မိူဝ်ႈလႆႈတူၺ်းၸိူင်း ဢၼ်မီးၸိုဝ်ႈဝႃႈ When Life Gives You Tangerines ပိုၼ်ၽႄႈဝႆႉတၢင်း Netflix မီးယူႇတင်းမူတ်း 16 တွၼ်ႈ လဝ်ႈလၢတ်ႈထိုင်လွင်ႈ ၸၢတ်ႈပၢၼ် ဢူဝ်းဢႄးသုၼ်း ၼၢင်းၸိူင်း ပဵၼ်လုၵ်ႈဢွၼ်ႇဢၼ်မီးယိူင်းဢၢၼ်း လွင်ႈၼွၼ်းၾၼ်ႁႂ်ႈလႆႈႁဵၼ်းသုင် ႁႂ်ႈလႆႈပဵၼ်ႁူဝ်ၼႃႈမူႇဝၢၼ်ႈ၊ ႁႂ်ႈပဵၼ်ၵူၼ်းတႅမ်ႈဝွၵ်း လႄႈ တေဢမ်ႇဢၢၼ်းပဵၼ်မႄႈၸဝ်ႈႁိူၼ်း ဢမ်ႇဢၢၼ်းလမ်ၼမ်ႉႁဵတ်းၵၢၼ်မိူၼ်မႄႈၼႆယူႇသေတႃႉ ၵူၺ်းၵႃႈၽဝဢွၼ်ႇမၼ်းၼၼ်ႉ ဢမ်ႇမိူၼ်ၼင်ႇၸႂ်လႆႈသေပွၵ်ႈ ဢူႈၵေႃႈလူႉၸဵမ်လဵၵ်ႉ မႄႈဢဝ်ၽူဝ်မႂ်ႇ ၵူၺ်းၵႃႈ သမ်ႉလႆႈတၢႆပႅတ်ႈၸဵမ်မိူဝ်ႈတိုၵ်ႉလဵၵ်ႉယူႇ။
မၼ်းတင်း ယင်းၵွၼ်းသိၵ်း ၸၢႆးၸိူင်း ယူႇၸွမ်းၵၼ်မႃးၸဵမ်မိူဝ်ႈလဵၵ်ႉ လႄႈ ယင်းၵွၼ်းသိၵ်း ၵျိူၵ်ႈ ဢူဝ်းဢႄးသုၼ်းမႃး ၸဵမ်မိူဝ်ႈဢႃႇယု လႆႈ 10 ၶူပ်ႇ ၼၼ်ႉယဝ်ႉ။
မိူဝ်ႈဢသၢၵ်ႈၶႃလႆႈ 18 ႁဵၼ်းပႆႇသုတ်းၼၼ်ႉ သွင်ၶႃၵေႃႈၸူဝ်းၵၼ်ပၢႆႈယဝ်ႉ၊ သမ်ႉဝႃႈလၵ်ႉပၢႆႈၵႂႃႇၸွမ်းၵၼ်သေတႃႉ ၵူၺ်းၵႃႈ ၶႃၵေႃႈဢမ်ႇလႆႈတေႇၼႃႈႁိူၼ်းၸွမ်းၵၼ်ၵမ်းလဵဝ် ၼင်ႇႁိုဝ်ၸၢတ်ႈပၢၼ်တၢင်းၼႃႈ ၸၢႆးၸိူင်းပေႃးတေလီၼႆၼၼ်ႉ ပေႃႈမႄႈၸၢႆးၸိူင်းၵေႃႈ ႁႃလၢႆးႁႂ်ႈၶႃၶၢတ်ႇၵၼ်သေ ႁႂ်ႈၼၢင်းၸိူင်းတေႇၼႃႈႁိူၼ်းၸွမ်းသထေး ၼင်ႇႁိုဝ်တေလႆႈၸႂ်ႉၸၢတ်ႈပၢၼ်လီလီ ၼင်ႇဢၼ်ၶႂ်ႈပဵၼ်ၼၼ်ႉၼႆယူႇ။
ၵူၺ်းၵႃႈ တွၼ်ႈတႃႇၸၢႆးၸိူင်းၼၼ်ႉ ၵူႈလွင်ႈဢၼ်မၼ်းႁဵတ်းယူႇ ၵူႈဝၼ်းဢၼ်မၼ်းပဵၼ်ယူႇၼၼ်ႉ ၵၢၼ်ႁဵၼ်းဢၼ်မၼ်းႁဵတ်းလႆႈလီယူႇၼၼ်ႉ ဢမ်ႇၸႂ်ႈဝႃႈမၼ်းၶႂ်ႈလႆႈသူးႁိုဝ် ၶႂ်ႈလႆႈၸိုဝ်ႈသဵင် ၵူၺ်းၵႃႈ မၼ်းၶႂ်ႈႁႂ်ႈၵူၼ်းၵေႃႉဢၼ်မၼ်းႁၵ်ႉလႆႈႁၼ် လႆႈယုမ်ႉၸူမ်းသိူဝ်းၸွမ်းၼၼ်ႉယဝ်ႉ။ တွၼ်ႈတႃႇ ၼၢင်းၸိူင်းတေမီးတၢင်းသိူဝ်း ၸွမ်းၼင်ႇဢၼ်ၶႂ်ႈပဵၼ်ၼၼ်ႉ မၼ်းၵေႃႈယွမ်းၸုၼ်ႉသေ ဢၢၼ်းႁၢင်ႇၼၢင်းၸိူင်းဢွၵ်ႇၵႂႃႇယူႇ။
ၵူၺ်းၵႃႈ ၸွမ်းလူၺ်ႈၸႂ်ဢၼ်မီးၼိူဝ်ၵၼ်ၼၼ်ႉ မၼ်းၶွတ်ႇတၵ်ႉမၼ်ႈၵႅၼ်ႇၼႃႇႁိုဝ် ဢူဝ်းဢႄးသုၼ်းၵေႃႈ လႆႈၸွမ်းႁွင်ႉႁႃၸၢႆးၸိူင်းၽွင်းတိုၵ်ႉၶီႇႁိူဝ်းၽၢတ်ႇဢွၵ်ႇၵႂႃႇၼၼ်ႉလႄႈ ၸၢႆးၸိူင်းၵေႃႈသမ်ႉဝႃႈႁိူဝ်းဢမ်ႇၸၢင်ႈၸွတ်ႇသေတႃႉ မၼ်းၵေႃႈလႆႈလမ်ၼမ်ႉမႃးႁႃၼၢင်းၸိူင်း ဢၼ်ယူႇတီႈၽင်ႇသေပႂ်ႉမၼ်းယူႇၼၼ်ႉယဝ်ႉ။
သွင်ၶႃၵေႃႈလႆႈတႄႇၼႃႈႁိူၼ်းႁူမ်ႈၵၼ် ၼၢင်းၸိူင်းလႆႈၶိုၼ်ႈပႂ်ႉလႄႈ လႆႈမီးလုၵ်ႈယိင်းဢွၼ်ႇၵေႃႉၼိုင်ႈ မႄႈၸဝ်ႈၵေႃႈဢမ်ႇပေႃးလီၵႃႈႁိုဝ် ၵွပ်ႈပဵၼ်ၼႃႈႁိူၼ်းဢၼ်ဢဝ်ၽူႈၸၢႆးပဵၼ်ယႂ်ႇလႄႈ ၽူႈယိင်းၼၼ်ႉ ဢမ်ႇမီးသုၼ်ႇလႆႈတၢၼ်ႇၽူႈၸၢႆးလႄႈ ဢမ်ႇႁဵတ်းလႆႈလွတ်ႈလႅဝ်း၊ ပေႃးပဵၼ်ၽူႈယိင်းၼႆတေႁႂ်ႈၽိုၵ်းလူၺ်းၼမ်ႉၸဵမ်မိူဝ်ႈလဵၵ်ႉယဝ်ႉ ၵူၺ်းၵႃႈၼၢင်းၸိူင်းၼၼ်ႉၵေႃႈ ဢမ်ႇပၼ်ႁႂ်ႈလုၵ်ႈမၼ်းလႆႈလုၺ်းၼမ်ႉလႄႈ ဢမ်ႇႁၼ်လီလွင်ႈၼႆႉသေ လႆႈၽိတ်းၵၼ်တင်းမႄႈၸဝ်ႈယဝ်ႉ ၸၢႆးၸိူင်းလႆႈႁၼ်မႄႈၸဝ်ႈႁဵတ်းႁၢႆႉမေးမၼ်းၼႆၵေႃႈ ၸူဝ်းဢဝ်မေးမၼ်းဢွၵ်ႇယူႇႁိူၼ်းၵူၺ်းယဝ်ႉ။
ၸၢႆးၸိူင်းၵေႃႈႁဵတ်းၵၢၼ်ၵိၼ်ၸၢင်ႈလဵင်ႉၼႃႈႁိူၼ်းလႄႈ ဢမ်ႇဝႃႈၵၢၼ်သင်မၼ်းၵေႃႈယွမ်းႁဵတ်းယဝ်ႉ၊ ၵူၺ်းၵႃႈ မၼ်းၵေႃႈ ဢမ်ႇလႆႈႁဵတ်းၵၢၼ်လီသေၵႃႈႁိုဝ် ၵၢၼ်ၵေႃႈၵႂႃႇၸဝ်ႉမႃးၶမ်ႈတႃႇသေႇ ထိုင်တီႈမၼ်းသမ်ႉပေႃးလႆႈတၢင်းမၢတ်ႇၸဵပ်းႁႅင်းလႄႈ ၼၢင်းၸိူင်းဢၼ်မႆႈၸႂ်ၼႃႇၼၼ်ႉၵေႃႈ ဢမ်ႇပၼ်မၼ်းႁဵတ်းၵၢၼ်သေ ၸၢႆးၸိူင်းၵေႃႈဢမ်ႇလႆႈမီးၵၢၼ်ၵႂႃႇပႅတ်ႈ ထိုင်ၶၵ်ႉတီႈၶဝ်ႈသၢၼ်ၼႂ်းယွင်ဢမ်ႇၵိုတ်းတႃႇလဵင်ႉလုၵ်ႈသေဢိတ်းလႄႈ ၵူၼ်းဢၼ်ၵႅၼ်ႇၶႅင်ၼၼ်ႉၵေႃႈသမ်ႉပေႃးလႆႈႁွင်ႉႁႆႈဢွၵ်ႇမႃးယဝ်ႉ။
ၵူၺ်းၵႃႈ မႄႈထဝ်ႈၼၢင်းၸိူင်းၼၼ်ႉၵေႃႈ လႆႈၸွႆႈထႅမ်ငိုၼ်းသိုဝ်ႉႁိူဝ်းႁႃပႃသေ လႆႈလဵင်ႉၼႃႈႁိူၼ်းၶဝ်မႃး တေႃႇသမ်ႉပေႃးမီးႁိူၼ်းၵူၺ်းလႄႈ ၸၢႆးၸိူင်းလႄႈတင်းၼၢင်းၸိူင်းၼၼ်ႉၵေႃႈ လႆႈမီးလုၵ်ႈႁူမ်ႈၵၼ်ၵႂႃႇ 3 ၵေႃႉယဝ်ႉ။ ၵူၺ်းၵႃႈ ဝၼ်းၼိုင်ႈၼၼ်ႉ လုၵ်ႈၸၢႆးဢွၼ်ႇၵေႃႉလိုၼ်းၵေႃႈ လႆႈဢွၵ်ႇႁိူၼ်းၵႂႃႇၽွင်းလူမ်းလႅင်ႉၶဝ်ႈသေ လႆႈတၢႆၵႂႃႇပႅတ်ႈယူႇယဝ်ႉ။
“မိူဝ်ႈပေႃႈမႄႈတၢႆၼၼ်ႉ လုၵ်ႈတေသူင်ႇၵႂႃႇႁႂ်ႈႁွတ်ႈတီႈၵတ်းယဵၼ် ၵူၺ်းၵႃႈ မိူဝ်ႈလုၵ်ႈတၢႆၼၼ်ႉ တေမီးယူႇၼႂ်းႁူဝ်ၸႂ်ဢူႈမႄႈဝႆႉတႃႇသေႇ” လွင်ႈၼႆႉၵေႃႈ ပဵၼ်လွင်ႈၽင်ၸႂ် သမ်ႉဝႃႈဢမ်ႇလၢတ်ႈထိုင်ၵေႃႈ ဢမ်ႇမီးဝၼ်းလိုမ်းလႆႈသေပွၵ်ႈၼၼ်ႉယဝ်ႉ။
ၸွမ်းလူၺ်ႈၸၢႆးၸိူင်းပဵၼ်ႁူဝ်ၼႃႈႁိူၼ်းၼႆၼၼ်ႉ သမ်ႉဝႃႈတေလႆႈထူပ်းလွင်ႈတိူဝ်ႉၸႂ်တၢၼ်ႇႁိုဝ်ၵေႃႈ ၵႃႈတေလႆႈၵႅၼ်ႇၶႅင် ဢွၼ်ၼႃႈႁိူၼ်းၵႂႃႇႁႂ်ႈလွတ်ႈလႆႈၼၼ်ႉယဝ်ႉ၊ ၵွပ်ႈပိူဝ်ႈ ယင်းတိုၵ်ႉမီးမေးလႄႈ မီးလုၵ်ႈထႅင်ႈသွင်ၵေႃႉၼႆၼၼ်ႉ ၵႃႈတေလႆႈၵႅၼ်ႇၶႅင်သေ ၶဵင်ႇတႃႉမၼ်းၵႂႃႇႁႂ်ႈလႆႈ ႁဵတ်းၵႅင်ႈဢမ်ႇပဵၼ်သင်ဝႆႉသေ သမ်ႉဝႃႈၼႂ်းၸႂ်ၼၼ်ႉဢမ်ႇလႆႈယဝ်ႉၼႆၵေႃႈယဝ်ႉ။
တႄႇၸဵမ်မိူဝ်ႈ ဢူဝ်းဢႄးသုၼ်း တေႇၼႃႈႁိူၼ်းမႃးၵေႃႈ ဢမ်ႇလိူၵ်ႈလႆႈ ၵႃႈလႆႈပဵၼ်မႄႈၸဝ်ႈႁိူၼ်းသေ လဵင်ႉလုၵ်ႈ ဢဝ်လုၵ်ႈ၊ ႁဵတ်းၵၢၼ်ၸွႆႈၵၼ် ၽူဝ်ၵေႃႉၵႂႃႇႁႃပႃ မေးၵေႃႉၶၢႆပႃ ႁႃလဵင်ႉၼႃႈႁိူၼ်းၶဝ်။
လိူဝ်သေတေပဵၼ်ၽူဝ်မေးလီယဝ်ႉ ယင်းပဵၼ်ဢူႈမႄႈလီထႅင်ႈ ဢမ်ႇဝႃႈလုၵ်ႈၶႂ်ႈႁဵတ်းသင် ၵမ်ႉထႅမ်ႁႂ်ႈလုၵ်ႈႁဵတ်းတဵမ်တီႈ တွၼ်ႈတႃႇလုၵ်ႈပေႃးတေလႆႈႁဵၼ်းသုင်သုင်ၼၼ်ႉ ဢမ်ႇမီးငိုၼ်းၼႆ ဢမ်ႇတွၼ်ႉဝႃႈႁင်းလုၵ်ႈ တိုၼ်းဝႃႈႁႃငိုၼ်းၵမ်ႉထႅမ်လုၵ်ႈလႆႈတႃႇသေႇယဝ်ႉ။
လုၵ်ႈယိင်းသၢဝ်ၵေႃႉယႂ်ႇၼၼ်ႉၵေႃႈ လႆႈပဵၼ်ၾၼ်တၢင်မႄႈမၼ်းယဝ်ႉ။ “သမ်ႉဝႃႈတူဝ်ၵဝ်ႇဢမ်ႇလႆႈႁဵတ်းႁႂ်ႈထိုင်ၾၼ်ၵေႃႈ လုၵ်ႈယိင်းဢၼ်လႆႈႁဵတ်းၼၼ်ႉ မၼ်းၵေႃႈမိူၼ်ၼင်ႇတူဝ်ၵဝ်ႇလႆႈႁဵတ်းယဝ်ႉ”။
သမ်ႉဝႃႈဢမ်ႇၸႂ်ႈၼႃႈႁိူၼ်းဢၼ်မၢၵ်ႈမီးလီပဵၼ်ၼႆသေတႃႉၵေႃႈ တွၼ်ႈတႃႇလုၵ်ႈလၢင်းၼၼ်ႉ ပေႃႈမႄႈတိုၼ်းဢမ်ႇပၼ်ႁႂ်ႈလႆႈၼႃႈလဵၵ်ႉၽႂ်ယဝ်ႉ၊ လုၵ်ႈယိင်းသၢဝ် မီးၵေႃႉႁၵ်ႉပဵၼ်သထေး ဢၢၼ်းတေႇၼႃႈႁိူၼ်း ၵူၺ်းၵႃႈ ႁိူၼ်းၽၢႆႇၽူႈၸၢႆး ဢမ်ႇလႆႈၸႂ်လုၵ်ႈယိင်းသၢဝ်ၶဝ်လႄႈ သွင်ၽူဝ်မေးၵေႃႈ ပဵၼ်ဢၼ်လႆႈမႆႈၸႂ်မႃးယဝ်ႉ။
ဢူဝ်းဢႄးသုၼ်းၵေႃႈ တေႃႈၼင်ႇၼၼ် သင်လုၵ်ႈယိင်းမၼ်းလႆႈပဵၼ်လုၵ်ႈပႂ်ႉႁိူၼ်းၼၼ်ႉ ၸၢတ်ႈပၢၼ်လုၵ်ႈယိင်းမၼ်းၵေႃႈ တေႃႈတေပဵၼ်မႄႈၸဝ်ႈႁိူၼ်းၵူၺ်းၼႆသေတႃႉ မိူဝ်ႈလုၵ်ႈမၼ်းၵျိူၵ်ႈၵေႃႈ ၵႃႈတေလႆႈယွမ်းယဝ်ႉ။
ၵူၺ်းၵႃႈ လုၵ်ႈယိင်းမၼ်းၵေႃႈ လႆႈတတ်းၶၢတ်ႇပႅတ်ႈၽူႈၸၢႆးၵေႃႉဢၼ် ႁၵ်ႉၵၼ်မႃးႁိုင်ၼၼ်ႉ မၼ်းလႆႈလၢတ်ႈတီႈၽူႈၸၢႆးၵေႃႉၼၼ်ႉဝႃႈ “သမ်ႉဝႃႈႁၵ်ႉသူယူႇၵေႃႈ ႁဝ်းၵေႃႈႁၵ်ႉတူဝ်ႁဝ်းမိူၼ်ၵၼ်” ပေႃးဝႃႈမၼ်းတႄႇၼႃႈႁိူၼ်းၸွမ်းၵူၼ်းၵေႃႉၼႆႉ ဢူႈမႄႈမၼ်းတေလႆႈတိူဝ်ႉၸႂ်လႄႈ မၼ်းတေဢမ်ႇသိူဝ်းၸႂ်လႆႈၼႆၼၼ်ႉယဝ်ႉ။
လုၵ်ႈယိင်းသၢဝ်ၼၼ်ႉၵေႃႈ လႆႈထူပ်းၺႃးၵေႃႉၵူႈဢၼ် မိူၼ်ၼင်ႇဢူႈၶဝ် ဢုၼ်ႇၸႂ် ၶဝ်ႈၸႂ် လုမ်းလႃးတူၺ်းထိုင် ဢမ်ႇဝႃႈယူႇတီႈလႂ်ၵေႃႈ မႆႈၸႂ်ယူႇတႃႇသေႇ၊ မႄႈၸဝ်ႈၵေႃႈလႆႈၸႂ် လုၵ်ႈယိင်းသၢဝ်ၶဝ် တွၼ်ႈတႃႇတေသူင်ႇလုၵ်ႈယိင်းပၼ်ၵူၼ်းၵေႃႉၼိုင်ႈလုမ်းလႃးၼၼ်ႉ တွၼ်ႈတႃႇၶဝ်တႄႉ ဢမ်ႇၸႂ်ႈၽူႈမၢၵ်ႈမီးလီပဵၼ် ၵူၺ်းပဵၼ်ၵူၼ်းၵေႃႉဢၼ်ၸႂ်လီတွၼ်ႈတႃႇလုၵ်ႈၶဝ်ၼၼ်ႉၵူၺ်း ႁႂ်ႈလုၵ်ႈလႆႈယူႇတီႈဢၼ်လီ ၼၼ်ႉယဝ်ႉ။
ယင်းၵွၼ်းသိၵ်းၼၼ်ႉၵေႃႈ ပဵၼ်ၵူၼ်းဢၼ်ႁၵ်ႉလုၵ်ႈမၼ်းတႄႉတႄႉလႄႈ မၼ်းတေၵႆႉၵႆႉလၢတ်ႈတီႈလုၵ်ႈမၼ်းတႃႇသေႇဝႃႈ “ပေႃးဝႃႈလုၵ်ႈႁဵတ်းဢမ်ႇလႆႈယဝ်ႉၵေႃႈ ပွၵ်ႈမႃးၶိုၼ်းလႄႈၼႃႈ မီးပေႃႈပႂ်ႉႁပ်ႉလုၵ်ႈဝႆႉယူႇတႃႇသေႇ” ဢမ်ႇဝႃႈ မိူဝ်ႈလုၵ်ႈၶိုၼ်ႈႁူင်းႁဵၼ်းဝၼ်းဢွၼ်တၢင်းသုတ်း၊ လုၵ်ႈလႅၼ်ႈၶေႉပိူၼ်ႈ၊ လုၵ်ႈၵႂႃႇၶိုၼ်ႈၸၼ်ႉၸွမ်၊ လုၵ်ႈတေႇၼႃႈႁိူၼ်း။
လိူဝ်သေလုၵ်ႈယိင်းယဝ်ႉမီးလုၵ်ႈၸၢႆးၵေႃႉၼိုင်ႈ ပဵၼ်ၵူၼ်းဢမ်ႇပေႃးလႆႈလွင်ႈသေၵႃႈႁိုဝ် ၼၼ်ႉၵေႃႈ ယူႇႁူင်းႁဵၼ်းဢမ်ႇသုတ်းသေ ဢဝ်ၽူႈယိင်းပႃးတွင်ႉမႃးယူႇတီႈႁိူၼ်း သမ်ႉဝႃႈႁဵတ်းႁႂ်ႈဢူႈမႄႈႁူဝ်ၶႆႈယူႇသေတႃႉ ၶဝ်ၵေႃႈယင်းတိုၵ်ႉႁပ်ႉလႄႈလဵင်ႉလူလီလီယူႇ။
လုၵ်ႈၸၢႆးႁဵတ်းၵေႃႉၽိတ်းၵူၼ်းလႄႈ ထိုင်တီႈပေႃးလႆႈတူၵ်းၶွၵ်ႈ တွၼ်ႈတႃႇလုၵ်ႈႁႂ်ႈပေႃးလွတ်ႈဢွၵ်ႇမႃးၼၼ်ႉ လႆႈၶၢႆႁိူဝ်းဢၼ်ႁႃလဵင်ႉၼႃႈႁိူၼ်းၶဝ်မႃးတင်းၸူဝ်ႈၼၼ်ႉ ထုတ်ႇတူဝ်ဢွၵ်ႇမႃးယဝ်ႉ။
ဢူႈမႄႈၼၼ်ႉ ဢမ်ႇတွၼ်ႉပွႆႇၽႃႈလုၵ်ႈလႄႈ သမ်ႉဝႃႈလုၵ်ႈၼၼ်ႉ ဢမ်ႇလီသေတႃႉ ဢူႈမႄႈၼၼ်ႉၵေႃႈယင်းတိုၵ်ႉႁၵ်ႉလႄႈမႆႈၸႂ်ယူႇတႃႇသေႇ။
သမ်ႉဝႃႈမိူဝ်ႈတႄႇ ဢူဝ်းဢႄးသုၼ်းလႄႈ ယင်းၵွၼ်းသိၵ်း တေပဵၼ်ၼႃႈႁိူၼ်း ဢၼ်ဢမ်ႇမီးသင် တေႃႈၼင်ႇၶဝ်ႈၼႂ်းယွင်ၵူၺ်းၵေႃႈဢမ်ႇမီးသေဢိတ်းၼၼ်ႉ လႆႈၶဵင်ႇတႃႉသေ မီးမႃးႁိူဝ်းလမ်းၼိုင်ႈ ဢၼ်ၼၢႆးမွၼ်ႇၶဝ်ဢဝ်ငိုၼ်းၵဵပ်းတင်းမူတ်းပၼ်ၶႃလႄႈ လႆႈၶၢႆၵႂႃႇပႅတ်ႈမိူဝ်ႈလုၵ်ႈၸၢႆးၶႃတူၵ်းၶွၵ်ႈသေတႃႉၵေႃႈ မိူဝ်ႈတိုၵ်ႉမီးသၢႆၸႂ်ယူႇ ႁူႉၵႃႈတိုၼ်းတေမီးတၢင်းဢွၵ်ႇလႄႈ မီးၵၢၼ်သင်ဢၼ်ႁဵတ်းလႆႈၵေႃႈလႆႈႁဵတ်းၵႂႃႇသေ၊ မီးငိုၼ်းၵဵပ်းဝႆႉယူႇၽွင်ႈယဝ်ႉ လႆႈပိုတ်ႇၽုၺ်ႇလၢၼ်ႉၵႂႃႇ လၢၼ်ႉၶဝ်ၵေႃႈပဵၼ်လၢၼ်ႉဢၼ်ၶၢႆလီ ၼႃႈၵၢၼ်ၶဝ်ၵႂႃႇလႆႈလီၵေႃႈ သမ်ႉပေႃးထဝ်ႈယဝ်ႉ၊ ထဝ်ႈယဝ်ႉၵေႃႈ တၢင်းပဵၼ်ၵေႃႈမီးမႃး ယင်းၵွၼ်းသိၵ်းၵေႃႈ မီးတၢင်းပဵၼ်ၵႅၼ်ႇသႃႇသေ ဢမ်ႇဝႃႈပဵၼ်သင်မႃးၵေႃႈ မီးမေးမႆႈၸႂ်လုမ်းလႃးတူၺ်းထိုင်လႄႈ မီးလုၵ်ႈၸွမ်းၸွႆႈထႅမ်ပၼ် တေႃႇထိုင်သမ်ႉပေႃးလူႉတၢႆၵႂႃႇယဝ်ႉ။
ၸွမ်းၼင်ႇလွင်ႈၼွၼ်းၾၼ် ဢူဝ်းဢႄးသုၼ်းၸဵမ်မိူဝ်ႈၵေႃႉလဵၵ်ႉ ဢၼ်ၶႂ်ႈပဵၼ်ၽူႈတႅမ်ႈလင်ႇၵႃႇၵႂၢမ်းဝွၵ်းၼႆၼၼ်ႉၵေႃႈ မၼ်းၵေႃႈႁဵတ်းလႆႈလႄႈ လႆႈတႅမ်ႈႁဵတ်းပပ်ႉဢွၵ်ႇမႃး ပၼ်ပိူၼ်ႈလႆႈလူယူႇယဝ်ႉ။
လွင်ႈၼွၼ်းၾၼ် ယိူင်းဢၢၼ်းၼၼ်ႉ သမ်ႉဝႃႈႁဝ်းတေဢႃႇယုယႂ်ႇယဝ်ႉသေတႃႉ ပေႃးဝႃႈႁဝ်းဢမ်ႇပွႆႇၽႃႈမၼ်း ႁူႉတိုၼ်းတေႁဵတ်းလႆႈယူႇ မၼ်းဢမ်ႇလႆႈယူႇတီႈဢႃႇယု မၼ်းယူႇတီႈတၢင်းၶတ်းၸႂ်ႁဝ်း ၸွင်ႇတေႁဵတ်းပဵၼ်လႆႈၼၼ်ႉၵူၺ်း။
ယင်းၵွၼ်းသိၵ်း လၢတ်ႈ “သမ်ႉဝႃႈပူၼ်ႉမႃးလၢႆသိပ်းပီယဝ်ႉၵေႃႈ ဢူဝ်းဢႄးသုၼ်းၼၼ်ႉ တိုၵ်ႉမိူၼ်ၵဝ်ႇယူႇ” ၼႂ်းသၢႆတႃမၼ်းတူၺ်း ဢူဝ်းဢႄးသုၼ်းၼၼ်ႉ ဢမ်ႇတွၼ်ႇလႅၵ်ႈလၢႆႈၸွမ်းႁၢင်ႈၽၢင်သေပွၵ်ႈ ယင်းတိုၵ်ႉႁၼ်ႁၢင်ႈလီယူႇတႃႇသေႇၼၼ်ႉယဝ်ႉ။ ပေႃးဝႃႈလွင်ႈၽူဝ်လီၼႆတႄႉ ၽႂ်ၽႂ်ၵေႃႈၶွႆဢူဝ်းဢႄးသုၼ်းလိူဝ်ပိူၼ်ႈၼၼ်ႉယဝ်ႉ။
မိူဝ်ႈလႆႈတူၺ်းၸိူင်းႁူဝ်ၼႆႉယဝ်ႉ မၼ်းၼႄႁႂ်ႈႁၼ်ၽဝၸၢတ်ႈပၢၼ် ၼႃႈႁိူၼ်းၼိုင်ႈလင်ၼၼ်ႉ ဢမ်ႇၸႂ်ႈဝႃႈႁၵ်ႉၵၼ်လႄႈ ယူႇၸွမ်းၵၼ်ၵႂႃႇၵေႃႈယဝ်ႉယဝ်ႉ၊ တႃႇၸႂ်ႉၸၢတ်ႈပၢၼ်ၵႂႃႇၸွမ်းၵၼ်ၼၼ်ႉလမ်ႇလွင်ႈၼႃႇ မၢင်ပွၵ်ႈၵေႃႈသိူဝ်းဢိူဝ်ႈ၊ မၢင်ပွၵ်ႈၵေႃႈ တေလႆႈထူပ်းယဝ်ႉ လွင်ႈၶဵင်ႇတႃႉ ဢၼ်ၵပ်ႉၵိၼ်းၼႆၵေႃႈ ၸွႆႈၵၼ်ဢဝ်ၶၢမ်ႈပူၼ်ႉမၼ်းၵႂႃႇႁႂ်ႈလႆႈလႄႈ မိူဝ်ႈၵေႃႉၼိုင်ႈသိူဝ်းၵေႃႈ ပဵၼ်ႁႅင်းပၼ်ထႅင်ႈၵေႃႉၼိုင်ႈႁႂ်ႈလႆႈယုမ်ႉၶူဝ်မႃး၊ မိူဝ်ႈၵေႃႉၼိုင်ႈတုၵ်ႉၵေႃႈ ထႅင်ႈၵေႃႉၼိုင်ႈၸွမ်းပၼ်ႁႅင်းႁႂ်ႈလုၵ်ႉတိုၼ်ႇ ၸိုၼ်ႇၵႂႃႇၸွမ်းၵၼ်လွႆးလွႆး ၼၼ်ႉယဝ်ႉ။
ဢၼ်မႃးတႅမ်ႈလၢတ်ႈၶႆႈၼႄၼႆႉတႄႉ ပဵၼ်တၢင်းႁၼ်ထိုင်ၽူႈတႅမ်ႈလိၵ်ႈၵူၺ်း ဢမ်ႇၸႂ်ႈၼိူဝ်ႉၸိူင်းတင်းမူတ်း ယင်းတေမီးထႅင်ႈတွၼ်ႈသွၼ်လီတင်းၼမ်ၼၼ်ႉယဝ်ႉ။
တႅမ်ႈ-သႅၼ်ငဝ်း
30/03/2025
