တွၼ်ႈသၢမ်
ၸၢႆးယွတ်ႈၵေႃႈ လႆႈပွမ်တူဝ်ပဵၼ်ၵူၼ်းဢႅဝ်ႇလႄႇဝၢၼ်ႈလၢဝ်းမိူင်း ၼင်ႇၵူၼ်းလုၵ်ႉတၢင်ႇတီႈသီႇလႅၼ်လူင်ၼၼ်ႉမႃးယဝ်ႉ၊ သႂ်ႇတင်းၵူၼ်တႆးမတ်ႉတဵင်သိူဝ်ႈ ထူင်ပိူဝ်ႉလုၵ်ႈၼိုင်ႈ လုၵ်ႉတင်းဢွၵ်ႇဝၢၼ်ႈၼၼ်ႉ လတ်းၽၢၼ်ႇၶဝ်ႈၸွမ်းၶႅပ်ႇဝၢၼ်ႈၼၼ်ႉႁေ မုင်ႈၼႃႈၵႂႃႇတၢင်းၵျွင်းမုၼ်ၸဝ်ႈ တၢင်းတူၵ်းဝၢၼ်ႈၼၼ်ႉယဝ်ႉ။ တၢင်းၵႂႃႇၵျွင်းၼၼ်ႉသမ်ႉ မီးတၢင်းၽႄၵႂႃႇတႃႈၼမ်ႉၼႆယူႇ လိူၵ်ႈလိူၵ်ႈ မိူဝ်ႈဢၼ်ၸၢႆးႁဝ်းၵုမ်ႇမိုင်ႉပႆယူႇၼၼ်ႉ ဢမ်ႇတၼ်းႁူႉသင် သမ်ႉၵႂႃႇသိူၵ်ႈၼႃႈသႂ်ႇသၢဝ်လဝ်းၵေႃႉၼိုင်ႈ တိုၵ်ႉႁၢပ်ႇၼမ်ႉသေ ပႆမႃးတၢင်းမၼ်းယူႇၼၼ်ႉလႄႈ မိူဝ်ႈပဵၼ်ၸိူင်ႉၼၼ် ၸၼ်ဢဝ်သၢႆတႃမၼ်း မိူၼ်ႇမိုင်ယၵ်ႉတူၺ်းယိင်းပေႃးဢမ်ႇၽၢတ်ႇ ၵိုတ်းပႂ်ႉယိင်းၶဝ်ႁွတ်ႈမႃးထိုင်တီႈမၼ်းယဝ်ႉ ဝႆႉသဵင်လီၵႂၢမ်းဝၢၼ်ၶၢၼ်လၢတ်ႈၸူး
“ၼွင်ႉယိင်းၼုမ်ႇသၢဝ်လဝ်း ယူႇထင်သဝ်းဝၢၼ်ႈၼႆႉၶႃႈႁိုဝ်ၼေႃ”
“ၸႂ်ႈဢေႃႈ..ပီႈမိူင်းၵႆၶဝ်ၶႃႈလူး လုၵ်ႉတၢင်းလႂ်တဝ်ႈ ၶဝ်ႈတၢင်းလႂ်မႃးၶႃႈ”
“တူၺ်းတၢင်းမႃးတႄႉလၢတ်ႈပေႃးဢမ်ႇလႆႈ ၶႆႈပေႃးဢမ်ႇၸၢင်ႈယဝ်ႉ တၢင်းၵႂႃႇတႄႉၵျွင်းမုၼ်ၸဝ်ႈတၢင်းၼႃႈၼႆႉၵူၺ်း”
“တူဝ်ၸႂ်ၸိုၼ်ႈၵတ်းယဵၼ်သိူဝ်းသႃႇယူႇၶႃႈၼေႃႈ”
“တင်းတူဝ်တင်းၸႂ်ၵတ်းၸိုၼ်ႈယဵၼ်ၸႂ်ယူႇၶႃႈ… ၼွင်ႉသၢဝ်ၶဝ်လူး ယူႇၸိုၼ်ႈၵတ်းယဵၼ်လီယူႇၶႃႈၼေႃႈ”
“ယူႇၸိုၼ်ႈၵတ်းယဵၼ်လီယူႇၶႃႈ..”
