တွၼ်ႈသီႇသိပ်းဢဵတ်း
ၼူၼ်းမူဝ်ၼၼ်ႉၵေႃႈ တွၼ်ႈတႃႇႁႂ်ႈဢူၺ်းၵေႃႉမၼ်း ပေႃးတေမီးၵေႃႉမီးၵူႈ ပေႃးတေဢမ်ႇယူႇငဝ်ႁင်းၵူၺ်းၼၼ်ႉ ၶတ်းၸႂ်သူၼ်းၾႆးၼႂ်းၸႂ်၊ ႁႂ်ႈမၼ်းပေႃးပိုတ်ႇ ႁူဝ်ၸႂ်မၼ်းပၼ်ပိူၼ်ႈၽွင်ႈၼၼ်ႉၼႆယူႇ။
“ဢမ်ႇၸႂ်ႈဝႃႈ သူဢမ်ႇပိုတ်ႇၸႂ်လႄႈ ဢမ်ႇၶႂ်ႈယွမ်းႁပ်ႉမၼ်းၵူၺ်းယူဝ်ႉ ၸင်ႇလႆႈဝႃႈၸိူင်ႉၼၼ်၊ ဢမ်ႇၼၼ်ၵေႃႈ ဢမ်ႇပႆႇလိုမ်းၽႅၼ်ႇပၢႆႉၶေႃးဢၼ်ႁွႆႈၵွင်ႉၽႃယူႇၼၼ်ႉႁႃႉတေႃႈ”
“တေလၢတ်ႈထိုင်ၶိုၼ်းႁဵတ်းသင်လႃႇ! ႁဝ်းပေႃးဢမ်ႇဝူၼ်ႉထိုင်မၼ်းယဝ်ႉၼႆႉ”
“ၶႂ်ႈဝႃႈလိုမ်းၶဝ်ဢမ်ႇလႆႈ လႄႈ မွင်းပႂ်ႉၶဝ်ယူႇဢိူဝ်ႈၼေႃႈ!”
“ႁိုင်ပေႃးတၢၼ်ႇၼၼ်ႉယဝ်ႉ ႁဝ်းတေမွင်းပႂ်ႉၶဝ်ႁဵတ်းသင်လႃႇ! ၶဝ်ပေႃးတေႇၼႃႈႁိူၼ်းမီးလုၵ်ႈမီးလၢင်းၵႂႃႇယဝ်ႉတမ်ႉဢမ်ႇႁူႉ”
“သူဢမ်ႇဢၢၼ်းဝူၼ်ႉတႃႇတေပိုတ်ႇၸႂ်ပၼ်ၽႂ်ၽွင်ႈႁႃႉ သေၵေႃႉၵေႃႉၼၼ်ႉ”
“ဝူၼ်ႉယူႇၼႃ! ဝူၼ်ႉဝႃႈၸွင်ႇဢၢပ်ႈတေမီးၽႂ် ဢၼ်ႁဵတ်းႁႂ်ႈႁူဝ်ၸႂ်ႁဝ်း တဵၼ်ႈတွတ်ႇမႃးလႆႈထႅင်ႈ မိူၼ်မိူဝ်ႈယင်းၼုမ်ႇၼၼ်ႉယူႇႁႃႉ၊ မၢင်ပွၵ်ႈၵေႃႈယၢမ်ႈဝူၼ်ႉဝႃႈ သင်မီးၵေႃႉႁၵ်ႉၵေႃႈဢၢပ်ႈလီယူႇ၊ ၵူၺ်းၵႃႈ မိူဝ်ႈဝႃႈတေဢၢၼ်းပိုတ်ႇၸႂ်ပၼ်ၽႂ်ၼၼ်ႉ ႁဵတ်းႁႂ်ႈႁဝ်းၵူဝ်ဝႃႈ ႁဝ်းတေဢမ်ႇမီးလွင်ႈလွတ်ႈလႅဝ်း မိူၼ်မိူဝ်ႈႁဝ်းယူႇၵေႃႉလဵဝ်ၸိူင်ႉၼႆ၊ ႁဝ်းႁၼ်ပိူၼ်ႈမီးၵေႃႉႁၵ်ႉ၊ ႁၼ်ပိူၼ်ႈတေႇၼႃႈႁိူၼ်းၸိူဝ်းၼၼ်ႉ ၼင်ႇႁၢင်ႈ ႁဵတ်းႁင်ၵေႃႈပေႃးဢမ်ႇထၢင်ႇႁၢင်ႈႁေဢိတ်းၼၼ်ႉယဝ်ႉ၊ ပေႃးမီးလုၵ်ႈမႃးထႅင်ႈႁေ ၸၢတ်ႈပၢၼ်ႁဝ်း မၼ်းတေၵႂႃႇယဝ်ႉတီႈၼၼ်ႈၵူၺ်းႁိုဝ်လႃႇ ၵၢၼ်ဢၼ်ႁဝ်းၶတ်းၸႂ်ႁဵတ်းမႃးၸိူဝ်းၼၼ်ႉၵေႃႈ သင်ဢမ်ႇသင် ဢၢပ်ႈတေလႆႈၽႃႈပႅတ်ႈလူးၵွၼ်ႇ၊ ယိုင်ႈဝူၼ်ႉ ယိုင်ႈဢမ်ႇၶႂ်ႈမီးယဝ်ႉ ပေႃးလၢတ်ႈသိုဝ်ႈသိုဝ်ႈၵေႃႈ တၢင်းႁၵ်ႉမၼ်းဢမ်ႇလႆႈလမ်ႇလွင်ႈတၢၼ်ႇ လွင်ႈလွတ်ႈလႅဝ်းႁဝ်းၼၼ်ႉယဝ်ႉ ၸင်ႇဝႃႈဢမ်ႇၶႂ်ႈပိုတ်ႇၸႂ်ပၼ်ၽႂ်”
