တိုၼ်ႇလႅင်း တွၼ်ႈသီႇသိပ်းဢဵတ်း

ႁိုင်ယူႇဢမ်ႇတၢၼ်ႇၶမ်းႁွမ်ၵေႃႈသုတ်ႉတူဝ်ဢွၵ်ႇမႃး ၵူမ်ႈၼႃႈၵႂႃႇပႅတ်ႈဢိတ်းၼိုင်ႈယဝ်ႉ

“ႁဝ်းၵေႃႈမီးလွင်ႈၶႂ်ႈလၢတ်ႈႁႂ်ႈပဵၼ်ၶေႃႈလိုၼ်းသုတ်း…”

လႅင်းမိူင်းသုတ်ႉတူဝ်ဢွၵ်ႇႁၢင်ႇသေ ၶမ်းႁွမ်ဢမ်ႇပၼ်ႁႂ်ႈလႅင်းမိူင်းလႆႈတွပ်ႇ မၼ်းၸင်ႇသိုပ်ႇလၢတ်ႈထႅင်ႈ “ႁဝ်းပေႃးမွၵ်ႈၼႆႉၵူၺ်းလႃႈ…”

ၵႂၢမ်းၶေႃႈၼႆႉၵေႃႈ ယွၵ်ႈတုမ်ႉၸႂ်သမ်ႉပေႃးၵႅၼ်းလူင်မႃးၵမ်းလဵဝ်

“ႁဝ်းမႃးႁဵတ်းပုၼ်ႈၽွၼ်းႁဝ်းႁႂ်ႈတဵမ်တီႈလႄႈ…လွင်ႈႁဝ်းၼၼ်ႉမိူဝ်ႈမၼ်းဢမ်ႇသိုပ်ႇလႆႈထႅင်ႈယဝ်ႉၵေႃႈ…ႁႂ်ႈမၼ်းသုတ်းၵႂႃႇတီႈၼႆႈသေ…သူၵေႃႈပဵၼ်သိုၵ်းတေလႆႈဢွၵ်ႇတၢင်းၵႂႃႇတီႈဢၼ်ႁဝ်းဢမ်ႇၸၢင်ႈၸွမ်းထိုင်လႆႈ…ႁဝ်းၵေႃႈပဵၼ်မေႃသွၼ်…တီႈဢၼ်သူဢမ်ႇၸၢင်ႈယူႇႁူမ်ႈၸွမ်းလႆႈ…ႁဝ်းဢမ်ႇၶႂ်ႈပၼ်ၵႂၢမ်းမၼ်ႈလႄႈဢမ်ႇၶႂ်ႈဝႆႉတၢင်းမုင်ႈမွင်းသင်ယဝ်ႉၼႃႈ…ၶၢဝ်းယၢမ်းဢၼ်ႁဝ်းမီးၼၼ်ႉ…ႁဝ်းၵေႃႈလႆႈၸႂ်ႉၸွမ်းၵၼ်တဵမ်တီႈယဝ်ႉ…မိူဝ်ႈသူဢမ်ႇယူႇယဝ်ႉ..ႁဝ်းၵေႃႈတေလႆႈၸႂ်ႉၸၢတ်ႈပၢၼ်ႁဝ်းၵႂႃႇႁင်းႁဝ်း…သူၵေႃႈတေလႆႈၸႂ်ႉၸၢတ်ႈပၢၼ်သူၵႂႃႇထႅင်ႈ..ႁဝ်းပေႃးမွၵ်ႈၼႆႉၵူၺ်းယဝ်ႉလႃႈ..”

ၶမ်းႁွမ်လုပ်ႈၼႃႈလႅင်းမိူင်းဢၼ်ငဝ်မွင်ၼင်ႇလုၵ်ႈဢွၼ်ႇၼၼ်ႉယဝ်ႉ။

လႅင်းမိူင်းလၢတ်ႈသဵင်ဢူၼ်ႈမေႃးယူႇၼႂ်းၵူင်ၶေႃးမၼ်းၼၼ်ႉ “မၼ်းတေႁဵတ်းႁႂ်ႈႁဝ်းဢမ်ႇႁၵ်ႉၵၼ်လႆႈယူႇႁႃႉ မၼ်းတေႁဵတ်းႁႂ်ႈႁဝ်းတတ်းၶၢတ်ႇၵၼ်လႆႈတေႉႁႃႉ”

“ဢမ်ႇၼႃ…ႁဝ်းယင်းတိုၵ်ႉႁၵ်ႉယူႇ..သူၵေႃႈႁၵ်ႉႁဝ်း…ႁဝ်းႁူႉလီယူႇ”

“ယွၼ်ႉသင်လႃႇ…”

“ယွၼ်ႉလွင်ႈႁၢင်ႇၵႆၼၼ်ႉမၼ်းမေႃလႅၵ်ႈလၢႆႈ..”

“ပေႃးဢမ်ႇပဵၼ်မႃးၸိူင်ႉၼၼ်လူး..”

“သင်ဝႃႈဝၼ်းၼၼ်ႉထိုင်မႃးၵွၼ်ႇလႄႈ…မိူဝ်ႈၼႆႉႁဝ်းၽၢတ်ႇၵၼ်ၵႂႃႇလူၺ်ႈလီ…မိူဝ်းၼႃႈမႃးႁဝ်းၵေႃႈတေဢမ်ႇလႆႈဝူၼ်ႉၽိတ်းတေႃႇၵၼ်…တေဝႃႈႁဝ်းႁၼ်သုၼ်ႇတူဝ်ၵေႃႈဢမ်ႇပဵၼ်သင်ၼႃ”

“သမ်ႉဝႃႈပုၼ်ႈၽွၼ်းမၼ်းလမ်ႇလွင်ႈသေတႃႉ…တၢင်းႁၵ်ႉၵေႃႈလမ်ႇလွင်ႈမိူၼ်ၵၼ်…ၵူၼ်းၵေႃႉဢၼ်တေပၼ်ႁႅင်းၸႂ်…ဢၼ်တေႁဵတ်းႁႂ်ႈၶႂ်ႈမီးသၢႆၸႂ်သိုပ်ႇယူႇၵႂႃႇ…ဢၼ်ၶႂ်ႈတူၺ်းထိုင်လုမ်းလႃးပၼ်…ၶႂ်ႈၵႅတ်ႇၶႄပၼ်…မၼ်းႁဵတ်းႁႂ်ႈပဵၼ်ႁႅင်းဢီးႁႂ်ႈၶႂ်ႈယူႇၵႂႃႇၼၼ်ႉယဝ်ႉ…သင်ဢမ်ႇမီးမၼ်း…မၢင်ၽဝ်ႇၵၢၼ်မၢင်မဵဝ်းႁဝ်းတေဢမ်ႇႁဵတ်းလႆႈၵေႃႈပဵၼ်လႆႈ…ႁဝ်းယုမ်ႇဝႃႈ…တၢင်းႁၵ်ႉၼၼ်ႉမၼ်းယူႇၼိူဝ်ပုၼ်ႈၽွၼ်း…ယွၼ်ႉတၢင်းႁၵ်ႉသေ…မၼ်းႁဵတ်းႁႂ်ႈႁဝ်းလႆႈထူပ်းသူထႅင်ႈပွၵ်ႈၼိုင်ႈ…တၢင်းႁၵ်ႉလႄႈၼႃႈၵၢၼ်…မၼ်းၵႂႃႇၸွမ်းၵၼ်လႆႈယူႇၼႃ…”

“ၵေႃႈၼၼ်ႉယဝ်ႉ…မိူဝ်ႈၽုၵ်ႈသူပေႃးတေလႆႈၵႂႃႇယဝ်ႉလူး…ဢမ်ႇႁူႉဝႃႈတေလႆႈၶိုၼ်းပွၵ်ႈမႃးထႅင်ႈမိူဝ်ႈလႂ်…ၵွပ်ႈၼၼ်…သူၵေႃႈၸႂ်ႉၶၢဝ်းယၢမ်းသူႁႂ်ႈလီလႄႈ…ႁဝ်းၵေႃႈတေၸႂ်ႉၶၢဝ်းယၢမ်းႁဝ်းႁႂ်ႈလီမိူၼ်ၵၼ်”

လႅင်းမိူင်းၵူမ်ႈၼႃႈတိူဝ်ႉၸႂ်သေယဝ်ႉ “ႁဝ်းယွမ်းၼွမ်းၼႃႈ..ၶမ်းႁွမ်”

