သဵင်ၵႆႇၶၼ် ၽွင်းတိုၵ်ႉၼွၼ်းဝၢၼ် မေႃးလင်ၼႃႇတီႈၼိူဝ်ႁူဝ်ၼွၼ်းၸၢႆးလၢဝ် ၶၼ်ယူႇတိၵ်းတိၵ်း ၼွၼ်းပေႃးဢမ်ႇလပ်းလႆႈယဝ်ႉ။ ၵႃႈလႆႈလုၵ်ႉမႃး ပႃးတၢင်းတႃၼွၼ်းဢမ်ႇဢိမ်ႇသေ ၶဝ်ႈၵႂႃႇၼႂ်းသွင်ႇၾႆးယူႇ။ ၸင်ႇပွင်ႉယူႇႁင်းၵူၺ်းမၼ်း
“ၵႆႇၼႆႉၵေႃႈၶၼ်ယူႇတိၵ်းတိၵ်း…ၵမ်ႉဢဝ်ႁဵတ်းၽၵ်းပႅတ်ႈႁေသဵင်ႈသဵင်ႈယဝ်ႈ…”
“သင်ႁူႉၼၼ်တႄႉ တေႁဵတ်းသေသွင်သၢမ်တူဝ်ယဝ်ႉ…” ၵိုင်ႉၵၢင်ႉတူၵ်းၸႂ် တႃၼွၼ်းသမ်ႉပေႃးပေႇ။
“မႃးမီးယူႇတီႈၼႆႈၸဵမ်မိူဝ်ႈလႂ်!!…”
“ၸဵမ်မိူဝ်ႈၵႆႇပႆႇၶၼ်…”
“ႁဵတ်းၽၵ်းသင်ၶႃႈလႃႇၼၼ်ႉ…”
“ၶဝ်ႈလႅဝ်…ၼိူဝ်ႉၵႆႇ…”
“ဢေႃႈ……ၼိူဝ်ႉၵႆႇၼႆၶႃႈႁ!!… ဢမ်ႇၸႂ်ႈဝႃႈပဵၼ်…”
“ၸႂ်ႈဢိူဝ်ႈ……ၸိုင်ဝႃႈမၼ်းၶၼ်တိၵ်းတိၵ်းၼႆ”
ၸၢႆးလၢဝ်ၵေႃႈ ဢမ်ႇၸၢင်ႈႁဵတ်းသင်လႆႈယဝ်ႉလူး။ ၵႆႇသမ်ႉပေႃးႁုင်သုၵ်းယဝ်ႉ ၵႃႈလႆႈတူၺ်းသေဢိုၼ်ၼမ်ႉလၢႆးယူႇၵူၺ်း။
ၾႃႉပၢင်ႇမိူင်းလႅင်းမႃးယဝ်ႉ ၶမ်းႁွမ်ၵေႃႈ တိုၼ်ႇမႃးသေ ဢၢင်ႈလုၵ်ႉၶိုၼ်ႈမႃးလႄႈ ႁူဝ်မဝ်းၼႃႇလုၵ်ႉဢမ်ႇလႆႈ ၸိုၼ်ႇၶိုၼ်ႈလုၵ်ႉၶိုၼ်းၵေႃႈဢမ်ႇလႆႈ ယိင်းသႅင်ႁၼ်ၸိူင်ႉၼၼ်ယဝ်ႉၵေႃႈ…
“တေၵႂႃႇလႂ်လႃႇ…”
“လႃႈယဝ်ႉ…ႁဝ်းလူဝ်ႇၵႂႃႇႁူင်းႁဵၼ်းယဝ်ႉ…” ယိင်းသႅင်ၵေႃႈတႅၵ်ႈတူၺ်းလူမ်းၼၢဝ်ပၼ်သေ လူမ်းၼၢဝ်တိုၵ်ႉၶိုၼ်ႈယူႇလႄႈ။
“သိုပ်ႇၼွၼ်းလိုဝ်ႈႁိူဝ်ႉၵွၼ်ႇလႄႈ…ယႃႇၽွမ်ႈၵႂႃႇယဝ်ႉ…သူပဵၼ်ၸိူင်ႉၼႆ…ၵႂႃႇၵေႃႈဢမ်ႇၸၢင်ႈႁဵတ်းသင်ပၼ်လႆႈ…”
“ဢေႃႈ…ယဝ်ႉႁဝ်းႁဵတ်းႁိုဝ်မႃးမီးယူႇတီႈၼႆႈလႃႇ…” ယိင်းသႅင်ၵေႃႈထူၺ်းၸႂ်လူင်သေ
“ၶမ်ႈဝႃး…လႅင်းမိူင်းၶဝ်ပွၵ်ႈမႃး…ထူပ်းႁၼ်သူလႄႈလႆႈဢဝ်မႃး…သူဢမ်ႇႁူႉတူဝ်သေဢိတ်းႁႃႉ…ဢမ်ႇတွင်းသင်သေဢိတ်းႁႃႉ…”
“ႁဝ်းတွင်းလႆႈဝႃႈ…ႁဝ်းမႃးထိုင်ၵၢင်တၢင်းၵူၺ်း…ယဝ်ႉၵေႃႈႁဝ်းဢမ်ႇႁူႉဝႃႈမၼ်းပဵၼ်သင်ၵႂႃႇယဝ်ႉ…”
ၶမ်းႁွမ်ၵေႃႈ ၶတ်းၸႂ်ဝူၼ်ႉ ၵူၺ်းၵႃႈႁူဝ်ၶႆႈၼႃႇလႄႈ ဢမ်ႇဝူၼ်ႉယဝ်ႉ ယူႇယူႇၵေႃႈၶိုၼ်းလပ်းၵႂႃႇ။
“ၶမ်းႁွမ်ပဵၼ်ၸိူင်ႉႁိုဝ်…”
“တိုၵ်ႉမီးလူမ်းၼၢဝ်ယူႇ…လပ်းၵႂႃႇယဝ်ႉ…”
“ဢေႃႈ…” လႅင်းမိူင်းၵေႃႈဢဝ်တၢင်းၶဝ်ႈလႅဝ်ပၼ်ယိင်းသႅင်သေ “ၸွင်ႇမီးသင်တေၸွႆႈလႆႈႁႃႉ…”
“မီးတႄႉမီးယူႇ…ၵူၺ်းၵႃႈၸွင်ႇသူတေၸွႆႈလႆႈႁိုဝ်ဢမ်ႇႁူႉ…”
“လၢတ်ႈမႃးၵွၼ်ႇလႄႈ…”
“မိူဝ်ႈၼႆႉ…လုၵ်ႈဢွၼ်ႇၶဝ်ၵေႃႈတေဢွၼ်ၵၼ်မႃးၶိုၼ်ႈႁူင်းႁဵၼ်း…ၶမ်းႁွမ်ဢမ်ႇယူႇလီၸိူင်ႉၼႆ…တေဢမ်ႇမီးၶူးသွၼ်ယဝ်ႉ…တေလၢတ်ႈႁႂ်ႈဢိုတ်းႁူင်းႁဵၼ်းၵေႃႈ…တေၸၢင်ႈတုမ်ႉတိူဝ်ႉၵၢၼ်ႁဵၼ်းၶဝ်…တင်းၶမ်းႁွမ်သမ်ႉဝႆႉၼမ်ႉၼၵ်းပၼ်လုၵ်ႈႁဵၼ်းမၼ်းၼႃႇသေ…ၸွင်ႇသူတေၸွႆႈသွၼ်ပၼ်ၶဝ်လႆႈႁႃႉ…ပေႃးဢမ်ႇလႆႈၵေႃႈဢမ်ႇပဵၼ်သင်…ႁဝ်းၵေႃႉၵႂႃႇၵေႃႈလႆႈ…”
“လႆႈယူႇ…ဢမ်ႇမီးပၼ်ႁႃ…ႁဝ်းၵေႃႈယၢမ်ႈႁဵတ်းၶူးမႃးယူႇဢိတ်းၼိုင်ႈ…”
“ၶႅၼ်းလီဢေႃႈပေႃးပဵၼ်ၸိူင်ႉၼႆ…ၸူမ်းတေႉယဝ်ႉၶႃႈ”
“ႁဝ်းၼင်ႇၵၼ်ၵူၺ်း…လူဝ်ႇၸွႆႈထႅမ်ၵၼ်ၼၼ်ႉ…ပဵၼ်ပုၼ်ႈၽွၼ်းယူႇယဝ်ႉ…”
ထိုင်ၶၢဝ်းၵိၼ်ၶဝ်ႈယဝ်ႉ ယိင်းသႅင်ၵေႃႈ ဢဝ်တင်းၶဝ်ႈလႅဝ်ၼိူဝ်ႉၵႆႇ ႁွမ်ႁွမ်ၼၼ်ႉ ပၼ်ၶမ်းႁွမ်ၵိၼ်ယူႇ။ ၵိၼ်တူၺ်းၵမ်းၼိုင်ႈသေပေႃးၵႂႃႇ။