“သၢဝ်လဝ်းၶဝ်ဝၢၼ်ႈၼႆႉ ၸိုင်ပိူၼ်ႈပေႉမေႃဢုပ်ႇလၢတ်ႈၼႃႇၶႃႈၼေႃ”
“ပီႈမၢဝ်ႇမိူင်းၵႆၶဝ်ၶႅၼ်းမေႃဢုပ်ႇၼႃႇၶႃႈလေႃႇ”
“ၶႂ်ႈႁူႉၸၵ်းလႄႈလႆႈဢုပ်ႇၸူးၼၼ်ႉၶႃႈယဝ်ႉ မိူဝ်းလွႆးလွႆးၶႃႈ..ပေႃးဢုပ်ႇလၢတ်ႈၵႂၢမ်းၼမ် ၵူဝ်ၵေႃႉမွင်းထႃႈတီႈႁိူၼ်းၶဝ်လႆႈပႂ်ႉႁိုင်ဢေႃႈ”
“ႁၢပ်ႇၼမ်ႉမႃးၵႆ ႁိူဝ်ႉပႆႇႁၢႆလႄႈပႆႇၸၢင်ႈပွၵ်ႈ မိူဝ်းႁိူၼ်းၵေႃႈ ပႆႇမီးၵေႃႉလွမ်ငွၵ်ႈမွင်းတၢင်း ပေႃးပီႈမီးၵေႃႉမွင်းထႃႈပႂ်ႉဝႆႉယူႇၵေႃႈ..လွႆးလွႆးၶႃႈ”
“ၵေႃႉမွင်းၵေႃႈႁိုဝ်မီး ၵေႃႉပႂ်ႉထႃႈၵေႃႈပႆႇထူပ်းလႃႈ ဝႃႈလႃးၵေႃႈပိူၼ်ႈသင်ႇဝႃႈလွႆးလွႆး ၵူဝ်ၵေႃႉတွႆးပိူၼ်ႈလမ်းၶိုတ်းမႃးႁၼ်ၶႃႈႁိုဝ်ၼေႃ”
“ပေႃးထၢၼ်ႈဝႃႈမီးၵေႃႉတွႆး ႁူႉတေႁၼ်ပႆလွႆးလွႆးၸွမ်းၵၼ်ယူႇၶႃႈလေႃႇ ယွၼ်ႉၼွင်ႉယိင်းဢမ်ႇပႆႇမီးၵေႃႉသွတ်ႇႁူမ်ႈတၢင်းပႆ ၵေႃႉသွင်ႁူမ်ႈပွင်းမိူဝ်းလႄႈ ၸင်ႇလႆႈမႃးၵေႃႉလဵဝ်ၵူၺ်းဢေႃႈ”
“ၵူၼ်းႁၢင်ႈလီမေႃဢုပ်ႇလၢတ်ႈၶဝ် မီးၸိုဝ်ႈႁွင်ႉသင်လႃႇ တႃႉၶႂ်ႈႁူႉလႃႈ”
“ၸိုဝ်ႈယိင်းတႄႉႁဵဝ်းငိုၼ်းၵူၺ်းဢေႃႈ..”
“ၸိုင်ဝႃႈ..ႁိမ်းၼႆႉပေႉမႃးႁွမ် ဢၵျွင်းဝႃႈမီးမွၵ်ႇႁဵဝ်းငိုၼ်းလူး တႃႉၶႂ်ႈပဵၼ်မႅင်းၽိုင်ႈၸွမ်းတွမ်မွၵ်ႇႁဵဝ်းငိုၼ်းၵူၺ်းယဝ်ႉဝႃႈ”
ႁဵဝ်းငိုၼ်းၵေႃႈၼႃႈဝိၼ်ႇဝၢႆႇၶၢႆႉပၢႆႈသၢႆတႃယဝ်ႉ ယုမ်ႉဢွၵ်ႇမႃးၼင်ႇဢၢႆဢၢႆသေ သိုပ်ႇထၢမ်ၵႂႃႇၶိုၼ်းတီႈၸၢႆးယွတ်ႈ။
“ပီႈၶဝ်ၶႃႈလူးမီးၸိုဝ်ႈသင်ၶႃႈ..”
“ပီႈၶဝ်တႄႉၸိုဝ်ႈႁွင်ႉၸၢႆးယွတ်ႈဝႃႇ”
“ယွတ်ႈဢၼ်ယူႇၸွမ်းပၢႆမႆႉပၢႆၽူၺ်း မဵဝ်းႁဵဝ်းငိုၼ်းၶဝ် လႆႈႁႅၼ်မုင်ႈတူၺ်းဢဝ်ၼၼ်ႉၶႃႈၼေႃႈ”
“ႁဵဝ်းငိုၼ်းၶဝ်ပေႉၵႅၼ်ႇႁႅၼ်မုင်ႈတူၺ်းသုင် ယွတ်ႈၽၵ်းလိူၼ်းတိူၼ်းယူႇႁိမ်းတူၼ်ႈလဝ်းၵူမ် ႁိမ်းၵၢၼ်ႈလမ်းၼုမ်ႇတူၼ်ႈႁဵဝ်းငိုၼ်းႁွမ်ၼၼ်ႉၵေႃႈ ပဵၼ်ယွတ်ႈယူႇဢိူဝ်ႈ”
ၵူၼ်းမၢဝ်ႇၵူၼ်းသၢဝ်ၶဝ်ဢုပ်ႇၵၼ် ၵၢင်ဝၼ်းတူၵ်းထၢၼ်ႈပေႃးလပ်ႉလွႆၵႂႃႇၵေႃႈ တေႃႈႁိုဝ်ပႃႈၶႂ်ႈၽၢတ်ႇၽၢၵ်ႈယၢၼ်ၵၼ်မိူဝ်းလႆႈ၊ ဢၢင်ႈဢၢၼ်းၸွမ်းသူင်ႇထိုင်ႁိူၼ်းသမ်ႉ ၵူဝ်မၼ်းၸဵဝ်းထိုင် ၸင်ႇဢမ်ႇၼိုင်တူင်ႉၵႂႃႇတၢင်းလႂ်သေပွၵ်ႈ ၼၼ်ႉယဝ်ႉ။
ၵူၼ်းတီႈႁိူၼ်းႁဵဝ်းငိုၼ်းၶဝ် ဢၼ်ပဵၼ်ပီႈၼၢင်းမၼ်း ၼၢင်းၼူၼ်းၼၼ်ႉ မႆႈၸႂ်ၵူဝ်မၼ်းတေၵႂႃႇပဵၼ်သင်ၼႆသေ မႃးၸွမ်းၶႆႈယူႇ၊ ႁဵဝ်းငိုၼ်းဢၼ်လႆႈႁၼ်ပီႈၼၢင်းမႃးၸွမ်းၶႆႈၼႆၵေႃႈ ႁိုဝ်ၸၢင်ႈသိုပ်ႇၵႂၢမ်းထႅင်ႈယဝ်ႉ ယွၼ်းပွၵ်ႈမိူဝ်းၵႂႃႇ ဢွၼ်တၢင်းၼၢင်းၼူၼ်းတေမႃးထိုင်တီႈၶႃယူႇ ၼၼ်ႉယဝ်ႉ။
“တၢၼ်ႇႁွတ်ႈႁိူၼ်းလႄႈဢမ်ႇႁွတ်ႈၼႆႉ ၵၢၼ်ႉမႆႈၸႂ်ႁေမႃးၸွမ်းၶႆႈ တေႉၵေႃႈမႃးၶိၼ်းမၢဝ်ႇဢုပ်ႇၵူၺ်းလူင်”
“ၶႃႈဢမ်ႇလႆႈၶိၼ်း..မႃးႁူပ်ႉၺႃးလႄႈဢုပ်ႇၵၼ်ၵႂႃႇၵူၺ်း”
“ပဵၼ်ၽႂ်လႃႇ! ၵဝ်ႁူႉၸၵ်းယူႇႁႃႉ.. ၵူၼ်းဝၢၼ်ႈလႂ်ထွမ်ႇဝႃႈ”
“ၼၢင်းႁဝ်းဢမ်ႇႁူႉၸၵ်းလေႃႇ..” ဝႆႉၼႃႈဢၢႆဢၢႆသေ ယုမ်ႉယူႇၸုတ်းၵုတ်းႁင်းမၼ်း။
“ပေႃးမႂ်းဢမ်ႇလၢတ်ႈၵဝ်ႁမ်ႉတေႁဵတ်းႁိုဝ်ႁူႉၸၵ်းလႃႇ..”