“ဢမ်ႇၸႂ်ႈတၢင်းၽိတ်းသူလႄႈဢမ်ႇၸႂ်ႈတၢင်းၽိတ်းၽႂ်…ပဵၼ်ၵွပ်ႈဝၢၼ်ႈမိူင်းႁဝ်းၼႆႉမၼ်းဢမ်ႇၵတ်းယဵၼ်ၼၼ်ႉၵူၺ်း…”

လႅင်းမိူင်းၶဝ်ၵေႃႈ ၸွမ်းလူၺ်ႈၼႃႈတီႈပုၼ်ႈၽွၼ်းၼႆၼၼ်ႉသေ လႆႈၵႂႃႇၸွမ်းၶေႃႈၸီႉသင်ႇ ယူႇၸွမ်းငဝ်းလၢႆးၵႂႃႇဝၼ်းလႂ်ဝၼ်းၼၼ်ႉယဝ်ႉ။

ဝၼ်းယဝ်ႉဝၼ်းပူၼ်ႉၵႂႃႇ ၶၢဝ်းၵတ်းၵေႃႈၸၢင်ၵႂႃႇလွႆးလွႆး ၶၢဝ်းမႆႈၵေႃႈၸမ်ၶဝ်ႈႁွတ်ႈထိုင် လုၵ်ႈႁဵၼ်းၶဝ်ၵေႃႈတွပ်ႇလိၵ်ႈၵၼ်ယဝ်ႉသေ မေႃသွၼ်ၵေႃႈလႆႈလိုဝ်ႈမိူဝ်းၸႂ်းႁိူၼ်းယဝ်ႉ။

ၶၢဝ်းမႆႈသုတ်းသဵင်ႈၶၢဝ်းၾူၼ်ၶဝ်ႈထိုင် ႁူင်းႁဵၼ်းဢၼ်ယဵၼ်သီႇသီႇမႃးၶၢဝ်းႁိုင်ၼၼ်ႉၵေႃႈ မီးမေႃသွၼ်မႂ်ႇမႃးသွၼ်တၢင်ၶမ်းႁွမ်ၵႂႃႇယူႇယဝ်ႉ။

လႅင်းမိူင်းဢၼ်ၶိုၼ်းႁွတ်ႈထိုင်ၼၼ်ႉၵေႃႈ ဢမ်ႇၸၢင်ႈသိူဝ်းလႆႈ ၶႂ်ႈၶိုၼ်းႁူပ်ႉႁၼ်သေတႃႉ ဢမ်ႇၸၢင်ႈၶိုၼ်းႁူပ်ႉၵၼ်လႆႈယဝ်ႉႁိုဝ် တၢင်းမွင်းၼၼ်ႉဢမ်ႇပႆႇသုတ်းသဵင်ႈႁၢႆလႆႈ။

ၶၢဝ်းယၢမ်းပူၼ်ႉၵႂႃႇလၢႆပီႊလၢႆလိူၼ် ၸဵမ်မိူဝ်ႈႁူႉဝႃႈ ဝၢႆးသေၶမ်းႁွမ်ပွၵ်ႈမိူဝ်းၶိုၼ်းၵူၺ်း တင်းၼေႃႇမိူင်းသေဢွၼ်ၵၼ်ၵႂႃႇမိူင်းထႆးယဝ်ႉၼႆလႄႈ ဢမ်ႇလႆႈႁူႉၶၢဝ်ႇႁူႉငၢဝ်းၶမ်းႁွမ်ထႅင်ႈယဝ်ႉ။

ၶမ်းႁွမ်ၵေႃႈပိၵ်ႉသဵၼ်ႈတၢင်းၵၢၼ်ၵပ်းသိုပ်ႇမၼ်းၵူႈလွင်ႈလွင်ႈ ႁူမ်ႈပႃးမႄႈတီႈႁိူၼ်းၼၼ်ႉယဝ်ႉ။ ပေႃးမႄႈဢမ်ႇၵပ်းသိုပ်ႇလႆႈ ၶမ်းမိူင်းၶႅၼ်းဝႆႉၵႆၵႆယဝ်ႉ။

