မိူဝ်ႈႁဝ်းယင်းၵေႃႉလဵၵ်ႉလဵၵ်ႉ ဝၢၼ်ႈမိူင်းသုၵ်ႉယုင်ႈဢူၼ်ၵဝ်း ၼႃႈႁိူၼ်းႁဝ်း ၵူၼ်းမိူင်းႁဝ်း ႁိုဝ်လႆႈယူႇသႃႇ ၵႂႃႇလႂ်ၵေႃႈၵူဝ် ႁႃႁဵတ်းၵိၼ်ၵၢၼ်ၵေႃႈယၢပ်ႇ ပေႃးမၢၼ်ႈၶဝ်ႈဝၢၼ်ႈမႃးၵေႃႈ ၺႃးႁၢပ်ႇၶျေႃး ၸႂ်ႉၵႂႃႇႁဵတ်းၵၢၼ်ပၼ်လၢႆ ဢမ်ႇမိူၼ်ၸႂ်ၵေႃႈပေႃႉထုပ်ႉလူလၢႆၶႃႈႁႅမ်တၢႆပႅတ်ႈ။ ပေႃးႁၼ်ၽူႈယိင်းၵေႃႈ ၵၼ်ႉၸၼ်လူလၢႆ ၸၢတ်ႈပၢၼ်ၽူႈယိင်းပေႃးဢမ်ႇလိူဝ်သင်ယဝ်ႉ ပေႃးဢမ်ႇယွင်ႇၵေႃႈတၢႆ။ ၶဝ်ႈဝၢၼ်ႈမႃးမိူဝ်ႈလႂ် သၢႆၸႂ်ၵူၼ်းတၢႆၶၢတ်ႇၵႂႃႇပဵၼ်ၵွင်ပဵၼ်ၸုမ်း ယိုဝ်းၵူၼ်းတၢႆမိူၼ်ၼင်ႇသတ်း ယိုဝ်းတၢႆလၢႆလၢႆဢမ်ႇၵႃး ဢွၵ်ႇဝၢၼ်ႈၵႂႃႇယဝ်ႉ ၸွမ်းဢဝ်ၾႆးၽဝ်ၸုတ်ႇဝၢၼ်ႈပေႃးပဵၼ်ၽဝ်ႇတဝ်ႈ ၵူၼ်းၸိူဝ်းပၢႆႈလွတ်ႈၵႂႃႇၵေႃႈ ႁိုဝ်တေလႆႈယူႇသႃႇ ၶဝ်ႈၼမ်ႉတၢင်းၵိၼ် ႁိူၼ်းယေးတႃႇယူႇသၢင်ႈသဝ်း ၵေႃႈႁိုဝ်မီး လႆႈဢိုပ်းယၢၵ်ႈၶၢၼ်ၸႂ် သမ်ႉပၢႆလႆႈပၢႆႈသိုၵ်းထႅင်ႈ လႆႈၸႂ်ႉၸၢတ်ႈပၢၼ်မူၵ်းသွၼ်ႉၵႂႃႇပဵၼ်ဝၼ်းပဵၼ်ဝၼ်း။ ယူႇၵႂႃႇၵေႃႈၶၢၼ်ၸႂ် ပၢႆႈၵႂႃႇၵေႃႈမိူၼ်ၵႂႃႇၸူးတၢင်းတၢႆ တေတၢႆလၢႆလၢႆသမ်ႉ မိူဝ်ႈမီးသၢႆၸႂ်ယူႇ ယင်းဢမ်ႇလႆႈၸႂ်ႉႁႂ်ႈမီးၵႃႈၶၼ်လူး မိူဝ်ႈႁူႉဝႃႈတေၵႂႃႇၸူးတၢင်းတၢႆ တႃႉသူႈႁေတၢႆမၼ်းဢမ်ႇလီႁိုဝ် တွၼ်ႈတႃႇၸၢတ်ႈပၢၼ်လုၵ်ႈလၢၼ်ႁဝ်း တေဢမ်ႇလႆႈထူပ်း မိူၼ်ၸိူင်ႉၼင်ႇႁဝ်းလႆႈထူပ်းၼႆႉ။
ၶဝ်ႁဵတ်းၸိူင်ႉၼၼ်ၵႂႃႇဝၢၼ်ႈယဝ်ႉဝၢၼ်ႈ ႁွတ်ႈထိုင်မႃးတီႈဝၢၼ်ႈႁဝ်းယဝ်ႉၼၼ်ႉ မႅၼ်ႈၽွင်းမိူဝ်ႈႁဝ်းပေႃႈမႄႈလုၵ်ႈၵႂႃႇႁႆႈမႃးသေ တေဢၢၼ်းပွၵ်ႈမိူဝ်းႁိူၼ်းၼႆလႄႈ မိူဝ်ႈၸမ်တေႁွတ်ႈၼႂ်းဝၢၼ်ႈၼၼ်ႉ လႆႈငိၼ်းသဵင်ၵွင်ႈလင်ၼၼ်ႈပၼ်းႁူၼ်ႈလူင်ၵႂႃႇသဵင်ႈ လွမ်မုင်ႈတူၺ်းယဝ်ႉ ႁၼ်ပဵဝ်ၾႆးမႆႈလုၵ်ႉႁုၼ်ႈႁုၼ်ႈ ၵႂၢၼ်းၾႆးပိဝ်ၶိုၼ်ႈပေႃးလမ်ၽိတ်းၽိတ်း ပေႃႈတင်းမႄႈၵေႃႈဢမ်ႇသိုပ်ႇဢွၼ်ႁဝ်းပွၵ်ႈမိူဝ်းႁိူၼ်း ထွႆၵႂႃႇၶိုၼ်းတၢင်းၵဝ်ႇယဝ်ႉ။
မိူဝ်ႈၵႂႃႇၸွမ်းတၢင်းၼၼ်ႉသင်လႆႈႁူပ်ႉၺႃးသိုၵ်းတႆးၼႆ တေၵႂႃႇယွၼ်း တၢင်းၸွႆႈထႅမ်ၶဝ်ၵေႃႈလႅပ်ႈတေလႆႈယူႇ။ ဢမ်ႇပႆႇတၼ်းႁၼ်သိုၵ်းတႆး မိူဝ်ႈယင်းတိုၵ်ႉဢွၼ်ၵၼ်ၵႂႃႇၸွမ်းတၢင်းၼၼ်ႉ မီးသိုၵ်းမၢၼ်ႈလမ်းၸွမ်းမႃးလႄႈ ပေႃႈတင်းမႄႈၵေႃႈလႆႈဢွၼ်ႁဝ်းလႅၼ်ႈ ၶဝ်ၵေႃႈယိုဝ်းၵွင်ႈသႂ်ႇ ၵႃႈပွင်ႇၵႃႈပဵၼ် ၵူၺ်းၵႃႈမၼ်းၵေႃႈယိုဝ်းၺႃးသႂ်ႇတီႈၵွင်ႇၵေႃႈဢူႈႁဝ်းထိုင်တီႈပေႃးလူမ်ႉလူင်းၵႂႃႇ ၶဝ်ၵွတ်ႇႁဝ်းဝႆႉထိုင်မႄႈပေႃးမႃးႁွပ်ႇဢဝ်ႁဝ်းၵႂႃႇ။ မိူဝ်ႈၼၼ်ႉႁဝ်းၵေႃႈဢမ်ႇႁူႉဝႃႈ ပေႃႈႁဝ်းလူမ်ႉႁဵတ်းသင် ႁဝ်းႁွင်ႉပေႃႈပဵၼ်လၢႆၵမ်းၵေႃႈ ပေႃႈဢမ်ႇတွပ်ႇႁဝ်းၶိုၼ်း လိူဝ်သေဝႃႈၼွၼ်း လူင်းၵႂႃႇယဝ်ႉဢမ်ႇတူင်ႉသေဢိတ်း ႁဝ်းၵုမ်ႇလၢတ်ႈမႄႈဝႃႈႁႂ်ႈပႂ်ႉပေႃႈၼႆၵေႃႈ မႄႈယင်းတိုၵ်ႉသိုပ်ႇလႅၼ်ႈယူႇတိၵ်းတိၵ်း မႄႈသမ်ႉလႅၼ်ႈထိူင်းလႄႈ လႆႈၵႂႃႇပႅပ်ႉဝႆႉတႂ်ႈတူၼ်ႈမႆႉသေ လၢတ်ႈတီႈႁဝ်းဝႃႈ