“ပဵၼ်သင်လႃႇ…ဢမ်ႇဝၢၼ်ႁႃႉ…”
“ႁဝ်းဢမ်ႇၶႂ်ႈၵိၼ်ယဝ်ႉ…”
“ယဵၼ်ႉၸႂ်ၵိၼ်ဢိတ်းၼိုင်ႈလႄႈ…ႁူဝ်ၼႃႈႁဝ်းတင်ႈၸႂ်သေႁဵတ်းမႃးပၼ်ၵမ်းလဵဝ်ၼႆႉ…”
“ၶဝ်မႃးသေႁႃႉ…မႃးၸဵမ်မိူဝ်ႈလႂ်…” ၶမ်းႁွမ်ၵေႃႈသိုပ်ႇၵိၼ်သမ်ႉပေႃးမူတ်းယူႇတေႉ။
“သိုပ်ႇၼွၼ်းလိုဝ်ႈႁိူဝ်ႉထႅင်ႈလႄႈ…ယႃႇပေၵုမ်ႇမိုင်ႉမႆႈၸႂ်ၸွမ်းလုၵ်ႈႁဵၼ်းသူယူႇၵူၺ်း…”
မိူဝ်ႈၼႆႉၶမ်းႁွမ်ၵေႃႈၼွၼ်းတင်းဝၼ်း ဢမ်ႇလႆႈႁဵတ်းသင် ၶၢၼ်ႉဝႃႈၶၢၼ်ႉယဝ်ႉ ထိုင်ၵၢင်ၶမ်ႈမႃးႁႂ်ႈပေႃးလႆႈၵႂႃႇႁူင်းႁဵၼ်းၼႆလႄႈ တွၼ်ႈတႃႇမိူဝ်ႈၽုၵ်ႈၼၼ်ႉ ႁၢင်ႈႁႅၼ်းဝႆႉထႃႈယူႇ။ တႃႇၸဵဝ်းႁၢႆၶႅၼ်းၼၼ်ႉ ယိင်းသႅင်ၵေႃႈႁၢင်ႈႁႅၼ်းပၼ်ယႃသေ ႁႂ်ႈမၼ်းၵိၼ်ယဝ်ႉ။
ထိုင်ၼင်ႇမိူဝ်ႈၽုၵ်ႈမႃး ၵၢင်ဝၼ်းၵေႃႈဢွၵ်ႇ မွၵ်ႇၵုမ်ႈၵေႃႈပၢင်ႇယဝ်ႉ ၶမ်းႁွမ်ၸင်ႇႁႃတိုၼ်ႇၵူၺ်း ၵိုင်ႉၵၢင်ႉတူၵ်းၸႂ်ယၢမ်းမွင်းလႄႈ ႁိပ်ႈႁိပ်ႈၼႅတ်ႈၼႅတ်ႈလူင်ၵႂႃႇ သမ်ႉပေႃးလိုမ်းတူၺ်းဝႃႈ တူဝ်ၸဝ်ႈၵဝ်ႇဢမ်ႇယူႇလီ။ ႁွတ်ႈၵႂႃႇၼႃႈႁူင်းႁဵၼ်း ၵိုတ်းမိုင်ၸုၵ်းတူၺ်းၶဝ်ႈၵႂႃႇ ႁၼ်မႅၼ်ႈၺႃး လႅင်းမိူင်းဢၼ် တိုၵ်ႉသွၼ်လိၵ်ႈပၼ်လုၵ်ႈဢွၼ်ႇယူႇၼၼ်ႉ ဢဝ်သၢႆတႃပေႃးမိုင်တူၺ်းၸွမ်း သမ်ႉပေႃးလဝ်းလူင်မႃးၵမ်းလဵဝ်ယဝ်ႉ။ ဢူၼ်ႈဢွၼ်ႇသဵင်ဝၢၼ်မေႃလၢတ်ႈ ပၼ်လွင်ႈဢုၼ်ႇၸႂ် ႁၼ်ယဝ်ႉ ႁူဝ်ၸႂ်သမ်ႉပေႃးၵီႈသိူဝ်းမႃးၵမ်းလဵဝ် ၶမ်းႁွမ်ၵေႃႈၸုၵ်းတူၺ်းသေယုမ်ႉယူႇႁင်းၵူၺ်း။ ယၢမ်းၼၼ်ႉ ဢမ်ႇႁူႉဝႃႈလႅင်းမိူင်းတၼ်းမႃးမီးယူႇၽၢႆႇၼႃႈမၼ်းၸဵမ်မိူဝ်ႈလႂ်။
“ဢွၵ်ႇမႃးတၢင်းၼွၵ်ႈႁဵတ်းႁင်…လႅတ်ႇမႆႈၼႃႇ……” ထွတ်ႇဢဝ်သိူဝ်ႈသွၼ်ႉမၼ်းမႃးႁူမ်ႇပၼ်ႁူဝ်ၶမ်းႁွမ်ယူႇ။
“ႁဝ်းၶၢၼ်ႉယူႇႁိူၼ်းယဝ်ႉ…မၼ်းဢမ်ႇၵျေႃႇ…ဢမ်ႇမိူၼ်လႆႈႁၼ်ၼႃႈလုၵ်ႈႁဵၼ်း…”
“ပဵၼ်သင်ဢွၵ်ႇမႃးတၢၵ်ႇလႅတ်ႇယူႇ…မႆႈပေႃးတၢၼ်ႇသင်…ၵမ်ႉတေၼၢၼ်းၶႅၼ်းယဝ်ႉ…” ယိပ်းဢဝ်မိုဝ်းၶမ်းႁွမ်ၶဝ်ႈၵႂႃႇၼႂ်းႁူင်းႁဵၼ်းၼၼ်ႉသေ ပၼ်ႁႂ်ႈၶမ်းႁွမ် ၼင်ႈပႂ်ႉတူၺ်းယူႇ။
ၶမ်းႁွမ်ၵေႃႈတေၸၢင်ႈႁဵတ်းႁိုဝ်လႆႈ ၵႃႈလႆႈၼင်ႈတူၺ်းလၢႆလၢႆၵူၺ်းလေႃႇ ဢမ်ႇႁူႉဝႃႈတေတူၺ်းသင် တူၺ်းလႅင်းမိူင်း ဢၼ်မေႃလၢတ်ႈသဵင်ဝၢၼ်ဢူၼ်ႈဢွၼ်ႇ ႁဵတ်းႁႂ်ႈလုၵ်ႈႁဵၼ်းပေႃးမူၼ်ႈၸႂ်ၸွမ်း ပဵၼ်ႁူင်းႁဵၼ်းဢၼ်ဢုၼ်ႇၸႂ်တေႉၼၼ်ႉယဝ်ႉ။ ၼင်ႈမိူၼ်ႇတူၺ်းတင်းႁိုင် လုၵ်ႈႁဵၼ်းသမ်ႉပေႃးလူင်းယဝ်ႉ ယင်းပႆႇၶၢႆႉသၢႆတႃလႆႈ။
“ၶမ်းႁွမ်……” သဵင်ဢူၼ်ႈဢူၼ်ႈ မေႃးယူႇႁိမ်းႁူ ၶမ်းႁွမ်ၵိုင်ႉၵၢင်ႉတူၵ်းၸႂ် သၢႆတႃဝိၼ်ႇဝၢႆႇၸူး တုမ်ႉလေႃႇၺႃးၵၼ် ဢဝ်သဵင်ႁူဝ်ၸႂ်တွတ်ႇတဵၼ်ႈႁႅင်း သမ်ႉပေႃးဢမ်ႇႁတ်းတူင်ႉသေဢိတ်း။ လႅင်းမိူင်းၵူမ်ႈၸူးၶဝ်ႈၸမ် မိုဝ်းယိပ်းဢဝ်ဢၼ်မွတ်ႇပႅၼ်ႈပုၼ်းယဝ်ႉ လုၵ်ႉၵႂႃႇၶိုၼ်း။ ၶမ်းႁွမ်ၸင်ႇလူမ်ၸႂ်မႃး လႅင်းမိူင်းၵေႃႈလၵ်ႉယုမ်ႉယူႇၸုတ်းၵုတ်း ႁင်းၵူၺ်းယဝ်ႉ။
ၵၢင်ဝၼ်းၸမ်တဵင်ႈယဝ်ႉ ၶမ်းႁွမ်ၼႅတ်ႈပွၵ်ႈမိူဝ်းႁိူၼ်းၶိုၼ်းသေ မိူဝ်းႁဵတ်းၶဝ်ႈၽၵ်းပႂ်ႉဝႆႉယူႇ ဝၢႆးလူင်းလိုဝ်ႈယဝ်ႉၵေႃႈ ၵႂႃႇယူႇတီႈၽၵ်းတူသေငွၵ်ႈတူၺ်းလႅင်းမိူင်း
“မိူဝ်းၵိၼ်ၶဝ်ႈလႆႈယဝ်ႉ…”
“လဵင်ႉလႆႈယူႇႁႃႉ…”
ဢမ်ႇသူၼ်ၸႂ်သေ ႁွင်ႉယဝ်ႉၵေႃႈမိူဝ်းၵႂႃႇပႅတ်ႈယဝ်ႉ။
ၶမ်းႁွမ်ႁဵတ်းၽၵ်းဝႆႉပဵၼ်လၢႆမီႇတမ်းဝႆႉပေႃးတဵမ်ၽိူၼ်သေ ၵွၼ်ႉၶဝ်ႈပၼ်လႅင်းမိူင်းယဝ်ႉ။
“ယိင်းသႅင်ၵႂႃႇလႂ်ယဝ်ႉ…ဢမ်ႇမႃးၵိၼ်ၶဝ်ႈႁႃႉ…”
“ဢမ်ႇႁူႉယဝ်ႉ…ပွၵ်ႈမႃးၵေႃႈဢမ်ႇႁၼ်ၽႂ်…”
“ဢမ်ႇယူႇလီယဝ်ႉ ပဵၼ်သင်ႁဵတ်းၽၵ်းၼမ်ထိုင်တၢၼ်ႇၼႆႉလႃႇ…”
“ၵေႃႈ…သူမႃးၸွႆႈႁဝ်းပဵၼ်တၢၼ်ႇၼႆႉ…ႁဝ်းၵေႃႈထုၵ်ႇလီတွပ်ႇတႅၼ်းသူၶိုၼ်းယူႇၽွင်ႈ…”
ၶမ်းႁွမ်ယုမ်ႉၸူး “ၵိၼ်လႄႈ…ၽၵ်းတေၵတ်းသဵင်ႈယဝ်ႉ…”
လႅင်းမိူင်းၵိၼ်တူၺ်းယဝ်ႉ “ပဵၼ်ပွၵ်ႈဢွၼ်တၢင်းသုတ်း…ဢၼ်လႆႈၵိၼ်တူၺ်းၼမ်ႉမိုဝ်းသူ…”
“ပဵၼ်သင်လႃႇ…”
“မၼ်းဝၢၼ်ထိုင်တီႈလၢတ်ႈဢမ်ႇလႆႈ… ”
“ၶႂ်ႈဝႃႈဝၢၼ်ႁႃႉဢမ်ႇဝၢၼ်တေႉ…”
“ၵေႃႈဝၢၼ်ယူႇ…သင်ၸိူဝ်ႉဝႃႈမိူဝ်ႈၼႆႉႁဝ်းဢမ်ႇမႃးၸွင်ႇႁဝ်းတေလႆႈမႃးၵိၼ်တူၺ်းႁႃႉၼႆႉ…ႁဝ်းယွၼ်းမႃးၵိၼ်ၵူႈဝၼ်းၸွင်ႇလႆႈႁႃႉ… ”
“လႆႈဢိူဝ်ႈ……ပေႃးသူမႃးလႆႈၵူႈဝၼ်းတႄႉ……” သဵင်ၶႃၵေႃႈယဵၼ်ၵႂႃႇႁင်းၽႂ်ႁင်းမၼ်းယူႇယဝ်ႉ။ သဵင်ယဵၼ်မိူဝ်ႈၵိၼ်ၶဝ်ႈၸိူင်ႉၼႆ ဢမ်ႇပေႃးလီၵႃႈႁိုဝ်လႄႈ
“မိူဝ်ႈၼႆႉဢမ်ႇႁၼ်ၼေႃႇမိူင်းသေၵမ်းလႃႇ…”
“ဢေႃႈ…လိုမ်းလၢတ်ႈ…မိူဝ်ႈၼႆႉၼေႃႇမိူင်းဢမ်ႇယူႇလီ…”
“ပဵၼ်ၸိူင်ႉႁိုဝ်…ပဵၼ်ၼႃႇဝႆႉႁႃႉ… ”
“ဢမ်ႇလူဝ်ႇမႆႈၸႂ်…မီးမေႃယႃတူၺ်းထိုင်ယူႇ…”
“ဢေႃႈ……လီယဝ်ႉပေႃးၼၼ်…ၸွႆႈတူၺ်းထိုင်ပၼ်ၽွင်ႈ…”
“ႁဝ်းပဵၼ်ပေႃႈမၼ်း…မီးပုၼ်ႈၽွၼ်းတူၺ်းထိုင်ယူႇယဝ်ႉ…”
“ၶဝ်ပဵၼ်လုၵ်ႈႁဵၼ်းႁဝ်း…မီးပုၼ်ႈၽွၼ်းတေလႆႈမႆႈၸႂ်ၸွမ်းမိူၼ်ၵၼ်ယဝ်ႉ”
