ထိုင်ၼင်ႇၵၢင်ၶမ်ႈမႃး ၶမ်းႁွမ်လႄႈတင်းလုၵ်ႈ ဢွၼ်ၵၼ်ႁၢင်ႈၶိူင်ႈႁၢင်ႈၽၢင်သေ ပႆၵႂႃႇၸွမ်းပွႆး လုၵ်ႈဢွၼ်ႇၼႆၵေႃႈ ပေႃးႁၼ်တၢင်းလဵၼ်ႈၼႆတုၵ်းၶႂ်ႈလႆႈယဝ်ႉ ဢမ်ႇသိုဝ်ႉပၼ်သမ်ႉႁႆႈထႅင်ႈ ၸၢင်ႈတေႁဵတ်းႁိုဝ် ႁၼ်ၵေႃႈၵႃႈလႆႈသိုဝ်ႈပၼ်ယဝ်ႉဢိူဝ်ႈလေႃႇ ၵေႃႉပီႈတႄႉလၢတ်ႈငၢႆႈယူႇ ၵေႃႉၼွင်ႉတႄႉပေႃးဝႃႈၶႂ်ႈလႆႈၼႆဢမ်ႇၸူး တၢင်းၶႂ်ႈလႆႈသမ်ႉမၢၵ်ႇပွင်းလူမ်း ဢၼ်ပိူၼ်ႈသွႆႉပဵၼ်ပုၵ်ႉသေပိဝ်ယူႇဝႆႉၼၼ်ႉယဝ်ႉ။
ၵူၼ်းၼမ်လႄႈ ၶမ်းႁွမ်သမ်ႉပေႃးဢမ်ႇႁတ်းပွႆႇသႅင်လႅင်း ပေႃးဢမ်ႇၸေးၵေႃႈႁွပ်ႇလူင်ၵႂႃႇတေႃႇပေႃးသုတ်းတၢင်းယဝ်ႉ။ မိူဝ်ႈၵႂႃႇႁွတ်ႈထိုင်တီႈပၢႆႉတၢင်းၽႄၶဝ်ႈၼႂ်းပၢင်ပွႆးၼၼ်ႉ ႁၼ်လႅင်းမိူင်းပႂ်ႉဝႆႉယူႇတီႈၼၼ်ႈသေပႆမႃးၸူးၶဝ်မႄႈလုၵ်ႈ
“ႁႂ်ႈႁဝ်းဢုမ်ႈလႄႈ..”
ၶမ်းႁွမ်ၵေႃႈဢမ်ႇထဵင် ယိုၼ်ႈပၼ်လႅင်းမိူင်းၵမ်းလဵဝ် “ၼၵ်းဝႆႉလူးၼႆႉ..သူတေႁိူဝ်ႉတေယဝ်ႉ”
“ပေႃးဝႃႈပဵၼ်မႄႈလုၵ်ႈဢွၼ်ႇမႃးယဝ်ႉ…လုၵ်ႈႁဝ်းတေၼၵ်းတၢၼ်ႇထူင်ၶဝ်ႈသၢၼ်ၵေႃႈၵႃႈလႆႈယွင်ႈႁႂ်ႈမၼ်းပေႉယဝ်ႉ”
“သူလဵင်ႉလုၵ်ႈၵေႃႉလဵဝ်…ၸွင်ႇႁိူဝ်ႉႁိုဝ်”
“ႁဝ်းမီးတၢင်းသိူဝ်းယူႇၼႃ…”
“လဵင်ႉပႃးႁဝ်းထႅင်ႈၵေႃႉၼိုင်ႈဢမ်ႇလီႁိုဝ်…”
“လဵင်ႉလႆႈလုၵ်ႈဢွၼ်ႇၵူၺ်းၵူၼ်းလူင်တႄႉဢမ်ႇႁပ်ႉလဵင်ႉၶႃႈ…”
မိုဝ်းၶွၼ်ၼိုင်ႈဢုမ်ႈလုၵ်ႈဝႆႉလႄႈ ထႅင်ႈၶွၼ်ၼိုင်ႈ ယိပ်းမိုဝ်းၶမ်းႁွမ်ဝႆႉယူႇ၊ ၶမ်းႁွမ်ၵေႃႈဢမ်ႇလႆႈထဵင်ၶိုၼ်း မိုဝ်းၶွၼ်ၼိုင်ႈၵေႃႈ တဝ်ႉႁူဝ်မႃႇလုၵ်ႈၸၢႆးမၼ်းဝႆႉယဝ်ႉ။
“ပွၵ်ႈၼႆႉၸွင်ႇတေမီးၵၢၼ်ထႅင်ႈႁိုဝ်..”