“လုၵ်ႈ!…လႅၼ်ႈၵႂႃႇၸွမ်းတၢင်းဢၼ်ႁဝ်းမႃးမိူဝ်ႈၵႆႈၼၼ်ႉ…တေႁၼ်ၵူၼ်းၼမ်ၼမ်…ၶဝ်မီးၶဝ်ႈမုၼ်းၸွၵ်းဢၼ်လုၵ်ႈၵဝ်မၵ်ႉၼႃႇၼၼ်ႉလဵင်ႉလုၵ်ႈၵဝ်…လုၵ်ႈၵႂႃႇၸူးၶဝ်လႄႈၼႃႈ…မႄႈတေပႂ်ႉပေႃႈသူႁွတ်ႈမႃးယဝ်ႉ…တေၵႂႃႇၸွမ်းလုၵ်ႈၵဝ်ၵူၺ်း…”
ႁဝ်းၵေႃႈတေႁဵတ်းႁိုဝ်ႁူႉလႃႇ ႁူႉဝႃႈမီးၶဝ်ႈမုၼ်းဢၼ်ႁဝ်းလႆႈၸႂ်ၼႆၵူၺ်းၵေႃႈ ႁဝ်းၵေႃႈၸူမ်းၵႂႃႇယဝ်ႉ။ မိူဝ်ႈႁဝ်းဢွၵ်ႇၵႂႃႇ မႄႈမႃးႁႄႉတၢင်းလင်ႁဝ်းဝႆႉပၼ်သေ သဵင်ၵွင်ႈၵေႃႈလင်ဢွၵ်ႇပဵၼ်လၢႆၵမ်း မႄႈၵေႃႈလူမ်ႉလူင်လူင်းၵႂႃႇထႅင်ႈလႄႈ သဵင်မႄႈဢၼ်မၢတ်ႇၸဵပ်းယူႇၼၼ်ႉ ယင်းႁွင်ႉႁႂ်ႈႁဝ်းလႅၼ်ႈယူႇတိၵ်းတိၵ်း။ ဝၢႆးသဵင်ၵွင်ႈယဵၼ်ၵႂႃႇ သဵင်ႁွင်ႉယဵၼ်ႁၢႆ သၢႆၸႂ်ႁဝ်းၵေႃႈမိူၼ်လႆႈၵိူတ်ႇမႂ်ႇ ၸင်ႇမီးသဵင်ၵွင်ႈလင်ဢွၵ်ႇမႃးတုမ်ႉတွပ်ႇၶဝ်ၵႂႃႇၶိုၼ်းလႄႈ လႆႈပဵၼ်ပၢင်တိုၵ်းသိုၵ်းတႆးလႄႈသိုၵ်းမၢၼ်ႈ ႁၢဝ်ႈႁၢဝ်ႈႁႅင်းႁႅင်းယဝ်ႉ။ ၵူၼ်းၵေႃႉဢၼ်ထူပ်းႁၼ်ႁဝ်းမိူဝ်ႈၼၼ်ႉၵေႃႈ လႆႈၸွႆႈသၢႆၸႂ်ႁဝ်းဝႆႉသေ ၵဵပ်းလဵင်ႉႁဝ်းမႃးလႄႈ ႁဝ်းမီးသၢႆၸႂ်လႆႈမႃးႁၼ်သူယူႇဝၼ်းမိူဝ်ႈၼႆႉၵေႃႈ ပဵၼ်ယွၼ်ႉပိူဝ်ႈသိုၵ်းၸွႆႈထႅမ် ႁဝ်းဝႆႉၼၼ်ႉယဝ်ႉ။
