ၵၢင်ၼႂ်ၸဵမ်ၸဝ်ႉ လႅင်းမိူင်းၸင်ႇၸူးဢဝ်ၼေႃႇမိူင်းၶဝ်ႈမႃးတီႈဝၢၼ်ႈသေ ပႆလူင်ၶဝ်ႈၵႂႃႇၼႂ်းဝၢင်းႁူင်းႁဵၼ်းယဝ်ႉ ငွၵ်ႈတူၺ်းၸွမ်းႁွင်ႈႁဵၼ်းႁွင်ႈယဝ်ႉႁွင်ႈ ၵူၺ်းၵႃႈ ဢမ်ႇပႆႇႁၼ်ၽႂ်လႄႈ ဢွၼ်ၵၼ်ၼင်ႈပႂ်ႉယူႇတႂ်ႈႁူမ်ႈမႆႉ ႁိမ်းႁူင်းႁဵၼ်းၼၼ်ႉယဝ်ႉ။
ႁူင်းႁဵၼ်းလႄႈႁိူၼ်းၶမ်းႁွမ်ၶဝ်ၼၼ်ႉ မီးၸမ်ၵၼ်ၵူၺ်း ဝၢႆႇတူၺ်းၵႂႃႇၵူၺ်းၵေႃႈ ပေႃးႁၼ်ယူႇယဝ်ႉ ၶႅၼ်ႈၵၼ်သဵၼ်ႈတၢင်းလႄႈဝၢင်းႁူဝ်ႉၵူၺ်း လိူဝ်သေဝၢင်းႁူင်းႁဵၼ်းၵႂၢင်ႈလႄႈ ႁၼ်ၵႆၵၼ်ၼၼ်ႉယဝ်ႉ။ မိူဝ်ႈလႅင်းမိူင်း မိုင်တူၺ်းၵႂႃႇတၢင်းႁိူၼ်းလင်ၼၼ်ႉ ႁၼ်ၵူၼ်းဢွၵ်ႇမႃးယဝ်ႉ ၵိုင်ႉၵၢင်ႉဢဝ်သၢႆတႃ ယၵ်ႉတူၺ်းတီႈၼၼ်ႈၵမ်းလဵဝ်။
သီၶူၼ်ႁူဝ်လမ်လိူမ်ႈ ၾႆးၶွပ်ႇၶၢင်ႈၶႅပ်ႇႁူသွင်ၽၢႆႇ ပွႆႇၶူၼ်ႁူဝ်ယၢဝ်းတၢင်းလင်ဝႆႉ ႁၼ်ၼႃႈၶၢဝ်ပွတ်ႇသဵမ်ႈလဝ်းလီ တၢင်းယုမ်ႉဢၼ်ၸိုၼ်ႈသႂ် သၢႆတႃဢၼ်ႁဵတ်းႁႂ်ႈမီးလွင်ႈဢုၼ်ႇၸႂ်ၼၼ်ႉ ႁူႉလႆႈထိုင်တီႈၼႂ်းႁူဝ်ၸႂ်မႃးၵမ်းလဵဝ်။ ၽူႈယိင်းၵေႃႉ ဢၼ်သႂ်ႇတင်းသိူဝ်ႈတႆးသီၶွၼ်ႇ သိၼ်ႈတႆးသီလမ် ပႆၶဝ်ႈမႃးႁိမ်းၸမ် ႁဵတ်းႁႂ်ႈႁၼ်ႁၢင်ႈၾၢင်ယိင်းၵေႃႉၼၼ်ႉ ၸိုင်ပေႉမႃးလဝ်းလီ တူဝ်လဵၵ်ႉသေး ဢမ်ႇလႆႈယွမ်ပူၼ်ႉႁႅင်းလိူဝ် သႂ်ႇတင်းသိူဝ်ႈတႆးၼႃႈတေႃႇ ႁေႃႇဝႆႉတူဝ်ၶိင်း မႄႈသိူဝ်ႈယၢဝ်းထိုင်ဢႅဝ်သိုပ်ႇသိၼ်ႈယၢဝ်းလူင်းႁွတ်ႈတႃတိၼ် ၶူဝ်းတႆးၸိူင်ႉၼႆ ႁၼ်ပဵၼ်သီၵူၼ်းထဝ်ႈၼႆသေတႃႉ မိူဝ်ႈယိင်းၵေႃႉၼႆႉၼုင်ႈသႂ်ႇၼၼ်ႉ ႁပ်ႉႁူႉႁၼ်လႆႈထိုင်လွင်ႈပဵၼ်တႆးလႄႈ တၢင်းႁၢင်ႈလီဢၼ်မီးၼႂ်းတူဝ်ယိင်းတႆးၼၼ်ႉဢွၵ်ႇမႃးၵမ်းလဵဝ် တေပဵၼ်ၶူဝ်းတႆးယူဝ်းယူဝ်းၵူၺ်းၵေႃႈ ၵႅပ်ႈလႅပ်ႈႁၢင်ႈလီတႃ ပဵၼ်ဢၼ်လီယၵ်ႉလီတူၺ်းတႄႉတႄႉၼၼ်ႉယဝ်ႉ။
သၢႆတႃၶမ်းႁွမ်ယူႇၵႆသေမုင်ႈတူၺ်း ႁၼ်ၵူၼ်းဢၼ်ၼင်ႈယူႇတႂ်ႈႁူမ်ႈမႆႉၼၼ်ႉၵေႃႈ ဢဝ်မိုင်ၵႂႃႇၵမ်းၼိုင်ႈသေ ၼႂ်းပၢႆးဝူၼ်ႉမၼ်းၼၼ်ႉ ၵိုင်ႉၵၢင်ႉၶူၼ်ႉႁၼ်ၶိုၼ်းၵူၼ်းၵေႃႉၼိုင်ႈမႃးယဝ်ႉ။ ယိုင်ႈပႆၶဝ်ႈၸမ်ယိုင်ႈၶႅၼ်းႁၼ်ၸႅင်ႈ ၵူၺ်းၵႃႈ မိူဝ်ႈဝၢႆႇမႅၼ်ႈၺႃး လုၵ်ႈဢွၼ်ႇၵေႃႉၼိုင်ႈၼၼ်ႉ ႁဵတ်းႁႂ်ႈပၢႆးဝူၼ်ႉလႅၵ်ႈလၢႆႈမႃးၶိုၼ်းယူႇ။ တင်းဝူၼ်ႉတင်းပႆလူင်ၵႂႃႇ ႁိုဝ်တေပႃႈႁတ်းတေႃႇၼႃႈလႆႈလႃႇ ၵူဝ်တေပဵၼ်ၵူၼ်းၵေႃႉဢၼ်ဢမ်ႇထၢင်ႇၼၼ်ႉယဝ်ႉ။
မိူဝ်ႈပႆၶဝ်ႈၸူးၸမ် သဵင်ႁူဝ်ၸႂ်ၵိုင်ႉၵၢင်ႉတွတ်ႇႁႅင်းမႃး ႁၢမ်ႈပေႃးဢမ်ႇလႆႈ ၸႂ်တိုၼ်ႇတဵၼ်ႈႁႃႉ ၸႂ်ၶိုၼ်ႈၸွမ်းႁိုဝ်ၵေႃႈဢမ်ႇႁူႉယဝ်ႉ။ ၼႂ်းၶၢဝ်းယၢမ်းဢၼ်ဢမ်ႇလႆႈထူပ်းႁၼ်ၶဝ် မၼ်းႁဵတ်းႁႂ်ႈဢမ်ႇၶုၵ်းၸႂ်လႆႈလႄႈ လိုမ်းၶဝ်ၵႂႃႇၼႆသေတႃႉ ၵူၺ်းၵႃႈမိူဝ်ႈလႆႈႁၼ်ၵူၼ်းၵေႃႉၼၼ်ႉ မၼ်းႁဵတ်းႁႂ်ႈၶုၵ်းၶူၼ်ႉဝူၼ်ႉထိုင်ၶဝ်မႃးၶိုၼ်းသေ ဢဝ်ႁူဝ်ၸႂ်ၼၼ်ႉၵိုင်ႉၵၢင်ႉတွတ်ႇတဵၼ်ႈမႃးထႅင်ႈ ထိုင်တီႈပေႃးႁၢမ်ႈဢမ်ႇလႆႈၼၼ်ႉယဝ်ႉ။
