တွၼ်ႈသၢမ်သိပ်းသၢမ်
ၶႃႈၵေႃႈမိူဝ်ႈၵႂႃႇႁွတ်ႈထိုင်တီႈၼမ်ႉႁွင်ႈ ဢၼ်မီးႁိမ်းၸမ်တူင်ႈၼႃးၼၼ်ႉ ဢၢႆၼမ်ႉပေႃးၵႂၼ်းလူင်ဝႆႉလႄႈ ၼမ်ႉၵေႃႈ သမ်ႉပေႃးဢုၼ်ႇႁုၼ်ႁုၼ်ဝႆႉယူႇ။ သုၵ်ႈၼႃႈလၢင်ႉတႃလီလီငၢမ်းငၢမ်းယဝ်ႉ၊ ၶဝ်ႈၵႂႃႇၸူးၶႃတီႈၼႂ်းသူၼ်သေ ၶႃႈၸင်ႇ တင်ႈၸႂ်ၶဝ်ႈၵႂႃႇၸမ်ၸမ်တီႈႁိမ်းၶူးၼၼ်ႉယဝ်ႉ ဢမ်ႇႁူႉဝႃႈၶႃႈပဵၼ်သင် ယူႇယူႇႁူဝ်ၸႂ်ၶႃႈၵေႃႈ ၵိုင်ႉၵၢင်ႉတွတ်ႇတဵၼ်ႈႁႅင်းမႃး ထူၺ်ႈၸႂ်ၵပ်ႉမႃးၵမ်းလဵဝ် တေလၢတ်ႈသင်ဢွၵ်ႇမႃးၵေႃႈ ၵႂင်ၵႂင်ၵႃးၵႃးလူင်ၵႂႃႇမူတ်း ၼၼ်ႉယဝ်ႉ။
ၶႃႈၵေႃႈၸၢင်ႈတေလၢတ်ႈသင်လႆႈ ၼင်ႈၵူမ်ႈၵဵပ်းၽၵ်းယူႇႁဵတ်းၼၼ်ၵူၺ်း၊ ၵဵပ်းၽၵ်းၶၢမ်းယဝ်ႉၵေႃႈ ၵဵပ်းၽၵ်းမီႇၽၵ်းၵီးပႃးႁေ၊ မိူဝ်ႈလႂ်မိူဝ်ႈမႃးယဝ်ႉ ၽၵ်းၶီႈဝူဝ်းၵေႃႈၼုမ်ႇ ၵဵပ်းပႃးႁေယဝ်ႉ၊ ၽၵ်းၵၢတ်ႇၼၼ်ႉၵေႃႈ သမ်ႉပေႃးၼုမ်ႇတုတ်းၼုတ်းတၢတ်းၼၢတ်း ႁၼ်ယဝ်ႉၶႂ်ႈယၵ်းပေႇၸႂ်၊ ၵူၺ်းၵႃႈ ၵူႈဝၼ်းၵူႈဝၼ်းၼႆႉ ဢမ်ႇမီးဝၼ်းလႂ်ဢၼ်ဢမ်ႇလႆႈၵိၼ်ၽၵ်းၵၢတ်ႇႁေဝၼ်း ၵမ်ႉၽၵ်းၵၢတ်ႇၵႅင်၊ ၽၵ်းၵၢတ်ႇၸေႃး၊ ၽၵ်းၵၢတ်ႇၵူဝ်ႈဝႃႇ၊ လိူဝ်ၼၼ်ႉသမ်ႉ ႁဵတ်းၽၵ်းသူမ်ႈဝႆႉထႅင်ႈႁေ၊ ပေႃးဢမ်ႇၵိၼ်ၽၵ်းသူမ်ႈယဵၼ်ႈၵေႃႈ ၵိၼ်ၽၵ်းသူမ်ႈၼမ်ႉဝႃႇ လႆႈဝႃႈၵိၼ်ၽၵ်းၵၢတ်ႇၵူႈတႃႇယဝ်ႉယူဝ်ႉ။
မိူဝ်ႈၶႃႈလဵပ်ႈၵႂႃႇႁိမ်းတိူၵ်ႇၽၵ်းၵၢတ်ႇၼၼ်ႉ ဢၢႆႈၸၢႆးႁဝ်းၵေႃႈႁွင်ႉၸူးၶႃႈမႃး “ဢေးယိင်း! ၽၵ်းၵၢတ်ႇတိူၵ်ႇႁိမ်းမႂ်းၼၼ်ႉ ထူၺ်ႈမိူဝ်းလႄႈ ႁဝ်းမိူဝ်းႁဵတ်းဢီႇမဵတ်ႈ!”
