ၵင်ဝၼ်းၸၢႆႉတူၵ်းယဝ်ႉ လႅင်းမိူင်းဢဝ်ႁႅင်းၵူၼ်းသေမႃးလွမ်ႉဝႆႉယူႇ… ၶၢဝ်ႇဢၼ်ၼႆႉ ႁွတ်ႈၵႂႃႇၽၢႆႇၼိူဝ်ယဝ်ႉ။ ၽၢႆႇတၢင်းၼိူဝ်ၵေႃႈ ပဵၼ်လွင်ႈဢၼ်ဢမ်ႇႁၢၼ်ႉၸႂ်တေႉတေႉ ယွၼ်ႉလွင်ႈဢၼ်လႅင်းမိူင်းတႅပ်းတတ်းႁဵတ်းၵႂႃႇႁင်းၵူၺ်းၼႆႉ မၼ်းၸၢင်ႈတုမ်ႉတိူဝ်ႉထိုင်ၶေႃႈတူၵ်းလူင်း ၵၢၼ်ငမ်းယဵၼ်တင်းသွင်ၽၢႆႇလႆႈယဝ်ႉ။ ၵူၺ်းၵႃႈၽၢႆႇတၢင်းတႂ်ႈတႄႉ ဢမ်ႇႁူႉၵၼ်လူးၵွၼ်ႇ။ ၵူၼ်းလူင်ၽၢႆႇၼိူဝ် ၽၢႆႇၵၢၼ်မိူင်းတႄႉ ဢၢၼ်းတေဢဝ်လၢႆးဢုပ်ႇဢူဝ်းၶဝ်ႈၸွႆႈထႅမ်ယူႇ ၵူၺ်းၵႃႈ ၽၢႆႇၵၢၼ်သိုၵ်းသမ်ႉႁႄႉႁၢမ်ႈဝႆႉယဝ်ႉ ၵွပ်ႈပိူဝ်ႈလႅင်းမိူင်းလႆႈပူၼ်ႉလိူဝ်ၶေႃႈသင်ႇၵႂႃႇယဝ်ႉလႄႈ ဢမ်ႇၸၢင်ႈသင်ႇႁႂ်ႈမၼ်းထွႆလႆႈသေဢိတ်း ၵၢၼ်ၵပ်းသိုပ်ႇၵေႃႈသမ်ႉၶၢတ်ႇဝႆႉထႅင်ႈ သင်ၽၢႆႇၵၢၼ်မိူင်းၶဝ်ၵႂႃႇသုၵ်ႉၸွမ်း ပိူၼ်ႈတေႁူႉဝႃႈၸုမ်းလႅင်းမိူင်းၶဝ်ၼၼ်ႉ ပဵၼ်ၽႂ်၊ ၸိူင်ႉႁိုဝ်ၵေႃႈ ႁူဝ်ၼႃႈမၼ်း မီးလွင်ႈယုမ်ႇၸႂ်လုၵ်ႈၼွင်ႉမၼ်းယူႇယဝ်ႉလႄႈ ပေႃးဢမ်ႇတၵ်းသဵင် ၽႂ်ၵေႃႈတေဢမ်ႇႁူႉဝႃႈပဵၼ်ၸုမ်းလႂ်ၼႆၼၼ်ႉသေ ပႂ်ႉတူၺ်းငဝ်းလၢႆးဝႆႉယူႇယဝ်ႉ။
ယွၼ်ႉမၼ်းပဵၼ်ၵျွင်းမုၼ်ၸဝ်ႈလႄႈ ဢမ်ႇယိုဝ်းၵၼ်ၼၼ်ႉတေလီၼႆသေ ဢဝ်ၵူၼ်းၵမ်ႈၽွင်ႈလွမ်ငွႆးၶဝ်ႈမႃးၸမ်ႁိမ်းၵျွင်းယဝ်ႉ ပတ်ႉလၢႆးမင်ဢဝ် မိူဝ်ႈၶဝ်ဢမ်ႇႁူႉတူဝ်ၼၼ်ႉ လူမ်ႉၵႂႃႇၵေႃႉလႂ်ၵေႃႉၼၼ်ႉယူႇ။
ၶမ်းႁွမ်လႆႈၶၢမ်ႇတင်းၶဝ်ႁွင်ႉၵႂႃႇ ၸွပ်ႇထၢမ်ၵဵဝ်ႇၵပ်းသိုၵ်းတႆးၸိူဝ်းၼၼ်ႉယူႇ မိူၼ်ဝႃႈဢမ်ႇလႆႈၶေႃႈတွပ်ႇသေပွၵ်ႈလႄႈ ၸင်ႇတဵၵ်းတဵင်ၸႂ်ႉဢဵၼ်ႁႅင်းတေႃႇၶမ်းႁွမ် ၵေႃႉပဵၼ်ႁူဝ်ၼႃႈၶဝ်ၼၼ်ႉ ဢဝ်ၽႃႇမိုဝ်းမၼ်းငႃသႂ်ႇမႅပ်ႉၶမ်းႁွမ်ယဝ်ႉ ၶမ်းႁွမ်ၵမ်ၶေႃႈမိုဝ်းမၼ်းဝႆႉသေ လိမ်ႇဢွၵ်ႇပႅတ်ႈလႄႈ ႁဵတ်းႁႂ်ႈမိုဝ်းမၼ်းၸဵပ်းႁႅင်းထိုင်တီႈပေႃးလႆႈၸဵပ်းၸႂ်မႃး ၸႂ်ႉလုၵ်ႈၼွင်ႉမၼ်းၺွပ်းၶမ်းႁွမ်ဝႆႉယဝ်ႉ။ သမ်ႉဝႃႈၵူၼ်းၶဝ်မႃးၼမ်သေတႃႉ ၵူၼ်းဢၼ်မီးတၢင်းၼွၵ်ႈၼၼ်ႉၵူၺ်းၼမ် ၵူၼ်းဢၼ်ယူႇတၢင်းၼႂ်းတႄႉ မီးသၢမ်ၵေႃႉၵူၺ်း။
လုၵ်ႈၼွင်ႉမၼ်းၶုၼ်ႇၺွပ်းဢဝ်ၶမ်းႁွမ် ၵူၺ်းၵႃႈလႆႈၶၢမ်ႇတၢင်း ႁႅင်းတိၼ်ၵျွၵ်းထိပ်ႇဢီးၽၢင်ႈၽတ်ႉလူမ်ႉထူၵႂႃႇ ၵမ်းၵေႃႉၵေႃႉယူႇ တႃႇတေလုၵ်ႉၶိုၼ်ႈမႃးၶိုၼ်းၼၼ်ႉ လႅပ်ႈတေၶၢၼ်ၸႂ်ယဝ်ႉ ယွၼ်ႉထိပ်ႇၺႃးတီႈယမ်မၼ်း သမ်ႉပေႃးၵၼ်ႈလူင်ၵႂႃႇၵေႃႉလႂ်ၵေႃႉၼၼ်ႉတေႉလူင်။ ႁူဝ်ၼႃႈၶဝ်ၼၼ်ႉၵေႃႈ ႁွင်ႉၵူၼ်းတၢင်းၼွၵ်ႈသေဢဝ်ၵွင်ႈဢွၵ်ႇယိူင်းၸူးမႅၼ်ႈမိူဝ်ႈလဵဝ်ၵၼ်လႄႈ ၶမ်းႁွမ်ၵေႃႈ ပုင်ႈလႅၼ်ႈၶဝ်ႈၸူးၸမ် ၶုၼ်ႇႁၢဝ်ႉဢဝ်ၵွင်ႈသေယဝ်ႉ လုၵ်ႈၼွင်ႉမၼ်းၵေႃႈလႅၼ်ႈမႃး ပၢႆၵွင်ႈၼၼ်ႉၵေႃႈ ၵိုင်ႉၵၢင်ႉၸမ်ႈသႂ်ႇတီႈ ၵွၵ်းႁူဝ် ႁူဝ်ၼႃႈၶဝ်ၼၼ်ႉသေ