မိူဝ်ႈတူၺ်းလီလီ ၼႃႈၵူၼ်းၵေႃႉၼၼ်ႉၵိုင်ႉၵၢင်ႉဝၢႆႇၵႂႃႇပႅတ်ႈသေ ဢမ်ႇလႆႈႁၼ်ၼႃႈၼၼ်ႉလီၵႃႈႁိုဝ်ၼႆၵေႃႈ ႁၢင်ႈၾၢင်ၶဝ်ၼၼ်ႉၼႄလႆႈၵမ်းလဵဝ်ဝႃႈ ပဵၼ်လႅင်းမိူင်းၼႆ။ ယိုင်ႈၶဝ်ႈၸမ်ယိုင်ႈယုမ်ႇၸႂ်မႃး မိူၼ်မီးသေလွင်ႈလွင်ႈ ႁဵတ်းႁႂ်ႈ ၼႂ်းႁူဝ်ၸႂ်ၼၼ်ႉ ၵိုင်ႉၵၢင်ႉၵပ်ႉၵိၼ်းမႃးယူႇယဝ်ႉ။
လွင်ႈသုၼ်ႇတူဝ်ၵေႃႈမၼ်းပဵၼ်လွင်ႈသုၼ်ႇတူဝ်ၵူၺ်း မိူဝ်ႈၶဝ်ႈမႃးၼႂ်းႁူင်းႁဵၼ်းၼၼ်ႉ ၸွမ်းလူၺ်ႈပဵၼ်မေႃသွၼ်ၵေႃႉၼိုင်ႈၼႆလႄႈ ၶမ်းႁွမ်ၵႂႃႇယူႇတၢင်းၼႃႈမၼ်းသေ ဢဝ်တၢင်းယုမ်ႉယိုၼ်ႈၸူးယဝ်ႉ တူင်ႉတၵ်ႉၵႂႃႇ…
“မႂ်ႇသုင်ၶႃႈ…မႃးသူင်ႇလုၵ်ႈၶိုၼ်ႈႁူင်းႁဵၼ်းၶႃႈႁႃႉ…”
သဵင်ဢၼ်ယၢမ်ႈႁူ တုမ်ႉယွၼ်ႈၶဝ်ႈမႃးထိုင်ၼႂ်းၸႂ် မိူဝ်ႈဢမ်ႇလႆႈႁၼ်ၵၼ်ႁိုင် မိုင်ယၵ်ႉတူၺ်းၵေႃႈ ဢမ်ႇႁတ်းတူၺ်းသၢႆတႃၶမ်းႁွမ်ၼၼ်ႉလႃးလႃး။
“မႂ်ႇသုင်ၶႃႈ…မေႃသွၼ်…” သဵင်လဵၵ်ႉလဵၵ်ႉဢွၼ်ႇ ၼေႃႇမိူင်းၼၼ်ႉတူင်ႉတၵ်ႉလၢတ်ႈတေႃႇၸူးၶမ်းႁွမ်ၵႂႃႇ။
ၶမ်းႁွမ်ၵေႃႈ ယုမ်ႉၸူးလုၵ်ႈဢွၼ်ႇဢၼ်တိုၵ်ႉႁႃလႆႈ 5 ၶူပ်ႇၼၼ်ႉယဝ်ႉ တွပ်ႇၵႂႃႇၶိုၼ်း
“မႂ်ႇသုင်ၶႃႈ…ၸၢႆးၸိုဝ်ႈသင်ၶႃႈလႃႇ…”
“ၸၢႆးၸိုဝ်ႈႁွင်ႉၼေႃႇမိူင်းဢေႃႈ…မေႃသွၼ်ႁၢင်ႈလီတေႉယဝ်ႉ…”
ၶမ်းႁွမ်တူၺ်းၼေႃႇမိူင်း ဢၼ်ၼႃႈလီႁၵ်ႉ ၵႅမ်ႈသွင်ၽၢႆႇတွင်ႇဢွၵ်ႇမႃး တူၺ်းႁၼ်ယဝ်ႉလီၶႂ်ႈယၵ်းလဵၼ်ႈၼႃႇၼၼ်ႉသေ ယုမ်ႉဢွၵ်ႇၸူးယဝ်ႉ တွပ်ႇၶိုၼ်းၵႂၢမ်းၼေႃႇမိူင်း
