တွၼ်ႈႁႃႈ
ၵၢင်ၶမ်ႈလပ်းသိင်ႇ ၶၢဝ်းၶိင်ႇပိူၼ်ႈၼွၼ်းလပ်းမွႆႈၼၼ်ႉ ၸၢႆးယွတ်ႈလႄႈႁဵဝ်းငိုၼ်းၼၼ်ႉတႄႉ ယင်းတိုၵ်ႉၼင်ႈဢုပ်ႇၵၼ်ယူႇႁိမ်းမုၵ်ႉၾႆးၵႂၼ်း တင်းဢုပ်ႇတင်းသူၼ်းၾႆး၊ ဢုပ်ႇၵႂႃႇဢုပ်ႇမႃးၶေႃးႁႅင်ႈၼႃႇၼႆၵေႃႈ သူတ်ႉၼမ်ႉၼဵင်ႈႁေ ၵေႃႉၼိုင်ႈလၢတ်ႈယဝ်ႉၵေႃႉၼိုင်ႈတွပ်ႇ ၵႂၢမ်းသွတ်ႇၵွင်ႉၶဝ်ႈၵၼ် ယိုင်ႈလၢတ်ႈ ၶေႃႈၵႂၢမ်းဢၼ်ယူႇၼႂ်းၸႂ်ၼၼ်ႉၵေႃႈ ပေႃႇၽုတ်းဢွၵ်ႇမႃးတိၵ်းတိၵ်းယဝ်ႉ။
“ၸဵမ်မိူဝ်ႈႁူပ်ႉႁၼ်သူ ပၼ်ၸၢႆးႁဝ်းပေႃးမဝ်း တၢင်းလဝ်းဢွၼ်ႇၼွင်ႉယိင်းၼၼ်ႉ သမ်ႉပေႃးၶႂ်ႈဢဝ်ႁူဝ်ၸႂ်ႁဝ်း ၽၢၵ်ႇပၼ်ၼွင်ႉဝႆႉသဵင်ႈသဵင်ႈယဝ်ႉဝႃႈ”
“ယႃႇဝႃႈၼၼ်ၶႃႈလႄႈ မဵဝ်းဝႃႈမီးၸႂ်တေႃႇၵၼ်ဢၼ်ဝႃႈၼၼ်ႉတႄႉ မိူဝ်ႈႁၼ်ၼႃႈၵူၺ်းဢေႃႈ ပေႃးယူႇပႃႈလင်ၼႆ ဢမ်ႇႁူႉတေလၢတ်ႈသင်ၵူၺ်းၵူၺ်း၊ မဵဝ်းႁူႉၼႃႈဢမ်ႇႁၼ်ၸႂ်ဢၼ်ဝႃႈၼၼ်ႉဢေႃႈ ယိင်းႁဝ်းၵူဝ်ၼႃႇ”
“ယူႇတေႃႇၼႃႈဝႃႈႁၵ်ႉၵေႃႈ ယူႇပႃႈလင်ၼၼ်ႉတိုၼ်းၸႂ်ထိုင်သေႇသေႇယဝ်ႉ ပႅၵ်ႉသမ်ႉဝႃႈဢမ်ႇၸႂ်ႈၵူၼ်းလဝ်း ဢမ်ႇၸႂ်ႈၸၢႆးငဝ်းၵေႃႈ ၸႂ်ႁဝ်းၼၼ်ႉတႄႉမီးၼွင်ႉသၢဝ်လဝ်းႁဝ်းဝႆႉယူႇၼႃႈ”
“ႁၵ်ႉၼႆၼၼ်ႉ ၸိုင်ပႄႉလႅပ်ႈလၢတ်ႈငၢႆႈ ယွၼ်ႉဢမ်ႇလႆႈသဵင်ႈၵႃႈသဵင်ႈၶၼ်လႄႈ ၸင်ႇလႆႈလၢတ်ႈဢွၵ်ႇမႃးၶႃႈႁိုဝ်ၼေႃ”
