တွၼ်ႈႁူၵ်း
ယၢမ်းႁူဝ်ၶမ်ႈလိပ်းသိင်ႇမႃးတၢၼ်ႇတၢၼ်ႇၼၼ်ႉ တီႈႁိူၼ်းႁဵဝ်းငိုၼ်းၼၼ်ႉၵေႃႈ ၼၢင်းၼူၼ်းလႄႈလုၵ်ႈၸၢႆးဢွၼ်ႇမၼ်းတႄႉ ႁႅၼ်းၶူဝ်းတႃႇပၢႆႈယူႇယဝ်ႉ၊ ၵူၺ်းၵႃႈမႄႈၵေႃႈဝႃႈ တေဢမ်ႇပၢႆႈၼႆလႄႈ ႁဵဝ်းငိုၼ်းမႆႈၸႂ်မႄႈသေ ဢမ်ႇဢၢၼ်းပၢႆႈၸွမ်းၼႆယူႇ။
“မႄႈႁဝ်းလႄႈဢေးႁဵဝ်းဢမ်ႇၵႂႃႇၸွမ်းႁႃးႁႃႉ”
“ဢေးႁဵဝ်း ႁဵတ်းႁင်မႂ်းဢမ်ႇၶႂ်ႈပၢႆႈၵႂႃႇၸွမ်းပီႈၼၢင်းမႂ်းလႃႇ တီႈႁိူၼ်းၼႆႉဝႆႉၵိုတ်းၵဝ်ၵူၺ်းၵေႃႈလႆႈယဝ်ႉဢိူဝ်ႈ”
“မႄႈဢမ်ႇၵႂႃႇ လုၵ်ႈယိင်းတေၵႂႃႇလႆႈၸိူင်ႉႁိုဝ်!! တေႁႂ်ႈမႄႈယူႇၵေႃႉလဵဝ်လႆႈၸိူင်ႉႁိုဝ်”
“ၵဝ်ၵေႃႈထဝ်ႈၼႃႇယဝ်ႉ ယူႇတီႈၼႆႈၵေႃႈယူႇမႃးႁိုင်ၼႃႇယဝ်ႉ ႁႂ်ႈၵဝ်တၢႆၵႂႃႇတီႈၼႆႈၵေႃႈၸၢင်ႈပဵၼ်သင် ”
“ပဵၼ်သင်လႄႈမႄႈတေလႆႈလၢတ်ႈၸိူင်ႉၼႆလႃႇ ယိင်းၵူဝ်ဢေႃႈမႄႈ..”
“မႂ်းတေၵူဝ်ႁဵတ်းသင်လႃႇ ဝၢၼ်ႈမိူင်းႁဝ်း မၼ်းပဵၼ်ၸိူင်ႉၼႆမႃးယူႇလၢႆသိုပ်ႇလၢႆပၢၼ်ယဝ်ႉ၊ သမ်ႉဝႃႈၵူဝ်တၢၼ်ႇလႂ် မႂ်းၵေႃႈတေလႆႈမေႃယူႇၸွမ်းမၼ်းၵႂႃႇႁႂ်ႈလႆႈဢိူဝ်ႈ၊ မိူဝ်ႈလႂ်မႂ်းလိူၵ်ႈတေပၢႆႈ မႂ်းၵေႃႈတေလႆႈၵႂႃႇႁႃတီႈယူႇ ဢၼ်လွတ်ႈၽေး၊ မိူဝ်ႈလႂ်မႂ်းလိူၵ်ႈတေၶဵင်ႇတႃႉၸွမ်းမၼ်း မႂ်းၵေႃႈတေလႆႈမီးတၢင်းႁတ်းႁၢၼ်တေႃႇသူႈႁႂ်ႈလႆႈဢိူဝ်ႈ..”