“ယိၼ်းၸူမ်းယဝ်ႉၶႃႈ…ၼေႃႇမိူင်းၵေႃႈမေႃလၢတ်ႈတေႉၶႃႈယဝ်ႉ…”
“လုင်းလုင်းႁဝ်းသွၼ်မႃး…”
“လုင်းလုင်းသူ…တေမေႃလၢတ်ႈတေႉၶႃႈယဝ်ႉ…” ၼေႃႇမိူင်းငွၵ်းႁူဝ်လွႆးလွႆးယူႇ။
“မႃးပႂ်ႉႁိုင်ယဝ်ႉၶႃႈႁႃႉ…” ၼေႃႇမိူင်းၵေႃႈၵွၵ်းႁူဝ်ၵႂႃႇထႅင်ႈ။
“ပေႃးၼၼ်ၵေႃႈ…ႁဝ်းၶဝ်ႈၵႂႃႇယူႇတၢင်းၼႂ်းၼေႃႈ…”
“ဢေႃႈၶႃႈ…” ၶမ်းႁွမ်ၵေႃႈၸုင်ဢဝ် ၼေႃႇမိူင်းၶဝ်ႈၵႂႃႇၼႂ်းႁွင်ႈ လုမ်းမၼ်းၼၼ်ႉယဝ်ႉ။
ဝၢႆးသေၶမ်းႁွမ်ၶႃၵႂႃႇယဝ်ႉ လႅင်းမိူင်းၸင်ႇတူင်ႉတူဝ်ပႆၵႂႃႇၸွမ်းတၢင်းလင်ၶႃယူႇ။ ၶဝ်ႈၵႂႃႇတီႈၼႂ်းႁွင်ႈလုမ်း တေမီးၶူဝ်းၶွင်ဢၼ်လုၵ်ႈဢွၼ်ႇလဵၼ်ႈလႄႈ ၼေႃႇမိူင်းလႆႈႁၼ်ယဝ်ႉ ၼႅတ်ႈၵႂႃႇလဵၼ်ႈၵမ်းလဵဝ်ယဝ်ႉ။ လႅင်းမိူင်းၵေႃႈ ၶဝ်ႈမႃးယူႇတီႈၼႃႈၽိူၼ်ၶမ်းႁွမ်ၼၼ်ႉသေ
“ႁဝ်းဢဝ်လုၵ်ႈႁဝ်းမႃးၶိုၼ်ႈႁူင်းႁဵၼ်း…ႁဝ်းတေလႆႈႁဵတ်းၸိူင်ႉႁိုဝ်ၽွင်ႈၶႃႈ…”
ၶမ်းႁွမ်ယုမ်ႉၸူး မိူၼ်ပဵၼ်ဢူၺ်းလီ ၵူၺ်းၵႃႈ လၢႆးႁဵတ်းၼၼ်ႉမိူၼ်ပဵၼ်ၵူၼ်းဢမ်ႇယၢမ်ႈႁူႉၸၵ်းၵၼ်မႃး မိူၼ်ဝႃႈ ၶမ်းႁွမ်မိူဝ်ႈဢွၼ်တၢင်းလႄႈ မိူဝ်ႈလဵဝ်ဢမ်ႇၸႂ်ႈၵေႃႉလဵဝ်ၵၼ်ၼၼ်ႉယဝ်ႉ။ ၶမ်းႁွမ်ဢဝ် ၸေႈမၢႆၽၢင်ၼၼ်ႉ ပၼ်လႅင်းမိူင်းၵႂႃႇသေ
“သူထႅမ်ပၼ်ၶေႃႈမုၼ်းလိၵ်ႈၼႂ်းလွၵ်းၼႆႉၵေႃႈလႆႈယဝ်ႉၶႃႈ…”
မိူဝ်ႈလႅင်းမိူင်းတိုၵ်ႉထႅမ်မၢႆၽၢင်ယူႇၼၼ်ႉ ၶမ်းႁွမ်ၵေႃႈ ၼင်ႈယၵ်ႉတူၺ်းၼေႃႇမိူင်းဢၼ်လဵၼ်ႈတၢင်းလဵၼ်ႈၼၼ်ႉသေ လွင်ႈလီႁၵ်ႉၼေႃႇမိူင်းၼၼ်ႉ ႁဵတ်းႁႂ်ႈမၼ်းယုမ်ႉပေႃးဢမ်ႇတုပ်ႇလႆႈ။
“လုၵ်ႈသူ…လီႁၵ်ႉတေႉၶႃႈယဝ်ႉ…”
လႅင်းမိူင်းၵေႃႈ ၵိုတ်းပၢႆၵမ်ၵမ်ႉၼိုင်ႈယဝ်ႉ သိုပ်ႇယၵ်ႉၸူးၶမ်းႁွမ်သေ
“ဢိုမ်ႈ…”
လႅင်းမိူင်းသႂ်ႇမၢႆၽၢင်ယဝ်ႉသေ
“ႁဝ်းတေပွၵ်ႈမိူင်းယဝ်ႉ…ယွၼ်းၽၢၵ်ႇၼေႃႇမိူင်းၽွင်ႈၶႃႈ…”
“ဢေႃႈၶႃႈ..ယိၼ်းလီၶႃႈ”
လႅင်းမိူင်း ဢွၵ်ႇၵႂႃႇသမ်ႉပေႃးဢမ်ႇႁူၼ်လင်မႃးၶိုၼ်း ယၢင်ႈဢွၵ်ႇၵႂႃႇပႅတ်ႈဝႆးဝႆးယဝ်ႉ။ ၶမ်းႁွမ်ၸင်ႇဢဝ်မၢႆၽၢင်ၼၼ်ႉမႃးတူၺ်းၶိုၼ်း ဢမ်ႇလႆႈသႂ်ႇဝႆႉၼင်ႇဢၼ်လူဝ်ႇသႂ်ႇ ဢမ်ႇတဵမ်ထူၼ်ႈၼႆသေ ၶမ်းႁွမ်ၼႅတ်ႈလမ်းႁွင်ႉၸွမ်းၵႂႃႇ မိူၼ်ဝႃႈလႅင်းမိူင်းဢမ်ႇလႆႈငိၼ်းယဝ်ႉ ပူၼ်ႉၵႂႃႇပႅတ်ႈယူႇ။ ၸင်ႇၵႂႃႇၼင်ႈၸွမ်း ၼေႃႇမိူင်းဢၼ်လႅၼ်ႈတၢင်းလဵၼ်ႈယူႇၼၼ်ႉလႄႈ
“ၼေႃႇမိူင်း…”
“ဢေႃႈ…”
“မႄႈၸၢႆးၸိုဝ်ႈသင်လႃႇ…”
“လုင်းလုင်းၶဝ်လၢတ်ႈဝႃႈ…မႄႈၸၢႆးၸိုဝ်ႈ…ၶမ်းႁွမ်ၼႆၶႃႈဝႃႇ…”
မိူဝ်ႈလႆႈငိၼ်းၸိူင်ႉၼၼ် ဢဝ်ၶမ်းႁွမ် သမ်ႉပေႃးယဵၼ်ၵႂႃႇပႅတ်ႈၵမ်းလဵဝ်ယဝ်ႉ ၸွမ်းၼင်ႇၶေႃႈၵႂၢမ်းၼၼ်ႉ ႁူႉလႆႈၵမ်းလဵဝ်ဝႃႈ ၼေႃႇမိူင်းဢမ်ႇယၢမ်ႈႁၼ်မႄႈၸဵမ်မိူဝ်ႈလဵၵ်ႉ။ ၸိုဝ်ႈၼၼ်ႉတေၸႂ်ႈႁိုဝ်ဢမ်ႇၸႂ်ႈ ၶမ်းႁွမ်ၵေႃႈပႆႇသႂ်ႇ ပႂ်ႉထၢမ်တူၺ်းလႅင်းမိူင်းထႅင်ႈၵွၼ်ႇ ၸင်ႇတေသႂ်ႇၼႆယူႇ။