မိူဝ်ႈငိၼ်းၸိူင်ႉၼၼ် မိူၼ်ၾၼ်တေပၢႆႈယဝ်ႉ၊ ၶၢၼ်ႉထူၺ်ႈတႄႉဢမ်ႇၸႂ်ႈ ၶၢၼ်ႉၵိၼ်ၼၼ်ႉယဝ်ႉ။ ၸၢင်ႈတေႁဵတ်းႁိုဝ် ထူၺ်ႈၵေႃႈထူၺ်ႈလႄႈ ၶႃႈၵေႃႈ ၼင်ႈႁေထူၺ်ႈလူင်ၵႂႃႇလွႆးလွႆး ထူၺ်ႈၵႂႃႇထူၺ်ႈမႃး သမ်ႉၺႃးၽၵ်းၼွၵ်ႇ မီးၼႂ်းတိူၵ်ႇၽၵ်းၵၢတ်ႇၼၼ်ႉ ၼုမ်ႇဝႃႈၼုမ်ႇ၊ ဢဝ်ၶႃႈသမ်ႉပေႃးၶုၵ်းၸႂ်လႆႈ ၶႂ်ႈၵိၼ်ၼမ်ႉၽိတ်ႉမႃးၵမ်းလဵဝ်၊ ၵူၺ်းၵႃႈ ဢမ်ႇထူၺ်ႈယဝ်ႉၽၵ်းၼွၵ်ႇတႄႉ မိူဝ်ႈၼႆႉၵိၼ်ထူဝ်ႇၽူးဢုၼ်ႇလူင်။
ၶႃႈၵေႃႈထူၺ်ႈၽၵ်းၵၢတ်ႇတိူၵ်ႇၼၼ်ႉယဝ်ႉသေ ၵႂႃႇသုၵ်ႈတီႈႁိမ်းၼမ်ႉႁွင်ႈၼၼ်ႉလႄႈ ၶူးၵေႃႈ ႁွပ်ႇဢဝ်မႃးၸွႆႈၶႃႈသေသုၵ်ႈၸွႆႈယူႇ၊ ႁႃးသွင်ၵေႃႉၼၼ်ႉၵေႃႈ သမ်ႉပေႃးဢမ်ႇသူပ်းဢမ်ႇသဵင်သေဢိတ်း ယဵၼ်သီႇသီႇလူင်ႁေ သုၵ်ႈၽႂ်သုၵ်ႈမၼ်းၵူၺ်း၊ သမ်ႉဝႃႈၶႃႈတဵတ်ႇယဵၼ်ယူႇသေတႃႉ ၼႂ်းၸႂ်ၶႃႈၼၼ်ႉတႄႉ မိူၼ်တေလုၵ်ႉပဵၼ်ၾႆးမႃးယဝ်ႉ။ မၼ်းဢမ်ႇယဵၼ်သေဢိတ်းလႄႈ ဢမ်ႇၸၢင်ႈလၢတ်ႈသင်လႆႈ သေဢိတ်း ၼၼ်ႉယဝ်ႉ။ ၵဵပ်းၽၵ်းၵဵပ်းသင်ယဝ်ႉ ဢဝ်ၽၵ်းတၢင်ႇသႂ်ႇၵႃးသေ ၶႃႈၵေႃႈလႆႈပွၵ်ႈမိူဝ်းၵႂႃႇဢွၼ်တၢင်းၶဝ်ယူႇ။
မိူဝ်ႈမိူဝ်းၵႂႃႇလွႆးလွႆးၼၼ်ႉ ၶႃႈၸင်ႇတေၶုၵ်းၸႂ်လႆႈ ၶေႃႈထၢမ်ၶႃႈမိူဝ်ႈၵႆႈၼၼ်ႉၶိုၼ်းသေ၊ ၸင်ႇဝူၼ်ႉတူၺ်းၺႃး မိူဝ်ႈယူႇႁိမ်းၶူးၼၼ်ႉ မၼ်းႁဵတ်းႁႂ်ႈၶႃႈထူၺ်ႈၸႂ်ၵပ်ႉလႄႈ ႁူဝ်ၸႂ်တဵၼ်ႈတွတ်ႇႁႅင်း ထိင်းပေႃးဢမ်ႇလႆႈ၊ လၢတ်ႈၵႂၢမ်းပေႃးဢမ်ႇဢွၵ်ႇ၊ တေလၢတ်ႈသင်ၵေႃႈ သမ်ႉပေႃးၵႂင်ၵႂင်ၵႃးၵႃးလူင်ၵႂႃႇမူတ်း၊ လိူဝ်ၼၼ်ႉသမ်ႉ ၶႃႈၵေႃႈဢမ်ႇႁတ်းႁူပ်ႉတေႃႇၼႃႈၶဝ်လီလီ၊ ပေႃးမႃးၶိုၼ်းဝူၼ်ႉတူၺ်း မိူဝ်ႈပူၼ်ႉမႃးၸိူဝ်းၼၼ်ႉၵေႃႈ မီးၽၢင်ႁၢင်ႈၸိူင်ႉၼႆမိူၼ်ၵၼ်ယဝ်ႉ၊ မိူဝ်ႈလႂ်ပဵၼ်ၸိူင်ႉၼႆ မိူဝ်ႈၼၼ်ႉၵေႃႈ တိုၼ်းမီးၶူးယူႇတႃႇသေႇ၊ ၶႃႈယုမ်ႇၸႂ်လႆႈယဝ်ႉဝႃႈ ယွၼ်ႉၶူးသေ ၶႃႈၸင်ႇလႆႈပဵၼ်ၸိူင်ၼႆ၊ ၽၢင်ႁၢင်ႈၸိူင်ႉၼႆ သမ်ႉတေႁွင်ႉဝႃႈပဵၼ်သင်လႃႇ?၊ ပဵၼ်ယွၼ်ႉၶႃႈၵူဝ်ၶူးၸိူင်ႉၼၼ်ႁႃႉ?။
မိူဝ်ႈၶႃႈတိုၵ်ႉဝူၼ်ႉယူႇၼၼ်ႉ ၵႃးၶဝ်ၵေႃႈလႆႈၽႅတ်ႈပူၼ်ႉၵႂႃႇတၢင်းၼႃႈၶႃႈသေ ဢဝ်ၶႃႈသမ်ႉပေႃးမိူၼ်ႇမိုင်တူၺ်းၸွမ်း တေႃႇပေႃးပူၼ်ႉသၢႆတႃယူႇ ၸႂ်ၶႃႈၼၼ်ႉၵေႃႈၼင်ႇဝႃႈ ၸပ်းၵႂႃႇၸွမ်းၶဝ်ၵႂႃႇမူတ်းယဝ်ႉ။
မိူဝ်းႁွတ်ႈထိုင်ႁိူၼ်းယဝ်ႉ ၼၢႆးႁဝ်းလႄႈတင်းပီႈႁွမ်လႅင်းၶႃၵေႃႈ ထွင်ထူဝ်ႇၽူးယူႇ၊ ဢၢႆႈၸၢႆးႁဝ်းလႄႈၶူးၽိဝ်ၾႃႉၼၼ်ႉတႄႉၵေႃႈ ဢွၼ်ၵၼ်လိူၵ်ႈၽၵ်းယူႇတီႈၸၢၼ်းႁိူၼ်း၊ ၶူးပိူင်းၾႃႉတႄႉၵေႃႈ ႁႅၼ်းၶိူင်ႈၶေးမၼ်းယူႇႁင်းၵွႆးၼႂ်းသွင်ႇၾႆး ၼၼ်ႉယဝ်ႉ။ ၼၢႆးႁဝ်းၵေႃႈ ႁူႉယူႇဝႃႈၶႃႈတေဢမ်ႇမေႃႁဵတ်းႁင် ႁၼ်ၶႃႈမႃးယဝ်ႉၼႆၵေႃႈ။
“ဢေးယိင်း! ၵႂႃႇႁွင်ႉဢၢႆႈလၢၼ်ၶဝ်ၸိူဝ်းၼၼ်ႉမႃးလႄႈ”