ႁဵဝ်းငိုၼ်းၵေႃႈ ပွႆႇၼမ်ႉတႃၸိုမ်ႉယမ်းၵႅမ်ႈမႃးသေ
“ယဝ်ႉမႄႈလူး..မႄႈတေႁဵတ်းၸိူင်ႉႁိုဝ်လႃႇ တေပၢႆႈႁႃႉ၊ တေတေႃႇသူႈႁႃႉ”
“ႁဝ်းလူဝ်ႇၵႂႃႇယဝ်ႉ! ႁႅၼ်းၶူဝ်းလႄႈ ႁဝ်းၵႂႃႇ ဝၢၼ်ႈႁဝ်းၵေႃႈဢမ်ႇဢၢပ်ႈလွတ်ႈလႆႈယဝ်ႉၵဝ်ဝႃႈ မႄႈႁဝ်းႁမ်ႉတေယူႇႁဵတ်းသင်တီႈၼႆႈလႃႇ!!…” ၼၢင်းၼူၼ်းတင်းၸႂ်ဢမ်ႇယၢဝ်းႁေ ႁွင်ႉႁိုတ်းသႂ်ႇၶႃ ဢၼ်တိုၵ်ႉၼင်ႈယဵၼ်ၸူးၵၼ်ယူႇၼၼ်ႉယဝ်ႉ။
ႁဵဝ်းငိုၼ်းၼၼ်ႉၵေႃႈ မွင်းပႂ်ႉၶေႃႈတွပ်ႇတီႈမႄႈ ဢၼ်ၼိမ်ယဵၼ်သေတူၺ်းမၼ်းၼၼ်ႉယူႇ။
“ၵဝ်ထဝ်ႈၼႃႇယဝ်ႉ ဢမ်ႇမီးႁႅင်းတႃႇတေလႅၼ်ႈပၢႆႈ၊ ဢမ်ႇမီးႁႅင်းတႃႇတေတေႃႇသူႈယဝ်ႉ၊ ၵဝ်တေယူႇတီႈၼႆႈသေ ၵႅတ်ႇၶႄတူဝ်ၵဝ် တီႈယူႇၵဝ်တီႈၼႆႈၵူၺ်း သမ်ႉဝႃႈၵဝ်တေတၢႆၵႂႃႇတီႈၼႆႈၵေႃႈ ၵဝ်ႁၢၼ်ႉၸႂ်ယူႇ ၵဝ်လႆႈၵႅတ်ႇၶႄ တီႈဢၼ်ၵဝ်ထုၵ်ႇလီၵႅတ်ႇၶႄဝႆႉ လိုၼ်းသုတ်းမႃးၵေႃႈ ၸၢတ်ႈပၢၼ်ၵဝ် ႁႂ်ႈမၼ်းလႆႈမိူၼ်ဢူႈသူၽွင်ႈလႄႈ ဢိတ်ႉၼိုင်ႈၵေႃႈယင်းလီ၊ ႁႂ်ႈလႆႈၵႅတ်ႇၶႄဝၢၼ်ႈႁဝ်းဝႆႉ ၸွမ်းလူၺ်ႈသၢႆၸႂ် ဢၼ်ယင်းတိုၵ်ႉမီးယူႇၼၼ်ႉၽွင်ႈလႄႈ..”
သိုပ်ႇလၢတ်ႈထႅင်ႈ
“ၵူၺ်းၵႃႈ..သူပီႈၼွင်ႉ ယင်းတိုၵ်ႉမီးႁႅင်း ယင်းတိုၵ်ႉၼုမ်ႇ တိုၵ်ႉမီးသဵၼ်ႈတၢင်း တႃႇတေၵႂႃႇထႅင်ႈၶၢဝ်းယၢဝ်းယူႇ၊ ယႃႇၸူမ်ယူႇၸွမ်းဝၢၼ်ႈၼွၵ်ႈၸွၵ်ႉထိူၼ်ႇဢွၼ်ႇ ဢၼ်မီးၽေးယူႇၼႆႉလႃႈ ဢွၼ်ၵၼ်ၵႂႃႇလႄႈ..”
“ယိင်းဢမ်ႇၶႂ်ႈၵႂႃႇၼႃမႄႈ ဢမ်ႇမီးမႄႈယဝ်ႉ ယိင်းသမ်ႉတေႁဵတ်းႁိုဝ်ယူႇလႆႈလႃႇ၊ ဢမ်ႇမီးႁိူၼ်းႁဝ်းယဝ်ႉ ယိင်းသမ်ႉတေလႆႈၵႂႃႇယူႇတီႈလႂ်၊ ယိင်းဢမ်ႇႁူႉဝႃႈတေၵႂႃႇတၢင်းလႂ်၊ ယိင်းဢမ်ႇႁူႉဝႃႈတေပၢႆႈၵႂႃႇႁဵတ်းသင်၊ ႁႂ်ႈယိင်းယူႇၸွမ်းမႄႈလႄႈ ၵႅတ်ႇၶႄမႄႈ ၵႅတ်ႇၶႄႁိူၼ်းႁဝ်းၸွမ်းမႄႈဢမ်ႇလႆႈႁႃႉ”
“ဢေးႁဵဝ်း.. မႂ်းယင်းတိုၵ်ႉမီးၵူၼ်းၵေႃႉဢၼ် မႂ်းတေၵႂႃႇႁႃလႆႈယူႇလူး မႂ်းယင်းတိုၵ်ႉမီးၵူၼ်းၵေႃႉဢၼ်မႂ်းႁၵ်ႉ လိူဝ်သေၵဝ် ၵူၼ်းထဝ်ႈၵေႃႉၼႆႉယူႇဢမ်ႇၸႂ်ႈႁိုဝ်၊ ဢမ်ႇဝၼ်းၼိုင်ႈၵဝ်ၵေႃႈ တေၽၢတ်ႇယၢၼ်သူၵႂႃႇယူႇၵူၺ်း ႁႂ်ႈၵဝ်လႆႈတမ်းၸႂ်ဢိတ်ႉၼိုင်ႈလႄႈ ၵႂႃႇလႄႈမႄႈ ၵႂႃႇၸွမ်းဢေးၼၢင်းသူလႄႈ..”
ၼၢင်းၼူၼ်းယဵၼ်ႉၸႂ်ဢမ်ႇလႆႈသေ ႁႅၼ်းၶူဝ်းၶႃသႂ်ႇထူင်ယဝ်ႉၵေႃႈ ႁႅၼ်းႁၢပ်ႇႁႅၼ်းၵၢၼ်းမၼ်းလီလီငၢမ်းငၢမ်းယဝ်ႉ၊
“ၵႂႃႇလႄႈႁဝ်းၵႂႃႇ ၸူဝ်ႈၶဝ်ပႆႇမႃးၼႆႉ၊ ၵႂႃႇလွႆးလွႆးၵေႃႈလွတ်ႈယူႇၵူၺ်းၵႂႃႈ”
“ၵႂႃႇထႃႈလႄႈၶိူဝ်မႄႈလုၵ်ႈ..”
“ႁႃးၵႂႃႇယဝ်ႉမႃးၸွမ်းၼႃႈ ၶူဝ်းၶိူဝ်ၵေႃႈ ၵဝ်ဢဝ်ၵႂႃႇမူတ်းယဝ်ႉ..”
ၼၢင်းၼူၼ်းတိုၵ်ႉႁႃလူင်းႁိူၼ်းၵူၺ်း ဢမ်ႇႁူႉသဵင်ၵွင်ႈသဵင်မၢၵ်ႇတၢင်းလႂ် မေႃးလင်မႃးၸမ်ၼႃႇ ဢဝ်မၼ်းသမ်ႉပေႃးတူၵ်းၸႂ်ႁွင်ႉသႅၼ်ႇပႃးယဝ်ႉ။ ႁဵဝ်းငိုၼ်းလႄႈတင်းမႄႈၼၼ်ႉၵေႃႈ ဢွၼ်ၵၼ်လႅၼ်ႈလူင်းၵႂႃႇတႂ်ႈလၢင်ႈႁိူၼ်း ၼင်ႇဝႆးၽႂ်းလႄႈ လၢၵ်ႈဢဝ်လၢၼ်ၸၢႆးဢွၼ်ႇၶဝ်လႄႈ ႁွင်ႉဢဝ်ၼၢင်းၼူၼ်း လႅၼ်ႈၶဝ်ႈတႂ်ႈႁိူၼ်းၶဝ်ၼၼ်ႉသေ ဢဝ်ၽိူင်းသိူဝ်ႇပိုၼ်ႉႁိူၼ်းၼၼ်ႉယဝ်ႉ ဢူပ်ႇပူပ်ႇလူင်းၵႂႃႇယူႇ။
သဵင်ၵွင်ႈၼၼ်ႉၵေႃႈ လၼ်ႇလင်ဢေႃႇတေႃႇလူင်မႃး ၸွမ်းၵိဝ်ႇၵၢင်ဝၢၼ်ႈၼၼ်ႉတိၵ်းတိၵ်းယဝ်ႉ၊ ၸုမ်းၸူၼ်ၼၼ်ႉၵေႃႈ ဢွၼ်ၵၼ်ယိုဝ်းၵွင်ႈ ၵႂႃႇၵူႈၸွၵ်ႉၵူႈၸဵင်ႇ သမ်ႉပေႃးဢမ်ႇတူၺ်းသီႇတူၺ်းႁႃႈ ဢမ်ႇတူၺ်းဝႃႈမၢၵ်ႇၵွင်ႈၶဝ်ၼၼ်ႉ တေၵႂႃႇတိူဝ်ႉသႂ်ႇသၢႆၸႂ်ၽႂ်ယဝ်ႉ။
“ယိုဝ်းလႄႈဢၢႆႈ!… ယႃႇပၼ်ႁႂ်ႈၽႂ်ၵိုတ်းသေၵေႃႉလူႉမႃႈ!!.. ပႃးၵူၼ်းဝၢၼ်ႈၼႆႉႁိုဝ် ဢၼ်ၵႂႃႇၽဝ်တီႈယူႇႁဝ်းၼၼ်ႉ”
ႁွင်ႉသေႃႇပေႃးတဵမ်ဝၢၼ်ႈယဝ်ႉ။
တပ်ႉသိုၵ်းၶိုၵ်ႉတွၼ်း ယုင်းလၢႆးၶဝ် ဢၼ်တိုၵ်ႉၵုမ်ၵၼ်ယူႇလီလီၼၼ်ႉၵေႃႈ လႆႈငိၼ်းသဵင်ၵွင်ႈမေႃးမႃးတၢင်းဝၢၼ်ႈၼႆသေ၊ ႁိုဝ်တေတူၺ်းလၢႆယဝ်ႉ ႁၢင်ႈႁႅၼ်းတူဝ် ၸႅၵ်ႇၽႄၵူၼ်းၵၼ် ၶဝ်ႈၼႂ်းဝၢၼ်ႈၵႂႃႇယူႇ။
ၸုမ်းၸူၼ်ၸိူဝ်းၼၼ်ႉ ယွၼ်ႉယိုဝ်းၵွင်ႈဢမ်ႇထၢတ်ႇဢမ်ႇဝၢႆးလႄႈ သဵင်ၵွင်ႈလင်ၼၼ်ႈမေႃးပၼ်း ထၢင်ႇတေမီးၸုမ်းၶဝ်ၵူၺ်းၼၼ်ႉယူႇ။ ဢမ်ႇထၢင်ႇဢမ်ႇထိူမ် ၵေႃႉဢၼ်ယိုဝ်းၵွင်ႈပူၵ်းၶိုၼ်ႈၾႃႉၶိုၼ်ႈမွၵ်ႇ ယူႇၼႂ်းၵၢင်ပိူၼ်ႈၼၼ်ႉ လူမ်ႉလူင်ႉၵႂႃႇသေယဝ်ႉ၊ ၸုမ်းၶဝ်ၼၼ်ႉၵေႃႈ ၵိုင်ႉၵၢင်ႉတူၵ်းၸႂ် ယိုဝ်းၵွင်ႈၶဝ်ၵႂႃႇၵူႈၸွၵ်ႉၵူႈၸဵင်ႇယူႇ။ ယွၼ်ႉၶဝ်ယူႇတီႈၵၢင်ပၢင်ႇလႄႈ ပဵၼ်ပဝ်ႉမၢႆလႆႈငၢႆႈယဝ်ႉ။
တပ်ႉသိုၵ်းၶိုၵ်ႉတွၼ်း ယုင်းလၢႆးၶဝ်ၵေႃႈ ပႂ်ႉႁႂ်ႈသဵင်ၵွင်ႈၸုမ်းၸူၼ်ၶဝ်ယဵၼ်ၵႂႃႇသေ ဢမ်ႇႁိုင်ဢမ်ႇၼၢၼ်း ၶဝ်ၵေႃႈပွႆႇမၢၵ်ႇၵွင်ႈၶဝ်ဢွၵ်ႇ ယိူင်းသႂ်ႇၵူၼ်းၸိူဝ်းၼၼ်ႉ လူမ်ႉၵႂႃႇပဵၼ်ၵေႃႉပဵၼ်ၵေႃႉယူႇ။ မိူဝ်ႈပဵၼ်ၸိူင်ႉၼၼ် ၸုမ်းၸူၼ်ၶဝ်ၼၼ်ႉ မႄးဢဝ်တီႈယူႇလီလီငၢမ်းငၢမ်းယဝ်ႉ ယိုဝ်းၵႂႃႇၶိုၼ်းတၢင်းမႃးမၢၵ်ႇၵွင်ႈၼၼ်ႉယဝ်ႉ။
သမ်ႉဝႃႈပဵၼ်ၵၢင်ၶမ်ႈသေတႃႉ လိူၼ်ၵေႃႈယင်းလႅင်းထွင်ႇပိူင်းပၼ် ႁႂ်ႈႁၼ်ၵူၼ်းလႆႈလႄႈ ၸၢႆးယွတ်ႈၼၼ်ႉၵေႃႈ တင်းၵွင်ႈသၼၢႆႇပိူဝ်ႇမၼ်းၼၼ်ႉသေ ၶိုၼ်ႈယူႇၼိူဝ်လင်ႁိူၼ်းၼၼ်ႉယဝ်ႉ ယိူင်းသႂ်ႇၵေႃႉလႂ်ၵေႃႈ လူမ်ႉဢူပ်ႇထူတၢႆၵႂႃႇၵေႃႉလႂ်ၵေႃႉၼၼ်ႉယူႇ။
သဵင်ၵွင်ႈလင်ယွၼ်ႈမေႃးတင်းဝၢၼ်ႈ ၵူၼ်းၼႂ်းဝၢၼ်ႈ တေပဵၼ်ၸိူင်ႉႁိုဝ်တႄႉဢမ်ႇႁူႉယဝ်ႉ၊ ၵူၼ်းၸူၼ်ဢၼ်ၶဝ်ႈမႃးၼႂ်းဝၢၼ်ႈၼႆႉတႄႉ တပ်ႉသိုၵ်းၶိုၵ်ႉတွၼ်း ယုင်းလၢႆးၶဝ်ႁိုဝ်ပၼ်လွတ်ႈ၊ သမ်ႉဝႃႈၵူၼ်းဢေႇသေတႃႉ လွင်ႈႁဵတ်းၵၢၼ်ၶဝ်တႄႉ ၵူၼ်းၼမ်ၵေႃႈဢမ်ႇပေႉလႆႈ၊ ဢဝ်တီႈယူႇၵၼ်ဝႆႉ မီးယူႇၵူႈၸွၵ်ႉၵူႈၸဵင်ႇ လႅၼ်ႈဝႆးၽႂ်းၽၢႆ တၢၼ်ႇၵူၼ်းမေႃႁၢႆတူဝ်ၼၼ်ႉယဝ်ႉ။
ႁိုင်ယူႇ 15 မိၼိတ်ႉ သဵင်ၵွင်ႈတင်းသွင်ၽၢႆႇယဵၼ်ႁၢႆၵႂႃႇ၊ ၵူၼ်းၼႂ်းတပ်ႉသိုၵ်းၶိုၵ်ႉတွၼ်းယုင်းလၢႆးၶဝ် ၵမ်ႈၽွင်ႈၵေႃႈ ၸႅၵ်ႇၽႄၵၼ် မႃးၵႂၢတ်ႇလၢင်ႉ ၵဵပ်းဢဝ်တူဝ်တၢႆၵူၼ်းၸူၼ်ၸိူဝ်းၼၼ်ႉၵႂႃႇယူႇ။ ဢွၼ်ၵၼ်တေႃႉၵႂႃႇၵမ်းယဝ်ႉၵမ်းၵေႃႈ ၼင်ႇႁၢင်ႈမၼ်းပေႉမႃးၼမ် သမ်ႉပေႃးမီးယူႇၵူႈၸွၵ်ႉၵူႈၸဵင်ႇ၊ မိူင်းၸမ်တေလႅင်း ၶဝ်ၸင်ႇတေတေႃႉၵႂႃႇပႅတ်ႈလႆႈသဵင်ႈသဵင်ႈ။
ၼႃႈၾႃႉၼႃႈမိူင်းမိုတ်းမူဝ်း မုင်ႈတူၺ်းၵႂႃႇတၢင်းလႂ်ၵေႃႈ ၵႅၼ်ႇပေႉမႃးမွင်၊ ဢၢႆၶႅဝ်းတူႇလိူတ်ႈ ဢိူၵ်ႇၼုၵ်းလႅင်ၸွမ်းသဵၼ်ႈတႃႈသၢႆတၢင်း၊ ႁိူၼ်းၵူၼ်းသဝ်းၵေႃႈ ပေႃးပဵၼ်ႁူးပွင်ႇပဵဝ်လူင်ၵႂႃႇၵူႈလင်၊ ႁိူၼ်းမႆႉႁိူၼ်းၽႃၶႅၼ်းႁၼ်ၸႅင်ႈ ပၼ်ထႅင်ႈတၢင်းယၢပ်ႇ ၶၢၼ်ၸႂ်ၵူၼ်းမိူင်းၵူၺ်းၵူၺ်းယဝ်ႉ။ ႁဵဝ်းငိုၼ်းၶဝ် ဢၼ်ငွမ်ဝႆႉယူႇတႂ်ႈလၢင်ႈၼၼ်ႉၵေႃႈ ႁိုဝ်ႁတ်းၵႂႃႇလႂ်တင်းၶိုၼ်း ၵၢင်ၼႂ်လႃႈတၢၼ်ႇတၢၼ်ႇ ငိၼ်းသဵင်ႁွင်ႉသေႃႇၵူၼ်းၼႂ်းဝၢၼ်ႈ
“မိူဝ်ႈလဵဝ်ဢမ်ႇမီးၽေးမီးၶဵၼ်သင်ယဝ်ႉ ၽႂ်ယူႇႁိူၼ်းၵေႃႈ ဢွၼ်ၵၼ်ဢွၵ်ႇမႃးလူၺ်ႈ” ၼၼ်ႉတႄႉပဵၼ်သဵင်ဢိင်ႇတႃႉယူႇ။
ၵူၼ်းၸိူဝ်းဢၼ်ယင်းတိုၵ်ႉယူႇၼႂ်းဝၢၼ်ႈၼၼ်ႉၵေႃႈ ဢွၼ်ၵၼ်ဢွၵ်ႇမႃးယဝ်ႉ၊ ၵမ်ႈၽွင်ႈဢၼ်လႆႈတၢင်းမၢတ်ႇၸဵပ်းယူႇၼၼ်ႉၵေႃႈ သႅၼ်ႇႁွင်ႉယွၼ်းတၢင်းၸွႆႈထႅမ်ၵၼ်ၵႂႃႇ။ ၼင်ႇဝႃႈၼႂ်းဝၢၼ်ႈၶဝ် ဢၼ်တဵတ်ႇယဵၼ်ၼင်ႇဝၢၼ်ႈႁၢမ်းလူင်ၼၼ်ႉၵေႃႈ လႆႈမီးသဵင်ၵူၼ်းဢူၼ်ပၼ်းၶိုၼ်းယဝ်ႉ။
တွၼ်ႈႁူၵ်းသုတ်းၵႂႃႇယဝ်ႉ သိုပ်ႇလူထႅင်ႈတွၼ်ႈၸဵတ်းၶႃႈ။
တႃႇတွင်း။ ။ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆး ဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈပဵၼ်တေႉ။
