မိူဝ်ႈႁၼ်ၸိူင်ႉၼၼ်ယဝ်ႉၵေႃႈ မေႃယႃဢွၼ်ၵၼ်မႃးတူၺ်းၵမ်းလဵဝ် လႆႈႁၼ်ႁွႆးယိုဝ်းတၢင်းလင် လိူတ်ႈလႆလူင်းပေႃးဢမ်ႇၵိုတ်းဢမ်ႇလိုဝ်ႈ လႅင်းမိူင်းတႄႉဢမ်ႇႁူႉတူဝ်ယဝ်ႉ။ ၸွမ်းလူၺ်ႈမေႃယႃဢၼ်လႆႈႁၼ်ႁူဝ်ၼႃႈၶဝ်ပဵၼ်ၸိူင်ႉၼၼ်ယဝ်ႉ ၼင်ႇႁိုဝ်တေၸွႆႈဢသၢၵ်ႈႁူဝ်ၼႃႈၶဝ်လႆႈၼၼ်ႉ တင်းၶိူင်ႈၸႂ်ႉယႃႈယႃသေ ႁိပ်ႈၼႅတ်ႈယူတ်းယႃပၼ် ၵမ်းလဵဝ်ယဝ်ႉ ဢမ်ႇမီးၶိူင်ႈၵမ်ႉၵႅမ်ပဵင်းပေႃးၼႆလႄႈ လႆႈသူင်ႇတူဝ်ၵႂႃႇယူတ်းယႃတီႈၼႂ်းဝဵင်းလူင်ယူႇ။ ၵွပ်ႈပုၼ်ႈၽွၼ်းၸၢႆးၶိူဝ်းပဵၼ်ၵႅမ်ၼႆသေ လူဝ်ႇၸတ်းၵၢၼ်ၵူႈလွင်ႈလွင်ႈလႄႈ လႆႈသူင်ႇတူဝ် ယိင်းသႅင်ၵႂႃႇတူၺ်းထိုင်ယဝ်ႉ။
ၸၢႆးၶိူဝ်းၵေႃႈ လႆႈဢွၼ်ဢဝ်လုၵ်ႈၼွင်ႉမၼ်း ပွၵ်ႈမိူဝ်းၵႂႃႇတီႈတပ်ႉၶဝ်ၶိုၼ်းယဝ်ႉ မိူဝ်ႈႁွတ်ႈၵႂႃႇတီႈတပ်ႉၼၼ်ႉၵေႃႈ ၵၢင်ဝၼ်းပေႃးၶမ်ႈလပ်းသိင်ႇၼႃႇယဝ်ႉလႄႈ ၶႂ်ႈလိုဝ်ႈႁိူဝ်ႉ ၶႂ်ႈၼွၼ်းလပ်းတႃၵႂႃႇၼႆသေတႃႉ ႁိုဝ်တေၸၢင်ႈလပ်းလႆႈ ဢွၼ်ၵၼ်ၼင်ႈငဝ်ၵႂႃႇ ၵူႈၵေႃႉၼၼ်ႉယဝ်ႉ။
ၶမ်းႁွမ်ၵေႃႈ ဝၼ်းယဝ်ႉဝၼ်း ဢမ်ႇတၼ်းဝူၼ်ႉထိုင်ၽႂ် ၵုမ်ႇမိုင်ႉသွၼ်လိၵ်ႈ သွၼ်ႁဵၼ်းပၼ်လုၵ်ႈဢွၼ်ႇလႄႈ ႁဵတ်းၵၢၼ်မၼ်းၵႂႃႇယူႇၵူၺ်း။ ၸုမ်းဢၼ်ၶဝ်ႁွတ်ႈမႃးၶိုၼ်း ၼၼ်ႉၵေႃႈ ဢမ်ႇႁတ်းမႃးၼႄၼႃႈတီႈၶမ်းႁွမ်သေၵေႃႉ ၵူဝ်ၶမ်းႁွမ်တေထၢမ်ႁႃယိင်းသႅင်လႄႈ ဢွၼ်ၵၼ်ပၢႆႈၼႃႈပၢႆႈတႃၶမ်းႁွမ်ယူႇယဝ်ႉ။ ဝၼ်းၼိုင်ႈ ၶမ်းႁွမ်ၵေႃႈႁၼ်ၶမ်းမိူင်းႁေႃႈလူတ်ႉလတ်းၵႂႃႇၼႂ်းၵၢင်ဝၢၼ်ႈ ၽွင်းမၼ်းတိုၵ်ႉမိူဝ်းသိုဝ်ႉၽၵ်းတီႈသႅင်ႇပႃႈမူၺ်းၶဝ်ယူႇၼၼ်ႉ
