ယၢမ်းၵၢင်ၼႂ် ၶမ်းႁွမ်ၵေႃႈလုၵ်ႉၸဵမ်ၸဝ်ႉသေ ႁၢင်ႈႁႅၼ်းၶူဝ်းတႃႇမိူဝ်းဝဵင်းယူႇ…
“ၶမ်းႁွမ်ပေႉႁဵတ်းသင်ၸဵမ်ၸဝ်ႉလႃႇ…”
“မိူဝ်ႈၼႆႉႁဝ်းတေမိူဝ်းဝဵင်း…”
“ဢွၵ်ႇၸႂ်သင်မိူဝ်းဝဵင်းၸဵမ်ၸဝ်ႉၸိူင်ႉၼႆ…မီးပၢင်ၵုမ်ႁႃႉ…ႁႂ်ႈႁဝ်းမိူဝ်းၸွမ်းၼႄႇ…”
“ဢမ်ႇ!!…ႁဝ်းတေမိူဝ်းသိုဝ်ႉတၢင်းၵိၼ်တၢင်းယႅမ်ႉ…ႁဝ်းဝူၼ်ႉဝႃႈတေၵိၼ်လဵင်ႉပၼ်…ၸုမ်းလႅင်းမိူင်းၶဝ်…ဢၼ်ဢွၼ်ၵၼ်မႃးၸွႆႈႁဝ်းမိူဝ်ႈဝႃးၼၼ်ႉ…”
“ဢဝ်လူတ်ႉမိူဝ်းႁင်းၵူၺ်းႁႃႉ…”
“ယႃႇမႆႈၸႂ်…လုၵ်ႈႁဵၼ်းႁဝ်းမိူဝ်းၸွမ်းယူႇ…ၸွႆႈမိူဝ်းလၢတ်ႈပၼ်ႁႂ်ႈၶဝ်လူင်းမႃးၽွင်ႈ…ႁဝ်းတေၸဵဝ်းမႃးယူႇၼႃႈ…”
ယိင်းသႅင်ၵေႃႈယဵၼ်ၵႂႃႇ သမ်ႉပေႃးဢမ်ႇၸၢင်ႈလၢတ်ႈသင်ယဝ်ႉ ယွၼ်ႉၶေႃႈသင်ႇ လႅင်းမိူင်းဢမ်ႇပၼ်လၢတ်ႈႁႂ်ႈလၢတ်ႈလႄႈ ၶႂ်ႈလၢတ်ႈတၢၼ်ႇႁိုဝ်ၵေႃႈ ၵႃႈလႆႈယဵၼ်ႉၸႂ်ဝႆႉၵူၺ်း။
“ဢေႃႈ… ဢိုမ်ႈ!…ႁဝ်းတေလၢတ်ႈပၼ်လႂ်…”
ၶမ်းႁွမ်ဢွၵ်ႇႁိူၼ်းမိူဝ်းၵႂႃႇလူၺ်ႈတီႈမီးတၢင်းသိူဝ်း ၸူမ်းလၢတ်ႈယုမ်ႉၶူဝ် ၼႂ်းၸႂ်ပေႃးသိူဝ်းလူင်မိူဝ်းၵႂႃႇ။
ၶမ်းႁွမ်ပွၵ်ႈဝဵင်းမႃးယဝ်ႉ ႁိုဝ်တၼ်းယူႇလၢႆ ႁုင်မိုဝ်ႉႁုင်ၵႅင်ယူႇတေႃႇၵၢင်ဝၼ်းသမ်ႉပေႃးၶမ်ႈ။ ၵၢင်ဝၼ်းလပ်းသိင်ႇယဝ်ႉၵေႃႈ ၶမ်းႁွမ်ၼင်ႈပႂ်ႉၽိူၼ်မူႇၶဝ်ႈယူႇတင်းႁိုင် ဢမ်ႇႁၼ်ၽႂ်ႁွတ်ႈမႃးသေၵေႃႉ တေႃႈၼင်ႇယိင်းသႅင်ၵူၺ်း ၸဵမ်မိူဝ်ႈပွၵ်ႈမႃးတင်းဢမ်ႇႁၼ်ငဝ်းလႃႈ။ တေသိုပ်ႇၾူၼ်းႁႃၼႆၵေႃႈ ဢမ်ႇၸၢင်ႈ ၵႃႈလႆႈၼင်ႈပႂ်ႉယူႇတိၵ်းတိၵ်းၵူၺ်း သမ်ႉဝႃႈတွင်ႉမႆႈယူႇၵေႃႈ ပႆႇၸၢင်ႈၵိၼ် ယွၼ်ႉလႆႈႁွင်ႉဝႆႉပိူၼ်ႈယဝ်ႉလူး။ ၼင်ႈပႂ်ႉယူႇ သမ်ႉပေႃးပူၼ်ႉၶၢဝ်းယၢမ်းမႃးႁိုင်ယဝ်ႉ ဢမ်ႇမီးၽႂ်မႃးၼႆလႄႈ ၶမ်းႁွမ်ၵေႃႈဝူၼ်ႉဝႃႈ ယိင်းသႅင်ဢမ်ႇတၼ်းမိူဝ်းလၢတ်ႈယူဝ်ႉၼႆသေ လမ်တိုဝ်လမ်တၼ်မိူဝ်းႁွင်ႉဢဝ်ႁင်းၵူၺ်း၊ ယၢမ်ႈၵေႃႈဢမ်ႇယၢမ်ႈၵႂႃႇ တၢင်းၵေႃႈဢမ်ႇႁူႉ ၸူးဢဝ်ပိူၼ်ႈလၢတ်ႈၵူၺ်းလႄႈ ႁွႆးတၢင်းလိူမ်ႈလိူမ်ႈၼၼ်ႉသေ ပႆၵႂႃႇတိၵ်းတိၵ်းယဝ်ႉ။
ဝၢႆးသေၶမ်းႁွမ်ၵႂႃႇၵူၺ်း ၵူၼ်းတီႈတပ်ႉၵေႃႈမႃးႁွင်ႉယိင်းသႅင်ၶိုၼ်ႈမိူဝ်းၵမ်းလဵဝ်ယဝ်ႉ။ ႁဵတ်းပၢင်ၵုမ်ၵၼ်တေႃႇၵၢင်ဝၼ်းပေႃးၶမ်ႈသေ ၸင်ႇတေဢွၼ်ၵၼ်လူင်းတပ်ႉမႃး ၵူၺ်းၵႃႈ တီႈႁိူၼ်းၼၼ်ႉၵေႃႈ ဢမ်ႇလႆႈႁၼ်ၽႂ် ႁွင်ႉႁႃၶမ်းႁွမ်ၵေႃႈဢမ်ႇလႆႈငိၼ်းသဵင် ၵႂႃႇတၢင်းလႂ်ႁင်းမၼ်းၵေႃႈဢမ်ႇႁူႉ။ ၵူၺ်းမီးၶဝ်ႈၽၵ်းဢၼ်မၼ်းႁႅၼ်းတမ်းဝႆႉယူႇၼၼ်ႉၵူၺ်း ပႂ်ႉတင်းႁိုင် ၵမ်ႈၽွင်ႈၵေႃႈတွင်ႉမႆႈယဝ်ႉၼႆလႄႈ ၶဝ်ႈၽၵ်းၵေႃႈတေၵတ်းၼႃႇယဝ်ႉၼႆသေ ဢွၼ်ၵၼ်ၵိၼ်ထႃႈယဝ်ႉ၊ ၵိၼ်ယဝ်ႉသေဢွၼ်ၵၼ်လိုဝ်ႈပႂ်ႉယူႇထႅင်ႈတင်းႁိုင်ၵေႃႈ ဢမ်ႇႁၼ်မႃးလႄႈ ၸႂ်ဢမ်ႇလီယဝ်ႉ ၼႅတ်ႈဢွၼ်ၵၼ်ဢွၵ်ႇၸွမ်းႁႃယူႇ။
