ၵၢင်ဝၼ်းၸၢႆႉတူၵ်း ၶၢဝ်းလူင်းႁူင်းႁဵၼ်း ၶမ်းႁွမ်ပႆႇၸၢင်ႈပွၵ်ႈၶိုၼ်းမိူဝ်း ပႂ်ႉႁႂ်ႈမီးၵူၼ်းမႃးႁပ်ႉၼေႃႇမိူင်းယဝ်ႉ ၸင်ႇတေမိူဝ်းၼႆယူႇ။ ၵူၺ်းၵႃႈ ၵၢင်ဝၼ်းၶမ်ႈမႃးတိၵ်းတိၵ်းလႄႈ ဢမ်ႇႁၼ်ၽႂ်မႃးသေပွၵ်ႈ ၶမ်းႁွမ်ၸင်ႇႁွင်ႉဢဝ်ၼေႃႇမိူင်းမိူဝ်းၸွမ်းတီႈႁိူၼ်းယဝ်ႉ။ မိူဝ်ႈတိုၵ်ႉၸုင်ၼေႃႇမိူင်းၶဝ်ႈမိူဝ်းၼႂ်းဝၢင်းႁိူၼ်း ယိင်းသႅင်လႆႈႁၼ်သေ
“လုၵ်ႈဢွၼ်ႇၵေႃႉၼႆႉ…ယူႇတီႈပၢင်သဝ်းၸွမ်းၵၼ်တင်းၸၢႆးၶိူဝ်းၶဝ်ဢမ်ႇၸႂ်ႈႁႃႉ…ႁဵတ်းႁိုဝ်မႃးၸွမ်းသူလႃႇ…”
“ပေႃႈၶဝ်မႃးသူင်ႇၶိုၼ်ႈႁူင်းႁဵၼ်း…ၶၢဝ်းၼႆႉၵေႃႈပႆႇမႃးႁပ်ႉၼၼ်ႉၼႃႇ…”
“ပဵၼ်လုၵ်ႈၽႂ်လႃႇ…”
“ၶဝ်ပဵၼ်လုၵ်ႈ…လႅင်းမိူင်းဝႃႇ…”
“ႁႃ!!…တၢႆႁေလႃႈ!…”
မိူဝ်ႈငိၼ်းၸိူင်ႉၼၼ် ပဵၼ်ဢၼ်တူၵ်းၸႂ်မႃးၵမ်းလဵဝ်လႄႈ ၸႂ်ၼႆႉထိင်းဝႆႉဢမ်ႇလႆႈယဝ်ႉ ၶႂ်ႈႁႆႈႁိုဝ်၊ ၶႂ်ႈယုမ်ႉႁိုဝ်၊ ၶႂ်ႈၶူဝ်ႁိုဝ် ၼႂ်းၸႂ်ၼႆႉလၢတ်ႈပေႃးဢမ်ႇထုၵ်ႇသေဢိတ်း။
“ပေႉတူၵ်းၸႂ်သင်လူင်လၢင်လႃႇ…”
“ၶဝ်တၼ်းတေႇၼႃႈႁိူၼ်းမီးလုၵ်ႈၵေႃႉယႂ်ႇတၢၼ်ႇၼႆႉယဝ်ႉႁႃႉၼႆႉ…ႁဝ်းသမ်ႉပေႃးဢမ်ႇၶႂ်ႈယုမ်ႇယဝ်ႉ…”
ၶမ်းႁွမ်ဢွၼ်ဢဝ်ၼေႃႇမိူင်း ၶဝ်ႈမိူဝ်းလဵၼ်ႈပႂ်ႉၼႂ်းႁိူၼ်း ၵွပ်ႈလူဝ်ႇႁဵတ်းၵၢၼ်ၸွမ်းႁိူၼ်းၸွမ်းယေးသေ ႁႂ်ႈမၼ်းလဵၼ်ႈယူႇၵူၺ်းယဝ်ႉ။ ၼေႃႇမိူင်းပဵၼ်လုၵ်ႈဢွၼ်ႇလီလႄႈ ဢမ်ႇၸွမ်းသုၵ်ႉယုင်ႈဢမ်ႇၸွမ်းၵဝ်းသင်သေ ၼင်ႈငဝ်ပႂ်ႉဢမ်ႇၸၢင်ႈႁဵတ်းသင်ယူႇၼႂ်းႁိူၼ်းၼၼ်ႉယဝ်ႉ။ ၶမ်းႁွမ်ၵေႃႈ မိူဝ်ႈတိုၵ်ႉႁဵတ်းၶဝ်ႈၽၵ်းယူႇၼႂ်းသွင်ႇၾႆးၼၼ်ႉ လႆႈႁၼ်ၼေႃႇမိူင်းၼင်ႈငဝ်ယူႇလႄႈ လႆႈႁွင်ႉမႃးၼင်ႈတူၺ်းၸွမ်းၼႂ်းသွင်ႇၾႆးယဝ်ႉ။ ၼင်ႇႁိုဝ်ပေႃးတေဢမ်ႇလီၶၢၼ်ႉၼၼ်ႉ ၶမ်းႁွမ်တႄႇဢုပ်ႇလၢတ်ႈၵႂၢမ်းၸူးလႄႈ ၼႂ်းသွင်ႇၾႆးၼၼ်ႉၵေႃႈ ပဵၼ်သဵင်ၶႃပၼ်းၵႂႃႇမူတ်း။
ထိုင်ၶၢဝ်းဢၢပ်ႇၼမ်ႉယဝ်ႉလႄႈ လုၵ်ႈဢွၼ်ႇၵေႃႈ ထုၵ်ႇလီဢၢပ်ႇၼမ်ႉၼႆသေ ၶမ်းႁွမ်လႆႈဢၢပ်ႇပၼ်ၼမ်ႉၼေႃႇမိူင်းၵႂႃႇယူႇ။ ၶမ်းႁွမ်ဢၢပ်ႇၼမ်ႉပၼ်ၼေႃႇမိူင်းယဝ်ႉ ၶဝ်ႈမိူဝ်းၼႂ်းႁိူၼ်း လႆႈႁၼ် ယိင်းသႅင်ၼင်ႈသေငဝ်ယူႇလႄႈ
“သႅင်ပဵၼ်သင်လႃႇ…ဢမ်ႇႁၼ်သူတၵ်းသဵင်ၸဵမ်ၵႆႈယဝ်ႉ…”
“ဢေႃႈ…ဢိုမ်ႈ…ႁဝ်းဢမ်ႇပဵၼ်သင်…”
“ပေႃးၼၼ်ၵေႃႈ…တူၺ်းပၼ်ၼေႃႇမိူင်းၽွင်ႈၼႃႈ…ႁဝ်းတေၵႂႃႇဢၢပ်ႇၼမ်ႉယဝ်ႉ…”
ယိင်းသႅင်ပႆႇတၼ်းတွပ်ႇ ၶမ်းႁွမ်ပေႃးၵႂႃႇပႅတ်ႈယဝ်ႉ။ လိူဝ်သေၵူၼ်းတိူဝ်ႉၸႂ်ယူႇ သမ်ႉပၢႆႁႂ်ႈမႃးလဵၼ်ႈၵေႃႉၼေႃႇမိူင်းထႅင်ႈ ႁၼ်ၼႃႈယဝ်ႉၵေႃႈ ၼမ်ႉတႃပေႃးၶႂ်ႈလႆဢွၵ်ႇမႃးၵမ်းလဵဝ်။ ယိုင်ႈဝူၼ်ႉ ယိုင်ႈဢမ်ႇပွင်ႇၸွမ်းတၢင်းဝူၼ်ႉတူဝ်ၵဝ်ႇယဝ်ႉ တေႁဵတ်းႁိုဝ်ႁူၼ်ၶိုၼ်းၶၢဝ်းယၢမ်းလႆႈယဝ်ႉလႃႇ မိူဝ်ႈမၼ်းပဵၼ်မႃးယဝ်ႉၼၼ်ႉ ၵႄႈၶႆလွင်ႈဝၼ်းလင်ဢမ်ႇလႆႈၵေႃႈ ၵႃႈတေလႆႈၵႄႈၶႆလွင်ႈမိူဝ်းၼႃႈၼၼ်ႉၵူၺ်း။ ႁၵ်ႉဢမ်ႇလႆႈၵေႃႈ ႁူႉၵႃႈတေလႆႈတတ်းၸႂ်ၵူၺ်းလေႃႇ ပွႆႇၼမ်ႉတႃဢၼ်ၵၼ်ႈဝႆႉၼၼ်ႉဢွၵ်ႇမႃးတင်းမူတ်းသေလႄႈ မိုဝ်းဢွၼ်ႇ ၼေႃႇမိူင်းၼၼ်ႉၵေႃႈ မႃးၸဵတ်ႉပၼ်ယူႇယဝ်ႉ။
“ပႃႈပႃႈ…ႁႆႈႁဵတ်းသင်လႃႇ…ပေႃးၵူၼ်းလူင်ႁႆႈၼႆ…တေဢမ်ႇႁၢင်ႈလီၶႃႈဝႃႇ…”
ယိင်းသႅင်ၸင်ႇယုမ်ႉဢွၵ်ႇမႃးသေ “ပႃႈပႃႈဢမ်ႇလႆႈႁႆႈ…မုၼ်ႈၶဝ်ႈတႃၵူၺ်း…”
“ပဵၼ်သင်ၼႃႈပႃႈပႃႈယမ်းယမ်း…မိူၼ်ၸၢႆးႁႆႈဝႆႉ…”
ၶေႃႈၵႂၢမ်းလုၵ်ႈဢွၼ်ႇၵေႃႉၼႆႉ ႁဵတ်းႁႂ်ႈ လၢတ်ႈသင်ပေႃးဢမ်ႇလႆႈၸွမ်းမၼ်းၼၼ်ႉယဝ်ႉ။
“မိူဝ်ႈလႂ်ပေႃႈၸၢႆးတေမႃး…”
“ၶႂ်ႈမိူဝ်းယဝ်ႉႁႃႉ…” ၼေႃႇမိူင်းငွၵ်းႁူဝ်ၼႄၵႂႃႇ။
“ပေႃႈသူလၢတ်ႈမႃးဝႃႈ…ႁႂ်ႈသူယူႇတီႈၼႆႈၼႆဝႃႇ…ပေႃႈသူ…တေဢမ်ႇမႃးယဝ်ႉၼႆ…”
“ဢမ်ႇၸႂ်ႈ…ပေႃႈဢမ်ႇလႆႈလၢတ်ႈၸၢႆးၸိူင်ႉၼၼ်…ပေႃႈဝႃႈတေမႃးႁပ်ႉၸၢႆးပေႃးလူင်းႁူင်းႁဵၼ်းယဝ်ႉၼႆ…”
“လူင်းႁူင်းႁဵၼ်းၸဵမ်ၵႆႈယဝ်ႉ…ပေႃႈသူၵေႃႈယင်းပႆႇမႃးလူး…ပေႃႈသူဢမ်ႇမႃးယဝ်ႉ…”
“ဢမ်ႇၸႂ်ႈ!…”
ယိင်းသႅင်ၵေႃႈ ယဝ်ႉယွၵ်ႇၼေႃႇမိူင်းၵႂႃႇ လွင်ႈမွင်ၸႂ်မၼ်းပေႃးႁၢႆၵႂႃႇမူတ်း။
ဝၢႆးသေၵိၼ်ၶဝ်ႈၶမ်ႈယဝ်ႉ ၼင်ႇႁိုဝ်ၼေႃႇမိူင်းပေႃးတေဢမ်ႇလႆႈယူႇလၢႆသေ တေၼင်ႈမွင်းပႂ်ႉ လႅင်းမိူင်းယူႇၼၼ်ႉ ၶမ်းႁွမ်ၵေႃႈ ဢွၼ်ႁဵတ်းသေလွင်ႈလွင်ႈ ႁႂ်ႈပေႃးမီးၽွၼ်းလီတွၼ်ႈတႃႇၼေႃႇမိူင်းၼႆလႄႈ ၶႆႈဢပုမ်ႇၼႄမၼ်းၵႂႃႇယဝ်ႉ။
ယၢမ်းၵၢင်ၶိုၼ်းတႂ်ႈငဝ်းသၢႆလႅင်းလၢဝ်ဝွႆးဝွႆး ၼႂ်းဝၢၼ်ႈဢၼ်လပ်းသိင်ႇမိုတ်းတၼ် သဵင်ယဵၼ်သီႇသီႇၼၼ်ႉ တီႈႁိူၼ်းၶမ်းႁွမ်ၶဝ်၊ သဵင်တွႆႇၽၵ်းတူလင်မေႃးမႃး ၶမ်းႁွမ်ငိၼ်းသဵင်ယဝ်ႉ တိုၼ်ႇမႃးပိုတ်ႇၽၵ်းတူတူၺ်း ၵိုင်ႉၵၢင်ႉႁၼ်ၽူႈၸၢႆးသႂ်ႇၶူဝ်းသိုၵ်းတဵမ်တူဝ် ပႃးတင်းၵွင်ႈယဝ်ႉၸုၵ်းယူႇၽၢႆႇၼႃႈမၼ်းၼၼ်ႉလႄႈ တူၵ်းၸႂ်လူင်ၵႂႃႇ
“သူပဵၼ်ၽႂ်!…” သဵင်ၶႅင်ႁၢဝ်ႈႁတ်း လၢတ်ႈဢွၵ်ႇသူပ်း။
ယွၼ်ႉယူႇၼႂ်းလပ်းသိင်ႇ ၵူၼ်းၵေႃႉၼၼ်ႉသမ်ႉပူၵ်ႉၼႃႈပူၵ်ႉတႃဝႆႉလႄႈ ႁဵတ်းႁႂ်ႈၶမ်းႁွမ်တူၵ်းၸႂ်မႃးၼၼ်ႉယဝ်ႉ ၵွပ်ႈဢမ်ႇယၢမ်ႈႁၼ်ၵူၼ်းၸိူဝ်းၼႆႉသေပွၵ်ႈလူး။
“ႁဝ်း…လႅင်းမိူင်း…” ထွတ်ႇမၢၵ်ႇႁူဝ်မၼ်းယဝ်ႉ ဢဝ်ဢၼ်ပူၵ်ႉသူပ်းမၼ်းဢွၵ်ႇ ၶမ်းႁွမ်ၸင်ႇတေပိုတ်ႇၽၵ်းတူပၼ်ၵႂၢင်ႈမႃး သႅင်ၾႆးၼႂ်းႁိူၼ်းၼၼ်ႉ ထွင်ႇပၼ်ႁႂ်ႈႁၼ်လႅင်းမိူင်းလီလီလႄႈ ၸွမ်းလူၺ်ႈသၢႆတႃဢၼ်လႆႈႁၼ်ၶဝ်ၼၼ်ႉ
“သူၵႂႃႇလႂ်မႃးလႃႇ…ပဵၼ်သင်လႄႈ..ၶူဝ်းပေႃးယမ်းၵႂႃႇတင်းတူဝ်ၸိူင်ႉၼႆ…”
“ၵူၼ်းႁဝ်းလႆႈႁပ်ႉလွင်ႈမၢတ်ႇၸဵပ်း…မေႃယႃမီးယူႇႁႃႉ…”
“ဢိုမ်ႈ!…”
