သဵင်ၾႆးလုၵ်ႉၵႂၢၼ်းႁုၼ်ႈႁုၼ်ႈယူႇတီႈၼႂ်းဝၢၼ်ႈ သဵင်ၵွင်ႈဢူၼ်မေႃးပၼ်းၼၼ်ႈပေႃးတၢၼ်ႇသဵင်ၽူၼ် သဵင်ႁွင်ႉႁႆႈယူႇၼၼ်ႉႁိုဝ်တေပႄႉလႆႈသဵင်ၵွင်ႈလႃႇ ၼမ်ႉတႃဢၼ်ဢွၼ်ႈဝွၼ်းႁႂ်ႈဢီးလူယူႇၼၼ်ႉၵေႃႈ ဢမ်ႇမီးၽႂ်တူၺ်းႁၼ် လိူတ်ႈလႅင်ၼွင်းဢိူၵ်ႇဝၢၼ်ႈပေႃးတၢၼ်ႇၼမ်ႉၽူၼ် ပဵဝ်ၾႆးလုပ်ႇလုၵ်ႉမႆႈလၢမ်းႁုပ်ႇၽဝ်ဝၢၼ်ႈပေႃးႁၢမ်း ယၢမ်းၼင်ႇၼၼ် တီႈၼႂ်းထိူၼ်ႇလူင်ၼၼ်ႉ သဵင်ၵွင်ႈလင်မေႃးမႃး တိူဝ်ႉမႅၼ်ႈၺႃးသႂ်ႇၵူၼ်းထဝ်ႈၶၢဝ်ႉၵေႃႉၼိုင်ႈလူမ်ႉမူပ်ႇထူလူင်ၵႂႃႇ သဵင်လင်မႃးထႅင်ႈၵမ်းၼိုင်ႈ ၵေႃႉပဵၼ်မႄႈပႃႈဢၼ်လႅၼ်ႈမႃးၸွမ်းလင်ၼၼ်ႉၵေႃႈ လႆႈလူမ်ႉဢိူၵ်ႇၵူဝ်ႈၼုၵ်းယၢင်ၵႂႃႇမူတ်း ပႃးတင်းလုၵ်ႈဢွၼ်ႇ…
လႅင်းမိူင်းဢၼ်တိုၵ်ႉၼွၼ်းၾၼ်ယူႇၼၼ်ႉပေႃးၽႅတ်းတိုၼ်ႇမႃးၵမ်းလဵဝ်ယဝ်ႉ။
“ႁူဝ်ၼႃႈ!!…ၸဝ်ႈသိုၵ်းမီးၵၢၼ်ၶႂ်ႈလၢတ်ႈတေႃႇ”
လႅင်းမိူင်းၵေႃႈၼႅတ်ႈလုၵ်ႉၵႂႃႇၵမ်းလဵဝ်ယူႇ ၵွပ်ႈပဵၼ်သိုၵ်းလူး သမ်ႉဝႃႈၶၢဝ်းၼွၼ်းယဵၼ်ယူႇၵေႃႈ ႁူႉၵႃႈတေလႆႈတူင်ႉတိုၼ်ႇလႄႈလုၵ်ႉႁဵတ်းၼၼ်ႉယဝ်ႉ။ ဝၢႆးသေထူပ်းၵၼ်တၢင်းၸဝ်ႈသိုၵ်းမႃးယဝ်ႉ လႆႈႁပ်ႉၵၢၼ်မႃးသေ ၸတ်းႁႅင်းၵူၼ်းယဝ်ႉဢွၼ်ၵႂႃႇယူႇ။
ယၢမ်းၶမ်ႈၶိုၼ်းလိုၵ်းယဵၼ် တီႈၼိူဝ်သဵၼ်ႈတၢင်းႁိမ်းလႅၼ်လိၼ်ၶၢမ်ႈမိူင်းၼၼ်ႉ မီးၵႃးတင်းၼမ်လတ်းၶၢမ်ႈၵႂႃႇ ပဵၼ်ၵႃးလူင်သိပ်းသွင်လေႃႉလၢႆလၢႆ ယူႇယူႇၵေႃႈၵႃးၸိူဝ်းၼၼ်ႉၵိုင်ႉၵၢင်ႉၵိုတ်းသေ လႆႈငိၼ်းသဵင်တိၼ်လႅၼ်ႈလူင်မႃးၵူႈၸွၵ်ႉၵူႈၸဵင်ႇ လွမ်ႉႁွပ်ႈၵႃးၸိူဝ်းၼၼ်ႉဝႆႉမူတ်းယဝ်ႉ။ ၵူၼ်းႁေႃႈၵႃးၵေႃႈဢမ်ႇၸၢင်ႈတူင်ႉတူဝ်လႆႈသေဢိတ်း ဝၢႆႇၵႂႃႇတၢင်းလႂ်မိူၼ်ဝႃႈပၢႆၵွင်ႈၼႆႉပေႉမႃးယူႇၸမ်ၼႃႈၽၢၵ်ႇၼႃႇ တေယၢင်ႈလူင်းၵႃးၼႆၵေႃႈၶႃပေႃးၶႅင်ယဝ်ႉ။
တီႈၼႂ်းၵႃးဢၼ်တၢင်ႇမႃးၸိူဝ်းၼၼ်ႉ လႆႈႁၼ်ယႃႈမဝ်းၵမ်တင်းၼမ်လႄႈ ၽူႈယိင်းတင်းၼမ် လႆႈၶၢမ်ႇတိၺွပ်းမတ်ႉတိၼ်မတ်ႉမိုဝ်းဝႆႉ ပေႃးဢမ်ႇၸၢင်ႈတူင်ႉတူဝ်လႆႈ။ မိူဝ်ႈလႆႈႁၼ်ၵူၼ်းမႃးၸွႆႈၶဝ်ၼၼ်ႉ တင်းၼမ်ႉတႃလႄႈသဵင်ႁွင်ႉႁႆႈ၊ တၢင်းၸူမ်းသိူဝ်းလႄႈၵႂၢမ်းယိၼ်းၸူမ်းၶဝ် ပေႃးဢူၼ်ၵႂႃႇမူတ်းၼၼ်ႉယဝ်ႉ။ ၸွမ်းၼင်ႇပုၼ်ႈၽွၼ်းမီးၼၼ်ႉသေ ၸုမ်းၶိုၵ်ႉတွၼ်းၶဝ်ၵေႃႈ လႆႈႁဵတ်းၸွမ်းပိူင်ၽႅၼ်ၵႂႃႇ ပဵၼ်ၶၵ်ႉပဵၼ်တွၼ်ႈယဝ်ႉ ဢဝ်ၶူဝ်းၶွင်ဢိၵ်ႇတင်းၵူၼ်း ဢၢပ်ႈပၼ်ၽူႈမီးပုၼ်ႈၽွၼ်းၶဝ်ၸတ်းၵၢၼ် ႁႂ်ႈသိုပ်ႇႁဵတ်းသၢင်ႈၵႂႃႇ ၼႃႈၵၢၼ်ၶဝ်ၵေႃႈလႆႈယဝ်ႉတူဝ်ႈၵႂႃႇယဝ်ႉ။
ပၢင်တိုၵ်းၵၢၼ်ၵႃႉၶၢႆလွင်ႈၽိတ်းမၢႆမီႈပွၵ်ႈၼႆႉ ၸုမ်း “ၼူၵ်ႉဢႅၼ်ႇၾႃႉ” ပဵၼ်တူဝ်ယၢင်ႇလီၼႂ်းသိုၵ်းတႄႉတႄႉ။ ပွၵ်ႈၼႆႉ ပဵၼ်ပၢင်တိုၵ်းဢၼ်ၸႂ်ႉၵွင်ႈယူႇ ၵူၺ်းၵႃႈဢမ်ႇလႆႈငိၼ်းသဵင်မၢၵ်ႇၼႆၼၼ်ႉ ၵူၼ်းလူင်ၶဝ်ပဵၼ်ဢၼ်ႁၢၼ်ႉၸႂ်လၢႆးႁဵတ်းသၢင်ႈၼႆႉတႄႉလႄႈ ထိုင်တီႈသမ်ႉပေႃးလႆႈပၼ်သူးၶဝ်ၵႂႃႇယဝ်ႉ။
မိူဝ်ႈလႅင်းမိူင်းတိုၵ်ႉလိုဝ်ႈႁိူဝ်ႉၼွၼ်းလပ်းမွႆႈယူႇၼၼ်ႉ ၸၢႆးဢွင်ႇၵေႃႉပဵၼ်ၽူႈမၢႆမၼ်းၼၼ်ႉၵေႃႈ ႁိပ်ႈၼႅတ်ႈလူင်မႃး…
“ႁူဝ်ၼႃႈ!!…ၸဝ်ႈသိုၵ်းလၢတ်ႈမႃးႁႂ်ႈၵႂႃႇထူပ်း…ၶမ်ႈၼႆႉ…ႁႃႈမူင်းႁႂ်ႈထိုင်ဝႃႇ”