“မိူဝ်ႈၵေႃႉယႂ်ႇမႃး တၢင်းႁၵ်ႉဢၼ်ႁဵတ်းႁႂ်ႈႁူဝ်ၸႂ်သၼ်ႇဝႆၶွၼ်း ယွင်ႇၸွမ်းမၼ်းမိူၼ်မိူဝ်ႈၼုမ်ႇၼၼ်ႉ မၼ်းဢမ်ႇမီးယဝ်ႉ၊ ၵူၼ်းႁဝ်းတေယူႇႁင်းၵူၺ်းၵေႃႉလဵဝ် ၵႂႃႇတေႃႇၸူဝ်ႈဢမ်ႇလႆႈလူး၊ သမ်ႉဝႃႈႁဝ်းပဵၼ်ဢူၺ်းၵေႃႉၵၼ်ၵေႃႈ ႁဝ်းၵေႃႈဢမ်ႇလႆႈယူႇၸွမ်းၵၼ် ၵႂႃႇတႃႇၸူဝ်ႈလူး၊ ႁဝ်းၵေႃႈတေဢမ်ႇၸၢင်ႈယူႇၸွမ်းသူလႆႈ မိူၼ်မိူဝ်ႈဢွၼ်တၢင်းယဝ်ႉ၊ ယွၼ်ႉၼၼ်လႄႈ ႁဝ်းၶႂ်ႈႁႂ်ႈသူႁႃၽႂ်သေၵေႃႉၼိုင်ႈ ဢၼ်သူယုမ်ႇၸႂ်လႆႈဝႃႈ ၶဝ်ၵေႃႉၼၼ်ႉ တေပဵၼ်ၵူၼ်းဢၼ်ယူႇႁိမ်းၶၢင်ႈသူ၊ ပဵၼ်ၵူၼ်းၵေႃႉဢၼ်သူပိုင်ႈဢိင်လႆႈ၊ ပဵၼ်ၵူၼ်းပၼ်ႁႅင်းၸႂ်မိူဝ်ႈတူၵ်းသုမ်း၊ ပဵၼ်ၵူၼ်းဢၼ်ဢုပ်ႇၵုမ်ၵၼ်လႆႈၵူႈလွင်ႈ၊ ၸွႆႈလုမ်းလႃးမိူဝ်ႈဢမ်ႇယူႇလီ၊ ႁူမ်ႈသိူဝ်းႁူမ်ႈတုၵ်ႉၸွမ်းၵၼ်ၵႂႃႇ၊ မေႃပွင်ႇၸႂ်ပၼ်ၵၼ် ၵူၼ်းၸိူင်ႉၼၼ် သင်ဢမ်ႇသင်ၵေႃႈ သူထုၵ်ႇလီမီးသေၵေႃႉၼိုင်ႈဢိူဝ်ႈ”
“ၵူၼ်းလီၸိူင်ႉၼၼ် တေႁႃလႆႈၸိူင်ႉႁိုဝ်လႃႇ၊ ၵၢပ်ႈပၢၼ်ယၢမ်းလဵဝ်ၼႆႉၶႅၼ်းႁႃယၢပ်ႇယဝ်ႉ”
“မၼ်းၵေႃႈဢမ်ႇၸမ်ပဵၼ် တေလႆႈပဵၼ်ၵူၼ်းလီၵူႈလွင်ႈလူး သွၼ်ႇႁႂ်ႈသူလႄႈတင်းၶဝ် ယွမ်းႁပ်ႉၵၼ်လႆႈၵေႃႈပေႃးယဝ်ႉၼႃႇ”
“သူလႆႈတႄႇၼႃႈႁိူၼ်းယဝ်ႉလႄႈ ႁတ်းဝႃႈၵူၺ်းလေႃႇ မိူဝ်ႈဢွၼ်တၢင်းသႂ်လႅင်းၵေႃႈလၢတ်ႈၸိူင်ႉၼႆယူႇ ႁဝ်းတွင်းယူႇၼႃ သူဝႃႈၸိူင်ႉႁိုဝ် ယင်းတိုၵ်ႉၵိုတ်းႁဝ်းယူႇပဵၼ်ၵေႃႉၼႆႁိုဝ်လႃႇ! ႁၵ်းလင်ၵၼ်ယဝ်ႉ ႁတ်းမႃးလၢတ်ႈၵၼ်ၸိူင်ႉၼႆလႆႈၸိူင်ႉႁိုဝ်?”
လၢတ်ႈဢဝ်ၼူၼ်းမူဝ် ပေႃးဢမ်ႇထဵင်ၶိုၼ်းလႆႈၼၼ်ႉယဝ်ႉ။ သႅင်ၶမ်းတင်းဢုပ်ႇတင်းပႆလူင်မိူဝ်း သမ်ႉပေႃးႁွတ်ႈထိုင်ႁိူၼ်းၵႂႃႇယဝ်ႉသေ သွင်ၶႃၵေႃႈ ဝၢင်းၽူင်းၵႂႃႇယူႇယဝ်ႉ။
သႅင်ၶမ်းၼၼ်ႉၵေႃႈ ၼင်ႇဝႃႈၶဵဝ်ႈမႅင်းမၼ်းၸဵပ်းမႃးႁႅင်းဝႆႉလႄႈ သမ်ႉပေႃးဢမ်ႇပဵၼ်လပ်းပဵၼ်ၼွၼ်းတင်းၶိုၼ်းယူႇယဝ်ႉ လိူဝ်ၼၼ်ႉ တွင်ႉသမ်ႉၸဵပ်းပႃးထႅင်ႈယူႇ။ ထိုင်ၼင်ႇၵၢင်ၼႂ်မႃး မၼ်းၵေႃႈၵႂႃႇတီႈ (Clinic) ႁွင်ႈယႃထူၺ်ႈၶဵဝ်ႈ ဢၼ်ၸင်ႇႁႃမႃးပိုတ်ႇ ဢမ်ႇပေႃးၵႆတီႈယူႇမၼ်းၼၼ်ႉယဝ်ႉ။ ၵႂႃႇၸဝ်ႉႁႅင်းၼႃႇ ပိူၼ်ႈယင်းဢမ်ႇပႆႇပိုတ်ႇလႄႈ မၼ်းၵေႃႈဢမ်ႇၸၢင်ႈႁဵတ်းႁိုဝ် ၵႃႈလႆႈၵႂႃႇၼင်ႈပႂ်ႉယူႇၼႃႈႁွင်ႈၼၼ်ႉၵူၺ်း။
ႁိုင်တၢၼ်ႇတၢၼ်ႇ မီးၵႃးလမ်းၼိုင်ႈမႃးၵိုတ်းယူႇ တီႈဝႆႉၵႃးၼၼ်ႉသေ ၵူၼ်းၵေႃႉဢၼ်ဢမ်ႇထၢင်ႇဢမ်ႇထိူမ် ၽိူဝ်ၶမ်းၼၼ်ႉၵေႃႈ ဢွၵ်ႇၵႃးမႃး၊ ဢဝ်သႅင်ၶမ်းသမ်ႉပေႃးတူၵ်းၸႂ်မႃးယူႇ။
“ႁဵတ်းႁိုဝ်ႁေ..မႃးၺႃးၶဝ်ထႅင်ႈယဝ်ႉလႃႇၼႆႉ!”
ၽိူဝ်ၶမ်းၼၼ်ႉၵေႃႈ မိူဝ်ႈလႆႈႁၼ်သႅင်ၶမ်းယဝ်ႉ
“ႁူႉဝႃႈႁဝ်းယူႇတီႈၼႆႈသေ.. မႃးႁႃႁဝ်းၸဵမ်ၸဝ်ႉၶႃႈႁႃႉၼႆႉ”
“ႁဝ်းမႃးထူၺ်ႈၶဵဝ်ႈၵူၺ်းဢေႃႈ..သူႁဵတ်းၵၢၼ်တီႈၼႆႈၶႃႈႁႃႉ”
“ၸႂ်ႈယဝ်ႉၶႃႈ..ပဵၼ်မေႃယႃၽၢႆႇၶဵဝ်ႈ.. ဢွၼ်တၢင်းတေမႃးတေလႆႈလၢတ်ႈဝႆႉလူင်ႈၼႃႈၶႃႈဢေႃႈ ၵူၺ်းၵႃႈပဵၼ်သူလႄႈႁဝ်းတေတူၺ်းပၼ်လႂ်”
ယုမ်ႉယုမ်ႉသေ ၽုၺ်ႇၽၵ်းတူၶဝ်ႈႁွင်ႈယႃၵႂႃႇယူႇယဝ်ႉ။
ၽိူဝ်ၶမ်းၵေႃႈယွၼ်ႉတိုၵ်ႉၸဝ်ႉယူႇလႄႈ ဢမ်ႇပႆႇမီးၵူၼ်းၼႆၵေႃႈ လႆႈတူၺ်းပၼ်ၵႂႃႇသေ မေႃတႄႉၵေႃႈဢၢၼ်းတူၺ်းပၼ်လၢႆလၢႆၵူၺ်း၊ ၵူၺ်းၵႃႈ ၵူၼ်းပဵၼ်မၼ်းသမ်ႉၶႂ်ႈထူၺ်ႈၼႃႇယဝ်ႉလႄႈ လၢတ်ႈႁႂ်ႈထူၺ်ႈယူႇတိၵ်းတိၵ်း မေႃၵေႃႈ လႆႈထူၺ်ႈၵႂႃႇပၼ်ယဝ်ႉ။ ဝၢႆးသေထူၺ်ႈၶဵဝ်ႈယဝ်ႉဢၢၼ်းဢွၵ်ႇ ႁွင်ႈယႃမႃးၼႆယူႇ၊ လိူၵ်ႈလိူၵ်ႈ တွင်ႉသမ်ႉၵိုင်ႉၵၢင်ႉၸဵပ်းႁႅင်းမႃးလႄႈ ထိင်းတူဝ်ဢမ်ႇလႆႈယဝ်ႉသေ မဝ်းလူမ်ႉလူင်လူင်းၵႂႃႇ တီႈႁွင်ႈယႃၼၼ်ႉၵမ်းလဵဝ်ယဝ်ႉ။
ၽိူဝ်ၶမ်းဢၼ်ႁၼ်ၸိူင်ႉၼၼ်ၵေႃႈ ႁိုဝ်တူၺ်းလႆႈယဝ်ႉ ၼႅတ်ႈဢဝ်ၵႂႃႇႁူင်းယႃၵမ်းလဵဝ်၊ ႁွတ်ႈထိုင်ႁူင်းယႃယဝ်ႉ မေႃယႃၶဝ်ၵေႃႈ ၸႅတ်ႈထတ်းတူၺ်းႁေ ၸင်ႇတေႁူႉဝႃႈ သႅင်ၶမ်းၼၼ်ႉ ပဵၼ်သႆႈၵိင်ႇၼႆလႄႈ တေလႆႈၽႃႇတတ်းၼႆယူႇ။ ၽိူဝ်ၶမ်းၵေႃႈ မႃးပႂ်ႉတူၺ်းလုမ်းလႃး သႅင်ၶမ်းၵႂႃႇ သမ်ႉပေႃးဢမ်ႇပဵၼ်ၵၢၼ်ပဵၼ်ငၢၼ်းသင်ယဝ်ႉ။
ယၢမ်းၵၢင်ၶိုၼ်းလိုၵ်းယဵၼ် သႅင်ၶမ်းဢၼ်မိုၼ်းတႃမႃးၼၼ်ႉ လႆႈႁၼ်ဢမ်ႇၸႂ်ႈၼႂ်းႁိူၼ်းမၼ်းယဝ်ႉ၊ ဝၢႆႇသၢႆႉဝၢႆႇၶႂႃတူၺ်းသေ ၶၢင်ႈမၼ်းၼၼ်ႉ ႁၼ်ၽိူဝ်ၶမ်း ၼွၼ်းငူပ်ႉဝႆႉယူႇလႄႈ ပဵၼ်ဢၼ်တူၵ်းၸႂ်သေ ၶုၼ်ႇၽႅတ်းလူင်ၵႂႃႇ၊ တွင်ႉၵိုင်ႉၵၢင်ႉၸဵပ်းႁႅင်း သမ်ႉပေႃးၶၢင်းဢွၵ်ႇမေႃးသဵင်မႃးလႄႈ ဢဝ်ၽိူဝ်ၶမ်းပေႃးတိုၼ်ႇမႃးယဝ်ႉ။
“တိုၼ်ႇယဝ်ႉႁႃႉ!! ၸွင်ႇၸဵပ်းႁႅင်းယူႇႁိုဝ်”
“ယၢမ်ႈႁၼ်တီႈလႂ်..ၽႃႇတတ်းဝႃႈဢမ်ႇၸဵပ်းလႃႇ” ႁူႇၼႃႈႁူႇတႃသေလၢတ်ႈယူႇ။
“လၢတ်ႈလႆႈၸိူင်ႉၼႆတႄႉ ဢမ်ႇလီမႆႈၸႂ်ယဝ်ႉ.. ”
“ႁဝ်းဢမ်ႇပဵၼ်သင်ယဝ်ႉၶႃႈ သူၵေႃႈထုၵ်ႇလီမိူဝ်းလိုဝ်ႈႁိူဝ်ႉသူယဝ်ႉဢေႃႈ”
ၽိူဝ်ၶမ်းၵေႃႈလုၵ်ႉသေယဝ်ႉ မိူဝ်ႈတေယၢင်ႈၽၢတ်ႇဢွၵ်ႇၵႂႃႇၼၼ်ႉ သႅင်ၶမ်းသမ်ႉၼႅတ်ႈၸၼ်သိူဝ်ႈမၼ်းဝႆႉလႄႈ ၽိူဝ်ၶမ်းၸင်ႇဝၢႆႇၸူးယဝ်ႉ။
“ဢမ်ႇၶႂ်ႈႁႂ်ႈႁဝ်းမိူဝ်းယဝ်ႉႁႃႉ ႁဝ်းယူႇထႅင်ႈၵေႃႈလႆႈယူႇၼႃ”
သႅင်ၶမ်းၵေႃႈပွႆႇသိူဝ်ႈၼၼ်ႉသေယဝ်ႉ“ယိၼ်းၸူမ်းယဝ်ႉၶႃႈ.. ႁဝ်းဝႃႈႁဝ်းထုၵ်ႇလီလၢတ်ႈၵႂၢမ်းၶေႃႈၼႆႉဢေႃႈ”
“မွၵ်ႈၼႆႉၵူၺ်းႁႃႉ!”
“ဢိုမ်ႈ..မွၵ်ႈၼႆႉၵူၺ်းယဝ်ႉ ပွၵ်ႈမိူဝ်းၵေႃႈမိူဝ်းလီလီၶႃႈလႄႈ”
“ပေႃးယိၼ်းၸူမ်းယူႇတႄႉၵေႃႈ..လူင်းႁူင်းယႃယဝ်ႉ ယႃႇလိုမ်းၵႂႃႇလဵင်ႉၶဝ်ႈၵေႃႈပေႃးယဝ်ႉၼႃႈ! ”
“လႆႈဢေႃႈ..”
“ႁဝ်းမိူဝ်းၵွၼ်ႇယဝ်ႉ ယိၼ်းၸူမ်းယဝ်ႉၼႃႈမႆႈၸႂ်တၢင်ႁဝ်း” ၽၢတ်ႇယၢၼ်ဢွၵ်ႇၵႂႃႇပႅတ်ႈသႅင်ၶမ်းယူႇယဝ်ႉ။
ၽွင်းဢၼ်လိုဝ်ႈယူႇတီႈႁူင်းယႃၼၼ်ႉ သႅင်ၶမ်းၵေႃႈ ဢမ်ႇပဵၼ်ႁင်ၵႃႈႁိုဝ်လႄႈ ဢမ်ႇၶႂ်ႈႁၼ်ၵူၼ်းတီႈႁိူၼ်းမႆႈၸႂ်သေ တေဢွၼ်ၵၼ်လုၵ်ႉတီႈၵႆလူင်မႃးၼႆၵေႃႈ၊ မၼ်းဢမ်ႇလႆႈလၢတ်ႈၼႄၵူၼ်းတီႈႁိူၼ်း။ ပေႃးဢမ်ႇလၢတ်ႈတေႃႇၵေႃႈ ၼင်ႇႁၢင်ႈပေႉငိၼ်းငဝ်ဝႆႉယူႇ ဝၼ်းႁဵတ်းၵၢၼ်သမ်ႉ လႆႈလိုဝ်ႈယူႇတီႈႁူင်းယႃၸိူင်ႉၼႆ ဢဝ်မၼ်းပေႃးဢမ်ႇၶႂ်ႈမေႃယူႇယဝ်ႉ။
မိူဝ်ႈဢၼ်တိုၵ်ႉၼင်ႈမိူၼ်ႇငဝ်ယူႇၼၼ်ႉ ၸင်ႇသမ်ႉမီးမၢႆၾူင်းဢၼ်ဢမ်ႇလႆႈမၢႆၸိုဝ်ႈဝႆႉ သိုပ်ႇမႃးသေ
“မႂ်ႇသုင်ၶႃႈ”
“ပဵၼ်ႁဝ်းၽိူဝ်ၶမ်းဢိူဝ်ႈ!..ၸွင်ႇမီးလွင်ႈသင်ႁႂ်ႈႁဝ်းၸွႆႈႁိုဝ် မီးလွင်ႈသင်ၵေႃႈလၢတ်ႈလႆႈယူႇၼႃႈ”
“ဢမ်ႇပဵၼ်သင်ၶႃႈ..ဢမ်ႇသုၵ်ႉယုင်ႈၶၢဝ်းယၢမ်းသူၼႆႉတေလီယူႇ”
“ၵူၺ်းၵႃႈသူၵေႃႈသုၵ်ႉယဝ်ႉလူး…သုၵ်ႉၸႂ်ပႃးၵွၼ်ႇယဝ်ႉ”
သႅင်ၶမ်းၵေႃႈဢမ်ႇၶႆႈသိုပ်ႇၵႂၢမ်းသေ လၢႆႈၵႂၢမ်းၵႂႃႇပႅတ်ႈ
“သူတမ်ႉဢမ်ႇလႆႈလၢတ်ႈမိူဝ်း တီႈသႅင်ၶိူဝ်းၶဝ်ၸွင်ႇၸႂ်ႈ… ပေႃးပဵၼ်လႆႈဢမ်ႇလၢတ်ႈၶဝ်ၼႆႉ တေလီတေႃႇႁဝ်းတႄႉတႄႉဢေႃႈ”
“ဢမ်ႇၸႂ်ႈဝႃႈဢမ်ႇၶႂ်ႈလၢတ်ႈၼႃ ႁဝ်းလိုမ်းလၢတ်ႈၵူၺ်း”
“ႁဝ်းၵေႃႉတေလၢတ်ႈၵူၺ်းၶႃႈ..ပေႃးဝႃႈဢမ်ႇလႆႈလၢတ်ႈၵေႃႈ”
“ဢမ်ႇၸႂ်ႈဝႃႈဢမ်ႇၶႂ်ႈလၢတ်ႈႁေ ဢမ်ႇပၼ်ႁဝ်းလၢတ်ႈၸိူင်ႉၼၼ်ႁႃႉ”
သမ်ႉပေႃးဢဝ်သႅင်ၶမ်းယုမ်ႉဢွၵ်ႇမႃးယဝ်ႉ “ႁူႉၶိုတ်းလႆႈၸိူင်ႉႁိုဝ်လႃႇ!”
“ပွင်ႇၸႂ်ယူႇၼႃႈဝႃႈသူၵူဝ်ၶဝ်တေမႆႈၸႂ်ၼႆ.. ဢဝ်သူဝႃႈၶႃႈလႄႈ”
“ၸူမ်းယဝ်ႉၶႃႈ!!..ႁဵတ်းၵၢၼ်သူၵွၼ်ႇၶႃႈလႄႈ ႁဝ်းတေဢမ်ႇသုၵ်ႉယုင်ႈယဝ်ႉ”
“ယိုင်ႈလၢတ်ႈၸိူင်ႉၼႆ ယိုင်ႈသုၵ်ႉၸႂ်ယဝ်ႉဝႃႈ တေလႆႈႁဵတ်းႁိုဝ်လႃႇ ၵႂႃႇႁႃသူမိူဝ်ႈလဵဝ်ဢမ်ႇလီႁႃႉ”
“မွၵ်ႈၼႆႉၵူၺ်းယဝ်ႉၶႃႈ”
သႅင်ၶမ်းၵေႃႈၵူဝ်လႆႈငိၼ်းၵႂၢမ်းသိုပ်ႇမႃးထႅင်ႈလႄႈ ၼႅတ်ႈဝၢင်းပႅတ်ႈဝႆးဝႆးယူႇ။ “တႃႉသေဝႃႈၵူၼ်းၸႂ်ၼမ် လၢတ်ႈၵႂၢမ်းမႃးၼိုင်ႈၶေႃႈၵူၺ်းၵေႃႈ ၶူၼ်တုမ်ႇၼိူဝ်ႉသမ်ႉပေႃးၵီႈလူင်မႃးယဝ်ႉ” လၢတ်ႈယူႇႁင်းၵူၺ်း။
ထိုင်ၼင်ႇၵၢင်ၶမ်ႈ လပ်းသိုင်ႇဝွႆးဝွႆးယူႇၼၼ်ႉ သႅင်ၶမ်းဢၼ်ၼွၼ်းလိုဝ်ႈႁိူဝ်ႉယူႇၼၼ်ႉၵေႃႈ လႆႈႁၼ်ၽိူဝ်ၶမ်းမႃးၸူးမၼ်းသေ
“ႁဝ်းၵူဝ်သူငဝ်လႆႈဢဝ်ၼႆႉမႃးပၼ်..” ဢဝ်ပပ်ႉပၼ်ၵႂႃႇ လေႃးပႃးသိူဝ်ႈၶူဝ်းယူႇ။
သႅင်ၶမ်းၵေႃႈထူၵ်းတူၺ်းၵႂႃႇယဝ်ႉ လႆႈႁၼ်မီးပႃးၶူဝ်းၼႂ်းသေယဝ်ႉ ၼႅတ်ႈပိၵ်ႉပၢၵ်ႇထူင်ၼၼ်ႉသေ
“သူပဵၼ်ၵူၼ်းႁႅၼ်းၶူဝ်းႁႃႉ!”
“ပဵၼ်သင်လႃႇ ႁဝ်းဝႃႈတူဝ်သူလႄႈတင်းၼွင်ႉယိင်းႁဝ်း ၶႂ်ႈတၢၼ်ႇတၢၼ်ႇၵၼ်ၵူၺ်း ႁဝ်းႁႂ်ႈမၼ်းႁႅၼ်းပၼ်ဢိူဝ်ႈ”
“ဢေႃႈ..ၸူမ်းယဝ်ႉၶႃႈ” ယုမ်ႉႁႅင်ႈႁႅင်ႈၸူးယူႇ။
ၽိူဝ်ၶမ်းၼၼ်ႉၵေႃႈမိူၼ်ႇမိုင်တူၺ်း သႅင်ၶမ်းသေယုမ်ႉၸွမ်းယူႇ၊ သၢႆတႃဢၼ်တူၺ်းၸူး တၢင်းယုမ်ႉဢၼ်လႆႈႁၼ်ၼၼ်ႉ သမ်ႉပေႃးဢဝ်သႅင်ၶမ်း ဝၢႆႇၼႃႈယၵ်ႉပႅတ်ႈတၢင်ႇတၢင်းသေ။
“မႃးၸႂ်းႁဝ်းၸိူင်ႉၼႆ သူဢမ်ႇမီးၵၢၼ်မီးငၢၼ်းတေႁဵတ်းထႅင်ႈယဝ်ႉၶႃႈႁႃႉ”
“ၼႆႉယဝ်ႉၶႃႈၵၢၼ်ႁဝ်း.. မႃးပႂ်ႉတူၺ်းလုမ်းလႃးသူၼႆႉယိုင်”
“ႁဝ်းဝႃႈတႄႉမၼ်းဢမ်ႇၸမ်ပဵၼ်ၶႃႈၼႃ..ႁဝ်းလုမ်းလႃးတူဝ်ၵဝ်ႇလႆႈယူႇၶႃႈ”
“ၵူၼ်းႁဝ်းၼႆႉ မိူဝ်ႈဢမ်ႇယူႇလီၵိၼ်ဢမ်ႇဝၢၼ်ၼၼ်ႉ ဢမ်ႇထုၵ်ႇလီယူႇၵေႃႉလဵဝ်ၼႃႇ ၸၢင်ႈႁဵတ်းႁႂ်ႈတုမ်ႉတိူဝ်ႉပၢႆးၸႂ်လႆႈဢိူဝ်ႈ..”
“ႁဝ်းဝႃႈတႄႉ ဢၼ်တေမီးတၢင်းပဵၼ်ပၢႆးၸႂ်ၼႆႉ ဢမ်ႇၸႂ်ႈႁဝ်းယဝ်ႉ တေပဵၼ်သူၵူၺ်းဢေႃႈ..”
“ႁူႉၸႂ်ႁဝ်းၵျႃႉလႃႇပေႃးၼၼ်..”
