ယၢမ်းၵၢင်ၼႂ် လုင်းပိူင်းၵေႃႈ ၸူဝ်းဢွၼ်ဢဝ်ၸွမ်သႅင်လႄႇၼႂ်းသူၼ်ၼၼ်ႉသေ ငိုၼ်းသႅင်ၵေႃႈၸွႆႈမႄႈပႃႈႁႅၼ်းၶဝ်ႈၽၵ်းယူႇၼႂ်းသွင်ႇၾႆးၼၼ်ႉယဝ်ႉ။
“ၽွင်းၼႆႉၵၢၼ်ၽုၵ်ႇၵၢၼ်သွမ်ႈၸိူဝ်းၼႆႉ ၸွင်ႇမီးတၢင်းယၢပ်ႇသင်ၵွၼ်ႇၶႃႈၼႄႇ”
“ပေႃးဝႃႈလွင်ႈယၢပ်ႇတႄႉၶႂ်ႈဝႃႈၵူႈမဵဝ်းယဝ်ႉ ဢမ်ႇဝႃႈၾုၼ်ႇၸိူဝ်းၼႆႉ ဢၼ်ႁဝ်းမီးမၼ်းဢမ်ႇၵုမ်ႇ လႆႈသိုဝ်ႉတၢင်းၼွၵ်ႈထႅင်ႈၶႃႈဢိူဝ်ႈ၊ ၶၢဝ်းၼႆႉသမ်ႉ မႅင်းၵေႃႈလိူင်ႇ ပေႃးဢမ်ႇသိတ်းယႃၵေႃႈမႅင်းတွမ် သမ်ႉဢမ်ႇၶႂ်ႈၸႂ်ႉသၢၼ်ၶေးမီးလႄႈ ႁဵတ်းဢဝ်ဢၼ်သၽႃႇဝၼၼ်ႉၶႃႈၼႃႇ ဝႃႈၼႆၵေႃႈသမ်ႉလႆႈသဵင်ႈၵႃႈယူႇ လႆႈၵမ်းၵမ်းသိတ်းပၼ်ၼၼ်ႉၶႃႈယိုင်”
“လႆႈႁၼ်ၽၵ်းၼႂ်းသူၼ်ၼဝ်ႈၼမ်ၵျႃႉၶႃႈလူးၼၼ်ႉ မီးပၼ်ႁႃၸိူင်ႉႁိုဝ်ဢမ်ႇႁူႉၶႃႈ”
“မိူဝ်ႈဝူင်ႈပူၼ်ႉၼႆႉ လူမ်းပတ်ႉဢဝ်သုမ်ႉမၼ်းပိဝ်ၵႂႃႇႁေလႄႈ ၸင်ႇႁႃမႄးယဝ်ႉမိူဝ်ႈသွင်သၢမ်ဝၼ်းၼႆႉမႃးၵူၺ်း”
ၶဝ်ႈၽၵ်းသုၵ်းယဝ်ႉၼႆၵေႃႈ ဢွၼ်ၵိၼ်ၶဝ်ႈၵိၼ်သင်သေ မႃးတႄႇဢုပ်ႇၼႃႈၵၢၼ်ၵၼ်ၵႂႃႇ။
“ပေႃးဝႃႈတေႁႂ်ႈလုင်းႁဝ်းၶဝ် သူင်ႇၽၵ်းပၼ်ႁဝ်းၼႆႉ တေမီးလွင်ႈယၢပ်ႇၸိူင်ႉႁိုဝ်ဢမ်ႇႁူႉၶႃႈ”
လုင်းပိူင်းၵေႃႈ ၼိမ်ယဵၼ်ၵႂႃႇ ယူဝ်ဝႃႈ ၸွမ်သႅင်တေဢမ်ႇႁပ်ႉၽၵ်းၼႂ်းသူၼ်ထႅင်ႈယဝ်ႉမႆႈၸႂ်ယူႇ၊ ၵူၺ်းၵႃႈ မိူဝ်ႈထၢမ်မႃးၸိူင်ႉၼႆ လွင်ႈဢၼ်ၶမ်ၸႂ်ဝႆႉယူႇၼၼ်ႉၵေႃႈ ပိုတ်ႇမႃးယဝ်ႉ။
“တီႈတေႉ ဢၼ်သူင်ႇၵႂႃႇမိူဝ်ႈဝႃးၼၼ်ႉ ပဵၼ်တီႈၼႆႈၵူၺ်းၶႃႈ ၵၼ်ႇတေႃးတေႉဢေႃႈ ဢၼ်လႆႈလႅၼ်လၢတ်ႈၵႂႃႇၸိူင်ႉၼၼ် လၢၼ်သၢင်ႇၵေႃႈတေႁၼ်ယူႇ ၽၵ်းၼႂ်းသူၼ်မၼ်းပဵၼ်ၸိူင်ႉႁိုဝ်ဝႆႉၼႆ”
“ဢမ်ႇၸႂ်ႈဝႃႈပဵၼ်ဢၼ်ၼဝ်ႈၵူႈမဵဝ်းၶႃႈလူး ႁဝ်းၵေႃႈသိုဝ်ႉၶၢႆၵၼ်မႃးႁိုင် ယဝ်ႉၵေႃႈ လုင်းႁဝ်းၵေႃႈသူင်ႇပၼ်ႁဝ်းယူႇတႃႇသေႇ လိူဝ်သေဢၼ်ၼဝ်ႈၵႂႃႇၸိူဝ်းၼၼ်ႉယဝ်ႉ တင်းမီးထႅင်ႈယူႇဢမ်ႇၸႂ်ႈၶႃႈႁိုဝ်၊ ပဵၼ်လႆႈၵႃႈႁိုဝ်ၵေႃႈ ဢမ်ႇပဵၼ်သင်ၶႃႈ”
“ႁဵတ်းၼၼ်ႁႃႉ ၸူမ်းယဝ်ႉၼႃႈ လၢၼ်ဢိူဝ်ႉ”
“ပေႃးဝႃႈ မီးဢၼ်လႂ်ဢမ်ႇၸၢင်ႈသူင်ႇပၼ်ႁဝ်းလႆႈၼႆၵေႃႈ ပွင်ႇပၼ်လူင်ႈၼႃႈၵေႃႈလႆႈၶႃႈ သင်မီးတၢင်ႇဢၼ်ၽုၵ်ႇၶႅမ်ႉလိူဝ်ၽၵ်းဢၼ်ႁဝ်းၵႆႉဢဝ်ၼၼ်ႉၵေႃႈ ၼႄႉၼမ်းပၼ်တၢင်းႁဝ်းလႆႈယူႇ ၵပ်းသိုပ်ႇတီႈၽူႈမၢႆၵေႃႈလႆႈ”
“ၸူမ်းယဝ်ႉ ၸူမ်းယဝ်ႉလၢၼ်ဢိူဝ်ႉ လုင်းၵေႃႈၵၼ်ႇတေႃးယွမ်းၼွမ်းတေႉတေႉဢိူဝ်ႈ”
“ဢမ်ႇပဵၼ်သင်ၶႃႈ ၶႃႈပွင်ႇၸႂ်လီယူႇ”
မိူဝ်ႈမိူဝ်းၵႂႃႇၸွမ်းတၢင်းၼၼ်ႉ ငိုၼ်းသႅင်ၵေႃႈ ယၵ်ႉတူၺ်းၸွမ်သႅင်သေ ၼင်ႇဝႃႈပဵၼ်ထႅင်ႈၵေႃႉၼိုင်ႈယဝ်ႉ။
“ႁဵတ်းႁိုဝ်ႁူႉၶႃႈဝႃႈ ပဵၼ်ၽၵ်းတီႈသူၼ်ၵူၺ်း”
“မိူဝ်ႈၵႂႃႇလႄႇတီႈသူၼ်”
“ယူဝ်ဝႃႈတေဢမ်ႇဢဝ်ၽၵ်းလုင်းယဝ်ႉ ယွၼ်ႉသင်ၶႃႈလႃႇ”
“လွင်ႈဝႆႉဝၢင်းၸႂ်”
“ၸိူင်ႉႁိုဝ်ၶႃႈ”
“ႁဝ်းဢမ်ႇလႆႈၸႂ် ၽိတ်းၵၼ်တင်းၽႂ် လၢတ်ႈလွင်ႈလီလႆႈၵေႃႈလီ လၢတ်ႈလီဢမ်ႇလႆႈၵေႃႈ ႁဝ်းတေဢမ်ႇဢဝ် မွၵ်ႈၼၼ်ႉ”
ငိုၼ်းသႅင်ဢမ်ႇလၢတ်ႈတေႃႇမၼ်းထႅင်ႈယဝ်ႉ သိုပ်ႇမုင်ႈၼႃႈႁေႃႈၵႃးၵႂႃႇ မိူဝ်ႈၶဝ်ႈမိူဝ်းၵႂႃႇၼႂ်းဝဵင်းယဝ်ႉၼၼ်ႉ တီႈႁူင်းယႃသိုပ်ႇၾူၼ်းမႃး ဢူႈမၼ်းပဵၼ်ႁႅင်းၼႃႇဝႆႉၼႆသေ ၼႅတ်ႈဝိၼ်ႇႁူဝ်ၵႃးမၼ်းၵႂႃႇတၢင်းႁူင်းယႃၼၼ်ႉၵမ်းလဵဝ်။
“သူတေၵႂႃႇလႂ်လႃႇ” ၸွမ်သႅင်ထၢမ်ၵေႃႈဢမ်ႇတွပ်ႇ။
ငိုၼ်းသႅင်ၵူၺ်းၵုမ်ႇႁေႃႈၵႃး ဢမ်ႇတၼ်းထွမ်ႇသဵင်ၽႂ်။
ႁွတ်ႈၵႂႃႇတီႈႁူင်းယႃယဝ်ႉၵေႃႈ ၵိုတ်းၵႃးမၼ်းသေ ၼႅတ်ႈၵႂႃႇတၢင်းႁွင်ႈယူတ်းယႃၵူၼ်းပဵၼ်ၼၼ်ႉၵမ်းလဵဝ် လႆႈႁၼ်ပေႃႈၽႅၼ်ယႃမူၵ်ႇလူင်ဝႆႉသေလပ်းယူႇ။
“ပေႃႈပဵၼ်ၸိူင်ႉႁိုဝ်ၶႃႈမေႃယႃ”
“တၢင်းပဵၼ်မၼ်းႁၢႆႉႁႅင်းမႃးၼႃႇတေႉယဝ်ႉ” ပေႃးယဝ်ႉ ႁဝ်းယွၼ်းထူပ်းၵမ်ႉၼိုင်ႈၶႃႈၼႃႈ။
“ဢေႃႈၶႃႈ”
ၸွမ်သႅင်ၵေႃႈလမ်းမႃးၸွမ်းသေ ယူႇၵႆၵႆၸုၵ်းတူၺ်းၵူၺ်း၊ မိူဝ်ႈပေႃႈမိုၼ်းတႃမႃးႁၼ်ငိုၼ်းသႅင်ၼႆၵေႃႈ
“လုၵ်ႈ..”
ၼမ်ႉတႃဢၼ်ယၵ်ႉတူၺ်းပေႃႈယူႇၼၼ်ႉ လႆဢွၵ်ႇမႃး ပႃးတင်းသဵင်သၼ်ႇသၼ်ႇ
“ပေႃႈ…ယိင်းဢမ်ႇၶႂ်ႈယူႇလူၺ်ႈဢမ်ႇမီးပေႃႈၼႃ”
“လုၵ်ႈယိင်းပေႃႈ မိူဝ်ႈလႂ်တေၵေႃႉယႂ်ႇလႃႇ”
ငိုၼ်းသႅင်ၵွတ်ႇဢဝ်ပေႃႈၶဝ်သေ ၸွမ်သႅင်ၵေႃႈၶဝ်ႈမႃးၸမ် ဢၢင်ႈမႃးတူင်ႉတၵ်ႉယဝ်ႉ။ ငိုၼ်းသႅင်လႆႈႁၼ်ၼႆၵေႃႈ ၼႅတ်ႈလုၵ်ႉလၢၵ်ႈဢဝ်ၶႅၼ်မၼ်းမႃးၸူးပေႃႈၶဝ်
“မႃးယဝ်ႉႁႃႉ..ၼႆႉပေႃႈၵေႃႉႁၵ်ႉယိင်း”
ပေႃႈၶဝ်ယၵ်ႉတူၺ်းႁူဝ်တေႃႇတိၼ်သေ သၢႆတႃၸွမ်သႅင်ဢၼ်ယၵ်ႉတူၺ်းငိုၼ်းသႅင်ၼင်ႇဢမ်ႇႁူႉႁူဝ်ႁူႉႁၢင်ယူႇၼၼ်ႉၵေႃႈ ဢၢင်ႈထဵင်ၵႂႃႇၶိုၼ်းယဝ်ႉ ငိုၼ်းသႅင်ၼႅတ်ႈလၢတ်ႈတႅၼ်း
“ပေႃႈ..ၽႃႇတတ်းလႄႈ သင်ၶႂ်ႈႁႂ်ႈယိင်းႁဵတ်းၶႅၵ်ႇယူႇၵေႃႈ”
သဵင်ဢႆပေႃႈၶဝ် ဢႁူၵ်ႉ!! ႁူၵ်ႉ!!
“ၸၢႆးဢသၢၵ်ႈၵႃႈႁိုဝ်ယဝ်ႉ”
“သၢမ်သိပ်းသွင်ယဝ်ႉၶႃႈ”
“ယၢမ်ႈမီးၼႃႈႁိူၼ်းယူႇႁႃႉ..”
“ပႆႇမီးၶႃႈ..”
“ႁဵတ်းႁိုဝ်ႁူႉၸၵ်းၵၼ်တင်းလုၵ်ႈယိင်းလုင်းလႃႇ”
“တီႈႁဵတ်းၵၢၼ်ဢေႃႈ ယဝ်ႉၵေႃႈၶႃႈဢမ်ႇၸႂ်ႈ..”
ငိုၼ်းသႅင်ၼႅတ်ႈလၢတ်ႈတၢင်ၵႂႃႇ “ၶဝ်ပဵၼ်ႁူဝ်ၼႃႈယိင်း ဢၼ်တိုၵ်ႉမႃးႁဵတ်းၵၢၼ်လႆႈဢမ်ႇႁိုင်ၼႆႉၵူၺ်း ယိင်းလၢတ်ႈယူႇဢမ်ႇၸႂ်ႈႁိုဝ်လႃႇဝႃႈ မီးႁူဝ်ၼႃႈမႂ်ႇၼႆ” သၢႆတႃငိုၼ်းသႅင်ယၵ်ႉတူၺ်းၸူး ၸွမ်သႅင်သေယဝ်ႉ “ယိင်းဝႃႈယိင်းႁၵ်ႉမႅၼ်ႈၶဝ်ၸဵမ်မိူဝ်ႈတႄႇႁၼ်ယဝ်ႉဢေႃႈ ယဝ်ႉၵေႃႈၶဝ်ၸႂ်လီတေႃႇယိင်းတေႉယဝ်ႉ ယူႇၸွမ်းၶဝ်ယဝ်ႉ မၼ်းဢုၼ်ႇၸႂ်လီတေႉယဝ်ႉဝႃႈ”
ပေႃႈၶဝ်ယဵၼ်ၵႂႃႇသေ ယၵ်ႉတူၺ်းၸွမ်သႅင်ယဝ်ႉ “ၸၢႆးလူး ႁၼ်ဝႃႈလုၵ်ႈယိင်းလုင်းပဵၼ်ၸိူင်ႉႁိုဝ်လႃႇ”
ငိုၼ်းသႅင်ယၵ်ႉတူၺ်းလူၺ်ႈသၢႆတႃဢွၼ်ႈဝွၼ်းဝႆႉယူႇ ၸွမ်သႅင်ယၵ်ႉတူၺ်းငိုၼ်းသႅင်ၼင်ႇၵူၼ်းဢွင်ႇပေႉဝႆႉယူႇ။
သိုပ်ႇလူဢၢၼ်ႇထႅင်ႈတွၼ်ႈတေမႃးၶႃႈ
