ယွၼ်ႉပိူဝ်ႈ ဝၢၼ်ႈမိူင်းဢမ်ႇၵတ်းယဵၼ်
ယွၼ်ႉပိူဝ်ႈ ယၢမ်ႈၺႃးပိူၼ်ႈတဵၵ်းတဵင်ႁဝ်းမႃးလႄႈဢမ်ႇၶႂ်ႈၶၢမ်ႇထႅင်ႈယဝ်ႉ
ယွၼ်ႉပိူဝ်ႈ ႁၵ်ႉလုၵ်ႈႁဝ်းဢိူဝ်ႈဢမ်ႇၶႂ်ႈႁႂ်ႈၶဝ်လႆႈတုၵ်ႉၶမိူၼ်ႁဝ်း
ယွၼ်ႉပိူဝ်ႈ ဢိမ်ႇၸၢၼ်ႈၵၢၼ်တိုၵ်းၽၼ်းၵၼ်ၼႃႇတေႉယဝ်ႉ
ယွၼ်ႉပိူဝ်ႈ ၼႃႈႁိူၼ်းႁဝ်းဢမ်ႇတဵမ်ထူၼ်ႈလူး
မၼ်းမီးလွင်ႈတၢင်းတင်းၼမ် တႃႇတေပၢႆႈ၊ မိူဝ်ႈပၢႆႈၽၢတ်ႇဢွၵ်ႇယၢၼ်ၵႂႃႇ ယူႇမိူင်းပိူၼ်ႈသေ လၢတ်ႈဝႃႈႁဝ်းပဵၼ်ၵူၼ်းဢမ်ႇမီးမိူင်းၼႆၼၼ်ႉ လီၸႂ်လဵၵ်ႉယူႇဢိူဝ်ႈသင်ၼင်လိၼ်မီးၸႂ်ယူႇတႄႉ။
ပၢႆႈၵႂႃႇယူႇမိူင်းပိူၼ်ႈ တူဝ်ႁဝ်းဢမ်ႇၸႂ်ႈပိူၼ်ႈ ၵူၺ်းၵႃႈ လုၵ်ႈႁဝ်းတႄႉၵိူတ်ႇမိူင်းပိူၼ်ႈ၊ ယူႇၵိၼ်မိူင်းပိူၼ်ႈ၊ ယႂ်ႇၼႂ်းမိူင်းပိူၼ်ႈ၊ ႁဵၼ်းႁူင်းႁဵၼ်းပိူၼ်ႈ မေႃလိၵ်ႈပိူၼ်ႈ ႁူႉၵႂၢမ်းပိူၼ်ႈ ႁူႉပိုၼ်းပိူၼ်ႈ ပဵၼ်ၵူၼ်းၵတ်ႉၶႅၼ်ႇလႅၼ်ႇၽၢႆၼႃႇၵေႃႈ ၸွင်ႇတေမၼ်းႁူႉၸၵ်းယူႇႁႃႉ ဝၢၼ်ႈမိူင်းႁဝ်းပဵၼ်ၸိူင်ႉႁိုဝ်။
မၢင်ၸိူဝ်းဢူႈမႄႈၸိူဝ်ႉၶိူဝ်းပဵၼ်တႆးယူႇသေတႃႉၵေႃႈ လုၵ်ႈတေႉဢမ်ႇမေႃလၢတ်ႈၵႂၢမ်းတႆးယဝ်ႉ။ မိူင်းတႆးဢၼ်ဝႃႈၼၼ်ႉၵေႃႈ ဢမ်ႇႁူႉၸၵ်းလႄႈ သမ်ႉဝႃႈႁွတ်ႈထိုင်ယူႇသေတႃႉၵေႃႈ ဢမ်ႇၶႂ်ႈယူႇယဝ်ႉ။
တွၼ်ႈတႃႇၽဝလုၵ်ႈတေလီၼၼ်ႉ ပေႃႈမႄႈၵေႃႈၶႂ်ႈႁႂ်ႈလုၵ်ႈၵႂႃႇလႆႈၵႆ ၶႂ်ႈႁႂ်ႈမီးဝႂ်ၵိုၵ်းမိူင်းပိူၼ်ႈသေ မီးသုၼ်ႇႁဵတ်းလႆႈၼင်ႇပိူၼ်ႈမႃး။ သိုဝ်ႉႁိူၼ်းလႆႈ မီးတီႈယူႇတီႈၵိၼ် တင်ႈတူဝ်သၢင်ႈတူဝ်လႆႈ ၼႂ်းမိူင်းပိူၼ်ႈသေ ႁွင်ႉပေႃႈမႄႈပီႈၼွင်ႉၸိူဝ်ႉၶိူဝ်းမႃးယူႇ၊ မၢင်ၸိူဝ်းၵေႃႈ ဢမ်ႇဢၢၼ်းပွၵ်ႈၶိုၼ်းယဝ်ႉလႄႈ ၶၢႆတီႈလိၼ်သေ မၢင်ၸိူဝ်းၵေႃႈၶၢႆပၼ်ၵူၼ်းတၢင်ႇၶိူဝ်း၊ မၢင်ၸိူဝ်းသမ်ႉပႅတ်ႈသေၵႂႃႇ။
ႁိူၼ်းႁၢမ်း၊ ဝၢၼ်ႈႁၢမ်း၊ သူၼ်ႁႆႈၼႃးႁၢမ်း ပေႃးပဵၼ်ႁဝ်းၼင်ႇၵၼ် သမ်ႉဝႃႈႁင်းၵၼ်၊ ၵူၺ်းၵႃႈ ပေႃးၵူၼ်းတၢင်ႇၶိူဝ်းမႃးယူႇမႃးထင်သမ်ႉဢမ်ႇႁတ်းတၵ်းသဵင်။
ၵူၼ်းတၢင်ႇၸၢဝ်းၶိူဝ်းသမ်ႉ ဢမ်ႇပၢႆႈၵႂႃႇလႂ်လႄႈ ၽႄႈၸိူဝ်ႉၽႄႈၶိူဝ်းယူႇၽိုတ်ႉၵၼ်ၵႂႃႇ ၽိုတ်ႉၶဝ်ႈၸိမ်ၵမ်းဢိတ်းၵမ်းဢိတ်း ဢမ်ႇတၼ်းႁူႉတၼ်းႁၼ်ပိူၼ်ႈပေႃးမႃးဝႃႈပဵၼ်ၶွင်ပိူၼ်ႈယဝ်ႉၼႆၼႃႇ ၼႆႉမၼ်းပဵၼ်ၽေးလိူဝ်သေသဵင်မၢၵ်ႇၵွင်ႈၵွၼ်ႇႁိုဝ်။
မိူင်းပၼ်ႇ မိူဝ်ႈဢွၼ်တၢင်း ပဵၼ်ဝၢၼ်ႈမူၼ်းၵူၼ်းၵိုၼ်းတႄႉတႄႉ မိူဝ်ႈပၢၼ်တႅပ်းသီႇတႅပ်း 1997-1998 ဝၢၼ်ႈလႆႈႁၢမ်းပၢၵ်ႇပၢႆ ဝၢၼ်ႈတႆးဢၼ်ၶိုၼ်းတႄႇမီးလၢႆသိပ်း မၢင်ဝၢၼ်ႈလင်ႁိူၼ်းတင်းဢမ်ႇတဵမ်သိပ်း၊ ၵူၺ်းၵႃႈ ဝၢၼ်ႈပီႈၼွင်ႉပဢူဝ်းၶဝ် ၵူၼ်းၵိုၼ်းၶွၼ်ႈၼမ်တႄႉတႄႉ လိူဝ်သေၼၼ်ႉ တီႈလိၼ်ပဝ်ႇလိၼ်ႁၢမ်းၼႆၵေႃႈ ၶဝ်မႃးႁဵတ်းသူၼ်ႁဵတ်းၼႃးဝႆႉတင်းၼမ် လီယွင်ႈဢၢမ်းၼမ်ႉၸႂ်ၶဝ်တေႉယဝ်ႉ။ ပိူၼ်ႈမေႃၸွႆႈထႅမ်ၵၼ်ႁိုဝ်၊ ပိူၼ်ႈမေႃပူၵ်းပွင်ပၼ်ၵၼ်ႁိုဝ် ပိူၼ်ႈယူႇသဝ်းပဵၼ်ႁိုဝ်ဝႆႉ လႆႈၶႆႈၸႂ်လဵပ်ႈႁဵၼ်းတူၺ်းယူႇ။
ၵူၼ်းၶိူဝ်းမၢၼ်ႈၶဝ် မႃးႁဵတ်းတၢင်း မႃးႁဵတ်းသုမ်ႉတွပ်းသေယူႇၸွမ်းၽင်ႇတၢင်း၊ ယူႇႁိုင်ၵႂႃႇပဵၼ်ႁိူၼ်း ၼပ်ႉႁူဝ်ပီမၼ်းမႃးၵေႃႈ ပဵၼ်ဝၢၼ်ႈၶဝ်ၵႂႃႇယဝ်ႉ။
ႁဝ်းတႄႉ မီးဝၢၼ်ႈမီးမိူင်းယူႇၵေႃႈ ၶၢမ်ႇယၢပ်ႇယူႇမိူင်းပိူၼ်ႈၵူၺ်းသေ ၶႅၼ်းလိူဝ်လႆႈတုၵ်ႉၶယူႇမိူင်းႁဝ်း တေပဵၼ်ပၢင်တိုၵ်းမိူဝ်ႈလႂ်ဢမ်ႇႁူႉ လူႉမိူဝ်ႈလႂ်ဢမ်ႇႁူႉၼၼ်ႉယူႇၵူၺ်း။
သင်ဝႃႈႁဝ်းဢမ်ႇမီးၼင်လိၼ် ဢမ်ႇၸႂ်ႈယွၼ်ႉပိူၼ်ႈမႃးယိမ် ယွၼ်ႉႁဝ်းဢမ်ႇၶႂ်ႈလႆႈသေပႅတ်ႈပၼ်ပိူၼ်ႈမႃးဢဝ်ၵူၺ်း။
ယူႇၼိူဝ်လႅင်းသေယဝ်ႉ တဵၵ်းတႅမ်ႈဝႃႈ “ယိုဝ်းလႄႈတိုၵ်းလႄႈ” ၶိုၼ်ႈလႅင်းဝႆႉမိူင်းပိူၼ်ႈသေလၢတ်ႈယူႇ၊ ႁဝ်းတင်းဢမ်ႇႁူႉ ပိူၼ်ႈပေႃးတိုၵ်းယူႇယဝ်ႉလူး ဢမ်ႇႁူႉတူဝ်ၵွၼ်ႇဝႃႈ ႁဝ်းၵေႃႈတူၵ်းၶမ်ႁႅဝ်ႉမၼ်းဝႆႉယူႇယဝ်ႉၼႆ။
ၼႆႉတႄႉတၢင်းႁၼ်ထိုင်ၽူႈတႅမ်ႈလိၵ်ႈၵူၺ်း ဢမ်ႇၸႂ်ႈဝႃႈမၼ်းတေထုၵ်ႇမႅၼ်ႈၵူႈၶေႃႈ ယွၼ်ႉၽူႈဢွၼ်ႁူဝ်ၵမ်ႈၼမ်ၵေႃႈ ပိူၼ်ႈဢွၼ်ၵၼ်သူင်ႇလုၵ်ႈပိူၼ်ႈ ၵႂႃႇၼွၵ်ႈမိူင်းတင်းၼမ်ယူႇၵူၺ်း၊ ဢၼ်တေမႃးပူၵ်းပွင်ၼႂ်းတူင်ႇဝူင်းၶိုၼ်းၼႆၵေႃႈတေမီးယူႇၵႂႃႈ။
ၶူမ်ၽၢတ်ႇ
24/08/2026