ၼၢႆးႁဝ်းတေႁွင်ႉၸႃႉၸိူဝ်းဢူၺ်းၵေႃႉဢၢႆႈၸၢႆးႁဝ်းၼၼ်ႉဝႃႈ ဢၢႆႈလၢၼ်ၼႆယဝ်ႉ၊ ပေႃးလၢတ်ႈၸိုဝ်ႈမၼ်းၵေႃႈ သမ်ႉမီးပဵၼ်လၢႆၵေႃႉၼၼ်ႉၼႃႇ။ ၶႃႈၵေႃႈပၼ်ႇလူတ်ႉထိပ်ႇၶႃႈၼၼ်ႉ မိူဝ်းၵႂႃႇတၢင်းႁိူၼ်း ပီႈၸၢႆးသိူဝ်ၶဝ်ဢွၼ်တၢင်း ယွၼ်ႉမၼ်းတေႃႇတၢင်းလႄႈ ၸင်ႇၶိုၼ်းမိူဝ်းႁွင်ႉ လႅင်းမိူင်း ယဝ်ႉၶိုၼ်းၵႂႃႇတၢင်းႁိူၼ်း သႅင်ၶိူဝ်း၊ ၸွမ်ၶိူဝ်း၊ သၢႆႁိူဝ်ႈ ႁိူၼ်းၶဝ်သၢမ်ၵေႃႉ ဢၼ်ၸပ်းၵၼ်ဝႆႉၼၼ်ႉၼၼ်ႉယဝ်ႉ။ ၶဝ်သၢမ်ၵေႃႉၼႆႉတႄႉ မွင်းႁွင်ႉၵူၺ်း ဢွၵ်ႇႁိူၼ်းဢဝ်လူတ်ႉထိပ်ႇၶဝ်ၼၼ်ႉ ပၼ်ႇလမ်းၶႃႈမႃးၵမ်းလဵဝ်ယဝ်ႉ။ ၶႃသွင်ၵေႃႉၼၼ်ႉတႄႉ လႅပ်ႈတေၵႂႃႇႁွင်ႉလၢႆလၢႆၵူၺ်း။
ၸွမ်ၶိူဝ်းၼၼ်ႉၵေႃႈ ပၼ်ႇလူတ်ႉထိပ်ႇမၼ်းမႃးႁိမ်းၶႃႈသေယဝ်ႉ
“ဢေးယိင်း! ၶမ်ႈၼႆႉလႄႇပွႆးယူႇႁႃႉ!”
“ဢမ်ႇၵႂႃႇ!! တႃႉၼွၼ်းၶူတ်းၽႃႈလႃႈ ၵတ်းပေႃးတၢၼ်ႇၼၼ်ႉ”
“ၵႂႃႇလႃႈ! ပေႃးမႂ်းဢမ်ႇၵႂႃႇၵဝ်သမ်ႉတေဢမ်ႇမီးၵေႃႉၼၼ်ႉၼႃႇ”
“ပီႈၶဝ်ၵေႃႈၵႂႃႇဢမ်ႇၸႂ်ႈႁိုဝ်လႃႇ” ဝၢႆႇထၢမ်သႅင်ၶိူဝ်းၶႃသၢႆႁိူဝ်ႈ။
“ၵႂႃႇၵႂႃႈ! ဢမ်ႇၵႂႃႇႁိုဝ်လႆႈၼႄႇ!” သႅင်ၶိူဝ်းတွပ်ႇၸူးၼင်ႇဝႃႈ မီးၽႅၼ်သေလွင်ႈလွင်ႈၼၼ်ႉယဝ်ႉ။
“ၼၼ်ႉၼႃႇႁဵတ်းႁိုဝ်ဝႃႈဢမ်ႇမီးၵေႃႉ!”
“ၶဝ်ၵႂႃႇၸွမ်းသၢဝ်ၶဝ်ၵၼ်ၵူႈၵေႃႉလူး၊ ၵိုတ်းၵဝ်ၵူၺ်းၼႃႇ”
“ၸိူင်ႉပီႈၼႆႉၵႃႈဢမ်ႇမီးသၢဝ်! သၢဝ်ၼမ်ၼႃႇလႄႈ ဢမ်ႇၸၢင်ႈလိူၵ်ႈၵေႃႉလႂ်ႁေ မႃးဢဝ်ၶႃႈႁဵတ်းၶေႃႈဢၢင်ႈမၼ်းၵူၺ်းယူဝ်ႉ!”
“တေႉဢိူဝ်ႈ! ၵဝ်ၸၢင်ႈၵႂႃႇဢဝ်သၢဝ်တီႈလႂ်မႂ်းၵေႃႈ”
“ၵူၼ်းမေႃၵဝ်းၽူႈယိင်းၸိူင်ႉၼင်ႇပီႈၼႆႉ ဢမ်ႇမီးၸူႉၼႆၵေႃႈဢမ်ႇလူဝ်ႇပဵၼ်ၸွမ်ၶိူဝ်းယဝ်ႉ”
သၢႆႁိူဝ်ႈၶႃသႅင်ၶိူဝ်းၼၼ်ႉၵေႃႈဢွၼ်ၵၼ်ၶူဝ်ယူႇ။
“ဢမ်ႇၼၼ်ၵေႃႈ ႁၢင်ႈၽၢႆႇၼွၵ်ႈလႄႈၽၢႆႇၼႂ်းမၼ်းပိူင်ႈၵၼ်ဝႆႉႁႃႉတေႃႈ ၵူၼ်းယဵၼ်ယဵၼ်ဢမ်ႇသူပ်းဢမ်ႇသဵင်ၶဝ်သမ်ႉမီး၊ ၵူၼ်းႁႃလႄႇႁႃၵဝ်းသမ်ႉဢမ်ႇလႆႈ ဢၼ်ဝႃႈၼၼ်ႉယူဝ်ႉ”
“ပေႃးမီးၽႂ်တေႁႃလႃႇ ပေႃးႁႃၵေႃႈပွင်ႇဝႃႈဢမ်ႇမီးၼၼ်ႉၼႃႇမႂ်းၵေႃႈ!”
ၶႃႈၵေႃႈယၵ်ႉတူၺ်းသႅင်ၶိူဝ်းသေ“ႁွမ်ၼူၼ်းၼႆႁႃႉၸူႉပီႈ”
“ႁူႉလႆႈၸိူင်ႉႁိုဝ်လႃႇ!” ယၵ်ႉတူၺ်းၶႃႈၶိုၼ်းၼင်ႇတူၵ်းၸႂ်ယူႇ။
ၶႃႈၶိုၼ်းဝၢႆႇတူၺ်းသၢႆႁိူဝ်ႈသေ“ပီႈသမ်ႉ..ၶမ်းႁွမ်၊ ယဝ်ႉၵေႃႈ ၸၢႆးသိူဝ်သမ်ႉ သီၶမ်း၊ ဢၢႆႈၸၢႆးႁဝ်းသမ်ႉ ၼွင်ႉမွၼ်း ၼႆႁိုဝ်လႃႇ”
“ၸွမ်ၶိူဝ်းလၢတ်ႈၼႄမၼ်းႁႃႉ!” သႅင်ၶိူဝ်းထၢမ်ယူႇ။
“ယႃႇမႃးႁႃၼေးၵၼ်ယူႇယဝ်ႉ! ၶမ်ႈဢွၵ်ႇဝႃႇၼၼ်ႉပီႈၶဝ်ၵေႃႉလၢတ်ႈၵူၺ်း၊ ထၢင်ႇၶႃႈဢမ်ႇငိၼ်းၼႆၵႂႃႈ”
ၶဝ်ၵေႃႈၵိုတ်းဢဝ်ပလိၵ်ႈလူတ်ႉထိပ်ႇၶဝ်ၼၼ်ႉသေ “ၶမ်ႈဢွၵ်ႇဝႃႇၼႆႁႃႉ!” သႅင်ၶိူဝ်းပဵၼ်ဢၼ်တူၵ်းၸႂ်လိူဝ်ပိူၼ်ႈၼၼ်ႉယဝ်ႉ။
“တေႉဢိူဝ်ႈ! ႁဝ်းမႃးဢုပ်ႇၵၼ်တင်းႁိုင်တီႈႁိူၼ်းၶဝ်လူးၼေႃႈ” သၢႆႁိူဝ်ႈ မိူၼ်တေၶုၵ်းၸႂ်လႆႈသေလၢတ်ႈဢွၵ်ႇမႃးယဝ်ႉ။
“ငိၼ်းမူတ်းယဝ်ႉဢိူဝ်ႈပေႃးၼႆ!”
သႅင်ၶိူဝ်းၼၼ်ႉ ၼင်ႇဝႃႈၸႂ်ဢမ်ႇၸပ်းတူဝ်ဝႆႉယူႇ။ ၶႃႈၵေႃႈဝၢႆႇတူၺ်းမၼ်းသေ
“ႁူႉၵေႃႈ! ၶႃႈဢမ်ႇဢဝ်ၵႂႃႇလၢတ်ႈၼႄၽႂ်ၼင်ႇၵဝ်ႇသႄႈ ပီႈပေႉဢၢပ်ႈတူၵ်းၸႂ်လူင်လၢင်လႃႇ မိူဝ်ႈလဵဝ်ဢမ်ႇမီးၶူးလူင်ယဝ်ႉ ၽႂ်ႁူႉၵေႃႈဢမ်ႇဝႃႈသင်ၼင်ႇၵဝ်ႇ ပေႃးၶႃႈၶႂ်ႈလၢတ်ႈၶႃႈလၢတ်ႈၸဵမ်မိူဝ်ႈလႂ်ယဝ်ႉ”
“ပေႃးႁူႉၸိူင်ႉၼၼ်ၵေႃႈလီဢိူဝ်ႈ” သႅင်ၶိူဝ်းလၢတ်ႈ။
“ၵူၺ်းၵႃႈ! ၵူၼ်းၸိူင်ႉၼင်ႇၶႃႈၼႆႉပီႈယုမ်ႇၸႂ်လႆႈယူႇႁႃႉ!” ၶႃႈၵေႃႈၼႅတ်ႈပၼ်ႇလူတ်ႉထိပ်ႇၵႂႃႇဝႆးဝႆးၵမ်းလဵဝ်ယဝ်ႉ။
“ဢေးယိင်းမႂ်း!!” ၶဝ်ၼၼ်ႉၵေႃႈၼႅတ်ႈလမ်းၸွမ်းယူႇ။ ဢမ်ႇႁိုင်ႁဝ်းၵေႃႈႁွတ်ႈႁိူၼ်းယဝ်ႉ။ ႁွတ်ႈထိုင်ၽၵ်းတူၵိူၼ်ႇၵူၺ်း ဢၢႆမၼ်းသမ်ႉပေႃးၺိၼ်းၶဝ်ႈထိုင်ၼႂ်းၶူႈၼင်ယဝ်ႉၼႃႇ၊ တွင်ႉၵေႃႈႁွင်ႉမႃးၵမ်းလဵဝ်ယဝ်ႉ။
“ႁွတ်ႈမႃးၵၼ်ယဝ်ႉႁႃႉ!”
ၼၢႆးႁဝ်းၵေႃႉတၵ်းသႂ်ႇပၼ်သေ ပီႈႁွမ်လႅင်းၵေႃႈသမ်ႉသႂ်ႇၶေးမၼ်းပၼ်ယဝ်ႉ၊ ႁဝ်းၵေႃႈဢဝ်မႃးၵေႃႉဝၢၼ်ႇဝၢၼ်ႇ ၼင်ႈၵိၼ်ၵုမ်းၵၼ်ယူႇတီႈၵၢင်ၸၢၼ်း ၼၼ်ႉယဝ်ႉ။ ဢမ်ႇႁူႉဝႃႈမၼ်းပေႉဝၢၼ်ဝႃႈဝၢၼ် ထူဝ်ႇၽူးဢူၼ်ဢူၼ် သဵၼ်ႈၶဝ်ႈသွႆးၼဵဝ်ၼၢၵ်ႇၼၢၵ်ႇ၊ ၼင်ပွင်းဢွၼ်ႇၸိမ်ႉၵပ်းႁေ ဢႃႈလႃႈၶိုၵ်ႉပေႇၸႂ်၊ မိူဝ်ႈလႂ်မိူဝ်ႈလႆႈၵိၼ်ၵေႃႈ ၵိၼ်ပၼ်ႁႂ်ႈမၼ်းဢိမ်ႇဢိမ်ႇၼၼ်ႉၼႃႇ ၶႃႈတႄႉၵိၼ်ဝၢၼ်ႇလဵဝ်ၵူၺ်း ၵူၺ်းဝၢၼ်ႇမၼ်းသမ်ႉ ၶႂ်ႈယႂ်ႇဝႆႉတၢၼ်ႇတၢၼ်ႇၼင်ႇၵဝ်ႇ။ ၵိၼ်ယဝ်ႉၵေႃႈ ဢမ်ႇၶႂ်ႈလုၵ်ႉလႆႈယဝ်ႉ တွင်ႉၵႂ်ႈ၊ ႁိုင်ႁိုင်ၼၢၼ်းၼၢၼ်းလႆႈၵိၼ်ၵူၺ်းၼႃႇ မိူဝ်ႈလႂ်မိူဝ်ႈၵိၼ်ၵေႃႈ ၵိၼ်ပၼ်ႁႂ်ႈဢိမ်ႇဢိမ်ႇၼၼ်ႉယိုင် ဢမ်ႇႁူႉမိူဝ်ႈၽုၵ်ႈမိူဝ်ႈႁိုဝ်း ပေႃးတေလႆႈၵိၼ်ၽၵ်းၵၢတ်ႇၶိုၼ်းယဝ်ႉ။ ပေႃးဝူၼ်ႉၸိူင်ႉၼၼ် သင်တိုၵ်ႉၶဝ်ႈလႆႈထႅင်ႈယူႇတႄႉ ၶႃႈသမ်ႉပေႃးၶႂ်ႈၵိၼ်ထႅင်ႈယဝ်ႉ။
ၵၢင်ၶမ်ႈလပ်းသိင်ႇယဝ်ႉၼၼ်ႉ ၶူးပိူင်းၾႃႉၵေႃႈ မႃးၸုၵ်းႁွင်ႉၼၢႆးႁဝ်းယူႇၼႂ်းဝၢင်းႁူဝ်ႉၶဝ်ၼၼ်ႉသေ
“ၼၢႆး!! ၶမ်ႈၼႆႉၸွင်ႇတေၵႂႃႇလႄႇပွႆးႁိုဝ်! ႁဝ်းတေဢဝ်ၵႃးၵႂႃႇ”
“ဢိူဝ်ႈ! ၵႂႃႇဢိူဝ်ႈ!” ၶႃႈၵေႃႈငိၼ်းယူႇ ၵူၺ်းဢမ်ႇလႆႈသူၼ်ၸႂ်သင်။
“မႂ်းဢမ်ႇၵႂႃႇႁႃႉဢေးယိင်း!”
