တွၼ်ႈတႃႇပၢႆးယူႇလီၵူၼ်းၼႂ်းဝၢၼ်ႈၼႂ်းဢိူင်ႇ ၸိူဝ်းဢၼ်ဢမ်ႇမီးမေႃယႃႁွတ်ႈထိုင်ၼၼ်ႉ တၢင်တူဝ်မေႃယႃၸၢႆးၶိူဝ်းလႄႈ ယိင်းသႅင် လႆႈဢွၼ်ၵၼ်ႁၢင်ႈႁႅၼ်းသေ ဢွၵ်ႇၶၢဝ်းတၢင်းၵႂႃႇ တႃႇၵႂႃႇၸႅတ်ႈပၼ်ၼႆယူႇ။ ၵူၺ်းၵႃႈ ယိင်းသႅင်ႁၢင်ႈႁႅၼ်းတူဝ်ႈတၼ်းၽွမ်ႉယဝ်ႉသေတႃႉ မိူၼ်ဝႃႈၸၢႆးၶိူဝ်းယင်းဢမ်ႇပႆႇႁွတ်ႈမႃး ပႂ်ႉပေႃးလႃႈၼႃႇ ပေႃးပူၼ်ႉၶၢဝ်းယၢမ်းလၢတ်ႈၵၼ်ဝႆႉယဝ်ႉၼႆၵေႃႈ ယင်းဢမ်ႇပႆႇႁၼ် ပႂ်ႉပႂ်ႉပေႃးၶၢၼ်ႉယဝ်ႉ ၸႂ်ယဵၼ်ယိင်းသႅင်သမ်ႉပေႃးၶႂ်ႈသဵင်ႈ ဢၢၼ်းတေဢွၵ်ႇၵႂႃႇႁင်းၵူၺ်းၼႆယူႇ။
“လၢတ်ႈၵၼ်တႄႉ7:00မူင်းဝႃႇ…ထိုင်9:00မူင်းယဝ်ႉၵေႃႈပႆႇႁွတ်ႈမႃးၼႆႉ…” မိူဝ်ႈတိုၵ်ႉပွင်ႉယူႇၼၼ်ႉ ၸၢႆးၶိူဝ်းၵေႃႈႁွတ်ႈမႃးသေ
“ႁဝ်းယွမ်းၼွမ်းယူႇ…ဢၼ်ႁွတ်ႈမႃးတူၵ်းလိုၼ်း…”
“ထၢင်ႇဝႃႈတေဢမ်ႇမႃးယဝ်ႉ…ၵေႃႈလီ…လီလိူဝ်သေဢမ်ႇမႃး…”
“ဢမ်ႇလႃႇဢမ်ႇပွင်ႉသင်ယဝ်ႉႁႃႉ…ႁၼ်မိူဝ်ႈသူတေႇႁွတ်ႈမႃးၼၼ်ႉ…ႁဝ်းၵၢၼ်ႉႁၢင်ႈႁႅၼ်းဝႆႉယူႇယဝ်ႉ”
“ၼႂ်းသၢႆတႃသူ…ႁၼ်ႁဝ်းပဵၼ်ၵူၼ်းၶီႈပွင်ႉဝႆႉၵူၺ်းႁႃႉ…တေပွင်ႉၵႂႃႇၵေႃႈဢမ်ႇမီးသင်လီၶိုၼ်ႈမႃးလႆႈ…မၼ်းတေႁဵတ်းႁႂ်ႈၵၢၼ်ႁဝ်းလူႉသုမ်းၵႂႃႇၵူၺ်းလူးၵွၼ်ႇ…သင်ပွင်ႉသေၸႂ်လမ်ၵၼ်ၵႂႃႇ…တႃႇတေႁဵတ်းၵၢၼ်ၸွမ်းၵၼ်ၵႂႃႇၼၼ်ႉၵေႃႈ…မၼ်းယၢပ်ႇၼႃႇ…ၵူၼ်းတၢင်းၼွၵ်ႈတူၺ်းၵေႃႈ…မၼ်းဢမ်ႇထုၵ်ႇတႃ…တႃႉတေပွင်ႉၵၼ်ႁႃတၢင်းၽိတ်းၵၼ်ယူႇၵူၺ်း…တႃႉဢဝ်လွင်ႈပွင်ႇၸႂ်သေ…ႁဵတ်းၵၢၼ်ၵႂႃႇမၼ်းတေၸၢင်ႈႁဵတ်းႁႂ်ႈၵၢၼ်ႁဝ်းၶိုပ်ႈၼႃႈဢမ်ႇၸႂ်ႈႁိုဝ်…ပွၵ်ႈၼၼ်ႉ…မၼ်းႁဵတ်းႁႂ်ႈႁဝ်းဝူၼ်ႉလႆႈၼၼ်ႉယဝ်ႉ…”
“ဢမ်ႇလီယုမ်ႇဝႃႈသူတေမေႃဝူၼ်ႉၸိူင်ႉၼႆ…လီၼပ်ႉယမ်တေႉယဝ်ႉ…”
“မိူဝ်ႈၼႆႉၸွင်ႇတေၵႂႃႇလႆႈယူႇႁႃႉ…ပေႃးဢမ်ႇၵႂႃႇလႆႈ…ၵႂႃႇမိူဝ်ႈၽုၵ်ႈၵေႃႈလီယူႇၼႃႈ…”
“ၵႂႃႇလႆႈယဝ်ႉ…”
ၶႃၵေႃႈလႆႈဢဝ်ၶူဝ်းၶွင်ၵႂႃႇၼမ်လႄႈ ၸင်ႇဢဝ်လူတ်ႉၵႂႃႇၵေႃႉလမ်းၼႆယူႇ ယၢမ်းၼၼ်ႉယိင်းသႅင် ၶပ်းၸၢၵ်ႈလူတ်ႉၶိူင်ႈမၼ်းယူႇ ၸင်ႇတေတူၺ်းမႅၼ်ႈဝႃႈၼမ်ႉမၼ်းလူတ်ႉမူတ်းယဝ်ႉ။
“ၼမ်ႉမၼ်းလူတ်ႉမူတ်း!!…ၵႂႃႇသိုဝ်ႉၵမ်းၼိုင်ႈၼႃႈ…”
“ၶူဝ်းမၼ်းၵေႃႈဢမ်ႇၸႂ်ႈၶွင်ၼၵ်းသင်ၵႃႈႁိုဝ်ၼင်ႇၵဝ်ႇ…ၵႂႃႇၸွမ်းၵၼ်ၵေႃႈလႆႈယူႇ…လူတ်ႉလမ်းလဵဝ်ၵူၺ်းၵေႃႈပေႃးယဝ်ႉ…ၼမ်ႉမၼ်းၵေႃႈတေဢမ်ႇသဵင်ႈၼမ်…တၢင်းယၢပ်ႇၵေႃႈတေဢမ်ႇသဵင်ႈၶၢဝ်းယၢမ်း…”
“ၸိူင်ႉၼၼ်ႁႃႉ…ၵေႃႈလီယူႇ…”
သွင်ၶႃၵေႃႈ ဢွၼ်ၵၼ်ဢွၵ်ႇၶၢဝ်းတၢင်းၵႂႃႇယူႇယဝ်ႉ။ ၶဝ်ႈမိူဝ်းၵႂႃႇတီႈၼႂ်းဝၢၼ်ႈ မိူဝ်းၵႂႃႇတီႈႁိူၼ်း လုင်းၵၢင်ႉၼၼ်ႉ လႆႈႁၼ်ၵူၼ်းဢွၼ်ၵၼ်မႃးပႂ်ႉၸႅတ်ႈတၢင်းပဵၼ်ၼမ်ဝႃႈၼမ်ယူႇ။ မိူဝ်းၵႂႃႇဢမ်ႇတၼ်းလႆႈလိုဝ်ႈ လႆႈႁဵတ်းၵၢၼ်ၵမ်းလဵဝ် ၶႃၵေႃႈလႆႈၸွႆႈၵၼ်ၸႅတ်ႈပၼ် ၵူၼ်းဝၢၼ်ႈ လုမ်းလႃးပၼ်ၵူၼ်းပဵၼ် ၵူၼ်းဢၼ်ဢမ်ႇၸၢင်ႈမႃးႁွတ်ႈလႆႈ ဢၼ်ပဵၼ်ၼႃႇႁႅင်းဝႆႉၼၼ်ႉၵေႃႈ လႆႈဢွၼ်ၵၼ်မိူဝ်းႁွတ်ႈထိုင်ႁိူၼ်းၵူၼ်းပဵၼ်သေ မိူဝ်းယူတ်းယႃပၼ်ၵႂႃႇယူႇ ၶႃလႆႈႁဵတ်းၵၢၼ်ၵႂႃႇ သမ်ႉပေႃးဢမ်ႇလႆႈလိုဝ်ႈ ထိုင်ၵၢင်ဝၼ်းပေႃးၶမ်ႈၵႂႃႇယဝ်ႉ။ ၶႃၸင်ႇတေလႆႈမိူဝ်းလိုဝ်ႈတီႈႁိူၼ်းလုင်းၵၢင်ႉၶဝ်ၼၼ်ႉသေ ၵိၼ်ၶဝ်ႈၵိၼ်သင်ယဝ်ႉၵေႃႈ လႆႈဢွၼ်ၵၼ်ၼင်ႈဢုပ်ႇလုင်းၵၢင်ႉၶဝ်ထႅင်ႈ သမ်ႉပေႃးလိုၵ်းၼႃႇယဝ်ႉ ၼမ်ႉၵေႃႈပႆႇလႆႈဢၢပ်ႇ ယိင်းသႅင်ၵေႃႈတင်းႁိူဝ်ႉတင်းၶႂ်ႈၼွၼ်းၶႂ်ႈဢၢပ်ႇၼမ်ႉသေ လွမ်လွမ်ထၢမ် ၸၢႆးၶိူဝ်းယူႇ။
“ပိူၼ်ႈဢၢပ်ႇၼမ်ႉတီႈလႂ်လႃႇ…ႁဝ်းၶႂ်ႈဢၢပ်ႇၼမ်ႉၼႃႇယဝ်ႉ…”
“ပိူၼ်ႈဢၢပ်ႇၼမ်ႉႁွင်ႈ…”
“ႁႃ!!…လိုၵ်းပေႃးတၢၼ်ႇၼႆႉ…တေလႆႈၵႂႃႇဢၢပ်ႇထိုင်ၼမ်ႉႁွင်ႈထႅင်ႈၵွၼ်ႇႁႃႉ…ႁဝ်းၶႂ်ႈၵႂႃႇဢၢပ်ႇၼမ်ႉ…ၶႂ်ႈမႃးၼွၼ်းၼႃႇယဝ်ႉ…” ၸၢႆးၶိူဝ်းႁၼ်ၼႃႈဢွၼ်ႈဝွၼ်း ယိင်းသႅင်ယဝ်ႉၵေႃႈႁၼ်ထိုင်ၵၢင်ၸႂ်သေ ၵိုတ်းလိုဝ်ႈလွင်ႈဢုပ်ႇ ႁဵတ်းႁၢင်ႈမိူၼ်ၶႂ်ႈၼွၼ်း ႁၢဝ်ႁိူမ်ႉၸူးယူႇ လုင်းၵၢင်ႉႁၢဝ်ႁိူမ်ႉမိူၼ်ၶႂ်ႈၼွၼ်းမႃး လႄႈ ၸင်ႇႁႂ်ႈမႄႈၸဝ်ႈႁိူၼ်းၶဝ်ဢဝ်ၽႃႈမႃးသိူဝ်ႇပၼ်ၶႃယူႇ။ ယၢမ်းၼၼ်ႉၸၢႆးၶိူဝ်းၵေႃႈ
“မေႃယႃ…ၵႂႃႇဢၢပ်ႇၼမ်ႉလႆႈယဝ်ႉ…” ယိင်းသႅင်ႁၼ်ၽႃႈယဝ်ႉၵေႃႈ
“ဢမ်ႇၵႂႃႇယဝ်ႉ…မိူဝ်ႈၽုၵ်ႈၸင်ႇတေၵႂႃႇလႄႈ…ႁဝ်းၶႂ်ႈၼွၼ်းၼႃႇယဝ်ႉ…”
“မဵၼ်ႁိူဝ်ႇမဵၼ်ၶႆး…ၼွၼ်းႁဵတ်းၶႅၵ်ႇပိူၼ်ႈ…မီးလွင်ႈမူတ်းသႂ်ၽွင်ႈလႄႈ…” ဢဝ်တႃၼွၼ်းယိင်းသႅင်ပေႃးႁၢႆလူင်ၵႂႃႇ ၼႅတ်ႈဢဝ်ၶူဝ်းယဝ်ႉ ဢွၵ်ႇၵႂႃႇယူႇ။ မိူဝ်ႈၵႂႃႇၸွမ်းတၢင်းယူႇ ၼၼ်ႉၵေႃႈ
“လပ်းသိင်ႇပေႃးတၢၼ်ႇၼႆႉယဝ်ႉ…တိုၵ်ႉႁႃတေလႆႈၵႂႃႇဢၢပ်ႇၼမ်ႉဝႃႇ…ႁူႉယူႇဝႃႈၵၢင်ဝၼ်းၶမ်ႈၵေႃႈ…တိုၵ်ႉၼင်ႈဢုပ်ႇယူႇတိၵ်းတိၵ်း…”
“ႁၼ်ႁိုဝ်…လွင်ႈယဵၼ်ႉၵၼ်ႈမၼ်းဢမ်ႇမီးလႆႈႁိုင်…တူဝ်တေႉမၼ်းဢွၵ်ႇမႃးယဝ်ႉ…”
“ၸွင်ႇမၼ်းသမ်ႉဢမ်ႇလီပွင်ႉႁိုဝ်…”
“ပဵၼ်သင်ဢမ်ႇလၢတ်ႈႁႂ်ႈပိူၼ်ႈမႃးသူင်ႇလႃႇ…တေပႂ်ႉႁဝ်းႁဵတ်းသင်…ဢမ်ႇၼၼ်ၵေႃႈၶႂ်ႈဢၢပ်ႇၼမ်ႉၸွမ်းႁဝ်းႁႃႉတေႃႈ…”
“ယွင်ႇယဝ်ႉၼႄႇ…ဢမ်ႇၵႂႃႇၸွမ်းသူယဝ်ႉ…”
ယိင်းသႅင်ၵေႃႈႁူၼ်လင်ၵႂႃႇၶိုၼ်း ယၢမ်းၼၼ်ႉ ၸၢႆးၶိူဝ်းၸင်ႇလႆႈဝၵ်ႉဢဝ်ၶႅၼ်မႃးလႄႈ ဢမ်ႇတၼ်းတင်ႈတူဝ် ဝူင်လူင်ၵႂႃႇမိူၼ်တေလူမ်ႉ ၵူၺ်းၵႃႈၸၢႆး ၶိူဝ်းၼႅတ်ႈဢဝ်မိုဝ်းၶုၼ်ႇႁၢဝ်ႉၸၼ်ဢဝ်ၶႅၼ်ယိင်းသႅင်ၵႂႃႇၶွၼ်ၼိုင်ႈလႄႈ ထႅင်ႈၶွၼ်ၼိုင်ႈ ႁွင်းႁပ်ႉဝႆႉဢႅဝ်ယိင်းသႅင်ၼၼ်ႉ လၢၵ်ႈၸၼ်ၶဝ်ႈမႃးၸူးတူဝ်မၼ်းယူႇ ယၢမ်းၼၼ်ႉၼႃႈၶႃၵေႃႈသုတ်ႉၶဝ်ႈၸမ်ၵၼ် ၵႂႃႇလူၺ်ႈဢမ်ႇတၼ်းႁူႉတူဝ် သၢႆတႃယၵ်ႉတူၺ်းၵၼ်ၵႂႃႇတႂ်ႈငဝ်းလိူၼ်လႅင်းလႅင်းၼၼ်ႉၵမ်းၼိုင်ႈသေ ၼႃႈၸၢႆးၶိူဝ်းၵေႃႈသုတ်ႉၶဝ်ႈၸမ် ယိင်းသႅင်ၵႂႃႇထႅင်ႈ ထိုင်တီႈႁဵတ်းႁႂ်ႈႁူဝ်ၸႂ်တွတ်ႇတဵၼ်ႈႁႅင်းမႃးလႄႈ ဢမ်ႇႁူႉဝႃႈတေလႆႈႁဵတ်းၸိူင်ႉႁိုဝ် ယိင်းသႅင်ၵေႃႈၼႅတ်ႈၵၼ်ႈၸႂ်လပ်းတႃလူင်ၵႂႃႇပႅတ်ႈ ၼႃႈၸၢႆးၶိူဝ်း ၼၼ်ႉၵေႃႈသုတ်ႉၶဝ်ႈၸမ်ယိင်းသႅင်တိၵ်းတိၵ်းယဝ်ႉ လၢတ်ႈၵႂႃႇတီႈႁိမ်းႁူၼၼ်ႉလွႆးလွႆးဝႃႈ
“ၽူႈယိင်းၵေႃႉလဵဝ်မိူဝ်းႁင်းၵူၺ်းၸိူင်ႉၼႆ…သူဝူၼ်ႉဝႃႈတေပဵၼ်သင်မႃးလႃႇ…ပေႃးၵူၼ်းဢမ်ႇလီမႃးႁၼ်…”
ယိင်းသႅင်လႆႈသတိမႃးၶိုၼ်းသေ