သင်ဢမ်ႇမီးသိုၵ်းတႆး သၢႆၸႂ်ႁဝ်း၊ ၵူၼ်းမိူင်းႁဝ်း၊ ၽႅၼ်ႇလိၼ်ဝၢၼ်ႈမိူင်းႁဝ်း ဝၼ်းမိူဝ်ႈၼႆႉယူဝ်တေဢမ်ႇမီးယဝ်ႉႁိုဝ်ဢမ်ႇႁူႉ။ သမ်ႉဝႃႈႁဝ်းတေမၢတ်ႇၸဵပ်း သၢႆၸႂ်ႁဝ်းတေၶၢတ်ႇၵႂႃႇ မိူဝ်ႈႁဝ်းၼုင်ႈၶူဝ်းသိုၵ်းသေ ယိပ်းၵွင်ႈၶဝ်ႈပွႆးတိုၵ်းယူႇၼၼ်ႉ ႁဝ်းလႆႈၵႅတ်ႇၶႄပၼ်ဝၢၼ်ႈမိူင်း၊ ၽႅၼ်ႇလိၼ်လႄႈၵူၼ်းမိူင်းႁဝ်း မွၵ်ႈၼႆႉၵူၺ်းၵေႃႈႁၢၼ်ႉၸႂ်ၼႃႇယဝ်ႉ။
မၢင်ပွၵ်ႈပေႃးႁဝ်းႁိူဝ်ႉႁဝ်းၵေႃႈဝူၼ်ႉဝႃႈၶႂ်ႈပေႃးသိုၵ်းသေ ယူႇၸွမ်းၼႃႈႁိူၼ်းဢၼ်ဢုၼ်ႇၸႂ် ၵူၺ်းၵႃႈမိူဝ်ႈဝူၼ်ႉဢွၵ်ႇမႃးၸိူင်ႉၼၼ်ယဝ်ႉ ႁဵတ်းႁႂ်ႈႁဝ်းႁၼ်ပေႃႈတင်းမႄႈမႃးၵမ်းလဵဝ်ယဝ်ႉ။ ၼႃႈႁိူၼ်းဢၼ်ဢုၼ်ႇၸႂ်ဢၼ်ဝႃႈၼၼ်ႉ ပေႃးဝႃႈတိုၵ်ႉမီးၽူႈၶဵၼ်မိူၵ်ႈလိူင်းယူႇၼႆ မၼ်းတေမီးလႆႈယူႇႁိုဝ် ပေႃးဝၢၼ်ႈမိူင်းဢမ်ႇၵတ်းယဵၼ် ႁိူၼ်းႁဝ်းၵေႃႈတေႁိုဝ်ၸၢင်ႈယူႇမူၼ်ႈသိူဝ်းလႆႈ သင်တိုၵ်ႉမီးၶဝ်ယူႇ သမ်ႉဝႃႈမိူဝ်ႈၼႆႉၵတ်းယဵၼ်ၵေႃႈ မိူဝ်ႈၽုၵ်ႈမိူဝ်ႈႁိုဝ်းၶဝ်တေၸၢင်ႈၸွမ်းသုၵ်ႉႁဝ်းလႆႈတႃႇသေႇယဝ်ႉ။
တေႃႈၼင်ႇႁဝ်းယူႇယင်းဢမ်ႇၵတ်းယဵၼ် တႃႇလုၵ်ႈလၢၼ်ႁဝ်းတေၸၢင်ႈယူႇသဝ်းၵႂႃႇလႆႈၶၢဝ်းၵႆၼၼ်ႉ တေမီးလႆႈယူႇႁႃႉ။ ႁဝ်းဢမ်ႇၶႂ်ႈႁႂ်ႈလုၵ်ႈႁဝ်းလႆႈမိူၼ်ၼင်ႇႁဝ်း ႁဝ်းၶႂ်ႈႁႂ်ႈၶဝ်လႆႈယူႇ ၵတ်းယဵၼ်လႄႈဢမ်ႇမီးၶဵၼ်ယႃႉၵဝ်းၼၼ်ႉယဝ်ႉ ၶဝ်ၵေႃႈတေဢမ်ႇလႆႈပွင်ႉဝႃႈပၢၼ်ပေႃႈပၢၼ်မႄႈႁဝ်း ၶဝ်ဢမ်ႇႁဵတ်းသင်ဝႆႉပၼ်လႄႇ ထိုင်ပၢၼ်ႁဝ်းမႃးလႆႈမႃးတုၵ်ႉၶၸိူင်ႉၼႆ မၼ်းလီၸႂ်လဵၵ်ႉမွၵ်ႈၵႃႈႁိုဝ် ႁဝ်းၵိူတ်ႇၶဝ်မႃးသေဢမ်ႇၵႃး လႆႈပၼ်တၢင်းယၢပ်ႇၽိုတ်ႇၶဝ်ထႅင်ႈ။
သမ်ႉဝႃႈဢမ်ႇၸၢင်ႈယူႇၸွမ်းၼႃႈႁိူၼ်းဢၼ်ဢုၼ်ႇၸႂ်လႆႈၵေႃႈ…ၵူၼ်းၵေႃႉဢၼ်တေၸၢင်ႈၸွႆႈထႅမ်ႁႅင်းၸႂ်…လႄႈ …ပဵၼ်ႁႅင်းဢီးႁႂ်ႈမီးႁႅင်းၸႂ်ႁဵတ်းၵၢၼ်ၵေႃႈသမ်ႉလူဝ်ႇယူႇၵူၺ်း…”
လႅင်းမိူင်းၵေႃႈ လုၵ်ႉမႃးၼင်ႈလီလီသေ ယိပ်းဢဝ်မိုဝ်းၶမ်းႁွမ်ယဝ်ႉ “သမ်ႉဝႃႈႁဝ်းတေဢမ်ႇၸၢင်ႈပၼ်လွင်ႈဢုၼ်ႇၸႂ်သူလႆႈၼင်ႇပိူၼ်ႈ…တေဢမ်ႇႁဵတ်းႁႂ်ႈၸၢတ်ႈပၢၼ်သူတဵမ်ထူၼ်ႈလႆႈသေတႃႉ…ႁႂ်ႈသူႁူႉဝႆႉဝႃႈ ႁဝ်းႁၵ်ႉသူဢိူဝ်ႈၼႃႈ…ၶမ်းႁွမ်”
လႅင်းမိူင်းၵေႃႈယိုတ်ႈတူဝ်သုတ်ႉၶဝ်ႈၸမ်ၶမ်းႁွမ် ဢဝ်မိုဝ်းၶွၼ်ၼိုင်ႈယိုၼ်းၶဝ်ႈၵွတ်ႇသွတ်ႇဢဝ်ဢႅဝ် မၼ်းသေ ထႅင်ႈၶွၼ်ၼိုင်ႈလုပ်ႈၵမ်းၶိုၼ်ႈၵွင်ႇၵေႃႈၼၼ်ႉလွႆးလွႆး ၶမ်းႁွမ်ၵေႃႈလပ်းတႃ လူင်းၸွမ်းႁွမ်းသုတ်ႉႁူဝ်ၵႂႃႇၶဝ်ႈၸမ် ၼႃႈလႅင်းမိူင်းၵေႃႈသိုပ်ႇသုတ်ႉၸမ်ၶဝ်ႈၸူး ၶူႈၼင်လေႃႇတုမ်ႉ ၵၼ်ၵႂႃႇ သီႇသူပ်းဢွၼ်ႇၵေႃႈတၢင်ႇသႂ်ႇၸူးၵၼ် ပၼ်ႁႂ်ႈၵူၼ်းလူဝူၼ်ႉၵႂႃႇႁင်းၵူၺ်းလႃႈ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ
