ၶမ်ႈၶိုၼ်းလိူၼ်လႅင်းလႅင်း သဵင်ၵွင်သဵင်မွင်းလင်မေႃးဢူၼ် သဵင်ႁုၼ်ႉသဵင်ႁွင်ႉသႅၼ်ႇမေႃး ပၼ်းယူႇၼႂ်းဝၢၼ်ႈၼၼ်ႉ လင်ႁွတ်ႈမိူဝ်းထိုင်တီႈပၢင်သဝ်းၶဝ်ၼၼ်ႉသေ ဢဝ်ၸႂ်ၵူၼ်းသိုၵ်းၶဝ် ၸႂ်ပေႃးဢမ်ႇၼိမ်သဝ်း တိုၼ်ႇတဵၼ်ႈၶႂ်ႈလူင်းလႄႇလဵၼ်ႈပွႆးၼႃႇယဝ်ႉ ၸင်ႇၸူဝ်းၵၼ်ၵႂႃႇယွၼ်းၶႂၢင်ႉတီႈ ႁူဝ်ၼႃႈၶဝ်ၼၼ်ႉၵႂႃႇယူႇ။ လၢတ်ႈၵႂၢမ်းလီၵႂၢမ်းဝၢၼ် မိပ်ႇမိပ်ႇၼူတ်ႈၼူတ်ႈပၼ် တေၼွၼ်းပေႃးဢမ်ႇ ၸၢင်ႈယဝ်ႉ။
“ႁူဝ်ၼႃႈ…ႁဝ်းၶႃႈၶႂ်ႈယွၼ်းလႄႇပွႆးဢေႃႈ…”
“ပၼ်ႁဝ်းၵႂႃႇသေၶႃႈလႄႈ…ၼိုင်ႈပီမီးၼိုင်ႈပွၵ်ႈၵူၺ်း…”
“ၸႂ်ႈယဝ်ႉၶႃႈ…ႁဝ်းယင်းဢမ်ႇတွၼ်ႉလႆႈၺႃးၵွၼ်ႇယဝ်ႉ…ပွႆးၼႆႉ…”
“ႁဝ်းယင်းဢမ်ႇတွၼ်ႉမီးၶၢဝ်းယၢမ်းလႆႈယူႇၵတ်းၵတ်းယဵၼ်ယဵၼ်ၸိူင်ႉၼႆသေပွၵ်ႈလႃႈ…ႁိုင်ႁိုင်လႆႈတိုဝ်ႉတၢင်းၸိူင်ႉၼႆ…ပၼ်ႁဝ်းၵႂႃႇသေလႃႈ…”
လႅင်းမိူင်းၵေႃႈ ပွင်ႇၸႂ်ၼိူဝ်လုၵ်ႈၼွင်ႉမၼ်းလီယူႇ ၸွမ်းလူၺ်ႈမၼ်းၵေႃႈပဵၼ်မိူၼ်ၵၼ်လူး။
“ပေႃးၼၼ်ၵေႃႈ…ၽႄႁဵတ်းသွင်ၸုမ်း…ၸုမ်းၼိုင်ႈပႂ်ႉတပ်ႉ…ထႅင်ႈၸုမ်းၼိုင်ႈၵႂႃႇ…ပေႃးၸုမ်းၼိုင်ႈႁွတ်ႈမႃးယဝ်ႉ…ထႅင်ႈၸုမ်းၸင်ႇတေလႆႈၵႂႃႇ…ၸၢႆးၶိူဝ်းဢဝ်ပုၼ်ႈၽွၼ်းလႄႈၼႃႈ…ယဝ်ႉၵေႃႈ…ပေႃးၵႂႃႇပွႆးၵေႃႈ…ယႃႇသၢင်ႈပၼ်ႁႃၵေႃႈပေႃးယဝ်ႉ…ပေႃးမီးပၼ်ႁႃၵေႃႈ…မီးတၢမ်ႇၵူၺ်း…ၵႂႃႇလႆႈယဝ်ႉ…”
