ဢၢႆလႅတ်ႇဢုၼ်ႇဢုၼ်ႇထွင်ႇလႅင်း လူမ်းလီၸိုၼ်ႈသႂ် ၸႂ်ၵတ်းယဵၼ်လီ ၶမ်းႁွမ်ၶဝ်ႈၵႂႃႇၼႂ်းႁွင်ႈႁဵၼ်း ပႃးတၢင်းယုမ်ႉဝၢၼ်သဵင်လီလၢတ်ႈတေႃႇ လုၵ်ႈႁဵၼ်းၵေႃႈၸိုၼ်ႈပၢင်ႇသႂ် ၸႂ်မူၼ်ႈသိူဝ်းၸွမ်းၼၼ်ႉယဝ်ႉ။ ၵူၺ်းၵႃႈ မိူၼ်ဝႃႈသွင်သၢမ်ဝၼ်းပူၼ်ႉမႃးၼၼ်ႉ လုၵ်ႈႁဵၼ်းပိူင်ႈမႃးတႄႉယဝ်ႉ ဢမ်ႇႁူႉဝႃႈပဵၼ်သင် မီးလုၵ်ႈႁဵၼ်းထၢမ်ထိုင်လႅင်းမိူင်းယူႇတႃႇသေႇ။
“မေႃသွၼ်ၶႃႈ………မေႃသွၼ်လႅင်းမိူင်းတေဢမ်ႇမႃးသွၼ်ႁဝ်းယဝ်ႉႁႃႉ…”
“ဢမ်ႇမႃးယဝ်ႉ……” ယူႇယူႇၵေႃႈလႅင်းမိူင်းႁွတ်ႈမႃးသေ
“ၽႂ်ဝႃႈလႃႇ…တေဢမ်ႇမႃး…လုၵ်ႈႁဵၼ်းႁၢႆႉပေႃးတၢၼ်ႇၼႆႉ…မေႃသွၼ်ၵေႃႉလဵဝ်ၵူၺ်းတေသွၼ်လႆႈယူႇ ႁႃႉ…”
“သူၼၼ်ႉယဝ်ႉ…ဢွၼ်လုၵ်ႈႁဵၼ်းႁဝ်းတိုဝ်…ႁၼ်ႁိုဝ်…ပၼ်တၢင်းယၢပ်ႇၸႂ်သူယဝ်ႉ…”
လႅင်းမိူင်းမႃးၸွႆႈၸိူင်ႉၼႆ ၶႅၼ်းမႃးဢိတ်းၼိုင်ႈ။ ၵူႈပွၵ်ႈလႆႈသွၼ်ၵေႃႉလဵဝ်ၵူၺ်း ႁိူဝ်ႉယူႇၵေႃႈဢမ်ႇမီးၵူၼ်းပုတ်ႈ ဢၼ်ႁိူဝ်ႉလိူဝ်ပိူၼ်ႈၼႆႉတႄႉ ၸိူဝ်းလုၵ်ႈဢွၼ်ႇဢၼ်ပႆႇမေႃသင်သေ မႅၼ်ႈၽွင်းၶႂ်ႈလဵၼ်ႈၼၼ်ႉယဝ်ႉ။ လႅင်းမိူင်းမႃးၸွႆႈသွၼ်ပၼ် ထိုင်တီႈလုၵ်ႈဢွၼ်ႇသမ်ႉပေႃးၸပ်းမၼ်းမႃးယဝ်ႉၼႃႇ။ ဢၼ်မႃးၸွႆႈၵေႃႈၸူမ်းယူႇ ၵူၺ်းၵႃႈ မၢင်ပွၵ်ႈမႃးၵေႃႈ လၵ်ႉမႆႈၸႂ်ၸွမ်းပေႃးဝႃႈ လႅင်းမိူင်းဢမ်ႇယူႇယဝ်ႉ တေႁဵတ်းၸိူင်ႉႁိုဝ် တေႃႈၼင်ႇ ဢမ်ႇႁၼ်မႃးဢဝ်ၵႅပ်ႉၼိုင်ႈၵူၺ်း လုၵ်ႈဢွၼ်ႇပေႃးထၢမ်ႁႃယူႇတိၵ်းတိၵ်း။
လူင်းႁူင်းႁဵၼ်းယဝ်ႉ ၶမ်းႁွမ်ၶႃၵေႃႈ ၸွႆႈၵၼ်ၽဵဝ်ႈသိမ်းၶူဝ်းသေ ၼင်ႈဢုပ်ႇၵၼ်ယူႇၼႂ်းတီႈႁွင်ႈႁဵၼ်း။
“ႁဝ်းယိၼ်းၸူမ်းတေႉယဝ်ႉ…ဢၼ်မႃးၸွႆႈႁဝ်းၸိူင်ႉၼႆ…”
“ႁဝ်းတဵမ်ၸႂ်ယူႇယဝ်ႉ…ယဝ်ႉ..ႁဝ်းၵေႃႈၸူမ်းမိူၼ်ၵၼ်..ဢၼ်သူယွမ်းႁပ်ႉတၢင်းၸွႆႈထႅမ်ႁဝ်း…”
“ႁဝ်းၵေႃႈယင်းတိုၵ်ႉဝူၼ်ႉယူႇဝႃႈၸွင်ႇထုၵ်ႇလီထဵင်ၶိုၼ်း…”
“ပဵၼ်သင်လႄႈ…ႁဝ်းႁဵတ်းဢမ်ႇလီႁႃႉ…”
“ဢမ်ႇ…သူႁဵတ်းလီတေႉယဝ်ႉ…မိူၼ်ဝႃႈလုၵ်ႈဢွၼ်ႇၶဝ်တေလႆႈၸႂ်သူတေႉယဝ်ႉ…”
“ၵူၼ်းလဝ်းလူး…မီးၽႂ်လႃႇတေဢမ်ႇလႆႈၸႂ်…မီးမၢင်ၵေႃႉၵူၺ်းယူဝ်ႉ…”
“ႁဝ်းမႆႈၸႂ်ဝႃႈပေႃးသူဢမ်ႇယူႇယဝ်ႉ…ႁဝ်းတေႁိူဝ်ႉတေႉၼၼ်ႉယဝ်ႉ…”
“ပေႃးၸိူင်ႉၼၼ်…သူထုၵ်ႇလီႁဵတ်းလီတေႃႇႁဝ်းၼမ်ၼမ်…”
“ၼၼ်ႉယဝ်ႈ…ၵႂႃႇလႄႈႁဝ်းမိူဝ်း..”
ၶၢဝ်းယၢမ်းတၼ်းလႅင်းမိူင်းၼၼ်ႉ မႃးဝႆႉပၼ်ၶမ်းႁွမ်သဵင်ႈသဵင်ႈယဝ်ႉ။ ယၢမ်းတိုၵ်ႉသွၼ်လုၵ်ႈဢွၼ်ႇၶဝ်ယူႇၼၼ်ႉ ယူႇယူႇၵေႃႈသဵင်ၸၢၵ်ႈမေႃးမႃးလႄႈ မိူၼ်ဝႃႈမီးၵၢၼ်သေ။
“ၶမ်းႁွမ်!…ႁဝ်းမီးၵၢၼ်ယဝ်ႉ…ၽၢၵ်ႇတူၺ်းပႃး ၼေႃႇမိူင်းၽွင်ႈ!…ႁဝ်းၵႂႃႇၵွၼ်ႇ…”
“ဢိုမ်ႈ!!…”
“ႁဝ်းယွမ်းၼွမ်းယူႇ……”
“ဢမ်ႇပဵၼ်သင်……ႁဝ်းပွင်ႇၸႂ်ယူႇ…သူၵႂႃႇလႄႈ…”