“ၶမ်းမိူင်း…တၼ်းမႃးၶိုၼ်းမိူဝ်ႈလႂ်လႃႇ”
ၶမ်းမိူင်းသမ်ႉပေႃးၵိုင်ႉၵၢင်ႉတူၵ်းၸႂ် ဢမ်ႇႁူႉတေလႆႈလၢတ်ႈၸိူင်ႉႁိုဝ် တင်းၵူဝ်တင်းသဵင်သၼ်ႇသေ “ဢေႃႈ..ၶႃႈဢမ်ႇလႆႈၵႂႃႇၸွမ်းပိူၼ်ႈလူင်”
ၶမ်းႁွမ်ႁူႉလီယူႇဝႃႈ ၶမ်းမိူင်းလႅၼ် “လၢတ်ႈမႃးသိုဝ်ႈသိုဝ်ႈလႄႈ…”
“ဢမ်ႇႁူႉယဝ်ႉ…ၶႃႈလူဝ်ႇမိူဝ်းဝဵင်း” ၼႅတ်ႈႁေႃႈလူတ်ႉမၼ်းပုင်ႈဢွၵ်ႇၵႂႃႇဝႆးဝႃႈဝႆးယူႇ။ ၶမ်းႁွမ်ၵေႃႈ ဢမ်ႇၸၢင်ႈႁဵတ်းႁိုဝ် ထူၺ်ႈၸႂ်လူင်သေမိူဝ်းၵႂႃႇၵူၺ်း။
ယၢမ်းၵၢင်ၼႂ်ၸဵမ်ၸဝ်ႉ သဵင်လူတ်ႉမေႃးလင်မႃးတီႈၼႃႈႁိူၼ်း ၶမ်းႁွမ်ၵေႃႈၼႅတ်ႈ ဢွၵ်ႇမႃးတူၺ်း လႆႈႁၼ်ယိင်းသႅင်လႄႈၸၢႆးၶိူဝ်းယဝ်ႉ။
“ပွၵ်ႈမႃးၶိုၼ်းယဝ်ႉႁႃႉ!..ႁဝ်းထၢင်ႇဝႃႈသူတေဢမ်ႇမႃးယဝ်ႉ”
ယၢမ်းၼၼ်ႉ ၼေႃႇမိူင်းၵေႃႈလႅၼ်ႈဢွၵ်ႇႁိူၼ်းမႃးသေ
“ပေႃႈၸၢႆးလူး..ဢမ်ႇႁၼ်လႃႇ”
ၸၢႆးၶိူဝ်းလႄႈယိင်းသႅင်ယၵ်ႉတူၺ်းၼႃႈၵၼ် လူၺ်ႈသီၼႃႈဢမ်ႇလီၼၼ်ႉယဝ်ႉ။
“တေႉဢိူဝ်ႈ…ဢမ်ႇႁၼ်ၶဝ်မႃးလႃႇ”
“ႁဝ်းၶတ်းၸႂ်တဵမ်တီႈယဝ်ႉၼႃႈၶမ်းႁွမ်..” ယိင်းသႅင်ၼမ်ႉတႃၸိုမ်း ၼင်ႇသဵင်ႈၸႂ်ဢမ်ႇႁၼ်တၢင်းဢွၵ်ႇသေဢိတ်းၼၼ်ႉယဝ်ႉ။
“လႅင်းမိူင်းပဵၼ်သင်ၵႂႃႇလႃႇ!!…” ၶမ်းႁွမ် ယၵ်ႉတူၺ်းၸူးၸၢႆးၶိူဝ်း။
“ႁဝ်းဢမ်ႇႁူႉမိူၼ်ၵၼ်…”
“သူႁၼ်ဝႃႈႁဝ်းပဵၼ်သင်လႃႇ..ၶဝ်ပဵၼ်သင်ၶဝ်ပဵၼ်ၸိူင်ႉႁိုဝ်..ႁဝ်းဢမ်ႇမီးသုၼ်ႇႁူႉလႆႈသေဢိတ်းႁႃႉ..ႁဝ်းမႆႈၸႂ်ၵူၺ်းၵေႃႈဢမ်ႇလႆႈႁႃႉ…လၢတ်ႈမႃးလႄႈဢမ်ႇဝႃႈတေပဵၼ်ၸိူင်ႉႁိုဝ်ၵေႃႈ…ႁဝ်းတေႁပ်ႉဢဝ်ၵူၺ်း…ယႃႇပေပၼ်ႁႂ်ႈႁဝ်းဝူၼ်ႉၵႂႃႇႁင်းၵူၺ်းထၢင်ႇၵႂႃႇႁင်းၵူၺ်းလႄႈ…သင်ဢမ်ႇသင်…ယိုၼ်ယၼ်ပၼ်ႁဝ်းၵူၺ်းၵေႃႈလႆႈယဝ်ႉ…ၶဝ်တိုၵ်ႉမီးသၢႆၸႂ်ယူႇႁႃႉ…ဢမ်ႇမီးယဝ်ႉ”
“ႁဝ်းလႆႈၵႂႃႇသူင်ႇတီႈႁူင်းယႃဢွၼ်ႇၵူၺ်း…ဢမ်ႇလႆႈသူင်ႇႁွတ်ႈႁူင်းယႃလူင်…ၵူၺ်းၵႃႈတီႈႁူင်းယႃၵေႃႈယူတ်းယႃဢမ်ႇလႆႈ…တႃႇတေၵႂႃႇထိုင်တီႈႁူင်းယႃလူင်ၼၼ်ႉၵေႃႈ…မၼ်းၸၢင်ႈတေတၢႆလႆႈၸွမ်းတၢင်းၼႆဢိူဝ်ႈ…ၵူၺ်းၵႃႈပီႈၼွင်ႉမၼ်းမႃးႁပ်ႉတူဝ်မၼ်းၵႂႃႇယဝ်ႉ..ႁဝ်းၵေႃႈဢမ်ႇႁူႉဝႃႈၶဝ်ပဵၼ်ၸိူင်ႉႁိုဝ်”
ၶမ်းႁွမ်ၵၢင်းသၼ်ႇတိုၼ်းတိုၼ်းသေ “သူလူးဢမ်ႇလႆႈၶၢဝ်ႇသင်မႃးႁႃႉ!” ထၢမ်ၵႂႃႇတီႈၸၢႆးၶိူဝ်း။
“ဢမ်ႇၶႃႈ…” ပႃးလူၺ်ႈသီၼႃႈမွင်ၸႂ်ၼႃႇၼၼ်ႉယဝ်ႉ။
ၶမ်းႁွမ်ၵေႃႈၼင်ႈၵွတ်ႇဢဝ်ၼေႃႇမိူင်းသေ ပွႆႇၼမ်ႉတႃမၼ်းသိုတ်ႉႁႆႈဢွၵ်ႇမႃးယူႇယဝ်ႉ။
ဝၼ်းမိူဝ်ႈၼႆႉသွၼ်လိၵ်ႈယူႇၼႆၵေႃႈ မိူၼ်ႁၢင်ႈၸႂ်ၼႆႉဢမ်ႇၸပ်းတူဝ်သေဢိတ်း ဢမ်ႇတၵ်းသဵင်သင် ဢမ်ႇလၢတ်ႈသင် ဢမ်ႇမိူၼ်ၵူႈဝၼ်းလႄႈ လုၵ်ႈႁဵၼ်းၵေႃႈသမ်ႉပေႃးဢမ်ႇၶႂ်ႈႁတ်းၶဝ်ႈၸမ်ယဝ်ႉ။ မိူဝ်ႈၼႆႉၶမ်းႁွမ်ၵေႃႈ လႆႈပၼ်လုၵ်ႈႁဵၼ်းလူင်းႁူင်းႁဵၼ်းၵႂႃႇၶိုင်ႈဝၼ်းၼႆသေ မၼ်းၵေႃႈပွၵ်ႈမိူဝ်းၵႂႃႇတီႈႁိူၼ်းယူႇယဝ်ႉ။ မိူဝ်ႈမိူဝ်းႁွတ်ႈႁိူၼ်းယဝ်ႉၼၼ်ႉ ယိင်းသႅင်လႆႈႁၼ်လုၵ်ႈႁဵၼ်းၶဝ်ပွၵ်ႈမိူဝ်းယဝ်ႉၼႆၵေႃႈ
“ၶမ်းႁွမ်!!…ဝၢႆးဝၼ်းဢမ်ႇၶိုၼ်ႈႁူင်းႁဵၼ်းယဝ်ႉႁႃႉ…”
“ဢိုတ်းႁူင်းႁဵၼ်းတႃႇႁႃႈဝၼ်းၶိုင်ႈ…”
“ႁႃ!…ဢမ်ႇၸႂ်ႈဝႃႈတိူဝ်ႉၸႂ်ၼႃႇသေတေလႆႈဢိုတ်းႁူင်းႁဵၼ်းထိုင်ႁႃႈဝၼ်းၶိုင်ႈႁႃႉ…”
“ႁဝ်းဢမ်ႇဢဝ်ၶၢဝ်းယၢမ်းသုၼ်ႇတူဝ်ႁႂ်ႈမၼ်းတုမ်ႉတိူဝ်ႉသုၼ်ႇႁူမ်ႈလေႃႇၼႃႈ…ၵူၼ်းဝၢၼ်ႈၶဝ်မႃးလၢတ်ႈမိူဝ်ႈၵႆႈ…ႁႂ်ႈႁဝ်းမိူဝ်းပၢင်ၵုမ်တီႈဝဵင်းၼႆဝႃႇ…တေလႆႈမိူဝ်းႁွတ်ႈဝဵင်းမိူဝ်ႈၼႆႉလႄႈတေလႆႈသိုပ်ႇဢွၵ်ႇၶၢဝ်းတၢင်းၵႂႃႇထႅင်ႈၵႆ…ႁဝ်းၸင်ႇတေဢိုတ်းႁဵၼ်းပၼ်ၶဝ်ႁၢင်ႈဝၼ်းယဝ်ႉ”
“ၸိူင်ႉၼၼ်ႁႃႉ…ယဝ်ႉၼေႃႇမိူင်းလူး…ပေႃးသူဢမ်ႇတၼ်းႁႂ်ႈႁဝ်းတူၺ်းၵေႃႈလႆႈယူႇၼႃ…”
“ဢမ်ႇပဵၼ်သင်…ႁဝ်းတေႁွင်ႉၵႂႃႇပႃးၵူၺ်း…ၵူဝ်သူဢမ်ႇတၼ်းမိူၼ်ဝၼ်းၼၼ်ႉဢိူဝ်ႈ..”
ၶမ်းႁွမ်ၵေႃႈႁႅၼ်းၶူဝ်းယဝ်ႉသေ ႁွင်ႉဢဝ်တင်းၼေႃႇမိူင်းၶီႇလူတ်ႉယဝ်ႉ
“ႁဝ်းၵႂႃႇၵွၼ်ႇၼႃႈ..လုမ်းလႃးတူဝ်လီလီ”
မိုဝ်းၼုမ်ႇၼုမ်ႇဢွၼ်ႇၼေႃႇမိူင်းၼၼ်ႉၵေႃႈ ၵွတ်ႇဢဝ်တူဝ်ၶမ်းႁွမ်မိူဝ်းၵႂႃႇပေႃးမၼ်ႈတဵင်ႈတဵင်ႈယဝ်ႉ။ သၢႆသဵၼ်ႈတၢင်းယၢဝ်းၵႆ မၢၵ်ႇလေႃႉလူတ်ႉဢွၼ်ႇၼၼ်ႉၵေႃႈ လႅၼ်ႈလမ်းၵၼ်မိူဝ်းၵႂႃႇ လူမ်းထူဝ်းထွင်းမႃးၽတ်ႉၶဝ်ႈတႃ ဢဝ်ၼမ်ႉတႃလႆယွတ်ႇတူၵ်း ၵႅမ်ႈပေႃးယမ်းၵႂႃႇမူတ်း ႁိုဝ်ဢူတ်းယဵၼ်ႉၵၼ်ႈလႆႈ တၢင်းဝူၼ်ႉဝၼ်းသိုၼ်း ၶိုၼ်းၶုၵ်းၸႂ်လႆႈ ၼမ်ႉတႃၸိုမ်းႁႆႈ ၸဵတ်ႉပေႃးဢမ်ႇမူတ်းလႆႈယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ
