တွၼ်ႈပႅတ်ႇ
ယွၼ်ႉပဵၼ်ၶိင်ႇၶၢဝ်းၶဝ်ႈႁိုဝ်ႉမႃးယဝ်ႉလႄႈ ၵူၼ်းဝၢၼ်ႈၶဝ်ၵေႃႈ ႁိပ်ႈၼႅတ်ႈဢွၼ်ၵၼ်ၽုၵ်ႇမၢၵ်ႇၶဝ်ႈတဝ်ႈၼမ်ႉၵၼ်ယူႇ။ တပ်ႉသိုၵ်းၶိုၵ်ႉတွၼ်းယုင်းလၢႆးၶဝ်ၵေႃႈ လႆႈဢွၼ်ၵၼ်ၵႂႃႇၸွႆႈသေ ၸႃႉပဵၼ်မၢဝ်ႇပဵၼ်သၢဝ်ၵေႃႈ ဢုပ်ႇၵၼ်ႁဵတ်းၵၢၼ်ၵႂႃႇ ပဵၼ်ၵူႈပဵၼ်တွႆး၊ ၸႃႉၸိူဝ်းပဵၼ်မႄႈႁိူၼ်းပေႃႈႁိူၼ်း ၵူၼ်းလူင်ၶဝ်တႄႉၵေႃႈ ဢုပ်ႇၵျေႃႇႁုၼ်ႉၼူဝ်သိူဝ်းၶူဝ်ၸွမ်းၵၼ်ၵႂႃႇယူႇ။
ႁဵဝ်းငိုၼ်းၼၼ်ႉၵေႃႈ ဝၢႆးသေႁူႉဝႃႈၸၢႆးယွတ်ႈပဵၼ်သိုၵ်းၼႆ ဢမ်ႇပေႃးႁတ်းႁူပ်ႉတေႃႇၼႃႈၵႃႈႁိုဝ် လႄႈ ၶတ်းၸႂ်ပၢႆႈၼႃႈပၢႆႈတႃယူႇတႃႇသေႇယဝ်ႉ။ ၵူၺ်းၵႃႈ ဝၼ်းမိူဝ်ႈၼႆႉ ၸၢႆးယွတ်ႈၵေႃႈ ၶတ်းၸႂ်ၶဝ်ႈႁႃမၼ်း ဢမ်ႇပၼ်ႁႂ်ႈလွတ်ႈၵႂႃႇလႆႈၼႆယူႇ။
“ၼွင်ႉယိင်းဢူၺ်..ပီႈဝူၼ်ႉၸိူင်ႉႁိုဝ်ၵေႃႈဢမ်ႇပွင်ႇ ပီႈၶႂ်ႈယွင်ႇၸွမ်းမၼ်းၼႃႇယဝ်ႉ ယွၼ်ႉသင်လႄႈ ၼွင်ႉယိင်းၵဝ် တေလႆႈလႆႈပၢႆႈၼႃႈပီႈၵႂႃႇတိၵ်းတိၵ်းလႃႇ.. ပီႈႁူႉယူႇဝႃႈလႆႈလႅၼ်ယိင်းၵႂႃႇ ပီႈယွမ်းၽိတ်းယူႇ.. ယွၼ်ႉၼႃႈၵၢၼ်ပုၼ်ႈၽွၼ်းလႄႈ ပီႈဢမ်ႇၸၢင်ႈလၢတ်ႈပၼ်ယိင်းၵဝ်ႁႂ်ႈႁၼ်ၸႅင်ႈ ယိုင်ႈလၢတ်ႈယိုင်ႈတေထႅင်ႈလူမ်းၸႂ်လမ်ၵေႃႈ ပီႈတေႃႈတေလၢတ်ႈလႆႈ ၵႂၢမ်းယွမ်းၼွမ်းမဵဝ်းလဵဝ်ၵူၺ်း၊ ယွမ်းၼွမ်းယူႇၼႃႈယိင်းဢူၺ် ၸၢႆးယွမ်းၼွမ်းယဝ်ႉ မႃးႁူပ်ႉတေႃႇၼႃႈဢုပ်ႇၵၼ်ၶိုၼ်း ၸွင်ႇတေလႆႈႁိုဝ် ႁၼ်ၼွင်ႉဢမ်ႇယုမ်ႉၼႃႈၵီႈၸူးၸၢႆးၸိူင်ႉၼႆ ၸႂ်ၸၢႆးမိူၼ်တေတႅၵ်ႇလႅဝ်ၵႂႃႇယဝ်ႉ၊ ၸၢၼ်ႈၸင်းႁဝ်းယဝ်ႉႁိုဝ်၊ ဢိမ်ႇၸၢၼ်ႈႁဝ်းယဝ်ႉႁႃႉ ဝူၼ်ႉႁင်းၵူၺ်းၵေႃႈဢမ်ႇပွင်ႇ ၼွင်ႉၸွႆႈတွပ်ႇပၼ်ၸၢႆးဢိတ်ႉၼိုင်ႈလႄႈ”
ႁဵဝ်းငိုၼ်းၵေႃႈ တင်းမဵတ်ႉၶဝ်ႈမၼ်းၼၼ်ႉသေ ဢွႆတွတ်ႈၸွမ်းၵႂႃႇပႃႈလင် ၸၢႆးယွတ်ႈၼၼ်ႉၵမ်းလုၵ်းၵမ်းလုၵ်းသေယဝ်ႉ။
“ပီႈဢူၺ်.. ယိင်းၼွင်ႉဢမ်ႇထိူၵ်ႈႁၵ်ႉ၊ ဢမ်ႇထိူၵ်ႈၽၢၵ်ႇၽဝၸၢတ်ႈပၢၼ်ယိင်းပၼ်သူလႆႈ၊ ပီႈဢမ်ႇၸႂ်ႈၵေႃႉယူႇမိူင်းၵႆ ယိင်းဢမ်ႇၸၢင်ႈၸပ်းၸွမ်းႁွမ်းပႆႁူမ်ႈသူမိူဝ်း၊ ၽဝၸၢတ်ႈပၢၼ်ယိင်း ႁၵ်ႉမႅၼ်ႈသူၵေႃႈ ႁႂ်ႈမၼ်းယဝ်ႉၵႂႃႇသေ ပေပၼ်ႁႂ်ႈမၼ်းယိုတ်ႈယၢဝ်းၵႂႃႇထႅင်ႈလႃႈ၊ ဝၼ်းၼိုင်ႈဢမ်ႇႁိုင် ပီႈၵေႃႈပေႃးတေၽၢတ်ႇယိင်းပၢႆႈမိူဝ်းၵႂႃႇယဝ်ႉဢမ်ႇၸႂ်ႈႁိုဝ်လႃႇ၊ ဢၢၼ်းႁႂ်ႈပဵၼ်ၵေႃႉမိုတ်ႈၵိုဝ်းၵေႃႈ ယိင်းၼွင်ႉဢမ်ႇႁပ်ႉလႆႈ မိူဝ်ႈလႆႈႁၵ်ႉယဝ်ႉ ယိုင်ႈႁူပ်ႉယိုင်ႈၶႅၼ်းႁၵ်ႉထိုင်ၸႂ် ယိင်းတေၶတ်းၸႂ်ပၢႆႈႁႂ်ႈၵႆသူ ယူႇႁၢင်ႇဝႆႉတေႃႇထိုင်သူတေၽၢတ်ႇ ယိင်းတေဢမ်ႇလႆႈမႃးမွင် ၼင်ႇပီႈလႄႈမႄႈယိင်း လႆႈထူပ်းမႃး”
သမ်ႉဝႃႈၶဝ်လၢတ်ႈဝႃႈႁၵ်ႉယူႇၵူႈၶေႃႈၵူႈၵမ်းၵေႃႈ ၼင်ႇႁၢင်ႈၶေႃႈၵႂၢမ်းၶဝ် တွၵ်ႈတမ်ၸူၵ်ႉသႂ်ႇႁူဝ်ၸႂ်ၸၢႆးယွတ်ႈ ပေႃးဢမ်ႇၸၢင်ႈတွပ်ႇၸူးႁင်ၶိုၼ်းလႆႈ ၼၼ်ႉယဝ်ႉ။
“ပီႈပွင်ႇၸႂ်ယဝ်ႉၼွင်ႉဢူၺ်.. ၸူမ်းယဝ်ႉ ၼွင်ႉလၢတ်ႈၼႄၸိူင်ႉၼႆ ၽဝၸၢတ်ႈပၢၼ်ၸၢႆး ဢမ်ႇလႆႈသၢင်ႈသဝ်းမူၼ်ႈၵတ်းယဵၼ်၊ ၵုမ်ႇလိုပ်ႈလမ်းမူၼ်ႉတိုၵ်းၶဵၼ်၊ တေပဵၼ်ႁိုဝ်တေတၢႆဢမ်ႇလၢမ်းႁူႉလႆႈမိူဝ်ႈလႂ်၊ ဢမ်ႇႁူႉဝၼ်းႁူႉၶိုၼ်း၊ တေလႆႈလိုဝ်ႈမိူဝ်ႈလႂ်၊ သဝ်းတီႈလႂ်၊ ၵႂႃႇတၢင်းလႂ်ထႅင်ႈ။ မၢင်ပွၵ်ႈၵေႃႈယူႇႁႅင်ႈၵိၼ်းၸႂ်၊ ဢမ်ႇမီးႁိူၼ်းပၼ်ႁႂ်ႈၸၢင်ႈလႆႈသဝ်းထင်ပဵၼ်တီႈ၊ တေႁႂ်ႈၼွင်ႉမႃးၸႂ်ႉၸၢတ်ႈပၢၼ်ၸွမ်းၸၢႆးၵေႃႈ ၼွင်ႉတေလႆႈတၢင်းတုၵ်ႉၸွမ်းၵူၺ်း ၸၢတ်ႈပၢၼ်ၽဝၸၢႆးၼႆႉၵေႃႈ ဢမ်ႇထိူၵ်ႈႁႂ်ႈၼွင်ႉမႃးႁၵ်ႉလႆႈမိူၼ်ၵၼ် ၵူၺ်းၵႃႈ ယႃႇႁၢမ်ႈႁႂ်ႈၸၢႆးဢမ်ႇႁၵ်ႉၼွင်ႉလႄႈၼႃႈ ႁၵ်ႉယဝ်ႉမၼ်းႁၢမ်ႈဢမ်ႇလႆႈ..”
ႁဵဝ်းငိုၼ်းၼၼ်ႉၵေႃႈ ၸွမ်းၼင်ႇဢၼ်တူဝ်ထူပ်းမၼ်းလႆႈႁၼ် တီႈပီႈၼၢင်းမၼ်းဢဝ်ၽူဝ်သိုၵ်းၼၼ်ႉလႄႈ လွင်ႈဢၼ်မႄႈၵႆႉၶႆႈၼႄတႃႇသေႇဝႃႈ ဢူႈၶဝ်ပဵၼ်သိုၵ်းၼႆၼၼ်ႉ ႁဵတ်းႁႂ်ႈမၼ်းဝူၼ်ႉၸွမ်းပေႃးဢမ်ႇပွင်ႇ ဢၼ်မၼ်းၵေႃႈ လႆႈမႃးႁၵ်ႉမႅၼ်ႈသိုၵ်းမိူၼ်ၵၼ်လႄႈ၊ ၸွမ်းၼင်ႇၸၢတ်ႈပၢၼ်ၼႃႈႁိူၼ်းၶဝ် ဢၼ်လႆႈထူပ်းမႃးၸိူဝ်းၼၼ်ႉ ႁဵတ်းႁႂ်ႈမၼ်းဢမ်ႇၶႂ်ႈႁႂ်ႈပဵၼ်မိူၼ်ၼင်ႇမႄႈလႄႈ ပီႈၼၢင်းၶဝ်ထႅင်ႈၵေႃႉၼိုင်ႈ ၼၼ်ႉယဝ်ႉ။
ၸၢႆးယွတ်ႈၼၼ်ႉတႄႉ ၼႃႈတႃဢမ်ႇၸိုၼ်ႈဢမ်ႇပၢင်ႇ၊ ပိူၼ်ႈလၢတ်ႈတေႃႇဢုပ်ႇယဝ်ႉၸူးၵေႃႈ ဢမ်ႇၸူမ်းဢမ်ႇသိူဝ်းသင်သေဢိတ်း ၼၼ်ႉယဝ်ႉ။
“မႂ်းပဵၼ်သင်လႃႇဢၢႆႈယွတ်ႈ ၼင်ႈငဝ်ပေႃးတၢၼ်ႇၵႆႇတူၵ်းၼမ်ႉယဝ်ႉယိုင်လႃႇ”
“ၵႂႃႇၽုၵ်ႇၶဝ်ႈၸွမ်းသၢဝ်ဢမ်ႇၵျေႃႇႁႃႉ!”
မၼ်းၵေႃႈထူၺ်ႈၸႂ်လူင်ၸူးၶဝ်သေ ပၢႆႈဢွၵ်ႇၵႂႃႇပႅတ်ႈယဝ်ႉ။
ႁဵဝ်းငိုၼ်းၼၼ်ႉၵေႃႈ တင်းၶိုၼ်းႁိုဝ်ၼွၼ်းလပ်းလႆႈ၊ ၼွၼ်းၸိူင်ႉႁိုဝ်ၵေႃႈဢမ်ႇလပ်း ၽိုၼ်ႉၵႂႃႇၽိုၼ်ႉမႃးယူႇတိၵ်းတိၵ်းၵူၺ်းယူႇ။
“မႄႈ..လပ်းယဝ်ႉႁႃႉ”
“မႂ်းၽိုၼ်ႉၵႂႃႇၽိုၼ်ႉမႃးပေႃးတၢၼ်ႇၼၼ်ႉ တေႁဵတ်းႁိုဝ်ႁႂ်ႈၵဝ်ၼွၼ်းလပ်းလႆႈလႃႇ”
“မႄႈဝူၼ်ႉၸိူင်ႉႁိုဝ်သေမႃးဢဝ်ၵၼ်တင်းဢူႈႁဝ်းလႃႇ မႄႈႁူႉယူႇႁႃႉဝႃႈဢူႈႁဝ်းၼၼ်ႉပဵၼ်သိုၵ်းၼႆ”
“ႁူႉဢိူဝ်ႈ! ယွၼ်ႉႁႃးဢူႈသူၽွမ်ႉၸႂ်ၵၼ်သေ ၸင်ႇလႆႈတေႇၼႃႈႁိူၼ်းၸွမ်းၵၼ်ၼၼ်ႉယဝ်ႉ၊ မီးၵူၼ်းတင်းၼမ်ဢွၼ်ၵၼ်ဝႃႈ မႂ်းဢဝ်ၽူဝ်သိုၵ်းၵေႃႈ ၵႂႃႇတုၵ်ႉၶၵူၺ်းဢိူဝ်ႈၼႆဝႃႇ မႄႈၵေႃႈဢမ်ႇထွမ်ႇ ယွၼ်ႉပိူဝ်ႈႁၵ်ႉၶဝ်လႆႈၸႂ်ၶဝ်ယဝ်ႉၼႃႇ၊ ၵူၺ်းၵႃႈ ဢၼ်ၶဝ်ဝႃႈမႃးၼၼ်ႉၵေႃႈ ၸႂ်ႈယူႇ လႆႈယူႇၸွမ်းဢူႈသူ ဢမ်ႇလႆႈသဝ်းလီလီ၊ ဢမ်ႇမီးတီႈယူႇပဵၼ်တီႈ၊ ဢမ်ႇလႆႈၵိၼ်လီၼုင်ႈလိူင်ႇ၊ ၶၢဝ်းၵတ်းၵေႃႈႁိုဝ်လႆႈၼွၼ်းဢုၼ်ႇ၊ ၶၢဝ်းၽူၼ်ၵေႃႈလႆႈၼွၼ်းယမ်း၊ မၢင်ပွၵ်ႈလႆႈပႆတၢင်းတိၼ်ပွင်းပွင်းပေႃးလွၵ်ႈ၊ ၶိုၼ်ႈလွႆလူင်းႁူၺ်ႈ ၵႂႃႇတၢင်းလႂ်ၵေႃႈဢမ်ႇႁူႉတီႈမၢႆပၢႆတၢင်း၊ မၼ်းႁိူဝ်ႉမၼ်းတုၵ်ႉၶဢိူဝ်ႈယၢမ်းၼၼ်ႉ ၵူၺ်းယင်းဢမ်ႇတၼ်းလႆႈပွင်ႉဢွၵ်ႇမႃးလႃႈ ယွၼ်ႉပိူဝ်ႈမီးၶဝ် ၸွႆႈၸုင်ယိပ်းမိုဝ်းဢွၼ်ပႆၵႂႃႇ၊ မီးၶဝ်ယူႇႁိမ်းၶၢင်ႈၵေႃႈလပ်းယဵၼ်ယဝ်ႉ၊ လႆႈငိၼ်းသဵင်ဢုပ်ႇလၢတ်ႈၶဝ်ၵူၺ်းၵေႃႈႁိူဝ်ႉပေႃးႁၢႆ ပေႃးမႃးဝူၼ်ႉတူၺ်းၶိုၼ်း ယၢမ်းၼၼ်ႉ မၼ်းဢမ်ႇၸႂ်ႈၶၢဝ်းယၢမ်းဢၼ်တုၵ်ႉသေဢိတ်း မၼ်းပဵၼ်တၢင်းသိူဝ်း ဢၼ်ဢမ်ႇတွၼ်ႉလိုမ်းမၼ်းလႆႈသေပွၵ်ႈၼၼ်ႉယဝ်ႉ၊ ယၢမ်းဢၼ်ဢမ်ႇမီးၶဝ်ၼႆႉၵူၺ်းဢိူဝ်ႈ ပဵၼ်တၢင်းတုၵ်ႉဢၼ်ႁဵတ်းႁႂ်ႈၸႂ်ထိုင်ယူႇၸိူင်ႉၼႆ”
“ယိင်းၵေႃႈၸႂ်ထိုင်ဢူႈႁဝ်းမိူၼ်ၵၼ်ယဝ်ႉ”
သွင်ၵေႃႉမႄႈလုၵ်ႈၵွတ်ႇၵၼ်သေၼွၼ်းၵႂႃႇယူႇ။
ယၢမ်းၵၢင်ၼႂ်ၾႃႉပၢင်ႇမိူင်းသႂ် ပိူၼ်ႈဢွၼ်ၵၼ်ၵႂႃႇႁႆႈၵႂႃႇသူၼ်ၵၼ်မူတ်းယဝ်ႉ၊ ၼႂ်းဝၢၼ်ႈသမ်ႉပေႃးယဵၼ် ၵူၼ်းဝၢၼ်ႈၵေႃႈဢမ်ႇပေႃးၵိုတ်းၽႂ်ယဝ်ႉလႄႈ ၵွႆးၵိုတ်းၵူၼ်းသိုၵ်းၸုမ်းယုင်းလၢႆးၶဝ် ဢၼ်ပႂ်ႉတူၺ်းငဝ်းလၢႆး ၸွမ်းၸိူဝ်းဝၢၼ်ႈၼၼ်ႉ သွင်သၢမ်ၵေႃႉၵူၺ်း၊ ၸၢႆးယွတ်ႈၵေႃႈ ၵူဝ်တေလႆႈႁူပ်ႉၺႃးႁဵဝ်းငိုၼ်းလႄႈ ဢမ်ႇလႆႈၵႂႃႇႁႆႈၸွမ်းပိူၼ်ႈ။ တၢင်းဝူၼ်ႉတႄႉဝႃႈၵူဝ်လႆႈၺႃးၼႆယူႇ ၵူၺ်းသမ်ႉၵႆႉလဵပ်ႈပၼ်ႇၵႂႃႇတၢင်းႁိူၼ်းၶဝ်ၼႃႇ ထိုင်တီႈလႆႈႁူပ်ႉႁဵဝ်းငိုၼ်း ဢၼ်ႁၢပ်ႇတၢင်းပုင်းၼမ်ႉဢွၵ်ႇႁိူၼ်းမႃးၼၼ်ႉသေ သွင်ၶႃၵေႃႈ မိုင်ယၵ်ႉတူၺ်းၵၼ်ယူႇႁဵတ်းၼၼ်ၵူၺ်းယဝ်ႉ။
ၸၢႆးယွတ်ႈၵေႃႈ ႁိုဝ်ၸၢင်ႈလၢတ်ႈၵႂၢမ်းသင်လႆႈ ယုမ်ႉႁႅင်ႈႁႅင်ႈၸူးသေ
“လႄႇၵႂႃႇလႄႇမႃးၵေႃႈ မႃးၺႃးတၢင်းၼႆႉႁေယဝ်ႉ”
ႁဵဝ်းငိုၼ်းၵေႃႈ ဢိုတ်းၵိူၼ်ႇလီငၢမ်းသေယဝ်ႉ
“မိူဝ်ႈၼႆႉဝူၼ်ႉဝႃႈတေဢမ်ႇလႆႈႁၼ်ပီႈယဝ်ႉ ”
“ယိုင်ႈပၢႆႈယိုင်ႈၺႃး ယိုင်ႈဢမ်ႇၶႂ်ႈႁၼ်ယိုင်ႈႁူပ်ႉဢၼ်ဝႃႈၼၼ်ႉၶႃႈယူဝ်ႉ”
“ယိုင်ႈဢမ်ႇၶႂ်ႈဝူၼ်ႉထိုင်ယိုင်ႈၶုၵ်းၸႂ်လႆႈ တေႁႂ်ႈပၢႆႈၵႂႃႇတၢင်းလႂ်လႆႈ မိူဝ်ႈႁူပ်ႉႁၼ်ပီႈယဝ်ႉ ႁဵတ်းႁႂ်ႈၶႅၼ်းၶႂ်ႈႁူပ်ႉၸူးၸိူင်ႉၼႆ ပီႈသမ်ႉတေဢၢၼ်းပၢႆႈယိင်းၵႂႃႇပႅတ်ႈႁဵတ်းၼၼ်ၶႃႈၼေႃႈ”
သီၼႃႈၸၢႆးယွတ်ႈၼၼ်ႉၵေႃႈ သမ်ႉပေႃးလၢႆႈလူင်ၵႂႃႇၵမ်းလဵဝ်ယူႇ။ တင်းၶႂ်ႈယုမ်ႉဢမ်ႇၶႂ်ႈယုမ်ႉႁေ
“ၵူဝ်ပၼ်ႁႂ်ႈယိင်းလႆႈမွင် ယွၼ်ႉပီႈဢမ်ႇၸႂ်ႈၵူၼ်းမေႃပွင်ၼႃႈႁိူၼ်းမူၼ်း၊ ဢမ်ႇၸႂ်ႈၵေႃႉဢၼ်ပၼ်ႁႂ်ႈသူမူၼ်ႈသိူဝ်းသႃႇၸႂ်လူၼ်း၊ ဢမ်ႇၸႂ်ႈၵေႃႉၵူၼ်း တေပၼ်ႁႂ်ႈသူလႆႈၵတ်းၸႂ် ဢမ်ႇထုၵ်ႇလီပၼ်ႁႂ်ႈယိင်းၼွင်ႉၶဝ် လႆႈမႃးယၢပ်ႇၸႂ်ၸွမ်း ၵူၼ်းၸိူင်ႉၼင်ႇႁဝ်း ဢမ်ႇထိူၵ်ႈသဝ်းဢိူမ်ႈႁိမ်းၶၢင်ႈသူၼွင်ႉယိင်းလဝ်းၼႃ”
“ဝၼ်းၼၼ်ႉ..ယိင်းၼွင်ႉလႆႈလၢတ်ႈပူၼ်ႉ လူၼ်ႉလိူဝ်သူပ်းလိူဝ်ၵႂၢမ်းၵႂႃႇ ႁဵတ်းႁႂ်ႈပီႈၸႂ်ဢမ်ႇသႃႇၵေႃႈ ယွမ်းၼွမ်းယူႇၶႃႈ၊ ဝႃႈတေဢၢၼ်းပၢႆႈၼႃႈ ၶႂ်ႈပၢႆႈၵႂႃႇဢမ်ႇႁႂ်ႈႁူပ်ႉၼႃႈၵၼ် ၵူၺ်းယၢမ်းဢၼ်ဝႃႈတေဢမ်ႇထူပ်း မိူဝ်ႈၼႆႉၵေႃႈသမ်ႉလႆႈမႃးႁၼ် ပၼ်ႁႂ်ႈယိင်းထိင်းၸႂ်ႁႄႉဢမ်ႇလၢတ်ႈဢုပ်ႇၸူး ဢမ်ႇလႆႈၼၼ်ႉယဝ်ႉ”
ႁဵဝ်းငိုၼ်းသိုပ်ႇပႆမုင်ႈၼႃႈၵႂႃႇတင်းတႃႈၼမ်ၼၼ်ႉသေ မိူၼ်ဝႃႈၸၢႆးယွတ်ႈၵေႃႈ တေပႆၵႂႃႇၸွမ်းလူၺ်ႈဢမ်ႇတၼ်းၾၢင်ႉမိူၼ်ၵၼ်ၼၼ်ႉယဝ်ႉ။
တွၼ်ႈပႅတ်ႇသုတ်းၵႂႃႇယဝ်ႉ သိုပ်ႇလူၵႂႃႇထႅင်ႈတွၼ်ႈၵဝ်ႈၶႃႈ။
တႃႇတွင်း။ ။ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆး ဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈပဵၼ်တေႉ။
