တိုၼ်ႇလႅင်း တွၼ်ႈသိပ်းၸဵတ်း

တီႈၼႂ်းဝၢင်းႁိူၼ်းယွၵ်းယွၵ်းလင်ၼိုင်ႈ မီးသဵၼ်ႈတၢင်းဢၼ်လိူမ်ႈလီလႄႈ တၢင်းလင်ႁိူၼ်းမီးၼမ်ႉႁွင်ႈလႆလွင်ႈၵႂႃႇ မီးၶူဝ်ႁၢဝ်းၶိုၵ်ႉၶႅမ်ႉၵႅၼ်ႇၶႅင် သဵၼ်ႈတၢင်းလူတ်ႉလူင်ၵႂႃႇလႆႈလီ ၽၢႆႇပုၼ်ႉႁွင်ႈၼမ်ႉၼၼ်ႉမီးသူၼ် ဢမ်ႇပေႃးၵႂၢင်ႈၵႃႈႁိုဝ် သမ်ႉမီးပႃႇမႆႉလူင်မႆႉယႂ်ႇ သုမ်ႇလပ်ႉၶပ်ႉယႆၸႅၼ်ႇၵၼ် ၶိုၼ်ႈၵႂႃႇၸွမ်းသၼ်ၸွမ်းၵွင်းၸိူဝ်းၼၼ်ႉယူႇယဝ်ႉ။ တွၼ်ႈတႃႇလွင်ႈႁူမ်ႇလူမ်ႈလႄႈ ၵုမ်းထိင်းပၼ်ႁႅင်းၾႆးသေ ၼင်ႇႁိုဝ်ပေႃးတေဢမ်ႇမီးႁႅင်းၵမ်ႉပိူၼ်ႈ ႁႂ်ႈပေႃးၸွႆႈမႃးလႆႈထႅင်ႈၽၢႆႇလင်ၼၼ်ႉ လႅင်းမိူင်းၵေႃႈ ၸတ်းၵူၼ်းၵႂႃႇမူၵ်းပႅပ်ႉဝႆႉယူႇယဝ်ႉ။ ၼင်ႇႁိုဝ်တေဢမ်ႇပူၵ်းႁႂ်ႈငူးတိုၼ်ႇၼၼ်ႉ ၶဝ်ၵေႃႈၸႂ်ႉလွၵ်းလၢႆးငွႆးၶဝ်ႈၵႂႃႇ။

ၸွမ်းၼင်ႇၽႅၼ်ၵၢၼ်ၶဝ်မီးၼၼ်ႉ ယႃႉလုၽဵဝ်ႈမူၺ်ႉပႅတ်ႈ ႁႂ်ႈၶူဝ်းၶွင်ၶဝ်မူတ်းသဵင်ႈၵူၺ်း ဢမ်ႇၸႂ်ႈတႃႇမႃးတိုၵ်းတေႃးၵူၼ်း သင်ၸိူဝ်ႉဝႃႈငိူင်ႉဝႄႈလႆႈလွင်ႈတိုၵ်းတေႃးၵၼ်ၼၼ်ႉလီလိူဝ်ပိူၼ်ႈၼႆယူႇ။ ၵူၺ်းၵႃႈ မိူဝ်ႈသဵင်ၵွင်ႈတႅၵ်ႇမႃးၼၼ်ႉ တိုၼ်းလူဝ်ႇလႆႈႁၢင်ႈႁႅၼ်းတူဝ်ႈတၼ်းဝႆႉၵူႈတီႈယဝ်ႉ သင်ၶဝ်တုမ်ႉတွပ်ႇၶိုၼ်း တိုၼ်းတေလႆႈတိုၵ်းတေႃးၵႂႃႇၶိုၼ်မိူၼ်ၵၼ်ယဝ်ႉ။