“ႁဝ်းလၵ်ႉပၢႆႈၵၢၼ်ယူႇ…ၸွင်ႇၵွႆႈမိူဝ်းဢဝ်တၢမ်ႇၵမ်းလင်ဢဝ်”
ၽွင်းပွႆးတိုၵ်ႉၵိုၼ်း လုၵ်ႈဢွၼ်ႇသမ်ႉၶႂ်ႈၼွၼ်းယဝ်ႉၼႆၵေႃႈ ဢွၼ်ၵၼ်ပွၵ်ႈမိူဝ်းၶိုၼ်းတီႈႁိူၼ်းယဝ်ႉ။ လႅင်းမိူင်းၼၼ်ႉၵေႃႈ ၸွမ်းသူင်ႇတေႃႇပေႃးထိုင်ႁိူၼ်းသေယဝ်ႉ ပႂ်ႉႁႂ်ႈၶမ်းႁွမ်ၵွမ်ႇလုၵ်ႈၼွၼ်းလပ်းသေ ၸင်ႇတေဢွၵ်ႇႁိူၼ်းမႃး လႅင်းမိူင်းထွင်ႇလူမ်းၼင်ႈပႂ်ႉယူႇတီႈၼႃႈႁိူၼ်းၼၼ်ႉတေႉၼင်ႇၵဝ်ႇယဝ်ႉ။
ၶမ်းႁွမ်မႃးၼင်ႈႁိမ်းမၼ်းသေယဝ်ႉ
“ၸွင်ႇၵတ်းႁိုဝ်”
“ဢမ်ႇၼႃ…သူလူး..ၸွင်ႇႁိူဝ်ႉႁိုဝ်…လဵင်ႉလုၵ်ႈႁင်းၵူၺ်း”
“ဢိုမ်ႈ…မၢင်ပွၵ်ႈၵေႃႈၶႂ်ႈတၢႆၵွၼ်ႇယဝ်ႉ..ၵူၺ်းၵႃႈမိူဝ်ႈႁၼ်တႃလမ်လမ်ဢွၼ်ႇယၵ်ႉတူၺ်းယူႇ..မၼ်းၵေႃႈၸိုၼ်ႇႁႂ်ႈႁဝ်းလုၵ်ႉမႃးၶိုၼ်းသိုပ်ႇၵႂႃႇထႅင်ႈၼၼ်ႉယဝ်ႉ”
“ႁဝ်းဝႃႈသူႁဵတ်းလီယဝ်ႉၼႃႈ…ဢၼ်ပွႆႇပႅတ်ႈႁဝ်းၵႂႃႇ”
ၶမ်းႁွမ်ယၵ်ႉတူၺ်းၼႃႈလႅင်းမိူင်း ဢၼ်ၼင်ႈယူႇႁိမ်းမၼ်းၼၼ်ႉသေ
“ႁိုမ်..”
“ပေႃးဝႃႈသူယူႇၸွမ်းႁဝ်း…သူယိုင်ႈၶႅၼ်းတေႁိူဝ်ႉလိူဝ်သေၼႆႉၵေႃႈပဵၼ်လႆႈ…ႁဝ်းပဵၼ်သိုၵ်းဢမ်ႇမီးသင်ပၼ်သူသေဢမ်ႇၵႃး..ယင်းပၼ်လွင်ႈမႆႈၸႂ်သူထႅင်ႈလူးၵွၼ်ႇ…ဢမ်ႇမီးၼႃႈၵၢၼ်လဵင်ႉၼႃႈႁိူၼ်းလႆႈ…ဢမ်ႇမီးငိုၼ်းတႃႇၼႃႈႁိူၼ်းႁဝ်းပဵင်းပေႃးလႆႈ…ၵမ်းလိုၼ်းမႃးၵေႃႈတေပဵၼ်သူၵူၺ်းၵေႃႉတေလႆႈဢဝ်ပုၼ်ႈၽွၼ်း…ယွၼ်ႉႁဝ်းဢမ်ႇမီးၶၢဝ်းယၢမ်း…ဢမ်ႇမီးသင်လိူဝ်သေႁူဝ်ၸႂ်…သင်သူၸွမ်းႁဝ်းမႃး…ႁဝ်းတင်းတေဝူၼ်ႉၽိတ်းတေႃႇတူဝ်ၵဝ်ႇလိူဝ်သေၼႆႉၵွၼ်ႇယဝ်ႉ…”
