တွၼ်ႈသီႇသိပ်းသီႇ
ၼႂ်းလၢၼ်ႉဢၼ်ၵူၼ်းပေႃးတဵမ်လူင်ၵႂႃႇမူတ်းၼၼ်ႉ တွၼ်ႈတႃႇသႅင်ၶမ်းၶႃၼၼ်ႉတႄႉ ၼင်ႇႁၢင်ႈဢမ်ႇလႅပ်ႈမီးၽႂ်ဝႆႉယဝ်ႉ၊ သဵင်သမ်ႉပေႃးယဵၼ်သီႇသီႇ ယၵ်ႉတူၺ်းၼႃႈၵၼ်ယူႇႁဵတ်းၼၼ်၊ ၵေႃႉၼိုင်ႈၵေႃႈ မိူၼ်မွင်းၶေႃႈတွပ်ႇယူႇ ထႅင်ႈၵေႃႉၼိုင်ႈသမ်ႉ ဢမ်ႇႁူႉတေတွပ်ႇၸိူင်ႉႁိုဝ်ယဝ်ႉ။ သဵင်ၼၼ်ႉၵေႃႈ တဵတ်ႇယဵၼ်ႁၢႆၵႂႃႇႁိုင်ယူႇတၢၼ်ႇတၢၼ်ႇ၊ သႅင်ၶမ်းၸင်ႇလၢတ်ႈၸူးၶိုၼ်း
“ၵိၼ်ဢိမ်ႇယဝ်ႉၵေႃႈ ပွၵ်ႈမိူဝ်းၵၼ်ယဝ်ႉၼႄႇ” ႁဵတ်းၼင်ႇဢမ်ႇလႆႈငိၼ်းၵႂႃႇယဝ်ႉ။
မိူၼ်သီၼႃႈၽိူဝ်ၶမ်းၼၼ်ႉ ဢမ်ႇပေႃးလီၵႃႈႁိုဝ်သေ တွပ်ႇပွတ်းပွတ်းၵႂႃႇ “ဢိုမ်ႈ!”
သႅင်ၶမ်းၵေႃႈလုၵ်ႉၵႂႃႇၸၢႆႇၵႃႈမၼ်းသေယဝ်ႉ ၽိူဝ်ၶမ်းၼၼ်ႉတႄႉၵေႃႈ ပွၵ်ႈမိူဝ်းၵႂႃႇပႅတ်ႈဝႆးဝႆးယူႇ။
သႅင်ၶမ်းဢွၵ်ႇလၢၼ်ႉမႃး သမ်ႉပေႃးဢမ်ႇတၼ်းႁၼ်လင်ၽိူဝ်ၶမ်းၼၼ်ႉသေဢိတ်း၊ မိူဝ်ႈပဵၼ်ၸိူင်ႉၼၼ် မိူၼ်ၼႂ်းၸႂ်ၼႂ်းၶေႃးၵေႃႈ ဢမ်ႇပေႃးၵတ်းယဵၼ်မိူၼ်ၵၼ်လႄႈ လၢတ်ႈယူႇၼႂ်းၸႂ်ႁင်းၵူၺ်း
“ႁဵတ်းထုၵ်ႇမႅၼ်ႈယဝ်ႉၸွင်ႇၸႂ်ႈႁိုဝ်.. လွင်ႈႁဵတ်းသၢင်ႈႁဝ်းၼၼ်ႉ ပၼ်ၶေႃႈတွပ်ႇၶဝ်လႆႈယူႇၸွင်ႇၸႂ်ႈ” ထူၺ်ႈၸႂ်လူင်မႃးသေ “မိူဝ်ႈလႂ်မိူဝ်ႈတႅပ်းတတ်းယဝ်ႉ ဢမ်ႇမီးဝၼ်းတိူဝ်ႉၸႂ်ယူႇယဝ်ႉ မႂ်းႁဵတ်းလီယဝ်ႉ ဢေးယိင်း၊ မႂ်းႁဵတ်းထုၵ်ႇမႅၼ်ႈယဝ်ႉၼႃႈဢေးယိင်း..”
ၽိူဝ်ၶမ်းၼၼ်ႉၵေႃႈ သမ်ႉဝႃႈသႅင်ၶမ်းဢမ်ႇလၢတ်ႈသင်သေတႃႉ မိူဝ်ႈႁၼ်လွင်ႈႁဵတ်းသၢင်ႈၶဝ်ၼၼ်ႉ မၼ်းၵေႃႈပွင်ႇၸႂ်ယဝ်ႉ၊ လႆႈၶေႃႈတွပ်ႇယဝ်ႉ ၼႂ်းၸႂ်ၼႂ်းၶေႃးၵေႃႈ သမ်ႉပေႃးဢမ်ႇလီမႃးၵမ်းလဵဝ်ယူႇ၊ တႃႇတေႁူပ်ႉတေႃႇၼႃႈၶဝ်ႁိုဝ် တေသိုပ်ႇယုမ်ႉယူႇပႃႈၼႃႈၶဝ်ၼၼ်ႉၵေႃႈ ႁိုဝ်တေႁတ်းယဝ်ႉလႃႇ၊ ၶႂ်ႈပၢႆႈၽၢတ်ႇယၢၼ်ၵႂႃႇ ၶႂ်ႈလိုမ်းၶဝ်ၵႂႃႇ..ဢမ်ႇၶႂ်ႈႁူပ်ႉႁၼ်ထႅင်ႈ ၵွပ်ႈဝႃႈ ယိုင်ႈႁၼ်ယိုင်ႈႁၢမ်ႈၸႂ် ဢမ်ႇႁႂ်ႈႁၵ်ႉၶဝ်ဢမ်ႇလႆႈၼၼ်ႉယဝ်ႉ။
ၼႂ်းၶမ်ႈၶိုၼ်းလပ်းသိင်ႇ တီႈၼႂ်းလၢၼ်ႉလဝ်ႈၼၼ်ႉ ၽိူဝ်ၶမ်းၼၼ်ႉၵေႃႈ ၼင်ႈႁေၵိၼ်လဝ်ႈၵွၵ်းယဝ်ႉၵွၵ်း ဢိုၵ်ႉၵိၼ်ၵမ်းယဝ်ႉၵမ်း ပေႃးဢမ်ႇၶၢတ်ႇ၊ ၸွမ်ၶိူဝ်းသမ်ႉပေႃးလႆႈႁၢမ်ႈမၼ်းဝႆႉယဝ်ႉ။
“မႂ်းပဵၼ်ႁင်လႃႇ…ၵိၼ်လဝ်ႈပေႃးတၢၼ်ႇၼႆႉ”
“ၶဝ်..ဢမ်ႇလႆႈမီးၸႂ်တေႃႇၵဝ်သေဢိတ်းၼၼ်ႉယဝ်ႉ”
“ႁူႉလႆႈၸိူင်ႉႁိုဝ်လႃႇဝႃႈၶဝ်ဢမ်ႇမီးၸႂ်.. ႁူႉၸၵ်းၶဝ်လီၵႃႈႁိုဝ်ယဝ်ႉလႃႇ ဢမ်ႇၸႂ်ႈဝႃႈဝူၼ်ႉဢဝ်ၵူၺ်းႁႃႉ..”
“မိူၼ်ၵူႈလွင်ႈမၼ်းတေၵႂႃႇလႆႈလီ ဢုပ်ႇၵႂၢမ်းၶဝ်ႈၵၼ်လီ၊ ႁူပ်ႉႁၼ်ၼႃႈၵၼ် ယုမ်ႉယၢႆႈၸူးၵၼ်၊ ၼင်ႇမိုတ်ႈၵၼ်ၸမ်ၸႂ်ၵၼ် မိူဝ်ႈလၢတ်ႈဝႃႈလႆႈၸႂ်ၶဝ်ၶေႃႈၼၼ်ႉၵူၺ်း သမ်ႉဝိၼ်ႇဝၢႆႇလၢႆႈၵႂၢမ်းပႅတ်ႈ မၼ်းၼႄၸႅင်ႈလႅင်းယူႇယဝ်ႉဢမ်ႇၸႂ်ႈႁိုဝ်လႃႇ ဝႃႈၶဝ်ဢမ်ႇလႆႈမီးၸႂ်သင်သေဢိတ်း”
“မိုတ်ႈၵၼ်တင်းၶဝ်မႃးႁိုင်ၵႃႈႁိုဝ်ယဝ်ႉလႃႇ.. ထိုင်တီႈပေႃးတႅပ်းတတ်းဝႃႈၶဝ်ၼၼ်ႉဢမ်ႇလႆႈမီးၸႂ်သင် ၶဝ်လၢတ်ႈဢွၵ်ႇမႃးယူႇႁႃႉဝႃႈဢမ်ႇလႆႈၸႂ်ၼႆ ဢမ်ႇၵျိူၵ်ႈမႂ်းၼႆ မၢင်ၽဝ်ႇၶဝ်ပႆႇၵိုင်ႉၵၢင်ႉတႅပ်းတတ်းလႆႈၵေႃႈပဵၼ်လႆႈ၊ ပေႃးၶဝ်ဢမ်ႇလႆႈၸႂ်တေႉတေႉ ၶဝ်ၵေႃႈတေလၢတ်ႈသိုဝ်ႈသိုဝ်ႈယဝ်ႉဢမ်ႇၸႂ်ႈႁႃႉ”
“သမ်ႉဝႃႈၶဝ်ဢမ်ႇလႆႈလၢတ်ႈသင်ၵေႃႈ သီၼႃႈလႄႈလွင်ႈႁဵတ်းသၢင်ႈၶဝ်ၼၼ်ႉ မၼ်းၸႅင်ႈလႅင်းယူႇယဝ်ႉလူး” ဢိုၵ်ႉၵိၼ်လဝ်ႈမၼ်းၵႂႃႇထႅင်ႈယဝ်ႉ သမ်ႉပေႃးၼင်ႈႁႆႈဢွၵ်ႇမႃးတေႃႇၼႃႈ ၸွမ်ၶိူဝ်းယူႇ။
“တူၺ်းမိူၼ်မႂ်းတေသူၼ်ၸႂ်ၶဝ်တေႉတေႉၼၼ်ႉယဝ်ႉ.. ဢမ်ႇတွၼ်ႉႁၼ်ၽူႈၸၢႆးၸိူင်ႉၼင်ႇ ၽိူဝ်ၶမ်း သုမ်းၼမ်ႉတႃယွၼ်ႉၽူႈယိင်းႁႂ်ႈမိူၼ်ၼႆ ႁေပွၵ်ႈ”
“ၵဝ်ၸႂ်ထိုင်ၶဝ်တေႉယဝ်ႉ..တေလႆႈႁဵတ်းႁိုဝ်လႃႇ ၵဝ်ၸႂ်ထိုင်ၶဝ်တေႉဢိူဝ်ႈ..”
ၸွမ်ၶိူဝ်းၼၼ်ႉၵေႃႈ ထူၺ်ႈၸႂ်လူင်ၸူးမၼ်းၵႂႃႇ ၼိမ်ယဵၼ်ၵႅပ်ႉၼိုင်ႈယဝ်ႉ တွႆႇႁူဝ်မႃႇၽိူဝ်ၶမ်းသေ။
“ၸႂ်ထိုင်ၵေႃႈ ၵႂႃႇႁႃၶဝ်လႄႈ ႁၵ်ႉၵေႃႈလၢတ်ႈႁၵ်ႉလႄႈ ယွၼ်ႉၶဝ်ဢမ်ႇလႆႈႁၵ်ႉမႂ်းၼၼ်ႉ ဢမ်ႇၸႂ်ႈဝႃႈတေတႅပ်းတတ်းပၼ် ႁႂ်ႈမႂ်းႁၵ်ႉၶဝ်ႁိုဝ်ဢမ်ႇႁၵ်ႉ၊ သမ်ႉဝႃႈတေႁႄႉႁၢမ်ႈတၢၼ်ႇလႂ်ၵေႃႈ ႁူဝ်ၸႂ်ၼၼ်ႉမၼ်းႁၢမ်ႈဢမ်ႇလႆႈ၊ သမ်ႉဝႃႈၶဝ်ဢမ်ႇႁၵ်ႉၵေႃႈ မႂ်းမီးသုၼ်ႇႁၵ်ႉၶဝ်လႆႈယူႇဢိူဝ်ႈ ယွၼ်ႉပဵၼ်ႁူဝ်ၸႂ်မႂ်းၵူၺ်းလူး ဢမ်ႇၸႂ်ႈဢဝ်ႁူဝ်ၸႂ်ၶဝ်မႃးသေ ၸင်ႇတေဝႃႈပဵၼ်ႁၵ်ႉၼႆ”
ၸွမ်ၶိူဝ်းၵေႃႈ ဢွၵ်ႉၸွမ်းမၼ်းၵႂႃႇသေၵွၵ်းၼိုင်ႈ သိုပ်ႇလၢတ်ႈထႅင်ႈ
“ၵဝ်ၵေႃႈ မီးၽူႈယိင်းၵေႃႉၼိုင်ႈ ႁၵ်ႉမၼ်းမႃးႁိုင်ၼႃႇယဝ်ႉ လႆႈပဵၼ်သိပ်းပီႊၼႆႉယဝ်ႉဝႃႈ၊ ၵဝ်ယၢမ်ႈလၢတ်ႈႁၵ်ႉတေႃႇမၼ်းလၢႆပွၵ်ႈယဝ်ႉ လၢတ်ႈမိူဝ်ႈလႂ်ၵေႃႈ ထုၵ်ႇထဵင်ၶိုၼ်းယူႇတႃႇသေႇ၊ ပေႃးပဵၼ်တၢင်ႇၵေႃႉတႄႉတေဝႃႈ ၵူၼ်းငိူဝ်ႈၵူၺ်းဢိူဝ်ႈ၊ ၵူၺ်းၵႃႈ တၢင်းႁၵ်ႉမၼ်းၵေႃႈႁၢမ်ႈဢမ်ႇလႆႈလူး သမ်ႉဝႃႈတေပဵၼ်ၵူၼ်းငိူဝ်ႈၵေႃႈ ငိူဝ်ႈယွၼ်ႉႁၵ်ႉၵူၼ်းၸိူင်ႉၼင်ႇမၼ်းၼၼ်ႉ ၵဝ်ၵေႃႈႁၢၼ်ႉၸႂ်ယူႇ၊ သမ်ႉဝႃႈထုၵ်ႇထဵင်ၶိုၼ်းလၢႆပွၵ်ႈၵေႃႈ ဢမ်ႇပဵၼ်သင်ၼႃ ၵဝ်ၵေႃႈယင်းတိုၵ်ႉမီးတၢင်းမုင်ႈမွင်းယူႇ မိူဝ်ႈလႂ်မၼ်းယင်းတိုၵ်ႉလွတ်ႈလႅဝ်းယူႇၼၼ်ႉ”
“ၵူၼ်းၸိူင်ႉၼင်ႇၵေႃႉႁႃးၼႆႉ မေႃႁၵ်ႉမၼ်ႈၵိုမ်းယိုၼ်းယၢဝ်းႁေၵႃႈ ဢမ်ႇဝူၼ်ႉၺႃးသေဢိတ်း..”
“သမ်ႉဝႃႈၼႂ်းၸၢတ်ႈပၢၼ်ၼႆႉ တေမီးၽူႈယိင်းတင်းၼမ်ၶဝ်ႈမႃးၵေႃႈ တိုၼ်းမီးယူႇၵူၼ်းၵေႃႉၼိုင်ႈ ဢၼ်ႁၵ်ႉယဝ်ႉလိုမ်းဢမ်ႇလႆႈသေပွၵ်ႈၼႆၼႃႇ”
“ၶဝ်ဢမ်ႇလႆႈမီးၸႂ်၊ ဢမ်ႇလႆႈသူၼ်ၸႂ်ယဝ်ႉ ပဵၼ်သင်လႄႈ ယင်းတိုၵ်ႉတေၵႂႃႇသူၼ်ၸႂ်ၶဝ်ယူႇလႃႇ၊ ဢမ်ႇၼၼ်ၵေႃႈ ၶဝ်တေၸၢင်ႈမီး ၵူၼ်းၵေႃႉဢၼ်ၶဝ်ႁၵ်ႉယူႇယဝ်ႉၵေႃႈပဵၼ်လႆႈ၊ ပေႃးပဵၼ်ၸိူင်ႉၼၼ် သမ်ႉတေၶတ်းၸႂ်ပွင်ႇလွင်ႈသင်လႃႇ၊ လိုၼ်းသုတ်းမႃးၵေႃႈ တေပဵၼ်ၽၢႆႇၸဵပ်းၵႂႃႇထႅင်ႈၵူၺ်း”
“မိူဝ်ႈလႂ်ဢမ်ႇၼႄႉဢမ်ႇၼွၼ်းၼၼ်ႉ ယႃႇၽွမ်ႈတႅပ်းတတ်းလႄႈ မိူဝ်ႈလႂ်ၶဝ်ပႆႇလၢတ်ႈဢွၵ်ႇသူပ်းၼၼ်ႉ ယႃႇၽွမ်ႈဝူၼ်ႉဢဝ်ႁင်းၵူၺ်း၊ သမ်ႉဝႃႈ ၶဝ်တေဢမ်ႇလႆႈသူၼ်ၸႂ်သေတႃႉ ႁဵတ်းႁႂ်ႈၶဝ်မႃးသူၼ်ၸႂ်ၵေႃႈလႆႈယူႇလူး၊ ၵူႈလွင်ႈမၼ်းဢမ်ႇမီးသင်ဢၼ်မၼ်ႈၵိုမ်း ၸႂ်ၵူၼ်းႁဝ်းၼၼ်ႉ ယိုင်ႈၶႅၼ်းဢမ်ႇမၼ်ႈၵိုမ်းယဝ်ႉ ပေႃးႁၵ်ႉၵေႃႈယႃႇယွမ်းသုမ်းလႄႈ၊ ပေႃးမၼ်းၵိုင်ႇတၢင်းတႃႇတေသိုပ်ႇႁၵ်ႉယူႇၼၼ်ႉ တိုဝ်ႉတၢင်းဢွၼ်ႇဢိတ်ႉၼိုင်ႈၵူၺ်းၵေႃႈ ယႃႇပၼ်လုတ်ႈမိုဝ်းလႃႈ၊ ဢမ်ႇႁဵတ်းသင်ႁေသေလၢႆၼၼ်ႉ ၵဝ်ဝႃႈမၼ်းဢမ်ႇၵိုင်ႇထိူၵ်ႈတႃႇတေလၢတ်ႈ ၶေႃႈၵႂၢမ်းဝႃႈ သေလၢႆလေႃႇၼႃႈ”
လၢတ်ႈယဝ်ႉၵေႃႈလုၵ်ႉၵႂႃႇပႅတ်ႈ ၽိူဝ်ၶမ်း ပၼ်ႁႂ်ႈမၼ်းၼင်ႈဝူၼ်ႉၵႂႃႇႁင်းၵူၺ်း ယူႇယဝ်ႉ။
ၶမ်ႈၶိုၼ်းလိုၵ်းယဵၼ် သႅင်ၶမ်းၼၼ်ႉၵေႃႈၵၢၼ်ႉဝႃႈ ၶတ်းၸႂ်ၼွၼ်းၸဵမ်ၸဝ်ႉၸဵမ်ၸဵဝ်းၼႆယူႇ၊ ၵူၺ်းၵႃႈ ၼွၼ်းႁဵတ်းႁိုဝ်ၵေႃႈဢမ်ႇလပ်း ၸႂ်ၸပ်းၵုမ်ႇဝူၼ်ႉထိုင်ၶိုၼ်း လွင်ႈဢၼ်မၼ်းႁဵတ်းသၢင်ႈတေႃႇ ၽိူဝ်ၶမ်းၼၼ်ႉယူႇတိၵ်းတိၵ်း၊ ၼင်ႇဢမ်ႇႁူႉဝႃႈတေလႆႈႁဵတ်းၸိူင်ႉႁိုဝ်ၼၼ်ႉယဝ်ႉ။ ဝူၼ်ႉဢၢၼ်းတေသိုပ်ႇၽူင်းႁႃဢူၺ်းၵေႃႉမၼ်းၼႆယူႇ၊ ယၵ်ႉတူၺ်းၼႃႈၽူင်းသေ ဢူၺ်းၵေႃႉဢၼ်မၼ်းမိုတ်ႈၸိူဝ်းၼၼ်ႉၵေႃႈ သမ်ႉပေႃးဢမ်ႇလႆႈႁၼ်ၶိုၼ်ႈလႅင်းဝႆႉႁေၵေႃႉ။ တူၺ်းၵႂႃႇတူၺ်းမႃး ႁၼ်ၶမ်းၽွင်ၼႆၵေႃႈ ၼႅတ်ႈသိုပ်ႇၽူင်းၸူးၵမ်းလဵဝ်။
“သိုပ်ႇၽူင်းမႃးၶၢဝ်းၼႆႉယဝ်ႉ မီးလွင်ႈသင်လႃႇ!!..”
“ၼွၼ်းယဝ်ႉႁႃႉ! ႁဝ်းၼွၼ်းဢမ်ႇလပ်း..”
“ပေႃးၼွၼ်းယဝ်ႉတေတၼ်းႁပ်ႉၾူင်းသူယူႇႁႃႉ ထၢမ်လႆႈ”
“ဢူႈဢၢႆႈၸၢႆးၶဝ်ယူႇႁိူၼ်းယူႇၵႂႃႈ..”
“ဢမ်ႇယူႇ..ႁဝ်းၸင်ႇမီးၶၢဝ်းယၢမ်းမႃးတႅမ်ႈလိၵ်ႈယူႇဢိူဝ်ႈၼႆႉ”
“လီယဝ်ႉ ႁဝ်းယွၼ်းသုၵ်ႉယုင်ႈၶၢဝ်းယၢမ်းသူဢိတ်ႉလႄႈပေႃးၼႆ”
“မီးလွင်ႈသင်လႃႇ… မိူဝ်ႈၼႆႉသူပေႉလၢၵ်ႇလၢႆးၸိူင်ႉႁိုဝ်ဝႆႉဢမ်ႇႁူႉယဝ်ႉ”
“ႁဝ်းၶမ်ၸႂ်..ဢမ်ႇႁူႉဝႃႈတေလႆႈလၢတ်ႈၼႄၽႂ်ယဝ်ႉ ၶမ်ၸႂ်တေႉဢိူဝ်ႈ တေႁဵတ်းႁိုဝ်လၢတ်ႈၵေႃႈ လၢတ်ႈပေႃးဢမ်ႇဢွၵ်ႇယဝ်ႉ”
“မီးလွင်ႈသင်ထိုင်တီႈႁဵတ်းႁႂ်ႈဢေးယိင်း ၼွၼ်းပေႃးဢမ်ႇလပ်း ၶမ်ၸႂ်ထိုင်တီႈပေႃးလႆႈမႃးဢုပ်ႇၵုမ်ႁဝ်းၸိူင်ႉၼႆလႃႇ.. လၢတ်ႈမႃးလႄႈ ႁဝ်းတေဝူၼ်ႉၸွႆႈ ယိုင်ႈၵဵပ်းဝႆႉၵေႃႈလဵဝ် ယိုင်ႈၶမ်ၸႂ်ထႅင်ႈၼၼ်ႉယဝ်ႉ”
“မိူဝ်ႈၼႆႉ..မီးၵူၼ်းမႃးလၢတ်ႈဝႃႈ လႆႈၸႂ်ႁဝ်းၼႆဝႃႇ!!.. ဢမ်ႇႁူႉတေလႆႈႁဵတ်းႁိုဝ်ယဝ်ႉ”
“ႁႃးႁႃး…ႁႃး… ဢေးယိင်းၵေႃႈ မီးၵူၼ်းမႃးလၢတ်ႈၵႂၢမ်းႁၵ်ႉၸူးႁေႁႃႉၼႆႉ”
“မၼ်းလီၶႂ်ႈၶူဝ်တီႈလႂ်လႃႇ.. ဢမ်ႇႁူႉဝႃႈႁဝ်းတေႁဵတ်းႁိုဝ်တီႈမၼ်းယဝ်ႉ. ႁဝ်းတေႁဵတ်းႁိုဝ်ထဵင်ၶိုၼ်းလႃႇ ၶဝ်လီတေႃႇႁဝ်းၼႃႇ၊ ႁဝ်းဝူၼ်ႉဝႃႈ လွင်ႈဢၼ်ၶဝ်ႁဵတ်းလီတေႃႇႁဝ်း ဢုပ်ႇတေႃႇႁဝ်းၼၼ်ႉ တေႁဵတ်းႁႂ်ႈႁဝ်းပဵၼ်ဢူၺ်းၵေႃႉၵၼ်ၵႂႃႇလႆႈယူႇ၊ ၵူၺ်းၵႃႈ သင်ႁဝ်းထဵင်ၵႂႃႇ တႃႇႁူပ်ႉတေႃႇၼႃႈၵၼ်ထႅင်ႈၼၼ်ႉ လႅပ်ႈတေယၢပ်ႇဝႆႉယူႇ၊ ႁဝ်းဢမ်ႇၶႂ်ႈသုမ်းၵူၼ်းလီၸိူင်ႉၼင်ႇၶဝ်ၵႂႃႇ လႄႈ တေႁႂ်ႈႁဝ်းပဵၼ်ၵေႃႉႁၵ်ႉၶဝ်ၵေႃႈ ႁဝ်းၵေႃႈယင်းပႆႇၶႂ်ႈမီးၼၼ်ႉၼႃႇ သူၵေႃႈႁူႉယူႇလူးႁဝ်းယွင်ႇၵၢၼ်တၢၼ်ႇႁိုဝ်၊ ဢမ်ႇမီးၶၢဝ်းယၢမ်းတႃႇတေ ပၼ်ၶၢဝ်းယၢမ်းမၼ်းလႆႈၼႆ”
“ၶဝ်ပဵၼ်ၵူၼ်းၸိူင်ႉႁိုဝ်ဝႆႉလႃႇတႃႉၶႂ်ႈႁူႉယဝ်ႉ.. ထိုင်တီႈပေႃးဢဝ်ဢေးယိင်းႁဝ်း ၶမ်ၸႂ်လႆႈတၢၼ်ႇၼႆႉၼႆႉ ၶႂ်ႈဝႃႈဢမ်ႇၸႂ်ႈၵူၼ်းယူဝ်းယူဝ်းယဝ်ႉ”
“ပဵၼ်သင်လႃႇ..”
“ၵေႃႈ..ဢိူဝ်ႈ.. သူသူၼ်ၸႂ်ၶဝ်ဝႆႉယူႇၼၼ်ႉၼႃႇ”
“ဢမ်ႇၸႂ်ႈလေႃႇ.. ႁဝ်းတေသူၼ်ၸႂ်ၶဝ်လႆႈၸိူင်ႉႁိုဝ် ဢမ်ႇပဵၼ်လႆႈႁဝ်းဝႃႇတႄႉ တႄႇၸဵမ်မိူဝ်ႈႁၼ်ၶဝ် ႁဝ်းၵေႃႈဝႆႉၸႂ်ဝႃႈ တေဢမ်ႇဢၢၼ်းသူၼ်ၸႂ်ယူႇယဝ်ႉလူး”
“ပဵၼ်သင်လႄႈဢမ်ႇၶႂ်ႈသူၼ်ၸႂ်လႃႇ… ဢႃႇယုၵေႃႈမွၵ်ႈၼႆႉယဝ်ႉ ယင်းတိုၵ်ႉပႆႇၶႂ်ႈမီးၸူႉမီးၸူဝ်းယူႇႁႃႉ”
“ဢိုမ်ႈ!..ႁဝ်းယင်းပႆႇၽွမ်ႉ ႁဝ်းယင်းတိုၵ်ႉၶႂ်ႈပဵၼ်လုၵ်ႈဢွၼ်ႇယူႇၼႃႇသူၵေႃႈ”
“ပေႃးဢမ်ႇပႆႇတႄႇႁဵတ်းၵႂႃႇ တေႁဵတ်းႁိုဝ်ပႃႈၽွမ်ႉလႆႈလႃႇ.. ႁဝ်းဝႃႈဝၢႆးသေၼႆႉယဝ်ႉ သူၵေႃႈတေလႅၵ်ႈလၢႆႈမႃးယူႇၵူၺ်းၼႃ”
“ယိုင်ႈလၢတ်ႈတေႃႇသူ ႁဝ်းယိုင်ႈၶႅၼ်းဢမ်ႇလႆႈၶေႃႈတွပ်ႇႁင်မႃးၼၼ်ႉယဝ်ႉ”
“သူပေႃးမီးၶေႃႈတွပ်ႇဝႆႉယူႇၼႂ်းၸႂ်ယဝ်ႉ သူမႃးထၢမ်ႁဝ်းၵေႃႈ တႃႇႁႂ်ႈမၼ်ႈၸႂ်ၼိူဝ်ၶေႃႈတွပ်ႇ ဢၼ်သူတေတွပ်ႇၼၼ်ႉၵူၺ်းဢမ်ႇၸႂ်ႈႁိုဝ် ဢမ်ႇဝႃႈသူတေတွပ်ႇၸိူင်ႉႁိုဝ် မၼ်းၵေႃႈလႅၼ်သဵင်ႁူဝ်ၸႂ်သူဢမ်ႇလႆႈလေႃႇၼႃႈ”
“ႁဝ်းၼွၼ်းယဝ်ႉ…ၾၼ်လီၼႃႈ”
“ၾၼ်လီ..ယႃႇဝူၼ်ႉၼမ်ထိုင်တီႈၼွၼ်းဢမ်ႇလပ်းၼင်ႇၵဝ်ႇ” ဢမ်ႇပၼ်ႁႂ်ႈသႅင်ၶမ်းတွပ်ႇ ၶမ်းၽွင်ၵေႃႈ ဝၢင်းၽူင်းၵႂႃႇပႅတ်ႈယူႇယဝ်ႉ။
သႅင်ၶမ်းၼၼ်ႉၵေႃႈ ယၵ်ႉတူၺ်းၶေႃႈၵႂၢမ်းလိုၼ်းသုတ်းဢၼ်သူင်ႇပၼ်ၵၼ်သေ ဢၢၼ်းတႅမ်ႈတွပ်ႇၶိုၼ်း လွင်ႈမိူဝ်ႈႁူဝ်ၶမ်ႈၼၼ်ႉသေယဝ်ႉ။ မိူဝ်ႈဢၼ်တႅမ်ႈၵႂႃႇ ၼင်ႇဢၼ်ၵၢင်ၸႂ်မၼ်းၶႂ်ႈလၢတ်ႈၼႄ လွင်ႈတၢင်းဢၼ်မၼ်းၶႂ်ႈလၢတ်ႈတင်းမူတ်းၼၼ်ႉ ၸင်ႇၶိုၼ်း ဝူၼ်ႉထိုင်လွင်ႈႁဵတ်းသၢင်ႈၽိူဝ်ၶမ်း ဢၼ်ႁိပ်ႈၼႅတ်ႈဢွၵ်ႇလၢၼ်ႉပႅတ်ႈၼၼ်ႉ မိူၼ်ၶဝ်တေတိူဝ်ႉၸႂ်ဝႆႉယူႇၼႆလႄႈ မၼ်းၵေႃႈလႆႈၶိုၼ်းမွတ်ႇၵႂႃႇယူႇ။
“လွင်ႈႁဵတ်းသၢင်ႈၵူၺ်း ႁဵတ်းႁႂ်ႈၶဝ်တိူဝ်ႉၸႂ်ထိုင်တၢၼ်ႇၼၼ်ႉ ပေႃးလေႃးပႃးၶေႃႈၵႂၢမ်းထႅင်ႈႁေၼႆ တေႁဵတ်းႁႂ်ႈၶဝ်တိူဝ်ႉၸႂ်တၢၼ်ႇႁိုဝ်လႃႇ”
ၶမ်ႈၼႆႉတင်းၶိုၼ်း ၶတ်းၸႂ်ၼွၼ်းယူႇၵေႃႈ ၼွၼ်းပေႃးဢမ်ႇလပ်းလႆႈသေဢိတ်း ၼၼ်ႉယဝ်ႉ။
ဝၼ်းယဝ်ႉဝၼ်းပူၼ်ႉၵႂႃႇ လွင်ႈၵပ်းသိုပ်ႇ သႅင်ၶမ်းလႄႈၽိူဝ်ၶမ်းၼၼ်ႉၵေႃႈ ၼင်ႇဝႃႈႁၢင်ႇၵၼ်ၵႂႃႇတိၵ်းတိၵ်းယူႇ။ ဝၢႆးသေဝၼ်းၼၼ်ႉ ၽႂ်ၵေႃႈဢမ်ႇၶိုၼ်းၵပ်းသိုပ်ႇၵၼ်ထႅင်ႈသေပွၵ်ႈ ၵူၺ်းၵႃႈ သမ်ႉဝႃႈဢမ်ႇၵပ်းသိုပ်ႇၵၼ်သေတႃႉ ၼႂ်းၵၢင်ၸႂ်ၵေႃႉလႂ်ၵေႃႉၼိုင်ႈၼၼ်ႉတႄႉၵေႃႈ မုင်ႈမွင်းႁႂ်ႈမီးၶေႃႈၵႂၢမ်းၽႂ်သေၵေႃႉၼိုင်ႈ ၶဝ်ႈမႃးဢုပ်ႇၸူးယူႇ။
သႅင်ၶမ်းၼၼ်ႉၵေႃႈ သမ်ႉဝႃႈႁဵတ်းၵၢၼ်ယူႇတင်းဝၼ်းတင်းဝၼ်းသေတႃႉ လွမ်လွမ်ငွၵ်ႈတူၺ်းၽူင်းမၼ်း မႃးပဵၼ်ၵမ်းပဵၼ်ၵမ်းယူႇ၊ ၽိူဝ်ၶမ်းၼၼ်ႉၵေႃႈတေႃႈၼင်ႇၼၼ် မိူဝ်ႈမီးသဵင်ၶေႃႈၵႂၢမ်းၶဝ်ႈမႃးၼၼ်ႉ ထၢင်ႇဝႃႈပဵၼ်ၵေႃႉဢၼ်မွင်းၼၼ်ႉသေ ႁိပ်ႈၼႅတ်ႈတူၺ်းဝႆးၽႂ်းလိူဝ်ၵူႈပွၵ်ႈယဝ်ႉ။ ယိုင်ႈဝၼ်းမၼ်းႁိုင် ၼႂ်းၵၢင်ၸႂ်ၽႂ်ၵေႃႈ ၼင်ႇႁၢင်ႈယိုင်ႈၸႂ်ထိုင်ၵၼ်မႃးတိၵ်းတိၵ်း၊ ၵူၺ်းၵႃႈ ပေႃးတၵ်ႉၸူး သမ်ႉၵူဝ်တေႁဵတ်းႁၢႆႉႁူဝ်ၸႂ်ၵၼ်၊ ဢမ်ႇလၢတ်ႈၼၼ်ႉလီလိူဝ်ၼႆသေ ဝူၼ်ႉၽႂ်ဝူၼ်ႉမၼ်းၵႂႃႇႁင်းၵူၺ်းယဝ်ႉ။
ဝၼ်းၼိုင်ႈၽူၼ်တူၵ်းယွႆးယွႆး မွၵ်ႇၵုမ်ႈသုမ်ႇၼမ်ႉၼၢႆးဢွႆ ၵတ်းလၢင်ႈငႅၼ်းငႅၼ်း သႅင်ၶမ်းဢၼ်ၵႂႃႇႁဵတ်းၵၢၼ် ဢၢၼ်းတေပွၵ်ႈၶိုၼ်းႁိူၼ်းၼၼ်ႉ၊ မီးမၢႆၽူင်းတီႈႁိူၼ်းသိုပ်ႇမႃးလႄႈ ၶေႃႈၵႂၢမ်းဢၼ်မၼ်းလႆႈငိၼ်းၵႂႃႇၼၼ်ႉၵေႃႈ ႁိုဝ်တေႁဵတ်းႁႂ်ႈၸႂ်မၼ်းလီလႆႈယဝ်ႉလႃႇ။
“ဢေးယိင်း!! ၼၢႆးႁဝ်းဢမ်ႇယူႇလီပဵၼ်ႁႅင်းၼႃႇယဝ်ႉ”
မၼ်းၵေႃႈႁိုဝ်ဝူၼ်ႉသင်ယဝ်ႉယၢမ်းၼၼ်ႉ ဢဝ်တင်းၵႃးမၼ်းၼၼ်ႉသေ ဢမ်ႇဝႄႉတီႈလႂ်ယဝ်ႉသိုပ်ႇၵႂႃႇၼႃႈ မုင်ႈၸူးဝဵင်းဢွၼ်ႇတီႈယၢမ်ႈသဝ်း ႁိူၼ်းဢၼ်ယၢမ်ႈယူႇႁူမ်ႈလူၺ်ႈၼၢႆးၶဝ်မႃး လၢႆသိပ်းပီႊၼၼ်ႉၵမ်းလဵဝ်ယဝ်ႉ။
ၽူၼ်လူင်ၼၼ်ႉၵေႃႈ တူၵ်းလူင်းသမ်ႉပေႃးဢမ်ႇထၢတ်ႇဢမ်ႇဝၢႆး၊ မၼ်းၼၼ်ႉၵေႃႈ ႁိပ်ႈၼႅတ်ႈႁေႃႈၵႃးၵႂႃႇ ဢမ်ႇၵိုတ်းဢမ်ႇလိုဝ်ႈ သမ်ႉပေႃးဢမ်ႇတၼ်းထိင်းႁႅင်းဝႆးမၼ်းလႆႈ ၼၼ်ႉယဝ်ႉ၊ မိူင်းၵေႃႈ ၵွႆႈယူႇၵွႆႈလပ်းသိင်ႇမႃးတိၵ်းတိၵ်းယဝ်ႉလႄႈ ႁွတ်ႈတီႈလႂ်ထိုင်တီႈလႂ်ၵေႃႈ သမ်ႉပေႃးဢမ်ႇတၼ်းတူၺ်းတၢင်း၊ ယၢမ်းၼၼ်ႉ သႅင်ၾႆးႁိူဝ်ႈလႅင်းထွင်ႇမႃး တၢင်းၼႃႈၵႃးမၼ်းၼၼ်ႉသေ မၼ်းၵေႃႈၶုၼ်ႇႁေႃႈငွၵ်းပၢႆႈၵႂႃႇ ဢမ်ႇသၢင်ႇထုၵ်ႇၵႃးမၼ်းၼၼ်ႉၵေႃႈ ထုၵ်ႇၵႃးလမ်းၼိုင်ႈဢီးထွင်းၵူၼ်ႈၵႃးမၼ်း ပေႃးသုတ်ႉၶၢႆႉၶဝ်ႇၶွၼ်းဝႆလူင်ၵႂႃႇတင်းသဵင်ႈ ယူႇယဝ်ႉ။
တွၼ်ႈသီႇသိပ်းသီႇသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသီႇသိပ်းႁႃႈၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