“ဢေႃႈၶႃႈ…” ၸုမ်းၶဝ်ၵေႃႈၸႅၵ်ႇၵၼ်သေ ဢွၼ်ၵၼ်ၵႂႃႇယူႇ။
ယၢမ်းၼၼ်ႉ ၸၢႆးဢွင်ႇဢၼ်ပဵၼ်ၽူႈမၢႆၶဝ်ၼၼ်ႉၵေႃႈ သုတ်ႉၶဝ်ႈၸမ်ၸမ်လႅင်းမိူင်းသေ
“ႁူဝ်ၼႃႈ…ဢမ်ႇၵႂႃႇၶႃႈႁႃႉ…သၢဝ်ၼႂ်းဝၢၼ်ႈႁၢင်ႈလီၵျႃႉၶႃႈၼေႈ…”
“မီးသၢဝ်ယူႇႁႃႉ…မႃးယူႇပေႃးမီးပဵၼ်ပီပၢႆယဝ်ႉ…ပႆႇႁၼ်သၢဝ်လီလီသေၵေႃႉလႃႈ…ပေႃးဢမ်ႇမီးလုၵ်ႈၵေႃႈမီးၽူဝ်…မီးၸဝ်ႈၵၼ်မူတ်းယဝ်ႉ…”
“မေႃသွၼ်ၶမ်းႁွမ်ၶႃႈလူး…”
“ၶဝ်ပွၵ်ႈမိူဝ်းယဝ်ႉ…”
“မေႃယႃယိင်းသႅင်ၶႃႈလူး…”
“လၢတ်ႈၸိူင်ႉၼႆၵေႃႈ…မေႃယႃၸၢႆးၶိူဝ်းႁဝ်းလူး…”
“လူင်းၵႂႃႇၸဵမ်မိူဝ်ႈၸဝ်ႉဢမ်ႇပႆႇမႃးၶိုၼ်းလႃႈ…”
“ၽူႈမၢႆလူး…ၺႃးၸုပ်ႈၼိုင်ႈဢမ်ႇၸႂ်ႈႁိုဝ်…ဢမ်ႇၵႂႃႇယဝ်ႉႁႃႉ…ၸိုင်ဝႃႈသၢဝ်ၼမ်ၼႃႇၼႆ…”
“ၵူဝ်ၺႃးမႄႈႁိူၼ်းၸိူင်ႉဝႃႈ…” ယၢမ်းၼၼ်ႉ ၸၢႆးဢွင်ႇၵေႃႈမႄးၼင်ႈလီလီသေ
“ႁူဝ်ၼႃႈဝႃႈ…ႁႃးၼႆႉတေဢမ်ႇလႆႈမေးယဝ်ႉယူဝ်ႉၼႆႉ…”
“လႆႈယူႇၵႂႃႈ…ဢမ်ႇမီးသၢဝ်ၵေႃႈ…မႄႈႁၢင်ႉၵေႃႈလႆႈယူႇလူး…”
“ဢၼ်ယၢပ်ႇၼႆႉ..ႁဝ်းၶႂ်ႈလႆႈပိူၼ်ႈပိူၼ်ႈဢမ်ႇၶႂ်ႈလႆႈႁဝ်းၼၼ်ႉၶႃႈၼေႈ…”
လႅင်းမိူင်းၵေႃႈထူၺ်ႈၸႂ်လူင်ၵႂႃႇ ၼင်ႈလူင်းၸွမ်းသေ
“ယႃႇဝႃႈၽူႈမၢႆလႃႈ…တေႃႈၼင်ႇႁႃးယင်းတိုၵ်ႉဝူၼ်ႉယၢပ်ႇယူႇ…”
“မေႃသွၼ်ၶမ်းႁွမ်လႃႇ…ဢဝ်ၵႂႃႇဝႆႉလႂ်ယဝ်ႉ…”
“မီးၼႂ်းၸႂ်…”
ၸၢႆးဢွင်ႇၵေႃႈ ထူၺ်ႈၸႂ်လူင်ၵႂႃႇၵမ်းၼိုင်ႈသေ
“ၽူႈယိင်းၸိူင်ႉၼင်ႇမေႃသွၼ်ၶမ်းႁွမ်ၼႆႉ…ႁႃယၢပ်ႇၼႃႇ…ပဵၼ်သင်လႄႈဢမ်ႇမီးပၼ်ႁႃးသေၵေႃႉၼိုင်ႈၼေႃ…လိူဝ်သေႁၢင်ႈလီယဝ်ႉ…ၼမ်ႉၸႂ်လီထႅင်ႈ…သမ်ႉပၢႆပဵၼ်ၵူၼ်းမီးတၢင်းႁူႉ…မေႃၸွႆႈထႅမ်ပိူၼ်ႈ…မေႃလၢတ်ႈမေႃၸႃ…မေႃၶဝ်ႈဢွၵ်ႇပိူၼ်ႈ…ဢၼ်လွင်ႈယႂ်ႇၼႆႉ…မီးလွင်ႈယဵၼ်ႉၵၼ်ႈတေႉၼၼ်ႉယဝ်ႉ…တေႃႈၼင်ႇႁဵၼ်းသုတ်းၸၼ်ႉၸွမ်ယဝ်ႉ…မီးၵၢၼ်မီးငၢၼ်းပႂ်ႉမၼ်းယူႇ…ယင်းၶၢမ်ႇယၢပ်ႇသေမႃးႁဵတ်းၵၢၼ်ယူႇတီႈၼႂ်းဝၢၼ်ႈၼွၵ်ႈဢွၼ်ႇၸိူင်ႉၼႆၼၼ်ႉ…ပေႃးပဵၼ်ၵူၼ်းဝဵင်းတၢင်ႇၵေႃႉတႄႉ…ပၢႆႈမိူဝ်းၶိုၼ်းၸဵမ်မိူဝ်ႈတႄႇမႃးပုၼ်ႉယဝ်ႉ…ယုၵ်ႉယွင်ႈၼမ်ႉၸႂ်ၶဝ်တႄႉၼၼ်ႉယဝ်ႉ…လိူဝ်သေမီးလွင်ႈယဵၼ်ႉၵၼ်ႈ…ပဵၼ်မေႃသွၼ်ဢၼ်လီၼပ်ႉယမ်ၵေႃႉၼိုင်ႈၼၼ်ႉယဝ်ႉ…ၶဝ်မေႃသွၼ်ပၼ်လုၵ်ႈဢွၼ်ႇ…တွၼ်ႈတႃႇတေလီၼၼ်ႉ…ၶဝ်ၶတ်းၸႂ်ႁဵတ်းပၼ်ၵူႈလွင်ႈၸွမ်းၼင်ႇၶဝ်တေႁဵတ်းပၼ်ၼၼ်ႉယဝ်ႉ…ၶဝ်ဢမ်ႇတွၼ်ႉပွင်ႉၶၢင်းဝႃႈမၼ်းႁိူဝ်ႉသေပွၵ်ႈ…ၶဝ်ပဵၼ်ၵူၼ်းမေႃသႂ်ႇၸႂ်လႄႈ…လုမ်းလႃးပၼ်လုၵ်ႈႁဵၼ်းယူႇတႃႇသေႇ…ၶဝ်ပဵၼ်မေႃသွၼ်လီယဝ်ႉဢမ်ႇၵႃး…တွၼ်ႈတႃႇတူဝ်ၶဝ်ၵေႃႈ…မီးလွင်ႈႁတ်းႁၢၼ်…ၵႅတ်ႇၶႄတူဝ်လႆႈ…ဢမ်ႇႁဵတ်းႁႂ်ႈပိူၼ်ႈလႆႈမႆႈၸႂ်ၸွမ်းၶဝ်…ဢမ်ႇမီးၽႂ်ၸၢင်ႈပေႉၵိၼ်ၶဝ်လႆႈ…ၶဝ်ပဵၼ်ၽူႈယိင်းဢၼ်မီးတဵမ်ထူၼ်ႈၵူႈလွင်ႈ…ဢမ်ႇဝႃႈလွင်ႈယဵၼ်ႇငႄႈဢူၼ်ႈဢွၼ်ႇ…ႁူမ်ႈပႃးလွင်ႈၵႅၼ်ႇၶႅင်ၼၼ်ႉယဝ်ႉ…သင်ယိင်းတႆးၼႂ်းမိူင်းႁဝ်းၼႆႉ…မီးသေၶိုင်ႈၼိုင်ႈၼႂ်းတူဝ်ၶမ်းႁွမ်ၼႆႉတေလီတၢၼ်ႇႁိုဝ်ၼေႃ…
ၵူၺ်းၵႃႈ…ၸွမ်းၼင်ႇၶႃႈႁၼ်…ၼႂ်းမိူင်းႁဝ်းၵမ်ႈၼမ်ၼႆႉ…မိူဝ်ႈတိုၵ်ႉပဵၼ်လုၵ်ႈဢွၼ်ႇယူႇၼၼ်ႉ…ပွႆႇၶိုၼ်ႈႁူင်းႁဵၼ်းယူႇ…ၶိုၼ်ႈမႃးမေႃတၢၼ်ႇတၢၼ်ႇ…ၵေႃႉယႂ်ႇပေႉႁဵတ်းၵၢၼ်ယဝ်ႉၼၼ်ႉၵေႃႈ…ပေႃႈမႄႈၵေႃႈဢဝ်ၵႂႃႇႁဵတ်းၵၢၼ်ယဝ်ႉ…လုၵ်ႈဢွၼ်ႇၵေႃႈ…ဢမ်ႇၶႂ်ႈၶိုၼ်ႈႁူင်းႁဵၼ်းယဝ်ႉ…မိူဝ်ႈၽွင်းဢႃႇယုတိုၵ်ႉၶိုၼ်ႈ…တိုၵ်ႉႁႃၶႂ်ႈပဵၼ်သၢဝ်သိၵ်ႉႁိၵ်ႉမႃး…ၸႂ်ၵေႃႈပိဝ်မႃး…ၵၢၼ်ႁဵၼ်းဢမ်ႇၸပ်းတူဝ်…ၶႂ်ႈလႆႈၽူဝ်လႆႈမေးမႃးသေ…ဢွၵ်ႇႁူင်းႁဵၼ်းတေႇၼႃႈႁိူၼ်းၵႂႃႇပႅတ်ႈ…ဢမ်ႇပႆႇႁူႉၽိတ်းႁူႉထုၵ်ႇ…ႁူႉၶႂ်ႈလႆႈၵူၺ်း…ဢႃႇယုပႆႇယႂ်ႇ…ၸႂ်ယင်းပႆႇၼိမ်…ယူႇၵၼ်ဢမ်ႇႁိုင်…ၽိတ်းၽႅၵ်ႇၵၼ်မႃး…လွင်ႈယဵၼ်ႉၵၼ်ႈတေႃႇၵၼ်ၵေႃႈဢမ်ႇမီး…ဢမ်ႇၶႂ်ႈယွမ်းမႃႇၼႃႉတေႃႇၵၼ်…ဢမ်ႇတၼ်းႁိုင်သင်ၵေႃႈ…ပႅတ်ႈၵၼ်ၵႂႃႇ…ဢွၼ်ၵၼ်ပဵၼ်ပေႃႈႁၢင်ႉ…မႄႈႁၢင်ႉၸဵမ်မိူဝ်ႈဢႃႇယုတိုၵ်ႉလဵၵ်ႉ…တေၶိုၼ်ႈႁဵၼ်းၶိုၼ်းၵေႃႈ…ဢႃႇယုဢၼ်ပူၼ်ႉမႃးၼၼ်ႉပေႃးတူၵ်းလိုၼ်းယဝ်ႉ…
မၢင်ၼႃႈႁိူၼ်း…ၵူၼ်းၼႂ်းၼႃႈႁိူၼ်းၵေႃႈၶၢတ်ႇငိုၼ်းလႄႈ…ႁဵတ်းၵၢၼ်မိူင်းႁဝ်းႁႃငိုၼ်းယၢပ်ႇ…ၼႆၵေႃႈ…ႁၼ်ပိူၼ်ႈၵႂႃႇႁဵတ်းၵၢၼ်ၼွၵ်ႈမိူင်းလႆႈငိုၼ်းၼမ်ၼႆသေ…ၸိူဝ်းပဵၼ်ပေႃႈမႄႈၵေႃႈ…ၼင်ႇႁိုဝ်တေမီးငိုၼ်းႁႃလဵင်ႉသူင်ႇမႃးပၼ်လႆႈၼၼ်ႉၵေႃႈ…လႆႈသူင်ႇလုၵ်ႈၶဝ်ၵႂႃႇ…မၢင်ၵေႃႉတူၵ်းလိၵ်ႈ…ဢမ်ႇမီးငိုၼ်းၵႃႈႁဵၼ်းၵေႃႈ…လႆႈၵႂႃႇႁဵတ်းၵၢၼ်ပႅတ်ႈၸိူဝ်းၼႆႉမီးတင်းၼမ်…မၢင်ၸိူဝ်းသမ်ႉ…ၵႂႃႇယဝ်ႉလႆႈလီလႆႈပဵၼ်ၵေႃႈလိုမ်းႁိူၼ်းလိုမ်းယေး…မၢင်ၸိူဝ်းသမ်ႉ…ဢဝ်ၽူဝ်မီးႁိူၼ်းမီးယေးယဝ်ႉၵေႃႈ…လိုမ်းတၢင်းၼွင်ႈတၢင်းလင်…ဢမ်ႇၶိုၼ်းပွၵ်ႈမိူဝ်းၸႂ်းမႄႈသွင်ထဝ်ႈၶိုၼ်းၵေႃႈမီး…မၢင်ၸိူဝ်းသမ်ႉ…ၵႂႃႇႁႃၽူဝ်ယဝ်ႉမီးလုၵ်ႈမီးလၢင်း…တႅၼ်းတေၸွႆႈထႅမ်သမ်ႉပၢႆဢဝ်လုၵ်ႈဢွၼ်ႇမိူဝ်းပၼ်ပေႃႈမႄႈလဵင်ႉပၼ်ထႅင်ႈ…ပၼ်တၢင်းမႆႈပေႃႈမႄႈၶိုၼ်းထႅင်ႈ…ပေႃးပဵၼ်ၵူၼ်းမီးပၺ်ႇၺႃႇၵေႃႈ…မႃႇၼယႂ်ႇ…ပေႃးႁၢင်ႈလီသမ်ႉၵႂႃႇႁႃသထေးတိၵ်းတိၵ်း…ပေႃးပဵၼ်ၽူႈယိင်းလီ…ပိူၼ်ႈသမ်ႉၵျိူၵ်ႈၵႂႃႇယဝ်ႉလူး…ႁႃးသမ်ႉတေလႆႈၵႂႃႇဢဝ်ၵူၼ်းၸိူင်ႉႁိုဝ်ယဝ်ႉလႃႇ…”
“လီမွင်ၸႂ်တေႉၼၼ်ႉယဝ်ႉ…”
“ၸၢတ်ႈပၢၼ်ၶႃႈၸွင်ႇၸႂ်ႈ…”
“ၸၢတ်ႈပၢၼ်ယိင်းတႆးႁဝ်းဢိူဝ်ႈ…ႁႃးဝူၼ်ႉဝႃႈဢၼ်ပဵၼ်ယူႇၼႆႉၵေႃႈ…ဢမ်ႇၸႂ်ႈဝႃႈပိူၼ်ႈၶႂ်ႈပဵၼ်ၼႃႇလူး…ယူႇတီႈတူင်ႇဝူင်းႁိမ်းႁွမ်းမၼ်းမိပ်ႇငႅၼ်းလႄႈပဵၼ်မႃးၼၼ်ႉယဝ်ႉ…သင်မိူင်းႁဝ်းၶိုၼ်ႈယႂ်ႇတေမီးၽႂ်လႃႇၶႂ်ႈၵႂႃႇႁဵတ်းၵၢၼ်မိူင်းပိူၼ်ႈ…သင်ပၢႆးပၺ်ႇၺႃႇၶိုၼ်ႈယႂ်ႇ…ပေႃႈမႄႈႁူႉမေႃႈလိၵ်ႈလၢႆး…မေႃသင်ႇသွၼ်လုၵ်ႈလၢင်း…မေႃပူၵ်းပွင်ပၼ်လုၵ်ႈလၢင်း…ပၼ်ႁႅင်းလုၵ်ႈဢွၼ်ႇ…ပၼ်ႁႅင်းပၢႆးပၺ်ႇၺႃႇ…သင်လုၵ်ႈဢွၼ်ႇႁူႉၵႃႈၶၼ်ပၢႆးပၺ်ႇၺႃႇ…သင်ပေႃႈမႄႈပၼ်ႁႅင်း…သင်ပေႃႈမႄႈသင်ႇသွၼ်ပၼ်…သင်ပေႃႈမႄႈသႂ်ႇၸႂ်ၼိူဝ်လုၵ်ႈလၢင်း…ဝႆႉၵၢၼ်ႁဵၼ်းလုၵ်ႈဢွၼ်ႇလမ်ႇလွင်ႈ…လုၵ်ႈဢွၼ်ႇၵေႃႈႁူႉၵႃႈတေႁဵၼ်းႁူႉၵႂႃႇလႆႈယူႇယဝ်ႉ…သင်ပူၵ်းပွင်ပၢႆးပၺ်ႇၺႃႇပၼ်လႆႈလီ…မီးမေႃသွၼ်ဢၼ်သွၼ်လီ…ပူၵ်းပွင်ပၼ်လုၵ်ႈႁဵၼ်းလႆႈလီတဵမ်ထူၼ်ႈ…သႂ်ႇၸႂ်ၼိူဝ်ၵၢၼ်သွၼ်လုၵ်ႈႁဵၼ်း…တႃႇလုၵ်ႈႁဵၼ်းတေဢမ်ႇသူၼ်ၸႂ်ၼၼ်ႉ…မၼ်းၵေႃႈမီးၵမ်ႈဢေႇၵူၺ်းလေႃႇ…သင်သွၼ်ပၼ်ႁႂ်ႈမေႃႁဵၼ်းႁူႉ…ႁူႉၽိတ်းႁူႉထုၵ်ႇ…တႃႇတေႁဵတ်းဢၼ်ဢမ်ႇလီၼၼ်ႉ…ႁူႉၵႃႈတေမေႃငိုင်ႉဝႄႈၼၼ်ႉယဝ်ႉ…သင်လုၵ်ႈလၢင်းမီးတၢင်းႁူႉ…တႃႇတေပွႆႇၽႃႈပေႃႈမႄႈၼၼ်ႉတိုၼ်းဢမ်ႇမီး…သင်သွၼ်ပၼ်ၶဝ်ႁႂ်ႈမေႃႁႃငိုၼ်း…ႁႂ်ႈမေႃႁႃလဵင်ႉပေႃႈမႄႈၵူၺ်းၵေႃႈ…တႃႇတေလုမ်းလႃးပေႃႈမႄႈမိူဝ်ႈထဝ်ႈၼၼ်ႉတေဢမ်ႇမီးယဝ်ႉ…သင်ၵူၼ်းသႅၼ်းႁုၼ်ႈမႂ်ႇမီးတၢင်းႁူႉတၢင်းမေႃၼမ်ၼမ်…တႃႇတေဢမ်ႇမႃးပူၵ်းပွင်ၸွႆႈၶိုၼ်းမိူင်းႁဝ်းၼၼ်ႉတိုၼ်းဢမ်ႇမီး…သင်ၵူၼ်းၼႂ်းမိူင်းႁဝ်းဢမ်ႇပႆႇတဵမ်ထူၼ်ႈ…တႃႇတေၸွႆႈၸိူဝ်ႉၸၢတ်ႈႁဝ်းၼၼ်ႉ…မၼ်းဢမ်ႇပႆႇပဵင်းပေႃး…တႃႇမိူင်းႁဝ်းတေၶိုၼ်ႈယႂ်ႇ…ၵူၼ်းၼႂ်းမိူင်းႁဝ်းၵေႃႉတေလႆႈပူၵ်းပွင်ၶိုၼ်းၼၼ်ႉယဝ်ႉ…”
“ၵူၺ်းၵႃႈ…တႃႇၶိုၼ်ႈႁူင်းႁဵၼ်းၼၼ်ႉ…လႆႈသဵင်ႈငိုၼ်းၼမ်ၼႃႇၶႃႈလူး…ပေႃႈမႄႈမၢင်ၸိူဝ်းၵေႃႈယင်းဢမ်ႇၸၢင်ႈသူင်ႇလုၵ်ႈဢွၼ်ႇၶိုၼ်ႈႁဵၼ်းလႆႈ…တေႃႈၼင်ႇၼႃႈႁိူၼ်းၵူၺ်းၵေႃႈယင်းဢမ်ႇတဵမ်ထူၼ်ႈ…ဢၼ်ၶိုၼ်ႈလႆႈၵေႃႈ…ၵူၼ်းမီးငိုၼ်းၼၼ်ႉၵူၺ်း…”
“တေၵႂႃႇၶိုၼ်ႈႁဵတ်းသင်လႃႇႁူင်းႁဵၼ်းဢၼ်ႁဝ်းၸၢႆႇၵႃႈမၼ်းဢမ်ႇပေႉ…ႁူင်းႁဵၼ်းလီဢမ်ႇလီၼၼ်ႉ…ဢမ်ႇလႆႈယူႇတီႈၵႃႈၶၼ်မၼ်းလေႃႇ…သဵင်ႈငိုၼ်းယဝ်ႉလုၵ်ႈႁဵၼ်းၸင်ႇၵတ်ႉၶႅၼ်ႇဢမ်ႇၸႂ်ႈလူး…ႁူင်းႁဵၼ်းဢၼ်သွၼ်ပၼ်လၢႆလၢႆ…ဢမ်ႇဢဝ်ၵႃႈမၼ်းၼၼ်ႉၵေႃႈမီးယူႇ…မၼ်းၵေႃႈသွၼ်ပၼ်ႁႂ်ႈလုၵ်ႈႁဵၼ်းလီလႆႈမိူၼ်ၵၼ်ၼၼ်ႉယဝ်ႉ…သင်ၸိူဝ်ႉဝႃႈပၼ်ႁႅင်းပၢႆးပၺ်ႇၺႃႇယူႇၼႆ…ၶႂ်ႈႁႂ်ႈၸၢတ်ႈပၢၼ်လုၵ်ႈဢွၼ်ႇလႆႈလီၵေႃႈ…ပၼ်ၶိုၼ်ႈႁူင်းႁဵၼ်းလႄႈ…ဢမ်ႇမီးငိုၼ်းၵေႃႈ…ႁႃလႄႈႁူင်းႁဵၼ်းဢၼ်ဢမ်ႇလႆႈသဵင်ႈငိုၼ်း…တွၼ်ႈတႃႇပၢႆးပၺ်ႇၺႃႇတေလီၼၼ်ႉ…ပေႃႈမႄႈၵေႃႈလူဝ်ႇပၼ်ႁႅင်းယဝ်ႉ…”
လႅင်းမိူင်းၶႃၵေႃႈ ဢုပ်ႇၵုမ်ၵၼ်ယူႇတင်းႁိုင် ဢမ်ႇတၼ်းႁူႉဝႃႈပွႆးပေႃးဝၢႆး ၵူၼ်းလႄႇပွႆးသမ်ႉ ပေႃးမႃးၸေးၵၼ်ၶိုၼ်းယဝ်ႉ။
သိုပ်ႇလူတွၼ်ႈတေမႃးၶႃႈ