“သဵင်ၵွင်ႈသူလႄႈႁူဝ်ၼႃႈသူ..ဢၼ်လႂ်တေဝႆးလိူဝ်”
ၵူၼ်းၸိူဝ်းၼၼ်ႉၵေႃႈထွႆၶိုၼ်း ၵူၺ်းၵႃႈမိူဝ်ႈႁွတ်ႈၵႂႃႇတၢင်းတႂ်ႈၵျွင်းၶိုၼ်းၼၼ်ႉ ႁၼ်ၵူၼ်းၶဝ်လူမ်ႉဢူပ်ႇထူ ၼွၼ်းမူၼွၼ်းမႃၵႂႃႇမူတ်းယဝ်ႉ… ၶမ်းႁွမ်ၵေႃႈပွႆႇႁူဝ်ၼႃႈၶဝ်ၵႂႃႇသေယဝ်ႉ မၼ်းမႃးႁၼ်လုၵ်ႈၼွင်ႉမၼ်းၸိူင်ႉၼၼ် တင်းၵူဝ်တၢႆသေ ၼႅတ်ႈလၢတ်ႈၵူၼ်းမၼ်းထွႆ ၶိုၼ်းယူႇ။
“ၵွင်ႈၼႆႉ..ဢမ်ႇၸႂ်ႈၶူဝ်းမႂ်းယဝ်ႉ…ပေႃးမႂ်းတိုၵ်ႉမႃးထႅင်ႈ…ၸွင်ႇၵွႆႈမႃးဢဝ်မၢၵ်ႇမၼ်းလႄႈ…”
ၶမ်းႁွမ်ၵေႃႈလၢတ်ႈၼင်ႇႁတ်းႁၢၼ်သေ ယိပ်းဢဝ်ၵွင်ႈၼၼ်ႉသိမ်းၵႂႃႇယူႇ။
လွင်ႈသုၵ်ႉယုင်ႈၵေႃႈလႆႈတဵတ်ႇယဵၼ်ၵႂႃႇ လူၺ်ႈဢမ်ႇမီးသဵင်ၵွင်ႈတႅၵ်ႇသေဢိတ်းယူႇယဝ်ႉ။
လုၵ်ႈၼွင်ႉလႅင်းမိူင်းၸိူဝ်းၼၼ်ႉၵေႃႈ ဢွၼ်ၵၼ်မႃးၶဝ်ႈထႅဝ်ယူႇတီႈၼႃႈဝတ်ႉၼၼ်ႉသေ လႅင်းမိူင်းၵေႃႈ ဢွၵ်ႇမႃးတၢင်းလင်ၶမ်းႁွမ်ယဝ်ႉ။
“မိူၼ်ႁဝ်းတေမႃးႁႃၸဝ်ႈသြႃႇႁဝ်းၽိတ်းၶၢဝ်းယဝ်ႉ…မိူဝ်းလႆႈယဝ်ႉၸုမ်းႁဝ်း…”
“ဢမ်ႇၸႂ်ႈဝႃႈမႃးၸွႆႈႁဝ်းႁႃႉ… ”
“ဢမ်ႇ…ႁဝ်းမႃးႁႃၸဝ်ႈသြႃႇလၢႆလၢႆၵူၺ်း…”
“မႃးႁႃၸဝ်ႈသြႃးႇၼႆႉပိူၼ်ႈပႃးၵွင်ႈသေႁႃႉ…”
“ဢေႃႈ…ႁဝ်းဢွၼ်ဢဝ်လုၵ်ႈၼွင်ႉႁဝ်းမႃးတူၺ်း…ၵူဝ်ဝႃႈတေမီးလွင်ႈဢမ်ႇလီလႄႈပႃးၽၢင်ႉဝႆႉ…”
ၶမ်းႁွမ်ယၵ်ႉၸူးလႅင်းမိူင်းသေ “ၸူမ်းယဝ်ႉၼႃႈ… ”
လႅင်းမိူင်းတင်းၶႂ်ႈတူၺ်းဢမ်ႇၶႂ်ႈတူၺ်းၼႃႈၶမ်းႁွမ်ၼၼ်ႉသေ “ႁဝ်းယင်းဢမ်ႇလႆႈႁဵတ်းပၼ်သင်……”
“သူႁွတ်ႈမႃးၵူၺ်းၵေႃႈပေႃးယဝ်ႉ…” တတ်းၵႂၢမ်းပႅတ်ႈသေ ဢဝ်သဵင်ၶႃယဵၼ်ယူႇႁင်းၽႂ်ႁင်းမၼ်းယဝ်ႉ။ ၸင်ႇၸူဝ်းၵၼ်လူင်းၵျွင်းမိူဝ်း ၵူၺ်းၵႃႈၶမ်းႁွမ်မိူၼ် ၶႃလႅပ်ႈၶတ်းဝႆႉလႄႈ… ၶေႉၺွၵ်းၵႂႃႇၵမ်းလွႆးလွႆး။ လႅင်းမိူင်းၵေႃႈ
“ၸွင်ႇႁဝ်းတေလႆႈႁဵတ်းပၼ်မႆႉတဝ်ႉႁိုဝ်..”
သၢႆတႃၶမ်းႁွမ်ၵေႉတူၺ်း ဢမ်ႇပေႃးႁၢၼ်ႉၸႂ်ၵႃႈႁိုဝ်။
“မိူၼ်ၼင်ႇဝႃႈ…ဢဝ်ႁဝ်းပဵၼ်မႆႉတဝ်ႉပၼ်သူၵေႃႈလႆႈ” ယိုၼ်ႈၶႅၼ်ပၼ်ၶမ်းႁွမ်ႁႂ်ႈယိပ်းၼႆယူႇ တင်းၶႂ်ႈယိုၼ်ႈဢမ်ႇၶႂ်ႈယိုၼ်ႈၵေႃႈလူဝ်လူဝ်။
ၶမ်းႁွမ်ယၵ်ႉတူၺ်းလႅင်းမိူင်းသေ ၵၼ်ႈၶူဝ်ဢွၵ်ႇမႃးယဝ်ႉ “ႁဝ်းလီၵူဝ်ပဵၼ်တၢၼ်ႇၼၼ်ႉႁႃႉ..”
“ဢဝ်ၶိင်းမၢၼ်ႈယဵဝ်ႈပေႃးၶႂ်ႈလၼ်ၸိူင်ႉၼၼ်…”
ၶမ်းႁွမ်ၵေႃႈၵွတ်ႇဢဝ်ၶႅၼ်လႅင်းမိူင်းသေယဝ်ႉ
“ဢမ်ႇလႆႈၸႂ်ႉႁႅင်းႁိုင်ႁိုင်…ၵိုင်ႉၵၢင်ႉမႃးၸႂ်ႉၸိူင်ႉၼႆ…ဢမ်ႇယၢမ်ႈသေဢိတ်း…”
“ဢမ်ႇၸႂ်ႈဝႃႈၸႂ်ႉႁႅင်းၼႃႇပူၼ်ႉတီႈႁႃႉ…ဢဝ်ၵူၼ်းလူမ်ႉသမ်ႉပေႃးဢမ်ႇၸၢင်ႈလုၵ်ႉၸိူင်ႉၼၼ်… ႁဝ်းဝူၼ်ႉဝႃႈ…တိၼ်သူၼၼ်ႉႁႅင်းလိူဝ်ႁဝ်းၵွၼ်ႇယဝ်ႉ…”
“မိူဝ်ႈထိပ်ႇမၼ်းဢမ်ႇတၼ်းဝူၼ်ႉၸဵပ်းသင်ယဝ်ႉ…လူဝ်ႇလႆႈႁႂ်ႈလွတ်ႈၵူၺ်းၼႃႇ”
“ၸွင်ႇႁဝ်းတေလႆႈၸေးမိူဝ်းႁိုဝ်..ႁဵတ်းၵႅင်ႈၸဵပ်းၽွင်ႈၵေႃႈလႆႈယူႇၵူၺ်းၼႃႈ…”
“ဢမ်ႇၵူဝ်ႁဝ်းယဝ်ႉႁႃႉ…”
“ၵူဝ်သူၸင်းႁဝ်းၵူၺ်းဢိူဝ်ႈ…”
ပႆမိူဝ်းၵႂႃႇႁွတ်ႈထိုင်တီႈတင်ႇဢၼ်တမ်းယူႇၼႃႈႁိူၼ်းၼၼ်ႉၼႆၵေႃႈ လႅင်းမိူင်းႁႂ်ႈၶမ်းႁွမ်ၼင်ႈသေ ၼင်ႈၵူမ်ႈယိပ်းဢဝ်တိၼ်ၶမ်းႁွမ်မႃးၼူတ်ႈပၼ်ယူႇ။
“သူပဵၼ်ၽူႈယိင်းဢၼ်ႁတ်းႁၢၼ်…ဢမ်ႇမိူၼ်ၽႂ်ၼၼ်ႉယဝ်ႉ…ၸွင်ႇသူႁူႉႁႃႉ…ႁဝ်းထူပ်းသူပွၵ်ႈဢွၼ်တၢင်းသုတ်း…ႁဝ်းလႆႈႁၼ်…သူသင်ႇသွၼ်ၶမ်းမိူင်းယူႇၼၼ်ႉ…ၸၼ်ၸႂ်ႁႂ်ႈႁဝ်းသူၼ်ၸႂ်သူမႃးလႄႈ…လွင်ႈႁတ်းႁၢၼ်သူၼၼ်ႉ…ႁဵတ်းႁႂ်ႈႁဝ်းၶႂ်ႈႁူႉၸၵ်းသူမႃးလိူဝ်ၵဝ်ႇ…ယိုင်ႈႁူႉၸၵ်းယဝ်ႉ…ယိုင်ႈၶႅၼ်းၶႂ်ႈႁူႉၸၵ်း…ယိုင်ႈႁူႉၸၵ်းၵႃႈႁိုဝ်ၵေႃႈ…ဢမ်ႇမီးဝၼ်းဢိမ်ႇမိူဝ်ႇလႆႈ…တေဝႃႈႁိုဝ်ၵေႃႈ..မၼ်းလီၶႂ်ႈၶူဝ်တေႉယဝ်ႉ..ႁဝ်းပဵၼ်ၵူၼ်းဢၼ်ၸွမ်းၵႅတ်ႇၶႄပၼ်ပိူၼ်ႈယူႇယဝ်ႉ..ၵူၺ်းၵႃႈႁဝ်းၵေႃႈဢမ်ႇမီးၵူၼ်းၵေႃႉဢၼ်ၵႅတ်ႇၶႄပၼ်ႁဝ်းလႄႈ..ပၼ်ႁူမ်ႈၽုၺ်းလိုဝ်ႈၸႂ်လႆႈ…ၵူၺ်းၵႃႈသူ..ပဵၼ်ၵူၼ်းၵေႃႉဢၼ်ႁဝ်းၶႂ်ႈပိုင်ႈယူႇႁူမ်ႈၽူၺ်းလဵဝ်ၼၼ်ႉယဝ်ႉ..”
ႁႅၼ်ယၵ်ႉတူၺ်းၼႃႈၶမ်းႁွမ်သေ ၶိုၼ်းၵူမ်ႈမိပ်ႇၼူတ်ႈပၼ်ထႅင်ႈယဝ်ႉလၢတ်ႈဝႃႈ “ႁဝ်းႁူႉ..ႁဝ်းပဵၼ်သိုၵ်း..ႁဝ်းၵေႃႈဢမ်ႇႁဵတ်းသင်လႆႈ…တေႃႈၼင်ႇၶႂ်ႈယူႇႁိမ်းၶၢင်ႈသူၵူၺ်းၵေႃႈႁဵတ်းဢမ်ႇလႆႈ..ၵူၺ်းၵႃႈ…ႁႂ်ႈသူႁူႉဝႆႉဝႃႈ..ၼႂ်းႁူဝ်ၸႂ်ႁဝ်းၼၼ်ႉမီးသူယူႇတႃႇသေႇဢိူဝ်ႈၼႃႈ…”
တမ်းတိၼ်ၶမ်းႁွမ်ဝႆႉသေ လုၵ်ႉၶိုၼ်ႈမႃးယဝ်ႉ “ႁဝ်းတေမိူဝ်းၵွၼ်ႇယဝ်ႉၼႃႈ”
ၶမ်းႁွမ်တႄႉႁိုဝ်ၸၢင်ႈတၵ်းသဵင်လႆႈ ဢိုၵ်ႉၼိုၵ်ႉယူႇၼႂ်းၸႂ်သေ တူၺ်းလင်လႅင်းမိူင်းဢၼ်ပႆၽၢတ်ႇၵႂႃႇလွႆးလွႆးၼၼ်ႉၵူၺ်းယဝ်ႉ။
လႅင်းမိူင်းၵေႃႈ မိူဝ်းႁွတ်ႈပၢင်သဝ်းယဝ်ႉ မီးၶေႃႈသင်ႇႁႂ်ႈပူတ်းပုၼ်ႈၽွၼ်းၸူဝ်ႈၶၢဝ်း လႄႈ ႁၢမ်ႈၵွင်ႉၵၢႆႇၵၼ်တင်း ၼႃႈၵၢၼ်မၼ်းတေႃႇထိုင်တၢင်းၽိတ်းမၼ်းတေသုတ်းသဵင်ႈ ၼႆယူႇ။ တီႈတေႉ ဢၼ်မၼ်းႁဵတ်းၵႂႃႇၵေႃႈ ဢမ်ႇၸႂ်ႈဝႃႈၽိတ်းလူး မၼ်းၵေႃႈႁဵတ်းၸွမ်းပုၼ်ႈၽွၼ်းမၼ်းႁႂ်ႈတဵမ်တီႈ လႄႈ ႁဵတ်းၵႂႃႇလႆႈလီ ဢမ်ႇမီးလွင်ႈလူႉသုမ်းသင်။ ႁဵတ်းလႆႈလီယဝ်ႉသေတႃႉ ၵူၺ်းၵႃႈ လွင်ႈဢမ်ႇထွမ်ႇၶေႃႈၸီႉသင်ႇၼၼ်ႉ လႆႈထုၵ်ႇပၼ်တၢမ်ႇၵႂႃႇယဝ်ႉ။ လႅင်းမိူင်းၵေႃႈ ႁူႉတူဝ်ယူႇယဝ်ႉ ဝႃႈတေၺႃးတၢမ်ႇသေဢၼ်ဢၼ်။ ဢမ်ႇဝူၼ်ႉလႆႈဝႃႈတေၺႃးတၢမ်ႇၸိူင်ႉၼႆ။ လႅင်းမိူင်းထုၵ်ႇသူင်ႇတူဝ် ၵႂႃႇၵုမ်းၶင်ဝႆႉတီႈငဝ်ႈၸုမ်းလူင်ၶဝ်ၼၼ်ႉယဝ်ႉ။
သိုပ်ႇလူဢၢၼ်ႇထႅင်ႈတွ
