တွၼ်ႈသီႇသိပ်း
ပီႊ 2015၊ ပီႊၼႆႉၶႃႈၵေႃႈဢွင်ႇပူၼ်ႉၸၼ်ႉ 9 လႆႈမၢႆ 1 ယူႇ၊ ဢမ်ႇလိူဝ်လႆႈတၢင်းၶတ်းၸႂ် လႄႈ မၼ်းၵေႃႈလႆႈမႃး ၼၼ်ႉယဝ်ႉ။ ၶႃႈၵေႃႈဢမ်ႇဝူၼ်ႉဝႃႈ ၶႃႈတေလႆႈၼင်ႇၵဝ်ႇ ၵူၺ်းၵႃႈ ဢၼ်ၶႃႈဝူၼ်ႉမိူဝ်ႈၽွင်းႁဵၼ်းလိၵ်ႈၼၼ်ႉတႄႉ ၶႃႈတေဢၢၼ်းၶတ်းၸႂ်ႁဵၼ်း ၼင်ႇၵႃႈဢၼ်ၶႃႈႁဵတ်းပဵၼ်လႆႈ၊ ၸွမ်းၼင်ႇယိူင်းဢၢၼ်းဢၼ်ၶႃႈမီးဝႆႉ ႁႂ်ႈပေႃးၶိုၼ်ႈၸၼ်ႉၸွမ်လႄႈ လႆႈႁဵၼ်းၽၢႆႇမၢႆမီႈသေ လႆႈပဵၼ်ၽူႈတႅပ်းတတ်းတြႃးႁႂ်ႈပေႃးလႆႈၼၼ်ႉၵူၺ်း။
မိူဝ်ႈဢၼ်ၸွမ်ၶိူဝ်း၊ သႅင်ၶိူဝ်း၊ သၢႆႁိူဝ်ႈ လႄႈ လႅင်းမိူင်း ၶဝ်ႁူႉယဝ်ႉၼႆၵေႃႈ ဢွၼ်ၵၼ်သူင်ႇၶူဝ်းၶွင်ၶဝ်မႃးပၼ်ၶႃႈယူႇ၊ ၵွပ်ႈဝႃႈ မိူဝ်ႈၶႃႈယူႇၸၼ်ႉပႅတ်ႇၼၼ်ႉ ၶဝ်လႆႈပၼ်ၵႂၢမ်းမၼ်ႈၶႃႈဝႆႉဝႃႈ ပေႃးလႆႈထိၼိုင်ႈ ၶႂ်ႈလႆႈႁင်ၵေႃႈ တေသိုဝ်ႉပၼ်ၼႆၼၼ်ႉၼႃႇ၊ ၵူၺ်းၵႃႈ ၶႃႈၵေႃႈဢမ်ႇလႆႈယွၼ်းၶဝ်ၼင်ႇၵဝ်ႇ ၶဝ်ၵေႃႉပၼ်ႁင်းၵူၺ်း။
သႅင်ၶိူဝ်းသိုဝ်ႉပၼ်ၾူင်းၶႃႈလႄႈ ၸွမ်ၶိူဝ်းသမ်ႉဢဝ်ၶွမ်းၵဝ်ႇမၼ်းပၼ်ၶႃႈ၊ သၢႆႁိူဝ်ႈလႄႈ ၸၢႆးသိူဝ် ၶႃပၼ်ၵႃႈၶဝ်ႈမုၼ်း၊ ဢၢႆႈၸၢႆးႁဝ်းတႄႉၵေႃႈ ၶၢမ်ႇပၼ်ငိုၼ်းၽူင်းၼႆယူႇ။ ပီႊၼႆႉၵေႃႈ လႆႈဝႃႈပဵၼ်ပီႊဢၼ်ၵၢမ်ႇလီတႄႉယဝ်ႉ မီးတင်းၾူင်း၊ မီးတင်းၶွမ်း၊ မီးတင်းငိုၼ်း ၽွင်းၼႆႉသမ်ႉ ပဵၼ်ၽွင်းဢၼ် Facebook တိုၵ်ႉႁိူင်းမႃးၼႂ်းဝဵင်းႁဝ်းၼၼ်ႉယဝ်ႉ၊ တင်းသႅင်ၶိူဝ်းၶဝ်ၵေႃႈ ႁိုင်ႁိုင်ၼၢၼ်းၼၢၼ်း လႆႈၵပ်းသိုပ်ႇၵၼ်ယူႇ။
ၵူၺ်းၵႃႈ ၸူဝ်ႈၽွင်းၶိုၼ်ႈၸၼ်ႉသိပ်းၼႆႉ ၵွပ်ႈၵၢၼ်ႁဵၼ်းၼမ်ၼႃႇလႄႈ ဢမ်ႇမီးၶၢဝ်းယၢမ်းလဵၼ်ႈၾူင်းႁေၵႃႈႁိုဝ်ၼင်ႇၵဝ်ႇ။ ပီႊၼႆႉၵေႃႈ လႆႈၶတ်းၸႂ်လိူဝ်သေပီႊပူၼ်ႉမႃး ၼၼ်ႉယဝ်ႉ။ ၵွပ်ႈၵုမ်ႇမိုင်ႉတူၺ်းလိၵ်ႈတူၺ်းလၢႆးယူႇၵူၺ်း ၶႃႈသမ်ႉပေႃးဢမ်ႇတၼ်းတႅမ်ႈတၼ်းမၢႆ ပပ်ႉမၢႆတွင်းၶႃႈသေဢိတ်းယဝ်ႉ။ ဢမ်ႇႁိုင်ဢမ်ႇၼၢၼ်း ၵၢၼ်သွၼ်လိၵ်ႈႁဝ်းၵေႃႈသုတ်းသဵင်ႈၵႂႃႇယဝ်ႉ။
ၸွမ်းၼင်ႇတၢင်းမုင်ႈမွင်းၶႃႈၼၼ်ႉၵေႃႈ လႆႈဢွင်ႇပူၼ်ႉၸၼ်ႉသိပ်းသေယဝ်ႉ ၸင်ႇလႆႈသိုပ်ႇၶိုၼ်ႈႁဵၼ်းၸၼ်ႉၸွမ်၊ ယွၼ်ႉၸၼ်ႉၸွမ်ၼႂ်းဝဵင်းႁဝ်းဢမ်ႇမီးလႄႈ လႆႈၵႂႃႇၶိုၼ်ႈတီႈဝဵင်းလူင်ဢဝ် ၶႃႈၵေႃႈလႆႈၽၢတ်ႇယၢၼ်ႁိူၼ်းၵႂႃႇ သိုပ်ႇၶိုၼ်ႈႁဵၼ်းထႅင်ႈ၊ တွၼ်ႈတႃႇၶႃႈၵေႃႈ ပဵၼ်ပွၵ်ႈဢွၼ်တၢင်းသုတ်း ဢၼ်ၶႃႈလႆႈၽၢတ်ႇယၢၼ်ႁိူၼ်းၵႆၵႆၸိူင်ႉၼႆ။
ပေႃးဝႃႈသုတ်းၸၼ်ႉသိပ်းယဝ်ႉၼႆၵေႃႈ ဢၼ်ႁဝ်းယူႇႁူင်းႁဵၼ်းၸွမ်းၵၼ်ၼၼ်ႉ ဢွၼ်ၵၼ်ၵႂႃႇႁင်းၽႂ်ႁင်းမၼ်းယူႇ၊ ၵမ်ႈၽွင်ႈၵေႃႈ ၵႂႃႇႁဵၼ်းၼွၵ်ႈမိူင်း၊ ၵမ်ႈၽွင်ႈၵေႃႈ ဢမ်ႇသိုပ်ႇႁဵၼ်းထႅင်ႈယဝ်ႉ၊ ၵေႃႉလႂ်သူၼ်ၸႂ်ဢၼ်လႂ်ပၢႆးလႂ်ၵေႃႈ ၵႂႃႇသိုပ်ႇႁဵၼ်းပၢႆးလႂ်ပၢႆးၼၼ်ႉယူႇ၊ တႃႇႁဝ်းတေထူပ်းၵၼ် မိူၼ်မိူဝ်ႈဢွၼ်တၢင်းလႆႈၼၼ်ႉၵေႃႈ ႁိုင်ႁိုင်ၼိုင်ႈပွၵ်ႈၵူၺ်းယဝ်ႉ။
ၶႃႈတႄႉ ဢဝ်ဝႆႉၽၢႆႇမၢႆမီႈ ယွၼ်ႉမီးတၢင်းယိူင်းဢၢၼ်း ၶႂ်ႈပဵၼ်ၽူႈတႅပ်းတတ်းတြႃးၼၼ်ႉယဝ်ႉ၊ ဝၢႆးသေႁဵၼ်းသုတ်းယဝ်ႉၵေႃႈ ၶႃႈၵေႃႈလႆႈၶဝ်ႈႁၢပ်ႇထၢမ်းၵၢၼ် ပဵၼ်ၽူႈတႅပ်းတတ်းတြႃးၵႂႃႇတေႉယူႇ။ ၵူၺ်းၵႃႈ မၼ်းၵေႃႈမိူၼ်ၼင်ႇဝႃႈၼၼ်ႉယဝ်ႉ လွင်ႈသိုဝ်ႈယူဝ်းၼၼ်ႉ မၼ်းယူႇၽၢႆႇတႂ်ႈငိုၼ်းၶမ်းပႅတ်ႈ၊ မၢႆမီႈယူႇတႂ်ႈၽူႈမီးဢႃႇၼႃႇ။ ၶႃႈလႆႈႁၼ်လွင်ႈဢမ်ႇၽဵင်ႇပဵင်းတင်းၼမ်၊ လႆႈလပ်းႁူလပ်းတႃ ႁဵတ်းၵၢၼ်ပၼ်ၵူၼ်းမီးဢႃႇၼႃႇမီးငိုၼ်းၶမ်း၊ လီဢိမ်ႇၸၢၼ်ႈၼႃႇ၊ ႁဵတ်းၵၢၼ်ၸွမ်းပိူၼ်ႈၵေႃႈ တေလႆႈထွမ်ႇၶေႃႈသင်ႇပိူၼ်ႈၼၼ်ႉၼႃႇ၊ ယိုင်ႈႁဵတ်းထုၵ်ႇမႅၼ်ႈၸွမ်းထမ်းတၢၼ်ႇႁိုဝ်ၵေႃႈ ယိုင်ႈပဵၼ်ဢၼ်ၽိတ်း တွၼ်ႈတႃႇၶဝ်ၼၼ်ႉယဝ်ႉ၊ ၶႃႈသမ်ႉဢမ်ႇယဵၼ်ႉလႆႈ ဢၼ်ပိူၼ်ႈႁဵတ်းတေႃႇၵူၼ်းလီၼၼ်ႉလႄႈ ၶႃႈၵေႃႈဢမ်ႇပေႃးထုၵ်ႇသၢႆတႃၶဝ်ႁိုဝ်ဢမ်ႇႁူႉ ၼႄးဝႃႈၶႃႈႁဵတ်းၽိတ်းပိူင်ၶဝ်ႁေ လိုပ်ႈၶႃႈဢွၵ်ႇပႅတ်ႈၼၼ်ႉယိုင်။
သင်ဢမ်ႇသင်လႆႈႁဵတ်းဢၼ်ၶႃႈထုၵ်ႇလီႁဵတ်းယူႇ ဢမ်ႇလႆႈယူႇတီႈၼၼ်ႈၵေႃႈ ဢမ်ႇပဵၼ်သင်၊ တႃႇတေၸွႆႈထႅမ်ၵူၼ်းထူပ်းတၢင်းယၢပ်ႇၽိုတ်ႇ ၸွမ်းႁႃလွင်ႈထုၵ်ႇမႅၼ်ႈ ပၼ်ၵူၼ်းထုၵ်ႇပေႉပုၼ်ႈၼၼ်ႉ ဢမ်ႇၸႂ်ႈၵၢၼ်တပ်းတတ်းတြႃးမဵဝ်းလဵဝ်ၵူၺ်းလူး၊ ပဵၼ်ၽူႈတၢင်ၼႃႈၵေႃႈ ႁဵတ်းၵၢၼ်ၼၼ်ႉလႆႈယူႇ၊ မိူဝ်ႈလႂ်မီးၶေႃႈမုၼ်းသၢၵ်ႈသေႇပဵင်းပေႃး ၽူႈတႅပ်းတတ်းတြႃးဢၼ်ဝႃႈၼၼ်ႉၵေႃႈ ႁူႉၵႃႈတေလႆႈႁဵတ်းၸွမ်းၼင်ႇ ပိူင်ဢၼ်မီးဝႆႉၼၼ်ႉယူႇၵူၺ်း၊ ၶႃႈဝူၼ်ႉဝႃႈၶႃႈႁဵတ်းၽူႈတၢင်ၼႃႈၼႆႉ ၵိုင်ႇလႅပ်ႈတင်းၶႃႈလိူဝ်သေၽူႈတႅပ်းတတ်းတြႃးၵွၼ်ႇယဝ်ႉ။
ဝၢႆးသေၶႃႈထုၵ်ႇလိုပ်ႈဢွၵ်ႇၵၢၼ်ယဝ်ႉ ၶႃႈၵေႃႈလႆႈမႃးတင်ႈလုမ်းႁင်းၵူၺ်း လူၺ်ႈမီးၵူၼ်းႁဵတ်းၵၢၼ်တီႈလုမ်းတြႃးၸွမ်းၵၼ်ၼၼ်ႉ ပႃးမႃးၸွမ်းၵေႃႉၼိုင်ႈ၊ မီးၵူၼ်းၵေႃႉဢၼ်ၶႃႈလႆႈၸွႆႈၶဝ်ဝႆႉၼၼ်ႉ မႃးႁဵတ်းၵၢၼ်ၸွမ်းလႄႈ လုမ်းႁဝ်းၵေႃႈမီးၵူၼ်းႁဵတ်းၵၢၼ်ယူႇ သီႇၵေႃႉၼႆႉယဝ်ႉ။
ၸၢတ်ႈပၢၼ်မၼ်းၵေႃႈ ၵႂႃႇတၢင်းၼႃႈတိၵ်းတိၵ်း ၶႃႈသမ်ႉပေႃးဢမ်ႇတၼ်း ဝၢႆႇတူၺ်းၶိုၼ်းတၢင်းလင်ယဝ်ႉ၊ တႄႇၸဵမ်မိူဝ်ႈဢွၵ်ႇႁိူၼ်းမႃးၶိုၼ်ႈႁူင်းႁဵၼ်း တီႈၼႂ်းဝဵင်းလူင်ၼႆႉ ႁဵၼ်းသုတ်းယဝ်ႉမီးၵၢၼ်မီးငၢၼ်းႁေ၊ မီးႁိူၼ်းမီးယေးႁေ တႃႇမိူဝ်းယူႇတီႈႁိူၼ်းၶိုၼ်းၼႆၼၼ်ႉၵေႃႈ ၶႃႈသမ်ႉပေႃးဢမ်ႇတၼ်းဝူၼ်ႉထိုင်ယဝ်ႉ။ ထိုင်မိူဝ်ႈဝၼ်းဢၼ်ၶႃႈ လႆႈမႃးၸႂ်းႁိူၼ်းၶိုၼ်း ပီႊ 2022 ၼႆႉ ၶႃႈၸင်ႇတေၶုၵ်းၸႂ်လႆႈ။ ဝဵင်းတီႈဢၼ်ႁဝ်းယၢမ်ႈယူႇသဝ်း ႁိူၼ်းဢၼ်ႁဝ်းယၢမ်ႈသဝ်းထင်ၼၼ်ႉၵေႃႈ ၼင်ႇႁိုဝ်မၼ်းပေႃးတေမၼ်ႈၼိမ်သဝ်းၵတ်းယဵၼ် ယူႇႁိုင်ယိုၼ်းယၢဝ်း၊ ၵူၼ်းထဝ်ႈၵႂႃႇယဝ်ႉၵေႃႈ ၵူၼ်းၼုမ်ႇလူဝ်ႇပုတ်ႈတႅၼ်းၶိုၼ်းဢမ်ႇၸႂ်ႈႁိုဝ်၊ ၵႂၢမ်းထုင်းႁဝ်းမီးဝႆႉဝႃႈ သိူဝ်တၢႆသိူဝ်တႅၼ်း လႅၼ်းတၢႆလႅၼ်းပုတ်ႈ ၼႆလႄႈ ၶႃႈၵေႃႈ ဝူၼ်ႉဝႃႈတေဢၢၼ်းမႃးယူႇၶိုၼ်းတီႈဝဵင်းၼႆႉယူႇၵူၺ်းၼင်ႇၵဝ်ႇ။
ၶႃႈဝူၼ်ႉဝႃႈ သင်ၸိူဝ်ႉဝႃႈလုၵ်ႈႁဵၼ်းဢၼ်ႁဝ်းၶိုၼ်ႈႁူင်းႁဵၼ်းတီႈၼႆႈ ဢွၼ်ၵၼ်ႁႃပၺ်ႇၺႃႇသေပွၵ်ႈမႃးၶိုၼ်း မႃးႁဵတ်းၵၢၼ်ဢၼ်ႁဝ်းသူၼ်ၸႂ်၊ ပူၵ်းပွင်ၶိုၼ်းဝဵင်းႁဝ်းၶိုၼ်းၼႆ ဝဵင်းႁဝ်းၼႆႉ တေလီယူႇလိူဝ်သေမိူဝ်ႈဢွၼ်တၢင်းလူးၵွၼ်ႇ၊ ၵူၺ်းၵႃႈ ဝၢႆးသေသုတ်းႁဵၼ်းၵၼ်ယဝ်ႉၵေႃႈ ဢွၼ်ၵၼ်ၵႂႃႇႁင်းၽႂ်ႁင်းမၼ်း၊ ယူႇၵူၺ်းၽႂ်ၵူၺ်းမၼ်း၊ မေႃၽႂ်မေႃမၼ်းၵႂႃႇပႅတ်ႈယဝ်ႉၼႃႇ ၼႂ်းၼၼ်ႉၵေႃႈ သမ်ႉပႃးၶႃႈၵေႃႉၼိုင်ႈႁေ မိူၼ်ဝႃႈၶႃႈၵေႃႈပဵၼ်ၵူၼ်းလိုမ်းၵုင်ႇမုၼ်ဝႆႉ ယူႇယဝ်ႉ။
…………………………………………………………..
ၼူၼ်းမူဝ်ဢၼ်တင်ႈၸႂ်လူယူႇၼၼ်ႉၵေႃႈ ဢမ်ႇတၼ်းႁူႉတၼ်းႁၼ်သင် လုၵ်ႉတီႈပီႊ 2014 ၵမ်ႉၵူၺ်းၵေႃႈ ပေႃးတၼ်းထိုင် 2022 ယဝ်ႉ မၼ်းဝႆးၼႃႇပူၼ်ႉလႄႈ ၸဵဝ်းသုတ်းၼႃႇ၊ တမ်ႉဢမ်ႇပႆႇထိုင်ၶိင်ႇပိူၼ်ႈၼွၼ်း လူသမ်ႉပေႃးသုတ်းယဝ်ႉ။ ဢမ်ႇပေႃးၸႂ်ၵႃႈႁိုဝ်လႄႈ သိုပ်ႇၾူင်းၸူးသႅင်ၶမ်းၵႂႃႇယူႇ
“ႁလူဝ်!..ဝႃႈႁိုဝ်လႃႇဢေးၼူၼ်း..”
“မီးတီႈလႂ်လႃႇ!!”
“လၢၼ်ႉလဝ်ႈႁိမ်းတၢင်းၼႆႉၼေႈ ၵမ်ႉၵေႃႈမိူဝ်းယဝ်ႉ လူဝ်ႇဢုပ်ႇသင်ၵေႃႈဢုပ်ႇလႆႈယူႇ”
“ႁဝ်းလူသုတ်းယဝ်ႉ!! ႁဵတ်းသင်ပေႉၸဵဝ်းယဝ်ႉလႃႇ..”
“တၼ်းလူသုတ်းယဝ်ႉၵႃႈ..”
“ဢိုမ်ႈ! သုတ်းယဝ်ႉဝႃႈ..”
သႅင်ၶမ်းၵေႃႈဢွၵ်ႇလၢၼ်ႉမႃးသေ တင်းပႆတင်းဢုပ်ႇၼူၼ်းမူဝ်လူင်မိူဝ်းၵႂႃႇ။
“ၸႂ်ႈယဝ်ႉ..မၼ်းမီးမွၵ်ႈၼၼ်ႉၵူၺ်း.. ပႃးလူၺ်ႈႁဝ်းဢမ်ႇတၼ်းၽွင်ႈႁေၼၼ်ႉယဝ်ႉ တႄႇၸဵမ်မိူဝ်ႈႁဝ်းႁူႉဝႃႈ ယုမ်ႉလိူၼ်ဢမ်ႇမီးယဝ်ႉ ႁဝ်းၵေႃႈဢမ်ႇလႆႈသိုပ်ႇတႅမ်ႈထႅင်ႈ တေႃႇထိုင်ပီႊၵၢႆ ႁဝ်းလႆႈမိူဝ်းၸႂ်းႁိူၼ်းသေ လႆႈႁၼ်ၶိုၼ်းပပ်ႉၼၼ်ႉလႄႈ ၸင်ႇၶိုၼ်းမႄးႁုပ်ႈသေသိုပ်ႇတႅမ်ႈၵူၺ်း ပႃးတင်းလွင်ႈယုမ်ႉလိူၼ်ယဝ်ႉ မၼ်းပဵၼ်ႁွႆးၸဵပ်းလႄႈတီႈယႃၸႂ်ႁဝ်း ၶဝ်ပဵၼ်မၢႆတွင်း ဢၼ်ဢမ်ႇထုၵ်ႇလီလူင်လိုမ်းၵႂႃႇပႅတ်ႈလၢႆလၢႆ ၼၼ်ႉယဝ်ႉ”
သႅင်ၶမ်းမိုင်ယၵ်ႉတူၺ်းၵႂႃႇၼႂ်းၵၢင်တၢင်းၼၼ်ႉသေယဝ်ႉ သိုပ်ႇလၢတ်ႈထႅင်ႈ
“ဝၢႆးသေမႃးပဵၼ်ၽူႈတၢင်ၼႃႈ ၵေႃႉဢွၼ်တၢင်းသုတ်းဢၼ်ႁဝ်းႁပ်ႉႁဵတ်းပၼ် ပၼ်ႁႃၶဝ်ၼၼ်ႉ ၶႂ်ႈငၢႆးမိူၼ်ၼင်ႇ ယုမ်ႉလိူၼ်ၼၼ်ႉယဝ်ႉ၊ ယွၼ်ႉမၼ်းငၢႆးၶဝ်လႄႈ ႁဝ်းႁပ်ႉၵေႃႈဝႃႈလႆႈယူႇ၊ မိူဝ်ႈလႆႈငိၼ်းလွင်ႈၶဝ်ၼၼ်ႉ ႁဵတ်းႁႂ်ႈႁဝ်းဝူၼ်ႉႁၼ်လွင်ႈမၼ်းမႃးၸႅင်ႈလႅင်း၊ တွၼ်ႈတႃႇႁဝ်းတေဢမ်ႇမဝ်မၢင် တေႃႇသူႈဢဝ်လွင်ႈၽဵင်ႇပဵင်းပၼ်ၶဝ်ၵေႃႉၼၼ်ႉလႄႈ ႁဝ်းဢမ်ႇထုၵ်ႇလီလူင်လိုမ်းလွင်ႈမၼ်းပႃးယဝ်ႉ၊ တွၼ်ႈတႃႇပဵၼ်ႁႅင်းဢီးၶႂ်ႈသိုပ်ႇတေႃႇသူႈ၊ တွၼ်ႈတႃႇပဵၼ်ဢဵၼ်ႁႅင်းႁႂ်ႈႁဝ်းဢမ်ႇယွမ်းထွႆ လွင်ႈၶဝ်ၼၼ်ႉၵေႃႈ ၸွႆႈၸုင်ၸၼ်ႁႂ်ႈႁဝ်းဢဝ်ပေႉမႃးလႆႈယူႇ၊ ဝၢႆးသေၼၼ်ႉၵေႃႈ ႁဝ်းလႆႈတႅပ်းတတ်း ႁပ်ႉဢမုၶတီးၸိူင်ႉၼႆမႃးတိၵ်းတိၵ်းၼၼ်ႉၼႃႇ”
သႅင်ၶမ်းၼၼ်ႉၵေႃႈ ဢဝ်မၢၵ်ႇဢူမ်ဢၼ်မီးၼႂ်းထွင်းမၼ်းၼၼ်ႉမႃးဢူမ်သေယဝ်ႉ
“ယိုင်ႈႁူပ်ႉပၼ်ႁႃၸိူင်ႉၼႆမႃးလၢႆလၢႆမဵဝ်း ယိုင်ႈႁူပ်ႉႁၼ်လွင်ႈၸဵပ်းသႅပ်ႇ ၵေႃႉထုၵ်ႇၶၢမ်ႇ၊ ႁဝ်းယိုင်ႈၶႅၼ်းပွင်ႇၸႂ် လွင်ႈဢၼ်ၶဝ်လႆႈႁပ်ႉၼၼ်ႉယဝ်ႉ၊ မၼ်းတေတုၵ်ႉတၢၼ်ႇႁိုဝ်၊ မၼ်းတေယၢပ်ႇၶၢၼ်ၸႂ်တၢၼ်ႇႁိုဝ်၊ ၶဝ်ပၼ်ၾၢင်ႉႁဝ်းဝႃႈ ယွၼ်ႉၵူၼ်းမိူၵ်ႈလိူင်းၸိူဝ်းၼၼ်ႉသေ ႁဵတ်းႁႂ်ႈၸၢတ်ႈပၢၼ်ပေႃးလူႉသုမ်းယွၼ်ႉမၼ်းလႄႈ တေယွမ်းၸုၼ်ႉသၢႆၸႂ်ၵႂႃႇယွၼ်ႉမၼ်းၼၼ်ႉ ႁဝ်းဝႃႈမၼ်းဢမ်ႇၸႂ်ႈလွင်ႈထုၵ်ႇမႅၼ်ႈ၊ ၵူၼ်းၵေႃႉႁဵတ်းႁၢႆႉပိူၼ်ႈၼၼ်ႉ တေပဵၼ်သင်ၼႆ ၶဝ်ဢမ်ႇတွၼ်ႉဝူၼ်ႉလေႃႇ ယွၼ်ႉၶဝ်ဢမ်ႇမီးၸႂ်ဝူၼ်ႉထိုင်ပိူၼ်ႈယူႇယဝ်ႉၼႃႇ၊ ၸဝ်ႈၵဝ်ႇသမ်ႉတေမႃးႁဵတ်းႁၢႆႉၶိုၼ်းတူဝ်ၵဝ်ႇၼႆ မၼ်းပဵၼ်လွင်ႈဢၼ်ႁၢင်ႈႁၢႆႉ တွၼ်ႈတႃႇၽဝၸၢတ်ႈပၢၼ်မၼ်းၵႂႃႇတေႃႇၸူဝ်ႈယဝ်ႉ၊ ႁဝ်းယၢမ်ႈဝူၼ်ႉဝႃႈ ပေႃးဝႃႈၵူၼ်းၵေႃႉၼၼ်ႉတၢႆၵႂႃႇယဝ်ႉၵေႃႈ လွင်ႈႁၢင်ႈႁၢႆႉလွင်ႈတၢင်းဢၢႆၼၼ်ႉၵေႃႈ တေႁၢႆၵႂႃႇပႅတ်ႈယဝ်ႉၼႆယူႇ၊ တွၼ်ႈတႃႇၶဝ်မၼ်းမွတ်ႇႁၢႆၵႂႃႇ ၸွမ်းၸၢတ်ႈပၢၼ်ၶဝ်ယဝ်ႉသေတႃႉ ႁဝ်းၵေႃႈပဵၼ်သုၼ်ႇၼိုင်ႈ ဢၼ်လႆႈႁပ်ႉႁူႉထိုင်လွင်ႈၶဝ်ယူႇလႄႈ လွင်ႈၶဝ်ၼၼ်ႉၵေႃႈ ဢမ်ႇတွၼ်ႉမွတ်ႇႁၢႆၵႂႃႇ ၼႂ်းလွင်ႈမၢႆတွင်းႁဝ်းႁေပွၵ်ႈ၊ မိူဝ်ႈႁဝ်းႁၼ်ၵူၼ်းထူပ်းပၼ်ႁႃၸိူင်ႉၼၼ်မႃး မၼ်းႁဵတ်းႁႂ်ႈႁဝ်းၶႂ်ႈၸွႆႈထႅမ် ၵူၼ်းဢၼ်ထူပ်းလွင်ႈၸိူင်ႉၼင်ႇမၼ်းၼၼ်ႉလႄႈ ၼင်ႇႁိုဝ်ၵူၼ်းၸိူဝ်းၼၼ်ႉ ပေႃးတေဢမ်ႇမိူၼ်မၼ်း တေၽၢတ်ႇယၢၼ်ပႅတ်ႈၵူၼ်းၵေႃႉဢၼ်ႁၵ်ႉမၼ်းသေ ယွမ်းၸုၼ်ႉသၢႆၸႂ် ယွၼ်ႉၵူၼ်းမိူၵ်ႈလိူင်းၸိူင်ႉၼၼ်၊ တႅၼ်းတီႈတေတၢႆၵႂႃႇယွၼ်ႉၵူၼ်းမိူၵ်ႈၼၼ်ႉ တွပ်ႇတႅၼ်းၶဝ်ၶိုၼ်းႁႂ်ႈမၼ်းပေႃးၵိုင်ႇၵႃႈမၼ်းဢမ်ႇလီႁိုဝ်”
သႅင်ၶမ်းၵေႃႈၵမ်းၶဵဝ်ႈမၼ်းသေယဝ်ႉ
“ၶဵဝ်ႈၸဵပ်းတေႉယဝ်ႉ!!”
“ၸဵပ်းၽႅဝ်ဢိူဝ်ႈ ၵိၼ်မၢၵ်ႇဢူမ်ယူႇတိၵ်းတိၵ်းလူႉ”
“ႁဝ်းဝႃႈႁဝ်းတေၵႂႃႇထူၺ်ႈပႅတ်ႈယဝ်ႉ ၶဵဝ်ႈလူင်ၽၢႆႇသၢႆႉၼၼ်ႉ ပေႃးလႆႈၸဵပ်းၵိၼ်ၶဝ်ႈပေႃးဢမ်ႇလႆႈတေႉလူင်”
“ထူၺ်ႈပႅတ်ႈၵေႃႈထူၺ်ႈလႆႈယူႇလေႃႇ ပေႃးသူဢမ်ႇၵိုတ်းၵိၼ်မၢၵ်ႇဢူမ် မၼ်းၵေႃႈတေၸဵပ်းယူႇႁဵတ်းၼၼ်တိၵ်းတိၵ်းယဝ်ႉ ၶဵဝ်ႈလူင်ဢၼ်ပႆႇၸဵပ်းၵေႃႈ တေၸဵပ်းမႃးထႅင်ႈတိၵ်းတိၵ်းဢိူဝ်ႈ”
သႅင်ၶမ်းၵေႃႈယဵၼ်ၵႂႃႇၵႅပ်ႉၼိုင်ႈသေ သိုပ်ႇလၢတ်ႈၸူးၶိုၼ်း “လီတေႉယဝ်ႉဢၼ်သႅင်ၶိူဝ်းဢမ်ႇယူႇ ႁဝ်းလႆႈဢုပ်ႇတင်းသူႁေ”
“မီးသႅင်ၶိူဝ်းယူႇၵေႃႈဢုပ်ႇလႆႈယူႇလူး!” ၼူၼ်းမူဝ်ၵေႃႈယုမ်ႉယုမ်ႉသေယဝ်ႉ လၢႆႈၵႂၢမ်းၵႂႃႇ
“မိူဝ်ႈလႂ်သူတေပွၵ်ႈမႃးယူႇတီႈဝဵင်းၼႆႉၶိုၼ်းလႃႇ! တူၺ်းမိူၼ်သူၵေႃႈလႅပ်ႈၶႂ်ႈမႃးယူႇဢမ်ႇၸႂ်ႈႁိုဝ်”
“ဢိုမ်ႈ! ဝူၼ်ႉဝႆႉယူႇၵူၺ်း.. ၵူၺ်းၵႃႈ ႁဝ်းၵေႃႈပႆႇႁူႉဝႃႈတေပဵၼ်မိူဝ်ႈလႂ် ပႂ်ႉတူၺ်းပီႊၼႆႉသဵင်ႈၵွၼ်ႇၵႂႃႈ”
“သူႁူႉႁႃႉ ၸွမ်ၶိူဝ်းမၼ်းတေမႃးၶိုၼ်းယဝ်ႉ!!”
“ပေႃးမၼ်းမႃးၵေႃႈ ႁဝ်းဢမ်ႇမိူဝ်းယဝ်ႉယူဝ်ႉပေႃးၼႆ”
“ပဵၼ်ႁင်လႃႇ!.. ၸဵမ်မိူဝ်ႈၶိုၼ်ႈပီႊၼိုင်ႈ ဢၼ်ၶဝ်ယွၼ်းပဵၼ်ၸူႉၵၼ်တင်းသူၼၼ်ႉၵႃႈ”
“မိူဝ်ႈၼၼ်ႉ ႁဝ်းၵေႃႈဝႃႈယၢပ်ႇၸႂ်ၼႃႇယဝ်ႉ ဢၼ်ႁဝ်းလႆႈထဵင်ၶဝ်ၶိုၼ်းၸိူင်ႉၼၼ် ပၢႆႈၼႃႈပၢႆႈတႃၶဝ်ပဵၼ်သၢမ်လိူၼ် ၸင်ႇတေႁတ်းလၢတ်ႈတေႃႇၶဝ်ၶိုၼ်း၊ ပေႃးမၼ်းဢမ်ႇဝႃႈပဵၼ်ဢူၺ်းၵေႃႉၵၼ်ၼႆ ႁဝ်းတမ်ႉဢမ်ႇႁတ်းလၢတ်ႈတေႃႇၶိုၼ်းလႃႈ၊ မိူဝ်ႈၼႃႈၶဝ်တေၵႂႃႇၼွၵ်ႈမိူင်းၼၼ်ႉ ၸွင်ႇႁူႉႁႃႉၶဝ်လၢတ်ႈသင်ဝႆႉတီႈႁဝ်း ပေႃးမၼ်းမႃးၶိုၼ်း သင်ႁဝ်းပႆႇတေႇၼႃႈႁိူၼ်းၼႆ မၼ်းတေမႃးယွၼ်းႁဝ်းၼႆဝႃႇ”
“ႁႃးႁႃး..ႁႃး…” ဢဝ်ၼူၼ်းမူဝ်သမ်ႉပေႃးၶူဝ်ဢွၵ်ႇမႃးသေ“ႁဝ်းဝႃႈလီယူႇလူး..”
“လီတီႈလႂ်လႃႇ! ႁဝ်းဢမ်ႇတွၼ်ႉဝူၼ်ႉတွၼ်ႉၾၼ်ႁေပွၵ်ႈလႃႈၼၼ်ႉ ပဵၼ်ဢူၺ်းၵေႃႉၵၼ်၊ ပီႈၼွင်ႉၵၼ်ၵူၺ်း ပေႃးလီၼႃႇယဝ်ႉ”
“ဢိူဝ်ႈ..ၸၢင်ႈတေၵႂႃႇႁဵတ်းႁိုဝ်လႃႇ ပေႃးဝႃႈလႆႈႁၵ်ႉယဝ်ႉ မၼ်းၵေႃႈဢမ်ႇၸၢင်ႈႁႄႉႁၢမ်ႈလႆႈလူး၊ သင်သူယွမ်းႁပ်ႉသေပိုတ်ႇၸႂ်ပၼ် သူၵေႃႈတေယွမ်းႁပ်ႉမၼ်းလႆႈယူႇၵူၺ်းၵႂႃႈ”
“ၵူၼ်းႁဝ်း..မၼ်းၵေႃႈမေႃလႅၵ်ႈလၢႆႈယူႇတႃႇသေႇ ႁဝ်းဝႃႈတႄႉလၢႆပီႊယဝ်ႉ ၶဝ်ၵေႃႈတေဢမ်ႇၵျိူၵ်ႈႁဝ်းယဝ်ႉၵႂႃႈ”
“ဢမ်ႇၸၢင်ႈဝႃႈၼႃ ၵူၼ်းႁဝ်းၵေႃႈ မၼ်းမီးလၢႆမဵဝ်းယူႇလူး ၵမ်ႈၽွင်ႈၵေႃႈ မိူဝ်ႈလႆႈၸပ်းၸႂ်ယဝ်ႉၼၼ်ႉ ၵႃႈဢမ်ႇလႆႈတိုၼ်းဢမ်ႇၸူးၼၼ်ႉၼႃႇ ယူဝ်ပီႈၸွမ်ၶိူဝ်းၵေႃႈတေပဵၼ်ၵူၼ်းၸိူင်ႉၼၼ်တမ်ႉဢမ်ႇႁူႉ”
“တိူင်းမၼ်းလႃႈ! မၼ်းတမ်ႉဢမ်ႇတွၼ်ႉၵပ်းသိုပ်ႇမႃးႁေပွၵ်ႈ ၸိူင်ႉၼၼ်”
“ၶႂ်ႈဝႃႈမုင်ႈမွင်းႁႂ်ႈၶဝ် ၵပ်းသိုပ်ႇမႃးယူႇၵႂႃႈထၢင်ႇ”
သႅင်ၶမ်းၵေႃႈ ထူၺ်ႈၸႂ်လူင်သေ ယဵၼ်ထွမ်ႇယူႇ။
တွၼ်ႈသီႇသိပ်းသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသီႇသိပ်းဢဵတ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