ပွၵ်ႈၼႆႉ ပဵၼ်ပွၵ်ႈဢွၼ်တၢင်းသုတ်း တွၼ်ႈတႃႇၶမ်းမိူင်း ဢၼ်လႆႈလူင်းမိုဝ်းႁဵတ်းသၢင်ႈၼႂ်းပိုၼ်ႉတီႈတေႉတေႉ ႁဵတ်းႁႂ်ႈၸႂ်တိုၼ်ႇတဵၼ်ႈမႃးတႄႉတႄႉယဝ်ႉ။ တွၼ်ႈတႃႇတေၶဝ်ႈမႃးယူႇၼႂ်းၸုမ်း ၼူၵ်ႉဢႅၼ်ႇၾႃႉ ၼႆႉ တေလႆႈၽိုၵ်းၽွၼ်ႉမႃး ဢေႇသုတ်းၼိုင်ႈပီ မေႃၵၢၼ်သိုၵ်းၵူၺ်းဢမ်ႇၵႃး တေလႆႈမေႃပႃး လၢႆးၵႅတ်ႇၶႄတူဝ်ၵဝ်ႇ၊ လွၵ်းလၢႆးၶႄႉၶဵင်ႇၽူႈၶဵၼ်ဢမ်ႇၸႂ်ႉၵွင်ႈ၊ လၢႆးၶဝ်ႈပွႆးတိုၵ်းသဵင်ယဵၼ်၊ လၢႆးၸွႆႈထႅမ်ၵူၼ်းမိူဝ်ႈယူႇၼႂ်းမိုဝ်းၽူႈၶဵၼ်၊ လၢႆးယိုဝ်းႁႂ်ႈမႅၼ်ႈပဝ်ႉမၢႆ၊ တေလႆႈၽိုၵ်းၸႂ်လႄႈ လွင်ႈတူင်ႉတိုၼ်ႇလႅတ်းသႅဝ်းယူႇတႃႇသေႇ။ လိူဝ်သေၵၢၼ်သိုၵ်းယဝ်ႉ ယူႇတီႈၼႂ်းၸုမ်းသေ လႆႈၽိုၵ်းသွၼ်ပၼ်ၵႂႃႇၵူႈဝၼ်းဝၼ်း တေႃႇပေႃးပေႉတူဝ်မႃးယဝ်ႉ ၸင်ႇတေႁႂ်ႈလူင်းမိုဝ်းႁဵတ်းသၢင်ႈၼႂ်းပိုၼ်ႉတီႈဢၼ်တေႉမၼ်းၵႂႃႇ။

ၼင်ႇႁိုဝ်ပေႃးတေဢမ်ႇမီးလွင်ႈလုသုမ်းၼႂ်းပၢင်တိုၵ်းၼၼ်ႉ မိူဝ်ႈၽိုၵ်းၽွၼ်ႉၵေႃႈ လႆႈၽိုၵ်းႁဵတ်းမိူၼ်ၼင်ႇဢၼ်တေႉမၼ်းၼၼ်ႉယဝ်ႉ။ မိူဝ်ႈတေၵႂႃႇၸွႆႈထႅမ်ပိူၼ်ႈၼၼ်ႉ တူဝ်ၸဝ်ႈၵဝ်ႇ လူဝ်ႇၵႅတ်ႇၶႄတူဝ်လႆႈသေၵွၼ်ႇ ၸင်ႇတေၸွႆႈထႅမ်ပိူၼ်ႈလႆႈ။ မိူဝ်ႈယူႇၼႂ်းပၢင်တိုၵ်းၼၼ်ႉ ပဝ်ႉမၢႆပဵၼ်ၽူႈၶဵၼ်သေတႃႉ သၢႆၸႂ်ၵေႃႈတေလႆႈလွတ်ႈၽေး။ မိူဝ်ႈယူႇၼႂ်းပိုၼ်ႉတီႈၸွႆႈထႅမ်ၵူၼ်းၼၼ်ႉ သမ်ႉဝႃႈမၼ်းယၢပ်ႇၼႆၵေႃႈ တွၼ်ႈတႃႇလွင်ႈလွတ်ႈၽေးၵူၼ်းၼၼ်ႉ ဝႆႉပဵၼ်မၢႆၼိုင်ႈ။ သမ်ႉဝႃႈမီးၸႂ်ႁတ်းယူႇသေတႃႉ သင်ဝႃႈဢမ်ႇမီးသတိ ဝႆႉမဝ်မၢင်ၼႆ ၵၢၼ်ငၢၼ်းႁဝ်းၵေႃႈၸၢင်ႈတူၵ်းသုမ်းလႆႈၼၼ်ႉယဝ်ႉ။