“သူဝူၼ်ႉဝႃႈမၼ်းတေမီးယူႇႁႃႉ…ဝၢၼ်ႈယဵၼ်ပေႃးတၢၼ်ႇၼႆႉ…ထႅင်ႈလွင်ႈၼိုင်ႈၵေႃႈႁဝ်းၵေႃႈပဵၼ်သိုၵ်းလူး…တေၵူဝ်ႁဵတ်းသင်…”
“ၸိူင်ႉႁိုဝ်ၵေႃႈပဵၼ်ၽူႈယိင်းၵူၺ်း…ၵေႃႈယဝ်ႉလႄႈဢမ်ႇပဵၼ်သင်…မိူဝ်းလႄႈၶႂ်ႈမိူဝ်းၵေႃႈ…ငိၼ်းဝႃႈၵၢင်ၶမ်ႈၵၢင်ၶိုၼ်း…မီးၵူၼ်းဢွၵ်ႇလႄႇၸွမ်းၵိဝ်ႇၼႆၼေႈ…ပေႃးဝႃႈမၼ်းႁၼ်ၽူႈယိင်းဢွၵ်ႇလႄႇၸွမ်းၵိဝ်ႇၼႆ…တေဢဝ်မိူဝ်းႁဵတ်းမေးမၼ်းၼႆဝႃႇ…ၵူၼ်းၼႂ်းဝၢၼ်ႈၼႆႉ…ၸႃႉဢၼ်မီးလုၵ်ႈယိင်းသၢဝ်ၶဝ်ၸိူဝ်းၼႆႉ…ဢမ်ႇႁတ်းပၼ်လုၵ်ႈၶဝ်ဢွၵ်ႇႁိူၼ်းသေၵေႃႉၼေႈ…”
“လွၵ်ႇႁဝ်းႁႃႉ…”
“ဢမ်ႇလႆႈလွၵ်ႇ…ႁဝ်းမႆႈၸႂ်ဝႃႈ…ပေႃးသူႁၢႆၵႂႃႇယဝ်ႉ…ႁဝ်းတေႁဵတ်းႁိုဝ်လၢႆးငၢၼ်းတီႈႁူဝ်ၼႃႈၼၼ်ႉၵူၺ်း…မၢင်ပွၵ်ႈမႃးၵေႃႈ…တႃႉလီဢီးလူၽႃႈႁူမ်ႇႁိူၼ်းလုင်းႁဵင်ၶဝ်လႃႈၼေႃ…”
“ပဵၼ်သင်ၸိူဝ်ႈၶၢဝ်းၼႆႉပေႉလၢတ်ႈၵႂၢမ်းၼမ်လႃႇ…” သဵင်တီႈလႂ်ၵေႃႈဢမ်ႇႁူႉမေႃးလူင်မႃးႁိမ်းၶၢင်ႈတၢင်းၼၼ်ႉ
“ဢႁႅမ်ႉ!!” ၼႆၵေႃႈဢဝ်ယိင်းသႅင်လႅၼ်ႈၵျွၵ်းၵွပ်ႈပၼ်ၸၢႆးၶိူဝ်းလူင်ၵႂႃႇၵမ်းလဵဝ်။
“ႁဝ်းၵူဝ်ယဝ်ႉ!!…ႁဝ်းတေၵႂႃႇၸွမ်းသူ!!…ယႃႇပေၵႂႃႇပႅတ်ႈႁဝ်းလႄႈ…” ႁွင်ႉႁႆႈဢွၵ်ႇမႃးယူႇ။
ယၢမ်းၼၼ်ႉမီးငဝ်းၵူၼ်းၵေႃႉၼိုင်ႈ မူၼ်ႉယုမ်းလူင်မႃးႁၼ်ၶႃသေ
“သူသွင်ၵေႃႉၽူဝ်မေးတေထဵင်ၵၼ်ၵေႃႈပၼ်ၵဝ်ၵႂႃႇဢိၼ်ႉလႄႈ…”
ယိင်းသႅင်ၸင်ႇတေလႆႈသတိမႃးၶိုၼ်းယဝ်ႉ လူင်းလင်ၸၢႆးၶိူဝ်းမႃးသေ
“လုင်းလုၵ်ႉတီႈလႂ်မႃးလႃႇ…ၵၢင်ၶမ်ႈၵၢင်ၶိုၼ်းမႃးမီးယူႇၸိူဝ်းၼႆႉ…ပေႃးတၢၼ်ႇဝႃႈပဵၼ်ၽဵတ်ႇယဝ်ႉ…” လုင်းၼၼ်ႉၵေႃႈဢမ်ႇလႆႈတွပ်ႇသင် ပွၵ်ႈမိူဝ်းၵႂႃႇပႅတ်ႈယူႇ။ ယိင်းသႅင်ၵေႃႈဢမ်ႇယွမ်းလွင်ႈ ဢၼ်ဝႃႈ
“လုင်း…ပဵၼ်သင်လႄႈလၢတ်ႈႁင်းၵၼ်ၸိူင်ႉၼႆလႃႇ…ႁႃးသွင်ၵေႃႉဢမ်ႇၸႂ်ႈၽူဝ်မေးၵၼ်ၼႃ…ဢမ်ႇၸႂ်ႈၽူဝ်မေးၵၼ်…ၸွင်ႇငိၼ်းႁိုဝ်!…” ႁွင်ႉသႅၼ်ႇလူင်ၵႂႃႇတိၵ်းတိၵ်းယူႇ။
“ယႃႇၶတ်းၸႂ်ၵႄႈတူဝ်ယူႇယဝ်ႉ…ယိုင်ႈၵႄႈတူဝ်ၵႃႈႁိုဝ်…ယိုင်ႈပဵၼ်လွင်ႈလီၶႂ်ႈၶူဝ်တွၼ်ႈတႃႇပိူၼ်ႈၵူၺ်း…တေမီးၽႂ်ယုမ်ႇလႃႇ…ၽူႈယိင်းၽူႈၸၢႆးၵၢင်ၶမ်ႈၵၢင်ၶိုၼ်းယူႇၸွမ်းၵၼ်ၸိူင်ႉၼႆ…သင်ဢမ်ႇၸႂ်ႈ…ၸိုဝ်ႈသဵင်သလေႇၼႃႈတႃၽူႈယိင်းၶႅၼ်းတေဢမ်ႇမီးယဝ်ႉ…ပဵၼ်ၽူဝ်မေးၵၼ်ၼႆႉမၼ်းလီယဝ်ႉ…ၽႂ်ၵေႃႈတေဢမ်ႇၸၢင်ႈဢဝ်ၵႂႃႇလၢတ်ႈထိုင်လွင်ႈဢမ်ႇလီလႆႈ…ယဝ်ႉၵေႃႈ…ပိူၼ်ႈတူၺ်းဝႃႈႁႃးပဵၼ်ၽူဝ်မေးၵၼ်…ၸဵမ်မိူဝ်ႈၶဝ်ႈဝၢၼ်ႈမႃးပုၼ်ႉယဝ်ႉ…”
“ၸိူင်ႉႁိုဝ်ၵေႃႈပဵၼ်လွင်ႈပွမ်ၵူၺ်းၼင်ႇၵဝ်ႇ…ၵႂႃႇဢၢပ်ႇၼမ်ႉၵေႃႈၵႂႃႇလႄႈ…”
“ၸူဝ်းၵၼ်ၵႂႃႇဢၢပ်ႇၼမ်ႉၸိူင်ႉၼႆ…ၶႂ်ႈႁႂ်ႈမၼ်းပဵၼ်မႃးတေႉႁႃႉတေႃႈ…”
“ႁဝ်းတေယဵၼ်ႉၸႂ်ဢမ်ႇလႆႈယဝ်ႉ…ၵူၼ်းသင်ပေႉမႃးပႅတ်ႈလၢႆ…မိူဝ်ႈလႂ်ပိူၼ်ႈဝူၼ်ႉၵေႃႈ…ပၼ်ပိူၼ်ႈဝူၼ်ႉၵႂႃႇလႄႈ…လွင်ႈတေႉမၼ်းၵေႃႉပဵၼ်လွင်ႈတေႉၵူၺ်း…လွင်ႈၽၢမ်းတႃၼၼ်ႉ…မၼ်းဢမ်ႇႁဵတ်းႁႂ်ႈပဵၼ်လွင်ႈတေႉလႆႈယူႇယဝ်ႉ…”
“ႁပ်ႉၸွမ်းတၢင်းဝူၼ်ႉ…ဢမ်ႇၶိုတ်းၸွမ်းလႆႈယဝ်ႉ…”
သိုပ်ႇလူထႅင်ႈတွၼ်ႈတေမႃးၶႃႈ