သိုပ်ႇလူထႅင်ႈတွၼ်ႈတေမႃးၶႃႈ

တိုၼ်ႇလႅင်း တွၼ်ႈသီႇသိပ်း

မိူဝ်ႈႁဝ်းယင်းၵေႃႉလဵၵ်ႉလဵၵ်ႉ ဝၢၼ်ႈမိူင်းသုၵ်ႉယုင်ႈဢူၼ်ၵဝ်း ၼႃႈႁိူၼ်းႁဝ်း ၵူၼ်းမိူင်းႁဝ်း ႁိုဝ်လႆႈယူႇသႃႇ ၵႂႃႇလႂ်ၵေႃႈၵူဝ် ႁႃႁဵတ်းၵိၼ်ၵၢၼ်ၵေႃႈယၢပ်ႇ ပေႃးမၢၼ်ႈၶဝ်ႈဝၢၼ်ႈမႃးၵေႃႈ ၺႃးႁၢပ်ႇၶျေႃး...

တိုၼ်ႇလႅင်း တွၼ်ႈသၢမ်သိပ်းၵဝ်ႈ

ႁူဝ်ၶမ်ႈမိူင်းၸမ်လပ်းသိင်ႇ လႅင်းမိူင်းၵေႃႈၶီႇလူတ်ႉမႃးၵိုတ်းတီႈႁိူၼ်းၶမ်းႁွမ်ၶဝ်သေ ပႆၶဝ်ႈၵႂႃႇၼႂ်းဝၢင်းႁိူၼ်း ဢမ်ႇလႆႈႁၼ်ၽႂ်လႄႈ ၼႂ်းၸႂ်ယဵၼ်ႁၢႆ သၢႆငၢႆဢမ်ႇပေႃးလီၵႃႈႁိုဝ် ၽၵ်းတူၵေႃႈႁပ်းဝႆႉယူႇ ၸင်ႇဢီးတူၺ်းသမ်ႉဢမ်ႇလွၵ်ႉ ၶဝ်ႈမိူဝ်းပိုတ်ႇၾႆးဝႆႉယူႇၼႂ်းႁိူၼ်းၼၼ်ႉယဝ်ႉ။ ၶမ်းႁွမ်ၵေႃႈ...