လႅင်းမိူင်းၵေႃႈ မိူဝ်ႈမိူဝ်းႁွတ်ႈထိုင်ပၢင်သဝ်းယဝ်ႉၼၼ်ႉ ၼင်ႈသေငဝ်ယူႇတီႈၼႂ်းသႃလႃးႁင်းၵူၺ်းယဝ်ႉ မိူဝ်ႈႁၼ်ၸိူင်ႉၼၼ် ၸၢႆးဢွင်ႇၵေႃႈ ဢဝ်တၢင်းၵွၵ်းၼမ်ႉမႃးတမ်းပၼ်သေ
“ၵႂႃႇထူပ်းမေႃယႃၵူၺ်းၶႃႈႁႃႉ…ၸွင်ႇႁၼ်မေႃသွၼ်ၶႃႈႁိုဝ်…”
“လၢတ်ႈလွင်ႈသင်လႃႇ…ယင်းတိုၵ်ႉဝူၼ်ႉၶမ်ၸႂ်ယူႇၼႆႉ…”
“လႆႈႁၼ်ၼႃႈၶဝ်ယဝ်ႉ…လူဝ်ႇၸိုၼ်ႈသႂ်ဢမ်ႇၸႂ်ႈႁႃႉ…ပဵၼ်သင်သမ်ႉလႆႈမႃးၶမ်ၸႂ်ၸိူင်ႉၼႆ…”
“ႁႃးဢမ်ႇယုမ်ႇၸႂ်လႆႈယဝ်ႉ…ၸွင်ႇမၼ်းၸႂ်ႈၶမ်းႁွမ်ၼႆ…”
“ပဵၼ်သင်ယဝ်ႉလႃႇ!…ပေႃးဢမ်ႇၸႂ်ႈပီႈပႂ်ႉသမ်ႉတေပဵၼ်ၽႂ်…”
“ၶဝ်ၵေႃႈပဵၼ်မေႃသွၼ်လီၵေႃႉၼိုင်ႈၼၼ်ႉၼႃႇ…” ထူၺ်ႈၸႂ်လူင်သေ လုၵ်ႉပၢႆႈၵႂႃႇပႅတ်ႈယူႇ။
“ပီႈပႂ်ႉၵေႃႈတိုၼ်းပဵၼ်မေႃသွၼ်လီၸဵမ်မိူဝ်ႈလႂ်ဢမ်ႇၸႂ်ႈႁႃႉ…ဢမ်ႇၼၼ်ၵေႃႈ…တေဢမ်ႇၸႂ်ႈပီႈပႂ်ႉ…”
ၸၢႆးဢွင်ႇ လၢတ်ႈဢမ်ႇပႆႇသုတ်း လႅင်းမိူင်းပေႃးဢွၵ်ႇၵႂႃႇပႅတ်ႈယဝ်ႉ။ မိူဝ်ႈဢွၵ်ႇၽၵ်းတူမႃး သမ်ႉမႃးၺႃးၶမ်းမိူင်းထႅင်ႈသေ ႁဵတ်းႁႂ်ႈဝူၼ်ႉႁၼ်ၶမ်းႁွမ်မႃးယဝ်ႉ။ ထူၺ်ႈၸႂ်လူင်ၵမ်းၼိုင်ႈတေႃႇၼႃႈၶမ်းမိူင်းၵႂႃႇ
“ႁူဝ်ၼႃႈပဵၼ်သင်လႃႇ…မီးၵၢၼ်လမ်ႇလွင်ႈႁႃႉ…”
“ဢိုမ်ႈ!…တၼ်းယူႇႁႃႉ…ၶႂ်ႈဢုပ်ႇၸွမ်းဢိတ်းၼိုင်ႈ…”
“တၼ်းယူႇၶႃႈ…” လႅင်းမိူင်းၵွတ်ႇဢဝ်ၶေႃးၶမ်းမိူင်းၵႂႃႇၼင်ႈတီႈ ဢၼ်ဢမ်ႇမီးၽႂ်ၼၼ်ႉသေ ဝၢႆႇသၢႆႉဝၢႆႇၶႂႃယဝ်ႉၵေႃႈ မိူၼ်ဢၢင်ႈတေလၢတ်ႈသေလွင်ႈလွင်ႈဢွၵ်ႇသူပ်းမႃး ၵူၺ်းၵႃႈ ၵိုတ်းၵႂႃႇပႅတ်ႈသေ ၶိုၼ်းလၢတ်ႈၵႂႃႇဝႃႈ
