သၢႆတႃလႄႈလွင်ႈႁဵတ်းသၢင်ႈၼၼ်ႉ ဢမ်ႇလၢတ်ႈၼႄပၼ်သိုဝ်ႈသိုဝ်ႈၵေႃႈ မၼ်းသိုဝ်ႇဢွၵ်ႇမႃးၼႄလႆႈၸႅင်ႈလႅင်းလီၼႃႇ ထိုင်တီႈပီႈဢၢႆႈမၼ်း ပေႃးၾၢင်ႉႁၼ်မႅၼ်ႈသေ ႁွင်ႉမႃးဢုပ်ႇၸွမ်းယဝ်ႉ။
“လႆႈၸႂ်ငိုၼ်းသႅင်ႁႃႉ” ၵႂၢမ်းၶေႃႈၼႆႉ ႁဵတ်းႁႂ်ႈမၼ်းသမ်ႉပေႃးဢမ်ႇႁတ်းႁူပ်ႉသၢႆတႃတေႃႇၼႃႈၸူးပီႈဢၢႆႈမၼ်းယူႇ။
“ၸဵမ်မိူဝ်ႈလႂ်..”
မၼ်းၵေႃႈၵူမ်ႈၼႃႈသေထွမ်ႇယူႇၵူၺ်း ဢမ်ႇတွပ်ႇသင်ၶိုၼ်း
“ႁူႉယူႇဢမ်ႇၸႂ်ႈႁႃႉ..ၶူးလႄႈလုၵ်ႈႁဵၼ်းၼႆ”
“ႁူႉယူႇၶႃႈ”
“ႁူႉယဝ်ႉၵေႃႈလီ ဝူၼ်ႉဝႃႈမႂ်းတေမေႃၸတ်းၵၢၼ်ယူႇ”
“ဢေႃႈ”
သီၼႃႈသႅင်ပိုၼ်းၼၼ်ႉႁိုဝ်တေလီလႆႈ ၸႂ်ၵေႃႈဢမ်ႇသိူဝ်းယဝ်ႉလေႃႇ။
ငိုၼ်းသႅင်တႄႉၵေႃႈ ဝၢႆးသေမႄႈၽၢတ်ႇယၢၼ်ဢွၵ်ႇၵႂႃႇၼၼ်ႉ မီးသႅင်ပိုၼ်းပဵၼ်ၵေႃႉလႄႈ ပဵၼ်တီႈယူတ်းယႃၸႂ်ပၼ်မၼ်းသေဢမ်ႇၵႃး ႁဵတ်းႁႂ်ႈမၼ်းပေႃးလိုမ်းတၢင်းတုၵ်ႉၵူႈလွင်ႈယဝ်ႉ မိူဝ်ႈလႆႈယူႇႁိမ်းၸမ်သေ လႆႈႁၼ်ၵၼ်ၸိူင်ႉၼၼ်ၵူၺ်းၵေႃႈ သမ်ႉပေႃးၾၼ်ဝၢၼ်ၼႃႇယဝ်ႉ။
ယၢမ်းၵၢင်ၼႂ်ၸဵမ်ၸဝ်ႉ ငိုၼ်းသႅင်ၵေႃႈ မႃးပႂ်ႉဝႆႉယူႇတီႈႁူမ်ႈမႆႉၼၼ်ႉယဝ်ႉ၊ ၵူႈဝၼ်းတႄႉ ပေႃးဝႃႈလႆႈငိၼ်းသဵင်ႁိင်ႇငိုၼ်းသႅင်ၵမ်းၼိုင်ႈၵူၺ်းၵေႃႈ ၽၵ်းတူႁူးလႅင်းတၢင်းၼိူဝ်ၼၼ်ႉမီးၵူၼ်းငွၵ်ႈဢွၵ်ႇမႃးယဝ်ႉ၊ ၵူၺ်းၵႃႈ ဝၼ်းမိူဝ်ႈၼႆႉ ဢမ်ႇလႆႈႁၼ်ၽၵ်းတူပိုတ်ႇသေဢမ်ႇၵႃး ယဵၼ်သီႇသီႇဝႆႉ။ ပႂ်ႉတၢၼ်ႇႁိုဝ်ၵေႃႈ ဢမ်ႇမီးသဵင်သင်တုမ်ႉတွပ်ႇၶိုၼ်း သမ်ႉပေႃးလႃႈႁႅင်းၼႃႇယဝ်ႉ ၵူဝ်တူၵ်းလိုၼ်းၼႆသေ မၼ်းၵေႃႈႁိပ်ႈၼႅတ်ႈပၼ်ႇလႅင်ထိပ်ႇမၼ်းၵႂႃႇဝႆးဝႆးယဝ်ႉ၊ တင်းၵႂႃႇတင်းဝၢႆႇတူၺ်းၽၢႆႇလင် လိုမ်းတူၺ်းတၢင်းၼႃႈသေ ၵႂႃႇၽႃႇၺႃးမႃၼႂ်းၵၢင်တၢင်းၼၼ်ႉယဝ်ႉ ၵိုင်ႉၵၢင်ႉၼႅတ်ႈဢဝ်ပလိၵ်ႈသေ မၼ်းလႄႈတင်းလႅင်ထိပ်ႇလူမ်ႉလူင်းၵႂႃႇၸွမ်းၵၼ်ယဝ်ႉၼႃႇ။
မိူၼ်ၶႂ်ႈဢိုတ်ႇႁႆႈမႃးယူႇဢိူဝ်ႈ ၵူၺ်းၵႃႈဢမ်ႇၸၢင်ႈႁဵတ်းႁိုဝ် ၸိုၼ်ႇလုၵ်ႉသေ ဢီးလႅင်ထိပ်ႇမၼ်းၵႂႃႇလွႆးလွႆးၵူၺ်းယဝ်ႉ ယွၼ်ႉပိူဝ်ႈ သၢႆလႅၼ်ႈမၼ်းၵေႃႈလႆႈၶၢတ်ႇၵႂႃႇယဝ်ႉလူး။ လိူဝ်သေတူၵ်းလိုၼ်းၶဝ်ႈထႅဝ်ယဝ်ႉ သမ်ႉပၢႆတူၵ်းလိုၼ်းႁူင်းႁဵၼ်းထႅင်ႈႁေၵွၼ်ႇ။ ႁွတ်ႈၵႂႃႇၼႂ်းႁွင်ႈ မႅၼ်ႈၽွင်းသႅင်ပိုၼ်းတိုၵ်ႉသွၼ်လိၵ်ႈယူႇလႄႈ လႆႈႁၼ်သိူဝ်ႈၶူဝ်းမၼ်းပေႃးၵူဝ်ႈၼုၵ်းၵူမ်ႇဝႆႉဢိတ်းဢိတ်းသေ ယၵ်ႉတူၺ်းယဝ်ႉ ဢမ်ႇထၢမ်သင်ၶိုၼ်း။ ငိုၼ်းသႅင်ၵေႃႈၵႂႃႇၼင်ႈတီႈၼင်ႈမၼ်းယဝ်ႉ
“လူမ်ႉမႃးႁႃႉ” ၶိူဝ်းႁွမ်ထၢမ်ၸူးမၼ်း မၼ်းၵေႃႈငွၵ်းႁူဝ်ၼႄၵႂႃႇယဝ်ႉ ၼင်ႈၸိူဝ်ႈယၵ်ႉတူၺ်းသႅင်ပိုၼ်းယူႇၸိူင်ႉၼၼ် ၼင်ႇဝႃႈမီးၶေႃႈထၢမ်ၶႂ်ႈထၢမ်တင်းၼမ်ၼၼ်ႉယူႇ။
ၶၢဝ်းယၢမ်းမူတ်းသဵင်ႈၵႂႃႇ မၼ်းၵေႃႈၼႅတ်ႈဢွၵ်ႇႁွင်ႈၵႂႃႇပႅတ်ႈၵမ်းလဵဝ်ယဝ်ႉ၊ ငိုၼ်းသႅင်ဢၢင်ႈလမ်းၸွမ်းထၢမ်ၵူၺ်းပေႃးဢမ်ႇတၼ်းၶိုတ်း။ ငိုၼ်းသႅင်ၵေႃႈ တူၵ်းလိုၼ်းႁူင်းႁဵၼ်းလႄႈ ၶူးၵုမ်းၸၼ်ႉႁွင်ႉၵႂႃႇထူပ်းၼႂ်းႁွင်ႈလုမ်း ဢၼ်မီးပႃးသႅင်ပိုၼ်း ၼင်ႈဝႆႉယူႇၼၼ်ႉယဝ်ႉ။
“ၵွပ်ႈသင်လႄႈမႃးတူၵ်းလိုၼ်း”
သၢႆတႃငိုၼ်းသႅင်ၼၼ်ႉတႄႉ လွမ်မုင်ႈယၵ်ႉတူၺ်းၵႂႃႇၸူးသႅင်ပိုၼ်း ဢၼ်တိုၵ်ႉၵူမ်ႈၼႃႈသေ ထတ်းလိၵ်ႈတူၺ်းလိၵ်ႈယူႇၼၼ်ႉၵူၺ်း။ မၼ်းပႆႇတွပ်ႇသင်ၶိုၼ်းလႄႈ ၶူးမႄးသိုပ်ႇထၢမ်
“ဢမ်ႇမီးလွင်ႈတၢင်းသင်ႁႃႉ”
“ဢမ်ႇမီးၶႃႈ”
“ပေႃးၼၼ်ဝၢႆးလူင်းႁူင်းႁဵၼ်း ၵဵပ်းယုၵ်းယၵ်းၼႂ်းပၢင်ႇႁူင်းႁဵၼ်းႁႂ်ႈယဝ်ႉသေၸင်ႇမိူဝ်း မိူဝ်ႈၽုၵ်ႈမႃး ယႃႇႁႂ်ႈၶူးလႆႈႁၼ်ယုၵ်းယၵ်းသေဢၼ်”
“ဢေႃႈ”
“ၵႂႃႇလႆႈယဝ်ႉ”
သမ်ႉဝႃႈဢွၵ်ႇၵႂႃႇယဝ်ႉသေတႃႉ ၼႃႈလႄႈသၢႆတႃမၼ်းၼၼ်ႉတႄႉ ယင်းတိုၵ်ႉဝိၼ်ႇဝၢႆႇယၵ်ႉတူၺ်းယူႇတီႈသႅင်ပိုၼ်းၼၼ်ႉ ပႆႇၶႂ်ႈၽၢတ်ႇလႆႈ။
“ၶူးႁွင်ႉၵႂႃႇႁဵတ်းႁင်လႃႇ”
“ႁွင်ႉၵႂႃႇပၼ်တၢမ်ႇၵူၺ်းဢိူဝ်ႈ”
“ၺႃးၵဵပ်းယုၵ်းယၵ်းထႅင်ႈယဝ်ႉၵႃႈထၢင်ႇ”
“ၸႂ်ႈယဝ်ႉ” ၼိမ်ယဵၼ်လူင်ၵႂႃႇ ဢမ်ႇတၵ်းသဵင်သင်ထႅင်ႈယဝ်ႉ။
“မိူဝ်ႈၼႆႉလူမ်းဢမ်ႇလီၸွင်ႇၸႂ်ႈ”
“ဢိုမ်ႈ..”
“ၵႂႃႇႁဝ်းၵႂႃႇ”
ၶိူဝ်းႁွမ်ၵေႃႈ ၵွင်ႉဢဝ်ၶႅၼ်မၼ်းၵႂႃႇတၢင်းသႅင်ႇႁူင်းႁဵၼ်းၼၼ်ႉသေ သိုဝ်ႉၶဝ်ႈမုၼ်းမႃးတင်းၼမ် ဢၼ်ဢမ်ႇလွတ်ႈၼၼ်ႉတႄႉ ၶဝ်ႈသွႆးဢေႃႇတေႃႇႁႅင်ႈ ပေႃးတေၵိၼ်ၼႆၵေႃႈ ၼူတ်ႈႁႂ်ႈလႅဝ်လႅဝ်သေယဝ်ႉ သိၵ်ႇထူင်ႁႂ်ႈမၼ်းၵႂၢင်ႈၵႂၢင်ႈ သိူဝ်ႇသႂ်ႇၼိူဝ်ၽိူၼ်သေ ဢဝ်ၶဝ်ႈမုၼ်းၶွပ်ႈၶႅပ်ႈၼၼ်ႉ မႃးသႂ်ႇ ၸူဝ်းၵၼ်ၵိၼ် ႁုပ်ႈႁိပ်ႈႁုပ်ႈႁၢပ်ႈၵမ်ႉၵူၺ်းမူတ်းယဝ်ႉ။
ထိုင်ၶိင်ႇၶိုၼ်ႈႁူင်းႁဵၼ်းယဝ်ႉ မၼ်းၵေႃႈထူၵ်းပပ်ႉဢွၵ်ႇမႃးတႂ်ႈၽိူၼ်ၼၼ်ႉ လႆႈႁၼ်ယႃဝႆႉလႄႈ
“ၶွင်ၽႂ်ၼႆႉ”
“ဢမ်ႇႁူႉၼႃ ဢမ်ႇၸႂ်ႈၶွင်သူႁႃႉ”
“ဢမ်ႇၸႂ်ႈ..” ငိုၼ်းသႅင်ဝူၼ်ႉမိုင်ၵႂႃႇၵႅပ်ႉၼိုင်ႈသေ “ၵေႃႈယဝ်ႉလႄႈ” ၸင်ႇဝူတ်ႈၶႃၵူၼ်မၼ်းၶိုၼ်ႈယဝ်ႉ လႆႈႁၼ်ႁွႆးလွၵ်ႈဝႆႉယူႇတီႈၶႃမၼ်းၼၼ်ႉလႄႈ ဢဝ်မႃးတႃးဝႆႉယူႇ။ မၼ်းၵေႃႈၶေးတေဢမ်ႇႁူႉဝႃႈ မီးၵူၼ်းယူႇဝႆႉတီႈႁူးလႅင်းၼၼ်ႉၶျွင်းတူၺ်းယူႇ။
ၶိူဝ်းႁွမ်လႆႈႁၼ်ဢူၺ်းၵေႃႉမၼ်းၶႃၸဵပ်းၼင်ႇၼၼ်ၵေႃႈ “ႁႅင်ႉသူဢမ်ႇလၢတ်ႈတီႈၶူးလႃႇ လူမ်ႉလႄႈမႃးတူၵ်းလိုၼ်းၼႆ”
“ဢမ်ႇပဵၼ်ႁင်လေႃႇၼႃႈ ႁဝ်းၵေႃႈလႆႈၸႂ်ၵဵပ်းယုၵ်းယၵ်းမိူၼ်ၵၼ်”
“ယွင်ႇၵႂႃႇယဝ်ႉၼႄႇ”
“မိူၼ်လႆႈႁဵတ်းလွင်ႈလီဢၼ်ၼိုင်ႈၼၼ်ႉၼႃႇ” ၼိမ်ယဵၼ်ၵႅပ်ႉၼိုင်ႈယဝ်ႉ “ၵူၼ်းၵေႃႉၼိုင်ႈလၢတ်ႈၸိူင်ႉၼႆ”
“ၽႂ်လႃႇ ဢူႈသူႁႃႉ”
ၶူးၵေႃႈၶဝ်ႈႁွင်ႈႁဵၼ်းမႃးသေ ၽွင်းၶၢဝ်းလိုဝ်ႈၵိၼ်ၶဝ်ႈဝၼ်းၼၼ်ႉ ငိုၼ်းသႅင်လႆႈမႃးႁူပ်ႉတေႃႇၼႃႈၵၼ်တင်း သႅင်ပိုၼ်းလႄႈ မၼ်းၵေႃႈယုမ်ႉၸူးယဝ်ႉ ၵူၺ်းၵႃႈ မိူၼ်ဝႃႈသႅင်ပိုၼ်းတင်ႈၸႂ်ဢမ်ႇႁၼ်သေ ပူၼ်ႉၽႅတ်ႈၵႂႃႇပႅတ်ႈ။ လွင်ႈႁဵတ်းသၢင်ႈသႅင်ပိုၼ်းၼၼ်ႉ ဢဝ်ငိုၼ်းသႅင်ဝူၼ်ႉၵႂင်ၸွမ်း သမ်ႉပေႃးဢမ်ႇမီးသမ်ႇမထိႁဵၼ်းလိၵ်ႈလႆႈယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ
