တွၼ်ႈၸဵတ်း
တပ်ႉသိုၵ်းၶိုၵ်းတွၼ်းယုင်းလၢႆးၶဝ်ၵေႃႈ လႆႈဢွၼ်ၵၼ်ၶဝ်ႈမႃးၼႂ်းဝၢၼ်ႈသေ မိူဝ်ႈဢၼ်ၵူၼ်းဝၢၼ်ႈၶဝ် မုင်ႈႁၼ်ၸုမ်းၶဝ်မႃးၼၼ်ႉၵေႃႈ တင်းၾႃႉတင်းမိတ်ႈလူင်ႁေ ႁၢင်ႈႁႅၼ်းယိပ်းငႃဝႆႉယဝ်ႉ။ မုၼ်ၸဝ်ႈလႄႈတင်း ၸၢႆးယွတ်ႈၵေႃႈ မႃးယူႇပႃႈၼႃႈၶဝ်ၵႂႃႇသေ
“ၶဝ်ၸုမ်းၼႆႉယဝ်ႉ ဢၼ်မႃးယိုဝ်းပႅတ်ႈၸူၼ်ၶဝ်ႈဝၢၼ်ႈႁဝ်းၶမ်ႈဝႃးၼၼ်ႉ”
ၶဝ်ၸင်ႇလႆႈဝၢင်းၽႃႉဝၢင်းမိတ်ႈၶဝ်လူင်းယူႇ။
တပ်ႉသိုၵ်းၶိုၵ်ႉတွၼ်းယုင်းလၢႆးၶဝ်ၵေႃႈ ႁူႉပုၼ်ႈၽွၼ်းၽႂ်မၼ်းသေ ႁဵတ်းၵၢၼ်ၸွႆႈၵူၼ်းၼႂ်းဝၢၼ်ႈၵႂႃႇ၊ ဢၼ်ပဵၼ်မေႃယႃၸၢႆးၼွင်ႉၵေႃႈ ၸွႆႈယူတ်းယႃၵူၼ်းပဵၼ်ၵႂႃႇယူႇ။ ၵမ်ႈၽွင်ႈၵေႃႈမႄးၵဵပ်းၽဵဝ်ႈၵဵပ်းသိမ်း၊ ႁိူၼ်းမၢင်လင်ဢမ်ႇၵွႆၼမ်ၵေႃႈမႄးသေယူႇလႆႈယူႇ၊ မၢင်လင်ၵေႃႈလူႉၵွႆယွၵ်းယွႆပွင်ႇလူင်ၵႂႃႇသဵင်ႈ တေလႆႈၶိုၼ်းမႄးႁဵတ်းမႂ်ႇယဝ်ႉ။ ဢမ်ႇဝႃႈၸိူင်ႉႁိုဝ် ၵူၼ်းၼႂ်းဝၢၼ်ႈၶဝ်ၵေႃႈဢွၼ်ၸွႆႈၵၼ်ၵႂႃႇ၊ ၸဵမ်မိူဝ်ႈၸဝ်ႉမႃး ထိုင်လႃႈၵေႃႈ ဢမ်ႇလႆႈႁၼ်လုင်းၵႄႇၶႃၼၢႆးၵႄႇသေၵမ်းလႄႈ ပႃႈလႃႉ မႄႈႁဵဝ်းငိုၼ်းၶဝ်ၼၼ်ႉ လႆႈထၢမ်ၸူးတီႈဢိင်ႇတႃႉသေ
“ဢိင်ႇတႃႉ! လုင်းၵႄႇၶဝ်လူးဢမ်ႇႁၼ်လႃႇ..ပၢႆႈၵႂႃႇၸွမ်းပိူၼ်ႈယဝ်ႉႁႃႉတေႃႈ”
“ၶႃပူႇဢွၵ်ႇတႄႉဝႃႈတေဢမ်ႇပၢႆႈၼႆၼႃႇ ၶႃႈၵေႃႈဢမ်ႇတၼ်းၶုၵ်းၸႂ်လႆႈတေႉဢိူဝ်ႈၼႆႉ”
“ဢေးႁဵဝ်း မႂ်းမိူဝ်းတူၺ်းလူးပေႃးၼႆ ယူဝ်ၶႃပဵၼ်သေလွင်ႈလွင်ႈတမ်ႉဢမ်ႇႁူႉမေႃႉ”
ႁဵဝ်းငိုၼ်းၵေႃႈ ပႆယွၵ်းယွၵ်းလူင်းမိူဝ်းၵႂႃႇတင်းႁိူၼ်းလုင်းၵႄႇၶဝ်ၼၼ်ႉယဝ်ႉ၊ ၸွမ်းသဵၼ်ႈတႃႈသၢႆတၢင်းမိူဝ်းၼၼ်ႉတႄႉ သမ်ႉပေႃးမီးၶၢပ်ႈလိူတ်ႈ ဢိူၵ်ႇၼုၵ်းၵိူဝ်ႇၸွမ်းယိူဝ်ႈပဵၼ်တီႈပဵၼ်တၢင်း၊ ၸွမ်းႁူဝ်ႉပေႃးလႅင်ၸၢင်းဢၢင်းၵေႃႈမီး၊ ႁဵဝ်းငိုၼ်းၼၼ်ႉၵေႃႈ တင်းႁတ်းႁေဢမ်ႇႁတ်းႁေ လတ်းၽၢၼ်ႇၵႂႃႇလွႆးလွႆးၵမ်းယၢင်ႈၵမ်းယၢင်ႈယဝ်ႉ။ ၸၢႆးယွတ်ႈဢၼ်ႁၼ်ႁဵဝ်းငိုၼ်း ပႆလူင်ၵႂႃႇၼႂ်းၵၢင်တၢင်း ဢၼ်မီးလိူတ်ႈသိူဝ်ႇလႅင်လူင်ၸိူင်ႉၼၼ်ၵေႃႈ ၼႅတ်ႈဢႅၼ်ႇလႅၼ်ႈမႃးၸူးသေ
“ႁႂ်ႈႁဝ်းၵႂႃႇၸွမ်းၶႃႈလႄႈ ”
“ဢေႃႈ…”
ထိုင်ႁိူၼ်းလုင်းၵႄႇယဝ်ႉၼႆၵေႃႈ လႆႈဢွၼ်ၵၼ်ယဵပ်ႇယၢင်ႈ ၶိုၼ်ႈၶူဝ်လႆႁိူၼ်းလုင်းၵႄႇၶဝ်ၼၼ်ႉၵႂႃႇလွႆးလွႆးယဝ်ႉ၊ မိူဝ်ႈဢၼ်မိူဝ်းႁွတ်ႈထိုင်ၵႂႃႇ ပႃႇၽၵ်းတူဢၼ်ၽုၺ်ႇၵႂၢင်ႈလူင်ၼၼ်ႉၵေႃႈ ၸၢႆးယွတ်ႈလႆႈႁၼ် လုင်းၵႄႇၶႃၼၢႆးၵႄႇ ၼွၼ်းတၢႆၵွင်ၵၼ်ယူႇၼၼ်ႉယဝ်ႉ၊ ၵူဝ်ႁဵဝ်းငိုၼ်းႁၼ်သေ ၶုၼ်ႇလၢၵ်ႈၸၼ်ဢဝ်ၶႅၼ်ႁဵဝ်းငိုၼ်းၼၼ်ႉ လႅၼ်ႈလူင်းႁိူၼ်း လူၺ်ႈဢမ်ႇလၢတ်ႈသင်။
“ပဵၼ်သင်လႄႈလၢၵ်ႈႁဝ်းလူင်းႁိူၼ်းမႃးၸိူင်ႉၼႆၶႃႈ”
“သူ..ပွၵ်ႈမိူဝ်းလၢတ်ႈၵူၼ်းတီႈၼႂ်းဝၢၼ်ႈသေလႄႈ လုင်းၵႄႇၶႃ…လႆႈသဵင်ႈၵႂႃႇယဝ်ႉ”
“ၶႂ်ႈဝႃႈ..ပီႈလႆႈႁၼ်ႁႃႉမိူဝ်ႈၵႆႈၼႆႉ”
“ဢိုမ်ႈ..မိူဝ်းလႆႈယူႇၸွင်ႇၸႂ်ႈႁိုဝ်”
ႁဵဝ်းငိုၼ်းၵေႃႈငွၵ်းႁူဝ်ၼႄ ယင်ႇသိၼ်ႈယင်ႇသၢႆမၼ်း ဢႅၼ်ႇလႅၼ်ႈလူင်းမိူဝ်းၵႂႃႇ။ ၸၢႆးယွတ်ႈၵေႃႈၵပ်းၸၢၵ်ႈမၼ်းပွင်ႇၵႂႃႇတီႈ ႁူဝ်ၼႃႈ ႁႂ်ႈဢဝ်ၵူၼ်းမႃးၸွႆႈၵၼ်ၼႆယူႇ။
“တေလႆႈႁၼ်ၵူၼ်းမိူင်း လႆႈမႃးတၢႆယွၼ်ႉၵူၼ်းမိူၵ်ႈလိူင်းၶဝ်ၸိူဝ်းၼႆႉ ထႅင်ႈၵႃႈႁိုဝ်လႃႇ၊ ၵႂႃႇတီႈလႂ်ၵေႃႈ ႁၼ်မီးၵူၼ်းမိူင်းပဵၼ်ၵေႃႉၶၢမ်ႇယူႇတႃႇသေႇ ႁဝ်းပဵၼ်သိုၵ်း ႁဝ်းၵႅတ်ႇၶႄပၼ်ၶဝ်ယႃႇႁႂ်ႈပဵၼ်သင်ဢမ်ႇလႆႈႁႃႉ”
သႅင်ၾႃႉၼၼ်ႉၵေႃႈ တင်းၸႂ်လမ်၊ ၸဵပ်းၸႂ်၊ တိူဝ်ႉၸႂ်သေ လၢတ်ႈဢွၵ်ႇမႃး မၼ်းၸင်ႇသိုပ်ႇလၢတ်ႈထႅင်ႈ
“ပဵၼ်သိုၵ်းၵေႃႉႁတ်းႁၢၼ်၊ ပဵၼ်သိုၵ်းဢၢႆႈၵူၼ်းငၢၼ်၊ ပဵၼ်သိုၵ်းဢၼ်ပိူၼ်ႈယုၵ်ႉယွင်ႈၵတ်ႉၶႅၼ်ႇၼႆႁႃႉ ၵူၼ်းမိူင်းႁဝ်းၵူၺ်းၵႅတ်ႇၶႄဢမ်ႇလႆႈ ႁဝ်းသမ်ႉတေမႃးပဵၼ်သိုၵ်းၵၼ်ႁဵတ်းသင်လႃႇ”
“ၶမ်ႈဝႃး..ပေႃးဝႃႈဢမ်ႇမီးၸုမ်းႁဝ်း ၵူၼ်းဢၼ်ယူႇၼႂ်းဝၢၼ်ႈၼႆႉ တေတၢႆၵၼ်ၵႂႃႇမူတ်းယဝ်ႉ.. ဝၢၼ်ႈဢွၼ်ႇဢၼ်ၼႆႉၵေႃႈ မိူဝ်ႈလဵဝ်တေမီးလိူတ်ႈၶႅဝ်းတူႇၵူၼ်းတၢႆမၢၵ်ႇတၢႆမိူဝ် ပဵၼ်ႁိူၼ်းႁၢမ်းၵၼ်ၵႂႃႇယဝ်ႉ၊ လိူဝ်သေဝၢၼ်ႈၼႆႉယဝ်ႉ၊ တေမီးတၢင်ႇဝၢၼ်ႈမႃးထႅင်ႈ ဝၢၼ်ႈၼိုင်ႈယဝ်ႉဝၢၼ်ႈၼိုင်ႈ ၸွမ်းၼင်ႇပုၼ်ႈၽွၼ်းႁဝ်းပဵၼ်သိုၵ်းၼႆၼၼ်ႉ ႁဝ်းၵေႃႈလႆႈႁဵတ်းၵႂႃႇၼင်ႇၵႃႈဢဵၼ်ႁႅင်းႁဝ်းမီးယဝ်ႉ”
ႁူဝ်ၼႃႈၵေႃႈ ထူၺ်ႈၸႂ်လူင်မႃးသေ သိုပ်ႇလၢတ်ႈထႅင်ႈ
“ၵဝ်ပွင်ႇၸႂ်ယူႇၼႃႈဝႃႈ ဢၼ်မႃးႁဵတ်းသိုၵ်း တႃႇတိုၵ်းၽူႈၶဵၼ်လိုပ်ႈလမ်းၽူႈၶႂၢၵ်ႈမိူင်း ၵႅတ်ႇၶႄၵူၼ်းမိူင်းႁဝ်းၼႆ ၵူၺ်းၵႃႈ ၸွမ်းၼင်ႇၼမ်ႉၵတ်ႉတပ်ႉသိုၵ်းႁဝ်း၊ ဢဵၼ်ႁႅင်းဢၼ်ႁဝ်းမီးယူႇၼႆႉ မၼ်းတေႁဵတ်းၵႂႃႇဢမ်ႇလႆႈတဵမ်တီႈ မၼ်းယင်းတိုၵ်ႉမီးတီႈယူပ်ႈယွမ်းယူႇလႄႈ ႁဝ်းၵေႃႈ တေလႆႈဢွၼ်ၵၼ်ၶတ်းၸႂ်ႁႂ်ႈတိူဝ်းလီမႃးလိူဝ်သေၼႆႉဢိူဝ်ႈ၊ လွင်ႈဢၼ်ပဵၼ်ၵႂႃႇယဝ်ႉ ႁႂ်ႈဢဝ်ပဵၼ်တွၼ်ႈသွၼ်သေ မိူဝ်းၼႃႈမႃး ၼင်ႇႁိုဝ်မၼ်းတေဢမ်ႇပဵၼ်ၸိူင်ႉၼႆ ၽိူမ်ႉထႅမ်ၼမ်ႉၵတ်ႉသူၵႂႃႇထႅင်ႈလႄႈ တီႈလႂ်လူဝ်ႇမႄးၵေႃႈမႄး တီႈလႂ်လူဝ်ႇလႅၵ်ႈၵေႃႈ သူတေႁူႉယဝ်ႉဢမ်ႇၸႂ်ႈႁိုဝ် သိုၵ်းဢၼ်ဝႃႈၼၼ်ႉ ယွၼ်ႉလူဝ်ႇမီးလႄႈ ၸင်ႇတေလႆႈမီးမႃးယဝ်ႉ” သင်ႇလၢတ်ႈၼႄလုၵ်ႈၼွင်ႉမၼ်းၵႂႃႇ။
ၶဝ်ၵေႃႈဢွၼ်ၵၼ်တိုၼ်ႇတူဝ်မႃးသေ ႁူမ်ႈၵၼ်လၢတ်ႈမိူဝ်ႈလဵဝ်ၵၼ်ၵႂႃႇ
“ဢေႃႈၶႃႈ!!”
“ယဝ်ႉၵေႃႈ ႁႂ်ႈသူတွင်းဝႆႉၼႂ်းဢူၵ်းႁူဝ်ၸႂ်သူယူႇတႃႇသေႇ ၵူၼ်းမိူင်းၼၼ်ႉ ပဵၼ်သၢႆၸႂ်တပ်ႉသိုၵ်းဢိူဝ်ႈ”
သမ်ႉဝႃႈသေလၢႆၼႃႇတၢၼ်ႇလႂ် မိူၼ်ဢမ်ႇၸႂ်ႈလွင်ႈတႄႉၵေႃႈ မိူဝ်ႈႁၼ်တူဝ်ၵူၼ်းတၢႆၼွၼ်းယူႇပႃႈၼႃႈၼၼ်ႉ ၵႃႈတေလႆႈယွမ်းႁပ်ႉၵႂႃႇယဝ်ႉ။ ၼႂ်းဝၢၼ်ႈၼႆႉၵေႃႈ တင်းၵူၼ်းမိူင်းတင်းၵူၼ်းသိုၵ်း လႆႈၸွႆႈၵၼ်ၽဵဝ်ႈမႄးၵႂႃႇ ၶၢဝ်းတၢင်းလၢႆဝၼ်းယဝ်ႉ။ ၵူၼ်းဢၼ်ပၢႆႈၵႂႃႇၸိူဝ်းၼၼ်ႉ ၵမ်ႈၽွင်ႈၵေႃႈ လႆႈဢွၼ်ၵၼ်ပွၵ်ႈၶိုၼ်း တင်းႁိူၼ်းတင်းယေးယူႇ၊ ၵမ်ႈၽွင်ႈၵေႃႈ ဢမ်ႇတမ်းၸႂ်သေ ဢမ်ႇပႆႇႁတ်းမႃးၵေႃႈမီး။ မိူၼ်ၼႂ်းဝၢၼ်ႈၵေႃႈလီမႃးယဝ်ႉလႄႈ တင်းၵူၼ်းဝၢၼ်ႈလႄႈၵူၼ်းသိုၵ်းၵေႃႈ လႆႈယူႇႁူမ်ႈႁွမ်းၸွမ်းၵၼ်ၵႂႃႇ ၵူၼ်းဝၢၼ်ႈၵေႃႈႁူမ်ၸူမ်းႁပ်ႉတွၼ်ႈလီယူႇ၊ မီးသင်ၵေႃႈၸွႆႈမႅင်ႇယိုၼ်ႈပၼ် ၵႂႃႇႁိူၼ်းလႂ်ၵေႃႈ ႁႂ်ႈမိူၼ်ၼင်ႇႁိူၼ်းဢူႈႁိူၼ်းမႄႈသေႇသေႇ တႃႇဝႃႈဢိုပ်းၶဝ်ႈၼႆၼၼ်ႉတိုၼ်းဢမ်ႇမီး။
ၵူၼ်းသိုၵ်းၸွႆႈၵူၼ်းမိူင်း ၵူၼ်းမိူင်းၵေႃႈၸွႆႈၵူၼ်းသိုၵ်း၊ ၵူၼ်းမိူင်း ပဵၼ်တီႈပိုင်ႈဢိင်ၵူၼ်းသိုၵ်းယဝ်ႉ၊ ၵူၼ်းသိုၵ်းၵေႃႈ ပဵၼ်တီႈၸႂ်ယႂ်ႇ တွၼ်ႈတႃႇၵႅတ်ႇၶႄပၼ်ၵူၼ်းမိူင်း ႁႂ်ႈလွတ်ႈၽေးၼၼ်ႉယူႇယဝ်ႉ။ မိူဝ်ႈႁဵတ်းလွင်ႈလီပၼ်ၵၼ်ၵေႃႈ တေလႆႈႁပ်ႉလွင်ႈလီၶိုၼ်းယဝ်ႉ၊ မိူဝ်ႈႁဵတ်းလွင်ႈဢမ်ႇလီၵေႃႈ တေႃႈတေလႆႈႁပ်ႉလွင်ႈဢမ်ႇလီမႃးၶိုၼ်းယူႇ။
သမ်ႉဝႃႈၸုမ်းၸူၼ်ၼၼ်ႉဢမ်ႇမီးယဝ်ႉသေတႃႉ တွၼ်ႈတႃႇႁႂ်ႈပေႃးယုမ်ႇၸႂ်လႆႈ၊ ၼင်ႇႁိုဝ်ပေႃးတေမီးလွင်ႈႁူမ်ႇလူမ်ႈ၊ ပဵၼ်ပိုၼ်ႉတီႈလွတ်ႈၽေး တႃႇၵူၼ်းမိူင်းၼႆၼၼ်ႉၵေႃႈ ၸုမ်းယုင်းလၢႆးၶဝ်ၼၼ်ႉ လႆႈပႂ်ႉတူၺ်းယူႇတႃႇသေႇ ဢမ်ႇပၼ်လွတ်ႈသၢႆတႃလႆႈၼင်ႇၵဝ်ႇ။
တွၼ်ႈၸဵတ်းသုတ်းၵႂႃႇယဝ်ႉ သိုပ်ႇလူထႅင်ႈတွၼ်ႈပႅတ်ႇၶႃႈ။
တႃႇတွင်း။ ။ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆး ဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈပဵၼ်တေႉ။
