မီးၵူၼ်းယၢမ်ႈလၢတ်ႈတီႈၶႃႈဝႃႈ “မီးႁိူၼ်းၼၼ်ႉမၼ်းဢုၼ်ႇၸႂ်ဢိူဝ်ႈ မိူဝ်းႁိူၼ်းဢိတ်ႉၼိုင်ႈလႄႈ မိူဝ်ႈယင်းတိုၵ်ႉမီးပေႃႈမီးမႄႈယူႇၼၼ်ႉ”
ၶႃႈပဵၼ်ၵူၼ်းၵေႃႉၼိုင်ႈ ဢမ်ႇၵျိူၵ်ႈယူႇႁိူၼ်းလႄႈ ဢူႈမႄႈၵေႃႈဢမ်ႇပေႃးသူႈယူႇႁိူၼ်းသေ ယူႇၸွမ်းၵၢၼ်ၵူၺ်း၊ မၢင်ပွၵ်ႈမိူဝ်းတီႈဝၢၼ်ႈ ဢမ်ႇထိုင်ႁိူၼ်းၵေႃႈမီးယဝ်ႉ။
ၵူၺ်းၵႃႈ မိူဝ်ႈႁိူဝ်ႉမႃးၼၼ်ႉ လႆႈမႃးၼွၼ်းလိုဝ်ႈယူႇတီႈႁိူၼ်းႁဝ်းၼႆၵေႃႈ ၼင်ႇႁၢင်ႈပေႉမႃးလူမ်ၸႂ်ႁိုဝ်ဢမ်ႇႁူႉ၊ မိူဝ်ႈတုၵ်ႉၸႂ်ၼၼ်ႉ လႆႈငိၼ်းသဵင်သုၵ်ႉသၵ်ႉၵူၼ်းတီႈႁိူၼ်းၼၼ်ႉၵူၺ်းၵေႃႈ ပေႃးလိုမ်းမၼ်းၵႂႃႇယဝ်ႉ။
လင်ႁိူၼ်းဢမ်ႇလႆႈၶႅမ်ႉ ဢမ်ႇၸႂ်ႈႁိူၼ်းဢၼ်ႁၢင်ႈလီသေတႃႉၵေႃႈ ၼႂ်းၼႃႈႁိူၼ်းဢွၼ်ႇႁဝ်းၼၼ်ႉ မၼ်းမီးဢႆၢဢုၼ်ႇဝႆႉယူႇဢိူဝ်ႈ၊ ဢႆၢၵႂၼ်းၾႆးယၢမ်းၵၢင်ၼႂ်၊ သဵင်ပွင်ႉၶၢင်းယၢမ်းၶၢၼ်ႉလုၵ်ႉ၊ သဵင်ဢုပ်ႇၵၼ်ယၢမ်းၵိၼ်ၶဝ်ႈ၊ သဵင်တူၼ်ႈမႆႉႁိမ်းႁိူၼ်းၼိုင်ၶွၼ်းမႃးၵေႃႈ ၼင်ႇႁၢင်ႈယႃၸႂ်မႃးပဵၼ်ၵမ်းယူႇ။
မိူဝ်ႈဢွၼ်တၢင်းၼၼ်ႉ ယၢမ်ႈဢိမ်ႇၸၢၼ်ႈမၼ်းမႃးယဝ်ႉ ႁိူၼ်းၼႆႉယူႇမႃးပဵၼ်လႆၢပီယဝ်ႉ ၶႂ်ႈဢွၵ်ႇယၢၼ်ၶႆၢႉတီႈမၼ်းသေ ႁႃဢွင်ႈတီႈမႂ်ႇ တီႈဢၼ်လႆႈယူႇသႃႇလူမ်ၸႂ်၊ တီႈဢၼ်ၶိုၼ်ႈယႂ်ႇၶိုတ်းၵၢပ်ႈ၊ တီႈဢၼ်ဢမ်ႇလႆႈငိၼ်းသဵင်ပွင်ႉၼေးၵူႈဝၼ်းၼႂ်၊ တီႈဢၼ်ၵႆယၢၼ်ဢူႈလေႃးမႄႈ ၼႂ်းၵႄႈၵူၼ်းလႆၢၼႃႈလႆၢတႃ၊ တီႈဢၼ်ႁႃပၼ်လႆႈလွင်ႈလူမ်ၸႂ်ၼၼ်ႉ ၵမ်းလိုၼ်းၵေႃႈ လႆႈၶိုၼ်းၶွပ်ႈဢွင်ႈၵဝ်ႇ ဢၼ်ဝႃႈႁိူၼ်းႁဝ်းၼႆၼၼ်ႉၶိုၼ်းၵူၺ်း။
ယၢမ်းၵၢင်ၼႂ် တိုၼ်ႇမႃးလႆႈငိၼ်းသဵင်ၵူၺ်းၵေႃႈဢုၼ်ႇၸႂ်ၼႃႇယဝ်ႉ၊ သမ်ႉဝႃႈပဵၼ်သဵင်ပွင်ႉၵေႃႈယႃႇ။
ၸဝ်ႉတေႃႇၶမ်ႈ ဢမ်ႇလိုဝ်ႈဢမ်ႇသဝ်း ၸဵမ်ပၢၼ်ႁဝ်းလဵၵ်ႉလႅင်တေႃႇယႂ်ႇၵေႃႈ လေႃးၽႁဵတ်းၵၢၼ်ၶဝ်ၼၼ်ႉတႄႉယႂ်ႇၼႃႇ၊ တႃႇဝႃႈၶၢၼ်ႉၼႆတႄႉ ဝႃႈႁင်းႁဝ်းၵူၺ်း။
ယူႇၸွမ်းၶဝ်ယဝ်ႉ လိုမ်းတၢင်းၶိုၼ်ႈယႂ်ႇၶိုတ်းၵၢပ်ႈယဝ်ႉဝႃႈ၊ မၼ်းၵတ်းယဵၼ်ၸႂ် ဢမ်ႇသုၵ်ႉယုင်ႈတင်းၽႂ်၊ သမ်ႉယူႇတီႈဢမ်ႇမီးလႅင်းၾူၼ်းထႅင်ႈႁေ ယဵၼ်ႁူယဵၼ်ၸႂ် မိူၼ်လႆႈႁူၼ်ၶၢဝ်းယၢမ်းၵႂႃႇၶိုၼ်းပၢၼ်ၵွၼ်ႇၼၼ်ႉယဝ်ႉ။
သင်ပဵၼ်လႆႈၶႂ်ႈၵိုတ်းလိုဝ်ႈၶၢဝ်းယၢမ်းဝႆႉသေ ယူႇၵႂႃႇႁဵတ်းၼႆၵူၺ်းယဝ်ႉ။
သမ်ႉဝႃႈဢွင်ႈတီႈဢၼ်ႁဝ်းယူႇၼၼ်ႉ ၶႅမ်ႉတၢၼ်ႇႁိုဝ်ၵေႃႈ ဢမ်ႇၸႂ်ႈႁိူၼ်းႁဝ်းလူး၊ ပၢၼ်ပဵၼ်ၶႅၵ်ႇၼၼ်ႉၸူဝ်ႈၵႅပ်ႉၵမ်းၵေႃႈ လႆႈၶႆၢႉၵႂႃႇယဝ်ႉ။
ဢသၢၵ်ႈႁဝ်းယႂ်ႇမႃးၵေႃႈ ၶၢဝ်းယၢမ်းၶဝ်ၼၼ်ႉတႄႉယွမ်းလူင်းတိၵ်းတိၵ်းယဝ်ႉ၊ သမ်ႉဝႃႈဢမ်ႇမီးငိုၼ်းပၼ်ၶဝ်ၵေႃႈ မိူဝ်ႈၶဝ်လႆႈႁၼ်ႁဝ်းမီးယူႇၸမ်ၶဝ်ၼၼ်ႉ ၶဝ်ၵေႃႈၸူမ်းၼႃႇယဝ်ႉ။
မၼ်းဢမ်ႇမီးတီႈလႂ်လီသုတ်း မၼ်းဢမ်ႇမီးတီႈဢၼ်တဵမ်ထူၼ်ႈၵူႈလွင်ႈ သမ်ႉဝႃႈဢွင်ႈတီႈၼၼ်ႈ မၼ်းၶိုၵ်ႉၶႅမ်ႉၼႃႇယဝ်ႉၵေႃႈယႃႇ၊ ယူႇတီႈႁဝ်းမေႃပဵင်းပေႃးႁၢၼ်ႉၸႂ်သေ ယူႇၵႂႃႇၵူၺ်း။
ႁိူၼ်းဢၼ်ဝႃႈၼၼ်ႉ ပၼ်လွင်ႈၵတ်းယဵၼ်ၸႂ်လႆႈလႄႈ ၵူၼ်းၼႂ်းၼႃႈႁိူၼ်းဢၼ်ဝႃႈၼၼ်ႉၵေႃႈ ပဵၼ်တီႈဢုၼ်ႇၸႂ်လႆႈယဝ်ႉ။
ယိၼ်းၸူမ်းၽူႈလူလိၵ်ႈႁဝ်းၶဝ်ယူႇဢေႃႈ
ဢေးၸၢမ်
5/1/2026