“ဢမ်ႇၵႂႃႇယဝ်ႉဝႃႈၼၢႆး ၵတ်းၼႃႇ!”
“ပိူၼ်ႈၵႂႃႇလႂ်ၵေႃႈမႂ်းဢမ်ႇၶႂ်ႈၵႂႃႇ! မႂ်းႁတ်းယူႇႁင်းမႂ်းယူႇႁႃႉ တီႈႁိူၼ်းၵေႃႈဢမ်ႇမီးၽႂ်ၸိူင်ႉၼႆ”
မိူဝ်ႈဢၢင်ႈတွပ်ႇဝႃႈ ႁတ်းယူႇၼႆၼၼ်ႉ မႃသမ်ႉမႃးႁွၼ်ၼႆၵေႃႈ ၸၢင်ႈႁဵတ်းႁိုဝ် “ၶႃႈၵႂႃႇၵေႃႈလႆႈယူႇၵူၺ်း..”
တၢင်းၶဝ်ႈႁိမ်းႁွမ်းပၢင်ပွႆးၼၼ်ႉၵေႃႈ မီးၵၢတ်ႇၶၢႆတၢင်းၵိၼ်တၢင်းယႅမ်ႉ ဢမ်ႇဝႃႈၶဝ်ႈသဵၼ်ႈၶဝ်ႈသွႆး၊ ထူဝ်ႇၽူးၶင်ႇပွင်း၊ ၶဝ်ႈမုၼ်းႁေႃႇၶဝ်ႈမုၼ်းဢွၵ်း၊ ၶဝ်ႈတမ်ငႃး ၸိူဝ်းၼႆႉ ပေႃးၸေးပေႃးၸွတ်ႇလူင်ၵႂႃႇမူတ်း၊ ၶၢႆၶူဝ်းၶၢႆၶွင်ပေႃးၸေးပေႃးယေႃးသေ၊ ႁဝ်းၵေႃႈဢွၼ်ၵၼ်လႄႇလူင်ၵႂႃႇ ၸွမ်းတႅဝ်းၵၢတ်ႇၼၼ်ႉတေႃႇပေႃးသုတ်းယဝ်ႉ။ ယၢမ်းၼၼ်ႉ ၸင်ႇၵႂႃႇႁၼ်ၺႃးႁူင်းၾႆးမိၼ်သေ ၶူးပိူင်းၾႃႉၵေႃႈ ယိပ်းဢဝ်သွင်ဢၼ် ၸၢႆႇၵႃႈမၼ်းပၼ်တီႈၸဝ်ႈလၢၼ်ႉၼၼ်ႉၵႂႃႇယူႇ၊ ပေႃးဝႃႈတေႉ ၶူးၽိဝ်ၾႃႉၵေႃႉၶပ်းလူတ်ႉမႃး ႁဝ်းၵေႃႈမႃးၸွမ်းၵၼ်ၼၼ်ႉယဝ်ႉ မိူၼ်ၶဝ်ဢမ်ႇပေႃးမႃးၸမ်ႁဝ်းၵႃႈႁိုဝ် ၵူၺ်းမႃးၸွမ်းတၢင်းလင်ႁဝ်းယူႇ။
ႁဝ်းၸင်ႇတေဢွၼ်ၵၼ်ၶဝ်ႈၵႂႃႇၼႂ်းပၢင်ႇပၢင်ပွႆး ဢၼ်မီးၵူၼ်းၵိုၼ်းဝႃႈၵိုၼ်း လႄႈ မီးၵွင်မုၵ်ႉၾႆးပဵၼ်ၵွင်ပဵၼ်ၵွင်၊ ဢွၼ်မူႇဢွမ်ႇလွမ်ႉၵၼ်သေ လွမ်ယၵ်ႉတူၺ်းၵႂႃႇတီႈ ၶူင်ႇပၢင်ၵႅဝ်ႈဢၼ်မီးၵူၼ်းႁွင်ႉၵႂၢမ်းယူႇ ၼၼ်ႉယဝ်ႉ။ ၵူၼ်းၼမ်ၸိူင်ႉၼႆတႄႉ ပေႃးႁၢႆၵႂႃႇၵေႃႈလႅပ်ႈႁႃဢမ်ႇႁၼ်ၵၼ်ယဝ်ႉ ပေႃးဢမ်ႇတွင်းတီႈယူႇၵၼ်ဝႆႉ။
ႁႄႈဝႃႈတူၺ်းပွႆးၼႆဝႃႈ ၶႃႈသမ်ႉပေႃးတေလပ်းယဝ်ႉ၊ ၵတ်းၵေႃႈၵတ်းႁေ သင်ဢမ်ႇမီးမုၵ်ႉၾႆးၼၼ်ႉတႄႉ လႅပ်ႈတေၶႅင်ယဝ်ႉ။ ယိုင်ႈလိုၵ်းၵေႃႈယိုင်ႈၵတ်းတိၵ်းတိၵ်း ဢွမ်ႇၾႆးယူႇၵေႃႈမိုဝ်းၼၼ်ႉၵူၺ်းဢုၼ်ႇ ပွတ်းႁူဝ်ၼၼ်ႉတႄႉသႂ်ႇမၢၵ်ႇႁူယူႇၵေႃႈတိုၵ်ႉၵတ်းယူႇ၊ ၶူႈၼင်ဢၼ်ၺႃးလူမ်းၼၼ်ႉ သမ်ႉပေႃးလၢင်ႈငၢၼ်းငၢၼ်း။ ၵွပ်ႈဝႃႈၶႃႈသမ်ႉႁိပ်ႈၼႃႇလႄႈ လိုမ်းဢဝ်ၽႅၼ်ႇပၢႆႉၶေႃးသႂ်ႇၸွမ်းၼၼ်ႉၼႃႇ၊ မိူဝ်ႈၸဝ်ႉမၼ်းဢမ်ႇပေႃးၵတ်းလႄႈ ဢမ်ႇတၼ်းၶုၵ်းၸႂ်လႆႈၵေႃႈပႃးယဝ်ႉ။
ၵူၺ်းၵႃႈဢမ်ႇထၢင်ႇဢမ်ႇထိူမ် မီးၵူၼ်းဢဝ်ၽႅၼ်ႇပၢႆႉၶေႃးယိုၼ်ႈမႃးၸူးၶႃႈ တၢင်းလင်ၼၼ်ႉသေ
“သႂ်ႇလႄႈ..” ၼၼ်ႉတႄႉပဵၼ်ၶူးၽိဝ်ၾႃႉယဝ်ႉ။ ၶႃႈၵေႃႈႁိုဝ်တေသူၼ်ယဝ်ႉ ၵတ်းၼႃႇယဝ်ႉလူး၊ သႂ်ႇယဝ်ႉၵေႃႈသမ်ႉပေႃးဢုၼ်ႇလူင်မႃးတေႉၼင်ႇဝႃႈ တီႈၽႅၼ်ႇၼၼ်ႉၵေႃႈ မီးဢၢႆဢုၼ်ႇႁွမ်ႁွမ်ၸၢင်ၸၢင်ၸပ်းဝႆႉ မိူၼ်တေပဵၼ်ဢၢႆၼမ်ႉႁွမ်ၶဝ်ၼၼ်ႉယဝ်ႉ၊ ဢၢႆၼၼ်ႉမၼ်းႁဵတ်းႁႂ်ႈၶႃႈႁပ်ႉႁူႉလႆႈဝႃႈ ၶဝ်ၼၼ်ႉမီးႁိမ်းၸမ်ၶႃႈဝႆႉယူႇယဝ်ႉ။
တွၼ်ႈသၢမ်သိပ်းသၢမ်သုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢမ်သိပ်းသီႇၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