ၶမ်းမိူင်းၵေႃႈ ဝၢႆးသေသွၼ်ၵၢၼ်သိုၵ်းမႃးယဝ်ႉ လႆႈမႃးၶဝ်ႈၼႂ်းၸုမ်း ၼူၵ်ႉဢႅၼ်ႇၾႃႉ သေ  ႁပ်ႉပုၼ်ႈၽွၼ်းပဵၼ်ၽၢႆႇIT ၼႆသေတႃႉ တွၼ်ႈတႃႇၼမ်ႉၵတ်ႉၼႂ်းၵၢၼ်သိုၵ်းပေႃးတေၶိုပ်ႈၼႃႈ ႁႂ်ႈၸၢင်ႈလူင်းမိုဝ်းႁဵတ်းသၢင်ႈၼႃႈၵၢၼ်ၵႂႃႇလႆႈၼၼ်ႉ ၽၢႆႇၽူႈမီးပုၼ်ႈၽွၼ်းၵေႃႈ လႆႈၽိုၵ်းသွၼ်ပၼ်ၵႂႃႇ တေႃႇပေႃးတေပေႉတူဝ် ၵဵဝ်ႇလူၺ်ႈၼႃႈၵၢၼ်ၵူႈလွင်ႈလွင်ႈၼၼ်ႉယဝ်ႉ။ ဢၼ်လႆႈမႃးယိပ်းၵွင်ႈတေႉသေ ၶဝ်ႈပွႆးတိုၵ်းဢမ်ႇၸႂ်ႈၵၢၼ်ၽိုၵ်းယိုဝ်းၵွင်ႈတေႃႇတေႃလွၵ်ႇယဝ်ႉၼၼ်ႉ ပဵၼ်လွင်ႈဢၼ်မၼ်းမုင်ႈမွင်းမႃးယူႇတႃႇသေႇ ၸဵမ်မိူဝ်ႈၶႂ်ႈပဵၼ်သိုၵ်းပုၼ်ႉယဝ်ႉ။ ဢၼ်လႆႈၽိုၵ်း ဢၼ်လႆႈႁဵၼ်းမႃးၸိူဝ်းၼၼ်ႉ တေဢၢၼ်းဢဝ်မႃးၸႂ်ႉၼႂ်းပၢင်တိုၵ်းဝၼ်းမိူဝ်ႈၼႆႉတၢင်းမူတ်းၼႆယူႇ။

မိူဝ်ႈလတ်းၶၢမ်ႈပူၼ်ႉသူၼ်ၵႂႃႇ မီးသဵၼ်ႈတၢင်းဢၼ်လိူမ်ႈလီလႄႈ မီးပႃႇမႆႉယႂ်ႇမႆႉလူင်ၶပ်ႉယႆၸႅၼ်ႇၵၼ်ၵႂႃႇၸွမ်းသဵၼ်ႈသၢႆတၢင်း တွၼ်ႈတႃႇပေႃးတေၵႂႃႇႁွတ်ႈတီႈပဝ်ႉမၢႆလႆႈလီငၢမ်းၼၼ်ႉ ၸုမ်းၶဝ်လႆႈၽၢမ်းတူဝ်သေ လတ်းထိူၼ်ႇၶဝ်ႈၵႂႃႇလွႆးလွႆးယူႇယဝ်ႉ။ မိူဝ်ႈႁွတ်ႈထိုင်တီႈပဝ်ႉမၢႆယဝ်ႉၼၼ်ႉ ၶဝ်ၵေႃႈလႆႈႁၢင်ႈႁႅၼ်းဢဝ်တီႈယူႇဝႆႉ ၸွမ်းၼင်ႇဝၢင်းၽႅၼ်မႃးၼၼ်ႉသေ လႅင်းမိူင်းလႄႈ ၶမ်းမိူင်း ၵူၼ်းထႅင်ႈသွင်ၵေႃႉ ၽႄၵၼ်ၶဝ်ႈၵႂႃႇတွၼ်ႈတႃႇလူင်းမိုဝ်းႁဵတ်းသၢင်ႈတီႈပဝ်ႉမၢႆၶဝ်ၼၼ်ႉယဝ်ႉ။