“ၼွင်ႉယိင်းၵဝ်ၸိုင်သမ်ႉဝႃႈ ဢမ်ႇမီးၵႃႈမီးၶၼ် ၵႂၢမ်းဝႃႈႁၵ်ႉမဵဝ်းၶၢၼ်ယၢပ်ႇ ပေႃးဢမ်ႇလႆႈႁၼ်ၼႃႈၼွင်ႉပီႈႁိုဝ်တေမေႃလၢတ်ႈဢွၵ်ႇ မွၵ်ႇၽႂ်လႆႈလႃႇပီႈ ၼွင်ႉမေႃဢုပ်ႇယုမ်ႉၼႃႈၵီႈတေႃႇပီႈၸိူင်ႉၼႆ ပၼ်ဢဝ်ႁူဝ်ၸႂ်ပီႈႁဝ်းပေႃးလႆႈလၢတ်ႈၵႂၢမ်းဝႃႈႁၵ်ႉမႃးႁႂ်ႈၼၼ်ႉၼႃႇ”
“မဵဝ်းဢမ်ႇၸၢင်ႈထူၵ်းဢွၵ်ႇၼႄၵၼ်ၵေႃႈ ၶႂ်ႈလၢတ်ႈသင်ၵေႃႈလၢတ်ႈလႆႈယူႇၶႃႈဢေႃႈ”
“ပေႃးဝႃႈၼွင်ႉပေႉၸႂ်ၶႂ်ႈႁၼ်ယူႇၵေႃႈ ပီႈၵေႃႈပေႉၸႂ်ပိုတ်ႇၽုၺ်ႇၼႄလႆႈယူႇၼႃႈ ယွၼ်ႉပီႈယုမ်ႇဝႃႈ ၼႂ်းႁူဝ်ၸႂ်ပီႈၼၼ်ႉ မီးၼွင်ႉၵေႃႉလဵဝ်ၵူၺ်း သီႇႁွင်ႈႁူဝ်ၸႂ်တိုၼ်းဢမ်ႇပၼ်ၽႂ်သၢင်ႈသဝ်းလႆႈ လိူဝ်သေၼွင်ႉၼၼ်ႉယဝ်ႉ”
ၼင်ႇဝႃႈၶမ်ႈၶိုၼ်းၼႆႉ ပွတ်းၼႃႇတွၼ်ႈတႃႇၶႃၼၼ်ႉယဝ်ႉ။ ႁူဝ်ၼႂ်မိူင်းၸမ်လႅင်း ၸၢႆးယွတ်ႈၸင်ႇတေပွၵ်ႈမိူဝ်း၊ ႁဵဝ်းငိုၼ်းတႄႉၵေႃႈ ႁိုဝ်တေလႆႈၼွၼ်းယဝ်ႉလႃႇ ပေႃးလူဝ်ႇႁုင်ၶဝ်ႈမိုဝ်ႉၵႅင်တႃႇၵႂႃႇႁႆႈၵႂႃႇသူၼ်ယဝ်ႉၼႃႇ။
ယၢမ်းၵၢင်ၼႂ်လႃႈတၢၼ်ႇတၢၼ်ႇယဝ်ႉ ၵူၼ်းၼႂ်းၸုမ်းၶဝ်ၵေႃႈ လၢတ်ႈၵၼ်ဝႆႉဝႃႈတေဢုပ်ႇၵုမ်ၵၼ် မွၵ်ႈပႅတ်ႇမူင်းၼႆႉၼႆယူႇ၊ ပႂ်ႉတူၺ်းၸၢႆးယွတ်ႈမႃးၵမ်းလႂ်ၵေႃႈ ဢမ်ႇႁၼ်ႁွတ်ႈမႃးသေပွၵ်ႈ ထိုင်တီႈသၢင်ႇၵျႃႇပေႃးလႆႈၸွမ်းၶႆႈသေ ႁူပ်ႉၺႃးမုၼ်ၸဝ်ႈယဝ်ႉ။
“ၸဝ်ႈသြႃႇႁဝ်းၶႃႈ ၸၢႆးယွတ်ႈၸွင်ႇယူႇတီႈၵျွင်းၼႆႉၶႃႈႁိုဝ်”
“ၶမ်ႈဝႃးၵႂႃႇတၢင်းလႂ်ဢမ်ႇႁူႉတင်းၶိုၼ်း ၸင်ႇႁႃမႃးမိူဝ်ႈမိူင်းၸမ်လႅင်းၼႆႉၵူၺ်းၼေႈ”
မိူဝ်ႈႁူႉၸိူင်ႉၼၼ် သၢင်ႇၵျႃႇၵေႃႈၼႅတ်ႈၵႂႃႇတူၺ်းၸၢႆးယွတ်ႈၼၼ်ႉသေ လၢၵ်ႈၸၼ်ဢဝ်မၼ်းလုၵ်ႉမႃးယူႇ။
“ၵူၼ်းၶႂ်ႈလပ်းၶႂ်ႈၼွၼ်းယူႇတေမႃးႁွင်ႉၵၼ်ႁဵတ်းသင်လႃႇ!!”
“လူဝ်ႇႁဵတ်းၵၢၼ်ႁဵတ်းငၢၼ်းယဝ်ႉ မိူဝ်ႈၼႆႉမီးၵၢၼ်လမ်ႇလွင်ႈဢိူဝ်ႈ”
ၼင်ႇႁၢင်ႈတႃၼွၼ်းမၼ်းၼၼ်ႉၵေႃႈ သမ်ႉပေႃးပၢင်ႇလူင်ၵႂႃႇမူတ်းသေ ၽုၼ်ႇၽၢၼ်ႇႁၢင်ႈႁႅၼ်းတူဝ်မၼ်းလုၵ်ႉမႃးၵမ်းလဵဝ်။
“ၵႂႃႇလႄႈပေႃးၼၼ်”
ဢမ်ႇႁိုင်ဢမ်ႇၼၢၼ်း သွင်ၶႃၵေႃႈလႆႈႁွတ်ႈထိုင်တီႈပၢင်သဝ်းၶဝ်ၼၼ်ႉၵႂႃႇယူႇ။ ၸွမ်းၼင်ႇဢၼ်ၶဝ်လႆႈၸွပ်ႇသွၵ်ႈတူၺ်းၼၼ်ႉ ထူပ်းႁၼ်တီႈယူႇၸုမ်းၸူၼ်ၼၼ်ႉယဝ်ႉလႄႈ မိူၼ်ဝႃႈၵူၼ်းၸိူဝ်းၼၼ်ႉ ဢဵၼ်ႁႅင်းယႂ်ႇဝႆႉယူႇ၊ တႃႇတေဢဝ်ပေႉၶဝ်လႆႈၼၼ်ႉ ပေႃးတေၶဝ်ႈတိုၵ်းႁဵတ်းၼၼ်ၵူၺ်းတႄႉ ႁႅင်းၵူၼ်းၵေႃႈတေဢမ်ႇပေႉ ႁႅင်းၶိူင်ႈၵွင်ႈၵၢင်ႇၵေႃႈတေဢမ်ႇပေႃး ယွၼ်ႉၼၼ်လႄႈတေလႆႈႁႃလွၵ်းလၢႆးဝၢင်းၽႅၼ်ၵၼ်ၵႂႃႇထႅင်ႈယူႇ။
“ပေႃးတူၺ်းငဝ်းလၢႆးတႄႉ ၶႃႈဝႃႈႁဝ်းၸၢင်ႈလမ်တိုၵ်းၶဝ်လႆႈယူႇၶႃႈ” သၢင်ႇၵျႃႇလၢတ်ႈ။
“မီးပၢႆးဝူၼ်ႉၸိူင်ႉႁိုဝ်လႃႇသၢင်ႇၵျႃႇ” ႁူဝ်ၼႃႈၶဝ်ထၢမ်။
“ၸွမ်းၼင်ႇဢၼ်ၶႃႈၸွပ်ႇသွၵ်ႈမႃး ၵၢင်ဝၼ်းၶဝ်ၵေႃႈဢမ်ႇလႆႈမီၵူၼ်းၼမ်ႁေၵႃႈႁိုဝ် တေၼမ်လိူဝ်ႁဝ်းၼႆႉမွၵ်ႈ သွင်ပုၼ်ႈၵူၺ်း ၸႂ်ႉလၢႆးလမ်တိုၵ်းဢဝ်ၵေႃႈလႅပ်ႈတေလႆႈယူႇ”
သၢင်ႇၵျႃႇၵေႃႈလၢတ်ႈၼႄၽႅၼ်ၵၢၼ်မၼ်းၵႂႃႇသေ၊ ႁူဝ်ၼႃႈၵေႃႈ မႄးဝူၼ်ႉတူၺ်းၶိုၼ်းယဝ်ႉ သိုပ်ႇၽႅၼ်ၵၢၼ်ၵႂႃႇတႃႇတေၶဝ်ႈတိုၵ်းယႃႉလူႉပႅတ်ႈ တီႈယူႇၸုမ်းၸူၼ်ၶဝ်ၼၼ်ႉယဝ်ႉ။
ၽွင်းၵၢင်ဝၼ်းလႅတ်ႇမႆႈတႅင်ႈတႅင်ႈ ၶဝ်ၵေႃႈၵျွၵ်းၶၢမ်ႈႁူဝ်ႉ လွမ်ငွႆးၶဝ်ႈၵႂႃႇလွႆးလွႆး ႁၼ်ၵူၼ်းတီႈလႂ် ဢိုတ်းသူပ်းႁုၵ်ႉၸၼ်ငႅၼ်းၶေႃး သူၼ်ႈၵွင်ႈတွႆႇလူမ်ႉၵႂႃႇ ၵေႃႉလႂ်ၵေႃႉၼၼ်ႉ၊ လွင်ႈႁဵတ်းသၢင်ႈၶဝ် ဝႆးၽၢႆလႅတ်းၽႂ်း ဢမ်ႇတၼ်းႁူႉတၼ်းႁၼ်၊ ၵူၼ်းၸိူဝ်းၼၼ်ႉၵေႃႈ လူမ်ႉမွပ်ႇၵွင်ၵၼ်ယူႇသဵင်ႈ လူၺ်ႈသဵင်ၵွင်ႈဢမ်ႇတႅၵ်ႇသေဢိတ်း ၼၼ်ႉယဝ်ႉ။ တီႈလႂ်ဢမ်ႇမီးၵူၼ်းယဝ်ႉၵေႃႈ ဝိလိင်ႇလႄႈ ဢၢႆႈလိုၼ်းၸွမ်းၵႂႃႇပႃႈလင် ႁၢင်ႈၵၢင်မၢၵ်ႇသႂ်ႇ ၸွမ်းပိုၼ်ႉတီႈၸိူဝ်းၼၼ်ႉသမ်ႉပေႃးတဵမ်သေ ဢမ်ႇႁိုင်ၶဝ်ၵေႃႈ ၵဵပ်းၵႂၢတ်ႇလၢင်ႉဢဝ်ၵူၼ်းၸိူဝ်းဢၼ်လူမ်ႉယူႇၼၼ်ႉ မႃးမတ်ႉၵွင်ၵၼ်ၵႂႃႇ၊ ဢဝ်ၽႅၼ်ႇၽႃႈပိၵ်ႉဢိုတ်းသူပ်းၶဝ်ဝႆႉ ဢမ်ႇပၼ်လၢတ်ႈၵႂၢမ်းႁင်လႆႈၼၼ်ႉယဝ်ႉ ၸုမ်းၶဝ်ၵေႃႈ ဢွၼ်ၵၼ်ဢွၵ်ႇမႃးပႂ်ႉတူၺ်းငဝ်းလၢႆးတၢင်းၼွၵ်ႈၼၼ်ႉၶိုၼ်းယူႇ။
“ယူႇၸွမ်းၸူၼ်မႃးႁိုင်ၼႃႇၵေႃႈ လၢႆးႁဵတ်းၶႂ်ႈမိူၼ်ၸူၼ်မႃးလွႆးလွႆးယဝ်ႉ ဢမ်ႇဝႃႈႁႃႉ” သႅင်ၾႃႉလၢတ်ႈၸူး။
“ပိူၼ်ႈႁွင်ႉဝႃႈဢဝ်လၢႆးၸူၼ် ႁႅမ်ၸူၼ်ၶိုၼ်းၼႆဢိူဝ်ႈ မႂ်းၶႂ်ႈႁူႉၵေႃႈ” ဝိလိင်ႇလၢတ်ႈ။
ယၢမ်းၵၢင်ၶမ်ႈ မိူဝ်ႈၽွင်းဢၼ်ၸုမ်းၶဝ်ႁွတ်ႈမႃးၼၼ်ႉ ဝိလိင်ႇၵေႃႈ ႁၼ်ၵူၼ်းၶဝ်မႃးၵၼ်ၼမ်ၼႃႇယဝ်ႉၼႆလႄႈ ၼႅတ်ႈတဵၵ်းမၢၵ်ႇမၼ်းၵႂႃႇ၊ သဵင်မၢၵ်ႇတႅၵ်ႇလင်ၵွင်ႈႁူၺ်ႈၵွင်ႈလွႆ၊ ၾႆးလုၵ်ႉႁိုၼ်ႇၶိုၼ်ႈ သၢႆၸႂ်ၵူၼ်းဝွတ်ႈႁၢႆၵႂႃႇၸွမ်းၾႆး ပိုၼ်ႉတီႈၸိူဝ်းၼၼ်ႉၵေႃႈ လူႉလႅဝ်ယွၵ်းယွႆလူင်ၵႂႃႇမူတ်းယဝ်ႉ။ ၵမ်ႈၽွင်ႈဢၼ်လွတ်ႈၵေႃႈဢႅၼ်ႇႁူၼ်လႅၼ်ႈပၢႆႈၶိုၼ်း ၸုမ်းၶဝ်ၵေႃႈႁၢင်ႈလွၵ်းပႂ်ႉဝႆႉယဝ်ႉလႄႈ ယိုဝ်းလူမ်ႉၵႂႃႇၵေႃႉလႂ်ၵေႃႉၼၼ်ႉပႅတ်ႈယဝ်ႉ။ ၸုမ်းၸူၼ်ၼၼ်ႉၵေႃႈ မၢၵ်ႇမိုဝ်ႉၸိုၼ်းယၢမ်းၶဝ်ၼမ်ၼႃႇလႄႈ ယိုဝ်းၵႃႈဝႃႈၵႃႈပဵၼ် ပွႆႇမၢၵ်ႇၶိူဝ်းၶိူဝ်းယႂ်းယႂ်း ဢဝ်တပ်ႉသိုၵ်းၶိုၵ်ႉတွၼ်းယုင်းလၢႆးၶဝ် သမ်ႉပေႃးဢမ်ႇၸၢင်ႈၶဝ်ႈၸမ်လႆႈ ပၼ်ႁႂ်ႈၸူၼ်ၶဝ်ထွႆၵႂႃႇလႆႈလီလီငၢမ်းငၢမ်းယူႇ။
ၸုမ်းၸူၼ်ဢၼ်ၵိုတ်းၸိူဝ်းၼၼ်ႉၵေႃႈ လွင်ႈဢၼ်မီးၵူၼ်းမႃးၸွမ်းယိုဝ်းၶဝ် ႁဵတ်းႁႂ်ႈတီႈယူႇတီႈသဝ်းၶဝ် လူႉလႅဝ်ၵႂႃႇမူတ်းၼၼ်ႉ၊ ပဵၼ်ဢၼ်ဢမ်ႇႁၢၼ်ႉၸႂ်တႄႉတႄႉ၊ လႆႈဢွၼ်ၵၼ်ၶဝ်ႈၸူၼ်ၼႂ်းဝၢၼ်ႈသေ ၵၢဝ်ႇၼႄးဝႃႈ ၵူၼ်းဝၢၼ်ႈပဵၼ်ၵူၼ်းၵႂႃႇလၵ်ႉယိုဝ်းၶဝ်ၼႆလႄႈ ယိုဝ်းတၢႆၵူၼ်းဝၢၼ်ႈပဵၼ်ၵေႃႇပဵၼ်ၵွင် ဢမ်ႇသူၼ်ၸႂ်ၽႂ်ပဵၼ်ၽႂ်ယဝ်ႉ ႁဵတ်းႁႂ်ႈၵူၼ်းဝၢၼ်ႈတင်းဝၢၼ်ႈ လႆႈဢွၼ်ၵၼ်ပၢႆႈမႅပ်းပႅပ်ႉႁႃတီႈလွတ်ႈၽေး ႁင်းၽႂ်ႁင်းမၼ်းယဝ်ႉ။
ၵူၼ်းဝၢၼ်ႈႁိမ်းၸမ် ဝၢၼ်ႈဢၼ်ထုၵ်ႇၸူၼ်ၸိူဝ်းၼၼ်ႉၵေႃႈ ဢွၼ်ၵၼ်ၵူဝ်မိူၼ်ၵၼ်လႄႈ ၼႅတ်ႈပၢႆႈၵႂႃႇတင်းႁိူၼ်းတင်းယေး ဝၢၼ်ႈထၢၼ်ႈပေႃးၸမ်ႁၢမ်း။ တီႈဝၢၼ်ႈဢွၼ်ႇႁဵဝ်းငိုၼ်းၶဝ်ၼႆႉၵေႃႈ မိူဝ်ႈလႆႈႁူႉၶၢဝ်ႇႁူႉငၢဝ်းၵၼ်မႃးၼႆ သမ်ႉပေႃးတိုၼ်ႇၽၢၼ်ႈသၢၼ်ႈၵၼ်ၵႂႃႇ တင်းဝၢၼ်ႈမိူၼ်ၵၼ် ၵမ်ႈၽွင်ႈၵေႃႈဢမ်ႇထွမ်ႇသီႇထွမ်ႇႁႃႈ ဢမ်ႇပႂ်ႉၼႃႈပႂ်ႉလင်၊ ဢမ်ႇသေလၢႆၶူဝ်းၶွင်ႁိူၼ်းယေးသင်ယဝ်ႉ ပေႃးသၢႆၸႂ်ၸဝ်ႈၵဝ်ႇလွတ်ႈၵူၺ်းၵေႃႈ ပဵင်းပေႃးယဝ်ႉၼႆသေ ဢွၼ်ၵၼ်ပၢႆႈဢွၵ်ႇဝၢၼ်ႈၵႂႃႇပဵၼ်ၵေႃႇပဵၼ်ၵွင်ယူႇ။ ၵိုတ်းဢဝ်လၢႆႁိူၼ်းၵူၺ်းယဝ်ႉ ဢၼ်တိုၵ်ႉယူႇ။
တွၼ်ႈႁႃႈသုတ်းၵႂႃႇယဝ်ႉ သိုပ်ႇလူၵႂႃႇထႅင်ႈတွၼ်ႈႁူၵ်းၶႃႈ။
တႃႇတွင်း။ ။ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆး ဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈပဵၼ်တေႉ။