လၢတ်ႈဢဝ်သႅင်ၶမ်းသမ်ႉပေႃးဢမ်ႇႁူႉ တေတွပ်ႇၸိူင်ႉႁိုဝ်ယဝ်ႉ၊ ၵူႈပွၵ်ႈၼႆႉပဵၼ်မၼ်းယဝ်ႉ ဢၼ်ႁဵတ်းႁႂ်ႈပိူၼ်ႈထဵင်ပေႃးဢမ်ႇလႆႈ မိူၼ်တေထူပ်းၺႃးၵေႃႉဢၼ်မၼ်းဢမ်ႇၶႂ်ႈထဵင်ၸွမ်းယဝ်ႉ။ ယွၼ်ႉပိူဝ်ႈ မၼ်းႁူႉဝႃႈ ယိုင်ႈထဵင်ယိုင်ႈတေတူၵ်းလွၵ်းၶဝ်ၵူၺ်းၼႆလႄႈ
“ႁဝ်းၶႂ်ႈလိုဝ်ႈႁိူဝ်ႉယဝ်ႉ!..ပွၵ်ႈမိူဝ်းလိုဝ်ႈႁိူဝ်ႉသူသေၶႃႈလႄႈ”
“မႆႈၸႂ်ႁဝ်းမိူၼ်ၵၼ်ႁႃႉ ယိၼ်းၸူမ်းယဝ်ႉၶႃႈ”
“ၶတ်းၸႂ်ယႃႇႁႂ်ႈၶဝ်ၸၢင်ႈသိုပ်ႇၵႂၢမ်းထႅင်ႈၵေႃႈ ယင်းတိုၵ်ႉလၢတ်ႈလႆႈထႅင်ႈယူႇ” လၢတ်ႈယူႇၼႂ်းၸႂ်မၼ်းသေ မၼ်းၵေႃႈဢမ်ႇတၵ်းသဵင်ၸူးၽိူဝ်ၶမ်းယဝ်ႉ။ ၽိူဝ်ၶမ်းၵေႃႈ ဢမ်ႇၸၢင်ႈယူႇႁဵတ်းသင်ယဝ်ႉလႄႈ
“သူတေဢမ်ႇငဝ်ၸွင်ႇၸႂ်ႈ ပေႃးဝႃႈႁဝ်းမိူဝ်းၵႂႃႇယဝ်ႉ”
သႅင်ၶမ်းၵေႃႈယၵ်ႉတူၺ်းမၼ်းယူႇႁဵတ်းၼၼ် ဢမ်ႇတၵ်းသဵင် ၽိူဝ်ၶမ်းၵေႃႈသိုပ်ႇလၢတ်ႈထႅင်ႈ
“ႁဝ်းမိူဝ်းတေႉတေႉယဝ်ႉၼႃႈ…မိူဝ်းယဝ်ႉ..မိူဝ်းယဝ်ႉၵူၺ်ႉ”
“ၶႂ်ႈမိူဝ်းၵေႃႈမိူဝ်းလႄႈ တေလၢတ်ႈႁဵတ်းသင်တိၵ်းတိၵ်း” သႅင်ၶမ်းဢမ်ႇယဵၼ်ႉလႆႈယဝ်ႉ လႆႈလၢတ်ႈဢွၵ်ႇမႃးယူႇ။
“ႁဝ်းၵေႃႈၶႂ်ႈငိၼ်းသဵင်သူမွၵ်ႈၼၼ်ႉၵူၺ်း”
ၽိူဝ်ၶမ်းၵေႃႈယုမ်ႉယူႇၸုတ်းၵုတ်းယဝ်ႉ ဢွၵ်ႇၵႂႃႇၼင်ႇႁၢၼ်ႉၸႂ်ႁၢၼ်ႉၶေႃးယူႇ။ သႅင်ၶမ်းၼၼ်ႉတႄႉ မိူၼ်ဢမ်ႇႁၢၼ်ႉၸႂ်ၸိူင်ႉႁိုဝ်ဝႆႉဢမ်ႇႁူႉယဝ်ႉ။ “ၵၢၼ်ႉဝႃႈဢမ်ႇဢၢၼ်းလၢတ်ႈတေႃႇၶဝ်ယဝ်ႉ ၶဝ်ၵေႃႈယင်းတိုၵ်ႉႁဵတ်းႁႂ်ႈလၢတ်ႈတေႃႇၶဝ်လႆႈယူႇ ၵူၼ်းၸိူင်ႉၼႆဝႄႈလႆႈၵႃႈႁိုဝ်ၵေႃႈ ထုၵ်ႇလီဝႄႈမွၵ်ႈၼၼ်ႉယဝ်ႉ”
တွၼ်ႈသီႇသိပ်းဢဵတ်းသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသီႇသိပ်းသွင်ၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