လႅင်းမိူင်းဢဝ်တူဝ်ၵူၼ်းမၢတ်ႇၸဵပ်းၶဝ်ႈမိူဝ်းၵႂႃႇၼႂ်းႁိူၼ်းသေ ၶမ်းႁွမ်ၵေႃႈ ၵႂႃႇႁွင်ႉမေႃယႃလုၵ်ႉမႃးယဝ်ႉ။ မိူဝ်ႈလႆႈႁၼ် ၵူၼ်းမၢတ်ႇၼၼ်ႉပဵၼ်ၶမ်းမိူင်း ၶမ်းႁွမ် ၵိုင်ႉၵၢင်ႉပဵၼ်ၸႂ်ဢမ်ႇလီမႃးၵမ်းလဵဝ်။
“ၶမ်းမိူင်း!!…ႁဵတ်းႁိုဝ်သေလႄႈပဵၼ်ၸိူင်ႉၼႆ…ၸွင်ႇၶဝ်တေတၢႆႁိုဝ်…”
မိူၼ်ဝႃႈ ၽႂ်ၵေႃႈဢမ်ႇတၼ်းလႆႈထွမ်ႇၸွမ်းၶေႃႈၵႂၢမ်းမၼ်းလၢတ်ႈမႃးသေၵေႃႉ ၸၢႆးၶိူဝ်းၵေႃႈ ၸွမ်းလူၺ်ႈပဵၼ်မေႃယႃၼင်ႇၵၼ်လႄႈ
“ၶဝ်…မၢတ်ႇၸဵပ်းတီႈၶႅၼ်သၢႆႉ…ႁဝ်းဢဝ်မၢၵ်ႇၵွင်ႈဢွၵ်ႇလႄႈယူတ်းယႃပၼ်ႁွႆးၸဵပ်းယဝ်ႉ…ၵူၺ်းၵႃႈ…ၶဝ်မီးလူမ်းၼၢဝ်ၶိုၼ်ႈသုင်…တေသိုပ်ႇၵႂႃႇဢမ်ႇလႆႈထႅင်ႈယဝ်ႉ…ႁဝ်းၵေႃႈတေဢမ်ႇဢဝ်ၶိုၼ်ႈမိူဝ်းယဝ်ႉ…တေပၼ်ႁႂ်ႈၶဝ်လိုဝ်ႈႁိူဝ်ႉယူတ်းယႃတူဝ်တီႈၼႆႉသေၶိုၼ်းၼိုင်ႈ…သူၸွႆႈတူၺ်းပၼ်ၶဝ်ၽွင်ႈလႄႈၼႃႈ…”
“ဢေႃႈၶႃႈ…” ယိင်းသႅင်တွပ်ႇႁပ်ႉယဝ်ႉ ၸၢႆးၶိူဝ်းၶဝ်ၵေႃႈ ဢွၼ်ၵၼ်ဢွၵ်ႇၵႂႃႇၵမ်းလဵဝ်။ မိူဝ်ႈတေႁေႃႈၵႃးမိူဝ်းၵႂႃႇၼၼ်ႉ လႅင်းမိူင်းလႅၼ်ႈမႃးၸူးၶမ်းႁွမ်သေ
“ၼေႃႇမိူင်းလပ်းယဝ်ႉႁႃႉ…”
“လပ်းယဝ်ႉ…”
“ၸူမ်းယဝ်ႉၼႃႈ…ၸွႆႈတူၺ်းထိုင်ပၼ်ၶဝ်…”
လၢတ်ႈယဝ်ႉၵေႃႈ ဢွၵ်ႇႁၢင်ႇယၢၼ်ပွၵ်ႈမိူဝ်းၵႂႃႇယူႇ။
ၶမ်းႁွမ်ၵေႃႈ ၶမ်ႈၼႆႉႁိုဝ်တေလႆႈၼွၼ်းလီ ပႂ်ႉလုမ်းလႃးတူၺ်းထိုင်ၼွင်ႉၸၢႆးမၼ်းတင်းၶိုၼ်းယဝ်ႉ။