ၵၢင်ၶိုၼ်းလပ်းသိင်ႇ လုၵ်ႈလိူၼ်ဢွၼ်ႇဝွႆးဝွႆးႁိူဝ်ႈလႅင်းထွင်ႇပိူင်းပၼ် ပႆလူင်ၵႂႃႇ ၵေႃႉလဵဝ်ႁင်းၵူၺ်း ၼိူဝ်သဵၼ်ႈတၢင်းၵၢင်ပႃႇထိူၼ်ႇလူင်ၼၼ်ႉယဝ်ႉ။ ယိုင်ႈၵႂႃႇယိုင်ႈၺႃးပႃႇမႆႉယႂ်ႇမႆႉလူင်တိၵ်းတိၵ်းလႄႈ ႁဵတ်းႁႂ်ႈလပ်ႉပႅတ်ႈသၢႆလႅင်းလိူၼ်သေ ၵိုင်ႉၵၢင်ႉလပ်းသိင်ႇလူင်မႃး ၾႆးထၢတ်ႈသမ်ႉမွတ်ႇထႅင်ႈ တႃၵေႃႈလၢႆးမႃး တူၺ်းၵႂႃႇတၢင်းလႂ်ၵေႃႈဢမ်ႇႁၼ်သင်သေဢိတ်းယဝ်ႉ။
သဵင်လူမ်းထူဝ်းထွင်း ဝႂ်မႆႉတူင်ႉၶွၼ်းသၼ်ႇဝႆ ၽိူဝ်မႆႉႁူင်ႈတူၵ်းလူင်း သဵင်တိၼ်ဢႅၼ်ႇလႅၼ်ႈလိုပ်ႈလမ်းၼႂ်းၵၢင်ပႃႇထိူၼ်ႇ ၽူႈယိင်းၵေႃႉၼိုင်ႈႁွပ်ႇဢုမ်ႈလုၵ်ႈဢွၼ်ႇမၼ်းသေ ပၢႆႈမူၵ်းသေႃႉယူႇတႂ်ႈႁူမ်ႈမႆႉယႂ်ႇ တူဝ်သမ်ႉပေႃးသၼ်ႇတိၼ်းတိၼ်း ၾႆးထၢတ်ႈထွင်ႇပိူင်းလႅင်းတႂ်ႈလႅင်းၼိူဝ် သဵင်လွႆးလၢတ်ႈဢွၵ်ႇႁိမ်းႁူ
“လုၵ်ႈပႂ်ႉမႄႈယူႇတီႈၼႆႈၼႃႈ..မႄႈတေမႃးႁႃ…”
မိုဝ်းပွတ်ႈလုပ်ႈၼႃႈဢွၼ်ႇယိင်းၼၼ်ႉယဝ်ႉ ၵွတ်ႇသႂ်ႇဝႆႉၼႂ်းဢွင်ႈဢူၵ်းၼၼ်ႉသေ ႁၢင်ႇယၢၼ်ၽၢတ်ႇၵႂႃႇပႅတ်ႈယဝ်ႉ။
ၸုမ်းၸၢႆးၶိူဝ်းၶဝ်ၵေႃႈ ဢွၼ်ၵၼ်ၸွမ်းႁႃပၼ်ၶမ်းႁွမ် သမ်ႉပေႃးၸွတ်ႇဝၢၼ်ႈၵေႃႈဢမ်ႇႁၼ် ဢမ်ႇႁူႉဝႃႈမၼ်းတၼ်းၵႂႃႇတၢင်းလႂ် တေဝႃႈမိူဝ်းတီႈတပ်ႉၵေႃႈသမ်ႉဢမ်ႇႁၼ်၊ မၼ်းၵႂႃႇလႂ်ၼႆၵေႃႈဢမ်ႇသင်ႇလၢတ်ႈၽႂ်ဝႆႉသေၵေႃႉၼၼ်ႉယဝ်ႉ။ ယူႇယူႇ ၸၢႆးဢွင်ႇၵေႃႈ ၶုၵ်းၸႂ်လႆႈ မိူဝ်ႈၶဝ်မႃးၼၼ်ႉသေ
“ဢမ်ႇႁၼ်ႁဝ်းလူင်းမႃးလႄႈ…ယူဝ်မၼ်းမိူဝ်းၸွမ်းၶႆႈႁဝ်းႁိုဝ်ဢမ်ႇႁူႉ…မိူဝ်ႈႁဝ်းလူင်းမႃးၼၼ်ႉ…ႁၼ်ၾႆးလႅင်းဝွႆးဝွႆး…ၵႂႃႇထႅင်ႈတၢင်းၽႄၵႂႃႇသူၼ်ၵူၼ်းဝၢၼ်ႈၶဝ်ၼၼ်ႉဢိူဝ်ႈ”
ၸၢႆးၶိူဝ်းၵေႃႈ ၼႅတ်ႈၸတ်းၵူၼ်းမၼ်းဢွၵ်ႇၵႂႃႇႁႃ ဢွၼ်ၵၼ်ႁႃတၢင်းၶိုၼ်းယူႇ ႁႃႁဵတ်းႁိုဝ်ၵေႃႈဢမ်ႇထူပ်း မိူင်းသမ်ႉပေႃးလႅင်းယဝ်ႉၵေႃႈပႆႇႁၼ် ႁိမ်းႁွမ်းၶဝ်ယူႇၼၼ်ႉ ႁႃသမ်ႉပေႃးၸွတ်ႇ ႁွင်ႉသဵင်ပေႃးပၼ်းဢူၼ်ၵႂႃႇမူတ်းၵေႃႈ ႁွႆးၵူၺ်းတင်းဢမ်ႇၺႃး၊ ဢမ်ႇႁူႉမၼ်းတေၵႂႃႇထိုင်လႂ်ၼၼ်ႉယဝ်ႉ။
ၶမ်းမိူင်းၼၼ်ႉတႄႉ မႆႈၸႂ်မႆႈၶေႃး သမ်ႉပေႃးဢမ်ႇပဵၼ်လိုဝ်ႈပဵၼ်သဝ်းလႆႈ၊ ၵွပ်ႈပိူဝ်ႈႁၢႆၵႂႃႇၵၢင်ၶိုၼ်းလႄႈ ၵူဝ်မၼ်းတေၵႂႃႇပဵၼ်သေလွင်ႈလွင်ႈၼၼ်ႉယဝ်ႉ။ မၼ်းၵေႃႈ ၵႂႃႇၸွမ်းတၢင်းၽႄဢၼ်ၵႂႃႇၼၼ်ႉယူႇတိၵ်းတိၵ်း ယိုင်ႈၵႂႃႇ တၢင်းၽႄသမ်ႉမီးၵႂႃႇထႅင်ႈ တၢင်းၵႂႃႇလႂ်ၵႂႃႇလီၵေႃႈဢမ်ႇႁူႉယဝ်ႉ။
ၶမ်းႁွမ်ၵေႃႈတိုၼ်ႇမႃးတႂ်ႈတူၼ်ႈမႆႉလူင်သေ မူၼ်ႉယုမ်းဢွၵ်ႇမႃးယဝ်ႉ ၸုၵ်းၸိူဝ်ႈမိူၼ်ႇတူၺ်းၼႂ်းထိူၼ်ႇလူင်ၼၼ်ႉ တၢင်းၵေႃႈဢမ်ႇႁၼ် တေႃႉတႄႉမီးႁွႆးတၢင်းဢၼ်မၼ်းလတ်းမႃးၼၼ်ႉလႄႈ ပွၵ်ႈၵႂႃႇၸွမ်းႁွႆးၵဝ်ႇမၼ်းယူႇ။ ၵႂႃႇၵႂႃႇသမ်ႉဢဝ်ႁွႆးတၢင်းမၼ်းႁၢႆပႅတ်ႈလႄႈ ၾူၼ်သမ်ႉတူၵ်းထႅင်ႈသေ ၼင်ႈသေႃႉယူႇတႂ်ႈႁူမ်ႈမႆႉၸိူဝ်းၼၼ်ႉယဝ်ႉ။
ပေႃးၾူၼ်တူၵ်းၼႆၵေႃႈ ၼင်ႇႁၢင်ႈမိူင်းၼႆႉသမ်ႉပေႃးလပ်းသိင်ႇလူင်မႃးတေႉၼင်ႇဝႃႈ မၼ်းၵေႃႈ ၼင်ႈမိူၼ်ႇႁႅၼ်မုင်ႈတူၺ်းတူၼ်ႈမႆႉၼၼ်ႉသေ မိူၼ်တေတွင်းႁၢင်ႈၶမ်ႈဝႃး ဢၼ်မၼ်းလႅၼ်ႈပၢႆႈၼင်ႇပဵၼ်ၾၼ်ၼၼ်ႉမႃး ႁူမ်ႈပႃးၽူႈယိင်းဢၼ်ၵွတ်ႇမၼ်းသေ ယၢၼ်ၽၢတ်ႇၵႂႃႇၼၼ်ႉလႄႈ။
