တွၼ်ႈၵဝ်ႈ
ႁဵဝ်းငိုၼ်းၼၼ်ႉၵေႃႈ တင်းပႆတင်းလၢတ်ႈၵႂႃႇၸူး ၸၢႆးယွတ်ႈ−
“ဝၼ်းၶိုၼ်းယိင်းဢမ်ႇဝူၼ်ႉႁၼ် ဝၼ်းဢၼ်ဢမ်ႇမီးပီႈ ၼႂ်းၸႂ်ယိင်းဝူၼ်ႉထိုင် ၶႂ်ႈၶိုၼ်းၶိုင်ၶုၵ်းထူပ်းယူႇၵူႈယၢမ်းယဝ်ႉ၊ သင်လႆႈႁူပ်ႉၺႃးၵၼ် တေဢၢၼ်းၶိုၼ်ၶိုၼ်းၵႂၢမ်း လွင်ႈလႆႈလၢတ်ႈဝႆႉဝၼ်းၼၼ်ႉၶိုၼ်းဢေႃႈ သမ်ႉဝႃႈယိင်းဢမ်ႇထိူၵ်ႈတၢၼ်ႇလႂ်ၵေႃႈ၊ မိူဝ်ႈယိင်းလႆႈႁၵ်ႉပီႈၵႂႃႇယဝ်ႉ ယိုင်ႈႁၢမ်ႈယိုင်ႈထိင်းယၢပ်ႇ ယိုင်ႈႁူႉဝႃႈပီႈတေၽၢတ်ႇ ဢူၵ်းႁူဝ်ၸႂ်ယိင်းၸဵပ်းၵႅၼ်းလိူဝ်ႁႅင်း၊ ယိင်းတေဢမ်ႇပၢႆႈႁႂ်ႈၵႆသူလႄႈ ႁႂ်ႈယိင်းလႆႈပဵၼ်ၵေႃႉယူႇႁူမ်ႈပွင်းသွင်၊ ၵေႃႉႁူမ်ႈပွင်ၶႅပ်ႇၶၢင်ႈ၊ ၵေႃႉယဵပ်ႈယၢင်ႈႁူမ်ႈပွင်းပႆ ပီႈၵႂႃႇလႂ်ၵေႃႈႁႂ်ႈယိင်းၼွင်ႉပႆၸွမ်းၸွင်ႇတေလႆႈယူႇႁိုဝ်”
“ၸၢႆးပီႈပဵၼ်ၵေႃႉသိုၵ်း ဢၼ်ဢမ်ႇမီးၸၢတ်ႈပၢၼ်မိူၼ်ၵူၼ်းႁဵတ်းၵၢၼ် ႁႃလဵင်ႉလုမ်းလႃးသူႁႂ်ႈတဵမ်ထူၼ်ႈမိူၼ်ၼင်ႇပိူၼ်ႈလႆႈ၊ ဢမ်ႇမီးတီႈသဝ်းထင်ပၼ်ႁႂ်ႈသူလႆႈယူႇလီသိူဝ်းသႃႇ၊ ဢမ်ႇမီးၶၢဝ်းယၢမ်းပၼ်သူၼွင်ႉလႆႈၵူႈမိူဝ်ႈ ယူႇၸွမ်းၸၢႆး ယိုင်ႈၶႅၼ်းတေႁဵတ်းႁႂ်ႈၼွင်ႉလႆႈမႃးယၢပ်ႇၸွမ်းၵူၺ်း လိူဝ်သေႁၵ်ႉၼွင်ႉ ၸၢႆးဢမ်ႇမီးသင်ပၼ်လႆႈသေလွင်ႈ ယွၼ်ႉတၢင်းႁၵ်ႉၵူၺ်းၼၼ်ႉ ဢမ်ႇထိူၵ်ႈႁႂ်ႈယိင်းၼွင်ႉၵဝ် လႆႈမႃးသဝ်းႁူမ်ႈတုၵ်ႉၸွမ်းလေႃႇၼႃႈ”
“ပီႈဢူၺ် တၢင်းတုၵ်ႉလူင်ၼႆႉ တေတုၵ်ႉတၢၼ်ႇႁူဝ်ၸႂ်ယိင်းယၢမ်းၼႆႉလႆႈယူႇႁႃႉ၊ တၢင်းယၢပ်ႇလူင်ၼႆႉတေယၢပ်ႇတၢၼ်ႇ ဢၼ်ယိင်းဢမ်ႇလႆႈႁူပ်ႉသူထႅင်ႈၼၼ်ႉယူႇႁိုဝ်၊ ၼမ်ႉသွင်ပုင်းၼၵ်းၼႃႇတၢၼ်ႇၵေႃႈ ယင်းဢမ်ႇလႆႈၵွၼ်းၽၢႆႇလဵဝ်သေႁၢပ်ႇၶႃႈလူး ယၢပ်ႇတၢၼ်ႇလႂ်ၵေႃႈ လီလိူဝ်သေၵွၼ်းႁၢပ်ႇၼမ်ႉပုင်းလဵဝ်ယူႇၶႃႈ၊ မႆႉၵၢၼ်းပႆႇႁၵ်း ဢဝ်ၼၵ်းတၢၼ်ႇလႂ်ၵေႃႈ ယိင်းပေႉႁၢပ်ႇလႆႈယူႇ”
“ၼွင်ႉဢူၺ် ၵၢၼ်းဢမ်ႇႁၵ်းၵေႃႈယႃႇၶႂ်ႈဢဝ်ၼၵ်းလႄႈ ႁူဝ်မႃႇၼွင်ႉပီႈတေၸဵပ်းႁႅင်းဢိူဝ်ႈ”
“ၸဵပ်းၵေႃႈဢမ်ႇတၢၼ်ႇပီႈၽႃႈယိင်းၼွင်ႉမိူဝ်းယၢၼ်ၵႂႃႇ ဢမ်ႇတၢၼ်ႇၵေႃႉယူႇထႃႈ မွင်းဝၼ်းဢၼ်တေဢမ်ႇမႃးထိုင်လႆႈၼၼ်ႉလႃႈ”
“ၸိုင်ၼွင်ႉယိင်းပီႈသမ်ႉဝႃႈၼၼ်လႃႇ ပီႈၵေႃႈတေႃႈႁိုဝ်ၶႂ်ႈမိူဝ်းၽၢတ်ႇ၊ ၶႂ်ႈယၢၼ်ၶၢတ်ႇသေၼွင်ႉယိင်းႁဝ်း ၸူးၸႂ်တႄႉၶႂ်ႈသဝ်းၸမ်ယူႇသေႇသေႇယဝ်ႉ၊ ပေႃးတေၶႂ်ႈယွၼ်းတေႇႁူမ်ႈၽၢၵ်ႈ ပီႈၵူၺ်းပေႃးတုၵ်ႉယၢပ်ႇယဝ်ႉ တေႁႂ်ႈၼွင်ႉမႃးယၢပ်ႇၸွမ်း မၼ်းႁိုဝ်ပဵၼ်၊ ၵွပ်ႈႁၵ်ႉလႄႈဢမ်ႇၶႂ်ႈႁၼ်ၼွင်ႉယိင်းႁၵ်ႉဢွၼ်ႇပီႈ လႆႈမႃးၶီၵွပ်ႈၸၢႆးၼၼ်ႉယဝ်ႉ”
“ထၢၼ်ႈဝႃႈပီႈႁၵ်ႉတေႉၵူဝ်လႆႈၽၢတ်ႇ ႁိုဝ်တေၵူဝ်ၼွင်ႉယိင်းယၢပ်ႇၸႂ်လႃႇ သမ်ႉဝႃႈတေတုၵ်ႉတေယၢပ်ႇၵေႃႈ ၼွင်ႉယိင်းၵွၼ်းႁၢပ်ႇပေႉလႆႈယူႇၼႆ၊ ဢၼ်ဢမ်ႇၶႂ်ႈႁႂ်ႈၼွင်ႉသၢင်ႈသဝ်းႁွမ်းပႆၸွမ်းလႆႈၼၼ်ႉ ၵွပ်ႈၸႂ်ႁၵ်ႉပီႈမီးမိူဝ်ႈတေႃႇၼႃႈၵူၺ်းႁိုဝ်၊ ပေႃးပီႈဢမ်ႇပေႉၸႂ် ႁႂ်ႈယိင်းပဵၼ်ၵေႃႉၶႅပ်ႇၶၢင်ႈၶၢင်းၸမ် ႁူမ်ႈတုၵ်ႉၸွမ်းၸၢႆးလႆႈၵေႃႈ တေႃႈတေၸၢင်ႈႁဵတ်းႁိုဝ် ၼွင်ႉယိင်းၵေႃႈ တေႃႈတေလႆႈယၢင်ႈၵႂႃႇတၵ်းၼမ်ႉႁင်းၵူၺ်းယဝ်ႉ”
ႁဵဝ်းငိုၼ်းၵေႃႈ ယဵပ်ႈယၢင်ႈပႆပူၼ်ႉၵႂႃႇပႅတ်ႈၸၢႆးယွတ်ႈယူႇယဝ်ႉ။ ၵူၺ်းဢမ်ႇထၢင်ႇဢမ်ႇထိူမ် သဵင်ၵွင်ႈလၼ်ႇလင်မေႃးႁိမ်းႁူလႄႈ ႁဵဝ်းငိုၼ်းၼၼ်ႉတႄႉဢမ်ႇပဵၼ်သင် ၵူၺ်းၵႃႈ မိူဝ်ႈဝၢႆႇယၵ်ႉတူၺ်းၵႂႃႇၶိုၼ်းတၢင်းလင်မၼ်းၼၼ်ႉ လႆႈႁၼ်လိူတ်ႈလႅင်ၸၢင်းဢၢင်းၸိုမ်းဢွၵ်ႇမႃး တီႈဢူၵ်းၽၢႆႇသၢႆႉၸၢႆးယွတ်ႈၼၼ်ႉ လႄႈ သဵင်ႁွင်ႉသႅၼ်ႇႁဵဝ်းငိုၼ်းၼင်ႇတူၵ်းၸႂ် “ပီႈယွတ်ႈ!!” တင်းႁွင်ႉတင်းႁႆႈလူင်ဝႆႉ၊ ၸၢႆးယွတ်ႈၼၼ်ႉၵေႃႈ မိူဝ်ႈဢၼ်တိုၵ်ႉမီးႁႅင်းဝႆႉယူႇၼၼ်ႉ ၶဝ်ႈၵွတ်ႇႁႄႉဢဝ်ႁဵဝ်းငိုၼ်းသေ မိုဝ်းမၼ်းၶွၼ်ၼိုင်ႈၼၼ်ႉၵေႃႈ လၢၵ်ႈဢဝ်ၵွင်ႈပွတ်း ဢၼ်သိူင်ႇဝႆႉၼႂ်းသိူဝ်ႈမၼ်းဢွၵ်ႇမႃးယိုဝ်းၵႅတ်ႇဝႆႉသေ ဢဝ်ႁဵဝ်းငိုၼ်းပႅပ်ႉဝႆႉယဝ်ႉ၊ တူဝ်မၼ်းၵေႃႈ လွမ်ငွႆးႁႃတီႈၵူၼ်းၵေႃႉဢၼ်ယိုဝ်းမႃးၼၼ်ႉလႄႈ မိူဝ်ႈႁၼ်တူဝ်ယဝ်ႉၵေႃႈ ငွႆးၶဝ်ႈၵႂႃႇၸမ်ၸမ်သေ ဢဝ်ၵွင်ႈမၼ်းၼၼ်ႉယိုဝ်းသႂ်ႇပႃႈလင်ၵမ်းၼိုင်ႈ တၢင်းၼႃႈထႅင်ႈၵမ်းၼိုင်ႈ သိုဝ်ႈသႂ်ႇပၼ်ၵွၵ်းႁူဝ် လႄႈ ႁူဝ်ၸႂ်ၵူၼ်းၵေႃႉၼၼ်ႉၵမ်းလဵဝ် ၵူၼ်းၵေႃႉၼၼ်ႉၵေႃႈ လူမ်ႉဢူပ်ႇထူတၢႆၵႂႃႇတီႈၼၼ်ႈယူႇ။ မၼ်းၵေႃႈတူၺ်းပေႃးၸွတ်ႇပေႃးၸေး မိူၼ်တေလွတ်ႈၽေးယဝ်ႉၼႆလႄႈ ၸင်ႇလႆႈပွၵ်ႈႁူၼ်မႃးၸူးၶိုၼ်းႁဵဝ်းငိုၼ်းဢၼ်ပႂ်ႉဝႆႉၼၼ်ႉယဝ်ႉ။
ႁဵဝ်းငိုၼ်းၼၼ်ႉၵေႃႈ ၼင်ႈငွမ်တေႉငွမ်ဝႃႈယူႇယဝ်ႉ၊ မိူဝ်ႈလႆႈႁၼ်ၸၢႆးယွတ်ႈမႃးၸူးမၼ်းၶိုၼ်းႁဵတ်းၼၼ်ၵေႃႈ ၸင်ႇတေလူမ်ၸႂ်မႃးၶိုၼ်း၊ ၵူၺ်းၵႃႈ မိူဝ်ႈၶိုၼ်းႁၼ်တီႈဢူၵ်းၸၢႆးယွတ်ႈ ဢၼ်မၢတ်ႇၸဵပ်းယူႇၼၼ်ႉ
“ပီႈၸွင်ႇၸဵပ်းႁိုဝ် ပီႈၸွင်ႇတေပဵၼ်သင်ႁိုဝ်” တင်းမိပ်ႇၼမ်ႉတႃႁွင်ႉႁႆႈတေႃႇၸၢႆးယွတ်ႈယူႇ။
“သင်ဝႃႈႁဝ်းတၢႆ ႁဝ်းတၢႆၸဵမ်ၵႆႈယဝ်ႉယိင်းဢူၺ်ႉ မၼ်းဢမ်ႇလႆႈတိူဝ်ႉသိုဝ်ႈႁူဝ်ၸႂ်ၸၢႆးႁဝ်းၼႃ မီးၼွင်ႉၵူၺ်းဢိူဝ်ႈဢၼ်ယိုဝ်းတိူဝ်ႉလႆႈ”
“ယင်းတိုၵ်ႉလၢတ်ႈၼမ်လႆႈယူႇ”
ႁဵဝ်းငိုၼ်းၼၼ်ႉၵေႃႈ ပႅတ်ႈႁၢပ်ႇၼမ်ႉမၼ်းသေ ၽႃၽိူဝ်ဢဝ်ၸၢႆးယွတ်ႈပွၵ်ႈမိူဝ်းႁိူၼ်းၶဝ်ၵႂႃႇ ယူႇယဝ်ႉ။ မေႃယႃၸၢႆးၼွင်ႉၵေႃႈ မိူဝ်ႈႁူႉဝႃႈၸၢႆးယွတ်ႈမၢတ်ႇၸဵပ်းႁႅင်းၼႆ ၼႅတ်ႈမႃးယူတ်းယႃပၼ်ၵမ်းလဵဝ်ယူႇ။
ၸွမ်းလူၺ်ႈၸၢႆးယွတ်ႈ ထုၵ်ႇလၵ်ႉငွႆးယိုဝ်းၼႆႉလႄႈ မိူၼ်ဝႃႈၸုမ်းၶဝ်ၼၼ်ႉ တေသိုပ်ႇယူႇၼႂ်းဝၢၼ်ႈၼႆႉဢမ်ႇလႆႈထႅင်ႈယဝ်ႉ တင်းၸုမ်းၶဝ်တင်းၵူၼ်းမိူင်း တေဢမ်ႇမီးလွင်ႈလွတ်ႈၽေးၼႆၵေႃႈ၊ ဢွၼ်ၵၼ်ႁႅၼ်းၶူဝ်းႁႅၼ်းလဵင်းၵၼ် လွမ်လွမ်ဢွၵ်ႇၵႂႃႇ သမ်ႉပေႃးဢမ်ႇတၼ်းသူင်ႇတၼ်းသင်ႇ ၵူၼ်းၼႂ်းဝၢၼ်ႈၶဝ်ၼၼ်ႉသေဢိတ်းယဝ်ႉ။
ၵၢင်ၼႂ်မိူင်းလႅင်းမႃး ႁိူၼ်းဢၼ်ၸုမ်းယုင်းလၢႆးၶဝ် မႃးႁဵတ်းၶႅၵ်ႇသဝ်းယူႇၼၼ်ႉၵေႃႈ သမ်ႉပေႃးဢမ်ႇႁၼ်ၸုမ်းၶဝ်သေၵေႃႉယဝ်ႉ၊ လိူဝ်သေၵိုတ်းဝႆႉၽိုၼ်လိၵ်ႈသူင်ႇသင်ႇၵူၺ်း။ တီႈႁိူၼ်းႁဵဝ်းငိုၼ်းၶဝ်ၵေႃႈ တေႃႈၼင်ႇၼၼ် သမ်ႉပေႃးယဵၼ်လူင်ဝႆႉယူႇ ယွၼ်ႉႁဵဝ်းငိုၼ်းၵေႃႈ လႆႈၶႂၢင်ႉမႄႈသေ ၵႂႃႇၸွမ်းလုမ်းလႃးတူၺ်းထိုင် ၸၢႆးယွတ်ႈယူႇယဝ်ႉ။
သုတ်းယဝ်ႉ။
တႃႇတွင်း။ ။ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆး ဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈပဵၼ်တေႉ။
ၽူႈတႅမ်ႈလိၵ်ႈၵေႃႈ ယွမ်းႁပ်ႉယူႇဝႃႈ တေမီးတီႈၽိတ်းတီႈပိူင်ႈ တီႈႁိူင်ႈတီႈၵိူင်းတင်းၼမ် ၼမ်ႉၵႂၢမ်းဢမ်ႇၸိုဝ်ႈဢမ်ႇထုၵ်ႇမႅၼ်ႈၵေႃႈတေပႃး၊ ဝေႃးႁႃႇရၵႂၢမ်းတႆးဢမ်ႇၽဵၼ်ႈၵေႃႈတေမီးယူႇ၊ တူဝ်လိၵ်ႈတေႁူင်ႈတေႁၢႆတေၽိတ်း တီႈဢမ်ႇထတ်းႁၼ်ၺႃးၵေႃႈ ယင်းတေမီးယူႇၶႃႈ။
ႁႂ်ႈပဵၼ်ၸိူင်းဢၼ်ပၼ်တၢင်းမူၼ်ႈၸႂ်ၽူႈလူလိၵ်ႈႁဝ်းၶဝ်သေၵမ်း။
ပၢႆၵမ်− သႅၼ်ငဝ်း
12 June 2023-29 June 2023
ၼပ်ႉယမ်ထိုင်ၽူႈလူလိၵ်ႈႁဝ်းၶဝ်ယူႇဢေႃႈ။