“ၸူဝ်ႈႁဝ်းၵိူတ်ႇမႃး…ႁဝ်းဢမ်ႇယၢမ်ႈႁူႉဝႃႈပဵၼ်ၵူၼ်းမီးပေႃႈၼၼ်ႉမိူၼ်ႁိုဝ်ၼႆ…ပိူၼ်ႈလဵင်ႉလူၸိူင်ႉႁိုဝ်ၼႆ…ႁဝ်းယၢမ်ႈထၢမ်မႄႈတႃႇသေႇဝႃႈဢမ်ႇႁိူဝ်ႉႁႃႉလဵင်ႉႁဝ်းမႃး…မႄႈၵေႃႈဢမ်ႇတွၼ်ႉဝႃႈမၼ်းႁိူဝ်ႉ…မၼ်းဝႃႈလီၵႃႈႁိုဝ်ဢၼ်မီးႁဝ်းပီႈၼွင်ႉယူႇ..ႁဝ်းၵေႃႈပွင်ႇၸႂ်မႄႈမိူဝ်ႈမီးလုၵ်ႈလုၵ်ႈမႃးၼၼ်ႉယဝ်ႉ…ယွၼ်ႉပိူဝ်ႈၼၼ်လႄႈႁဝ်းၸင်ႇဢမ်ႇၶႂ်ႈၶၢမ်ႇသေ…ႁဝ်းလဵင်ႉလုၵ်ႈလႆႈယူႇလႄႈတေလဵင်ႉၵႂႃႇႁင်းၵူၺ်းၵူၺ်းၼႆၼၼ်ႉသေ…ႁဝ်းၸင်ႇလိူၵ်ႈလဵင်ႉႁင်းၵူၺ်းၼၼ်ႉယဝ်ႉ…မၼ်းၵေႃႈဢမ်ႇလႆႈဝႃႈႁၢင်ႈႁၢႆႉၼႃႇၽႅဝ်ၼႃ…”
“ႁဝ်းဝႃႈႁဝ်းတေဢမ်ႇတေႇၼႃႈႁိူၼ်းထႅင်ႈယဝ်ႉၼႃႈ…”
“လၢတ်ႈမႃးပေႃးတၢၼ်ႇဝႃႈယၢမ်ႈတေႇယဝ်ႉ…”
“ဢိုမ်ႈ…ဢမ်ႇတေႇၵေႃႈမိူၼ်လႆႈတေႇယဝ်ႉ..မီးတင်းလုၵ်ႈမီးတင်းမေးယဝ်ႉလူး”
“ၽႂ်ပဵၼ်မေးသူ…”
“သူတေၶႂ်ႈႁူႉႁဵတ်းသင်…သူတမ်ႉဢမ်ႇသူၼ်ၸႂ်ႁဝ်းယူႇယဝ်ႉလူး”
“ပေႃးဝႃႈတေႉ…ႁဝ်းမီးပေႃႈတေႉတေႉယူႇ…လႄႈၶဝ်ၵေႃႈယူႇတီႈၼႆႈၵူၺ်း…ႁဝ်းၵေႃႈၶႂ်ႈမႃးႁၼ်ပေႃႈႁဝ်းၸွမ်းလုၵ်ႈလုၵ်ႈႁဝ်းမိူၼ်ၵၼ်ၼၼ်ႉယဝ်ႉ”
“ပဵၼ်ၽႂ်လႃႇလၢတ်ႈႁဝ်းလႆႈယူႇႁႃႉ…”
“ၵူၺ်းၵႃႈႁဝ်းဢမ်ႇၶႂ်ႈႁူႉၸၵ်းယဝ်ႉ…ဢမ်ႇၶႂ်ႈလၢတ်ႈထိုင်မၼ်းယဝ်ႉ”
“ယွၼ်ႉသင်လႄႈဝႃႈၼၼ်လႃႇ…”
“မၼ်းပဵၼ်လွင်ႈဝၼ်းလင်ၵႂႃႇယဝ်ႉ…ၶဝ်ၵေႃႈမီးတၢင်းသိူဝ်းၸွမ်းၼႃႈႁိူၼ်းၶဝ်လီယူႇလႄႈ…ၶဝ်ၵေႃႈဢမ်ႇႁူႉၸၵ်းႁဝ်းယဝ်ႉ…”
ၶမ်းႁွမ်ထူၺ်ႈၸႂ်လူင်သေ ယိပ်းဢဝ်မိုဝ်းလႅင်းမိူင်းယဝ်ႉ “တီႈတေႉမႄႈႁဝ်းၵေႃႈလႆႈတၢႆၵႂႃႇၸဵမ်မိူဝ်ႈႁဝ်းၵေႃႉလဵၵ်ႉၼၼ်ႉမိူၼ်ၵၼ်…ပိူၼ်ႈႁူႉဝႃႈပေႃႈႁဝ်းပဵၼ်သိုၵ်းလႄႈ…မႃးၺွပ်းမႄႈႁဝ်းသေမႄႈႁဝ်းၵေႃႈလႆႈပၢႆႈၵႂႃႇႁႃလုင်းႁဝ်း…မိူဝ်ႈဢဝ်ႁဝ်းၵႂႃႇၸွမ်းတၢင်းၼၼ်ႉ…ၺႃးပိူၼ်ႈလမ်းသေမႄႈႁဝ်းၵေႃႈဢဝ်ႁဝ်းဝႆႉတႂ်ႈႁူမ်ႈမႆႉယဝ်ႉဢဝ်ဝႂ်မႆႉႁူမ်ႇသေၵႂႃႇပႅတ်ႈႁဝ်းလႄႈ…ထုၵ်ႇပိူၼ်ႈယိုဝ်းတၢႆပႅတ်ႈ…ဢၼ်ႁဝ်းၵႆႉၵႆႉၾၼ်ယူႇတႃႇသေႇၼၼ်ႉမၼ်းဢမ်ႇၸႂ်ႈၾၼ်လႄႈ…ပဵၼ်လွင်ႈဢၼ်ႁဝ်းလႆႈထူပ်းမႃးၼၼ်ႉယဝ်ႉ…တီႈဢၼ်မႄႈႁဝ်းဢဝ်ႁဝ်းသိမ်းဝႆႉၼၼ်ႉၵေႃႈ…လႆႈပဵၼ်ပၢင်တိုၵ်းၵၼ်သေလုင်းႁဝ်းၶဝ်ၵေႃႈ…လႆႈမႃးၺႃးႁဝ်းလႄႈ…ဢဝ်ႁဝ်းမႃးယူႇၸွမ်းပႃႈႁဝ်းယဝ်ႉ…ၽွင်းၼၼ်ႉပႃႈႁဝ်းၵေႃႈတင်းတိုၵ်ႉပႃးတွင်ႉၶမ်းမိူင်းယူႇ…ဢိူဝ်ႈ…”
ၶမ်းႁွမ်ၼိမ်ယဵၼ်သေ ၶိုၼ်းသိုပ်ႇလၢတ်ႈထႅင်ႈ “ပေႃႈတေႉတေႉႁဝ်းၼၼ်ႉ…တင်းဢမ်ႇႁူႉၵွၼ်ႇဝႃႈမႄႈႁဝ်းပႃးတွင်ႉႁဝ်းလႄႈ…မႄႈႁဝ်းၵေႃႈဢမ်ႇႁူႉမိူၼ်ၵၼ်ဝႃႈပေႃႈႁဝ်းယူႇတီႈလႂ်…လိူဝ်သေလႆႈႁူႉၶၢဝ်ႇဝႃႈပေႃႈႁဝ်းၵႂႃႇဢဝ်မေးထႅင်ႈယဝ်ႉၼႆလႄႈ…မႄႈႁဝ်းၵေႃႈဢမ်ႇၸွမ်းယဝ်ႉသေ…လႆႈလဵင်ႉႁဝ်းမႃးၵေႃႉလဵဝ်…တေႃႇထိုင်မၼ်းပေႃးသဵင်ႈပႅတ်ႈၼၼ်ႉယဝ်ႉ..ႁဝ်းတႄႉဢမ်ႇတွင်းၼင်ႇၵဝ်ႇ…ပႃႈႁဝ်းဢၼ်ႁဝ်းႁွင်ႉဝႃႈမႄႈယူႇမိူဝ်ႈလဵဝ်ၼႆႉၶိုၼ်းလၢတ်ႈၼႄႁဝ်းဢိူဝ်ႈ..”
လႅင်းမိူင်းဢဝ်တၢင်းလွင်ႈၵွတ်ႇၼၼ်ႉ သူင်ႇလွင်ႈဢုၼ်ႇၸႂ်ပၼ်ယဝ်ႉ။
ပွႆးဝၢႆး လႅင်းမိူင်းသိုပ်ႇႁဵတ်းၼႃႈၵၢၼ်ပုၼ်ႈၽွၼ်းတူဝ်ၵဝ်ႇ ၶမ်းႁွမ်ၵေႃႈပွၵ်ႈၶိုၼ်းတီႈယူႇသေ ၸႂ်ႉၸၢတ်ႈပၢၼ်ၵႂႃႇႁင်းၽႂ်ႁင်းမၼ်းယဝ်ႉ။
ႁူဝ်ၶမ်ႈၽွင်းၶၢဝ်းလိုဝ်ႈႁိူဝ်ႉလိုဝ်ႈၸႂ်ယူႇၼၼ်ႉ ၶမ်းႁွမ်တႄႉဢမ်ႇတၼ်းလႆႈလိုဝ်ႈ ၵႂႃႇႁပ်ႉလုၵ်ႈပွၵ်ႈႁူင်းႁဵၼ်းမႃးၵေႃႈ ၵုမ်ႇသုၵ်ႉသၵ်ႉႁႂ်ႈလုၵ်ႈဢွၼ်ႇဢၢပ်ႇၼမ်ႉသေ ႁႂ်ႈၶဝ်ႁဵတ်းၵၢၼ်ႁိူၼ်း ၽွင်းမၼ်းႁဵတ်းၶဝ်ႈၽၵ်းယူႇၼၼ်ႉလႄႈ
“မႄႈၾူင်းမႃး!!…”
“ၽႂ်လႃႇလုၵ်ႈ…”
“ပေႃႈလုၵ်ႈႁဝ်း…” ၼေႃႇမိူင်းဢၼ်မေႃဢၢၼ်ႇမေႃလူလိၵ်ႈတႆးၼၼ်ႉလူၼႄယူႇ။
“ပေႃႈသူဢိူဝ်ႈႁပ်ႉလႄႈ…”
“ပေႃႈပေႃႈ!!..” သႅင်လႅင်းၼၼ်ႉတႄႉၼႅတ်ႈငွၵ်ႈတူၺ်းၵမ်းလဵဝ်ယဝ်ႉ။
“မႄႈလူး…” ၼေႃႇမိူင်းဢဝ်ၾူင်းထွင်ႇၵႂႃႇတၢင်းၶမ်းႁွမ်ႁဵတ်းၶဝ်ႈၽၵ်းၼၼ်ႉသေ
“လုၵ်ႈလုၵ်ႈႁဵတ်းသင်ယူႇလႃႇ…”
“ႁဵတ်းၵၢၼ်ႁိူၼ်းဢေႃႈ…” သႅင်လႅင်းၼၼ်ႉၵေႃႈ ဢဝ်ၽိုၼ်ၸေႈဢၼ်မၼ်းယွမ်ႉသီၼၼ်ႉမႃးၼႄလႅင်းမိူင်းယူႇ။ ၼႂ်းႁၢင်ႈၼၼ်ႉတႄႉ ပဵၼ်ႁၢင်ႈၵႃႇတုၼ်းၵူၼ်းဢွၼ်ႇ ဢၼ်မီးၵူၼ်းသီႇၵေႃႉ ၶႂ်ႈပွင်ႇဝႃႈပေႃႈမႄႈလုၵ်ႈၼႆၼၼ်ႉယဝ်ႉ။
သုတ်းယဝ်ႉ။
ၸိူင်းၼႆႉတွၼ်ႈတႃႇလွင်ႈမူၼ်းသိူဝ်းၵူၺ်း ဢွင်ႈတီႈတေၸၢင်ႈဢိင်ဢဝ်တီႈပဵၼ်တေႉယူႇသေတႃႉ လွင်ႈဢၼ်ၵိူတ်ႇပဵၼ်မႃးၼႂ်းၸိူင်းၼၼ်ႉတႄႉ ပဵၼ်လွင်ႈဝူၼ်ႉၶႆႈမႃးဢဝ်ၵူၺ်းၶႃႈ။
ၼပ်ႉယမ်ထိုင်ၽူႈလူလိၵ်ႈႁဝ်းယူႇဢေႃႈ
တႅမ်ႈ-မွၵ်ႇႁူမ်ႈၾႃႉ
တႄႇတႅမ်ႈ -21/12/2019 ယဝ်ႉ10/4/2020
