တွၼ်ႈသၢမ်သိပ်းဢဵတ်း
ပုၼ်ႈၽွၼ်းၵေႃႉၼိုင်ႈလႄႈၵေႃႉၼိုင်ႈၼၼ်ႉ မီးဝႆႉႁင်းၽႂ်ႁင်းမၼ်းလႄႈ တေလႆႈႁပ်ႉဢဝ်ၵႂႃႇႁင်းၽႂ်ႁင်းမၼ်းယဝ်ႉ၊ မိူၼ်ၶေႃႈၵႂၢမ်းဢၼ်ပိူၼ်ႈလၢတ်ႈ ႁဵတ်းလွင်ႈသင်ၵေႃႈတေလႆႈႁပ်ႉၶိုၼ်းလွင်ႈၼၼ်ႉ၊ မိူဝ်ႈႁဵတ်းလွင်ႈလီၵေႃႈ တေလႆႈႁပ်ႉလွင်ႈလီသေ သိုပ်ႇဢဝ်ပုၼ်ႈၽွၼ်းႁဵတ်းၵၢၼ်လီၵႂႃႇ တွၼ်ႈတႃႇ ပွင်သၢင်ႈတူဝ်ၸဝ်ႈၵဝ်ႇႁႂ်ႈပေႃးတိူဝ်းလီမႃးထႅင်ႈ၊ မိူဝ်ႈႁဵတ်းလွင်ႈဢမ်ႇလီၵေႃႈ တေလႆႈႁပ်ႉဢဝ်ပုၼ်ႈၽွၼ်းဢၼ်တူဝ်ၸဝ်ႈၵဝ်ႇႁဵတ်းဝႆႉၼၼ်ႉယဝ်ႉ။
ၶႃႈၵေႃႈၸိုၼ်ႈၶႅၼ်းလီယဝ်ႉ ပွၵ်ႈမႃးၶိုၼ်ႈႁူင်းႁဵၼ်းၶိုၼ်းယူႇ၊ မိူၼ်ဝႃႈႁူင်းႁဵၼ်းၼႂ်းဝၼ်းမိူဝ်ႈၼႆႉ ၸိုၼ်ႈပၢင်ႇသႂ်လီ၊ ၸႂ်မူၼ်ႈၸႂ်သိူဝ်းတႄႉယဝ်ႉ ဢမ်ႇႁူႉဝႃႈမီးလွင်ႈလီလီသင်။
“မႂ်ႇသုင်ၵၢင်ၼႂ်ဢေးယိင်း!”
သွႆႈလိူၼ် ဢၼ်ဢမ်ႇတွၼ်ႉလၢတ်ႈတေႃႇၶႃႈႁေပွၵ်ႈၼၼ်ႉ မႃးတူင်ႉတၵ်ႉၶႃႈယူႇ။ ၽိူဝ်ႇၶႃႈၵႂႃႇႁွတ်ႈထိုင် ၼႃႈၽၵ်းတူႁွင်ႈႁဵၼ်းႁဝ်းၼၼ်ႉၵေႃႈ ၵူၼ်းၼႂ်းႁွင်ႈဢွၼ်ၵၼ်ႁုၼ်ႉသႅၼ်ႇပၼ်ၶႃႈႁေ လၢတ်ႈဝႃႈ
“ယိၼ်းၸူမ်းႁပ်ႉတွၼ်ႈ ဢၼ်ပွၵ်ႈမႃးၶိုၼ်ႈႁဵၼ်းၶိုၼ်း”
တွၼ်ႈတႃႇၶႃႈ မၼ်းလၢၵ်ႇလၢႆးၼႃႇ၊ ၶဝ်ၸိူဝ်းဢၼ်ဢမ်ႇလႆႈၸႂ်ၶႃႈ၊ ဢမ်ႇပေႃးၵႆႉလၢတ်ႈတေႃႇၶႃႈၸိူဝ်းၼၼ်ႉၵေႃႈ ဢွၼ်ၵၼ်ယုမ်ႉယုမ်ႉယၢႆႈယၢႆႈၼင်ႇဝႃႈ ႁူႉၸၵ်းၵၼ်ၼၼ်ႉယဝ်ႉ။ လွင်ႈႁဵတ်းသၢင်ႈၶဝ် ဢဝ်ၶႃႈႁဵတ်းသင်ပေႃးဢမ်ႇၶႂ်ႈမေႃယူႇ။ ၶႃႈၵေႃႈၵႂႃႇၸူးၼူၼ်းမူဝ်ၶဝ်ၼၼ်ႉသေ
“ပဵၼ်လွင်ႈသင်လႃႇ! ၶဝ်ၸိူဝ်းၼၼ်ႉၵိၼ်သင်မႃးလႃႇ ထုၵ်ႇသူတဵၵ်းတဵင်ႁႂ်ႈႁဵတ်းႁႃႉ”
“သူႁၼ်ႁဝ်းမေႃတဵၵ်းတဵင်ၽႂ်လႃႇ.. ႁဝ်းၵေႃႈဢမ်ႇႁူႉမိူၼ်ၵၼ်ၶဝ်ႁဵတ်းယွၼ်ႉသင်”
“တိူင်းမၼ်းလႃႈ! ၵူၺ်းၵႃႈ မိူဝ်ႈၼႆႉမႃးႁူင်းႁဵၼ်း မၼ်းလၢၵ်ႇလၢႆးၸိူင်ႉႁိုဝ်ဝႆႉၵေႃႈဢမ်ႇႁူႉယဝ်ႉ”
“ဢမ်ႇလႆႈမႃးႁိုင်လႄႈလၢၵ်ႇလၢႆးၵူၺ်းၵႃႈ” ၼူၼ်းမူဝ်လၢတ်ႈ။
ၶႃႈၵေႃႈၵႂႃႇတမ်းထူင်ၶႃႈတီႈၼင်ႈၶႃႈၼၼ်ႉသေယဝ်ႉ။ ၸိုၼ်ႈသႂ်ၵေႃႈဝၢႆႇၼႃႈၸူးၶႃႈသေ
“ဝၼ်းၼၼ်ႉ! သူဢွၼ်ႁဝ်းဢွၵ်ႇၵႂႃႇတုၵ်းယွၼ်းၶူးၼၼ်ႉ သူႁတ်းႁၢၼ်တေႉယဝ်ႉ” ဢဝ်မၢၵ်ႇဢူမ်လုၵ်ႈၼိုင်ႈ တမ်းပၼ်တီႈၽိူၼ်ၶႃႈၵႂႃႇယဝ်ႉ ၵွင်လင်မၼ်းပၼ်ၶႃႈၵႂႃႇ ၼင်ႇၶတ်းတီႇတီႇယူႇ။
ၶႃႈၸင်ႇတေႁူႉဝႃႈပဵၼ်ယွၼ်ႉဝၼ်းၼၼ်ႉ၊ ၽွင်းၶႃႈၵႂႃႇယူႇႁူင်းယႃၼၼ်ႉ မိူၼ်ဝႃႈ မီးလွင်ႈလႅၵ်ႈလၢႆႈယူႇလၢႆၸိူဝ်ႉလၢႆလွင်ႈ၊ ၵဵဝ်ႇလူၺ်ႈလွင်ႈမၢၵ်ႉလိၵ်ႈၼၼ်ႉၵေႃႈ ၶူးၶဝ်ထွၼ်ဢွၵ်ႇၵူၼ်းႁဵတ်းၽိတ်းၸိူဝ်းၼၼ်ႉ ပၼ်သုၼ်တင်းမူတ်းယူႇ၊ လိူဝ်သေဢၢႆႈဢွင်ႇယဝ်ႉ ယင်းမီးထႅင်ႈယူႇလၢႆၵေႃႉ လုၵ်ႈႁဵၼ်းဢၼ်ႁဵၼ်းယူႇႁွင်ႈA ၼၼ်ႉ။ ၵဵဝ်ႇလူၺ်ႈလွင်ႈမၢၵ်ႉလိၵ်ႈၼႆႉသေ ၽူႈမီးပုၼ်ႈၽွၼ်းၶဝ်ၵေႃႈ လႆႈဢွၼ်ၵၼ်မႃးၵူတ်ႇထတ်းၸႅတ်ႈၶူးလူင်ယဝ်ႉ၊ ထူပ်းႁၼ်ဝႃႈၼႂ်းႁူင်းႁဵၼ်းၼၼ်ႉ မီးပၼ်ႁႃထႅင်ႈတင်းၼမ်ယူႇ၊ ၶူးလူင်ၼၼ်ႉၵေႃႈထုၵ်ႇလိုပ်ႈဢွၵ်ႇပႅတ်ႈသေ ဢဝ်ၶူးၼုမ်ႇလႅင်းၶိုၼ်ႈတႅၼ်းတၢင်ၵႂႃႇယဝ်ႉ။
လွင်ႈဢၢႆႈဢွင်ႇၼၼ်ႉတႄႉ ဝၢႆးသေဝၼ်းၼၼ်ႉယဝ်ႉ ၽႂ်ၵေႃႈဢမ်ႇလႆႈႁၼ်မၼ်းမႃးႁူင်းႁဵၼ်းသေၵေႃႉ၊ ပူၼ်ႉၵႂႃႇလၢႆဝၼ်းၵူၺ်း ဢူႈၶဝ်ၵေႃႈ မႃးယွၼ်းဢဝ်မၼ်းဢွၵ်ႇႁူင်းႁဵၼ်းၵႂႃႇယူႇ။ ယွၼ်ႉဢူႈၶဝ်ၼၼ်ႉ ပဵၼ်ၵူၼ်းယႂ်ႇၵူၼ်းလူင်၊ ၵူၼ်းမီးဢႃႇၼႃႇမီးငိုၼ်းလႄႈ တႃႇပၼ်တၢမ်ႇႁႂ်ႈမၼ်းပေႃးတူၵ်းၶွၵ်ႈၼႆၼၼ်ႉတေယၢပ်ႇယူႇ၊ ၼင်ႇႁိုဝ်ပၼ်ႁႃမၼ်းတေဢမ်ႇမႃးတိူဝ်ႉၶိူၵ်ႈ ဢူၽုင်းဢူႈၶဝ်ၼၼ်ႉ တူၺ်းငဝ်းလၢႆးတႄႉ လႅပ်ႈတေသူင်ႇၵႂႃႇၼွၵ်ႈမိူင်းၵူၺ်း။ သမ်ႉဝႃႈမၼ်းတေပဵၼ်ၸိူင်ႉႁိုဝ်ၵေႃႈယဝ်ႉမၼ်းလႄႈ ပေႃးဝႃႈမၼ်းဢမ်ႇမႃးသုၵ်ႉသၵ်ႉႁဝ်းၵေႃႈလႆႈယဝ်ႉ။
မိူၼ်ဝႃႈပၢင်ႇမၢၵ်ႇၼင်ၼၼ်ႉၵေႃႈ ၶူးၶဝ်လႆႈပိုတ်ႇပၼ်ၵၼ်လဵၼ်ႈၶိုၼ်းယဝ်ႉ၊ ၵူၺ်းၵႃႈ မိူဝ်ႈလဵၼ်ႈၵေႃႈႁႂ်ႈမီးပၵ်းမီးပိူင်သေ လဵၼ်ႈၸွမ်းၵၼ်ၼႆယူႇ။ သမ်ႉဝႃႈလႅၵ်ႈလၢႆႈၽူႈၵွၼ်းႁူင်းႁဵၼ်းယဝ်ႉသေတႃႉ ၵူၼ်းၵူႈၵေႃႉၼၼ်ႉ တေၵိုင်ႉၵၢင်ႉလႅၵ်ႈလၢႆႈဢမ်ႇလႆႈလႄႈ ၵဵဝ်ႇလူၺ်ႈ ၵၢၼ်ႁဵၼ်းၵၢၼ်သွၼ်တႄႉ ယင်းတိုၵ်ႉမိူၼ်ၵဝ်ႇယူႇၵူၺ်း၊ ဢမ်ႇမီးလွင်ႈသင်လႅၵ်ႈလၢႆႈမႃး။
ထိုင်ၶိင်ႇၶၢဝ်းလူင်းႁူင်းႁဵၼ်းယဝ်ႉ ၶႃႈၵေႃႈပၼ်ႇတင်းလူတ်ႉထိပ်ႇၶႃႈသေ မိူဝ်းၵႂႃႇလွႆးလွႆး၊ တင်းလူမ်းၵတ်းယဵၼ်ဢွၼ်ႇထူဝ်းထွင်းၼၼ်ႉႁေ ပဵၼ်ဢၼ်မူၼ်ႈသိူဝ်းၸႂ်တေႉယဝ်ႉ။ ၵူၺ်းၵႃႈ မိူဝ်ႈႁွတ်ႈၵႂႃႇပွတ်းတၢင်းၼၼ်ႉသမ်ႉ လူတ်ႉထိပ်ႇၶႃႈၼၼ်ႉ ပၼ်ႇယူႇၵေႃႈဢမ်ႇၵႂႃႇလီယဝ်ႉ ၶႃႈၸင်ႇလူင်းတူၺ်းသေ လႆႈႁူႉဝႃႈမၢၵ်ႇမၼ်းပွင်ႇ၊ ၸၢင်ႈတေႁဵတ်းႁိုဝ် ၵႃႈလႆႈထူဝ်းမိူဝ်းၵႂႃႇၵူၺ်းယဝ်ႉ။
ပေႃးဝႃႈထူဝ်းလူတ်ႉထိပ်ႇႁဵတ်းၼႆ ၼင်ႇႁၢင်ႈၶႃႈသမ်ႉပေႃးႁၼ်ၼႃႈၶူးၽိဝ်ၾႃႉမႃးၵမ်းလဵဝ်ယဝ်ႉ၊ ႁဵတ်းႁႂ်ႈၶႃႈဝၢႆႇတူၺ်းတၢင်းလင် မိူၼ်ဝႃႈမၼ်းတေမႃးၸွမ်းၼၼ်ႉယဝ်ႉ။ သမ်ႉဝႃႈတူၺ်းၵမ်းယဝ်ႉၵမ်းၵေႃႈ ယင်းဢမ်ႇႁၼ်မႅၼ်ႈငဝ်းၶဝ်သေဢိတ်း၊ ပေႃးဝႃႈတႄႉ ဝၢႆးသေဝၼ်းဢၼ်ၶူးၵႂႃႇသူင်ႇတီႈႁူင်းယႃၼၼ်ႉ ၶႃႈၵေႃႈဢမ်ႇၶိုၼ်းလႆႈႁူပ်ႉတေႃႇၼႃႈၶဝ်လီလီသေပွၵ်ႈ ၵူၺ်းၵႃႈဝၼ်းၼၼ်ႉၵေႃႈ ၶႃႈတမ်ႉဢမ်ႇလႆႈလၢတ်ႈတေႃႇၶဝ်ၵွၼ်ႇ။ မၢင်ပွၵ်ႈၵေႃႈ ႁၼ်ယူႇၼိုင်ႈၵႅပ်ႉၼိုင်ႈၵမ်း ၵူၺ်းၵႃႈဢမ်ႇတၼ်းလႆႈလၢတ်ႈတေႃႇ၊ ဢမ်ႇႁူႉဝႃႈပဵၼ်သင် မိူဝ်ႈဢွၼ်တၢင်း ပေႃးႁၼ်ၼႃႈၵၼ်ၼႆ တေယုမ်ႉတေႃႇလႄႈလၢတ်ႈတေႃႇယဝ်ႉ ၵႂၢမ်းၶေႃႈၼိုင်ႈသွင်ၵမ်း၊ ၵူၺ်းၵႃႈ ဝၢႆးသေၶႃႈလူင်းႁူင်းယႃမႃးၼႆႉ ပေႃးႁၼ်ၶႃႈၵေႃႈ လိူဝ်သေဢမ်ႇလၢတ်ႈတေႃႇယဝ်ႉ သမ်ႉပၢႆၵွင်လင်ပႅတ်ႈႁေ ပူၼ်ႉၵႂႃႇပႅတ်ႈႁေၵွၼ်ႇ ပေႃးတၢၼ်ႇဝႃႈၸႂ်လမ်ႁင်ႁင်းၶႃႈယဝ်ႉ။
ထိုင်ၼင်ႇဝၼ်းလိုဝ်ႈမႃး ႁဝ်းသႂ်လႅင်း၊ ၼူၼ်းမူဝ်၊ ၶမ်းၽွင်၊ သႅင်ႁၵ်ႉ၊ ၸိုၼ်ႈသႂ်ၵေႃႈ ၸူဝ်းႁွင်ႉၵၼ် ၵႂႃႇၸႂ်းသႅင်ၶဵဝ်တီႈႁူင်းယႃယူႇ။ မိူဝ်ႈၵႂႃႇႁွတ်ႈထိုင်တီႈႁူင်းယႃၼၼ်ႉၵေႃႈ လႆႈႁၼ်ၸၢႆးၶမ်းၶိူဝ်း၊ သၢႆပိူင်းလႄႈၽွင်းလႅင်းၶဝ် ဢွၼ်ၵၼ်မီးယူႇတီႈႁူင်းယႃၼၼ်ႉယဝ်ႉ။
“ပေႉဢွၼ်ၵၼ်မႃးၼမ်ဝႃႈၼမ်! ႁူင်းယႃသမ်ႉပေႃးၵႅပ်ႈၵႂႃႇယဝ်ႉဢိူဝ်ႈ” ၶမ်းၶိူဝ်းလၢတ်ႈ။
“ၶဝ်ၼႆႉႁႃႉ.. ဢမ်ႇလႆႈတဵမ်ၸႂ်မႃးတူၺ်းႁႃးလူင်! မႃးတူၺ်းမေႃယႃလဝ်းလဝ်းၵူၺ်းႁိုဝ်လႃႇ!” သႅင်ၶဵဝ်လၢတ်ႈ။
“မီးမေႃယႃလဝ်းလဝ်းႁေႁႃႉ” သႅင်ႁၵ်ႉထၢမ် ယွၼ်ႉပိူဝ်ႈမၼ်းဢမ်ႇပႆႇယၢမ်ႈမႃး။
“ဢိုမ်ႈ! ထၢမ်တူၺ်းဢေးယိင်းလႄႈ မၼ်းသမ်ႉပေႃး ဢမ်ႇၶႂ်ႈလူင်းႁူင်းယႃၵွၼ်ႇၼႆဝႃႇ..မၼ်းလၢတ်ႈ” သႅင်ၶဵဝ်တူၺ်းၼႃႈၶႃႈႁေ လၢတ်ႈၼႄၶဝ်ၸိူဝ်းၼၼ်ႉယူႇ။ ၶဝ်ၵေႃႈဢွၼ်ၵၼ်ယၵ်ႉတူၺ်းၼႃႈၶႃႈ ဢဝ်ၼႃႈပေႃးမႆႈလႅင်မႃးယဝ်ႉ။
“ဢမ်ႇပေႃးတၢၼ်ႇၼၼ်ႉၼင်ႇၵဝ်ႇဢေႉ!”
“ၵူၼ်းၸိူင်ႉၼင်ႇဢေးယိင်းၼႆႉၵေႃႈ မေႃယွင်ႇၸွမ်းၽူႈၸၢႆးႁေႁႃႉၼႆႉ” သႂ်လႅင်းတင်းလၢတ်ႈတင်းယုမ်ႉယူႇယဝ်ႉ။
“မၼ်းၵေႃႈပဵၼ်ၽူႈယိင်းယူႇလူးသူၵေႃႈ!” ၼူၼ်းမူဝ်လၢတ်ႈ။
“တူၺ်းလေႃႇႁိမ်းႁွမ်းမၼ်း ပေႃးပဵၼ်ၵူၼ်းလဝ်းၵႂႃႇသဵင်ႈ တမ်ႉဢမ်ႇတွၼ်ႉႁၼ်မၼ်းသူၼ်ၸႂ်သေဢိတ်း” သႂ်လႅင်းၼၼ်ႉၵေႃႈလၢတ်ႈပေႃးဢမ်ႇယွမ်းၵႂၢမ်းယဝ်ႉ။
“ဢိူဝ်ႈၼေႃႈ! တႃႉၶႂ်ႈႁၼ်မေႃၵေႃႉၼၼ်ႉလႃႈ တေလဝ်းတၢၼ်ႇႁိုဝ်ၼႆ” ၶမ်းၽွင်ၵေႃႈလၢတ်ႈၸိမ်ၸွမ်းၵႂႃႇ။
တင်းယွၵ်ႇတင်းၶူဝ် ဢုပ်ႇမူၼ်ႈဢုပ်ႇၵျေႃႇ၊ ၵူၺ်းၵေႃႉၶၢမ်ႇသမ်ႉပဵၼ်ၶႃႈ ဢဝ်ၶႃႈသမ်ႉပေႃးဢမ်ႇၸၢင်ႈတၵ်းသဵင်သင်ၸွမ်းယဝ်ႉ၊ မိူၼ်ပဵၼ်ပွၵ်ႈဢွၼ်တၢင်းသုတ်း ဢၼ်ၺႃးပိူၼ်ႈဝႃႈ ထိုင်တီႈၶႃႈပေႃးဢမ်ႇၸၢင်ႈလၢတ်ႈၵႂၢမ်းလႆႈ။
“သူမႃးၸႂ်းသႅင်ၶဵဝ်ႁႃႉ! မႃးဝႃႈႁင်းႁဝ်းႁႃႉၼႆႉ! ၵမ်ႉတေမိူဝ်းပႅတ်ႈသူယဝ်ႉဝႃႈ”
“ဢမ်ႇယွၵ်ႇယဝ်ႉပေႃးၼၼ်”
ယၢမ်းၼၼ်ႉ မေႃလဝ်းၵေႃႉၼၼ်ႉ မႃးတၢင်းႁဝ်းယူႇၼၼ်ႉယဝ်ႉ။ ပေႃးဝႃႈတေႉၸိုဝ်ႈၶဝ်ႁွင်ႉသင် ၶႃႈတမ်ႉဢမ်ႇတွင်းလူၵွၼ်ႇ ၵူၺ်းႁၼ်ဝႃႈၶဝ်လဝ်းၼႃႇလႄႈ ႁွင်ႉၸွမ်းႁၢင်ႈၽၢင်ၼႃႈတႃၶဝ်ဝႃႈ မေႃယႃလဝ်းၼႆၵူၺ်း။ မေႃၵေႃႈ မႃးတူင်ႉတၵ်ႉႁဝ်းသေ
“မီးဢူၺ်းၵေႃႉမႃးၸႂ်းတင်းၼမ်ၸိူင်ႉၼႆ မေႃဝႃႈတႄႉ တၢင်းပဵၼ်ပေႃးလႅပ်ႈၶႂ်ႈၶႅၼ်းၵႂႃႇ ပဵၼ်သိပ်းပုၼ်ႈယဝ်ႉယူဝ်ႉၼႆႉ”
ယၵ်ႉတူၺ်းသႅင်ၶဵဝ်သေ ဢဝ်တၢင်းယုမ်ႉၶဵဝ်ႈငႃးတၢင်ႇမၼ်းၼၼ်ႉ ဝၢႆႇမႃးတၢင်းႁဝ်း သမ်ႉပေႃးၶႂ်ႈမဝ်းလူင်ၵႂႃႇပဵၼ်ၵမ်းယဝ်ႉ။ ၸင်ႇမႃးၸူးၶႃႈသေ
“ပဵၼ်ႁိုဝ်မႃးလႃႇ ၸွင်ႇယင်းတိုၵ်ႉၸဵပ်းယူႇႁိုဝ်”
“ဢမ်ႇ..ဢမ်ႇၸဵပ်းယဝ်ႉၶႃႈ..”
မေႃၵေႃႈသိုပ်ႇပူၼ်ႉႁဝ်းၵႂႃႇ တူၺ်းၵူၼ်းပဵၼ်တၢင်ႇၵေႃႉထႅင်ႈယူႇ။
“လဝ်းတေႉဢိူဝ်ႈမႂ်းဝႃႈ” သႂ်လႅင်းလၢတ်ႈယူႇလွႆးလွႆး။
ၼူၼ်းမူဝ်၊ သႅင်ႁၵ်ႉၶဝ်၊ ၶမ်းၽွင်ၶဝ်ၼၼ်ႉၵေႃႈ ယုမ်ႉယုမ်ႉႁေ ၼႃႈၵေႃႈလႅင်မႃးယူႇ။ ဢၼ်ဢမ်ႇပဵၼ်ႁိုဝ်ၼၼ်ႉတႄႉ ၸိုၼ်ႈသႂ်ၵူၺ်း၊ တေႃႈၼင်ႇၽွင်းလႅင်း ဢၼ်မီးယူႇႁိမ်းသၢႆပိူင်းၵေႃႉႁၵ်ႉမၼ်းၼၼ်ႉ ယင်းၸၢႆႉသၢႆတႃဝၢႆႇတူၺ်းလူးၵွၼ်ႇ။
ဝၢႆးသေၸႂ်းသႅင်ၶဵဝ်ယဝ်ႉ၊ ဢွၼ်ၵၼ်ဢွၵ်ႇႁူင်းယႃမႃးၼႆၵေႃႈ ၵိူဝ်ႉပၼ်ၶႃႈပေႃးဢမ်ႇၵိုတ်းလႆႈယူႇ။ မိူဝ်ႈပႆႇပူၼ်ႉႁူင်းယႃၼၼ်ႉ သႅင်ႁၵ်ႉထၢမ်ၶႃႈ
“ၶဝ်ၸိုဝ်ႈႁွင်ႉသင်လႃႇ!”
“ဢမ်ႇတွင်းယဝ်ႉ”
“ၸိုဝ်ႈၶဝ်ၵူၺ်းၵေႃႈဢမ်ႇတွင်းႁႃႉ!” ၶမ်းၽွင်းလၢတ်ႈ။
“ၶဝ်ၸိုဝ်ႈ..ၵွၼ်ၶိူဝ်းမိူင်း” ၸိုၼ်ႈသႂ်ဢၼ်ဢမ်ႇႁၼ်သူၼ်ၸႂ်ၼၼ်ႉၵေႃႈ လၢတ်ႈဢွၵ်ႇမႃးယူႇ။
ႁဝ်းၵေႃႈ ဢွၼ်ၵၼ်ယၵ်ႉတူၺ်းမၼ်းသေယဝ်ႉ။
“ႁူႉလႆႈၸိူင်ႉႁိုဝ်လႃႇ ႁဝ်းတမ်ႉဢမ်ႇႁူႉလူးၵွၼ်ႇၼႆႉ!”
“ပၢႆႉၸိုဝ်ႈၶဝ်တိတ်းယူႇၼႃႈသိူဝ်ႈၼၼ်ႉ ႁဵတ်းႁိုဝ်လႄႈဝႃႈဢမ်ႇႁူႉလႆႈလႃႇ”
မၼ်းၵေႃႈၸႂ်ႈယူႇ မိူဝ်ႈႁၼ်ၼႃႈၶဝ်ယဝ်ႉ ၽႂ်ႁိုဝ်တေတၼ်းတူၺ်းပၢႆႉၸိုဝ်ႈၶဝ်လႃႇ ၵူဝ်ဢမ်ႇလႆႈတူၺ်းၼႃႈၶဝ်ၼၼ်ႉၵူၺ်းဢိူဝ်ႈလေႃႇ။ ၵွပ်ႈဝႃႈ ႁဝ်းပႆႇဢွၵ်ႇပူၼ်ႉဢၢင်ႇၶႂၢင်ႇႁူင်းယႃလႄႈ ငိၼ်းသဵင်ၽူႈယိင်းၵေႃႉၼိုင်ႈ မေႃးယူႇတၢင်းလင်ႁဝ်းၼၼ်ႉ
“ၵွၼ်ၶိူဝ်းမိူင်း!!”
ႁဝ်းၵေႃႈလႆႈဢွၼ်ၵၼ် ဝိၼ်ႇဝၢႆႇယၵ်ႉတူၺ်းၵႂႃႇတၢင်းၼၼ်ႉ ဢၼ်ဢမ်ႇထၢင်ႇဢမ်ႇထိူမ် မေႃလဝ်းၼၼ်ႉၵေႃႈ လႅၼ်ႈၶဝ်ႈမႃးၵွတ်ႇသႂ်ႇယိင်းၵေႃႉၼၼ်ႉသေ သွင်ၶႃၵေႃႈ ၸုင်ယိပ်းမိုဝ်းၵၼ်ၶိုၼ်ႈလူတ်ႉၵႂႃႇယဝ်ႉ၊ လတ်းၽၢၼ်ႇၽႅတ်ႈႁဝ်း ဢွၵ်ႇႁူင်းယႃၵႂႃႇၸွမ်းၵၼ်ယူႇ၊ ႁဝ်းၼၼ်ႉတႄႉ ၸၢင်ႈတေႁဵတ်းႁိုဝ် မိူၼ်ႇမိုင်တူၺ်းၸွမ်းၶဝ်ၵႂႃႇ ယင်းဢမ်ႇပႆႇၸၢင်ႈတူင်ႉတီႈလႆႈလႃႈ တေႃႇၶဝ်ပေႃးပူၼ်ႉသၢႆတႃႁဝ်းၼၼ်ႉ။
“မွၵ်ႇႁၢင်ႈလီၵေႃႈ တေႃႈဢမ်ႇလွတ်ႈမႅင်းၽိုင်ႈမႃးတွမ် ၵူၼ်းႁၢင်ႈလဝ်းၵေႃႈ ႁိုဝ်လွတ်ႈမီးၵေႃႉႁၵ်ႉၵေႃႉပႅင်းလႃႇ” ၶမ်းၽွင်ၼၼ်ႉၵေႃႈ တင်းလၢတ်ႈတင်းလုပ်ႈႁူဝ်မႃႇၶႃႈလွႆးလွႆး ၼင်ႇပၼ်ႁႅင်းၸႂ်ၼၼ်ႉယဝ်ႉ။
ၸင်ႇႁႃတွင်းၸိုဝ်ႈၶဝ်လႆႈၵူၺ်း သမ်ႉလႆႈႁၼ်ဢၼ်ဢမ်ႇထုၵ်ႇလီႁၼ်၊ ႁဵတ်းႁႂ်ႈၶႃႈပေႃးဢမ်ႇမီးႁႅင်းလူင်မႃးၵမ်းလဵဝ်ယဝ်ႉ။
“လႆႈယူႇႁႃႉဢေးယိင်း!”
“ဢိုမ်ႈ! လႆႈယူႇယူဝ်ႉ ႁဝ်းၸၢင်ႈပဵၼ်သင်”
မိူဝ်ႈၶဝ်ထၢမ်ၶႃႈၸိူင်ႉၼၼ် မိူၼ်ဝႃႈၶႃႈၵေႃႈ လၢတ်ႈၵႂၢမ်းပေႃးဢမ်ႇၶႂ်ႈလႆႈမိူၼ်ၵၼ်ယဝ်ႉ၊ ပၼ်ႇလူတ်ႉထိပ်ႇၶႃႈႁေ ၽၢတ်ႇယၢၼ်ၶဝ်မိူဝ်းၵႂႃႇလွႆးလွႆးႁင်းၵူၺ်းယူႇ။ ၶႃႈထုၵ်ႇလီႁူႉယူႇယဝ်ႉဝႃႈ ၶဝ်ပဵၼ်ၵူၼ်းလဝ်း တိုၼ်းတေမီးၵေႃႉႁၵ်ႉၵေႃႉၵဝ်းၼႆ။ ၶႃႈၽိတ်းၵူၺ်း ဢၼ်ၵႂႃႇလႆႈၸႂ်ၵူၼ်းလဝ်းၼၼ်ႉ၊ တေၸၢင်ႈႁဵတ်းႁိုဝ် ၶဝ်ၵေႃႈလဝ်းတေႉလူး သမ်ႉဝႃႈမီးၸူႉယဝ်ႉၵေႃႈ၊ ၶႃႈယင်းဢမ်ႇလိုမ်းတၢင်းယုမ်ႉၶဝ် ဢၼ်မီးယူႇၼႂ်းတႃ မိူဝ်ႈလွတ်ႈတၢႆသေမိုၼ်းတႃမႃးႁၼ်ၶဝ်ၼၼ်ႉလႃႈ။
မိူဝ်ႈၼႆႉမိူဝ်းႁွတ်ႈႁိူၼ်းယဝ်ႉ ၼၢႆးႁဝ်းၵႂႃႇၶၢႆၵၢတ်ႇမႃးသေ မႃးႁဵတ်းလဵင်ႉၶဝ်ႈသွႆးၼၢၵ်ႇဝႃႇ၊ ဢွၼ်တၢင်းတေလႆႈၵိၼ်ၵေႃႈ လႆႈဢဝ်ၵႂႃႇပၼ်တီႈႁိူၼ်းၶူးပိူင်းၾႃႉၶဝ်ၼၼ်ႉပႃးယဝ်ႉ။ ၶႃႈၵေႃႈ ယိပ်းတင်းပၢၼ်ႉၶဝ်ႈသွႆးၼၼ်ႉသေ ႁွင်ႉၶူးၶဝ်ယူႇတီႈၼႃႈၽၵ်းတူ ၼၼ်ႉယဝ်ႉ။ ၸင်ႇမီးၶူးၽိဝ်ၾႃႉဢွၵ်ႇမႃးႁပ်ႉ လူၺ်ႈသီၼႃႈဢၼ်ဢမ်ႇလီႁေၵႃႈႁိုဝ်၊ မိူဝ်ႈၶူးယိပ်းဢဝ်ပၢၼ်ႉၼၼ်ႉ မိုဝ်းၶူးၵေႃႈလႆႈယိပ်းတုမ်ႉတိူဝ်ႉသႂ်ႇၺႃးမိုဝ်းၶႃႈၵႂႃႇ ဢမ်ႇႁူႉဝႃႈ ၵႂႃႇတိူဝ်ႉၺႃးဢဵၼ်လႂ် တွတ်ႇသၢၼ်ႈထိုင်ႁူဝ်ၸႂ်ၶႃႈ ပေႃးလင်မေႃးႁႅင်းဝႃႈႁႅင်းယဝ်ႉ၊ ၼႃႈၶႃႈၼၼ်ႉၵေႃႈ ၼင်ႇႁၢင်ႈမႆႈလူင်မႃးၵမ်းလဵဝ်ယူႇ၊ ၶႃႈၵေႃႈယင်းပႆႇၵႂႃႇၸၢင်ႈတၢင်းလႂ်လႆႈ ၸိုၵ်းမိုင်ယူႇႁဵတ်းၼၼ် ၶူးၵေႃႈဢဝ်ပၢၼ်ႉမၼ်းမႃးပၼ်ၶႃႈၶိုၼ်းသေ
“ၸူမ်းယဝ်ႉၼႃႈ!”
မိူဝ်ႈပဵၼ်ၸိူင်ႉၼၼ် လွင်ႈဢၼ်ၶႂ်ႈလၢတ်ႈတီႈၶူးၽိဝ်ၾႃႉ ပေႃးဝႃႈႁၼ်ၶူးၼႆၼၼ်ႉၵေႃႈ သမ်ႉပေႃးလိုမ်းၵႂႃႇမူတ်းယဝ်ႉဝႃႈ တေလႆႈလၢတ်ႈသင်။ ၶႃႈၵေႃႈဢဝ်ပၢၼ်ႉၼၼ်ႉသေ ႁိပ်ႈၼႅတ်ႈဢွၵ်ႇမႃးၵမ်းလဵဝ်ယဝ်ႉ ၶႃႈဝႃႈတႄႉ ၶႃႈမီးလူမ်းႁူဝ်ၸႂ်ယူႇယူဝ်ႉၼႆႉ။
တွၼ်ႈသၢမ်သိပ်းဢဵတ်းသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢမ်သိပ်းသွင်ၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
