တွၼ်ႈသၢမ်သိပ်း
မိူဝ်ႈဢူႈမႄႈၸွမ်းၸႂ်လုၵ်ႈသေ ႁဵတ်းပၼ်ယူႇတႃႇသေႇၼၼ်ႉ တေႁဵတ်းႁႂ်ႈၶဝ်ဢမ်ႇမေႃႁဵတ်းသင်ႁင်းၵူၺ်းမႃးယဝ်ႉ၊ ဢမ်ႇဝႃႈလွင်ႈလဵၵ်ႉလဵၵ်ႉဢွၼ်ႇၵူၺ်းၵေႃႈ ယင်းတိုၵ်ႉတေပိုင်ႈဢိင်ဢူႈမႄႈယူႇ၊ မိူဝ်ႈလူဝ်ႇသင်၊ မိူဝ်ႈၶႂ်ႈလႆႈသင်၊ ၶႂ်ႈပဵၼ်သင်ၵေႃႈယဝ်ႉ ဢူႈမႄႈၼၼ်ႉၵေႃႈ တေလႆႈႁဵတ်းပၼ်မူတ်းမူတ်း၊ ၵေႃႉပဵၼ်ဢူႈမႄႈၵေႃႈ တွၼ်ႈတႃႇလုၵ်ႈလၢင်း ပေႃးဢမ်ႇလႆႈလိူတ်ႇလႆႈမႆႈသင်ၼၼ်ႉ ၸွမ်းႁဵတ်းပၼ်ၵူႈလွင်ႈ၊ ဢမ်ႇပၼ်ႁႂ်ႈလုၵ်ႈလႆႈႁပ်ႉႁူႉလွင်ႈၶဵင်ႇတႃႉ သွၼ်ႇႁႂ်ႈလုၵ်ႈလႆႈၸႂ်ႉၸၢတ်ႈပၢၼ်ယူႇလူမ်ၸႂ် ၵတ်းယဵၼ်ၵူၺ်းၵေႃႈလႆႈယဝ်ႉ။
ယွၼ်ႉမီးဢူႈမႄႈၸွမ်းၸႂ်ယူႇတႃႇသေႇလႄႈ ၵေႃႉယႂ်ႇယဝ်ႉၵေႃႈ ယင်းပႆႇပေႉတူဝ်၊ မီးပၼ်ႁႃမႃးၵေႃႈ ယင်းဢမ်ႇမေႃၵႄႈၶႆႁင်းၵူၺ်းသေဢမ်ႇၵႃး တေယုမ်ႇယမ်ဝႃႈ ဢူႈမႄႈၼၼ်ႉ ယူႇၽၢႆႇလင်သေ ၸွႆႈထႅမ်ၶဝ်ယူႇတႃႇသေႇယဝ်ႉ၊ ၵူၺ်းၵႃႈ ဢူႈမႄႈၼၼ်ႉ ႁူႉလႆႈယူႇႁႃႉဝႃႈ တေယူႇၽၢႆႇလင်ၶဝ်သေ ၸွႆႈထႅမ်ၶဝ်လႆႈယူႇတႃႇသေႇ၊ လွင်ႈဢၼ်ၶဝ်ႁဵတ်းမႃးၸိူဝ်းၼၼ်ႉ တေႁပ်ႉဢဝ်ပုၼ်ႈၽွၼ်းပၼ်ၶဝ်လႆႈတေႃႇၸူဝ်ႈပၢၼ်ၶဝ်ၼၼ်ႉယူႇႁိုဝ်၊ သမ်ႉဝႃႈ ဢူႈမႄႈတေပဵၼ်ၽူႈၵေႃႉၵိူတ်ႇဢွၵ်ႇၶဝ်မႃးပဵၼ်ၵူၼ်းသေတႃႉ ၸၢတ်ႈပၢၼ်ၶဝ်ၵေႃႈ ပဵၼ်ၸၢတ်ႈပၢၼ်ၶဝ်ၵူၺ်း၊ ထုၵ်ႇလီပၼ်ႁႂ်ႈၶဝ်လႆႈၸႂ်ႉၸၢတ်ႈပၢၼ် ၸွမ်းၼင်ႇသႅၼ်းပၢၼ်ဢၼ်ၶဝ်ထုၵ်ႇလီပဵၼ်ၼၼ်ႉလႄႈ သင်ႇသွၼ်လၢတ်ႈပၼ်၊ မိူဝ်ႈႁဵတ်းၽိတ်းၵေႃႈ တေလႆႈမေႃႁပ်ႉဢဝ်တၢင်းၽိတ်း၊ မိူဝ်ႈႁဵတ်းထုၵ်ႇၵေႃႈ တေလႆႈမေႃႁူႉႁၼ်ထိုင်လွင်ႈထုၵ်ႇမႅၼ်ႈမႃး ၼၼ်ႉယဝ်ႉ။
ၵေႃႉပဵၼ်ဢၢႆႈဢွင်ႇၼၼ်ႉၵေႃႈ မိူၼ်ဝႃႈတၢင်းၼႂ်းႁူင်းႁဵၼ်းၼၼ်ႉ ပိူၼ်ႈတေဢွၼ်ၵၼ်ႁူႉလွင်ႈမၼ်းမူတ်းယဝ်ႉ လႄႈ ၽႂ်ၽႂ်ၵေႃႈ ဢွၼ်ၵၼ်ယၵ်ႉတူၺ်းၸူးမၼ်း လူၺ်ႈသၢႆတႃပႅင်းၸင်း ဢမ်ႇထုၵ်ႇၸႂ်သေဢမ်ႇၵႃး လၢတ်ႈၵႂၢမ်းလပ်ႉလင်မၼ်းၸိူဝ်းၼႆႉယူႇ။ မိူၼ်ပဵၼ်ၵူၼ်းလၢၵ်ႇလၢႆး တွၼ်ႈတႃႇၵူၼ်းတင်းၼမ်ယဝ်ႉ၊ ၵူၺ်းၵႃႈ ၵူၼ်းၸႂ်ႁၢဝ်ႈၸိူင်ႉၼင်ႇမၼ်းၼၼ်ႉသမ်ႉ ဢမ်ႇၶႂ်ႈၶၢမ်ႇသၢႆတႃၸိူင်ႉၼၼ်လႄႈ ငိၼ်းၽႂ်လၢတ်ႈထိုင်ၸိုဝ်ႈမၼ်းၵေႃႈ ၵႂႃႇႁႃပၢၼ်းၽိတ်းပိူၼ်ႈယူႇ၊ ၽႂ်ၵေႃႈပေႃးႁၼ်မၼ်းမႃးၸမ်ၼႆ တေၶတ်းၸႂ်ပၢႆႈႁႂ်ႈၵႆၵႆယဝ်ႉ။
ဝၼ်းလၢဝ်ၵေႃႈ မိူဝ်ႈႁူႉဝႃႈ ၶေႃႈထၢမ်ၼႂ်းပၢင်တွပ်ႇလိၵ်ႈႁူဝ်ႈ ယွၼ်ႉဢၢႆႈဢွင်ႇၼၼ်ႉၼႆၵေႃႈ ဢမ်ႇပေႃးၶႂ်ႈလဵၼ်ႈၵေႃႉမၼ်းလႄႈ မၼ်းၵေႃႈဢမ်ႇမီးၵေႃႉယဝ်ႉ၊ တေဝႃႈ သႅင်ၶဵဝ်ၼႆၵေႃႈ ၸဵမ်မိူဝ်ႈမၼ်းမႃးလဵၼ်ႈၵေႃႉႁဝ်း ဢၢႆႈဢွင်ႇၼၼ်ႉ ဢမ်ႇပေႃးၵဝ်းၸွမ်းမၼ်းၵႃႈႁိုဝ်ယဝ်ႉ။ ၵူၺ်းၵႃႈ မိူဝ်ႈၼႆႉ ၽွင်းၶႃႈမႃးထိုင်ႁူင်းႁဵၼ်းၼၼ်ႉ လႆႈငိၼ်းၵူၼ်းၼႂ်းႁွင်ႈ ၶဝ်ဢုပ်ႇၵၼ်လွင်ႈဢၢႆႈဢွင်ႇ လၢၵ်ႈတူဝ်သႅင်ၶဵဝ်ၵႂႃႇတၢင်းလင်ႁူင်းႁဵၼ်း ၼႆယူႇ။
တၢင်းၸႂ်လူင်ဢၢႆႈဢွင်ႇၼၼ်ႉႁမ်ႉ ယွင်ႇယွင်ႇမႃႈမႃႈသေ မိူဝ်ႈငိၼ်းၸိူင်ႉၼၼ်ၵေႃႈ ၶႃႈၼၼ်ႉတႄႉ ၸႂ်ႁိုဝ်တေလီလႆႈယဝ်ႉလႃႇ၊ ထူင်ၵေႃႈဢမ်ႇတၼ်းပူတ်း ၼႅတ်ႈဢွၵ်ႇႁွင်ႈၵႂႃႇၸွမ်းႁႃယူႇ၊ လႆႈငိၼ်းသဵင်ဢၢႆႈဢွင်ႇ မေႃးယူႇၼႂ်းသူၼ်ၼၼ်ႉသေ ၶႃႈၵေႃႈပႆၵႂႃႇၸွမ်းသဵင်ၼၼ်ႉလႄႈ မိူဝ်ႈၶႃႈၵႂႃႇထိုင်ၵေႃႈ မိူၼ်ၶႃႈတေတူၵ်းလိုၼ်းၵႂႃႇယဝ်ႉ။ လႆႈႁၼ်သႅင်ၶဵဝ် ၼွၼ်းလူမ်ႉဢိူၵ်ႇလိူတ်ႈဢိူၵ်ႇယၢင် လိုမ်းတူဝ်ယူႇၼိူဝ်ပိုၼ်ႉလိၼ် ပေႃးဢမ်ႇတူင်ႉတူဝ်လႆႈသေဢိတ်း ၵူၺ်းဢၢႆႈဢွင်ႇၼၼ်ႉ ယင်းတိုၵ်ႉယဵပ်ႇထိပ်ႇ ပိတ်ႉသႂ်ႇပိတ်ႉသႂ်ႇယူႇတိၵ်းတိၵ်း။
မိူဝ်ႈၶႃႈႁၼ်ၸိူင်ႉၼၼ် ၶႃႈၵေႃႈႁိုဝ်ႁၢမ်ႈၸႂ်လႆႈ ၶုၼ်ႇၽၢင်ႈဢီးသႂ်ႇပၼ်မၼ်း ၸွမ်းၼင်ႇႁႅင်းမီးၼၼ်ႉႁႅင်းႁႅင်းယူႇ။ တူဝ်မၼ်းယႂ်ႇ ႁႅင်းမၼ်းၼမ်ၼႃႇလႄႈ ၶႃႈဢမ်ႇႁဵတ်းႁႂ်ႈမၼ်းလူမ်ႉလူင်းသေဢမ်ႇၵႃး ယိုင်ႈၶႅၼ်းႁဵတ်းႁႂ်ႈမၼ်း မႃးၵမ်ၶေႃးသိူဝ်ႈၶႃႈယဝ်ႉ ဢီးၶႃႈလူမ်ႉၽတ်ႉသႂ်ႇၼိူဝ်ပိုၼ်ႉလိၼ်ၼၼ်ႉသေ ၽႃႇမိုဝ်းလူင်မၼ်း တူပ်းသႂ်ႇပၼ်မႅပ်ႉၶႃႈႁႅင်းႁႅင်းယဝ်ႉ။
“ဢၼ်ႁဵတ်းႁႂ်ႈၵဝ်ပဵၼ်ၸိူင်ႉၼႆၵေႃႈ ပဵၼ်ယွၼ်ႉမႂ်းၼႆႉယဝ်ႉ!!”
မိုဝ်းမၼ်းငႅၼ်းသႂ်ႇၶေႃးၶႃႈ ယုၵ်ႉဢဝ်တူဝ်ၶႃႈၶိုၼ်ႈသေယဝ်ႉ ဢီးသုတ်ႉၵႂႃႇတၢင်းတူၼ်ႈမႆႉလူင်ႁိမ်းၼၼ်ႉ ဢဝ်လင်ၶႃႈသမ်ႉပေႃးထူၸပ်းသႂ်ႇတူၼ်ႈမႆႈလူင်ယူႇ။ မၼ်းႁႅင်းၼႃႇလႄႈ သမ်ႉဝႃႈၶႃႈၶတ်းၸႂ်ၽိုတ်ႉဢီးတၢၼ်ႇလႂ်ၵေႃႈ ဢမ်ႇၽိုတ်ႉလႆႈသေဢမ်ႇၵႃး ၶႃႈထူၺ်ႈၸႂ်ယၢပ်ႇတေႉယဝ်ႉ၊ မိူၼ်တေထူၺ်ႈၸႂ်ဢမ်ႇလႆႈ၊ ၶႃႈတေတၢႆၵႂႃႇတီႈၼႆႈယဝ်ႉၸွင်ႇၸႂ်ႈႁိုဝ်၊ “ၸဵပ်းတေႉယဝ်ႉ၊ ၶႃႈတေတၢႆယဝ်ႉ၊ ၸွႆႈၶႃႈဢိတ်ႉၼိုင်ႈ” ၶႃႈႁွင်ႉသႅၼ်ႇႁူဝ်ၸႂ်ပေႃးတေတႅၵ်ႇလႅဝ်ယဝ်ႉ ၵူၺ်းၵႃႈ ဢမ်ႇႁၼ်ၽႂ်ႁွတ်ႈမႃး၊ ယွၼ်ႉသဵင်ၼၼ်ႉမၼ်းလၢတ်ႈလႆႈၼႂ်းၸႂ်ၵူၺ်း။
ဢမ်ႇထၢင်ႇဢမ်ႇထိူမ် ၶႃႈၵေႃႈမိုၼ်းတႃမႃးသေ လႆႈႁၼ်ၽူႈၸၢႆးၵေႃႉၼိုင်ႈ သႂ်ႇသိူဝ်ႈသီၶၢဝ်ၶၢဝ် မီးယူႇၼႂ်းတႃၶႃႈလႄႈယုမ်ႉၸူး မီးၶဵဝ်ႈငႃးတၢင်ႇသွၼ်ႉ တင်းၵႅမ်ႈလွၵ်းလွၵ်းဢွၼ်ႇႁေ၊ ၼႃႈၵေႃႈပွတ်ႇဝႃႈပွတ်ႇယဝ်ႉ ႁၼ်ၸိူင်ႉၼႆယဝ်ႉၵေႃႈ ၶႃႈဝႃႈတႄႉ ၶႃႈတၢႆၵႂႃႇႁွတ်ႈမိူင်းၽီယူႇၸွင်ႇၸႂ်ႈႁိုဝ်။
“တိုၼ်ႇယဝ်ႉႁႃႉယိင်း!” ၶဝ်လၢတ်ႈၸူးၶႃႈ သဵင်ၵေႃႈဝၢၼ်တေႉယဝ်ႉ။ ဢဝ်ၶႃႈယုမ်ႉၸူးၵူၺ်း လၢတ်ႈၵႂၢမ်းပေႃးဢမ်ႇဢွၵ်ႇလႆႈယဝ်ႉ။
“ၸွင်ႇၸဵပ်းတီႈလႂ်ႁိုဝ်..”
ၶဝ်ၶိုၼ်းထၢမ်ထႅင်ႈ မိူဝ်ႈၶႃႈဢၢင်ႈငွၵ်းၼႃႈၼႄဝႃႈဢမ်ႇၸဵပ်းၼႆၵေႃႈ ၼင်ႇဝႃႈၸွမ်းၶေႃး၊ ၸွမ်းဢႅဝ်၊ ၸွမ်းလင် ႁူဝ်တေႃႇတိၼ် ၸဵပ်းၸဵပ်းၶိုၼ်ႈၶိုၼ်ႈလူင်ၵႂႃႇမူတ်း တၢင်းၸဵပ်းလူင်မၼ်းၼၼ်ႉ ယဵၼ်ႉၸႂ်ဢမ်ႇလႆႈ ဢဝ်ၶႃႈပေႃးႁွင်ႉသႅၼ်ႇလူင်ဢွၵ်ႇမႃးယဝ်ႉ။
“ဢယႃး!! ၸဵပ်း!..”
“ပဵၼ်ၸိူင်ႉႁိုဝ်လႃႇ! ၸဵပ်းႁႅင်းၼႃႇႁႃႉ! ယႃႇပေႃးတူင်ႉတူဝ်ႁႅင်းၼႃႇၽႅဝ်”
မိူဝ်ႈပဵၼ်ၸိူင်ႉၼၼ် ၶႃႈၸင်ႇတေၾၢင်ႉႁၼ်မႅၼ်ႈ သၢႆၼမ်ႉၵိူဝ်ဢၼ်ၽႅၼ်ဝႆႉယူႇႁိမ်းၶႃႈ ၼၼ်ႉယဝ်ႉ။ ၸၢင်ႈၵႂႃႇၸႂ်ႈမိူင်းၽီတီႈလႂ် ၶႃႈလွတ်ႈတၢႆမႃးမီးယူႇႁူင်းယႃၼႆႉၵူၺ်းလူင်။ ၽွင်းၼၼ်ႉ ၼၢႆးႁဝ်းၵေႃႈလုၵ်ႉတၢင်းလႂ်တၢင်းလီၵေႃႈဢမ်ႇႁူႉ ႁိပ်ႈႁိပ်ႈၼႅတ်ႈၼႅတ်ႈမႃးၵွတ်ႇၶႃႈသေ
“ဢေးယိင်းတိုၼ်ႇယဝ်ႉႁႃႉ!”
“ၸဵပ်းၶႃႈဢေႃႈၼၢႆး! လွႆးလွႆးဢိတ်ႉၼိုင်ႈလႄႈ” ၼၢႆးႁဝ်းၵေႃႈပွႆႇၶႃႈၵႂႃႇယူႇ။
မိူဝ်ႈၶႃႈမီးယူႇတီႈႁူင်းယႃၼႆ သႅင်ၶဵဝ်ၼၼ်ႉၵေႃႈ တေမီးယူႇႁူင်းယႃမိူၼ်ၵၼ်ယဝ်ႉ။
“ၼၢႆးၸွင်ႇႁၼ်မႅၼ်ႈဢူၺ်းၵေႃႉၶႃႈႁိုဝ်!”
ၼၢႆးႁဝ်းၼၼ်ႉၵေႃႈ ထူၺ်ႈၸႂ်လူင်မႃးယဝ်ႉ၊ “ဢၢႆႈဢွၼ်ႇၵေႃႉၼၼ်ႉႁႃႉ မၼ်းပဵၼ်ႁႅင်းဝႆႉလႄႈ မေႃၶဝ်ယင်းတိုၵ်ႉပႂ်ႉတူၺ်းငဝ်းလၢႆးမၼ်းယူႇ”
မိူဝ်ႈငိၼ်းၸိူင်ႉၼၼ် ၶႃႈႁိုဝ်တေၵၼ်ႈၼမ်ႉတႃလႆႈယဝ်ႉလႃႇ ႁွင်ႉႁႆႈဢွၵ်ႇမႃးတေႃႇၼႃႈၼၢႆးႁဝ်းယူႇ၊ သမ်ႉဝႃႈမီးမေႃယႃယၵ်ႉတူၺ်းယူႇၵေႃႈ ၶႃႈၵေႃႈႁိုဝ်တၼ်းသူၼ်ၸႂ်ယဝ်ႉ၊ လွင်ႈဢၼ်သႅင်ၶဵဝ်ထူပ်းလွင်ႈၸိူင်ႉၼႆၼၼ်ႉ မၼ်းပႃးၵွပ်ႈၶႃႈယူႇၽွင်ႈ၊ ပေႃးၶႃႈဢမ်ႇၵႂႃႇသုၵ်ႉယုင်ႈ ယူင်းၵဝ်းတေႃးသဢၢႆႈဢွင်ႇ ဢၢႆႈၼၼ်ႉၵေႃႈ တေဢမ်ႇႁဵတ်းတေႃႇသႅင်ၶဵဝ်ႁၢႆႉႁႅင်းထိုင်တၢၼ်ႇၼႆႉ၊ ယိုင်ႈႁႆႈယိုင်ႈၶႅၼ်းၸဵပ်းမႃး ယိုင်ႈၸဵပ်းယိုင်ႈၶႂ်ႈႁႆႈ ၶၢၼ်ၸႂ်တေႉယဝ်ႉ။
“မႂ်းၸဵပ်းထိုင်တၢၼ်ႇၼၼ်ႉႁႃႉ!” ၼၢႆးႁဝ်းၼၼ်ႉ လၢတ်ႈယဝ်ႉၵေႃႈ ၼမ်ႉတႃယိုင်ႈႁူၺ်ႇတူၵ်းၸွမ်းယူႇ၊ ယိုင်ႈၶႅၼ်းႁဵတ်းႁႂ်ႈၶႃႈၶႂ်ႈႁႆႈမႃးထႅင်ႈ ၸဵပ်းၵေႃႈၸၢင်ႈႁဵတ်းႁိုဝ် ႁႃးၼၢႆးလၢၼ်ၼၼ်ႉၵေႃႈႁႆႈတေႃႇၵၼ်ႁေယဝ်ႉ။
မေႃဢၼ်ယူႇၼႂ်းၵႄႈႁႃးၼၼ်ႉၵေႃႈ ၶတ်းၸႂ်လၢတ်ႈ၊ ၶတ်းၸႂ်ပၼ်ႁႅင်း သမ်ႉပေႃးဢမ်ႇၸၢင်ႈလၢတ်ႈသင်လႆႈ မိုင်ၸိူဝ်ႈၸုၵ်းတူၺ်းယူႇႁဵတ်းၼၼ်ၵူၺ်း။
ထိုင်ဝၢႆးဝၼ်းယဝ်ႉၼႆၵေႃႈ သႂ်လႅင်းလႄႈၼူၼ်းမူဝ် ၶႃၵေႃႈဢွၼ်ၵၼ်မႃးၸႂ်းၶႃႈယူႇ။
“ပဵၼ်ၸိူင်ႉႁိုဝ်မႃးလႃႇ! မိူၼ်သူတေၸဵပ်းႁႅင်းတေႉယဝ်ႉ” သႂ်လႅင်းထၢမ်။
“ဢိုမ်ႈ! ဢမ်ႇၶႂ်ႈတူင်ႉၶႂ်ႈၼိုင်သေဢိတ်းၼၼ်ႉယဝ်ႉ ၶိုၼ်ႈၵႂႃႇတင်းတူဝ်ယဝ်ႉ”
“သူၼႆႉ! ပေႉလႆႈၸႂ်ႁဵတ်းႁႂ်ႈပိူၼ်ႈတူၵ်းၸႂ်ယူႇတႃႇသေႇလႃႇ” ၼူၼ်းမူဝ်တင်းလၢတ်ႈတင်းႁႆႈယူႇ။
“ယႃႇႁႆႈၼႄႁဝ်းထႅင်ႈလႄႈ မိူဝ်ႈၼႆႉႁႆႈတင်းဝၼ်း ႁဝ်းၸဵပ်းတေတၢႆယူႇယဝ်ႉ”
ၼူၼ်းမူဝ်ၼၼ်ႉၵေႃႈၸဵတ်ႉၼမ်ႉတႃမၼ်းသေယဝ်ႉ ၶႃႈၶိုၼ်းထၢမ်ၸူး။
“ႁဝ်းႁဵတ်းႁိုဝ်မႃးမီးယူႇတီႈႁူင်းယႃၼႆႉလႃႇ ႁဝ်းဝူၼ်ႉဝႃႈႁဝ်းတၢႆၵႂႃႇယဝ်ႉၵွၼ်ႇ”
“ၶူးၽိဝ်ၾႃႉဢိူဝ်ႈ!..ဢဝ်သူမႃး သူၼၼ်ႉ သမ်ႉပေႃးပဵၼ်လိူတ်ႈပဵၼ်ယၢင်ၵႂႃႇမူတ်းၼၼ်ႉၼႃႇ” ၼူၼ်းမူဝ်လၢတ်ႈ။
မိူဝ်ႈငိၼ်းဝႃႈၶူးၽိဝ်ၾႃႉၼႆၵေႃႈ မိူၼ်ၶႃႈၼၼ်ႉတေထုၵ်ႇၼီႈၶူးထႅင်ႈလွင်ႈၼိုင်ႈယဝ်ႉ။
“ၶူးႁဵတ်းႁိုဝ်ၵႂႃႇႁၼ်ႁဝ်းလႃႇ!”
သႂ်လႅင်းၼၼ်ႉၵေႃႈ တင်းၼႃႈတႃဢၼ်ဢမ်ႇလီၼၼ်ႉသေ လၢတ်ႈၸူး “မိူဝ်ႈႁဝ်းႁၼ်သူလႅၼ်ႈပၼ်ႇၸွမ်းႁူင်းႁဵၼ်းၼႆၵေႃႈ ႁဝ်းလႆႈလမ်းၸွမ်းသူၼၼ်ႉၼႃႇ၊ ၽိူဝ်ႇလႆႈႁၼ်သူၵႂႃႇၸူးဢၢႆႈဢွင်ႇၼႆၵေႃႈ ႁဝ်းၵေႃႈၼႅတ်ႈၵႂႃႇႁွင်ႉၶူးသေ၊ ၽိူဝ်ႇႁႃးၶူးၵႂႃႇထိုင် ႁၼ်ဢၢႆႈဢွင်ႇၼၼ်ႉငႅၼ်းၶေႃးသူဝႆႉယူႇ၊ မၼ်းႁၼ်ၶူးယဝ်ႉပွႆႇသူပႅတ်ႈႁေ ၼႅတ်ႈလႅၼ်ႈပၢႆႈယဝ်ႉ၊ ႁဝ်းၽိတ်းၵူၺ်း ႁဝ်းဢမ်ႇထုၵ်ႇလီပၼ်ႁႂ်ႈသူ..ယူႇၸွမ်းဢၢႆႈဢွင်ႇၸိူင်ႉၼၼ်”
“သူႁဵတ်းထုၵ်ႇမႅၼ်ႈယဝ်ႉ! ပေႃးဢမ်ႇၼၼ်သူၵေႃႈတေမၢတ်ႇၸဵပ်းႁေ မႃးၼွၼ်းယူႇတီႈႁူင်းယႃမိူၼ်ႁဝ်းၼႆႉယဝ်ႉ ယိၼ်းၸူမ်းယဝ်ႉၼႃႈ ဢၼ်ႁွင်ႉၶူးမႃးၸွႆႈႁဝ်း”
“သႅင်ၶဵဝ်လူးၶဝ်ပဵၼ်ႁိုဝ်မႃးလႃႇ!”
“သႅင်ၶဵဝ်ၶႅၼ်းမၢတ်ႇၸဵပ်းႁႅင်းၼႃႇ မိူဝ်ႈလဵဝ်ၵေႃႈယင်းပႂ်ႉတူၺ်းငဝ်းလၢႆးမၼ်းယူႇ”
ယၢမ်းၼၼ်ႉ ၸုမ်းဢၢႆႈၸၢႆးႁဝ်းၶဝ်ၵေႃႈ ဢွၼ်ၵၼ်ပဵၼ်ၸုမ်းလူင်ၶဝ်ႈမႃးတီႈၶႃႈယူႇၼၼ်ႉယဝ်ႉ။ ၸွမ်ၶိူဝ်းၼၼ်ႉၵေႃႈ ၼင်ႇႁၢင်ႈမႆႈၸႂ်မႆႈၶေႃးၼႃႇသေ
“ဢေးယိင်း! ပဵၼ်ႁိုဝ်မႃးလႃႇၶႅၼ်းမႃးယူႇၸွင်ႇၸႂ်ႈ”
“ဢိုမ်ႈ! ဢွၼ်ၵၼ်မႃးပဵၼ်ၸုမ်းၸိူင်ႉၼႆ ႁူင်းယႃတေဢမ်ႇမီးတီႈယူႇယဝ်ႉဝႃႈ”
“လူင်းႁူင်းႁဵၼ်းယဝ်ႉၵၢၼ်ႉၼႅတ်ႈမႃးဢိူဝ်ႈၼႆႉ” ၸၢႆးသိူဝ်ၵေႃႉလၢတ်ႈ။
“ၼၢႆးႁဝ်းလူးၵႂႃႇလႂ်ယဝ်ႉလႃႇ!” ဢၢႆႈၸၢႆးႁဝ်းထၢမ်။
“မိူဝ်ႈႁႅၼ်းၶူဝ်းမႃးဝႃႇ မေႃဢမ်ႇပႆႇပၼ်ၶႃႈမိူဝ်း” ယဵၼ်ၵႂႃႇၵႅပ်ႉၼိုင်ႈသေ သိုပ်ႇလၢတ်ႈၸူးၶဝ် “ၶႂ်ႈဝႃႈပႆႇမိူဝ်းတီႈႁိူၼ်းၵၼ်သေၵေႃႉၼႆႉၼေႃႈ”
“ႁိုဝ်ပႃႈၸၢင်ႈမိူဝ်းလႃႇ! မႆႈၸႂ်မႂ်းလိူဝ်သေႁိူၼ်းၵွၼ်ႇယဝ်ႉ” လႅင်းမိူင်းလၢတ်ႈ။
“မႃးႁႃလၢတ်ႈၸိူင်ႉၼႆယူႇ! ပေႃးဢမ်ႇလၢၵ်ႈမႃးမၼ်းတင်းဢမ်ႇမႃးၵွၼ်ႇယဝ်ႈ” သၢႆႁိူဝ်ႈလၢတ်ႈၸွမ်းလင်။
“ယႃႇဝႃႈၼၼ်လႄႈ ဢမ်ႇမိူၼ်ၵေႃႉႁႃးၵူၺ်ႉ”
ပေႃးဝႃႈၸုမ်းဢၢႆႈၸၢႆးႁဝ်းၶဝ်မႃးၼႆၵေႃႈ ၼူၼ်းမူဝ်လႄႈသႂ်လႅင်းၼၼ်ႉ ႁိုဝ်ၸၢင်ႈ ၸိမ်ၵႂၢမ်းသင်လႆႈယဝ်ႉလႃႇ၊ သူင်ႇသင်ႇၶႃႈသေ ဢွၼ်ၵၼ်ပွၵ်ႈမိူဝ်းၵႂႃႇယူႇ။ မိူဝ်ႈဢၼ်ၶႃဢွၼ်ၵၼ်ဢွၵ်ႇၵႂႃႇၼၼ်ႉ သၢႆတႃသႅင်ၶိူဝ်းၼၼ်ႉတႄႉ ယင်းတိုၵ်ႉမိူၼ်ႇမိုင်တူၺ်းၸွမ်းလင်ၶႃ တေႃႇပေႃးပူၼ်ႉသၢႆတႃယဝ်ႉ။
ဢၢႆႈၸၢႆးႁဝ်းၶဝ်ၼၼ်ႉၵေႃႈ ယူႇလဵၼ်ႈၵေႃႉၶႃႈ တေႃႇၼၢႆးႁဝ်းပေႃးႁွတ်ႈမႃးယဝ်ႉ ၸင်ႇဢွၼ်ၵၼ်မိူဝ်းၵႂႃႇ။
ၽၢႆႇတၢင်းဢူႈဢၢႆႈဢွင်ႇၶဝ်ၼၼ်ႉ ၵေႃႉၸတ်းၵၢၼ် ၵႃႈၸႂ်ႉၸၢႆႇတင်းသဵင်ႈယဝ်ႉ၊ သမ်ႉဝႃႈယူႇႁိုင်တၢၼ်ႇႁိုဝ်ၵေႃႈ လွင်ႈၵႃႈၸႂ်ႉၸၢႆႇတႄႉဢမ်ႇလႆႈမႆႈၸႂ်ၵႃႈႁိုဝ်၊ ပေႃးတူၺ်းလွင်ႈယူႇလွင်ႈၵိၼ်တႄႉ ၶႃႈၶႂ်ႈမိူဝ်းႁိူၼ်းၼႃႇယဝ်ႉ၊ ပေႃးတူၺ်းၼႃႈမေႃယႃလဝ်းလဝ်းၼၼ်ႉသမ်ႉ ၶႃႈပေႉမႃးၶႂ်ႈယူႇႁိုင်ဝႃႈႁိုင်၊ လႆႈႁၼ်ၼႃႈၸမ်ၸမ်ၵူႈၸဝ်ႉၼႂ်ဝၼ်းၶမ်ႈ။ ၶႃႈၵေႃႈ လိုဝ်ႈယူႇတီႈႁူင်းယႃၼႆႉ မီးၵႂႃႇသၢမ်ဝၼ်းယဝ်ႉ။ ဝၼ်းယဝ်ႉဝၼ်း ပေႃးဢမ်ႇၸၢင်ႈႁဵတ်းသင်ၼႆ တေၵၢၼ်ႉၵူၵ်ႉၵၢၼ်ႉၵၢၵ်ႉသေ ၵႂႃႇတူၺ်းသႅင်ၶဵဝ် ဢၼ်ၼွၼ်းၼိမ်ယူႇၼၼ်ႉတႃႇသေႇ လဵၼ်ႈၵေႃႉမႄႈၶဝ် ဢၼ်ပႂ်ႉမၼ်းဝႆႉယူႇ ၼၼ်ႉယဝ်ႉ။ မိူဝ်ႈၼႆႉၵေႃႈမေႃယႃလဝ်းၵေႃႉၼၼ်ႉ မႃးၸုၵ်းႁိမ်းၶႃႈသေယဝ်ႉ
“မိူၼ်ဝႃႈၽၢင်ႁၢင်ႈတၢင်းပဵၼ်ၶဝ် လီမႃးတေႉယဝ်ႉၶႃႈ တေပဵၼ်ယွၼ်ႉမီးဢူၺ်းၵေႃႉၶဝ် မႃးပၼ်ႁႅင်းယူႇတႃႇသေႇၼၼ်ႉယဝ်ႉ ဢမ်ႇႁိုင်ၵေႃႈ ၶဝ်တေတိုၼ်ႇမႃးယဝ်ႉ”
လႄႈယၢမ်းၼၼ်ႉ မိုဝ်းၶဝ်ၵေႃႈတူင်ႉမႃးသေ မိုၼ်းတႃမႃးလွႆးလွႆးတေႃႇၼႃႈၶႃႈၼၼ်ႉလီလီ၊ ၵေႃႉပဵၼ်မႄႈၶဝ် လႆႈႁၼ်ၸိူင်ႉၼၼ်ၵေႃႈ ၸူမ်းၸူမ်း ၼမ်ႉတႃပေႃးဢွၵ်ႇယဝ်ႉ။ ၶႃႈၵေႃႈႁိုဝ်လွတ်ႈလႃႇ ႁႆႈဢွၵ်ႇမႃးမိူၼ်ၵၼ်။ မိူဝ်ႈပဵၼ်ၸိူင်ႉၼၼ် မေႃၵေႃႈ ႁႂ်ႈမၼ်းတူင်ႉၶႅၼ် တူင်ႉတူဝ်တူၺ်းယူႇ ၵူၺ်းၵႃႈမိူၼ်ဝႃႈၶႃၶွၼ်သၢႆႉမၼ်းၼၼ်ႉ ယုၵ်ႉဢမ်ႇလႆႈသေဢိတ်း။ မိူဝ်ႈၶႃႈႁူႉၸိူင်ႉၼၼ်ၵေႃႈ ၸႂ်ၼႆႉတႄႉ ႁိုဝ်တေလီလႆႈယဝ်ႉလႃႇ ၶႃႈၵေႃႈႁိုဝ်တေမီးႁႅင်းယဝ်ႉ ၼင်ႈလူမ်ႉလူင်းၼိူဝ်ပိုၼ်ႉၼၼ်ႉသေ ႁွင်ႉႁႆႈၵႂႃႇၵူၺ်းလေႃႇ၊ ၶိုၼ်ႈႁူင်းယႃပွၵ်ႈၼႆႉ ၼမ်ႉတႃၶႃႈၼၼ်ႉ ဢမ်ႇမီးၵႃႈၶၼ်သေဢိတ်းယဝ်ႉ။
ယၢမ်းၼၼ်ႉဢူႈဢၢႆႈဢွင်ႇၶဝ်ၵေႃႈႁွတ်ႈမႃးသေ မႄႈသႅင်ၶဵဝ် ဢၼ်ႁၼ်မၼ်းၼၼ်ႉၵေႃႈ ဢမ်ႇသူၼ်ဝႃႈပဵၼ်ၽႂ်ယဝ်ႉ လႃႇလႃႇပွင်ႉပွင်ႉသႂ်ႇ၊ ႁွင်ႉႁွင်ႉႁႆႈႁႆႈ ယွၼ်းၶႃလုၵ်ႈၸၢႆးမၼ်းၶိုၼ်းၼႆယူႇ။ လုင်းၼၼ်ႉၵေႃႈ ဢမ်ႇၸၢင်ႈႁဵတ်းႁိုဝ် ပေႃးမႄႈသႅင်ၶဵဝ်ပွင်ႉၼိုင်ႈၶေႃႈၵေႃႈ ယွမ်းၼွမ်းၸွမ်းၵူႈၶေႃႈၵူႈၵမ်းၵႂႃႇၵူၺ်း။
တွၼ်ႈသၢမ်သိပ်းသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢမ်သိပ်းဢဵတ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
