယၵ်ႉတူၺ်းမၼ်းၵႂႃႇ။ တူဝ်ၶိင်းယွမ်လဵၵ်ႉသေး ၼုင်ႈသႂ်ႇၶူဝ်းတႆးၶွင်ႇၸၢင်ၸၢင်ႁူမ်ႈလေႃးပႃးသီၶၢဝ် ႁၼ် ဢႅဝ်ၶႅဝ်ႉ၊ မီးၵုမ်ႇ၊ မီးဢူၵ်း ႁၼ်ပဵၼ်တွၼ်ႈလႂ်ပွတ်းၼၼ်ႉ သီၼိူဝ်ႉၼုမ်ႇၶၢဝ်ပွတ်ႇ မိုဝ်းဢွၼ်ႇသဵမ်ႈလဝ်းလီ၊ ၼႃႈသဵမ်ႈၶၢဝ်ၼုမ်ႇၶွင်ႇဢိတ်းဢီႈ မွႆတႃလမ်ယၢဝ်း သီႇသူပ်းၶွင်ႇလႅင်ငဝ်းငဝ်း၊ ၶူၼ်ႁူဝ်ၵဝ်ႈမူၺ်းဝႆႉယူင်ႉယူင်ႉ တူၺ်းၸိူင်ႉႁိုဝ်ၵေႃႈ ႁၢင်ႈလီပၢင်ႇတႃ တူၺ်းလၢႆၵမ်းၵေႃႈဢမ်ႇဢၢမ်းဢမ်ႇလႆႈ၊ ပေႃးၸဝ်ႈသၢဝ်မၼ်းဢမ်ႇ ႁၢင်ႈၶိူင်ႈၼမ်တႄႉ တေသုမ်းဢူၺ်းၵေႃႉၸဝ်ႈသၢဝ်မၼ်းယဝ်ႉ။
“ႁၢင်ႈလီတေႉယဝ်ႉဝႃႈ ဢေးယိင်း!!”
သႅင်ၶမ်းၼၼ်ႉၵေႃႈ မႃးၸုၵ်းႁိမ်းၼူၼ်းမူဝ်သေ
“ၽိူဝ်လိူဝ်ယုၵ်ႉတႃပေႃးဢမ်ႇပေႉယဝ်ႉၼႆႉ သမ်ႉမႃးသႂ်ႇၶူၼ်တႃပွမ်ပၼ်ၵၼ်ထႅင်ႈႁေ ႁဵတ်းလႆႈတီႈၵၼ်ၼႃႇယဝ်ႉ”
“ၵူၺ်းၵႃႈသူၵေႃႈႁၢင်ႈလီတေႉတေႉလူး ဝႆႉဝႃႈႁဵတ်းတွၼ်ႈတႃႇဢူၺ်းၵေႃႉသေလႄႈ သူၵေႃႈတေလႆႈႁဵတ်းပၼ်ႁဝ်းပွၵ်ႈၼႆႉၵူၺ်းၼင်ႇၵဝ်ႇ”
ၾႃႉပၢင်ႇမိူင်းလႅင်းမႃးယဝ်ႉ ၼင်ႇဝႃႈသဵင်ၵူၼ်းၼႃႈႁိူၼ်းၼၼ်ႉၵေႃႈ သမ်ႉပေႃးဢူၼ်မေႃးပၼ်းလူင်ဝႆႉယူႇ၊ ၵူၼ်းၼုမ်ႇၵူၼ်းၵမ် ၸဵမ်ဢၼ်ၸဝ်ႈမၢဝ်ႇ၊ဢူၺ်းၵေႃႉၸဝ်ႈမၢဝ်ႇၼၼ်ႉၵေႃႈ ဢွၼ်ၵၼ်ၶဝ်ႈႁိူၼ်းမႃး တႃႇႁပ်ႉဢဝ်ၸဝ်ႈသၢဝ်မိူဝ်းႁိူၼ်းယူႇ။ ဢွၼ်တၢင်းတေဢဝ်မိူဝ်းၵေႃႈ လုၵ်ႈတင်းသွင် လႆႈဢွၼ်ၵၼ်ၵၼ်ႇတေႃး ဢူႈမႄႈလႄႈၵူၼ်းထဝ်ႈၵူၼ်းၵႄႇ ႁပ်ႉၵႂၢမ်းမင်ႇၵလႃႇသေယဝ်ႉၸင်ႇမိူဝ်း။ ႁွတ်ႈထိုင်ႁိူၼ်းၸဝ်ႈမၢဝ်ႇယဝ်ႉၵေႃႈ ဢူႈမႄႈသွင်ၸဝ်ႈ ပႂ်ႉႁပ်ႉလုၵ်ႈပႂ်ႉၶဝ်ၶဝ်ႈႁိူၼ်းမိူဝ်းၵႂႃႇလႄႈ သွင်ၵေႃႉၵေႃႈ လႆႈဢွၼ်ၵၼ်ၵၼ်ႇတေႃးပေႃႈလေႃးမႄႈ ႁူမ်ႈလူၺ်ႈပီႈဢိၵ်ႇၼွင်ႉၵူၼ်းလူင် ႁပ်ႉထွမ်ႇၵႂၢမ်းသွၼ် မတ်ႉမႆမတ်ႉမိုဝ်းပၼ်ၵႂႃႇ တွၼ်ႈၸဝ်ႉၵေႃႈသုတ်းယဝ်ႉသေ လႆႈတႄႇလဵင်ႉလူပီႈၼွင်ႉၶႅၵ်ႇၸိူဝ်းမႃးၶဝ်ႈႁူမ်ႈပွႆးၼၼ်ႉ ယူႇယဝ်ႉ။
ၵူၼ်းမႃးၶဝ်ႈႁူမ်ႈပၢင်ၶႅၵ်ႇၶဝ်ၼၼ်ႉၵေႃႈ ၵဝ်မႃးမႂ်းမိူဝ်းၵဝ်မိူဝ်းမႂ်းမႃး ၵူၼ်းသမ်ႉပေႃးတဵမ် တီႈၼင်ႈပေႃးဢမ်ႇၶၢတ်ႇ၊ ၸဝ်ႈမၢဝ်ႇၸဝ်ႈသၢဝ်ၶဝ်ၵေႃႈ ၼင်ႈပႂ်ႉပၼ်ပိူၼ်ႈမႃးမတ်ႉမိုဝ်း မိုဝ်းသမ်ႉပေႃးမႆၵုၺ်တဵမ်လူင်ဝႆႉယဝ်ႉ။
မိူဝ်ႈတိုၵ်ႉဢွၼ်ၵၼ်ႁပ်ႉၶႅၵ်ႇယူႇၼၼ်ႉ ၸင်ႇသမ်ႉမီးၵႃးလမ်းၼိုင်ႈ ဢၼ်ၶိုၵ်ႉၶႅမ်ႉႁၢင်ႈလီၼႃႇၼၼ်ႉ မႃးၵိုတ်းယူႇႁိမ်းႁိူၼ်းၼၼ်ႉသေ၊ မီးၵူၼ်းၶပ်းလူတ်ႉဢွၵ်ႇမႃးၽုၺ်ႇၽၵ်းတူပၼ်ယဝ်ႉ ၸင်ႇမီးၽူႈယိင်းၵေႃႉၼိုင်ႈ ဢွၵ်ႇလူတ်ႉမႃး သမ်ႉသႂ်ႇပႃးတင်းမၢၼ်ႇတႃလမ်ၽိုတ်းၽိုတ်းလူင်ႁေ ပႆၵႂႃႇတၢင်းၸဝ်ႈမၢဝ်ႇၸဝ်ႈသၢဝ်ၶဝ်ယူႇၼၼ်ႉလႄႈ ၸင်ႇပူတ်းမၢၼ်ႇတႃမၼ်းဢွၵ်ႇမႃးသေ
“ယိၼ်းၸူမ်းၸွမ်းၼႃႈ!”
“ယူဝ်ဝႃႈပဵၼ်မႄႈလဵင်ႉသထေးလူင်တီႈလႂ်မႃး တီႈတေႉၵေႃႈပဵၼ်မႄႈလဵင်ႉသႅင်ဢွင်ႇၶဝ်လူင်ၼႆႉ” သႅင်ၶိူဝ်းလၢတ်ႈၼင်ႇၸူမ်းသိူဝ်း။
“ယိၼ်းၸူမ်းယဝ်ႉၼႃႈ ဢၼ်ႁွတ်ႈမႃး ႁၼ်ဝႃႈသူဢမ်ႇတၼ်း..ထၢင်ႇတေဢမ်ႇမႃးယဝ်ႉ” ၼူၼ်းမူဝ်ယုမ်ႉလၢတ်ႈၸူးၶိုၼ်း။
“ႁိုဝ်တေလႆႈၼႄႇ ၽူႈၶေႉၶဵင်ႇႁဝ်းပဵၼ်ၵေႃႉ ႁဝ်းၵေႃႈထုၵ်ႇလီလႆႈမႃးငိၼ်းၸူမ်းၸွမ်းယူႇၵႂႃႈ ” ယၵ်ႉတူၺ်းသႅင်ၶမ်းသေ
“ဢူၺ်းၵေႃႉၸဝ်ႈသၢဝ်ၼႆႉ ႁဝ်းႁူႉၸၵ်းယူႇၸွင်ႇၸႂ်ႈ”
သမ်ႉပေႃးဢဝ်ၼူၼ်းမူဝ်တူၺ်းၼႃႈၶႃသေၶူဝ်ယူႇ၊ ဝၢႆးသေၵႂႃႇသိုပ်ႇၶိုၼ်ႈႁဵၼ်းၸၼ်ႉၸွမ်ၵၼ်ယဝ်ႉ ၶႃသွင်ၵေႃႉၵေႃႈ ဢမ်ႇလႆႈၶိုၼ်းထူပ်းၵၼ်ထႅင်ႈသေပွၵ်ႈ ဢၼ်ဢမ်ႇတွင်းၼႆႉ တေပဵၼ်ယွၼ်ႉသႅင်ၶမ်းႁၢင်ႈၶိူင်ႈ ဢမ်ႇမိူၼ်သႅင်ၶမ်းၼၼ်ႉၵေႃႈပႃးယဝ်ႉ။
“ဢေးယိင်းဢႄႈ…ဢမ်ႇတွင်းယဝ်ႉႁႃႉ!”
“ၽႂ်ႁိုဝ်တေတွင်းလႆႈလႃႇ တမ်ႉဢမ်ႇတွၼ်ႉႁၼ်မၼ်းႁၢင်ႈၶိူင်ႈၸိူင်ႉၼႆႁေပွၵ်ႈလူင် ဝႃႈယဝ်ႉယၢမ်ႈႁၼ်တီႈလႂ် ယူႇလီယူႇၼေႃႈ”
“ဢိုမ်ႈ!..ဢိုမ်ႈယူႇလီယူႇၵူၺ်း သူၵေႃႈယူႇလီယူႇၼေႃႈ! ပဵၼ်မႄႈလဵင်ႉသထေးယဝ်ႉလူး”
“တၢၼ်ႇတၢၼ်ႇမၼ်းၵဝ်ႇဢိူဝ်ႈ! ၵၢၼ်တႄႉၼမ်ထူၼ်ႈယဝ်ႉဝႃႈ သူလူးပဵၼ်ႁိုဝ်ပဵၼ်ႁႃလႃႇ လွင်ႈၵၢၼ်လွင်ႈငၢၼ်း ၵႂႃႇလႆႈလီယူႇႁႃႉ”
“လီယူႇၵူၺ်း!! ဢမ်ႇလႆႈႁၼ်ၵၼ်..ၶႂ်ႈမီးၸမ်ၸမ်ၸဵတ်းပီႊယဝ်ႉယူဝ်ႉၼႆႉ”
“ၶႂ်ႈဝႃႈမွၵ်ႈၼၼ်ႉယဝ်ႉဝႃႈ ငိၼ်းဝႃႈသူပဵၼ်ၽူႈတႅပ်းတတ်းတြႃးၼႆဢမ်ႇၸႂ်ႈႁႃႉ”
“ႁဝ်းဢွၵ်ႇယဝ်ႉ၊ ဢွၵ်ႇမႃးႁဵတ်းၽူႈတၢင်ၼႃႈၼၼ်ႉယိုင်”
“ပေႃးႁဝ်းသၢမ်ၵေႃႉမႃးယူႇၸွမ်းၵၼ် သမ်ႉပေႃးၶုၵ်းၸႂ်လႆႈမိူဝ်ႈယူႇႁူင်းႁဵၼ်းယဝ်ႉ ၶႄႉၵၼ်ဢဝ်ထီႉၼိုင်ႈ၊ ယွၼ်ႉဢေးယိင်းၼၼ်ႉယဝ်ႉ ႁဵတ်းႁႂ်ႈႁဝ်းဢမ်ႇပဵၼ်ၵိၼ်ပဵၼ်ယႅမ်ႉပဵၼ်လၢႆဝၼ်း၊ ပေႃးဝူၼ်ႉတူၺ်းၶိုၼ်းမိူဝ်ႈလဵဝ်တႄႉ မိူၼ်ပဵၼ်လွင်ႈၶႂ်ႈၶူဝ်ၵႂႃႇယဝ်ႉ၊ ဢမ်ႇႁူႉႁဝ်းတေၶတ်းၸႂ်ႁဵၼ်းပဵၼ်တေႉပဵၼ်ဝႃႈႁဵတ်းသင် ဢွၵ်ႇႁူင်းႁဵၼ်းမႃးယဝ်ႉၵေႃႈ သမ်ႉလႆႈမႃးႁဵတ်းၵၢၼ်ၼႂ်းၼႃႈႁိူၼ်း ၼင်ႇဝႃႈၽိုၵ်းၵၢၼ်မႂ်ႇမႂ်ႇထႅင်ႈၵူၺ်းၵဝ်ႇ”
“မိူဝ်ႈၼၼ်ႉသူဢမ်ႇလႆႈထီႉၼိုင်ႈသေတႃႉၵေႃႈ မိူဝ်ႈလဵဝ်တႄႉ သူဢွင်ႇမၢၼ်လိူဝ်သေႁဝ်းယဝ်ႉ” ၼူၼ်းမူဝ်တွပ်ႇၸူးၶိုၼ်း။
ၶဝ်ၵေႃႈဢွၼ်ၵၼ်ထႆႇၶႅပ်းႁၢင်ႈၵိုၵ်းၵၼ်သေယဝ်ႉ သႅင်ဢွင်ႇၵေႃႈ ပွၵ်ႈမိူဝ်းၶိုၼ်းယူႇယဝ်ႉ။
ဢမ်ႇႁိုင် ၸင်ႇမီးၵႃးမွၵ်ႈသွင်သၢမ်လမ်းၼႆႉ တမ်းဝႆႉယူႇႁိမ်းၶၢင်ႈတၢင်းၼၼ်ႉသေ၊ ၵႃးလမ်းတၢင်းၼႃႈၼၼ်ႉတႄႉပဵၼ် သႅင်လိုၼ်းလႄႈၵေႃႉႁၵ်ႉမၼ်း၊ လမ်းၵၢင်သမ်ႉမီး ၶမ်းလိုၼ်း လႄႈ ၼုမ်ႇႁွမ် မႃးၸွမ်းၵၼ်ယူႇ၊ လမ်းလင်ၼၼ်ႉၵေႃႈ မီး သႅင်လိူၼ်လႄႈတင်းၸဝ်ႈၽူဝ်မၼ်း ဢၼ်ႁွပ်ႇပႃးလုၵ်ႈဢွၼ်ႇ မွၵ်ႈသွင်ၶူပ်ႇပၢႆပၢႆၼၼ်ႉမႃးၸွမ်းယဝ်ႉ။
သႂ်လႅင်းၼၼ်ႉၵေႃႈ ဢဝ်လုၵ်ႈဢွၼ်ႇမၼ်းၽၢၵ်ႇဝႆႉပၼ်တီႈၼၢႆးသေ ၼႅတ်ႈမႃးၸွႆႈႁပ်ႉၶႅၵ်ႇယူႇ၊ မိူဝ်ႈႁၼ်ၸုမ်းၶဝ်ၼၼ်ႉမႃးၵေႃႈ ႁႃပၼ်တီႈၼင်ႈၵႂႃႇယဝ်ႉ။ ၶဝ်ၼႆႉတႄႉၵေႃႈ ႁဵတ်းၵၢၼ်ယူႇတီႈၼႂ်းဝဵင်းၼႆႉၵူၺ်းၼင်ႇၵဝ်ႇ ၵႆႉႁၼ်ၵၼ်ယူႇတႃႇသေႇ ဢၼ်ဢမ်ႇပေႃးၵႆႉႁၼ်ၵၼ်ၵႃႈႁိုဝ်ၼႆႉတႄႉ လႅပ်ႈမီးသႅင်ၶမ်းၵူၺ်း။ မိူဝ်ႈဢၼ်ၶဝ်တိုၵ်ႉၼင်ႈၵိၼ်ၶဝ်ႈၵၼ်ယူႇၼၼ်ႉ ၼူၼ်းမူဝ်ၶႃသႅင်ၶမ်းၵေႃႈ မႃးၸူးတီႈၶဝ်ႁေယဝ်ႉလႆႈမႃးၼင်ႈဢုပ်ႇၵၼ်ၵႂႃႇယူႇ။
“သႅင်ၶမ်းမိူဝ်ႈၼႆႉသူႁၢင်ႈလီတေႉယဝ်ႉဝႃႈ!” ၶဝ်ဢွၼ်ၵၼ်လၢတ်ႈၸူးသႅင်ၶမ်း မိူၼ်တေပဵၼ်ၶေႃႈၵႂၢမ်းဢၼ်ၶဝ်ၶႂ်ႈလၢတ်ႈလိူဝ်ပိူၼ်ႈ မိူဝ်ႈမႃးႁၼ်ၼႂ်းပၢင်ၶႅၵ်ႇၼၼ်ႉယဝ်ႉ။
“မိူၼ်ပၢင်ၶႅၵ်ႇႁဝ်းၼႆႉတေပဵၼ် ပၢင်ပွႆးပိုတ်ႇၼႄတၢင်းႁၢင်ႈလီသႅင်ၶမ်းယဝ်ႉလႄႇ”
ယၢမ်းၼၼ်ႉၶိူဝ်းႁွမ်ၵေႃႈမႃးၸူးၶဝ်ထႅင်ႈႁေ မႃးၽိုတ်ႉၽၢတ်ႉၼင်ႈတင်ႇၸွမ်းၸိူဝ်းၼၼ်ႉၵႂႃႇ။
“ႁဵတ်းႁင်သူၸိူဝ်းၼႆႉ..မႃးပေႃးဢမ်ႇပႂ်ႉၵၼ်သေဢိတ်းလူင်”
“ၵူဝ်ၽူႈဢဝ်ၶၢဝ်ႇႁဝ်းၵၢၼ်သုၵ်ႉသၵ်ႉလႄႈ ဢမ်ႇတၼ်းမႃးၼၼ်ႉယိုင်” သႅင်လိုၼ်းလၢတ်ႈ။
“ၸႂ်ႈၵႃႈ..ၽႂ်ႁိုဝ်မိူၼ်ၽူႈႁွင်ႉၵႂၢမ်းၸိူင်ႉသူလႃႇ ပွႆးမီးတီႈလႂ်ၵေႃႈ ၵႂႃႇမီးတီႈၼၼ်ႈယူႇတႃႇသေႇ”
“ပွႆးဢူၺ်းၵေႃႉတႄႉ ႁဝ်းၵေႃႈႁိုဝ်လွတ်ႈၵဝ်ႇလႃႇ”
“ၼုမ်ႇႁွမ်ၵေႃႈႁၢင်ႈႁဵတ်းၵၢၼ်တီႈသၢႆၵၢၼ်မိၼ်ဢမ်ႇၸႂ်ႈႁႃႉ တၼ်းမႃးမိူဝ်ႈလႂ်လႃႇ” သႅင်ၶမ်းထၢမ်။
“ၸႂ်ႈယဝ်ႉဝႃႈ တိုၵ်ႉမႃးမိူဝ်ႈဝႃးၵူၺ်း ႁဝ်းၵေႃႈၵႂႃႇၵႂႃႇမႃးမႃးတႃႇသေႇၼၼ်ႉယဝ်ႉဝႃႈ”
ၽၢႆႇတၢင်းသႅင်ၶိူဝ်းၼၼ်ႉၵေႃႈ မီးဢူၺ်းၵေႃႉမၼ်းမႃးၸူမ်းၸွမ်းယူႇတင်းၼမ်ၼၼ်ႉယဝ်ႉ။ ၽၢႆႇတၢင်းၼူၼ်းမူဝ် ဢၼ်မႃးၵမ်ႈၼမ်ၵေႃႈ ၼႂ်းဢူၺ်းၵေႃႉ ဢၼ်ၶိုၼ်ႈႁဵၼ်းၸွမ်းၵၼ်ၼႆႉယဝ်ႉ။ ၼူၼ်းမူဝ်ဢၼ်ႁၼ်ၶမ်းလိုၼ်း ဢမ်ႇပေႃးတၵ်းသဵင်သင်ၼၼ်ႉၵေႃႈ
“ယိၼ်းၸူမ်းယဝ်ႉၼႃႈၶမ်းလိုၼ်း ဢၼ်ႁဵတ်းပၼ်ၶႅပ်းႁၢင်ႈႁဝ်း”
“ဢမ်ႇပဵၼ်သင်ၼႃ ႁၼ်သူဢဝ်မႃးတမ်းၼႃႈပၢင်ပွႆးသူၸိူင်ႉၼႆၵူၺ်းၵေႃႈ ႁဝ်းယိၼ်းၸူမ်းၼႃႇယဝ်ႉ”
“ႁႂ်ႈမီးၵူၼ်းမႃးပၼ်ႁႅင်းလၢၼ်ႉသူၼမ်ၼမ်ႈၼႃႈပေႃးၼႆ”
ၶိူဝ်းႁွမ်ၼၼ်ႉၵေႃႈ သိုပ်ႇလၢတ်ႈၸူးတီႈ ၶမ်းလိုၼ်း ဢၼ်ပဵၼ်ဢူၺ်းၵေႃႉၸမ်ၸႂ်ၵၼ်တင်း မူၺ်လိုၼ်းၼၼ်ႉၵႂႃႇ
“သူလႆႈၵပ်းသိုပ်ႇတင်းမူၺ်လိုၼ်းယူႇႁႃႉ! မိူဝ်ႈလဵဝ်မၼ်းၵႂႃႇမီးတီႈလႂ်ယဝ်ႉလႃႇ ႁဝ်းဢမ်ႇလႆႈၵပ်းသိုပ်ႇမၼ်းႁိုင်ၼႃႇယဝ်ႉ”
“ၵူၼ်းလႄႇၵူၼ်းလၢဝ်းၼႃႇ မိူဝ်ႈလဵဝ်ၵေႃႈၵႂႃႇမီးယူႇသေမိူင်းမိူင်းၵႂႃႈ”
“ၶႂ်ႈဝႃႈဢမ်ႇလႆႈၵပ်းသိုပ်ႇၵၼ်”
ယၢမ်းၼၼ်ႉ ၼူၼ်းမူဝ်ၵေႃႈယိပ်းဢဝ်တင်းၾူင်းမၼ်းၼၼ်ႉမႃးသေ ႁၼ်ၼႃႈမူၺ်လိုၼ်းမီးယူႇၼႂ်းၾူင်း ၼၼ်ႉယဝ်ႉ။
“တိုၵ်ႉလၢတ်ႈထိုင်ၸိုဝ်ႈၵူၺ်း ပေႃးတၼ်းမႃးမီးယူႇၼႃႈၾူင်းၼႆႉယဝ်ႉလႃႇ” ၶိူဝ်းႁွမ်လၢတ်ႈ။
“ၼူၼ်းမူဝ်သူင်ႇပၼ်ၶႅပ်းႁၢင်ႈသူၸိူဝ်းၼႆႉလႄႈ လႆႈႁၼ်ယဝ်ႉၵေႃႈၶႂ်ႈမိူဝ်းၵမ်းလဵဝ်ယဝ်ႉဢိူဝ်ႈၼႆႉ”
“ၵႂႃႇလႄႇၵႆၼႃႇလူႉ မိူဝ်ႈလဵဝ်လႄႇဝႆႉမိူင်းလႂ်လႃႇ” သႅင်လိူၼ်ထၢမ်။
“တိုၵ်ႉပၼ်ႇပေႇပၼ်ႇပေႇၸွမ်းမိူင်းၶႄႇၼႆႉၼေႈ မိူဝ်ႈလဵဝ်မႃးမီးယူႇပိူၺ်ႇၵျိၼ်း တေဢၢၼ်းၵႂႃႇလႄႇတမ်ႇတိူင်းမိူင်းၶႄႇဢၼ်ဝႃႈၼၼ်ႉဝႃႇၼႆႉ”
“ႁၢင်ႈလႄႇမိူင်းၶႄႇၸဵမ်မိူဝ်ႈလိူၼ်ပူၼ်ႉယဝ်ႉဢမ်ႇၸႂ်ႈႁႃႉ!!”
“ႁဝ်းတေလႆႈၵႂႃႇထႅင်ႈယဝ်ႉ ႁႂ်ႈၵူႈၵေႃႉယူႇလီၵိၼ်ဝၢၼ်ၵၼ်ၼႃႈ ၸင်ႇၵွႆႈဢုပ်ႇၵၼ်ထႅင်ႈ…”
ၽႂ်ဢမ်ႇပႆႇတၼ်းလႆႈသင်ႇသင် မၼ်းသမ်ႉပေႃးဝၢင်းၾူင်းပႅတ်ႈယဝ်ႉ၊ ယၢမ်းၼၼ်ႉ သႅင်ႁၵ်ႉလႄႈၶမ်းၽွင်ၵေႃႈ ၶီႇလူတ်ႉၶိူင်ႈမႃးၸွမ်းၵၼ်သေ မိူဝ်ႈႁၼ်ၸိူင်ႉၼၼ် သႅင်ၶမ်းပေႃးႁိုဝ်ႈၼမ်ႉဝႆႉထႃႈယူႇယဝ်ႉ။
“ဢွၼ်ၵၼ်မႃးၸဵမ်မိူဝ်ႈလၢႆမူင်းပုၼ်ႉလႃႇၼႆႉ” ၼူၼ်းမူဝ်ထၢမ်။
“မွၵ်ႈႁႃႈမူင်းပၢႆပၢႆၼႆႉယဝ်ႉဝႃႈ!! ႁႃႈၸူဝ်ႈမူင်းၼၼ်ႉၼႃႇ၊ တူၺ်းႁၢင်ႈတူၺ်းၽၢင်ႁဝ်းဢမ်ႇလီတူၺ်းႁေဢိတ်းၸွင်ႇၸႂ်ႈႁိုဝ်” သႅင်ႁၵ်ႉထၢမ်။
“ယူႇၼႂ်းဝဵင်းၼႆႉပေႃးလီၼႃႇယဝ်ႉ တိုၵ်ႉႁႃၶႂ်ႈၵႂႃႇႁႃၶိုၼ်ႈပႂ်ႉႁိူၼ်းၵႆယူႇလႄႇဢ” သႅင်လိူၼ်လၢတ်ႈၸူး။
“ႁိုင်ႁိုင်ၼၢၼ်းၼၢၼ်းတေလႆႈဢွၵ်ႇႁိူၼ်းမႃးၵေႃႉလဵဝ်ၸိူင်ႉၼႆ လီပေႃးၵႃႈႁိုဝ် ပၼ်ပေႃႈလုၵ်ႈဢွၼ်ႇၶဝ်ဢဝ်လုၵ်ႈဝႆႉႁေ ႁႂ်ႈႁဝ်းႁဵတ်းသၢဝ်ၽွင်ႈၵႂႃႈ”
ငိၼ်းၸိူင်ႉၼၼ်ယဝ်ႉၵေႃႈ သႅင်လိူၼ်တူၺ်းၼႃႈၸဝ်ႈၽူဝ်မၼ်းၼၼ်ႉသေယဝ်ႉ ယုမ်ႉဢွၵ်ႇမႃးသေ “ႁဝ်းလိုမ်းဝူၼ်ႉပႅတ်ႈဢိူဝ်ႈ!!” ၸဝ်ႈၽူဝ်မၼ်းၼၼ်ႉၵေႃႈ ဢမ်ႇၸၵ်းသဵင် ယုမ်ႉယူႇႁဵတ်းၼၼ်ၵူၺ်း။ မိူၼ်တေပဵၼ်ၽူႈယိင်းလၢႆလၢႆလႄႈ မၼ်းၵေႃႈႁွပ်ႇလုၵ်ႈမၼ်းဢွၵ်ႇၵႂႃႇပႅတ်ႈၼႂ်းမူႇၶဝ်ၼၼ်ႉယူႇ။
ၶမ်းၽွင်ၼၼ်ႉၵေႃႈ မိူဝ်ႈဢၼ်လႆႈႁၼ်သႅင်ၶမ်းၼႆ သမ်ႉပေႃးဢဝ်မၼ်းတူၵ်းၸႂ်လူင်ၵႂႃႇ
“ဢေးယိင်းႁႃႉၼႆႉ!! သမ်ႉပေႃးဢမ်ႇၶႂ်ႈတွင်းတေႉလူင်”
“ၼင်တႃႁဝ်းၼၵ်းၼႃႇယဝ်ႉဝႃႈ! သူသမ်ႉမႃးတူၵ်းၸႂ်ႁဝ်းထႅင်ႈႁေ ယိုင်ႈၶႅၼ်းၼၵ်းၸႂ်ထႅင်ႈဢိူဝ်ႈၼႆႉ”
“ယႃႇဝႃႈၼၼ်လႄႈ ဢမ်ႇၸၢင်ႈဝႃႈၼႃႇ ႁၢင်ႈလီၸိူင်ႉၼႆ ယူဝ်ၸၢင်ႈမီးၵေႃႉထုၵ်ႇၸႂ်ႁၼ်မႅၼ်ႈၺႃး၊ မီးၵေႃႉၶႂ်ႈႁူႉၸၵ်းမႃးတူင်ႉတၵ်ႉလၢတ်ႈတေႃႇၽွင်ႈၼၼ်ႉၼႃႇ ၼူၼ်းမူဝ်ၵေႃႈတႄႇယဝ်ႉ၊ ၵိုတ်းသူၵူၺ်းႁိုဝ်” ၶမ်းၽွင်တင်းလၢတ်ႈတင်းယုမ်ႉယူႇ။
“ၽူႈတႅမ်ႈလိၵ်ႈႁဝ်းလၢတ်ႈမႃးထုၵ်ႇမႅၼ်ႈယဝ်ႉ!” ၸိုၼ်ႈသႂ်ၼုင်ႈတင်းၶူဝ်းပလိၵ်ႈႁေ ၶဝ်ႈမႃးၼႂ်းပွႆးၼၼ်ႉယဝ်ႉ။
“သူမႃးၸိူင်ႉၼႆဢမ်ႇၸႂ်ႈဝႃႈတေမႃးႁႃၺွပ်းၽႂ်ၸွင်ႇၸႂ်ႈ!!” သႅင်ၶမ်းလၢတ်ႈၸူးၶိုၼ်း။
“ႁဝ်းလၵ်ႉပႅတ်ႈၵၢၼ်ႁေမႃး ဢမ်ႇတၼ်းလႆႈလၢႆႈၶူဝ်းဢိူဝ်ႈ”
“ဢိူဝ်ႈ! ၵိုတ်းယူႇလူးၸိုၼ်ႈသႂ်ၼႆႉၼႃႇ သူဝႆႉႁဵတ်းသင်”
ၶမ်းၽွင်လႄႈၸိုၼ်ႈသႂ်ၵေႃႈ ယုမ်ႉၸူးၵၼ်ယူႇၸုတ်းၵုတ်း ၼင်ႇမီးသေလွင်ႈလွင်ႈဝႆႉယူႇ။
တွၼ်ႈသၢမ်သိပ်းႁႃႈသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢမ်သိပ်းႁူၵ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