ႁိူၼ်းသုမ်ႉၶႃးလင်ၼိုင်ႈ ဢၼ်ၵႂၢင်ႈယႂ်ႇလႄႈၶိုၵ်ႉၶႅမ်ႉ သဵၼ်ႈတၢင်းၶဝ်ႈၵႂႃႇၼႂ်းႁိူၼ်းၼၼ်ႉ မီးႁူဝ်ႉလွမ်ႉႁွပ်ႈဝႆႉလႄႈ မီးၵူၼ်းပႂ်ႉယၢမ်းလွမ်ႉႁွပ်ႈဝႆႉသီႇၼႃႈမိူင်း ၵူၼ်းပႂ်ႉယၢမ်းၸုၵ်းၸႅၼ်ၸွမ်းၸွၵ်ႉၸွမ်းၸဵင်ႇပေႃးတဵမ်ၵႂႃႇမူတ်း ႁၼ်ယဝ်ႉမိူၼ်တေဢမ်ႇမီးသဵၼ်ႈတၢင်းၶဝ်ႈသေဢိတ်းၼၼ်ႉယဝ်ႉ။ လႅင်းမိူင်းၶဝ်ၵေႃႈ မီးၵူၼ်းသီႇၵေႃႉ ၶဝ်ႈၵေႃႉၸဵင်ႇၸဵင်ႇ တွၼ်ႈတႃႇတေႁဵတ်းၵၢၼ်ငၢႆႈၼၼ်ႉ ၸႂ်ႉလွၵ်းလၢႆးသဵင်ယဵၼ်ၶဝ်ႈၵႂႃႇဢဝ်ယဝ်ႉ။ လွမ်ငွႆးၶဝ်ႈဢဝ်မိုဝ်းဝတ်ႉပၼ်ၵွင်ႇၵေႃႈၵူၼ်းပႂ်ႉယၢမ်းၼၼ်ႉပေႃးလူမ်ႉလူင်ၵႂႃႇသေ လွမ်ငွႆးၶဝ်ႈၵႂႃႇတၢင်းၼႂ်းထႅင်ႈ တွၼ်ႈတႃႇတေႁၢင်ႈမၢၵ်ႇဝႆႉၼၼ်ႉသေ ၼင်ႇႁိုဝ်တေလတ်းၽၢၼ်ႇလႆႈၵူၼ်းယၢမ်းၸိူဝ်းၼၼ်ႉၵေႃႈ ၶုၼ်ႇလႅၼ်ႈၽၢင်ႈသႂ်ႇ ႁၵ်းၶေႃးပႅတ်ႈၵူၼ်းၸိူဝ်းၼၼ်ႉ လူမ်ႉလူင်းၵႂႃႇပဵၼ်ၵေႃႉပဵၼ်ၵေႃႉ။ မိူဝ်ႈၶဝ်တေၸၢင်ႈယိုဝ်းၵွင်ႈၸူး ၶုၼ်ႇၸၵ်ႉဢဝ်ၵွင်ႈၶဝ်ၼၼ်ႉဝႆႉလႄႈ ဢဝ်သူၼ်ႈၵွင်ႈတွႆႉဝတ်ႉသႂ်ႇပၼ်တီႈၼႃႈၽၢၵ်ႇပေႃးလိူတ်ႈ လူမ်ႉလူင်းၵႂႃႇၵေႃႉလႂ်ၵေႃႉၼၼ်ႉယဝ်ႉ။

တွၼ်ႈတႃႇတေႁၼ်လႆႈပဝ်ႉမၢႆၸႅင်ႈလႅင်းၼၼ်ႉ ၶဝ်ၵေႃႈလႆႈၶူၼ်ႉသွၵ်ႈႁႃၸွမ်းႁိူၼ်းၸိူဝ်း ၼၼ်ႉယဝ်ႉ။ ၸွမ်းလူၺ်ႈပဵၼ်တီႈႁူင်းႁဵတ်းဢွၵ်ႇယႃႈလႄႈ ဢၼ်လႆႈမႃးယႃႉပႅတ်ႈၼႆႉ ဢမ်ႇၸႂ်ႈႁိူၼ်းၵူၺ်းပဵၼ်တီႈႁုင်ယႃႈၼၼ်ႉယဝ်ႉ။ ၶဝ်ၵေႃႈလႆႈၶူၼ်ႉသွၵ်ႈႁႃတၢင်းႁိုင် လႆႈႁၼ်ၶိူင်ႈၸၢမ်းယႃႈ မီးယူႇၼိူဝ်ႁိူၼ်းၸၼ်ႉၼိူဝ်ၼၼ်ႉသေ ၼင်ႇႁိုဝ်ပေႃးတေၸၼ်ၸႂ်လႆႈၵူၼ်းၸိူဝ်းၼၼ်ႉ လႅင်းမိူင်းၵေႃႈ ဢဝ်ၼမ်ႉမၼ်းႁူတ်းယဝ်ႉ ၸုတ်ႇၽဝ်ၵႂႃႇၼႂ်းႁွင်ႈၼၼ်ႉယူႇ။ ယၢမ်းၼင်ႇၼၼ် ၵူၼ်းၸိူဝ်းၼၼ်ႉ ဢွၼ်ၵၼ်မႃးမွတ်ႇၾႆးလႄႈ လႆႈႁၼ်ၵူၼ်းလႅၼ်ႈဢွၵ်ႇမႃးတီႈသဵၼ်ႈတၢင်းဢၼ်ၼိုင်ႈ မိူၼ်ပဵၼ်ၽႃ သမ်ႉပဵၼ်ၽၵ်းတူၼၼ်ႉယဝ်ႉ။ မိူဝ်ႈၽွင်းၵူၼ်းသူၼ်ႈသိၼ်းသၢၼ်ၵၼ်သုၵ်ႉသၵ်ႉယူႇၼၼ်ႉ လႅင်းမိူင်းဢဝ်တိုဝ်ႉတင်းၼႆႉသေ လွမ်ငွႆးၶဝ်ႈၵႂႃႇယူႇယဝ်ႉ။

တီႈၼႂ်းႁွင်ႈတႂ်ႈလိၼ် မၼ်းၵႂၢင်ႈယႂ်ႇပဵၼ်ၵူဝ်ႇတွင်ႇလူင်လင်ၼိုင်ႈၼၼ်ႉယဝ်ႉ မီးတၢင်းၶိူင်ႈႁုင်တူမ်ႈႁဵတ်းယႃႈၵူႈၸိူဝ်ႉၵူႈပိူင်ပေႃးၸေးမူတ်း။ ပုၼ်ႈၽွၼ်းလႅင်းမိူင်း ဢၼ်တေလႆႈမႃးႁဵတ်းၼႆႉ ပဵၼ်ပဝ်ႉမၢႆသုင်သုတ်းၼႂ်းၸုမ်းၶဝ်ၼၼ်ႉယဝ်ႉ။ လႅင်းမိူင်းႁၼ်ယဝ်ႉၵေႃႈ ႁိပ်ႈၼႅတ်ႈဝၢင်း မၢၵ်ႇၵႂႃႇယူႇ မိူဝ်ႈတိုၵ်ႉဝၢင်းမၢၵ်ႇၵႂႃႇယူႇၼၼ်ႉ ၸင်ႇမီးၵူၼ်းၶဝ်ႈမႃးၼႂ်းႁွင်ႈၶိုၼ်းသေ သၢႆတႃၵူၼ်းၼမ်လႄႈ ႁၼ်မႅၼ်ႈလႅင်းမိူင်းၵႂႃႇ ၸင်ႇလႆႈမီးလွင်ႈၶေႉၶဵင်ႇပိုတ်းယိုဝ်းၵၼ်ယူႇယဝ်ႉ။ ယွၼ်ႉပဵၼ်တႂ်ႈလိၼ် သဵင်ၵွင်ႈဢမ်ႇငိၼ်းလႆႈထိုင်ၼိူဝ်ပိုၼ်ႉလိၼ်။ ၶမ်းမိူင်းၶဝ်သၢမ်ၵေႃႉၵေႃႈ လႆႈႁၢင်ႈမၢၵ်ႇဝႆႉၼင်ႇပုၼ်ႈၽွၼ်းၶဝ်မီးၼၼ်ႉ ယဝ်ႉၵေႃႈ ဢွၵ်ႇမႃးဢဝ်တီႈယူႇၶိုၼ်းယူႇယဝ်ႉ။