“မၼ်းပဵၼ်ၾၼ်ႁႃႉ…ၸႂ်ႈၾၼ်တေႉယူႇႁႃႉ” ၶိုၼ်းၼင်ႈဝူၼ်ႉတူၺ်းလီလီယူႇ။
ၵွႆႈယူႇၾူၼ်ၵွႆႈတူၵ်းႁႅင်း ယူႇႁူမ်ႈယူႇၵေႃႈဢမ်ႇလွတ်ႈယမ်းလႄႈ မၼ်းႁႃဢဝ်ၵိင်ႇၵၢၼ်ႈမႆႉၸိူဝ်းၼၼ်ႉ ပူၵ်ႉႁူဝ်သေ လၢမ်းလိမ်းပႆလူင်ၵႂႃႇတိၵ်းတိၵ်းယဝ်ႉ ၸင်ႇၵႂႃႇသိူၵ်ႈၺႃးသႂ်ႇ ႁႆႈလဝ်ႇပိူၼ်ႈသေလႄႈ ပၢၵ်ႈယုမ်းပၢၵ်ႈယွမ်ႇၵႂႃႇၸွမ်းၶႅပ်ႇႁူဝ်ႉၸိူဝ်းၼၼ်ႉၵေႃႈ ၵႂႃႇပွင်ႇႁွႆးတၢင်းပိူၼ်ႈၵႂႃႇၵႂႃႇမႃးမႃးယဝ်ႉ။
ၵႂႃႇၸွမ်းတၢင်းတိၵ်းတိၵ်းၵေႃႈ ၶႅပ်ႇၶၢင်ႈတၢင်းၼၼ်ႉ မီးႁႆႈမီးသူၼ်ပိူၼ်ႈ ပဵၼ်သၢႆပဵၼ်တႅဝ်း ၼႂ်းၸႂ်တႄႉၸူမ်းၼႃႇယဝ်ႉ တေႁွတ်ႈဝၢၼ်ႈၵူၼ်းယဝ်ႉ။ ႁွတ်ႈထိုင်တီႈဝၢၼ်ႈမိူင်းသမ်ႉပေႃးၶမ်ႈယဝ်ႉ တီႈၼၼ်ႈၵေႃႈ သမ်ႉဢမ်ႇပႆႇၸႂ်ႈဝၢၼ်ႈၶဝ်ထႅင်ႈ ၸႂ်ႈႁိုဝ်ဢမ်ႇၸႂ်ႈ မၼ်း ဢမ်ႇၸၢင်ႈပွၵ်ႈၶိုၼ်းယဝ်ႉလႄႈ တီႈႁူဝ်တၢင်းဢၼ်မၼ်းပွင်ႇၼၼ်ႉ ၸင်ႇယွၵ်းယွၵ်းၶဝ်ႈမိူဝ်းၼႂ်းဝၢင်းႁိူၼ်းပိူၼ်ႈၵႂႃႇ ယွၼ်းႁဵတ်းၶႅၵ်ႇပိူၼ်ႈၵႂႃႇထႅင်ႈသေၶိုၼ်းၼိုင်ႈယူႇ။
ၸဝ်ႈႁိူၼ်းၵေႃႈ ပၼ်လွင်ႈၸွႆႈထႅမ်ႁူမ်ၸူမ်းႁပ်ႉတွၼ်ႈမၼ်းလီၼႃႇ။ ယၢမ်းၵၢင်ၶိုၼ်း ၸဝ်ႈႁိူၼ်းပိၵ်ႉၾႆးပႅတ်ႈယဝ်ႉလႄႈ ၼႂ်းႁိူၼ်းၵေႃႈလပ်းသိင်ႇၽိတ်း ဢၢၼ်းၼႃႇပိူၼ်ႈသေ ဢမ်ႇႁတ်းၼွၼ်းၼႆၵေႃႈ ဢမ်ႇလၢတ်ႈပိူၼ်ႈ ၼွၼ်းၵႂႃႇႁဵတ်းၼၼ်ယဝ်ႉ။
သိုပ်ႇလူဢၢၼ်ႇထႅင်ႈတွၼ်ႈတေမႃး
