ၶမ်းႁွမ်ၵေႃႈ လႆႈဝႃႈသႂ်ႇၸႂ်တူၺ်းထိုင်ၼေႃႇမိူင်းမႃးလိူဝ်သေၵဝ်ႇယူႇယဝ်ႉ၊ ၼေႃႇမိူင်းၼၼ်ႉၵေႃႈ မိူၼ်တေၵျိူၵ်ႈၶမ်းႁွမ်မိူၼ်ၵၼ် ပေႃးဝၼ်းၶိုၼ်ႈႁူင်းႁဵၼ်းၼႆ တေႁဵတ်းၵေႃႉၶမ်းႁွမ်သေ ပေႃးဝၼ်းလိုဝ်ႈၵေႃႈ လႅင်းမိူင်းမႃးႁပ်ႉမၼ်းမိူဝ်းယဝ်ႉ။
ပေႃးဝႃႈၼေႃႇမိူင်းမႃးယူႇၸွမ်းၶမ်းႁွမ်ၼႆ လႅင်းမိူင်းၵေႃႈ ၼင်ႇႁၢင်ႈဢမ်ႇပေႃးမေႃယူႇ ၵႆႉၵႆႉဝႃႈၸႂ်ထိုင်ၼေႃႇမိူင်းၼႃႇ ၵမ်ႉဢဝ်သိူဝ်ႈၶူဝ်းမႃးပၼ်ဝႃႇ ဢမ်ႇမီးသင်ၵေႃႈ ႁႂ်ႈၸၢႆးလၢဝ်ႁဵတ်းၽၵ်းသေ ဢဝ်လူင်းမႃးပၼ်ၸိူဝ်းၼႆႉယဝ်ႉ။
လုၵ်ႈၼွင်ႉမၼ်းၵေႃႈၵႆႉၵႆႉဝႃႈၼႃႇ “ၸႂ်ထိုင်ၼေႃႇမိူင်းႁႃႉ..ၶမ်းႁွမ်တႄႉဢမ်ႇႁူႉယဝ်ႈ”
“တင်းသွင်ၵေႃႉယဝ်ႈ” လၢတ်ႈသိုဝ်ႈသိုဝ်ႈသေ ဢဝ်ပိူၼ်ႈပေႃးဢမ်ႇၸၢင်ႈတၵ်းသဵင်သင်ယဝ်ႉ။
ၶၢဝ်းၽူၼ်သုတ်းႁၢႆၵႂႃႇလွႆးလွႆး ၶၢဝ်းၵတ်းသိုပ်ႇသုတ်ႉၶဝ်ႈၸူးၸမ် လုၵ်ႈႁဵၼ်းဢွၼ်ႇၶဝ်ၵေႃႈ တွပ်ႇလိၵ်ႈယဝ်ႉသေ မႅၼ်ႈၽွင်းပွႆးဢွၵ်ႇဝႃႇၼႆလႄႈ လႆႈဢိုတ်းႁဵၼ်းပၼ်ၵႂႃႇ တႃႇသိပ်းဝၼ်းၼႆယူႇ။ ၶူးၵေႃႈပဵၼ်ၶၢဝ်းယၢမ်းလႆႈလိုဝ်ႈသေ ၶမ်းႁွမ်ၵေႃႈ တင်ႈၸႂ်တေမိူဝ်းၸႂ်းႁိူၼ်းၼႆယဝ်ႉ မိူဝ်ႈယင်းတိုၵ်ႉႁႅၼ်းၶူဝ်းယူႇၼၼ်ႉ ၶမ်းမိူင်းၵေႃႈႁွတ်ႈမႃး။
“မိူဝ်ႈၼႆႉ…လူမ်းသင်ၽတ်ႉမႃးလႃႇ…မႃးႁွတ်ႈႁိူၼ်းသေ…”
“လူမ်းလီတေႉၼၼ်ႉၶႃႈယဝ်ႉ…”
“ယႃႇမႃးလၢတ်ႈၵႂၢမ်းဝၢၼ်ယူႇ…ပိူၼ်ႈၸႂ်ႉမႃးၸွင်ႇၸႂ်ႈႁိုဝ်…”