ၼႂ်းႁွင်ႈတႂ်ႈလိၼ်ၼၼ်ႉ မီးၶိူင်ႈၵိတ်ႇၶႂၢင်ၼမ်လႄႈ ႁဵတ်းႁႂ်ႈငိူင်ႉဝႄႈလႆႈလီယူႇ တွၼ်ႈတႃႇလွင်ႈလွတ်ႈၽေးတူဝ်ၵဝ်ႇလႄႈ ပေႃးတေဢွၵ်ႇလႆႈတၢင်းၼွၵ်ႈၶိုၼ်းၼၼ်ႉ ဢမ်ႇတုမ်ႉတွပ်ႇၸူးသေတဵတ်ႇယဵၼ်ဝႆႉ ပၼ်ႁႂ်ႈၶဝ်ဝူၼ်ႉဝႃႈတၢႆၵႂႃႇပႅတ်ႈႁေၼၼ်ႉယဝ်ႉ။ မိူဝ်ႈၸုမ်းၵူၼ်းၸိူဝ်းၼၼ်ႉ တိုၵ်ႉႁႃၵူၼ်းယူႇ လႅင်းမိူင်းၵေႃႈ ႁႃတိုဝ်ႉတၢင်းတႃႇတေဢွၵ်ႇၵႂႃႇၼႆယဝ်ႉ ၵူၺ်းၵႃႈတိုၵ်ႉမီးၵူၼ်းပႂ်ႉယူႇတီႈၽၵ်းတူလႄႈသမ်ႉမီးၵူၼ်းၸွမ်းႁႃမၼ်းထႅင်ႈၼႆ ႁဵတ်းႁႂ်ႈမၼ်းဢမ်ႇၸၢင်ႈဢွၵ်ႇၵႂႃႇလႆႈ။

ၸုမ်းလႅင်းမိူင်း ဢၼ်ပႂ်ႉဝႆႉယူႇၼၼ်ႉၵေႃႈ ဢမ်ႇလႆႈႁၼ်လႅင်းမိူင်းဢွၵ်ႇမႃးသေပွၵ်ႈလႄႈ  ထၢမ်ၵေႃႈဢမ်ႇတွပ်ႇ ႁွင်ႉၸူးၵေႃႈဢမ်ႇလၢတ်ႈသင်ၶိုၼ်း မၼ်းၶႂ်ႈလၢၵ်ႇလၢႆးမႃးသေ ၶမ်းမိူင်းၵေႃႈလႆႈၶိုၼ်းၶဝ်ႈၵႂႃႇ တွၼ်ႈတႃႇတေၵႂႃႇတူၺ်း လႅင်းမိူင်းယူႇယဝ်ႉ မိူဝ်ႈၼၼ်ႉၵူၺ်း ႁၼ်မႅၼ်ႈၵူၼ်းယၢမ်းပႂ်ႉယူႇႁိမ်းႁွမ်းၽႃတီႈၼိုင်ႈ မၼ်းလႆႈငွႆးၶဝ်ႈၵႂႃႇၸမ်ၸမ်သေ ႁၼ်ႁွႆးမိူၼ်ၽၵ်းတူဝႆႉယဝ်ႉ ၶုၼ်ႇဝူင်ၶဝ်ႈၵႂႃႇႁၢဝ်ႉဢဝ်ၵူၼ်းၵေႃႉၼိုင်ႈၶဝ်ႈမႃးႁႄႉတူဝ်မၼ်းဝႆႉယဝ်ႉ ၵူၼ်းထႅင်ႈၵေႃႉၼိုင်ႈ ဢၢင်ႈတေယိုဝ်း ၵူၺ်းၵႃႈဢမ်ႇၸၢင်ႈယိုဝ်းလႄႈ ႁဵတ်းႁႂ်ႈမၼ်းႁၵ်းၶေႃးၵူၼ်းၵေႃႉၼၼ်ႉလူမ်ႉလူင်းၵႂႃႇယဝ်ႉ ဢဝ်ႁႅင်းတိၼ်မၼ်းပုင်ႈၶဝ်ႈသႂ်ႇတီႈၵူၼ်းထႅင်ႈၵေႃႉၼိုင်ႈ ၵူၺ်းၵႃႈၵူၼ်းၵေႃႉၼၼ်ႉလႅတ်းလိူဝ်လႄႈ မၢၵ်ႇၵွင်ႈလၼ်ႇဢွၵ်ႇမႃး တိူဝ်ႉၺႃးသႂ်ႇတီႈၶႅၼ်သၢႆႉမၼ်းၼၼ်ႉၵႂႃႇယူႇ။ မိူဝ်ႈၽွင်းလိူတ်ႈတိုၵ်ႉမႆႈယူႇၼၼ်ႉ ယင်းတိုၵ်ႉမီးႁႅင်းယူႇလႄႈ မၼ်းၵေႃႈၶုၼ်ႇထိပ်ႇသႂ်ႇပၼ် ၵူၼ်းၵေႃႉၼၼ်ႉလူမ်ႉထူလူင်ၵႂႃႇ ၼင်ႇႁိုဝ်တေဢမ်ႇသုမ်းၶၢဝ်းယၢမ်းလႄႈ ၶုၼ်ႇၸၵ်ႉဢဝ်ၵွင်ႈယဝ်ႉ ဢဝ်သူၼ်ႈၵွင်ႈတွႆႇပႆၶီႈမႅပ်ႉၵူၼ်းၵေႃႉၼၼ်ႉ ပေႃးဢမ်ႇလုၵ်ႉမႃးလႆႈသေ ဢီးၽၵ်းတူၼၼ်ႉၶဝ်ႈၵႂႃႇလွႆလွႆးယူႇ။

ပိုတ်ႇၽၵ်းတူၶဝ်ႈၵႂႃႇ သၢႆတႃၵူၼ်းတၢင်းၼမ်ယၵ်ႉတူၺ်းၸူးလႄႈ ၸွမ်းလူၺ်ႈတၢင်းလႅတ်းဝႆးသေ ၼႅတ်ႈပၢႆႈပႅပ်ႉၵမ်းလဵဝ်ယဝ်ႉ ၵူၼ်းၸိူဝ်းၼၼ်ႉ ၵမ်ႈၽွင်ႈၵေႃႈလႅၼ်ႈဢွၵ်ႇမႃးလိုပ်ႈလမ်းၶမ်းမိူင်းၵမ်ႈၽွင်ႈၵေႃႈၸွမ်းႁႃတူဝ်လႅင်းမိူင်းယူႇ မိူဝ်ႈၵူၼ်းပဵၼ်ၽုင်လႅၼ်ႈဢွၵ်ႇမႃးၼၼ်ႉ လႅင်းမိူင်းၵေႃႈ လႆႈတိုဝ်ႉတၢင်းယဝ်ႉ  ၶုၼ်ႇဝႅၼ်ၽၢင်ႈၽၵ်းတူဢွၵ်ႇမႃး မိူဝ်ႈၵူၼ်းပႂ်ႉၽၵ်းတူတိုၵ်ႉမိုင်ယူႇၼၼ်ႉယဝ်ႉ။

မိူဝ်ႈမၼ်းလႅၼ်ႈဢွၵ်ႇမႃး  သဵင်ၵွင်ႈလိုပ်ႈလမ်းၸွမ်းမႃးတၢင်းလင်။ ၸွမ်းလူၺ်ႈ လွၵ်းလၢႆးလႅတ်းၽၢႆလႄႈ မၢၵ်ႇၵွင်ႈဢမ်ႇတၼ်းတိူဝ်ႉၸပ်းၺႃး။ တွၼ်ႈတႃႇၵူၼ်းၸိူဝ်းၼၼ်ႉ တေဢမ်ႇလမ်းမႃးၶိုတ်းလႆႈၼၼ်ႉ မၼ်းၵေႃႉလႆႈယိုဝ်းၵွင်ႈတုမ်ႉတွပ်ႇၵႂႃႇၶိုၼ်း မိူဝ်ႈသဵင်ၵွင်ႈတႅၵ်ႇ သၢႆၸႂ်ၵူၼ်းၵေႃႈတိုၼ်းတေတၢႆယူႇယဝ်ႉ။ တႅၼ်းတီႈတေယိုဝ်းၵႅတ်ႇၶႄတူဝ် မၼ်းၵေႃႈယိုဝ်းလူမ်ႉတၢႆၵႂႃႇၵေႃႉလႂ်ၵေႃႉၼၼ်ႉယူႇ ယၢမ်းၼၼ်ႉ လွင်ႈတဵတ်ႇယဵၼ်ၼၼ်ႉၵေႃႈ မီးသဵင်ၵွင်ႈသဵင်မၢၵ်ႇယိုဝ်းလင်မေႃးမေႃးၵူႈၸွၵ်ႉၵူႈၸဵင်ႇယဝ်ႉ။ ၵူၼ်းလႅင်းမိူင်းၵေႃႈ လုၵ်ႉမႃးၵူႈၸွၵ်ႉၵူႈၸဵင်ႇသေ ဝႅတ်ႉလွမ်ႉယိုဝ်းၶဝ်ၵႂႃႇ တွၼ်ႈတႃႇတေၵႅတ်ႇၶႄပၼ်လႅင်းမိူင်းလႄႈ ၶမ်းမိူင်းႁႂ်ႈပေႃးဢွၵ်ႇမႃးလႆႈၼၼ်ႉယဝ်ႉ။

ဝၢႆးသေလႅင်းမိူင်းၸွႆႈၶမ်းမိူင်းဢွၵ်ႇမႃးလႆႈယဝ်ႉ လႆႈဢွၵ်ႇၶေႃႈၸိသင်ႇ ႁႂ်ႈတဵၵ်းမၢၵ်ႇတႅၵ်ႇၵႂႃႇတီႈႁူင်းႁဵတ်းဢွၵ်ႇယႃႈၼႆႉသေ မၢၵ်ႇတႅၵ်ႇသဵင်လင် သၼ်ႇယွၼ်ႈလိၼ်မိူင်း ႁိူၼ်းလုၵ်ႉပဵၼ်ၾႆးပေႃးလႅင်းလူင်ၵႂႃႇမူတ်းယဝ်ႉ။ လႅင်းမိူင်းၶဝ်ၵေႃႈ လႆႈထွႆဢွၵ်ႇႁၢင်ႇၼႂ်းပိုၼ်ႉတီႈၼၼ်ႉၵႂႃႇၶိုၼ်းယဝ်ႉ။

ပႂ်ႉလူဢၢၼ်ႇထႅင်ႈတွၼ်ႈတေမႃးၶႃႈ။