“ၶမ်းႁွမ်…မႃးႁဵတ်းမေႃသွၼ်တီႈၼႂ်းဝၢၼ်ႈယဝ်ႉ…ပေႃးမီးၶၢဝ်းယၢမ်းၶႂ်ႈမိူဝ်းလႄႇၵေႃႈ…လႆႈယူႇၼႃႈ…ၵႂႃႇလႆႈယဝ်ႉ…”
“ၵၼႆႉၵူၺ်းၶႃႈႁႃႉ…”
“ဢိူဝ်ႈ!…ၵၼႆႉၵူၺ်း…”
“ဢေႃႈ…ႁူဝ်ၼႃႈလႆႈဢုပ်ႇတေႃႇပီႈၶႃႈယူႇႁႃႉ…”
“ဢိုမ်ႈ…သွင်ၶေႃႈ…ပဵၼ်ၶေႃႈၵႂၢမ်းတၢင်းၵၢၼ်ၵူၺ်း…သၢႆတႃၶဝ်…လွင်ႈႁဵတ်းသၢင်ႈၶဝ်…မၼ်းႁဵတ်းႁႂ်ႈႁႃးလၢတ်ႈၵႂၢမ်းပေႃးဢမ်ႇဢွၵ်ႇလႆႈယဝ်ႉ…”
“ပေႃးဝႃႈႁူဝ်ၼႃႈဢမ်ႇယွမ်းသုမ်း…ၶႃႈၵေႃႈယူႇၽၢႆႇႁူဝ်ၼႃႈတႃႇသေႇၼၼ်ႉယဝ်ႉ…ပီႈၶႃႈ…ၶဝ်ဢမ်ႇ…”လၢတ်ႈပႆႇသုတ်း သဵင်ၸၢၵ်ႈလင်မႃးလႄႈ လႅင်းမိူင်းၵေႃႈ လုၵ်ႉၵႂႃႇလၢတ်ႈၸၢၵ်ႈပႅတ်ႈယူႇယဝ်ႉ။
ဝၢႆးသေလၢတ်ႈၸၢၵ်ႈယဝ်ႉၵႂႃႇ
“ၵူႈၵေႃႉႁၢင်ႈႁႅၼ်းတူဝ်ၼႂ်းၶၢဝ်းတၢင်း10 မိၼိတ်ႉႁႂ်ႈတူဝ်ႈတၼ်း…”
ၶဝ်ၵေႃႈဢွၼ်ၵၼ်ႁၢင်ႈႁႅၼ်းတူဝ်ႁင်းၽႂ်ႁင်းမၼ်းၵႂႃႇယဝ်ႉ။ မိူဝ်ႈႁၢင်ႈႁႅၼ်းတူဝ်ႈတၼ်း ၶႅမ်ႉလႅပ်ႈယဝ်ႉဢဝ်တၢင်းၵႃးလူင်သေ ၶီႇလတ်းပူၼ်ႉၶၢမ်ႈဝၢၼ်ႈၵႂႃႇယဝ်ႉ။ ယွၼ်ႉၶၢဝ်းတၢင်းၵႂႃႇၵႆလႄႈ ၶၢဝ်းယၢမ်းမီးဢေႇသေ ႁဵတ်းႁႂ်ႈဢမ်ႇမီးၶၢဝ်းယၢမ်းၵုမ်ႇထူၼ်ႈ တႃႇတေသပ်းလႅင်းၼႃႈၵၢၼ်ပုၼ်ႈၽွၼ်းၼႄၵၼ် ၸွမ်းလူၺ်ႈငဝ်းလၢႆးၶိုၵ်ႉၶၵ်ႉ လႆႈဢုပ်ႇၵုမ်ၸႅၵ်ႇပုၼ်ႈၽွၼ်းၵၼ်ၵႂႃႇတီႈၼႂ်းလူတ်ႉၼၼ်ႉယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ
