ၵၢင်ၶိုၼ်းလပ်းသိင်ႇမိုတ်းတၼ် သဵင်ၽူၼ်ယွႆးယွႆး သဵင်လူတ်ႉလူင်မေႃးမႃးၵိုတ်းယူႇတီႈၼႃႈႁိူၼ်း ယၢမ်းၼၼ်ႉ ၶမ်းႁွမ်ၵေႃႈတိုၵ်ႉႁဵတ်းၵၢၼ်ယူႇလႄႈ လႆႈငိၼ်းသဵင်တွႆႇၽၵ်းတူသေ ၸင်ႇလုၵ်ႉၵႂႃႇတူၺ်း လႆႈႁၼ်လႅင်းမိူင်း ႁွပ်ႇဢုမ်ႈတင်းၼေႃႇမိူင်းလူင်မႃး ၼုင်ႈၶူဝ်းသိုၵ်းတဵမ်တူဝ်ပႃးၵွင်ႈသေမီးၸဵမ်လုၵ်ႈၼွင်ႉ ႁူမ်ႈပႃးၵႃးလူင်ဝႆႉလႄႈ မိူၼ်တေၵႂႃႇလႂ်သေတီႈတီႈၼၼ်ႉယဝ်ႉ။ ၶမ်းႁွမ်ႁၼ်ယူႇသေတႃႉ ႁဵတ်းမိူၼ်ဝႃႈဢမ်ႇႁၼ်သေ ဢမ်ႇလၢတ်ႈသင်ၸွမ်းယဝ်ႉ ႁွပ်ႇဢုမ်ႈဢဝ်ၼေႃႇမိူင်းၵႂႃႇၼွၼ်း ယဝ်ႉၵေႃႈလႅင်းမိူင်းဢွၵ်ႇၵႂႃႇပႅတ်ႈယူႇ။
မိူဝ်ႈၼႆႉဝၼ်းလိုဝ်ႈသေတႃႉ ၶမ်းႁွမ်တႄႉတေဢမ်ႇတၼ်းၼႆလႄႈ ဢဝ်ၼေႃႇမိူင်းပၼ်ဝႆႉတီႈယိင်းသႅင်ယဝ်ႉ။
“သႅင်! မိူဝ်ႈၼႆႉႁဝ်းတေမိူဝ်းဝဵင်း…ၽၢၵ်ႇတူၺ်းပၼ်ၼေႃႇမိူင်းၽွင်ႈ…”
“သူတေမိူဝ်းႁဵတ်းသင်လႃႇ… ”
“မိူဝ်းႁဵတ်းပၢင်ၵုမ်တီႈဝဵင်း…”
“လႆႈယူႇ…ယႃႇၼၢၼ်းမႃးၼႃႈ…”
“ဢိုမ်ႈ…ပေႃးယဝ်ႉၵေႃႈ..ႁဝ်းတေမႃးၵမ်းလဵဝ်ယဝ်ႈ…ၽၢၵ်ႇဝႆႉယဝ်ႉၼႃႈ…”
ၶမ်းႁွမ်ၶတ်းၸႂ်မိူဝ်းၸဵမ်ၸဝ်ႉယူႇ ယွၼ်ႉၽူၼ်ယွႆးပေႃးသုတ်းတၢင်းလႄႈ ႁဵတ်းႁႂ်ႈတၢင်းမိုၼ်ႈၵႂႃႇယၢပ်ႇၼၼ်ႉယဝ်ႉ။ ၶၢဝ်းတၢင်းၵေႃႈသမ်ႉၵႆသေ ႁွတ်ႈၵႂႃႇသမ်ႉပေႃးတူၵ်းလိုၼ်းပိူၼ်ႈယဝ်ႉ။
“ယွမ်းၼွမ်းယူႇၶႃႈ…ဢၼ်လႆႈမႃးတူၵ်းလိုၼ်း…”
“ႁွတ်ႈမႃးလႆႈၵေႃႈလီလိူဝ်သေဢမ်ႇႁွတ်ႈမႃး…” ပၢင်ၵုမ်ၶဝ်ၵေႃႈမႄးသိုပ်ႇၵႂႃႇယူႇယဝ်ႉ။
ထိုင် 6:00 မူင်းယဝ်ႉ ပၢင်ၵုမ်ၸင်ႇတေယဝ်ႉလႆႈ ဝၢႆးသေပၢင်ၵုမ်ယဝ်ႉ ၶမ်းႁွမ်ၼႅတ်ႈဢွၵ်ႇမိူဝ်းၵမ်းလဵဝ် ပိူၼ်ႈႁႂ်ႈၵိၼ်ၶဝ်ႈႁူမ်ႈၵၼ်ၸင်ႇမိူဝ်းၵေႃႈဢမ်ႇတၼ်းယဝ်ႉ ၵူဝ်မိူင်းတေလပ်းသိင်ႇပႅတ်ႈလႄႈ ႁိပ်ႈႁိပ်ႈၼႅတ်ႈၼႅတ်ႈလူင်မိူဝ်းၵႂႃႇ။
သမ်ႉဝႃႈၶႂ်ႈမိူဝ်းဝႆးယူႇသေတႃႉ ၽူၼ်တူၵ်းတၢင်းသမ်ႉမိုၼ်ႈသေ လႆႈၾၢင်ႉတူဝ်တႄႉတႄႉဝႃႈဝႃႈယဝ်ႉ၊ ႁူႉယူႇဝႃႈၵၢင်ဝၼ်းၶမ်ႈလပ်းသိင်ႇမႃးတိၵ်းတိၵ်းၼႆၵေႃႈ တေၸၢင်ႈႁဵတ်းႁိုဝ်လႃႇ ႁေႃႈဝႆးၼႃႇၵေႃႈတေလူမ်ႉၵူၺ်း ဢမ်ႇၸၢင်ႈႁဵတ်းႁႂ်ႈၵႂႃႇလႆႈၵႆလူး ယဵၼ်ႉၸႂ်သေႁေႃႈမိူဝ်းၵႂႃႇလွႆးလွႆးယဝ်ႉ။
ၾႆးလူတ်ႉဝွႆးဝွႆး လတ်းၶဝ်ႈၵႂႃႇၼိူဝ်သဵၼ်ႈတၢင်းပႃႇမႆႉဢုမ်ႇသုမ်ႇတၼ်ဝႆႉ သမ်ႉပေႃးၵတ်းငႅၼ်းငႅၼ်း တင်းသဵင်ၽူၼ်ယွႆး မွၵ်ႇၵုမ်ႈသုမ်ႇတၼ် ငဝ်းသင်ၵေႃႈဢမ်ႇႁၼ် သမ်ႉပေႃးလပ်းသိင်ႇၵႂႃႇမူတ်း ၵိုတ်းၾႆးလူတ်ႉၼၼ်ႉၵူၺ်းပိူင်းထွင်ႇပၼ်၊ ယၢမ်းၼၼ် သဵင်ၸၢၵ်ႈလူတ်ႉၵေႃႈယဵၼ်ၵႂႃႇ ၶမ်းႁွမ်ၵေႃႈပွႆႇလူတ်ႉပႅတ်ႈယဝ်ႉ တူဝ်ၵေႃႈပေႃးဢူၼ်ႈၵႂႃႇမူတ်း သမ်ႉပေႃးဢမ်ႇမီးႁႅင်းတႃႇတေၵႂႃႇလႆႈထႅင်ႈယဝ်ႉ။
မိူဝ်ႈၵူႈလွင်ႈၵိုတ်းၵႂႃႇ သဵင်ၽူၼ်ၵေႃႈလင်မႃး လႆႈငိၼ်းသဵင်ႁႆႈ မေႃးပၼ်းပေႃးတဵမ်ႁူၺ်ႈတဵမ်လွႆ မိူၼ်မီးသဵင်ၵွင်ႈလင်မေႃးၶဝ်ႈမႃးၼႂ်းႁူလႄႈ ႁဵတ်းႁႂ်ႈၶမ်းႁွမ်ၼင်ႈငွမ်ဝႆႉဢမ်ႇၸၢင်ႈတူင်ႉတူဝ်လႆႈယဝ်ႉ။ မိုဝ်းသွင်ၶွၼ်ဢွၼ်ႇမၼ်းပိၵ်ႉႁူဝႆႉတင်းသွင်ၽၢႆႇ တူဝ်ၼင်ႈငွမ်ဝႆႉသမ်ႉပေႃးသၼ်ႇ သဵင်ယဵၼ်ဝႆႉဢမ်ႇႁတ်းလၢတ်ႈသင် ၽူၼ်တူၵ်းယူႇၵေႃႈ မိူၼ်ဢမ်ႇႁူႉတူဝ်ယဝ်ႉ ၵတ်းႁိုဝ်လၢင်ႈႁိုဝ် ၵေႃႈဢမ်ႇႁူႉၼိူဝ်ႉယဝ်ႉ။
ၼင်ႈပႂ်ႉယူႇတင်းႁိုင် သမ်ႉပေႃးထိုင်တဵင်ႈၶိုၼ်းယဝ်ႉ ၸင်ႇမီးၵႃးလူင်လတ်းမႃးသေ ၾႆးၵႃးထွင်ႇလႅင်း ႁၼ်လူတ်ႉၶိူင်ႈမီးယူႇတီႈၵၢင်တၢင်းလႄႈ ၵႃးၼၼ်ႉၵေႃႈၶဝ်ႈၸူးၸမ်ၸမ်ယဝ်ႉ ႁၼ်ၽူႈယိင်းၼင်ႈငွမ်ယူႇ ၵူၼ်းယူႇတၢင်းလင်ႁၼ်ထၢင်ႇဝႃႈပဵၼ်ၽီသေ ဢမ်ႇမီးၽႂ်ႁတ်းလူင်း သမ်ႉဝႃႈသဵင်ႁွၼ်းၵႃးလင်မေႃးယူႇလၢႆၵမ်းၵေႃႈ ဢမ်ႇႁၼ်ၵူၼ်းၵေႃႉၼၼ်ႉတူင်ႉလႄႈ။ တေၶၢမ်ႈပူၼ်ႉၵႂႃႇသမ်ႉ လူတ်ႉၵိုတ်းၶမ်တၢင်းဝႆႉ ဢမ်ႇၸၢင်ႈၵႂႃႇ ႁႂ်ႈၽႂ်လူင်းဢဝ်ၶၢႆႉၵေႃႈ ဢမ်ႇမီးၽႂ်တူင်ႉသေၵေႃႉ။
လႅင်းမိူင်းၸင်ႇလူင်းယဝ်ႉ မိူဝ်ႈယၢမ်းၶဝ်ႈၵႂႃႇၸူးၸမ်ၸမ်ၼၼ်ႉ တူၺ်းႁၢင်ႈမၼ်းၶႂ်ႈငၢႆးၶမ်းႁွမ်ဝႆႉလႄႈ ဢမ်ႇပေႃးၶႆႈယုမ်ႇသေ ၵႂႃႇတိူဝ်ႉတူၺ်း ၶမ်းႁွမ်တူၵ်းၸႂ်ယဝ်ႉ တင်းၵူဝ်တင်းသၼ်ႇ သုတ်ႉထွႆႁၢင်ႇၵႂႃႇတၢင်းလင်တိၵ်းတိၵ်း။
“ၶမ်းႁွမ်!!…ဢမ်ႇၸႂ်ႈႁိုဝ်လႃႇ”
မိူဝ်ႈလႆႈငိၼ်းၸိုဝ်ႈယဝ်ႉၼၼ်ႉ ၶမ်းမိူင်းၵေႃႈၼႅတ်ႈလူင်းၵႃးမႃးၵမ်းလဵဝ်
“ႁူဝ်ၼႃႈလႄႈၵူႈၵေႃႉ!!…ၸွႆႈဢိတ်းၼိုင်ႈ…ထွင်ႇၾႆးပၼ်ၶႃႈၽွင်ႈ…”
