တွၼ်ႈသီႇ
ၼင်ႇႁိုဝ်တေႁူႉ တီႈၵႂႃႇတီႈမႃးၸုမ်းၸူၼ်ၼၼ်ႉၵေႃႈ တပ်ႉသိုၵ်းၶိုၵ်ႉတွၼ်းယုင်းလၢႆးၶဝ် ၸႅၵ်ႇပုၼ်ႈၽွၼ်းၵၼ် ႁဵတ်းၵၢၼ်ၽႂ်ၵၢၼ်မၼ်းၵႂႃႇ ယူႇယဝ်ႉ။
ထိုင်ယၢမ်းၵၢင်ၼႂ် ၵူၼ်းၼႂ်းဝၢၼ်ႈၶဝ် ဢွၼ်ၵၼ်ၵႂႃႇႁႆႈၵႂႃႇသူၼ်ၵၼ်မူတ်းယဝ်ႉ၊ ၸၢႆးယွတ်ႈၵေႃႈ လႆႈလွမ်လၵ်ႉၵႂႃႇတီႈတင်ႈသဝ်းၶဝ်ၼၼ်ႉၶိုၼ်းယူႇ။ မိူဝ်ႈႁွတ်ႈၵႂႃႇထိုင်ၼၼ်ႉၵေႃႈ ၸုမ်းၶဝ်သမ်ႉပေႃးၼင်ႈၵုမ်ၵၼ် မိူၼ်ပႂ်ႉထႃႈမၼ်းၵူၺ်းၼၼ်ႉယဝ်ႉ။
“ႁႅင်ႉပေႉၼၢၼ်းမႃးလႃႇ!!..” သၢင်ႇၵျႃႇထၢမ်။
“ၸိုင်ဝႃႈႁႂ်ႈပွမ်တူဝ်ၼႆ.. တေမႃးၵေႃႈလူဝ်ႇတူၺ်းၼႃႈတူၺ်းလင်ဢိတ်ႉၼိုင်ႈၵႂႃႈ”
“ႁွတ်ႈမႃးၵေႃႈလီယဝ်ႉ.. လႆႈသင်မႃးၽွင်ႈလႃႇ!!”
“လႆႈလၢတ်ႈတေႃႇၸဝ်ႈသြႃႇတင်းၶိုၼ်းၵူၺ်းႁိုဝ်ၶမ်ႈဝႃး ၺႃတေဢမ်ႇလႆႈၼွၼ်းယဝ်ႉၵွၼ်ႇလႃႈ”
“ၼႂ်းဝၢၼ်ႈမီးသၢဝ်ယူႇႁႃႉဢၢႆႈၼွင်ႉ” ဝိလိင်ႇၼႅတ်ႈထၢမ်ၸူး။
ၸၢႆးယွတ်ႈၵေႃႈႁိုဝ်ပႃႈတၵ်းသဵင် လွမ်လွမ်ယုမ်ႉယူႇႁင်းမၼ်း။
“ဢမ်ႇလၢတ်ႈၵေႃႈ တူၺ်းသီၼႃႈမၼ်းၵူၺ်းပေႃးႁူႉယဝ်ႉႁိုဝ်လႃႇ” ၸၢႆးၼုမ်ႇလၢတ်ႈ။
ၸုမ်းၶဝ်ၵေႃႈလႆႈဢွၼ်ၵၼ်ဢုပ်ႇထိုင် လွင်ႈၵၢၼ်လွင်ႈငၢၼ်းၶဝ်ယဝ်ႉ၊ လၢတ်ႈထိုင်ၽႅၼ်ၵၢၼ်ၶဝ် တႃႇတေလမ်းတီႉၺွပ်းၸူၼ်ၸိူဝ်းၼၼ်ႉၵႂႃႇယဝ်ႉ။
ၵၢင်ဝၼ်းၶၢဝ်းပိူၼ်ႈၵႂႃႇႁဵတ်းၵၢၼ် ၸၢႆးယွတ်ႈၵေႃႈလႆႈပွၵ်ႈၵႂႃႇႁဵတ်းၵၢၼ်မၼ်းၶိုၼ်း၊ ထိုင်ၶၢဝ်းပိူၼ်ႈပွၵ်ႈၵၢၼ် မၼ်းၵေႃႈပွၵ်ႈမႃးယူႇတီႈၵျွင်းၶိုၼ်းယဝ်ႉ။ ထိုင်ၶၢဝ်းၶိင်ႇပိူၼ်ႈဢၢပ်ႇၼမ်ႉဢၢပ်ႇတႃႈၼႆၵေႃႈ ယူႇၼိူဝ်ၵျွင်းၼၼ်ႉသေ မုင်ႈတူၺ်းတၢင်းယိင်းၼွင်ႉသၢဝ်ႁဵဝ်းငိုၼ်းၶဝ် တေလူင်းဢၢပ်ႇၼမ်ႉယူႇ၊ မိူဝ်ႈဢၼ်မုင်ႈႁၼ် သၢဝ်ၼုမ်ႇႁၢင်ႈလဝ်း ၼုင်ႈတင်းသိၼ်ႈတူင်ႇတႆးလူင် ၽႃႈၸဵတ်ႉႁူမ်ႇမႃႇ ႁၢပ်ႇတင်းပုင်းၼမ်ႉပဝ်ႇတူင်ႉၶွၼ်းဝူဝုတ်းဝူဝုတ်းလူင်မႃး၊ ၸင်ႇသမ်ႉမီးလုၵ်ႈဢွၼ်ႇလဵၵ်ႉၵေႃႉၼိုင်ႈ လႅၼ်ႈလူင်ၵႂႃႇပႃႈၼႃႈလႄႈ ၼင်ႇဝႃႈမီးၽူႈၸၢႆးၵေႃႉၼိုင်ႈ ပႆယၢင်ႈႁိမ်းၸမ်သေ ယုမ်ႉယုမ်ႉယၢႆႈယၢႆႈဢုပ်ႇလၢတ်ႈၵၼ်ၵႂႃႇယူႇ။
မိူဝ်ႈပဵၼ်ၸိူင်ႉၼၼ် ပၼ်ဢဝ်ၸၢႆးယွတ်ႈႁဝ်းပေႃးငဝ်လူင်မႃးယဝ်ႉ။ ႁဵဝ်းငိုၼ်းဢၼ်ႁွတ်ႈမႃးထိုင်တၢင်းၽႄၼၼ်ႉၵေႃႈ ၵိုတ်းလိုဝ်ႈၵႂႃႇ ႁႅၼ်မုင်ႈတူၺ်းတၢင်းၵျွင်းၼၼ်ႉယူႇၵမ်းယဝ်ႉၵမ်း ၼင်ႇဝႃႈမွင်းၽႂ်သေၵေႃႉၼိုင်ႈဝႆႉလႄႈ ပၼ်ႁႂ်ႈၽူႈၸၢႆးၵေႃႉၼၼ်ႉ ၽၢၼ်ႇပူၼ်ႉၵႂႃႇပႅတ်ႈယူႇ။ သမ်ႉဝႃႈတေငဝ်တၢၼ်ႇလႂ် သၢႆတႃဢၼ်မွင်းႁႃလႄႈ ၸႂ်ထိုင်ယူႇၼၼ်ႉတႄႉၵေႃႈ ၶိုၼ်းဝိၼ်ႇဝၢႆႇၸၢႆႉတူၺ်းၶိုၼ်းထႅင်ႈ လႆႈႁၼ်ႁဵဝ်းငိုၼ်း ပႆၵႂႃႇႁင်းၵူၺ်းၵေႃႉလဵဝ်ၼႆၵေႃႈ ၼႅတ်ႈဢႅၼ်ႇလႅၼ်ႈဢွၵ်ႇဝၢင်းၵျွင်း ပေႃးဢမ်ႇတၼ်းႁၼ်ႁူဝ်ႁၼ်ႁၢင်ယဝ်ႉ။
“ဢႁႅမ်ႉ! ဢႁိုမ်ႉ!..” သဵင်ၸၢႆးယွတ်ႈၼႆႉ သမ်ႉပေႃးတၼ်းဢဝ်ႁဵဝ်းငိုၼ်းၶဝ်ဝၢႆႇယၵ်ႉတူၺ်းသေယုမ်ႉယူႇ။
“ပေႃးဝႃႈပႆႇမီးၵေႃႉႁွမ်းပႆႁူမ်ႈပွင်းၼႆ ၶႂ်ႈယွၼ်းပဵၼ်ၵေႃႉယဵပ်ႇယၢင်ႈႁွမ်းပႆၸွင်ႇလႆႈၶႃႈ”
“ပေႃးဝႃႈဢမ်ႇမီးပီႈၸၢႆးယွတ်ႈၶဝ်မႃးႁူမ်ႈပႆၸွမ်း ထၢင်ႇၼွင်ႉယိင်းၶဝ်တေလႆႈပႆၵႂႃႇလွႆးလွႆးၵေႃႉၵူၼ်းလဵဝ်ၵူၺ်းယဝ်ႉ”
တိၼ်ဢွၼ်ႇသွင်ၶႃယဵပ်ႇယၢင်ႈဝၢင်းတမ်းပႆႁူမ်ႈၵၼ်ၵႂႃႇ ထိုင်ၵႂႃႇတႃႈၼမ်ႉယဝ်ႉၵေႃႈ ၽႄၵၼ်ၵႂႃႇဢၢပ်ႇတႃႈၽႂ်တၢင်းမၼ်း ၸၢႆးၵေႃႈႁင်းၽူႈၸၢႆး ယိင်းၵေႃႈဢၢပ်ႇတၢင်းယိင်း ယူႇ။
ၸၢႆးယွတ်ႈၼၼ်ႉၵေႃႈ လႆႈၶဝ်ႈၵႂႃႇတူင်ႉတၵ်ႉဢုပ်ႇၸွမ်း ပီႈသၢင်ႇၼႃႉလုင်းဢၢဝ်ၶဝ် တီႈတႃႈၼမ်ႉၼၼ်ႉသေ ပဵၼ်ဢၼ်ႁူႉၸၵ်းမိုတ်ႈၵိုဝ်းၵၼ်မႃးယဝ်ႉ၊ သဵင်ဢုပ်ႇယဝ်ႉယွၵ်ႇၶူဝ်ၵၼ်ထၢၼ်ႈပေႃးငိၼ်းမႃးထိုင် တႃႈၼမ်ႉၽူႈယိင်းၶဝ် ဢၼ်ယူႇဝႆႉတၢင်းတႅမ်ႇၼၼ်ႉယူႇ။ မိူဝ်ႈၼႆႉမီးပၢင်ၵုမ်ႁိူၼ်းလုင်းၵႄႇၼႆလႄႈ လႆႈၸူဝ်းၸၢႆးယွတ်ႈမိူဝ်းထွမ်ႇၸွမ်းယဝ်ႉ။
ၸၢႆးယွတ်ႈဢၢပ်ႇၼမ်ႉဢၢပ်ႇတႃႈယဝ်ႉသေ ပႂ်ႉႁဵဝ်းငိုၼ်းယူႇတီႈတၢင်းၽႄၼၼ်ႉ လႄႈ ၽူႈယိင်းၸိူဝ်းဢၼ် လတ်းၽၢၼ်ႇၵႂႃႇၵႂႃႇမႃးမႃးၼၼ်ႉၵေႃႈ ဢွၼ်ၵၼ်တူင်ႉတၵ်ႉယုမ်ႉၸူးၵႂႃႇ ၼင်ႇသူၼ်ၸႂ်သူၼ်ၶေႃး လေႃးပႃးလွင်ႈၶႂ်ႈႁူႉၶႂ်ႈႁၼ်ထႅင်ႈလႄႈ
“လၢၼ်သၢင်ႇၶဝ်ပဵၼ်ၵူၼ်းတၢင်းလႂ်ၼေႃ ႁၢင်ႈဢမ်ႇယၢမ်ႈႁၼ်လႃႇ” ပႃႈလူႇၼၼ်ႉၵေႃႉလၢတ်ႈ။
“ႁိုင်ၼႃႇဢမ်ႇတၢၼ်ႇ ၶုၵ်းၸႂ်လႆႈၶႂ်ႈၸႂ်ထိုင်ၸဝ်ႈသြႃႇႁဝ်းႁေ လႆႈမႃးလႄႇမႃးၸႂ်းဢေႃႈ”
“လုၵ်ႉမႃးမိူင်းၵႆၵႃႈၼေႃႈထၢင်ႇ..ပေႃးတၼ်းတၼ်းၵေႃႈ မႃးဝႄႉလႄႇၸွမ်းဝၢၼ်ႈၸွမ်းႁိူၼ်းႁဝ်းၽွင်ႈလႄႈၼႃႉ လၢၼ်သၢင်ႇ”
သၢဝ်သိၵ်းႁိၵ်းဢွၼ်ႇ ယုမ်ႉႁွမ်ၵေႃႈ လၢတ်ႈၸွမ်းၶိုၼ်း “မိူဝ်းဝႄႉလႄႇႁိူၼ်းယိင်းၶဝ်ၽွင်ႈၶႃႈလႄႈပီႈ”
မူဝ်သႅင်မႄႈႁၢင်ႉၼႂ်းဝၢၼ်ႈၼၼ်ႉၵေႃႈ လၢတ်ႈဢုပ်ႇၸူး “ႁိူၼ်းယိင်းၶဝ်ၵေႃႈၽုၺ်ႇၽၵ်းတူႁပ်ႉတွၼ်ႈယူႇၶႃႈပီႈ”
သၢဝ်ဢွၼ်ႇ ယုမ်ႉႁွမ်ၵေႃႈ ယုမ်ႉဝၢၼ်ၸူးသႂ်ႇသေ “ပီႈမၢဝ်ႇၵူၼ်းလဝ်းၶဝ် ပႂ်ႉၽႂ်ယူႇတီႈၼႆႈၶႃႈလႃႇ ဢမ်ႇပႆႇမိူဝ်းၶႃႈႁႃႉ မိူဝ်းၸွမ်းၵၼ်ၶႃႈၼႄႇ”
“မိူဝ်းလွႆးလွႆးၶႃႈ.. မီးၵေႃႉတေမိူဝ်းၸွမ်းယဝ်ႉဢေႃႈ”
သမ်ႉမႅၼ်ႈၽွင်းဢၼ် ႁဵဝ်းငိုၼ်းမႃးငိၼ်းဢဝ်လီလီ။ ၶေႃႈတွပ်ႇလွင်ႈႁဵတ်းသၢင်ႈၶဝ်ၼၼ်ႉ မိူၼ်တေထုၵ်ႇမႅၼ်ႈၸႂ်ႁဵဝ်းငိုၼ်းၶဝ်ဝႆႉလႄႈ ယုမ်ႉဢွၵ်ႇမႃး သူပ်းပေႃးဢမ်ႇၸၢင်ႈတုပ်ႇယဝ်ႉ။
“ၵေႃႉတေမိူဝ်းၸွမ်းၼႆႉ ၸွင်ႇႁဝ်းတေၵိုင်ႇထိူၵ်ႈႁိုဝ်ၼေႃ”
“ထိူၵ်ႈႁိုဝ်ဢမ်ႇထိူၵ်ႈ ၵေႃႉပီႈၵျိူၵ်ႈလႄႈၶႂ်ႈပႆၸွမ်းတႄႉ ပဵၼ်ႁဵဝ်းငိုၼ်းၵူၺ်း”
“ၵူၼ်းလႄႇဝၢၼ်ႈလၢဝ်းမိူင်း ၵူၼ်းႁူႉၸုင်ႇႁၼ်ၸေး ၵူၼ်းမေႃဢုပ်ႇမေႃၵဝ်း ၵူၼ်းလဝ်းၸိူင်ႉၼင်ႇပီႈႁဝ်းၼႆႉ တေၵဝ်းသၢဝ်မႃးၵေႃႈဢမ်ႇဢေႇ ၵေႃႉတေႇႁူမ်ႈၽၢၵ်ႈႁိူၼ်းလဵဝ်ၵေႃႈ ဢၢပ်ႈတေမီးယဝ်ႉၶႃႈႁိုဝ်ၼေႃ”
“သင်မီးတႄႉႁိုဝ်တေႁတ်းမႃးၵဝ်း ယိင်းၼွင်ႉသၢဝ်လဝ်းလီႁၵ်ႉပေႃးတၢၼ်ႇၼႆႉ ပီႈႁိုဝ်ႁတ်းႁဵတ်းလႆႈၼိူဝ်သူလႃႇပီႈ… ၵွပ်ႈပႆႇမီးၵေႃႉၶႅပ်ႇၶၢင်ႈႁူမ်ႈပွင်ၼႃႈႁိူၼ်းမူၼ်း ပီႈၵေႃႉၵူၼ်းလဵဝ် ၸင်ႇလႆႈမႃးႁွတ်ႈၽႅဝ်ထိုင်တီႈၼႆႈ လႆႈႁူပ်ႉထူပ်းဢုပ်ႇၸူးယိင်းယူႇၼႆႉၼႃႇ”
“ပေႃးဢမ်ႇပႆႇမီးတၢင်းၵႂႃႇ ပႆႇၸၢင်ႈလႄႇႁိူၼ်းလႂ်ၼႆၵေႃႈ မိူဝ်းဝႄႉလႄႇႁိူၼ်းယိင်းၶဝ်လႆႈယူႇၶႃႈ”
“ၸူးၸႂ်တႄႉၶႂ်ႈမိူဝ်းလႄႇၸဵမ်ၶမ်ႈဝႃးယဝ်ႉ ၵူဝ်ၵိူၼ်ႇပိူၼ်ႈဢိုတ်းႁႄႉႁဝ်းဝႆႉလႄႈဢမ်ႇၸၢင်ႈမိူဝ်းၵူၺ်း”
“ၵိူၼ်ႇႁိူၼ်းယိင်းၶဝ်တႄႉ ပေႃးပီႈဝႄႉမိူဝ်း တိုၼ်းၽုၺ်ႇသေႇသေႇၶႃႈ”
တင်းပႆတင်းဢုပ်ႇ ဢမ်ႇႁူႉဝႃႈမၼ်းႁိုင် သမ်ႉပေႃးတၼ်းထိုင်ၵႂႃႇတၢင်းၽႄ ယူႇယဝ်ႉ။
ယၢမ်းၵၢင်ၶမ်ႈ တီႈႁိူၼ်းလုင်းၵႄႇၼၼ်ႉၵေႃႈ မီးၵူၼ်းၼႂ်းဝၢၼ်ႈၶဝ် ဢွၼ်ၵၼ်မႃးၼင်ႈဝႅင်းၵၼ်သေ ၼင်ႈသူတ်ႉၼမ်ႉၼဵင်ႈၵၼ်ယူႇႁင်းၽႂ်ႁင်းမၼ်း၊ လုင်းၵႄႇၵေႃႈ လႆႈတႄႇႁူဝ်ဢုပ်ႇလၢတ်ႈၶႆႈၸူးၵူၼ်းဝၢၼ်ႈၶဝ် လွင်ႈတႃႇႁပ်ႉမိုဝ်းၸွမ်းၸုမ်းၸူၼ်ၼၼ်ႉ ၼႆယူႇ။ ဢုပ်ႇၵၼ်ထၢမ်ၵၼ်ယူႇတင်းႁိုင် ဢမ်ႇႁၼ်ၽႂ်ပၼ်တၢင်းႁၼ်ထိုင်သင် ၸူးဢဝ်ဢၼ်လုင်းၵႄႇဝူၼ်ႉၼႄၼၼ်ႉၵူၺ်းလႄႈ တူၵ်းလူင်းၵၼ်ၵႂႃႇ။
တီႈၼႂ်းဝၢၼ်ႈၼႆႉမၼ်းဢမ်ႇပေႃးယႂ်ႇလႄႈ ႁမ်ႉလူဝ်ႇႁဵတ်းၵၢၼ်ႁဵတ်းငၢၼ်းႁေ ၵၢင်ၶိုၼ်းၵေႃႈ ႁႂ်ႈၵူၼ်းၸၢႆးၼုမ်ႇၶဝ်ပုတ်ႈၵၼ်ပႂ်ႉ၊ ပေႃးပဵၼ်ၸူၼ်ၼႆ ၵၢင်ဝၼ်းတေဢမ်ႇပေႃးသူမႃး တွၼ်ႈတႃႇႁႂ်ႈပေႃးယုမ်ႇၸႂ်လႆႈၼႆၵေႃႈ ႁႂ်ႈမႄႈၸဝ်ႈႁိူၼ်း ဢၼ်ဢမ်ႇလႆႈၵႂႃႇသူၼ်ၼၼ်ႉလႄႈ လုၵ်ႈဢွၼ်ႇၼုမ်ႇလႅၼ်ႈဝႆးၼၼ်ႉပႂ်ႉၼႆယူႇ ပေႃးမီးသင်မႃးၵေႃႈ တေလႆႈလႅၼ်ႈၵႂႃႇႁွင်ႉၵၼ်လႆႈဝႆးဝႆး။ ၶိူင်ႈမႆႉၶိူင်ႈမိုဝ်းၶဝ်ၵေႃႈ ၽႃႉတုင်း လႅဝ်းယၢဝ်းႁိူၼ်းၽႂ်ႁိူၼ်းမၼ်းၼၼ်ႉ လပ်ႉဝႆႉႁႂ်ႈမၼ်းၽၢႆၽၢႆၼႆသေ တူၵ်းလူင်းၵၼ်ၵႂႃႇ။
ၸၢႆးယွတ်ႈတႄႉၵေႃႈ ၶဝ်ႈထွမ်ႇၸွမ်းၵူၺ်း ဢမ်ႇပၼ်တၢင်းႁၼ်ထိုင်သင်၊ ပၢင်ၵုမ်ယဝ်ႉၵႂႃႇ မၼ်းတႄႉမုင်ႈၼႃႈမိူဝ်းတၢင်းႁိူၼ်း ႁဵဝ်းငိုၼ်းၶဝ်ယူႇၼၼ်ႉၵမ်းလဵဝ်။ ၼၢင်းၼူၼ်းဢၼ်ၵႂႃႇပၢင်ၵုမ်သေ ႁူပ်ႉႁၼ်ၸၢႆးယွတ်ႈ ၽူႈၸၢႆးၵေႃႉလဵဝ်ဢမ်ႇယၢမ်ႈႁၼ်ၼႃႈၼၼ်ႉၵေႃႈ ၸွမ်းလူၺ်ႈလွင်ႈၶႂ်ႈႁူႉၶႂ်ႈႁၼ်မၼ်းၼၼ်ႉသေ
