တွၼ်ႈသၢမ်သိပ်းသီႇ
ႁိုင်ယူႇတၢၼ်ႇတၢၼ်ႇ ထိုင်တဵင်ႈၶိုၼ်းယဝ်ႉၼႆၵေႃႈ ပိူၼ်ႈဢွၼ်ၵၼ်ႁွင်ႉၵႂၢမ်းႁပ်ႉၸဵင် ၼပ်ႉထွႆလင်ၵႂႃႇၸွမ်းၵၼ် ႁူမ်ၸူမ်းႁပ်ႉတွၼ်ႈပီႊမႂ်ႇတႆးၵႂႃႇ၊ သဵင်မူၵ်ႇတႅၵ်ႇ မွၵ်ႇၾႆးၼၼ်ႉၵေႃႈ တႅၵ်ႇလင်ၽူင်ႉပိဝ်ၶိုၼ်ႈပိဝ်ၶိုၼ်ႈယူႇ။ ယၢမ်းၼၼ်ႉ ၶူးၽိဝ်ၾႃႉၵေႃႈ ဢဝ်ႁူင်းၾႆးမိၼ်မႃး ႁႂ်ႈၶႃႈၸွႆႈမၼ်းယိပ်းယူႇ၊ ၵွပ်ႈဝႃႈၼၢႆးႁဝ်းလႄႈၶူးပိူင်းၾႃႉၶႃၽူဝ်မေး ၶဝ်သၢမ်ၵေႃႉ ယိပ်းၸွမ်းၵၼ်ဝႆႉဢၼ်ၼိုင်ႈယဝ်ႉ၊ ထႅင်ႈဢၼ်ၼိုင်ႈၵေႃႈ ဢဝ်မႃးပၼ်ႁႃးၼၼ်ႉၼႃႇ။
ႁႃးၵေႃႈယိပ်းၵေႃႉၸဵင်ႇသေ ပွႆႇမၼ်းၶိုၼ်ႈၵႂႃႇယဝ်ႉ ယၵ်ႉမုင်ႈတူၺ်းမၼ်းပိဝ်ၶိုၼ်ႈၵႂႃႇတိၵ်းတိၵ်း၊ ႁူင်းၾႆးႁႃးၼၼ်ႉၵေႃႈ ပိဝ်ၶိုၼ်ႈမိၼ်ၵႂႃႇၸွမ်းပိူၼ်ႈယူႇ၊ ၼိူဝ်ၵၢင်ႁၢဝ်ၼၼ်ႉ မီးႁူင်းၾႆးမိၼ်ပိဝ်ႁိူဝ်ႈလႅင်းလႅင် ပေႃးသႅမ်းၸႅၼ်ႇလူင်ၵႂႃႇ ႁၢင်ႈလီတေႉယဝ်ႉဝႃႈ။ သဵင်ၼၼ်ႉသမ်ႉဝႃႈၶႃႈလၢတ်ႈယူႇၼႂ်းၸႂ်ၶႃႈၵေႃႈ ႁိမ်းႁူၶႃႈၼၼ်ႉ လႆႈငိၼ်းမိူၼ်ၵၼ်ယဝ်ႉဝႃႈ
“ႁၢင်ႈလီတေႉယဝ်ႉ” မိူဝ်ႈငိၼ်းၸိူင်ႉၼၼ် ၶႃႈၵေႃႈဝၢႆႇယၵ်ႉတူၺ်းၵႂႃႇတီႈၵေႃႉလၢတ်ႈၼၼ်ႉသေ သမ်ႉဝႃႈလပ်းသိင်ႇၼႃႇၵေႃႈ ၼင်ႇႁၢင်ႈလႆႈႁၼ်မႅၼ်ႈၺႃးသၢႆတႃ ဢၼ်ၶဝ်တူၺ်းၸူးမႃးၼၼ်ႉယူႇ။ ႁူဝ်ၸႂ်ၶႃႈၵေႃႈ တႄႇႁဵတ်းၵၢၼ်ႁႅင်းမႃးလိူဝ်ၵဝ်ႇယဝ်ႉ။
ႁပ်ႉၸဵင်ယဝ်ႉၵႂႃႇယဝ်ႉ ပွႆးၵေႃႈဝၢႆး ပိူၼ်ႈၵေႃႈဢွၼ်ၵၼ်ပွၵ်ႈမိူဝ်းၵႂႃႇႁင်းၽႂ်ႁင်းမၼ်း၊ ၶႃႈၵေႃႈၼင်ႇဝႃႈမိူဝ်းႁွတ်ႈႁိူၼ်းယဝ်ႉ ပေႉမႃးဢမ်ႇၶႂ်ႈၼွၼ်းသေဢိတ်း၊ ၼွၼ်းလိုၵ်းလႄႈမၼ်းပဵၼ်ၵႂႃႈ ၵူၺ်းၶႃႈၼၼ်ႉၵေႃႈယဵၼ်ႉဢမ်ႇလႆႈ တႃႇဢမ်ႇဝူၼ်ႉထိုင်ႁူင်းၾႆးမိၼ် ဢၼ်ႁၢင်ႈလီလူင်ၼၼ်ႉ လႄႈ သၢႆတႃၶူးဢၼ်ယၵ်ႉတူၺ်းၸူးၶႃႈၼၼ်ႉ ႁဵတ်းႁႂ်ႈၶႃႈယုမ်ႉဢွၵ်ႇမႃး ပေႃးတၢၼ်ႇၵူၼ်းယွင်ႇ ၼၼ်ႉယဝ်ႉ။
ထိုင်ဝၼ်းပီႊမႂ်ႇယဝ်ႉၼႆၵေႃႈ တူဝ်မႂ်ႇၸႂ်မႂ်ႇဝႃႇပိူၼ်ႈဝႃႈတႄႉ ၶႃႈတႄႉၵေႃႈ တၢင်းယၢမ်ႈဢၼ်ၵဝ်ႇၼၼ်ႉယင်းပႆႇပႅတ်ႈလႆႈ၊ ဝၼ်းလိုဝ်ႈၵေႃႈၵၢင်ဝၼ်းတဵင်ႈယဝ်ႉၸင်ႇလုၵ်ႉလႆႈ၊ ၵွပ်ႈၶမ်ႈဝႃး ၼွၼ်းလိုၵ်းႁႅင်းၼႃႇၼၼ်ႉယိုင်။ လုၵ်ႉမႃးယဝ်ႉၵေႃႈ သမ်ႉပေႃးတွင်ႉမႆႈယဝ်ႉ ၼႂ်းသိုင်ႇၾႆးၼၼ်ႉတႄႉၵေႃႈ မီးထူဝ်ႇၽူးၶူဝ်ႈလႄႈ ၶဝ်ႈတမ်ငႃးၶူဝ်ႈသေ ၶႃႈၵေႃႈၼင်ႈၵိၼ်ႁၢင်ႈဝၢၼ်ႁၢင်ႈမၼ်းယူႇ။ ဢၢႆႈၸၢႆးႁဝ်းၶဝ်တႄႉ လႅပ်ႈၵႂႃႇမီးယူႇတီႈႁူင်းႁဵၼ်း ဢၼ်မီးပၢင်ၶႄႉၶဵင်ႇၵၼ်ၼၼ်ႉယဝ်ႉၵႂႃႈ၊ ပေႃးဢမ်ႇလႆႈၵႂႃႇႁဵတ်းၵူၼ်းဢွၼ်လဵၼ်ႈႁႅင်းၵေႃႈ ၶဝ်လႅပ်ႈတေပဵၼ်ၵူၼ်းလဵၼ်ႈၼၼ်ႉယဝ်ႉ ၶႃႈတႄႉၵေႃႈ ဢမ်ႇလႆႈသႂ်ႇသၢႆမၢႆဝႆႉသေယဝ်ႉ ၶၢၼ်ႉၵႂႃႇပႃးၽွင်ႈၼၼ်ႉယိုင်။
ယၢမ်းၼၼ်ႉ လႆႈငိၼ်းသဵင်လူတ်ႉႁိူၼ်းၶူးၶဝ်မေႃးမႃးလႄႈ ၶႃႈၵေႃႈၼႅတ်ႈလႅၼ်ႈၵႂႃႇငွၵ်ႈတူၺ်း တီႈႁူးလႅင်းၼၼ်ႉၵမ်းလဵဝ်၊ ဢမ်ႇထၢင်ႇဢမ်ႇထိူမ် သမ်ႉလႆႈငိၼ်းပီႈႁွမ်လႅင်းထၢမ်တီႈၶူးပိူင်းၾႃႉ။
“ပေႉၼၢၼ်းမႃးလႃႇ! ဢၢႆႈၼွင်ႉၸင်ႇႁႃဢွၵ်ႇမိူဝ်းၵူၺ်းႁႃႉ”
“ဢိုမ်ႈ! ပႂ်ႉၵႃးၼၼ်ႉၼႃႇ”
မိူၼ်တေလၢတ်ႈထိုင်ၶူးၽိဝ်ၾႃႉၼၼ်ႉယဝ်ႉ။ မိူဝ်ႈငိၼ်းၸိူင်ႉၼၼ် ၶႃႈၵေႃႈ ၸႂ်ႁိုဝ်ၸပ်းတူဝ်ယဝ်ႉလႃႇ ၵိၼ်ထူဝ်ႇၽူးဢၼ်ဝၢၼ်ယူႇမိူဝ်ႈၵႆႈၼၼ်ႉၵေႃႈ သမ်ႉပေႃးၸၢင်ၵႂႃႇၵမ်းလဵဝ်ယဝ်ႉ။ ႁူဝ်ၸႂ်လူင်ၼႆႉၵေႃႈ ၼင်ႇဝႃႈပဝ်ႇႁူင်ႁူင်လူင်ဝႆႉ မိူၼ်ဢမ်ႇမီးႁႅင်းၶႂ်ႈႁဵတ်းသင်သေဢိတ်းၼၼ်ႉယဝ်ႉဝႃႈ။ မၢင်ၵမ်းၵေႃႈ ၶုၵ်းၸႂ်လႆႈၶဝ်ႁေ ၶႂ်ႈၼင်ႈႁႆႈယူႇၵူၺ်းယဝ်ႉ။
ဢမ်ႇႁိုင်ၵေႃႈ သမ်ႉပေႃးတၼ်းၶိုၼ်ႈႁူင်းႁဵၼ်းမႃးၶိုၼ်းယူႇ၊ ဝၼ်းယဝ်ႉဝၼ်းပူၼ်ႉၵႂႃႇ လိူၼ်ၸဵင်ယဝ်ႉလိူၼ်ၵမ်ထိုင်မႃး၊ လိူၼ်သၢမ်ၵေႃႈႁွတ်ႈထိုင်ယဝ်ႉလႄႈ ၼႃႈၾႃႉၼႃႈမိူင်းလူင်ၼၼ်ႉၵေႃႈ မူဝ်းၵႂႃႇလွႆးလွႆး၊ ၼႂ်းဢူၵ်းႁူဝ်ၸႂ်ၶႃႈၼၼ်ႉတႄႉ ယိုင်ႈဝၼ်းပူၼ်ႉၵႂႃႇႁိုင်ၵႃႈႁိုဝ်ၵေႃႈ ယိုင်ႈၶုၵ်းၸႂ်လႆႈၶဝ်တိၵ်းတိၵ်း၊ ယိုင်ႈဝူၼ်ႉၶိုၼ်းဝၼ်းၸိူဝ်းဢၼ်လႆႈႁဵတ်းၸွမ်းၶဝ်မႃးၼၼ်ႉ မၼ်းႁဵတ်းႁႂ်ႈၶႃႈ ယူႇဢမ်ႇၼိမ်သဝ်းလႆႈ၊ ဢၼ်ၶႃႈႁဵတ်းလႆႈယၢမ်းၼႆႉၵေႃႈ ၸွမ်းၼင်ႇၶေႃႈၵႂၢမ်းၶဝ်ယၢမ်ႈလၢတ်ႈဝႆႉၼၼ်ႉ ၶႃႈတေႁဵတ်းႁႂ်ႈထိုင်တီႈယူႇယဝ်ႉ။ ၶႃႈမုင်ႈမွင်းဝႃႈ ဝၼ်းၼိုင်ႈၼၼ်ႉ တေလႆႈထူပ်းၶဝ်ၶိုၼ်းလႄႈ ဝၼ်းၼိုင်ႈၼၼ်ႉ ၶဝ်တေလႆႈမႃးႁၼ်ၶႃႈ ဢၼ်လႅၵ်ႈလၢႆႈၵႂႃႇယူႇ ၼႆၼၼ်ႉယဝ်ႉ။
ပၢင်တွပ်ႇလိၵ်ႈၵေႃႈႁွတ်ႈထိုင်မႃး ပွၵ်ႈၼႆႉတႄႉၵေႃႈၶႃႈၶတ်းၸႂ်ႁဵၼ်းတႄႉတႄႉ ၼၼ်ႉယဝ်ႉ။ သမ်ႉဝႃႈဢမ်ႇႁူႉမၼ်းတေဢွၵ်ႇမႃးၸိူင်ႉႁိုဝ်ၵေႃႈ ၶႃႈသႂ်ႇၸႂ်သႂ်ႇႁႅင်းထိုင်တီႈယူႇ။
ၵၢၼ်သွၼ်ႁဵၼ်း ပီႊ 2013-2014 ၼႆႉၵေႃႈ သုတ်းၵႂႃႇယဝ်ႉ။
……………………………
ၼူၼ်းမူဝ်ၼၼ်ႉလူသုတ်းယဝ်ႉၵေႃႈ ယင်းတိုၵ်ႉၸပ်းၸႂ်ဝႆႉယူႇလႄႈ သိုပ်ႇၾူင်းႁႃသႅင်ၶမ်းၵမ်းလဵဝ်။
“ႁႃလူဝ်! ဢေးၼူၼ်း ဝႃႈႁိုဝ်လႃႇ”
“ၼွၼ်းယဝ်ႉႁႃႉ!”
“ပႆႇၼွၼ်း..တိုၵ်ႉႁဵတ်းၵၢၼ်ယူႇ”
ၼူၼ်းမူဝ်တူၺ်းဢွမ်မွင်းမၼ်းသေ သမ်ႉပေႃးမီးၵႂႃႇသွင်မူင်းယဝ်ႉ။
“ၶၢဝ်းၼႆႉယဝ်ႉယင်းပႆႇၼွၼ်းၵွၼ်ႇႁႃႉ!”
“သူသမ်ႉၼွၼ်းယဝ်ႉၼႄႇသိုပ်ႇၾူင်းမႃးၸိူင်ႉၼႆၼႆႉ”
“ဢိုမ်ႈၼေႃႈ!! ႁဝ်းလူသုတ်းယဝ်ႉ”
“ဢိုမ်ႈ…သုတ်းၵေႃႈသုတ်းယဝ်ႉၵူၺ်းဢိူဝ်ႈလေႃႇ..”
“ၶႂ်ႈမီးသိပ်းပီႊယဝ်ႉ! ယင်းတိုၵ်ႉပႂ်ႉၶဝ်ယူႇႁႃႉ..”
သႅင်ၶမ်းၼၼ်ႉၵေႃႈ ယဵၼ်ၵႂႃႇတင်းႁိုင်သေယဝ်ႉ
“ၼွၼ်းလႆႈယဝ်ႉၼႃႈ! တေႁဵတ်းၶႅၵ်ႇထႅင်ႈလၢႆဝၼ်းၵူၺ်းယဝ်ႉ ပေႃးၼွၼ်းလိုၵ်းၼႃႇၵမ်ႉတေဢမ်ႇႁၢင်ႈလီႁေယဝ်ႉဝႃႈ”
ဝၢင်းၾူင်းၵႂႃႇပႅတ်ႈၼူၼ်းမူဝ်ယူႇယဝ်ႉ။
သမ်ႉဝႃႈပပ်ႉၼၼ်ႉသုတ်းၵႂႃႇယဝ်ႉသေတႃႉ လွင်ႈမၢႆတွင်းသႅင်ၶမ်းၼၼ်ႉတႄႉ ယင်းတိုၵ်ႉၵိုတ်းဝႆႉယူႇ။ မိူဝ်ႈပဵၼ်ၸိူင်ႉၼၼ်ၵေႃႈ ႁိုဝ်တေသိုပ်ႇႁဵတ်းၵၢၼ်မၼ်းၵႂႃႇလႆႈထႅင်ႈယဝ်ႉ၊ ပိၵ်ႉၵၢၼ်သိမ်းငၢၼ်းႁႅၼ်းၶူဝ်း ဢိုတ်းၽၵ်းတူႁွင်ႈ ဢွၵ်ႇၵႂႃႇယူႇ။
ၵၢင်ၼႂ်ၸဵမ်ၸဝ်ႉ သႅင်ၶမ်းၼၼ်ႉၵေႃႈလိုဝ်ႈၵၢၼ်မၼ်းသေယဝ်ႉ ဢွၵ်ႇၶၢဝ်းတၢင်းမိူဝ်းၵႂႃႇၶိုၼ်း ဝဵင်းဢွၼ်ႇတီႈယၢမ်ႈသဝ်းထင်၊ ႁေႃႈၵႃးလႅၼ်ႈၽၢၼ်ႇဝၢၼ်ႈၼိုင်ႈယဝ်ႉဝၢၼ်ႈၼိုင်ႈ လတ်းလႅၼ်ႈၶၢမ်ႈလွႆလုၵ်ႈၼိုင်ႈယဝ်ႉလုၵ်ႈၼိုင်ႈသေ မၼ်းၵေႃႈ လႆႈႁေႃႈၵႃးမႃးၵိုတ်းယူႇတီႈ ႁိူၼ်းတႅၵ်ႈဢုတ်ႇသွင်ၸၼ်ႉလင်ၼိုင်ႈ ဢၼ်တိုၵ်ႉမႂ်ႇယူႇလႄႈ ၸင်ႇႁႃႁဵတ်းယဝ်ႉမွၵ်ႈသွင်ပီႊၵူၺ်းၼၼ်ႉသေယဝ်ႉ မိူဝ်ႈၵႃးမႃးၵိုတ်းၼႃႈႁိူၼ်းၼႆၵေႃႈ မီးသႂ်လႅင်းမႃးၽုၺ်ႇပၼ်ၽၵ်းတူၵမ်းလဵဝ်။ ၼၼ်ႉတႄႉပဵၼ်ႁိူၼ်းၶဝ်ၵူၺ်း၊ မွင်းလူင်းလူတ်ႉဢွၵ်ႇမႃးၵူၺ်း လုၵ်ႈဢွၼ်ႇၸၢႆး ဢႃႇယုမွၵ်ႈ သီႇၶူပ်ႇပၢႆပၢႆၼႆႉ လႅၼ်ႈလူင်မႃး ႁွင်ႉၸူးမၼ်းၵႂႃႇ−
“ဢေးဢႃ…” လုၵ်ႈဢွၼ်ႇယိင်းဢႃႇယုမွၵ်ႈၶူပ်ႇပၢႆပၢႆၼၼ်ႉၵေႃႈ ပႆသိုင်ႉသၢင်ႉသိုင်ႉသိင်ႉလႅၼ်ႈလူင်မႃးၸွမ်းပီႈဢၢႆႈမၼ်း၊ သႅင်ၶမ်းၵေႃႈ ၼင်ႈၵွတ်ႇဢဝ်သွင်ၶႃပီႈၼွင်ႉ ၼင်ႇၸႂ်ထိုင်ဝႃႈၸႂ်ထိုင်ၼၼ်ႉယဝ်ႉ။
သႅင်ၶမ်းၼၼ်ႉၵေႃႈ မိူဝ်ႈႁၼ်လၢၼ်ယိင်းဢွၼ်ႇမၼ်ၵႅမ်ႈတွင်ႇတွင်ႇ ၵၢင်းယွၼ်ႇယွၼ်ႇ မွႆတႃလမ်လမ်ယၢဝ်းယၢဝ်းၸိူင်ႉၼၼ်ၵေႃႈ ယဵၼ်ႉၸႂ်ဢမ်ႇလႆႈသေ ၼူတ်ႈပၼ်ၵႅမ်ႈလၢၼ်ဢွၼ်ႇမၼ်းၼၼ်ႉ သမ်ႉပေႃးႁႆႈယူႇ။ ပေႃးဝႃႈမၼ်းႁႆႈယဝ်ႉ ၸၢင်ႈႁဵတ်းႁိုဝ်
“ႁိူဝ်ႇ! ၸၢႆး..ၼွင်ႉႁႆႈယဝ်ႉတေႁဵတ်းႁိုဝ်လႃႇ ဢႃဢမ်ႇမေႃဝွၼ်း”
သႂ်လႅင်းဢၼ်တူၺ်းၸွမ်းၶဝ်ယူႇၼၼ်ႉၵေႃႈ မႃးတူပ်းလင်သႅင်ၶမ်းသေယဝ်ႉ။
“ၵေႃႉယႂ်ႇယဝ်ႉၵေႃႈ..မႃးႁႃႁဵတ်းမိူၼ်လုၵ်ႈဢွၼ်ႇယူႇ” ႁွပ်ႇဢုမ်ႈဢဝ်ဢေးၼွင်ႉၼၼ်ႉသေ ဝွၼ်းၶဝ်ႈမိူဝ်းၵႂႃႇၼႂ်းႁိူၼ်းပႅတ်ႈမၼ်းယဝ်ႉ။
ယၢမ်းၼၼ်ႉၸင်ႇငိၼ်းသဵင်ဢႆမေႃးယူႇၼႂ်းႁိူၼ်းလႄႈ ၼၼ်ႉတႄႉပဵၼ်သဵင်ၼၢႆးၶဝ်ယဝ်ႉ၊ မၼ်းၵေႃႈၼႅတ်ႈလႅၼ်ႈၶဝ်ႈမိူဝ်းၵႂႃႇသေ ပုင်ႈၶဝ်ႈၵွတ်ႇပၼ်ၼၢႆးၶဝ် ၼင်ႇဝႃႈတိုၵ်ႉပဵၼ်လုၵ်ႈဢွၼ်ႇၵေႃႉလဵၵ်ႉလဵၵ်ႉၼၼ်ႉယူႇ။
“ၵဝ်ၼၵ်းဢိူဝ်ႈဢေးယိင်း”
“ၶႃႈႁၼ်ဢၢႆႈလၢၼ်ၶႃႁဵတ်းတေႃႇၶႃႈၸိူင်ႉၼၼ်ယိုင်”
“ပေႃးလႆႈယဝ်ႉ!! လုၵ်ႈဢွၼ်ႇၵေႃႈဢမ်ႇၸႂ်ႈ”
“ၶႃႈၸႂ်ထိုင်ၼၢႆးတေႉယဝ်ႉဝႃႈ”
“မႃးႁႃလၢတ်ႈၸိူင်ႉၼၼ်ယူႇ…ပေႃးဢမ်ႇမီးၵၢၼ်တမ်ႉဢမ်ႇမေႃမႃးႁႃၸႂ်းႁိူၼ်းၸႂ်းယေးၸိူင်ႉၼၼ်”
“ၶႃႈၸင်ႇဝႃႈၸႂ်ထိုင်ၼႆၼႃႇ ပေႃးႁၼ်ၵၼ်ယူႇတႃႇသေႇ တေႁဵတ်းႁိုဝ်ၸႂ်ထိုင်လႆႈယဝ်ႉလႃႇၼၢႆးၵေႃႈ”
“ဢႃႉ! လုၵ်ႈဢွၼ်ႇၵေႃႉၼႆႉ!”
ဢဝ်ၼၢႆးၶဝ်သမ်ႉပေႃးဢမ်ႇၸၢင်ႈတၵ်းသဵင်လႆႈၼၼ်ႉယဝ်ႉ။
သႂ်လႅင်းၵေႃႈ ဢဝ်ဢေးၼွင်ႉႁွမ်လိုၼ်းၸူးၼၢႆးသေယဝ်ႉ၊ ၸွႆႈတေႃႉၶူဝ်းသႅင်ၶမ်းၶဝ်ႈႁွင်ႈႁွင်ႈၵႂႃႇယူႇ။ ၶႃသွင်ၵေႃႉဢၼ်ၶဝ်ႈၵႂႃႇၼႂ်းႁွင်ႈၼၼ်ႉၵေႃႈ။
“တိုၵ်ႉမိူၼ်ၵဝ်ႇၵူႈလွင်ႈယူႇလႃႇ!” သႅင်ၶမ်းဢၼ်လႆႈႁၼ်ႁွင်ႈၼွၼ်းမၼ်း ဢမ်ႇလႅၵ်ႈလၢႆႈသင်သေဢိတ်းၼၼ်ႉလၢတ်ႈၸူး သႂ်လႅင်းယူႇ။
“ၵေႃႈ..မိူၼ်ၵဝ်ႇၵူၺ်းဢိူဝ်ႈ ပေႃးၸဝ်ႈမၼ်းဢမ်ႇမႃးလႅၵ်ႈလၢႆႈ”
“သူၵေႃႈၶတ်းၸႂ်တေႉယဝ်ႉၼႃႈ ဢမ်ႇမီးၵူၼ်းယူႇၵေႃႈ တိုၵ်ႉမႃးႁဵတ်းလွင်ႈမူတ်းသႂ်ပၼ်ယူႇ ၽုၼ်ႇပေႃးဢမ်ႇမီးသေဢိတ်းတေႉလူင်”
“ႁဝ်းဢမ်ႇႁူႉဝႃႈသူတေမႃးမိူဝ်ႈလႂ်လူး ပေႃးမႃးၵေႃႈဢမ်ႇတွၼ်ႉလၢတ်ႈၵၼ်သေပွၵ်ႈၼၼ်ႉၼႃႇ”
“ပဵၼ်ပီႈပႂ်ႉႁဝ်းၼႆႉ လိူဝ်သေတေလႆႈလဵင်ႉလုၵ်ႈယဝ်ႉ သမ်ႉတေလႆႈလုမ်းလႃးပႃးၼွင်ႉယိင်းၶဝ်ထႅင်ႈႁေ ႁိူဝ်ႉၼႃႇၸွင်ႇၸႂ်ႈ”
“ပေႃးႁူႉတူဝ်ၵေႃႈ မႃးၸွႆႈၵၼ်လႄႈ မႃးယူႇတီႈႁိူၼ်းႁေ လဵင်ႉလၢၼ်ၸွႆႈႁဝ်းၽွင်ႈလေႃႇ”
“ၵူဝ်သူလႆႈလဵင်ႉပႃးႁဝ်းၵူၺ်းဢိူဝ်ႈ! ဢမ်ႇႁၼ်ႁႃႉႁဝ်ယင်းတိုၵ်ႉမိူၼ်လုၵ်ႈဢွၼ်ႇယူႇ”
သႂ်လႅင်းၵေႃႈယုမ်ႉၸူးသေယဝ်ႉ လၢႆႈၵႂၢမ်းၵႂႃႇ
“ယဝ်ႉမိူဝ်ႈလႂ်လႃႇ! တေလႆႈႁၼ်သူတွႆးမၢဝ်ႇမႃးလႄႇႁိူၼ်းၽွင်ႈ..”
“ႁဝ်းဝႃႈ သူၼႆႉထဝ်ႈမႃးတေႉယဝ်ႉဢိူဝ်ႈၼႆႉ!”
“ထဝ်ႈတီႈလႂ်ဢႃႇယုႁဝ်းၵေႃႈဢမ်ႇပိူင်ႈသင်ၵၼ်!”
သႅင်ၶမ်းၶွၼ်းႁူဝ်ဝႆဝုတ်းဝုတ်းယဝ်ႉ “ပၢႆးဝူၼ်ႉၵူၼ်းထဝ်ႈမႃးယူႇၼႂ်းႁူဝ်သူၼၼ်ႉၼႃႇ ၸင်ႇဝႃႈသူထဝ်ႈ!! မီးၵူၼ်းထဝ်ႈၵူၺ်းဢိူဝ်ႈလၢတ်ႈၸိူင်ႉၼႆ”
“ၶၢၼ်ႉလၢတ်ႈတေႃႇသူယဝ်ႉဝႃႈ!! ”ဢွၵ်ႇႁွင်ႈၵႂႃႇပႅတ်ႈသႅင်ၶမ်းၵႂႃႇယူႇယဝ်ႉ။
သႅင်ၶမ်းၼၼ်ႉၵေႃႈ မိူဝ်ႈဢၼ်မီးၼႂ်းႁွင်ႈၵေႃႉလဵဝ်ယူႇၼၼ်ႉ ပိုတ်ႇၽုၺ်ႇႁူးလႅင်း ဢၼ်မီးယူႇၶၢင်ႈတီႈၼွၼ်းမၼ်း ဢၼ်လႆႈႁၼ်ႁိူၼ်းၶူးပိူင်းၾႃႉၶဝ်ဝႆႉၼၼ်ႉလႄႈ လွမ်မုင်ႈတူၺ်းၵႂႃႇတၢင်းႁိူၼ်းလင်ၼၼ်ႉသေ ထူၺ်ႈၸႂ်လူင်ဢွၵ်ႇမႃးၵမ်းယဝ်ႉၵမ်း၊ မၼ်းၵေႃႈ လႆႈၶိုၼ်းပိၵ်ႉဢိုတ်း ၽၵ်းတူၽၢႆႇၼၼ်ႉၵႂႃႇသေယဝ်ႉ မႄးပိုတ်ႇၽုၺ်ႇႁူးလႅင်းဢၼ်ယူႇတၢင်းႁူဝ်ၼွၼ်းမၼ်းသေ ၸင်ႇၶိုၼ်းသွၵ်ႈႁႃတူၺ်းပပ်ႉဢၼ်လႆႈၵဵပ်းဝႆႉၸိူဝ်းၼၼ်ႉယူႇ။
ထိုင်ယၢမ်းႁူဝ်ၶမ်ႈၼၼ်ႉ သႂ်လႅင်းဢမ်ႇလႆႈႁၼ်သႅင်ၶမ်းဢွၵ်ႇႁွင်ႈမႃးႁေပွၵ်ႈလႄႈ လႆႈၶိုၼ်ႈမိူဝ်းတူၺ်းၼႂ်းႁွင်ႈၼၼ်ႉယူႇ။
“ႁဵတ်းသင်ယူႇလႃႇ!! ထိုင်ၶၢဝ်းၵိၼ်ၶဝ်ႈယဝ်ႉၼႃႈ!”
“ဢိူဝ်ႈ! ၵမ်ႉႁဝ်းၸင်ႇၵႂႃႇ ႁႃပပ်ႉၵမ်ႉၼိုင်ႈ”
“ပပ်ႉသင်လႃႇ!!”
“မၼ်းပဵၼ်ပပ်ႉမၢႆတွင်းႁဝ်း ႁဝ်းဝႃႈႁဝ်းဢဝ်ၵႂႃႇပႃးယဝ်ႉ မၼ်းႁမ်ႉဢမ်ႇမီးတီႈပုၼ်ႉ ဝူၼ်ႉဝႃႈမၼ်းတေလႅပ်ႈမီးတီႈႁိူၼ်းၼႆႉ ၵူၺ်းသမ်ႉဢမ်ႇတွင်းတီႈဝႆႉမၼ်းၼၼ်ႉၼႃႇဢၼ်ယၢပ်ႇၼႆႉ”
“ၵႂႃႇၵိၼ်ၶဝ်ႈၵွၼ်ႇလႄႈ ၵမ်ႉၸင်ႇမႃးႁႃၶိုၼ်း ယိုင်ႈႁႃယိုင်ႈဢမ်ႇႁၼ်ၵူၺ်းဢိူဝ်ႈ မၢၵ်ႇမိူဝ်ပေႃးတၢၼ်ႇၼၼ်ႉ”
ၼႂ်းႁွင်ႈၼၼ်ႉၵေႃႈ မီးပပ်ႉတၢင်းၼမ် ပေႃးၽေႇပဵၼ်ၵေႃႇပဵၼ်ၵွင်ႈလူင်ဝႆႉယူႇ ၼၼ်ႉယဝ်ႉ။
“ပပ်ႉမွၵ်ႈၼႆႉဢေႇလိူဝ်သေၵွင်ၸေႈ ဢၼ်ႁဝ်းႁဵတ်းၵၢၼ်ၵူႈဝၼ်းၼၼ်ႉၵွၼ်ႇလႃႈ”
“ၵႂႃႇၵိၼ်ၶဝ်ႈၵွၼ်ႇလႄႈပေႃးၼၼ်”
“ဢိုမ်ႈ!” မိူဝ်ႈလုၵ်ႉဢွၵ်ႇၵႂႃႇၼၼ်ႉသမ်ႉ ဢမ်ႇတၼ်းၾၢင်ႉသတိသေ ၶီႈလိုတ်းၺႃးၵွင်ပပ်ႉမၼ်းဢဝ်လူမ်ႉထူလူင်လူင်းၵႂႃႇယူႇ။ သႂ်လႅင်းဢၼ်တၼ်းလႆႈငိၼ်းသဵင်ၼၼ်ႉၵေႃႈ ၶိုၼ်းဝၢႆႇတူၺ်းမၼ်းၵႂႃႇသေ
“ႁိူဝ်ႇ! ႁဵတ်းႁိုဝ်ၵႂႃႇၼွၼ်းမူပ်ႇတီႈၼၼ်ႈလႃႇႁမ်ႉ”
“ၸဵပ်းတေႉယဝ်ႉ! ၸၼ်ႁဝ်းလုၵ်ႉၽွင်ႈလႄႈ”
မိူဝ်ႈဢၼ်သႂ်လႅင်းယိုၼ်ႈမိုဝ်းၸူးမၼ်းယူႇၼၼ်ႉ လိူၵ်ႈလိူၵ်ႈသမ်ႉ ႁၼ်မႅၼ်ႈပပ်ႉဢၼ်မၼ်းႁႃၼၼ်ႉသေ ယိပ်းဢဝ်ယဝ်ႉ ၽုၼ်ႇၽၢၼ်ႇလုၵ်ႉၶိုၼ်ႈမႃး ၼင်ႇဝႃႈဢမ်ႇၸဵပ်းႁေဢိတ်းၼၼ်ႉယူႇ။
“ၸဵပ်းတေႉယူႇႁႃႉၼႆႉ” တူၺ်းမၼ်းႁေၶွၼ်းဝႆႁူဝ်ဝုတ်းဝုတ်းယဝ်ႉ။
မူႇၶဝ်ႈၽိူၼ်မူၼ်း ဢၼ်မီးၵူၼ်းၼႂ်းႁိူၼ်းၸေးၵၼ် ပႃးၸဵမ်ၼၢႆး၊ ၼုမ်ႇႁိူင်း၊ သႂ်လႅင်း၊ လၢၼ်ယိင်းလၢၼ်ၸၢႆးဢွၼ်ႇသွင်ၵေႃႉ လႄႈ သႅင်ၶမ်း ၼင်ႈမူႇဝႅင်းၵၼ်၊ ယုမ်ႉလၢတ်ႈဢုပ်ႇၸူးၵၼ်၊ တၵ်းၽၵ်းယိုၼ်ႈသႂ်ႇပၼ်ၵၼ် ၵိၼ်ၵႂႃႇၼင်ႇႁၢင်ႈဝၢၼ်ႁၢင်ႈမၼ်း သဵင်ၶူဝ်ၶဝ် သမ်ႉပေႃးပူၼ်ႉႁိူၼ်းလူင်ၵႂႃႇယူႇ။
တွၼ်ႈသၢမ်သိပ်းသီႇသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢမ်သိပ်းႁႃႈၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