ၼၼ်ႉမၼ်းပဵၼ်ၵႂၢမ်းသင်ႇလူး သမ်ႉဝႃႈၶၢဝ်းယၢမ်းလိူဝ်ၼမ်ယူႇသေတ တႃႇတေၵႂႃႇႁွတ်ႈၼၼ်ႉ လႆႈၸႂ်ႉၶၢဝ်းယၢမ်းပဵၼ်ႁႃႈၸူဝ်ႈမူင်း။ ဝူၼ်ႉဝႃႈၶၢဝ်းယၢမ်းလႅပ်ႈတေဢမ်ႇပေႃးယဝ်ႉ လႅင်းမိူင်းၵေႃႈ မႄးလၢႆႈၶူဝ်းႁၢင်ႈၶိူင်ႈႁၢင်ႈၽၢင်သေ ၸူဝ်းဢဝ်မေႃယႃၸၢႆးၶိူဝ်းႁေႃႈလူတ်ႉဢွၵ်ႇပၢင်သဝ်းၵႂႃႇယူႇယဝ်ႉ။
တီႈၼႂ်းလုမ်းသိုၵ်းဢၼ်မီးႁူမ်ႇလူမ်ႈၼႅၼ်ႈၼႃ လႅင်းမိူင်းတၢင်းၸၢႆးၶိူဝ်းၵေႃႈႁေႃႈၵႃးၶႃၶဝ်ႈၵႂႃႇယူႇ။ သွင်ၶႃလႆႈၶဝ်ႈၵႂႃႇၼႂ်းႁွင်ႈၽူႈၸတ်းၵၢၼ် ၶဝ်ႈၵႂႃႇၼပ်ႉယမ်ၸဝ်ႈသိုၵ်းသေ ၸဝ်ႈသိုၵ်းၵေႃႈႁပ်ႉဢဝ်လွင်ႈၼပ်ႉယမ်ယဝ်ႉ လႆႈၼင်ႈဢုပ်ႇၵၼ်တင်းႁိုင်ယူႇ။ ဢၼ်ႁွင်ႉထူပ်းပွၵ်ႈၼႆႉၼၼ်ႉ ဢမ်ႇၸႂ်ႈဝႃႈမႃးၼင်ႈသေဢုပ်ႇၵၼ်ၵူၺ်းၼင်ႇၵဝ်ႇ ဢုပ်ႇၵႂႃႇဢုပ်ႇမႃး ၶဝ်ႈလွင်ႈၵႂႃႇႁင်းၵူၺ်း။
“ဢၼ်ႁွင်ႉမႃးၼႆႉၵေႃႈ…ၵူၼ်းလူင်ၽၢႆႇၼိူဝ်ၶဝ်…လႆႈယုၵ်ႉယွင်ႈတႄႉတႄႉလႄႈ…ႁႂ်ႈလႆႈပၼ်သူးတွၼ်ႈ…ၸုမ်းၼူၵ်ႉဢႅၼ်ႇၾႃႉသူၼႆသေ…ဢမ်ႇႁူႉဝႃႈတေလႆႈတွၼ်ႈသင်…တေပၼ်ႁႂ်ႈလိုဝ်ႈႁိုဝ်ႉ…မိူဝ်းလႄႇႁိူၼ်း…မိူဝ်းၸႂ်းႁိူၼ်းလႆႈတႃႇ10ဝၼ်း”
လႅင်းမိူင်းၵေႃႈယုမ်ႉဢိတ်းၼိုင်ႈယဝ်ႉသေ “သမ်ႉဝႃႈၶၢဝ်းယၢမ်းပွတ်းပွတ်းၵူၺ်းၵေႃႈ…ယိၼ်းၸူမ်းလႆႈႁပ်ႉၶူဝ်းတွၼ်ႈယူႇၶႃႈ”
ၸဝ်ႈသိုၵ်းၵေႃႈႁူႉယူႇဝႃႈ လႅင်းမိူင်းဝႃႈၶိတ်ႈ ပေႃးဢမ်ႇၸႂ်ႈလႅင်းမိူင်းၵေႃႈဢမ်ႇမီးၽႂ်ႁတ်းလၢတ်ႈၼင်ႇၵဝ်ႇ။ ၸဝ်ႈသိုၵ်းယုမ်ႉယဝ်ႉ ဢမ်ႇမီးသင်လၢတ်ႈယဝ်ႉလႄႈ
“ဢၼ်ၶႂ်ႈလၢတ်ႈၵေႃႈ မီးၵႃႈၼႆႉၵူၺ်း”
ၼႆသေ ႁႂ်ႈလႅင်းမိူင်းၵိုတ်းဝႆႉယဝ်ႉ ၸၢႆးၶိူဝ်းၵေႃႈဢွၵ်ႇႁွင်ႈမႃးပႂ်ႉထႃႈ။
“ပေႃႈႁဝ်းမီးလွင်သင်ထႅင်ႈၶႃႈ”
“ဢမ်ႇလႆႈမီးသင်တႄႉတႄႉၼင်ႇၵဝ်ႇ…သူမႄႈလုၵ်ႈၵေႃႈဢမ်ႇလႆႈထူပ်းၵၼ်ႁိုင်ယဝ်ႉ…လႆႈလိုဝ်ႈၵေႃႈမိူဝ်းၸႂ်းၽွင်ႈလႄႈ ”
“ဢေႃႈ…”
ပေႃႈၶဝ်ၵေႃႈတဝ်ႉႁူဝ်မႃႇၼင်ႇမႆႈၸႂ်ယဝ်ႉ
“ဢႃႇယုၵေႃႈယႂ်ႇယဝ်ႉ…ထုၵ်ႇလီမီးၵေႃႉထုၵ်ႇၸႂ်…ၵေႃႉတေႁူမ်ႈၶၢင်းပႆ…ၸွမ်းၵႂႃႇတႃႇႁူမ်ႈၸၢတ်ႈပၢၼ်လႆႈယဝ်ႉၼႃႈ”
“ပႂ်ႉထႅင်ႈသွင်သၢမ်ပီၵေႃႈ…ၵူၼ်းလဝ်းၸိူင်ႉၼင်ႇၶႃႈၼႆႉ…ယင်းတိုၵ်ႉမီးၵူၼ်းတေႃႇထႅဝ်ပႂ်ႉဝႆႉယူႇတင်းၼမ်လႃႈ…တေႃႈၼင်ႇၵူၼ်းပေႃးထဝ်ႈယဝ်ႉယင်းလႆႈမေးၼုမ်ႇယူႇ ”
ပေႃႈၶဝ်ႁိုဝ်တေၸၢင်ႈလၢတ်ႈသင်ၸွမ်းယဝ်ႉ “ၵေႃႈၸႂ်ႈယူႇ”
လႅင်းမိူင်းယုမ်ႉယဝ်ႉဢွၵ်ႇႁွင်ႈမႃးသေ ၸူဝ်းဢဝ်ၸၢႆးၶိူဝ်းပွၵ်ႈမိူဝ်းၵႂႃႇယဝ်ႉ။
မိူဝ်ႈလႂ်မိူဝ်ႈလိုဝ်ႈယူႇယဝ်ႉ ဢွၼ်ၵၼ်မႃးလႄႇႁွတ်ႈ ၼႂ်းဝဵင်းလူင်ဢၼ်ၵႂၢင်ႈယႂ်ႇ ဢဝ်သၢႆတႃတူၺ်းပေႃးဢမ်ႇတိူၵ်ႈလႆႈ လႅင်းမိူင်းတင်းၸၢႆးၶိူဝ်းၵေႃႈ ၶဝ်ႈၵႂႃႇတီႈၼႂ်းသႅင်ႇၶဝ်ႈၽၵ်းဢၼ်ၵႂၢင်ႈယႂ်ႇၼႃႇတီႈၼိုင်ႈၼၼ်ႉယဝ်ႉ။ မိူဝ်ႈတိုၵ်ႉယဵပ်ႇယၢင်ႈၶဝ်ႈၵႂႃႇၼႂ်းလၢၼ်ႉၼၼ်ႉ သၢႆတႃၵူၼ်းၼႂ်းလၢၼ်ႉ ဢွၼ်ၵၼ်မိုင်ယၵ်ႉတူၺ်းၸွမ်းၶႃ တႃပေႃးဢမ်ႇၶႂ်ႈၽႅပ်ႉလႆႈ။ ဢၼ်တူၺ်းၼႃႇလိူဝ်ပိူၼ်ႈၼၼ်ႉတႄႉ ပဵၼ်ၽူႈယိင်းၸိူဝ်းၼင်ႈပဵၼ်ၸုမ်းဝႆႉၼၼ်ႉယဝ်ႉ။
“လႅင်းမိူင်း ပိူၼ်ႈတူၺ်းႁႃးၵျႃႉဢေႉ”
“ႁႃးလဝ်းပေႃးတၢၼ်ႇၼႆႉ…ဢမ်ႇတူၺ်းၵေႃႈပိူင်ႈၼႃႇယဝ်ႉလေႃႇ…ပႂ်ႉတူၺ်းလႄႈ…ၼပ်ႉၼိုင်ႈထိုင်သၢမ်…ၵေႃႉဢမ်ႇၵေႃႉတိုၼ်းလုၵ်ႉမႃးႁႃဢဝ်ႈ”
လႅင်းမိူင်းၵေႃႈလိၵ်းတႃဢိတ်းၼိုင်ႈသေ ဝၢၼ်ႇမွၵ်ႇၼႃႈ ၵႂႃႇၸူးၽူႈယိင်းၸိူဝ်းၼၼ်ႉ ဢဝ်ၶဝ်ယုမ်ႉပေႃးဢမ်ႇၸၢင်ႈတုပ်ႇၶဵဝ်ႈလႆႈယဝ်ႉ။ မိူဝ်ႈၼင်ႈလူင်းၵႂႃႇ ၸၢႆးၶိူဝ်းတႄႇၼပ်ႉ
“ၼိုင်ႈ!…” ၼႆၵူၺ်း ၽူႈယိင်းဢၼ်ၶႂ်ႈႁၢမ်ႉႁၢင်ႈလီလိူဝ်ပိူၼ်ႈၼၼ်ႉၵေႃႈ လုၵ်ႉပႆမႃးတၢင်းၶႃယူႇၼၼ်ႉလႄႈ
“ႁၼ်ႁိုဝ်…မႃးယဝ်ႉၼႃႇ”
ယိင်းၵေႃႉၼၼ်ႉၵေႃႈ ပႆၶဝ်ႈမႃးၸမ်ၶႃတိၵ်းတိၵ်း မိူဝ်ႈမႃးႁွတ်ႈတီႈၶႃၼင်ႈၼၼ်ႉ သၢႆတႃမုင်ႈၵႂႃႇတူၺ်းတီႈၽၵ်းတူသေ ႁွင်ႉၵႂႃႇ…
“ၵေႃႉႁၵ်ႉ!!” ၼႆ မႅၼ်ႈမိူဝ်ႈၸၢႆးၶိူဝ်းတိုၵ်ႉၵိၼ်ၼမ်ႉယူႇလႄႈ သမ်ႉပေႃးၵႅၼ်ႉဢွၵ်ႇမႃးယဝ်ႉ။
ၽူႈယိင်းၵေႃႉၼၼ်ႉၵေႃႈ ပႆၵႂႃႇၵွင်ႉဢဝ်ၶႅၼ်ၽူႈၸၢႆး ဢၼ်တိုၵ်ႉၶဝ်ႈမႃးၼၼ်ႉပူၼ်ႉၵႂႃႇၶိုၼ်း။ ၸၢႆးၶိူဝ်းလႆႈႁၼ်လႅင်းမိူင်းၼႃႈႁႅင်ႈ ၸိူင်ႉၼၼ်ယဝ်ႉ လၵ်ႉၵၼ်ႈၶူဝ်ယူႇႁင်းမၼ်း။
“ၼပ်ႉၼိုင်ႈၵူၺ်း..ပိူၼ်ႈပေႃးလုၵ်ႉမႃးႁႃတေႉလူင်ဢေႉ”
“တႃႇၼႆႉၵေႃႉႁႃးၵေႃႉၸၢႆႇလႄႈၼႃႈ” သမ်ႉပေႃးဢဝ်ၸၢႆးၶိူဝ်းႁူတ်းလူင်ၵႂႃႇ။
“ငိုၼ်းလိူၼ်ႁႃးပႆႇဢွၵ်ႇ”
“ႁႃးၵေႃႈမိူၼ်ၵၼ်… ပၢႆႈဢွၵ်ႇလၢၼ်ႉၼႄႇႁႃး…”
“ဢမ်ႇမီးငိုၼ်းသမ်ႉၸူဝ်းၵၼ်ၶဝ်ႈလၢၼ်ႉလူင်လူင်ၸိူင်ႉၼႆလႄႇ ”
“ႁိုင်ႁိုင်ၼၢၼ်းၼၢၼ်းၼိုင်ႈပွၵ်ႈလႆႈမႃး…ႁႃးၵေႃႈၶႂ်ႈၵိၼ်တူၺ်းဢၼ်ၶိုၵ်ႉဢၼ်ၶႅမ်ႉမၼ်းဢိတ်းၼိုင်ႈၼႆၵႂႃႈ” ပိူၼ်ႈၵေႃႈမႃးတမ်းပၼ်ၶႃ ႁၢင်ႈလီႁၢင်ႈဝၢၼ်လၢႆလၢႆယဝ်ႉ။
“ႁၼ်ၸိူင်ႉၼႆယဝ်ႉတေပၢႆႈလႆႈယူႇႁ” ယုမ်ႉႁႅင်ႈႁႅင်ႈတေႃႇၵၼ်သေ ဢွၼ်ၵၼ်ၵိၼ်ယူႇယဝ်ႉ။
ဝၢႆးသေၵိၼ်ၶဝ်ႈယဝ်ႉ လႅင်းမိူင်းၵေႃႈၸၢႆႇၵႃႈမၼ်းသေ ဢွၼ်ၵၼ်ဢွၵ်ႇၵႂႃႇယူႇ ယၢမ်းၼၼ်ႉ ၸင်ႇမီးၽူႈယိင်းၵေႃႉၼိုင်ႈၼႂ်းၸုမ်းၼၼ်ႉလႅၼ်ႈမႃးၸူးၶႃသေယဝ်ႉ
“ၵမ်ႉၵွၼ်ႇၶႃႈ… ပီႈၸၢႆး”
သွင်ၶႃဝၢႆႇၸူးယဝ်ႉ ၸၢႆးၶိူဝ်းၵေႃႈ “မီးလွင်ႈသင်ဢမ်ႇႁူႉၶႃႈ…”
“တီႈပီႈတႄႉဢမ်ႇမီးၶႃႈ…ပီႈၵေႃႉၼႆႉၵူၺ်းဢေႃႈ…” တေႃႇၼႃႈၸူးလႅင်းမိူင်းၵႂႃႇသေ
“ပီႈၶႃႈ…ယိင်းၶႂ်ႈယွၼ်းမၢႆၵပ်းသိုပ်ႇပီႈၵူၺ်းဢေႃႈ.”
လႅင်းမိူင်းဝႆႉၼႃႈမိူၼ်ဢမ်ႇႁူႉဝႆႉသေ ယိင်းၵေႃႉၼၼ်ႉသမ်ႉပေႃးဢဝ်ၽူင်းယိုၼ်ႈပၼ်ယဝ်ႉ၊ လႅင်းမိူင်းၵေႃႈတႅမ်ႈပၼ်ယဝ်ႉ ၸူဝ်းၵၼ်ဢွၵ်ႇမိူဝ်းၵႂႃႇ။
မိူဝ်ႈတိုၵ်ႉႁေႃႈၵႃးမိူဝ်းယူႇၼိူဝ်သဵၼ်ႈတၢင်းၼၼ်ႉ လႅင်းမိူင်းၵေႃႈႁိုဝ်ယွမ်းလႃႇ ဢဝ်ၶိုၼ်းတီႈၸၢႆးၶိူဝ်းယူႇ။
“ပီႈတႄႉဢမ်ႇၸႂ်ႈၶႃႈ…ၼႆႁႃႉ!! ”
“ဢမ်ႇပိူင်ႈသင်ၵၼ်ၼင်ႇၵဝ်ႇ…မိူဝ်ႈၵႆႈၼႆႉလႆႈပၼ်ယူႇႁႃႉမၢႆၵပ်းသိုပ်ႇ”
“ပၼ်ယူႇ…ၵူၺ်းၵႃႈဢမ်ႇၸႂ်ႈၶွင်ႁႃး”
“ဢဝ်မၢႆၽူင်းတီႈလႂ်ပၼ်ထႅင်ႈယဝ်ႉလႃႇပွၵ်ႈၼႆႉ…ယႃႇလၢတ်ႈဝႃႈဢဝ်”
“မႅၼ်ႈယဝ်ႉ…ဢဝ်မၢႆၽူင်းသြႃႇႁႃးပၼ်”
“ၸႂ်ႈမဵဝ်းမၼ်းယူႇႁႃႉ!…ပိူၼ်ႈဢမ်ႇၶႂ်ႈလႆႈၶွင်ႁႃး…ပိူၼ်ႈၶႂ်ႈလႆႈၶွင်သြႃႇႁႃးၵူၺ်းဢိူဝ်ႈ…ပဵၼ်ႁင်လႄႈတေလႆႈဢဝ်ၶွင်ႁႃးပၼ်လႃႇၼၼ်ႉ ”
“တူၺ်းမိူၼ်သြႃႇႁႃးလႅပ်ႈသူၼ်ၸႂ်ဝႆႉယိုင်…ႁၼ်တူၺ်းတႃပေႃးဢမ်ႇၽႅပ်ႉလႆႈ…ႁႃးၶပ်းၶိုင်ပၼ်ယဝ်ႉ…ၸတ်းၵၢၼ်ႁင်းၵူၺ်းလႄႈၼႃႈ”
မိူဝ်ႈယင်းတိုၵ်ႉၵိုတ်းလူတ်ႉသေ ပႂ်ႉလူတ်ႉလႆၶၢမ်ႈတၢင်းၽႄယူႇၼၼ်ႉ လႆႈႁၼ်ၽူႈၸၢႆးၵေႃႉၼိုင်ႈ ယိပ်းတင်းထူင်ငိုၼ်းယဝ်ႉ လႅၼ်ႈၽၢၼ်ႇၼႃႈလူတ်ႉၶႃၵႂႃႇ သွင်ၶႃၵေႃႈမိူဝ်ႈလႆႈႁၼ်ၸိူင်ႉၼၼ် ယဵၼ်ႉၸႂ်တူၺ်းဢမ်ႇလႆႈယဝ်ႉလႄႈ ဢွၼ်ၵၼ်လႅၼ်ႈလူင်းၵႃးၵႂႃႇၵႅတ်ႇႁႄႉပႅတ်ႈ တၢင်းၼႃႈၽူႈၸၢႆးၵေႃႉဢၼ်တိုၵ်ႉလႅၼ်ႈၼၼ်ႉသေ ၸၢႆးၵေႃႉၼၼ်ႉႁွတ်ႈမႃးထိုင်တီႈၶႃယဝ်ႉ လႅင်းမိူင်းၵေႃႈၸင်ႇၸႂ် ၶတ်းၶႃၸၢႆးၵေႃႉၼၼ်ႉ လူမ်ႉလူင်းၵႂႃႇ။ မိူဝ်ႈၸၢႆးၵေႃႉၼၼ်ႉၶတ်းၸႂ်လုၵ်ႉယူႇ လႅင်းမိူင်းၸၼ်ဢဝ်ထူင်ငိုၼ်းၼၼ်ႉသေ ၸၼ်ၶေႃးသိူဝ်ႈမၼ်းလုၵ်ႉယဝ်ႉ ၵမ်ၶေႃးသိူဝ်ႈၵူၼ်းၵေႃႉၼၼ်ႉဝႆႉယူႇ။
“ပွႆႇ!!ပွႆႇၶႃႈၵႂႃႇလႄႈ”
ယၢမ်းၼၼ်ႉ သဵင်လင်မေႃးမႃး “ၺွပ်းမၼ်းဝႆႉလႄႈ!!…ယႃႇပေပွႆႇၵႂႃႇ!!”
သၢႆတႃလႅင်းမိူင်း မိူၼ်ႇတူၺ်းတၢင်းႁၢင်ႈလီယိင်းၵေႃႉၼၼ်ႉ သမ်ႉပေႃးမိုင်ၵႂႃႇၸွမ်းယဝ်ႉ။
“ပီႈ!…ၶမ်းႁွမ်!…ပွႆႇၸၢႆးၵႂႃႇလႄႈၼႃႈ…ၸၢႆးဢမ်ႇၶႂ်ႈမိူဝ်း”
ၶမ်းႁွမ်ပႆမႃးသိုပ်ႇၸၼ်ႁုၵ်ႉဢဝ်ၶေႃးသိူဝ်ႈၼွင်ႉၸၢႆးမၼ်းတီႈၼႂ်းမိုဝ်းလႅင်းမိူင်းၼၼ်ႉသေ လၢတ်ႈၸူး
“ၸူမ်းယဝ်ႉၶႃႈ…ၸွႆႈၺွပ်းပၼ်”
လႅင်းမိူင်းႁၼ်ၸိူင်ႉၼၼ် သမ်ႉပေႃးငိူဝ်ႈတူၺ်းထႅင်ႈၵမ်းၼိုင်ႈ ဢမ်ႇတွၼ်ႉယၢမ်ႈႁၼ်ၽူႈယိင်း ႁၢင်ႈလီလီ တေမီးလွင်ႈႁတ်းႁၢၼ်ၵႅၼ်ႇၶႅင် မီးႁႅင်းမိုဝ်း ထိုင်တီႈႁုၵ်ႉၸၼ်ဢဝ်တူဝ်ၸၢႆးဢွၼ်ႇၵေႃႉၼၼ်ႉ ပေႃးဝူင်လူင်ၵႂႃႇၸိူင်ႉၼၼ် မၼ်းၵေႃႈၸင်ႇဢဝ်ထူင်ၼၼ်ႉ ယိုၼ်ႈၸူးၸဝ်ႈမၼ်းၶိုၼ်းယဝ်ႉ..