တိုၼ်ႇလႅင်း တွၼ်ႈသၢမ်သိပ်းပႅတ်ႇ

ယၢမ်းၵၢင်ၶမ်ႈ သဵင်ယဵၼ်ယဵၼ် ယိင်းသႅင်ၵေႃႈဢဝ်တၢင်းၶူဝ်းမၼ်းမႃးႁႅၼ်းယဝ်ႉ။ ၶမ်းႁွမ်လႆႈႁၼ်သေ “သူတေၵႂႃႇလႂ်လႃႇ…” “ဢေႃ…မိူဝ်ႈၸဝ်ႉ…ႁူဝ်ၼႃႈမႃးလၢတ်ႈႁႂ်ႈႁဝ်းၵႂႃႇသိုပ်ႇႁဵၼ်းထႅင်ႈၼႆဝႃႇ…ႁဝ်းၵေႃႈသူၼ်ၸႂ်သေ…လႆႈတူၵ်းလူင်းၸွမ်းလႄႈ…မၼ်းၵေႃႈႁႂ်ႈႁဝ်းမႃးႁႅၼ်းၶူဝ်းပႂ်ႉထႃႈၼၼ်ႉယိုင်…” “ၶဝ်မႃးတီႈၼႆႈသေႁႃႉ…ႁဝ်းဢမ်ႇလႆႈႁၼ်ၶဝ်လႃႇ” ယိင်းသႅင်ယၵ်ႉတူၺ်းၶမ်းႁွမ်သေ “သူသွင်ၵေႃႉမီးလွင်ႈႁင်ၵၼ်လႃႇ” “ၸၢင်ႈၵႂႃႇမီးလွင်ႈသင်...” “ဢေႃႈၶႃႈ…လီယုမ်ႇၼႃႇၶႃႈ” “ႁဝ်းပၼ်ႁႅင်းယူႇၼႃႈ…ၶတ်းၸႂ်လႄႈ…တႃႇတေမီးတိုဝ်ႉတၢင်းၸိူင်ႉၼႆၼႆႉဢမ်ႇငၢႆႈငၢႆႈ…” “မႃးႁႃလၢႆႈၵႂၢမ်းယူႇ…ဢမ်ႇသေလၢႆၵၼ်သေဢိတ်းႁႃႉ…” “ႁဝ်းတေသေလၢႆႁဵတ်းသင်…မၼ်းပဵၼ်တိုဝ်ႉတၢင်းလီတွၼ်ႈတႃႇသူၵမ်းလဵဝ်…ႁဝ်းယိုင်ႈၶႅၼ်းပၼ်ႁႅင်းၼမ်ၼမ်ၵမ်းလဵဝ်ၼၼ်ႉယဝ်ႉ…တႃႇတေမီးတိုဝ်ႉတၢင်းသေလႆႈၵႂႃႇႁဵၼ်းၸိူင်ႉၼႆ…ဢမ်ႇလႃႈလီႈမီးလူး…မိူဝ်ႈမီးတိုဝ်ႉတၢင်းၼၼ်ႉ…ၶတ်းၸႂ်ဝၵ်ႉတၢဝ်းဢဝ်လႄႈ…ယိုင်ႈလႆႈႁဵၼ်းႁူႉၼမ်ၵႃႈႁိုဝ်…ယိုင်ႈတူဝ်ထူပ်းၼမ်ၵႃႈႁိုဝ်…မၼ်းတေမႃးၽိူမ်ႉထႅမ်ပၼ်ၼမ်ႉၵတ်ႉႁဝ်းမွၵ်ႈၼၼ်ႉယဝ်ႉ…ႁဵၼ်းၵႂႃႇယဝ်ႉၵေႃႈ…ယႃလိုမ်းဢဝ်မႃးၸႂ်ႉတိုဝ်းႁႂ်ႈပဵၼ်ၽွၼ်းလီၶိုၼ်းၼင်ႇၵဝ်ႇၼႃႈ…” “ဢေႃႈၶႃႈ…မေႃသွၼ်ႁဝ်း…တႃႉသေဝႃႈၵူၼ်းႁူႉၸႂ်ၵၼ်…ၸိုင်ပေႉမေႃလၢတ်ႈမိူၼ်ၵၼ်ၼေႃ…ႁဝ်းၵႂႃႇယဝ်ႉ…ပေႃးတေတေႇၼႃႈႁိူၼ်းၼႆၵေႃႈ…ယႃႇလိုမ်းတူၵ်ႇလၢတ်ႈမွၵ်ႇၼႄၵၼ်ၽွင်ႈၼႃႈ…” “ယူဝ်ပဵၼ်သူၵူၺ်းယင်းဢမ်ႇႁူႉ…ၸူဝ်ႈၶၢဝ်းၶိဝ်းၼႆႉ…မိူၼ်ၵႆႉႁၼ်မေႃယႃၸၢႆးၶိူဝ်းၵႆႉမႃးႁဵတ်းၵၢၼ်ဝႆႉၼေႈ…” “ယႃႇလႃႈလီႈလၢတ်ႈၼႃႇလႄႈ…ႁဝ်းၵေႃႈပေႃးတေၵႂႃႇယဝ်ႉ…ယူဝ်ၶဝ်တေဢဝ်မေးပႅတ်ႈႁဝ်းယင်းဢမ်ႇႁူႉ…” “လၢတ်ႈမႃးၸိူင်ႉၼႆ…ၶႂ်ႈဝႃႈမီးၸႂ်ယူႇၽွင်ႈၸွင်ႇၸႂ်ႈႁိုဝ်…” “ယူႇတီႈသူဝူၼ်ႉ…ႁဝ်းဢမ်ႇလၢတ်ႈတေႃႇသူယဝ်ႉ…” ယၢမ်းၵၢင်ၼႂ်တႃဝၼ်းၵေႃႈဢွၵ်ႇ မွၵ်ႇၵုမ်ႈၵေႃႈပၢင်ႇ သဵင်ၼူၵ်ႉသဵင်ၼူဢူၼ်ၼၼ်ႈမေႃးပၼ်း  သဵင်ၵႃးလင်မေႃးမႃးၵိုတ်းယူႇတီႈၼႃႈႁိူၼ်း။ ၸၢႆးၶိူဝ်းတင်းလႅင်းမိူင်းၵေႃႈ...