“ၸၢင်ႈတေႁဵတ်းႁိုဝ်…ၵေႃႈၸႂ်ႈယူႇယဝ်ႉ…”
“ဝႃႈယဝ်ႉ…ပေႃးဢမ်ႇမီးၵၢၼ်တေလူင်းမႃးယူႇႁႃႉ…”
“မိူဝ်ႈၽုၵ်ႈ…ၵူၼ်းလူင်တေမႃးလႄႇဝႃႇၼႆႉ…တေလႆႈမိူဝ်းႁပ်ႉၶၢၼ်ႉဝႃႈၶၢၼ်ႉယဝ်ႉ…တေလႆႈမိူဝ်းႁွတ်ႈထိုင်ဝဵင်းပုၼ်ႉ…”
“ယူဝ်ဝႃႈႁဵတ်းသိုၵ်းယဝ်ႉ…တေဢမ်ႇမေႃၶၢၼ်ႉၼႆ…”
“ၶၢၼ်ႉၼႆႉ…မၼ်းယႃဢမ်ႇလႆႈလေႃႇပီႈ…ၶႃႈမိူဝ်းယဝ်ႉ…”
“တေမိူဝ်းတီႈလႂ်…”
“မိူဝ်းဝဵင်း…”
“မိူဝ်းၵေႃႉလဵဝ်ၵူၺ်းႁႃႉ…”
“ၸႂ်ႈယဝ်ႉဝႃႈ…”
“ဢေႃႈ…မိူဝ်ႈၽုၵ်ႈပီႈတေမိူဝ်းၸႂ်ႈမႄႈႁဝ်း…ၼွင်ႉမီးလွင်ႈသင်ၶႂ်ႈၽၢၵ်ႇလၢတ်ႈမႄႈ…ဢမ်ႇၼၼ်ၶႂ်ႈလႆႈသင်တီႈႁိူၼ်းႁိုဝ်…”
“ပီႈတေမိူဝ်းမိူဝ်ႈၽုၵ်ႈယဝ်ႉႁႃႉ…ပေႃးၼၼ်ၵေႃႈ…”
ႁိမ်ဢဝ်ၽူင်းၶမ်းႁွမ်ၼၼ်ႉသေ ထႆႇVideo ဝႆႉ လၢတ်ႈၵႂႃႇမိူၼ်ၼင်ႇလၢတ်ႈတေႃႇမႄႈၼၼ်ႉယဝ်ႉ။
“မႄႈ…ၸၢႆးယူႇလီယူႇ…ၸၢႆးသႂ်ႇၶူဝ်းသိုၵ်းၸိူင်ႉၼႆ…ၸွင်ႇၸၢႆးလဝ်းမႃးႁိုဝ်…ၸၢႆးဝႃႈၸၢႆးလဝ်းမႃးလိူဝ်ၵဝ်ႇၼၼ်ႉယဝ်ႉ…မႄႈယႃႇမႆႈၸႂ်ၸွမ်းၸၢႆးၼႃႈ…ၸၢႆးယင်းတိုၵ်ႉမီးသၢႆၸႂ်…ယင်းတိုၵ်ႉယုမ်ႉတိုၵ်ႉၸႂ်ထိုင်မႄႈယူႇ…ၸၢႆးမုင်ႈမွင်းမိူဝ်းၸႂ်းမႄႈယူႇၼႃႈ…ၵူၺ်းၵႃႈမိူဝ်ႈလဵဝ်…ၼႃႈၵၢၼ်လႄႈပုၼ်ႈၽွၼ်းၸၢႆး…ဢၼ်လူဝ်ႇႁဵတ်းၼၼ်ႉမီးတင်းၼမ်ယဝ်ႉ…မႄႈၸွင်ႇႁူႉႁႃႉ…မိူဝ်ႈၸၢႆးလႆႈၼုင်ႈၶူဝ်းသိုၵ်းၼၼ်ႉ…ၸၢႆးမီးတၢင်းသိူဝ်းတေႉယဝ်ႉ…ၸၢႆးဝူၼ်ႉဝႃႈသႂ်ႇမၼ်းယဝ်ႉ…မၼ်းတေႁဵတ်းႁႂ်ႈၸၢႆးမီးႁၢင်ႈၽၢင်လဝ်းမႃး…ၵူၺ်းၵႃႈ…မၼ်းႁဵတ်းႁႂ်ႈမီးၽၢင်ႁၢင်ႈၼႆသေတႃႉ…ၼၼ်ႉမၼ်းပဵၼ်ဢၼ်ၵူၼ်းၽၢႆႇၼွၵ်ႈၶဝ်တူၺ်းၵူၺ်း…မိူဝ်ႈသႂ်ႇၶူဝ်းၼႆႉၵႂႃႇယဝ်ႉၼၼ်ႉ…ပုၼ်ႈၽွၼ်းလႄႈၼႃႈၵၢၼ်ၼၼ်ႉၵိုၵ်းမႃးၸွမ်းၵမ်းလဵဝ်ယဝ်ႉ…သိုၵ်းဢၼ်ဝႃႈၼၼ်ႉ…ဢမ်ႇၸႂ်ႈဝႃႈလၢတ်ႈယဝ်ႉပဵၼ်မႃးၵမ်းလဵဝ်…တေလႆႈၽိုၵ်းၽွၼ်ႉ…တေလႆႈယဵၼ်ႉၵၼ်ႈ…တေလႆႈႁတ်းၸုၼ်ႉ…တေလႆႈထူပ်းလွင်ႈဢၼ်ႁဝ်းဢမ်ႇယၢမ်ႈထူပ်းတၢင်းၼမ်ၼၼ်ႉယဝ်ႉ…တႃႇတေပဵၼ်သိုၵ်းၼိုင်ႈၵေႃႉၼႆႉ…ဢမ်ႇၸႂ်ႈငၢႆႈငၢႆႈ…ၸၢႆးပွင်ႇၸႂ်ယဝ်ႉ…ဢၼ်မႄႈဢမ်ႇၶႂ်ႈႁႂ်ႈၸၢႆးပဵၼ်သိုၵ်း…ၵူၺ်းၵႃႈ…သမ်ႉဝႃႈပဵၼ်ၸိူင်ႉႁိုဝ်ၵေႃႈ…ၸၢႆးတိုၼ်းတေႁဵတ်းယူႇ…တွၼ်ႈတႃႇတေၵႅတ်ႇၶႄမႄႈ…ပီႈ…တႃႇၵႅတ်ႇၶႄၼိူဝ်ႉလိူတ်ႉၸိူဝ်ႉၶိူဝ်းႁဝ်း…တႃႇဝၢၼ်ႈမိူင်းႁႂ်ႈၵတ်းယဵၼ်…ၶႃႈတေႁဵတ်း…တေသိုပ်ႇပုတ်ႈတႅၼ်းတၢင်ဢူႈႁဝ်းဢၼ်ႁဵတ်းဢမ်ႇယဝ်ႉၼၼ်ႉၵႂႃႇ…ၶႃႈတေၶတ်းၸႂ်ႁဵတ်း…ၸွမ်းၼင်ႇဢၼ်ၸၢႆးႁဵတ်းလႆႈၼၼ်ႉယဝ်ႉ…မႄႈၵေႃႈ…လုမ်းလႃးတူၺ်းထိုင်ပၢႆးယူႇလီတူဝ်ၵဝ်ႇၽွင်ႈလႄႈ…ယႃႇၵုမ်ႇဝူၼ်ႉၼမ်…မႆႈၸႂ်ယူႇၵူၺ်း…မၼ်းတေႁဵတ်းႁႂ်ႈၸဵဝ်းထဝ်ႈ…သင်ၸၢႆးလႆႈမိူဝ်းၸႂ်းႁိူၼ်း…ၶႃႈၶႂ်ႈႁၼ်မႄႈၼုမ်ႇထိုင်တီႈႁဵတ်းႁႂ်ႈၶႃႈဢမ်ႇတွင်းလႆႈၼၼ်ႉယဝ်ႉ…ပၢႆးပၢႆ…” ယုမ်ႉသူင်ႇသင်ႇမႄႈ ပေႃးတၢၼ်ႇဝႃႈ လၢတ်ႈတေႃႇတူဝ်မႄႈတေႉတေႉၼၼ်ႉယဝ်ႉ။
ၵၢင်ဝၼ်းၸၢႆႉတူၵ်း ႁူဝ်ၶမ်ႈလပ်းသိင်ႇဝွႆးဝွႆး သၢႆလႅင်းလိူၼ်ပိူင်းထွင်ႇဢွၵ်ႇမႃး လုၵ်ႈလၢဝ်ႁိူဝ်ႈ ၸပ်းၸွမ်းပႃး ၶမ်းႁွမ်ၼင်ႈပႂ်ႉလႅင်းမိူင်းသမ်ႉပေႃးလိုၵ်းၼႃႇယဝ်ႉၵေႃႈ ဢမ်ႇႁွတ်ႈမႃး မိူၼ်ဝႃႈတေ မီးၵၢၼ်လမ်ႇလွင်ႈၼႆသေ ၶမ်းႁွမ်ၵေႃႈ ၶဝ်ႈၼွၼ်းၵႂႃႇပႅတ်ႈယူႇ။ သမ်ႉဝႃႈၼွၼ်းယူႇသေတႃႉ မၼ်းႁိုဝ်တေလပ်းလႆႈ မႆႈၸႂ်ၵူဝ်ဝႃႈမိူဝ်းယဝ်ႉ တေဢမ်ႇတၼ်းလႆႈမွၵ်ႇလၢတ်ႈသူင်ႇသင်ႇၶဝ်ၼၼ်ႉယဝ်ႉ ၽိူဝ်လိူဝ်လူဝ်ႇမိူဝ်းၸဵမ်ၸဝ်ႉသေ ပႂ်ႉၶဝ်တင်းဝၼ်းတင်းၶိုၼ်းၵေႃႈ ယင်းဢမ်ႇႁၼ်ၼႃႈၶဝ်သေဢိတ်းၼၼ်ႉ သင်တေဢမ်ႇသင်ႇလၢတ်ႈၵေႃႈ ၼႂ်းၸႂ်ၼႆႉမၼ်းဢမ်ႇပႆႇလီလႆႈလူး။ ၶမ်ႈၼႆႉတင်းၶိုၼ်း ႁိုဝ်တေၼွၼ်းလပ်းလႆႈ ၼွၼ်းသေလွမ်မွင်းႁႂ်ႈၶဝ်မႃးႁွင်ႉယူႇၵူၺ်းၼၼ်ႉယဝ်ႉ။
ႁူဝ်ၼႂ်ၸဵမ်ၸဝ်ႉၾႃႉပႆႇပၢင်ႇမိူင်းပႆႇလႅင်း ၶမ်းႁွမ်ၵေႃႈ သူင်ႇသင်ႇလၢတ်ႈပၼ်ယိင်းသႅင်သေ ယၢၼ်မိူဝ်းၵႂႃႇလွႆးလွႆး။ သမ်ႉဝႃႈလူတ်ႉၼၼ်ႉၵႂႃႇတၢင်းၼႃႈယူႇသေတႃႉ ၸႂ်ၼၼ်ႉတႄႉၸပ်းၸွမ်း ဝႆႉယူႇတၢင်းလင်ၼၼ်ႉၵူၺ်း တူၺ်းၵႂႃႇတၢင်းၼႃႈၼၼ်ႉၵႆယူႇၼႆၵေႃႈ မိူၼ်တၢင်းလင်ၼၼ်ႉ မီးသေၸိူဝ်ႉသေလွင်ႈၸၼ်ၵႂႃႇၶိုၼ်းၼၼ်ႉယဝ်ႉ ယိုင်ႈၵႂႃႇၵႆတၢၼ်ႇႁိုဝ် ယိုင်ႈၶႂ်ႈႁူၼ်လင်ၶိုၼ်းမွၵ်ႈၼၼ်ႉ တေၸၢင်ႈႁဵတ်းႁိုဝ်လႃႇ ဝၢႆႇတူၺ်းၵႂႃႇၶိုၼ်းၵေႃႈ ဢမ်ႇလႆႈႁၼ်သင်လူး။ သင်ဢမ်ႇသင် တၼ်းလႆႈႁၼ်ၼႃႈသင်ႇလၢတ်ႈသေဢိတ်းၼိုင်ႈၼၼ်ႉ တေဢမ်ႇၶမ်ၸႂ်ပေႃးတၢၼ်ႇၼၼ်ႉလႃႈ။ ဢွၵ်ႇမႃးပႅတ်ႈၶဝ် ဢမ်ႇလၢတ်ႈသင်ၼၼ်ႉ မၼ်းၶမ်ၸႂ်ၼႃႇၼၼ်ႉယဝ်ႉ။
မိူဝ်ႈမိူဝ်းၸမ်တေႁွတ်ႈဝဵင်းၼၼ်ႉ လႆႈႁူပ်ႉမႅၼ်ႈၵႃးလူင်လမ်းၼိုင်ႈ ၵႃးလမ်းၼၼ်ႉၵေႃႈ လတ်းၽၢၼ်ႇပူၼ်ႉၵႂႃႇလွႆးလွႆး။ ၵူၺ်းၵႃႈ ၵူၼ်းၼႂ်းၵႃးလမ်းၼၼ်ႉၵေႃႈ မိူၼ်လႆႈႁၼ်ၶမ်းႁွမ်သေယုမ်ႉၸူးယူႇ။ ၶမ်းႁွမ်ၵေႃႈ တွင်းလႆႈဝႃႈၵူၼ်းၵေႃႉၼၼ်ႉ မိူၼ်ယၢမ်ႈႁၼ်တီႈၼိူဝ်လွႆဝႆႉယဝ်ႉ ၶမ်းႁွမ်ယုမ်ႉတွပ်ႇၸူးၶိုၼ်းသေ ၵႃးၶဝ်ၵေႃႈ လတ်းၽၢၼ်ႇၵၼ်ၵႂႃႇတၢင်းၽႂ်တၢင်းမၼ်းၼၼ်ႉယဝ်ႉ။
လႅင်းမိူင်းၵေႃႈယွၼ်ႉၵူၼ်းလူင်မႃးၸႂ်းလႄႈ ဢမ်ႇၸၢင်ႈမိူဝ်းၸူးၶမ်းႁွမ်လႆႈ။ ယၢမ်းၵၢင်ၶမ်ႈ လႅင်းမိူင်းလႄႈတင်းၸဝ်ႈသိုၵ်းၸွမ်ၶိူဝ်းၵေႃႈ ၼင်ႈဢုပ်ႇၵၼ်ယူႇတီႈသႃလႃး ၼႂ်းတပ်ႉၼၼ်ႉလွင်ႈၼိုင်ႈယဝ်ႉလွင်ႈၼိုင်ႈ ဢုပ်ႇၵႂႃႇဢုပ်ႇမႃး ၸဝ်ႈသိုၵ်းၵေႃႈလႆႈထၢမ်လွင်ႈၼေႃႇမိူင်းယူႇ။
“ၼေႃႇမိူင်းပဵၼ်ၸိူင်ႉႁိုဝ်…”
“လီယူႇဢေႃႈ…”
“ဢမ်ႇလႆႈႁၼ်ၶဝ်လႃႇ…ဢမ်ႇလႆႈယူႇၸွမ်းၵၼ်ႁႃႉ…”
“ဢဝ်ၵႂႃႇပွႆႇဝႆႉပၼ်ၶူးၶဝ်တီႈၼႂ်းဝၢၼ်ႈယဝ်ႉဢေႃႈ…”
“ပွႆႇယူႇႁူင်းႁဵၼ်းယဝ်ႉႁႃႉ…”
“ၸႂ်ႈယဝ်ႉၶႃႈ…”
“လီယဝ်ႉ…ဢၼ်မႃးႁွတ်ႈတီႈၼႆႈၵေႃႈၶႂ်ႈမႃးဢုပ်ႇလွင်ႈၼႆႉပႃးဢိူဝ်ႈ…ၼေႃႇမိူင်းပဵၼ်လုၵ်ႈသိုၵ်းၵေႃႉၼိုင်ႈ…ၶဝ်ပဵၼ်ၵူၼ်းၼႂ်းၼႃႈႁိူၼ်းၽူႈႁၢပ်ႇၵၢၼ်ဢၼ်လႆႈလူႇၼိူဝ်ႉလိူတ်ႈသၢႆၸႂ်ၵႂႃႇၼႂ်းပၢင်တိုၵ်း…ၶဝ်မီးသုၼ်ႇတႃႇတေလႆႈႁပ်ႉလွင်ႈၸွႆႈထႅမ်ၼၼ်ႉယဝ်ႉ…ယွၼ်ႉၼၼ်…ၵဝ်ဝႃႈၵဝ်တေဢဝ်မိူဝ်းလဵင်ႉလူလုမ်းလႃးၵႂႃႇၸွင်ႇတေလီႁိုဝ်…”
လႅင်းမိူင်းၵေႃႈမိုင်ဝူၼ်ႉၵႂႃႇတင်းႁိုင်ယူႇ။
မၼ်းၵေႃႈ ဢမ်ႇလႆႈပေႉတူဝ်လႄႈမီးၶၢဝ်းယၢမ်းတဵမ်ထူၼ်ႈ တွၼ်ႈတႃႇလုမ်းလႃးတူၺ်းထိုင်ၼေႃႇမိူင်းလႆႈတဵမ်တီႈ ၸွမ်းလူၺ်ႈၸဝ်ႈသိုၵ်းၼၼ်ႉၵေႃႈ ပဵၼ်ၵူၼ်းလဵင်ႉလူမၼ်းမႃးလဵၵ်ႉတေႃႇယႂ်ႇ သင်ႇပွၼ်ႈသွၼ်လီလႄႈ ႁဵတ်းႁႂ်ႈမၼ်းပဵၼ်ၵူၼ်းလီမႃးၼႆႉ သင်တေပၼ်ႁႂ်ႈၸဝ်ႈသိုၵ်းဢဝ်မိူဝ်းလဵင်ႉၼႆ လွင်ႈမိူဝ်းၼႃႈတွၼ်ႈတႃႇၼေႃႇမိူင်းၵေႃႈ တေဢမ်ႇလႆႈမႆႈၸႂ် မႄႈၵေႃႈပဵၼ်ၵူၼ်းၸႂ်လီ ႁၵ်ႉလုၵ်ႈဢွၼ်ႇယူႇ တႃႇဝႃႈတေႁဵတ်းႁၢႆႉၼေႃႇမိူင်းၼၼ်ႉဢမ်ႇပဵၼ်လႆႈ တွၼ်ႈတႃႇၼေႃႇမိူင်းၵေႃႈ ႁႂ်ႈပေႃးလႆႈယူႇလီ လႆႈႁဵၼ်းလီၼၼ်ႉ ပဵၼ်ဢၼ်လီတွၼ်ႈတႃႇမၼ်းတႄႉတႄႉ။ ၵူၺ်းၵႃႈ တႃႇတေတပ်းတတ်းလႆႈၼၼ်ႉ တေလႆႈဢုပ်ႇတင်းၶမ်းႁွမ်ထႅင်ႈၼႆသေ
“လွင်ႈၼႆႉ… ၶႃႈတေယွၼ်းဝူၼ်ႉတူၺ်းၵွၼ်ႇၶႃႈ…”
ယၢမ်းၵၢင်ၶိုၼ်းလိုၵ်းယဵၼ် လႅင်းမိူင်းၵေႃႈ မႃးဢုပ်ႇၵုမ်တင်းၶမ်းႁွမ်ၼႆသေ ၸင်ႇလႆႈမႃးတွႆႇၽၵ်းတူယဝ်ႉ ႁွင်ႉႁႃၶမ်းႁွမ်ယူႇ။ ၵူၺ်းၵႃႈ ဢမ်ႇလႆႈႁၼ်ၶမ်းႁွမ်ဢွၵ်ႇမႃး ၵူၼ်းၵေႃႉဢၼ်လႆႈႁၼ်ၼၼ်ႉတႄႉ ပဵၼ်ယိင်းသႅင်ၵူၺ်း
“ၶမ်းႁွမ်လႃႇ…”
“ၶမ်းႁွမ်ပွၵ်ႈမိူဝ်းယဝ်ႉ…”
“ပွၵ်ႈမိူဝ်းယဝ်ႉ!!…ပဵၼ်သင်လႄႈႁဝ်းဢမ်ႇႁူႉ…”
“ၶမ်းႁွမ်ပႂ်ႉမိူဝ်ႈဝႃးတင်းဝၼ်း…ၶမ်ႈဝႃးတင်းၶိုၼ်းယဝ်ႉ…ဢမ်ႇႁၼ်ႁွတ်ႈမႃးလႄႈ…မၼ်းၵေႃႈလႆႈမိူဝ်းၵႂႃႇယဝ်ႉ…”
“ၼေႃႇမိူင်းလူး..”
“ၶမ်းႁွမ်ဢဝ်မိူဝ်းၸွမ်းယဝ်ႉ…”
“ၸိူင်ႉၼၼ်ႁႃႉ..”
မိူဝ်ႈဢၢၼ်းဝၢႆႇႁူဝ်သေပွၵ်ႈမိူဝ်းၶိုၼ်းၼၼ်ႉ
“တေႉဢိူဝ်ႈ..မေႃယႃ..ႁဝ်းယွၼ်းထၢမ်ဢိတ်ႉၼိုင်ႈၸွင်ႇလႆႈႁိုဝ်”
“မီးလွင်ႈသင်ၶႃႈ…”
“ပေႃးဝႃႈ…ဢဝ်ၼေႃႇမိူင်းၽၢတ်ႇၶမ်းႁွမ်ၵႂႃႇၼႆ…ၶမ်းႁွမ်ၸွင်ႇတေတိူဝ်ႉၸႂ်ႁႃႉ”
ယိင်းသႅင်ထူၺ်ႈၸႂ်လူင်မႃးယဝ်ႉ “ဢိုမ်ႈ…တိူဝ်ႉၸႂ်ယူႇၵူၺ်းလေႃႇ…ၶဝ်လုမ်းလႃးတူၺ်းထိုင်ၼေႃႇမိူင်းမိူၼ်လုၵ်ႈၵေႃႉၼိုင်ႈၼၼ်ႉယဝ်ႉ…ၸဵမ်ႁူဝ်တေႃႇတိၼ်လုမ်းလႃးပၼ်…တူၺ်းၶဝ်ပဵၼ်ၵူၼ်းႁၵ်ႉလုၵ်ႈဢွၼ်ႇတေႉဢိူဝ်ႈ…သင်ဢမ်ႇႁူႉတႄႉ…လႅပ်ႈတေဝႃႈၶဝ်ယၢမ်ႈမီးလုၵ်ႈမႃးၼၼ်ႉယဝ်ႉ…”
ယိင်းသႅင်သိုပ်ႇလၢတ်ႈထႅင်ႈ “ၵူၺ်းၵႃႈ..တူၺ်းမၢင်ပွၵ်ႈၵေႃႈတေႁိူဝ်ႉယူႇမိူၼ်ၵၼ်…ၶၢဝ်းယၢမ်းႁဵတ်းၵၢၼ်ၶဝ်ၵူၺ်းပေႃးၼမ်ၼႃႇယဝ်ႉ…လုမ်းလႃးၼေႃႇမိူင်းထႅင်ႈသေ…ၶဝ်သမ်ႉပေႃးဢမ်ႇမီးၶၢဝ်းယၢမ်းပုၼ်ႈတႃႇတူဝ်ၵဝ်ႇယဝ်ႈ…ႁဝ်းၵေႃႈဢမ်ႇတၼ်းၸွႆႈၶဝ်လီလီ မၢင်ပွၵ်ႈၵေႃႈမႃးလိုၵ်းထႅင်ႈ”
“ၸိူင်ႉၼၼ်ႁႃႉ..ႁဝ်းဢမ်ႇယၢမ်ႈႁူႉသေပွၵ်ႈ”
“ၵူၺ်းၵႃႈ…ၶဝ်ၵေႃႈလၢတ်ႈတႃႇသေႇဝႃႈ…မီးၼေႃႇမိူင်းၵေႃႈလီမိူၼ်ၵၼ်…ဢမ်ႇမီးၶႃႈၵေႃႈဢမ်ႇငဝ်ယဝ်ႉ…”
“ႁဝ်းပွင်ႇၸႂ်ယဝ်ႉ…ၸူမ်းယဝ်ႉၼႃႈ”
လႅင်းမိူင်းၵေႃႈ မိူၼ်တေလႆႈၶေႃႈတွပ်ႇယဝ်ႉလႄႈ ပွၵ်ႈမိူဝ်းၵႂႃႇသေယဝ်ႉ။