“ပီႈၶဝ်ယူႇတၢင်းလႂ်ၶႃႈ ဢမ်ႇတွၼ်ႉယၢမ်ႈႁၼ်ၼႃႈသေပွၵ်ႈၶႃႈလူင်”
“မႃးၸႂ်းၸဝ်ႈသြႃႇတီႈၵျွင်းၼႆႉၶႃႈဢေႃႈ မီးၵူၼ်းႁွင်ႉမႃးလႄႇၼႂ်းဝၢၼ်ႈၼႆႉ ၼႆၶႃႈဝႃႇ”
ပေႃးဝႃႈၵျွင်းၼႆၵေႃႈ ၼၢင်းၼူၼ်းၼၼ်ႉတႄႉ ဝူၼ်ႉႁၼ်ၺႃးၽူႈၸၢႆး ၵေႃႉဢၼ်ၼွင်ႉယိင်းမၼ်းၸုၵ်းဢုပ်ႇသေ ၵွင်လင်မုင်ႈၼႃႈၵႂႃႇတၢင်းၵျွင်းၼၼ်ႉလႄႈ မၼ်းၵေႃႈယုမ်ႉယုမ်ႉႁေ
“တေမိူဝ်းလႄႇတၢင်းႁိူၼ်းလႂ်ၶႃႈလႃႇၶမ်ႈၼႆႉ..”
“ႁိူၼ်းႁဵဝ်းငိုၼ်းၶဝ်ဢၼ်ဝႃႈၼၼ်ႉ ပဵၼ်လင်လႂ်ဢမ်ႇႁူႉၶႃႈၼေႃ”
“ၸႂ်ႈတေႉလူင်..တူၺ်းႁၢင်ႈတူၺ်းၽၢင်ယဝ်ႉ ဝႃႈလႄႇႁႅင်ႉၼွင်ႉယိင်းၵဝ်ပေႉမႃးၸုၵ်းဢုပ်ႇလႆႈတင်းႁိုင်ၼႆ” လၢတ်ႈလွႆးလွႆးယူႇႁင်းၵူၺ်းသေ ၸင်ႇၶိုၼ်းဝိၼ်ႇဝၢႆႇၸူးၸၢႆးယွတ်ႈယဝ်ႉ
“ႁဝ်းၸိုဝ်ႈ ၼၢင်းၼူၼ်း ပဵၼ်ပီႈၼၢင်းႁဵဝ်းငိုၼ်းၶဝ်”
“ၸႂ်ႈၶႃႈႁႃႉ! ၸူမ်းတေႉဢေႃႈပေႃးၼႆ”
ၶႃသွင်ၵေႃႉၵေႃႈ လႆႈႁွတ်ႈမိူဝ်းၵႂႃႇတီႈႁိူၼ်းသေယဝ်ႉ၊ ႁဵဝ်းငိုၼ်းဢၼ်ငိၼ်းသဵင်တိၼ်ၵူၼ်းယဵပ်ႇယၢင်ႈၶိုၼ်ႈႁိူၼ်းမႃးၼၼ်ႉၵေႃႈ ၼႅတ်ႈဢွၵ်ႇမႃးတူၺ်းသေ
“မႃးယဝ်ႉႁႃႉဢေးၼၢင်း!..”
“မႃးယဝ်ႉ ပႃးၶႅၵ်ႇမႃးၸွမ်းၵေႃႉၼိုင်ႈ”
တွၼ်ႈသီႇသုတ်းၵႂႃႇယဝ်ႉ သိုပ်ႇလူၵႂႃႇထႅင်ႈတွၼ်ႈႁႃႈၶႃႈ။
တႃႇတွင်း။ ။ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆး ဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈပဵၼ်တေႉ။