သွင်ၵေႃႉပီႈၼွင်ႉၵေႃႈ ဢွၼ်ၵၼ်မိူဝ်းႁွတ်ႈထိုင်ႁိူၼ်းသေ ၼၢင်းၼူၼ်းၼၼ်ႉၵေႃႈ ၼႅတ်ႈလၢတ်ႈမႄႈၶဝ်ၵႂႃႇ
“မႄႈဢႃႈ…ဢေးၼွင်ႉတေလႆႈၽူဝ်ယဝ်ႉဝႃႈ!!”
“ဢိူဝ်ႈလီယဝ်ႉၼႃႇမႂ်းၵေႃႈ.. ၽႂ်တေမႃးဢဝ်မၼ်းလႃႇဝႃႈ!!”
“ဢမ်ႇၸႂ်ႈၶႃႈမႄႈ! ၼၢင်းႁဝ်းမၼ်းလၢတ်ႈၵႂႃႇႁဵတ်းၼၼ်ၵူၺ်းဢေႃႈၼၼ်ႉ ဢမ်ႇႁူႉႁူဝ်ႁူႉႁၢင်ႁေလႃႈလီလၢတ်ႈလူင်ၵႂႃႇ”
“ဢၼ်ၵဝ်ႁၼ်မိူဝ်ႈၵႆႈၼၼ်ႉ ႁမ်ႉဢမ်ႇၸႂ်ႈလွင်ႈတေႉၵႃႈ…”
“ႁွင်ႉမႃးလႄႇၽွင်ႈလႄႈ.. မႄႈႁဝ်းၵေႃႈ ၶႂ်ႈႁူႉၸၵ်းယူႇၵူၺ်းဢိူဝ်ႈ မိူဝ်ႈလႂ်လုၵ်ႈယိင်းၵဝ် မီးၵူၼ်းမႃးၵဝ်းမႃးဢုပ်ႇယူႇၼႆ”
“ၼၼ်ႉယဝ်ႉဝႃႈမႄႈ.. ၶႃႈၵေႃႈတႃႉၶႂ်ႈႁၼ်ယူႇ တေပဵၼ်ၵူၼ်းၸိူင်ႉႁိုဝ် ထိုင်တီႈဢဝ်မၼ်းၵိုတ်းဢုပ်ႇ ပေႃးလိုမ်းႁိူၼ်းလိုမ်းယေးၸိူင်ႉၼႆ၊ ယူဝ်ဝႃႈတေဢမ်ႇမီးၽႂ်ဢုပ်ႇမၼ်းလႆႈယဝ်ႉၵွၼ်ႇၼႆႉ၊ ၶႃႈၵေႃႈမႆႈၸႂ်ယူႇ ၵူဝ်မၼ်းတေဢမ်ႇလႆႈၽူဝ်ၼႆ ႁၼ်..ပေႃးပိူၼ်ႈလမ်းဢုပ်ႇ ၵုမ်ႇလႅၼ်ႈပၢႆႈၵူၺ်းၸိူင်ႉၼၼ်”
“ပေႃးဢမ်ႇလိူၵ်ႈ ၵျိူၵ်ႈၼႃႇႁေဢဝ်ၺႃး ၵူၼ်းမိူၼ်ၽူဝ်မႂ်းၵေႃႈႁမ်ႉဢမ်ႇလီၼင်ႇၵဝ်ႇ၊ ဢဝ်ႁေၵႂႃႇယူႇတၢင်းလႂ်တၢင်းလီပႅတ်ႈၵေႃႈဢမ်ႇႁူႉ တၢင်းႁိူၼ်းတၢင်းယေးၵေႃႈ ဢမ်ႇမေႃၵပ်းသိုပ်ႇမႃးၸိူင်ႉၼႆ တေဝႃႈႁၢင်ႉၵေႃႈပိူၼ်ႈသမ်ႉဢမ်ႇပႅတ်ႈ တေဝႃႈဢမ်ႇပႅတ်ႈသမ်ႉလႅပ်ႈႁၢင်ႉယူႇ”
“မႄႈႁဝ်းၼႆႉၵေႃႈ ပေႃးလႆႈဝႃႈႁင်ၵေႃႈလၢတ်ႈပေႃးတိူၵ်ႈတေႉလူင်၊ ၸိူဝ်ႉၽႂ်ၵေႃႈလႆႈမၼ်း မၢၵ်ႇၶိူဝ်ၶၼ်းလႆႈတူၼ်ႈ ဢၼ်ဝႃႈယူဝ်ႉမႄႈဝႃႈ မႄႈႁဝ်းသမ်ႉပဵၼ်မႄႈမၢႆႈ၊ လုၵ်ႈယိင်းၵေႃႉယႂ်ႇသမ်ႉမႄႈႁၢင်ႉပိူၼ်ႈဢမ်ႇပႅတ်ႈ၊ လုၵ်ႈယိင်းၵေႃႉလဵၵ်ႉသမ်ႉမႃးပဵၼ်သၢဝ်ၵေႇထႅင်ႈ…”
“မႂ်းပေႉၵုမ်ႇပွင်ႉႁဵတ်းႁင်တိၵ်းတိၵ်းလႃႇ ဢေးၼူၼ်း.. ဢေးႁဵဝ်းပေႃးတၼ်းၵႂႃႇႁႅၼ်းၽိူၼ်ၶဝ်ႈႁဝ်းယဝ်ႉယဝ်ႉၼၼ်ႉ ၵႂႃႇႁွင်ႉဢၢႆႈလၢၼ်မႃးၵိၼ်ၶဝ်ႈလႄႈ”
“ဢၢႆႈလုၵ်ႈၼႆႉႁမ်ႉၵႂႃႇတၢင်းလႂ်ထႅင်ႈယဝ်ႉလႃႇ..” ၼၢင်းၼူၼ်းလၢတ်ႈ။
ၸၢႆးယွတ်ႈၵေႃႈ မိူဝ်းႁွတ်ႈထိုင်တီႈၼႂ်းၵျွင်းသေ တၵ်ႉယမ်ဝႆႈသႃ သိုပ်ႇမိုတ်ႈတင်းၸဝ်ႈမုၼ်တီႈၵျွင်းသေယဝ်ႉ လႆႈႁူႉၸၵ်းမိုတ်ႈၵိုဝ်းၵၼ်မႃးသေ ဢုပ်ႇၵၼ်ထုၵ်ႇၸႂ်ထုၵ်ႇၶေႃး သမ်ႉပေႃးတၼ်းထိုင်တဵင်ႈၶိုၼ်းယူႇ။
တွၼ်ႈသၢမ်သုတ်းၵႂႃႇယဝ်ႉ သိုပ်ႇလူၵႂႃႇထႅင်ႈတွၼ်ႈသီႇၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆး ဝူၼ်ႉသၢင်ႈမႃးဢဝ်ၵူၺ်း ဢမ်ႇၸႂ်ႈလွင်ႈပဵၼ်တေႉ။