“ၼႆႉၸွင်ႇၸႂ်ႈထူင်သူၶႃႈ…”
“ၸႂ်ႈဢေႃႈ…ၸူမ်းတေႉယဝ်ႉၶႃႈ..”
“ဢမ်ႇပဵၼ်သင်ၶႃႈ…ယိၼ်းလီၸွႆႈထႅမ်ယူႇ”
“ႁဝ်းမိူဝ်းၵွၼ်ႇယဝ်ႉၶႃႈပေႃးၼႆ”
ၵူမ်ႈၼႃႈၼပ်ႉယမ်ဢိတ်းၼိုင်ႈၼင်ႇတူင်ႉတၵ်ႉသေ ၸၼ်မိၼ်ႇႁူၶမ်းမိူင်းမိူဝ်းၵႂႃႇၸွမ်းတၢင်းယဝ်ႉ။
“ၶမ်းႁွမ်ပေႃးလႆႈယဝ်ႉ…လီဢၢႆပိူၼ်ႈ”
“မေႃလီဢၢႆပိူၼ်ႈႁေႁႃႉ… ၵႃႈဢမ်ႇမိူဝ်းထိုင်ႁိူၼ်း…ယႃႇထၢင်ႇဝႃႈတေပွႆႇ”
“ၵမ်ႉမိုဝ်းၸဵပ်းဢိူဝ်ႈ… ”
“ၸဵပ်းၵေႃႈယဝ်ႉလႄႈ…မိုဝ်းၵူၺ်း…ၶႅၼ်းသေလႆႈလမ်းႁႃယူႇယူဝ်ႉ…ဢဝ်တၢင်းယၢမ်ႈဢမ်ႇလီမႃးတီႈၽႂ်လႃႇ…ၸွမ်းၸၵ်ႉၸွမ်းဢဝ်ထူင်ပိူၼ်ႈၸိူင်ႉၼႆ…”
“ၶႃႈဢမ်ႇမီးငိုၼ်းလူး…ၶႃႈၵေႃႈၶၢၼ်ႉမိူဝ်းႁိူၼ်းယူႇၵူၺ်းလေႃႇ…ၶႃႈႁပ်ႉၶၢမ်ႇယူႇဝႃႈ…ၶႃႈဢဝ်ၶွင်ပီႈၵူၺ်း…ၶႃႈဢမ်ႇလႆႈဢဝ်ၶွင်ၽႂ်ထႅင်ႈ…”
ၶမ်းႁွမ်မႄးသိုပ်ႇလိမ်ႇယၵ်းၶဝ်ႈထႅင်ႈ ထိုင်တီႈသမ်ႉပေႃးႁွင်ႉဢွၵ်ႇမႃးယဝ်ႉ။
“ၶွင်ၽႂ်ၵေႃႈယဝ်ႉ…မၼ်းၸႂ်ႈမဵဝ်းမၼ်းယူႇႁႃႉလၢႆးႁဵတ်းၸိူင်ႉၼႆ…”
“ၶႃႈတိုၵ်ႉႁဵတ်းပွၵ်ႈဢွၼ်တၢင်းသုတ်းၵူၺ်း…ၸွႆႈပွႆႇၶႃႈလႄႈ…”
“ၼႆႉႁႂ်ႈမၼ်းပဵၼ်ပွၵ်ႈလိုၼ်းသုတ်းလႄႈ…”
ၶမ်းႁွမ်ပွႆႇသေၸၼ်ဢဝ်ၶႅၼ်မၼ်းၵႂႃႇယူႇ။
သိုပ်ႇလူထႅင်ႈတွၼ်ႈတေမႃးၶႃႈ