ၶမ်းႁွမ်ၵေႃႈတေၸၢင်ႈႁဵတ်းႁိုဝ်…ၼင်ႈတူၺ်းလုၵ်ႈႁဵၼ်းသေထူၺ်ႈၸႂ်လူင်ယူႇ။
“ဝၼ်းမိူဝ်ႈၼႆႉၵေႃႈထိုင်မႃးႁႂ်ႈပေႃးလႆႈတေႉလူး…”
ၶမ်းႁွမ်ၵေႃႈသိုပ်ႇဢဝ်ပုၼ်ႈၽွၼ်းသေ ႁဵတ်းၵႂႃႇၶိုၼ်းႁင်းၵူၺ်းမၼ်းယဝ်ႉ။
ဝၢႆးသေဝၼ်းၼၼ်ႉ လႅင်းမိူင်းၵေႃႈႁၢႆၵႂႃႇလၢႆဝၼ်း ပဵၼ်ၸိူင်ႉႁိုဝ်ၵေႃႈ ဢမ်ႇႁၼ်ႁွတ်ႈမႃးၶိုၼ်း။
ၵၢင်ဝၼ်းလႅတ်ႈမႆႈတႅင်ႈတႅင်ႈ သဵင်ၵႃးသိုၵ်းလူင်လင်မေႃးမႃး ပဵၼ်သွင်သၢမ်လမ်း ၵူၼ်းၶီႇမႃးၸွမ်းတဵမ်ပိုၵ်းပိုၵ်း မႃးၵိုတ်းယူႇၼႂ်းဝၢင်းၵျွင်းလႄႈ ပေႃးတဵမ်ဝၢင်းၵျွင်းလူင်ဝႆႉ ၵူၼ်းဝၢၼ်ႈၵေႃႈဢမ်ႇႁတ်းၵႂႃႇတၢင်းလႂ်ယဝ်ႉ မိူဝ်ႈႁူႉဝႃႈမီးသိုၵ်းမၢၼ်ႈမႃးၼႂ်းဝၢၼ်ႈၼႆၵေႃႈ ဢမ်ႇမီးၽႂ်ႁတ်းဢွၵ်ႇႁိူၼ်း။
ၶၢဝ်းလူင်းႁူင်းႁဵၼ်းၼၼ်ႉ ၶမ်းႁွမ်ပွႆႇလုၵ်ႈႁဵၼ်းမိူဝ်း ၵူၺ်းၵႃႈဢမ်ႇမီးၽႂ်ႁတ်းဢွၵ်ႇၼွၵ်ႈႁူင်းႁဵၼ်းသေၵေႃႉ ယွၼ်ႉဝႃႈႁူင်းႁဵၼ်းၸမ်ဝၢင်းၵျွင်းလူး ယူႇၼႂ်းႁူင်းႁဵၼ်းသေတူၺ်း ႁၼ်လီဝႃႈႁၼ်လီယဝ်ႉ။
“ၼွင်ႉပႆႇမိူဝ်းႁိူၼ်းႁႃႉ…”
“မီးသိုၵ်းမၢၼ်ႈပေႃးတဵမ်လူင်ဝႆႉ…ႁဝ်းဢမ်ႇႁတ်းမိူဝ်းၶႃႈ…”
“ဢမ်ႇပဵၼ်သင်ၼွင်ႉ……ၶဝ်ဢမ်ႇႁဵတ်းသင်…”
“ႁဝ်းၵူဝ်ဢေႃႈ……ပေႃႈမႄႈႁဝ်းလၢတ်ႈဝႃႈ…ပေႃးႁၼ်သိုၵ်းၸိူင်ႉၼၼ်ယႃႇပေၵႂႃႇတၢင်းလႂ် ပေႃးၶဝ်ႁၼ် ၶဝ်တေၺွပ်းၼႆဝႃႇ ႁဝ်းၵူဝ်ဢေႃႈမေႃသွၼ်…”
“ၼွင်ႉၶဝ်တူၺ်းလူး…ၸွင်ႇၶဝ်မီးမိုဝ်းသၢမ်ၶွၼ်ႁႃႉ… ၸွင်ႇၶဝ်မီးတိၼ်သၢမ်ၶႃႁိုဝ်…”
“ဢမ်ႇမီးၶႃႈ…”
“တူၺ်းၶဝ်လူး…ၶဝ်ၵေႃႈမီးႁူမီးတႃ…မီးသူပ်းမီးၶူႈၼင်မိူၼ်ႁဝ်းၵူၺ်း ၶဝ်မီးမိူၼ်ႁဝ်းၵူၺ်း…ႁဝ်းသမ်ႉတေၵူဝ်ႁဵတ်းသင်…သင်ဝႃႈႁဝ်းၵူဝ်…ၶဝ်ယိုင်ႈၶႅၼ်းတေပေႉၵိၼ်ႁဝ်းငၢႆႈ…သင်ဝႃႈႁဝ်းလႅၼ်ႈၶဝ်ယိုင်ႈၶႅၼ်းလမ်း…သင်ဝႃႈႁဝ်းဢူၼ်ႈဢွၼ်ႇၶဝ်ယိုင်ႈၶႅၼ်းတဵၵ်းတဵင်ႁဝ်း…ပေႃးႁဝ်းဢမ်ႇႁဵတ်းသင်…ၶဝ်ၵေႃႈ တေဢမ်ႇၸၢင်ႈႁဵတ်းသင်…ပေႃးႁဝ်းႁတ်းႁဵတ်း…ၶဝ်ယိုင်ႈၶႅၼ်းၵူဝ်…ယိုင်ႈၶဝ်ၵူဝ်ၶဝ်ယိုင်ႈၶႅၼ်းတေလွၵ်ႇႁဝ်း…ယိုင်ႈၶဝ်လွၵ်ႇႁဝ်းၵႃႈႁိုဝ်…ႁဝ်းၵေႃႈတိုၼ်းလူဝ်ႇႁတ်းၼၼ်ႉယဝ်ႉ… ”
ယၢမ်းၼၼ်ႉ ၸင်ႇမီႍးၵူၼ်းလူင်ၶဝ် ၶဝ်ႈမႃးၼႂ်းဝၢင်းႁူင်းႁဵၼ်းၼၼ်ႉတူၺ်းယူႇ မႃးထၢမ်ႁႃမေႃသွၼ်လႄႈ ၶမ်းႁွမ်ၵေႃႈႁႂ်ႈလုၵ်ႈႁဵၼ်းၵေႃႉယႂ်ႇၼၼ်ႉ ဢွၼ်ဢဝ်လုၵ်ႈဢွၼ်ႇၵေႃႉလဵၵ်ႉ ၸိူဝ်းၼၼ်ႉမိူဝ်းၵႂႃႇသေ ၶမ်းႁွမ်ဢွၵ်ႇၵႂႃႇၸူးၶဝ်ယူႇယဝ်ႉ။ ၶဝ်ၵေႃႈမႃးထၢမ်လွင်ႈၼိုင်ႈယဝ်ႉ လွင်ႈၼိုင်ႈ ထၢမ်ၵႂႃႇထၢမ်မႃးမိူၼ်ၶေႃႈၵႂၢမ်းဢမ်ႇပေႃးၶဝ်ႈၵၼ်ယဝ်ႉ ႁွင်ႉဢဝ်ၶမ်းႁွမ်မိူဝ်းတီႈၵျွင်းၸွမ်းၶဝ်ၵႂႃႇ။ မိူဝ်ႈၶမ်းႁွမ်ထုၵ်ႇႁွင်ႉၵႂႃႇတီႈၵျွင်းၼၼ်ႉ ယိင်းသႅင်ၵေႃႈမႆႈၸႂ်လႄႈ ဢမ်ႇႁူႉဝႃႈတေႁွင်ႉၵႂႃႇႁဵတ်းသင်… ႁွပ်ႇဢဝ်ၼေႃႇမိူင်းဢၼ်တိုၵ်ႉလူင်းႁူင်းႁဵၼ်းမႃးၼၼ်ႉ လႅၼ်ႈလူင်ၵႂႃႇတီႈပၢင်သဝ်းလႅင်းမိူင်းၶဝ်ၵမ်းလဵဝ်ယူႇ။ ႁၼ်ယိင်းသႅင်ႁိူဝ်ႉၼႃႇလႄႈ ၸၢႆးၶိူဝ်းၼႅတ်ႈမႃးႁပ်ႉဢဝ်သေ
“ၶႂၢင်းပၼ်ၽွင်ႈ…မိူဝ်ႈၼႆႉႁဝ်းဢမ်ႇၸၢင်ႈလူင်း… မီးသိုၵ်းမၢၼ်ႈၶဝ်ႁွတ်ႈမႃး…”
“ယွၼ်ႉၼၼ်ယဝ်ႉ…ႁဝ်းၸင်ႇလႆႈမႃးႁွတ်ႈတီႈၼႆႈၼၼ်ႉယဝ်ႉ…”
“မီးလွင်ႈသင်တီႈဝၢၼ်ႈလႃႇ…”
“ၶဝ်ၺွပ်းၶမ်းႁွမ်ၵႂႃႇ…ႁဝ်းဢမ်ႇႁူႉဝႃႈၺွပ်းၵႂႃႇႁဵတ်းသင်…ႁဝ်းႁၼ်ၶဝ်ဢုပ်ႇၵၼ်တင်းႁိုင်…ယူႇယူႇၵေႃႈမိူၼ်ၶဝ်တေထဵင်ၵၼ်ယူဝ်ႉ…ၸင်ႇမီးၵူၼ်းၺွပ်းၶႅၼ်မၼ်းၵႂႃႇ…”
လႅင်းမိူင်းၵိုင်ႉၵၢင်ႉ လႆႈမႃးငိၼ်းလႄႈ လႅင်းမိူင်း လၢတ်ႈၵူၼ်းမၼ်းႁႂ်ႈႁၢင်ႈႁႅၼ်းတူဝ်ဝႆႉယဝ်ႉ။
“ႁူဝ်ၼႃႈ!…မီးၵႂၢမ်းသင်ႇမႃးဝႃႈ…တေဢမ်ႇလႆႈလူင်းပၢင်သဝ်းၼႆ… ”
“ၵႂၢမ်းသင်ႇမၼ်းတေလွင်ႈယႂ်ႇလိူဝ်သေၵူၼ်းၼိုင်ႈၵေႃႉတေပဵၼ်သင်ၵႂႃႇႁႃႉ!!…ပုၼ်ႈၽွၼ်းႁဝ်း..ဢမ်ႇၸႂ်ႈတႃႇၸွမ်းၵႂၢမ်းသင်ႇလွင်ႈလဵဝ်…တႃႇၵႅတ်ႇၶႄသၢႆၸႂ်ၵူၼ်းမိူင်း…ၸိူဝ်ႉၸၢတ်ႈၸိူဝ်ႉၶိူဝ်းႁဝ်း…ၼၼ်ႉၵေႃႈပဵၼ်ပုၼ်ႈၽွၼ်းႁဝ်းမိူၼ်ၵၼ်…ယွၼ်ႉၵူဝ်တၢမ်ႇသေ…တေသုမ်းၵူၼ်းလီၵႂႃႇၼိုင်ႈၵေႃႉၼၼ်ႉ…ၵူၼ်းလမ်ႇလွင်ႈလိူဝ်ယဝ်ႉ..ဢၼ်ပဵၼ်မႃးၽၢႆႇလင်ၼၼ်ႉတႄႉ…ၶႃႈၵေႃႉတေဢဝ်ပုၼ်ႈၽွၼ်းၵူၺ်း…”
သိုပ်ႇလူဢၢၼ်ႇထႅင်ႈတွၼ်ႈတေမႃးၶႃႈ။
