ဝၢႆးဝၼ်းလူင်းႁူင်းႁဵၼ်းယဝ်ႉ ၶမ်းႁွမ်ၸုင်တင်းၼေႃႇမိူင်းပွၵ်ႈမႃးတီႈႁိူၼ်း၊ မိူဝ်ႈၶဝ်ႈမိူဝ်းၵႂႃႇၼႂ်းႁိူၼ်းၼၼ်ႉ လႆႈႁၼ်လႅင်းမိူင်းၼႆၵေႃႈ ၼႅတ်ႈလႅၼ်ႈလူင်ၵႂႃႇၸူးၵမ်းလဵဝ် ၼင်ႇဝႃႈၸူမ်းလူင်ၸူမ်းလၢင်ၼၼ်ႉယဝ်ႉ။
“ပေႃႈၸၢႆးမႃးယဝ်ႉ!!…” လႅင်းမိူင်းၵေႃႈၼႅတ်ႈႁွပ်ႇဢုမ်ႈဢဝ်ၵမ်းလဵဝ်။
“ဢမ်ႇယူႇလၢႆဝၼ်း…ၵေႃႉယႂ်ႇမႃးတေႉလူးၼႆႉ…”
“မိူဝ်ႈဝႃး…ပေႃႈဢမ်ႇမႃး…ၸၢႆးၼွၼ်းၸွမ်းမေႃသွၼ်…မေႃသွၼ်ၶႆႈဢပုမ်ႇၼႄၸၢႆးႁေၼေႈ”
လႅင်းမိူင်းယၵ်ႉတူၺ်းၼႃႈၶမ်းႁွမ်ယဝ်ႉယုမ်ႉၸူး
“ႁဵတ်းႁႂ်ႈမေႃသွၼ်လႆႈယၢပ်ႇၸႂ်ယဝ်ႉၶႃႈၼႆ..”
“ဢမ်ႇပဵၼ်သင်ၶႃႈ” ၶမ်းႁွမ်ယုမ်ႉၸူး ႁူၺ်ႇတႃသႂ်သႂ်ၼၼ်ႉလၢတ်ႈၼႄဝႃႈတဵမ်ၸႂ်ယူႇ။
ၶမ်းႁွမ်ႁၼ်ၶမ်းမိူင်းဢွၵ်ႇမႃးၸူးၶဝ်တၢင်းၼွၵ်ႈႁိူၼ်းၼၼ်ႉလႄႈ “ဢွၵ်ႇမႃးႁဵတ်းသင်လႃႇၶႅၼ်းယဝ်ႉႁႃႉ..”
“တိုၵ်ႉၸဵပ်းယူႇ..ႁူဝ်ၼႃႈၶႃႈယွၼ်းလိုဝ်ႈတီႈၼႆႈသေထႅင်ႈဝၼ်းသွင်ဝၼ်းဢမ်ႇလႆႈႁႃႉ” ယၵ်ႉတူၺ်းလႅင်းမိူင်းၼင်ႇမီးၽႅၼ်ၼၼ်ႉယူႇ။
“ပေႃႈ..ၸၢႆးၵေႃႈၶႂ်ႈယူႇ..ၶႂ်ႈထွမ်ႇမေႃသွၼ်ၶႆႈဢပုမ်ႇ”
လႅင်းမိူင်းယၵ်ႉတူၺ်းၼႃႈၶမ်းႁွမ် ၼင်ႇမွင်းပႂ်ႉၶေႃႈတွပ်ႇၼၼ်ႉယူႇလႄႈ “ဢမ်ႇလႆႈယူဝ်ႉ!..မေႃသွၼ်လူဝ်ႇႁဵတ်းၵၢၼ်ဢိူဝ်ႈ”
ၶမ်းႁွမ်တူၺ်းၼွင်ႉၸၢႆးမၼ်းၼၼ်ႉသေ ပႃးလူၺ်ႈလွင်ႈမႆႈၸႂ်ၸွမ်းလႄႈ “ၶမ်းမိူင်း..လိုဝ်ႈတီႈၼႆႈတေႃႇပေႃးၶႅၼ်းၵေႃႈလႆႈယူႇၵူၺ်း..” တူၺ်းႁူၺ်ႇတႃလိူမ်ႈလိူမ်ႈၼေႃႇမိူင်းဢၼ်မုင်ႈမွင်းပႂ်ႉၶေႃႈတွပ်ႇမၼ်းယူႇၼၼ်ႉလႄႈ မၼ်းၵေႃႈၵူမ်ႈလူင်းၸမ်ၸမ်ၼေႃႇမိူင်းၼၼ်ႉသေယဝ်ႉ “ၼေႃႇမိူင်း..မိူဝ်းၸွမ်းပေႃႈသေၵွၼ်ႇလႄႈၼႃႈ..ပေႃးၸၢႆးမႃးႁူင်းႁဵၼ်း..မေႃသွၼ်ၸင်ႇတေဢဝ်ၵႂႃႇၶႆႈၼႄတီႈႁူင်းႁဵၼ်းၼႃႉ”
ၼေႃႇမိူင်းငွၵ်းႁူဝ်ၼႄသေ ၸုင်မိုဝ်းလႅင်းမိူင်းၶိုၼ်ႈၵႃးၶဝ်မိူဝ်းၵႂႃႇယဝ်ႉ။
ဝၢႆးလႅင်းမိူင်းပူၼ်ႉၵႂႃႇၵူၺ်း ၶမ်းႁွမ်ၵေႃႈ ၸွမ်းလူၺ်ႈလွင်ႈမႆႈၸႂ်ၼွင်ႉၸၢႆးမၼ်းၼႃႇလႄႈ
“ၸဵပ်းတီႈလႂ်လၢႆလၢႆလႃႇ!..”
ၼေႃႇမိူင်းဢဝ်ၽႃႈပူၵ်ႉၸဵပ်းတီႈၶႅၼ်သၢႆႉမၼ်းၼႄၵႂႃႇ “တီႈၼႆႈၵူၺ်း”
ၶမ်းႁွမ်မႃးယိပ်းၸွမ်းတူဝ်မၼ်း တူၺ်းပေႃးၸွတ်ႇယဝ်ႉၵေႃႈ “ၸွင်ႇမီးထႅင်ႈတၢင်ႇတီႈယူႇႁႃႉ”
“ဢမ်ႇမီးယဝ်ႉ..”
“လီယဝ်ႉပေႃးၼႆၵေႃႈ..ထႅင်ႈဢိၼ်ႉၵေႃႈၶႅၼ်းလီယဝ်ႉ”
“ပီႈဢမ်ႇပႆႇပဵၼ်..ပီႈၵေႃႈလၢတ်ႈလႆႈယူႇၵူၺ်းလေႃႇ…ပေႃးဢမ်ႇမီးႁူဝ်ၼႃႈၸွႆႈၶႃႈဝႆႉ…မိူဝ်ႈလဵဝ်ၶႃႈတေတၢႆၵႂႃႇယဝ်ႉၵေႃႈပဵၼ်လႆႈ…ပီႈထုၵ်ႇလီႁဵတ်းလီတေႃႇၶဝ်ဢိတ်းၼိုင်ႈဢေႃႈ…ၶဝ်ၸွႆႈၼွင်ႉၸၢႆးပီႈဝႆႉၼႃ…”
ၶမ်းႁွမ်ၵေႃႈ လၢမ်းလႆႈတၢင်းဝူၼ်ႉၼွင်ႉၸၢႆးမၼ်းယူႇယဝ်ႉ။
“ႁူႉယူႇဝႃႈ…ယူႇၼႂ်းၽေးၶဵၼ်…ပဵၼ်သင်ဢမ်ႇမေႃၾၢင်ႉတူဝ်ပၼ်ႁႂ်ႈတူဝ်ၵဝ်ႇမၢတ်ႇၸဵပ်းၸိူင်ႉၼႆ…”
ၶမ်းမိူင်းပေႃးဢမ်ႇၸၢင်ႈတၵ်းသဵင်သင်ၸွမ်းထႅင်ႈယဝ်ႉ။
ဝၼ်းယဝ်ႉဝၼ်းပူၼ်ႉၵႂႃႇ ၽွင်းၶၢဝ်းၵၢင်ဝၼ်းၸၢႆႉတူၵ်းလပ်ႉလွႆလူင်းလွႆးလွႆး လႅင်းမိူင်းမႃးႁပ်ႉၼေႃႇမိူင်းတီႈႁူင်းႁဵၼ်းသေ
“ၵမ်ႉၵွၼ်ႇၶႃႈ!!…”
သဵင်ၼၼ်ႉမေႃးမႃးတၢင်းလင်သွင်ၶႃ ဢၼ်တိုၵ်ႉတေဢွၵ်ႇယၢၼ်ၵႂႃႇယူႇၼၼ်ႉ
“ႁဝ်းယွၼ်းၶၢဝ်းယၢမ်းဢိတ်းၼိုင်ႈၸွင်ႇလႆႈ…”
“ဢေႃႈ…”
သမ်ႉဝႃႈလႅင်းမိူင်းတေၵႆႉမႃးတီႈႁိူၼ်းၶမ်းႁွမ်သေတႃႉ ၶတ်းၸႂ်ယူႇၵႂႃႇမိူၼ်ၼင်ႇၵူၼ်းဢမ်ႇယၢမ်ႈႁူႉၸၵ်းၵၼ်ၼၼ်ႉယဝ်ႉ၊ ဢမ်ႇႁတ်းတေႃႇၼႃႈ ဢမ်ႇႁတ်းသူင်ႇသၢႆတႃၸူး လိူဝ်သေလွမ်ယၵ်ႉတူၺ်းၵူၺ်း။ လွင်ႈႁတ်းႁၢၼ်ၵေႃႉၸၢႆးဢၼ်မီးယူႇတင်းသဵင်ႈၼၼ်ႉ လႆႈႁၢႆၵႂႃႇမိူဝ်ႈမီးယူႇတေႃႇၼႃႈယိင်းၵေႃႉၼႆႉမူတ်းယဝ်ႉ။
“သူမီးၶၢဝ်းယၢမ်းတၼ်းဝၼ်းလႂ်ဢမ်ႇႁူႉၶႃႈ…ႁဝ်းၶႂ်ႈဢုပ်ႇၵုမ်လွင်ႈၼေႃႇမိူင်းၽွင်ႈဢေႃႈ…မၼ်းၵေႃႈဢမ်ႇၸႂ်ႉၶၢဝ်းယၢမ်းႁိုင်ၵႃႈႁိုဝ်ၼင်ႇၵဝ်ႇ…”
“တၼ်းယူႇၵူႈဝၼ်းၶႃႈ…”
“မိူဝ်ႈၽုၵ်ႈ…ပေႃးမႃးႁပ်ႉၼေႃႇမိူင်း…ဝၢႆးလူင်းႁူင်းႁဵၼ်းၼၼ်ႉ…ၸွင်ႇတေပၼ်ၶၢဝ်းယၢမ်းလႆႈၶႃႈႁိုဝ်…”
“ဢေႃႈ…လႆႈယူႇၶႃႈ…”
ၵၢင်ၼႂ်ၸဵမ်ၸဝ်ႉ ၶမ်းႁွမ်ၵေႃႈ ၼုင်ႈသုပ်းသႂ်ႇၶူဝ်းတႆးတဵမ်တူဝ် ၶူၼ်ႁူဝ်လိူမ်ႈလမ်လီတႅတ်ႈၼႅတ်ႈ ၸုၵ်းပႂ်ႉႁပ်ႉလုၵ်ႈႁဵၼ်း ဢၼ်မႃးႁူင်းႁဵၼ်းၼၼ်ႉယူႇယဝ်ႉ။ ထိုင်ၶၢဝ်းယၢမ်း လုၵ်ႈႁဵၼ်းမႃးမူတ်းယဝ်ႉၵေႃႈ ဢွၼ်ၵၼ်တၢင်ႇၸွမ်ပိဝ် ႁွင်ႉၵႂၢမ်းၸိူဝ်ႉၸၢတ်ႈၵႂႃႇၸွမ်းၵၼ် ထိုင်ၶိင်ႇၶိုၼ်ႈႁဵၼ်း လုၵ်ႈႁဵၼ်းၵေႃႈ ၶဝ်ႈႁွင်ႈႁဵၼ်းၵႂႃႇႁင်းၽႂ်ႁင်းမၼ်း ၸွမ်းလူၺ်ႈမေႃသွၼ်မီးၵေႃႉလဵဝ်ၵူၺ်း ႁွင်ႈႁဵၼ်းသမ်ႉမီးလၢႆႁွင်ႈဝႆႉလႄႈ သွၼ်ႁွင်ႈၼိုင်ႈ ပၼ်ႁဵတ်းၵၢၼ်ဢၼ်ဢၼ်ၼိုင်ႈယဝ်ႉသေ ၶိုၼ်းသွၼ်ထႅင်ႈႁွင်ႈၼိုင်ႈ မၢင်ၽႃႇဢၼ်သွၼ်ႁူမ်ႈၵၼ်လႆႈၵေႃႈ ႁွင်ႉသွၼ်ႁူမ်ႈၵၼ်ၵႂႃႇ သွၼ်လိၵ်ႈတၢင်းဝၼ်းတၢင်းဝၼ်း တူၺ်းပႃးလုၵ်ႈဢွၼ်ႇသေ သမ်ႉပေႃးဢမ်ႇလႆႈလိုဝ်ႈလႆႈသဝ်း ၼႂ်းၶၢဝ်းတၢင်းၼိုင်ႈဝၼ်းၶမ်းႁွမ်ၼၼ်ႉ ပဵၼ်ဢၼ်ႁိူဝ်ႉတေႉတေႉၼၼ်ႉယဝ်ႉ။ သမ်ႉဝႃႈႁိူဝ်ႉၼႆသေတႃႉ မိူဝ်ႈလႆႈႁၼ်လုၵ်ႈဢွၼ်ႇ တင်ႈၸႂ်တင်ႈၶေႃးၶတ်းၸႂ်သေႁဵၼ်းဢဝ် ၸႂ်ႁိူဝ်ႉသမ်ႉပေႃးႁၢႆ လႅၵ်ႈလၢႆႈပဵၼ်တၢင်းသိူဝ်းၵႂႃႇယဝ်ႉ။
ဝၢႆးဝၼ်းယဝ်ႉ လုၵ်ႈႁဵၼ်းၶဝ် ဢွၼ်ၵၼ်ပွၵ်ႈမိူဝ်းၵႂႃႇႁင်းၽႂ်ႁင်းမၼ်း ဝၢႆးသေလုၵ်ႈႁဵၼ်းတေလႅပ်ႈမိူဝ်းမူတ်းယဝ်ႉၼၼ်ႉ လႅင်းမိူင်းၸင်ႇတေၶဝ်ႈၵႂႃႇတီႈၼႂ်းႁွင်ႈလုမ်းၶမ်းႁွမ် ႁၼ်ၶမ်းႁွမ်ၼင်ႈယူႇလႄႈ တွႆႇၽၵ်းတူယဝ်ႉ။
“ယွၼ်းၶႂၢင်ႉၶႃႈ…”
“ၶဝ်ႈမႃးၶႃႈ…”
လႅင်းမိူင်းၵေႃႈ ၶဝ်ႈၵႂႃႇၼင်ႈတေႃႇၼႃႈၽိူၼ်ၶမ်းႁွမ်ၼၼ်ႉယဝ်ႉ ၶမ်းႁွမ်ၵေႃႈ ဢဝ်မၢႆၾၢင်ဢၼ်တႅမ်ႈပႆႇယဝ်ႉၼၼ်ႉ ယိုၼ်ႈပၼ်လႅင်းမိူင်းသေ
“ဝၼ်းၼၼ်ႉ…သူသႂ်ႇမၢႆၾၢင်ဢမ်ႇပႆႇတဵမ်ထူၼ်ႈၶႃႈ…”
“ႁဝ်းဢမ်ႇမီးသင်တႃႇတေတႅမ်ႈသႂ်ႇထႅင်ႈယဝ်ႉၶႃႈ”
“သူပဵၼ်ဢူႈၶဝ်ဢမ်ႇၸႂ်ႈၶႃႈႁႃႉ..ပဵၼ်သင်လႄႈဢမ်ႇသႂ်ႇၶႃႈလႃႇ”
သဵင်ၼႂ်းႁွင်ႈယဵၼ်ၵႂႃႇၵႅပ်ႉၼိုင်ႈသေ
“ပေႃးဝႃႈတႄႉ…ၼေႃႇမိူင်း…ဢမ်ႇၸႂ်ႈလုၵ်ႈႁဝ်းၶႃႈ…ပေႃႈၶဝ်ႁဵတ်းၵၢၼ်ၸွမ်းႁဝ်း…လႆႈလုၵႂႃႇပႅတ်ႈမိူဝ်ႈၼႂ်းလၢႆလိူၼ်ပူၼ်ႉမႃးၼႆႉၵူၺ်း…မႄႈၶဝ်…လႆႈလုၵႂႃႇၸဵမ်မိူဝ်ႈၶဝ်ဢႃႇယုလႆႈၼိုင်ႈၶူပ်ႇ…လႆႈမႃးယူႇၸွမ်းၼၢႆးၶဝ်…ယူႇလႆႈႁိုင်ၼိုင်ႈပီႊၵူၺ်း…ၼၢႆးၶဝ်ၵေႃႈလုပႅတ်ႈထႅင်ႈ…ပေႃႈၶဝ်ၵေႃႈဢမ်ႇၸၢင်ႈပၼ်ၽႂ်လဵင်ႉလႄႈလႆႈဢဝ်မႃးယူႇၸွမ်းၼၼ်ႉယဝ်ႉ…ဝၢႆးသေပေႃႈၶဝ်လုၵႂႃႇ…ၶဝ်ဢမ်ႇမီးၽႂ်ယဝ်ႉ…ႁဝ်းၵေႃႈလႆႈသိုပ်ႇလုမ်းလႃးၶဝ်ၵႂႃႇ…တႅၼ်းတၢင်ပေႃႈၶဝ်ၼႆသေတႃႉ…ႁဝ်းဢမ်ႇႁဵတ်းပၼ်ၶဝ်လႆႈၵူႈလွင်ႈ…သမ်ႉဝႃႈႁဝ်းတေၶတ်းၸႂ်ယူႇသေတႃႉ…ႁဝ်းၵေႃႈယင်းႁဵတ်းပၼ်ၶဝ်ဢမ်ႇလႆႈတဵမ်တီႈၼၼ်ႉယဝ်ႉ…မၢင်ပွၵ်ႈ…ၶၢဝ်းယၢမ်းယူႇၸွမ်းၶဝ်ၵူၺ်းႁဝ်းယင်းဢမ်ႇမီးလူးၵွၼ်ႇ…ႁဝ်းတေႁဵတ်းႁိုဝ်ပဵၼ်ဢူႈၶဝ်လႆႈ”
“သူႁဵတ်းမွၵ်ႈၼႆႉၵေႃႈလႆႈဝႃႈလီယဝ်ႉၶႃႈ..”
သဵင်ၼႂ်းႁွင်ႈတဵတ်ႇယဵၼ်ၵႂႃႇၵႅပ်ႉၼိုင်ႈလႄႈ ၶမ်းႁွမ်သိုပ်ႇလၢတ်ႈၸူး
“ယိၼ်းၸူမ်းဢၼ်ပၼ်ၶၢဝ်းယၢမ်းတွၼ်ႈတႃႇၼႂ်းဝၼ်းမိူဝ်ႈၼႆႉၶႃႈၼႃ…ဢၼ်ၶႂ်ႈဢုပ်ႇၸွမ်းၵေႃႈ…မီးမွၵ်ႈၼႆႉၵူၺ်းၶႃႈ”
ဢဝ်မၢႆၾၢင်ၼေႃႇမိူင်းၼၼ်ႉ မႃးၽိူမ်ႉထႅမ်သႂ်ႇပၼ်ပႃးၸိုဝ်ႈလႅင်းမိူင်းၵႂႃႇယူႇယဝ်ႉ။