ၼႅတ်ႈၶဝ်ႇၶဝ်ႇၶွၼ်းၶွၼ်းပၼ်ၶမ်းႁွမ် တူဝ်သမ်ႉပေႃးတူင်ႉသၢၼ်ႈၵႂႃႇမူတ်း ႁူႉတူဝ်မႃးဢိတ်ႉၼိုင်ႈယဝ်ႉၵေႃႈ ပွႆႇတူဝ်မၼ်းလူမ်ႉလူင်းၵႂႃႇယဝ်ႉ၊ လႅင်းမိူင်းၸင်ႇႁွပ်ႇဢုမ်ႈၶိုၼ်ႈၵႃးၵႂႃႇၵမ်းလဵဝ်။ တူဝ်ၶမ်းႁွမ်ယမ်းမူတ်းယဝ်ႉလႄႈ တေထွတ်ႇပႅတ်ႈသိူဝ်ႈသမ်ႉပဵၼ်ၽူႈယိင်း ၸၢင်ႈႁဵတ်းႁိုဝ် ထွတ်ႇဢဝ်သိူဝ်ႈသိုၵ်းမၼ်းႁူမ်ႇပၼ်ၵႂႃႇ ဢဝ်ႁူဝ်မႃႇ မၼ်းႁဵတ်းပဵၼ်မွၼ်ႁူဝ်ပၼ်ယဝ်ႉ။
မိူဝ်းႁွတ်ႈႁိူၼ်းယဝ်ႉ တႅၵ်ႈတူၺ်းလူမ်းၼၢဝ် ၶႂ်ႈၶိုၼ်ႈသုင်ႁႅင်းဝႆႉလႄႈ လႅင်းမိူင်းၶႃၶမ်းမိူင်းတႄႉမႆႈၸႂ်သမ်ႉပေႃးဢမ်ႇပဵၼ်သဝ်းလႆႈယဝ်ႉ။
လႅင်းမိူင်းတူၺ်းမိူၼ် ၶမ်းမိူင်းလႅပ်ႈႁူႉလွင်ႈၶမ်းႁွမ်ဝႆႉသေ
“ၵူႈပွၵ်ႈၶဝ်ယၢမ်ႈပဵၼ်ၸိူင်ႉၼႆႁႃႉ… ”
“ဢမ်ႇယၢမ်ႈၶႃႈ… ”
“ၵူၺ်းၵႃႈ…မိူဝ်ႈၵႆႈၼၼ်ႉ…”
“ပီႈၶႃႈပဵၼ်ၵူၼ်းၵူဝ်လွင်ႈလပ်းသိင်ႇဢေႃႈ…ပေႃးယူႇၼႂ်းလပ်းသိင်ႇမၼ်းတေၵူဝ်ထိုင်တီႈဢမ်ႇႁူႉတူဝ်ၸိူင်ႉၼၼ်ယဝ်ႉ..ပေႃးမၼ်းႁၼ်ၾႆးၵေႃႈတေလီမႃးၶိုၼ်းႁင်းမၼ်း..ၵူၺ်းၵႃႈပွၵ်ႈၼႆႉ…ပဵၼ်သင်ၵေႃႈဢမ်ႇႁူႉ..တေႃႈၼင်ႇထွင်ႇၾႆးပၼ်ပေႃးတၢၼ်ႇၼၼ်ႉ…တင်းဢမ်ႇႁၼ်မၼ်းလီမႃးမိူၼ်ၵူႈပွၵ်ႈ…ႁိူၺ်ႉ!…” ထူၺ်ႈၸႂ်လူင်ဢွၵ်ႇမႃး ၼင်ႇၼၵ်းၸႂ်ၼၵ်းၶေႃးၼႃႇၼၼ်ႉယဝ်ႉ။
မေႃယႃၵေႃႈ “ယႃႇပေပေႃးမႆႈၸႂ်ႁႅင်းၼႃႇၽႅဝ်…တေပဵၼ်ယွၼ်ႉတၢၵ်ႇၽူၼ်လႄႈ…ၵတ်းႁႅင်းၼႃႇသေလူမ်းၼၢဝ်ၶိုၼ်ႈၼၼ်ႉၵူၺ်း…သူသွင်ၵေႃႉၵေႃႈ…ႁိူဝ်ႉမႃးတင်းဝၼ်းယဝ်ႉ…မိူဝ်းလိုဝ်ႈႁိူဝ်ႉၵွၼ်ႇၶႃႈလႄႈ…ႁဝ်းၵေႃႉတေတူၺ်းထိုင်ၵူၺ်း…”
“မေႃယႃၵေႃႈၶႂ်ႈၼွၼ်းမိူၼ်ၵၼ်…ပၼ်ႁႂ်ႈႁဝ်းလႆႈတူၺ်းထိုင်လႄႈ…”
“မိူဝ်ႈၼႆႉႁဝ်းၵေႃႈလႆႈလိုဝ်ႈႁိူဝ်ႉယူႇ…ယဝ်ႉၵေႃႈႁဝ်းပဵၼ်မေႃယႃ…ဢမ်ႇလူဝ်ႇမႆႈၸႂ်ယဝ်ႉ…ဢၼ်လီမႆႈၸႂ်ၼႆႉပဵၼ်သူသွင်ၵေႃႉၼၼ်ႉယဝ်ႉ…ပွၵ်ႈမိူဝ်းလိုဝ်ႈႁိူဝ်ႉသေလႄႈ…မိူဝ်းလႆႈယဝ်ႉဝႃႈ…”
“မိူင်းတေလႅင်းယဝ်ႉ…ပႂ်ႉႁႂ်ႈမိူင်းလႅင်းၸင်ႇတေမိူဝ်းဢဝ်…”
“မိူဝ်းမိူဝ်ႈလဵဝ်ၼၼ်ႉယဝ်ႉ…” ယိင်းသႅင်ၵေႃႈလိုပ်ႈၶႃ ထိုင်တီႈပေႃးလႆႈပွၵ်ႈမိူဝ်းၵႂႃႇယဝ်ႉ။
သမ်ႉဝႃႈပွၵ်ႈမိူဝ်းယဝ်ႉသေတႃႉ သွင်ၶႃၵေႃႈႁိုဝ်တေၸၢင်ႈၼွၼ်း။
“ၶမ်းႁွမ်…ပဵၼ်မႃးႁိုင်ယဝ်ႉႁႃႉ…”
“ၸိူင်ႉႁိုဝ်ၶႃႈ…”
“တၢင်းပဵၼ်……ၵူဝ်လွင်ႈလပ်းသိင်ႇၼၼ်ႉ…”
“ဢေႃ…ၶႃႈၵေႃႈဢမ်ႇႁူႉဝႃႈမၼ်းပဵၼ်မႃးႁိုင်ၵႃႈႁိုဝ်…ၶႃႈတိုၵ်ႉႁူႉမိူဝ်ႈ 6 ပီ ပူၼ်ႉမႃးၼၼ်ႉၵူၺ်း”
“တၢင်းပဵၼ်ၸိူင်ႉၼႆ…ဢမ်ႇယႃလႆႈႁ…”
“ဢမ်ႇႁူႉယဝ်ႉၶႃႈ…ၵႂႃႇၸူးမေႃယႃတူၺ်းမႃး…မေႃယႃၵေႃႈယင်းဢမ်ႇႁပ်ႉၶၢမ်ႇပၼ်လႆႈလႃႈ…သမ်ႉဝႃႈဢမ်ႇႁၢႆလႆႈၵေႃႈၶတ်းၸႂ်ငိူင်ႉဝႄႈ…ၼင်ႇႁိုဝ်မၼ်းတေဢမ်ႇၸၢင်ႈပဵၼ်ၼၼ်ႉဢဝ်ၵူၺ်း…”
“ပဵၼ်သင်လႄႈ…မႄႈသူပွႆႇပၼ်မႃးလႆႈယူႇလႃႇ…”
“တေပဵၼ်ယွၼ်ႉလၢႆပီမႃးၼႆႉ…မၼ်းဢမ်ႇပဵၼ်သင်ယဝ်ႉလႄႈ…မႄႈၵေႃႈတမ်းၸႂ်လႆႈယဝ်ႉၼႆၵူၺ်းၶႃႈယူဝ်ႉ…ၶႃႈမႃးယဝ်ႉ…ပီႈၶႃႈၸင်ႇမႃးလူး”
တေၸၢင်ႈႁဵတ်းႁိုဝ်လႃႇ တေၸွႆႈၵေႃႈဢမ်ႇၸၢင်ႈ တေယႃပၼ်ၵေႃႈ ဢမ်ႇၸႂ်ႈမေႃလူး လိူဝ်သေတေ ယူႇႁိမ်းၶၢင်ႈလႄႈၸွႆႈတူၺ်းထိုင်ပၼ်ၼၼ်ႉၵူၺ်းယဝ်ႉ။
